(1)

Ir-Regolament (UE) 2021/953 jistipula qafas għall-ħruġ, għall-verifika u għall-aċċettazzjoni ta’ ċertifikati COVID-19 interoperabbli tat-tilqim, tat-testijiet u tal-fejqan (“Ċertifikat COVID Diġitali tal-UE”) għall-fini tal-faċilitazzjoni tal-eżerċizzju mid-detenturi tad-dritt tagħhom għall-moviment liberu matul il-pandemija tal-COVID-19. Huwa għandu jikkontribwixxi wkoll għall-faċilitazzjoni tat-tneħħija gradwali tar-restrizzjonijiet għall-moviment liberu stabbiliti mill-Istati Membri, f’konformità mad-dritt tal-Unjoni, biex jiġi limitat it-tixrid tas-SARS-CoV-2, b’mod ikkoordinat.

(2)

Ir-Regolament (UE) 2021/953 jippermetti l-aċċettazzjoni taċ-ċertifikati COVID-19 maħruġa minn pajjiżi terzi liċ-ċittadini tal-Unjoni u lill-membri tal-familja tagħhom jekk il-Kummissjoni tikkonstata li dawk iċ-ċertifikati COVID-19 jinħarġu f’konformità ma’ standards li jitqiesu ekwivalenti għal dawk stabbiliti skont dak ir-Regolament. Barra minn hekk, f’konformità mar-Regolament (UE) 2021/954 tal-Parlament Ewropew u tal-Kunsill (2), l-Istati Membri għandhom japplikaw ir-regoli stipulati fir-Regolament (UE) 2021/953 għaċ-ċittadini ta’ pajjiżi terzi li ma jaqgħux fil-kamp ta’ applikazzjoni ta’ dak ir-Regolament, imma li jkunu qed joqogħdu jew jirrisjedu legalment fit-territorju tagħhom u li għandhom id-dritt li jivvjaġġaw lejn Stati Membri oħra f’konformità mad-dritt tal-Unjoni. Għaldaqstant, kwalunkwe sejba ta’ ekwivalenza ta’ din id-Deċiżjoni jenħtieġ li tapplika għaċ-ċertifikati COVID-19 tat-tilqim u tat-testijiet maħruġa mir-Repubblika ta’ Singapore liċ-ċittadini tal-Unjoni u lill-membri tal-familja tagħhom. B’mod simili, abbażi tar-Regolament (UE) 2021/954, jenħtieġ li tali sejbiet ta’ ekwivalenza japplikaw ukoll għaċ-ċertifikati COVID-19 tat-tilqim u tat-testijiet maħruġa mir-Repubblika ta’ Singapore liċ-ċittadini ta’ pajjiżi terzi li jkunu qed joqogħdu jew jirrisjedu legalment fit-territorju tal-Istati Membri bil-kundizzjonijiet stabbiliti f’dak ir-Regolament.

(3)

Fis-26 ta’ Lulju 2021, ir-Repubblika ta’ Singapore pprovdiet lill-Kummissjoni b’informazzjoni dettaljata dwar il-ħruġ ta’ ċertifikati COVID-19 interoperabbli tat-tilqim u tat-testijiet skont is-sistema intitolata "HealthCerts". Ir-Repubblika ta’ Singapore infurmat lill-Kummissjoni li hija tqis li ċ-ċertifikati COVID-19 tagħha qed jinħarġu f’konformità ma’ sistema standard u teknoloġika li jkunu interoperabbli mal-qafas ta’ fiduċja stabbilit bir-Regolament (UE) 2021/953 u jippermettu l-verifika tal-awtentiċità, tal-validità u tal-integrità taċ-ċertifikati. F’dan ir-rigward, ir-Repubblika ta’ Singapore infurmat lill-Kummissjoni li ċ-ċertifikati COVID-19 maħruġa mir-Repubblika ta’ Singapore f’konformità mas-sistema “HealthCerts” fihom id-data stabbilita fl-Anness tar-Regolament (UE) 2021/953.

(4)

Ir-Repubblika ta’ Singapore infurmat ukoll lill-Kummissjoni li hija taċċetta ċertifikati tat-tilqim u tat-testijiet maħruġa mill-Istati Membri u mill-pajjiżi taż-ŻEE f’konformità mar-Regolament (UE) 2021/953. Barra minn hekk, ir-Repubblika ta’ Singapore infurmat lill-Kummissjoni li se tittratta lid-detenturi taċ-Ċertifikat COVID Diġitali tal-UE tat-tilqim u tat-testijiet bl-istess mod bħad-detenturi taċ-ċertifikati tat-testijiet u tat-tilqim maħruġa mir-Repubblika ta’ Singapore. B’mod partikolari, ir-Repubblika ta’ Singapore kkonfermat li ċ-Ċertifikati COVID Diġitali tal-UE tat-testijiet se jiġu aċċettati bħala prova valida ta’ test negattiv ta’ qabel it-tluq għall-vjaġġaturi. Ir-Repubblika ta’ Singapore indikat li, wara l-adozzjoni ta’ din id-Deċiżjoni, id-detenturi ta’ Ċertifikat COVID Diġitali tal-UE tat-tilqim se jkunu eliġibbli għal miżuri ta’ ġestjoni sikura differenzjati bit-tilqim f’Singapore għal 30 jum mingħajr ċertifikati tat-tilqim addizzjonali.

(5)

B’mod partikolari, ir-Repubblika ta’ Singapore infurmat lill-Kummissjoni li hija tirrikonoxxi l-vaċċini kollu li temm il-proċedura ta' tqegħid fuq il-lista għall-użu ta' emerġenza tal-Organizzazzjoni Dinjija tas-Saħħa kif ukoll dawk awtorizzati taħt ir-Rotta ta’ Aċċess Speċjali Pandemiku ta’ Singapore. Singapore se taċċetta wkoll vaċċini awtorizzati mill-PSAR. Rigward it-testijiet, Singapore infurmat lill-Kummissjoni li taċċetta ċertifikati tat-testijiet bħala prova tal-istatus ta’ infezzjoni tal-vjaġġatur jew in-nuqqas ta’ infezzjoni, iżda dawn attwalment ma jirriżultawx fir-rinunzja tar-restrizzjonijiet fuq l-ivvjaġġar. Dawn ir-rinunzji huma kwistjoni tal-politiki tas-saħħa fil-fruntieri ta’ Singapore. Barra minn hekk, Singapore bħalissa ma tillaxkax ir-rekwiżiti tal-fruntieri għal vjaġġaturi li fiequ.

(6)

Fit-30 ta’ Settembru 2021, wara talba mir-Repubblika ta’ Singapore, il-Kummissjoni wettqet testijiet tekniċi li wrew li ċ-ċertifikati COVID-19 tat-tilqim u tat-testijiet jinħarġu mir-Repubblika ta’ Singapore f’konformità mas-sistema, “HealthCerts”, li hija interoperabbli mal-qafas ta’ fiduċja stabbilit bir-Regolament (UE) 2021/953, u tippermetti l-verifika tal-awtentiċità, il-validità u l-integrità taċ-ċertifikati. Il-Kummissjoni kkonfermat ukoll li ċ-ċertifikati COVID-19 tat-tilqim u tat-testijiet maħruġa mir-Repubblika ta’ Singapore f'konformità mas-sistema “HealthCerts” fihom id-data meħtieġa.

(7)

Barra minn hekk, ir-Repubblika ta’ Singapore infurmat lill-Kummissjoni li se toħroġ ċertifikati tat-tilqim interoperabbli għall-vaċċini kontra l-COVID-19. Dawk il-vaċċini bħalissa jinkludu Comirnaty u Spikevax.

(8)

Ir-Repubblika ta’ Singapore infurmat ukoll lill-Kummissjoni li se toħroġ ċertifikati tat-testijiet interoperabbli biss għal testijiet ta’ amplifikazzjoni tal-aċidu nuklejku u għal testijiet rapidi tal-antiġeni elenkati fil-lista komuni u aġġornata ta’ testijiet rapidi tal-antiġeni tal-COVID-19 maqbula mill-Kumitat għas-Sigurtà tas-Saħħa, stabbilit bl-Artikolu 17 tad-Deċiżjoni 1082/2013/UE tal-Parlament Ewropew u tal-Kunsill (3), abbażi tar-Rakkomandazzjoni tal-Kunsill tal-21 ta’ Jannar 2021 (4).

(9)

Barra minn hekk, ir-Repubblika ta’ Singapore infurmat lill-Kummissjoni li hija ma toħroġx ċertifikati interoperabbli tal-fejqan.

(10)

B’żieda ma’ dan, ir-Repubblika ta’ Singapore infurmat lill-Kummissjoni li meta verifikaturi f’Singapore jivverifikaw iċ-ċertifikati, id-data personali inkluża fihom se tiġi pproċessata biss biex tivverifika u tikkonferma t-tilqim, ir-riżultat tat-test jew l-istatus tal-fejqan tad-detentur u mhux se tinżamm wara.

(11)

L-elementi meħtieġa biex jiġi stabbilit li ċ-ċertifikati COVID-19 tat-tilqim u tat-testijiet maħruġa mir-Repubblika ta’ Singapore f'konformità mas-sistema “HealthCerts” għandhom jitqiesu bħala ekwivalenti għal dawk maħruġa f'konformità ir-Regolament (UE) 2021/953 huma għalhekk issodisfati.

(12)

Għalhekk, iċ-ċertifikati tal-COVID-19 maħruġa mir-Repubblika ta’ Singapore f'konformità mas-sistema “HealthCerts” jenħtieġ li jiġu aċċettati skont il-kundizzjonijiet imsemmija fl-Artikolu 5(5) u fl-Artikolu 6(5) tar-Regolament (UE) 2021/953.

(13)

Sabiex din id-Deċiżjoni tkun operattiva, ir-Repubblika ta’ Singapore għandha tkun konnessa mal-qafas ta’ fiduċja taċ-Ċertifikat COVID Diġitali tal-UE stabbilit bir-Regolament (UE) 2021/953.

(14)

Sabiex tipproteġi l-interessi tal-Unjoni, b’mod partikolari fil-qasam tas-saħħa pubblika, il-Kummissjoni tista’ tuża s-setgħat tagħha biex tissospendi jew ittemm din id-Deċiżjoni jekk il-kundizzjonijiet tal-Artikolu 8(2) tar-Regolament (UE) 2021/953 ma jibqgħux jiġu ssodisfati.

(15)

Sabiex ir-Repubblika ta’ Singapore tiġi konnessa mal-qafas ta’ fiduċja taċ-Ċertifikat COVID Diġitali tal-UE stabbilit bir-Regolament (UE) 2021/953 malajr kemm jista’ jkun, jenħtieġ li din id-Deċiżjoni tidħol fis-seħħ fil-jum tal-pubblikazzjoni tagħha f’Il-Ġurnal Uffiċjali tal-Unjoni Ewropea.

(16)

Il-miżuri previsti f’din id-Deċiżjoni huma f’konformità mal-opinjoni tal-Kumitat stabbilit bl-Artikolu 14 tar-Regolament (UE) Nru 2021/953,