Access to European Union law
<a href="https://eur-lex.europa.eu/content/help/eurlex-content/experimental-features.html" target="_blank">More about the experimental features corner</a>
Choose the experimental features you want to try
EUR-Lex
Access to European Union law

This document is an excerpt from the EUR-Lex website

You are here
Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search

Document 32019R0772

Regolament ta' Implimentazzjoni tal-Kummissjoni (UE) 2019/772 tas-16 ta' Mejju 2019 li jemenda r-Regolament (UE) Nru 1300/2014 fir-rigward tal-inventarju tal-assi bil-ħsieb li jiġu identifikati l-ostakli għall-aċċessibbiltà, jingħata tagħrif lill-utenti u jiġi monitorjat u evalwat il-progress fil-qasam tal-aċċessibbiltà (Test b'rilevanza għaż-ŻEE.)

ĠU L 139I, 27.5.2019, pp. 1–4 (BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)

Legal status of the document In force

ELI: http://data.europa.eu/eli/reg_impl/2019/772/oj

27.5.2019   

MT

Il-Ġurnal Uffiċjali tal-Unjoni Ewropea

LI 139/1

REGOLAMENT TA' IMPLIMENTAZZJONI TAL-KUMMISSJONI (UE) 2019/772

tas-16 ta' Mejju 2019

li jemenda r-Regolament (UE) Nru 1300/2014 fir-rigward tal-inventarju tal-assi bil-ħsieb li jiġu identifikati l-ostakli għall-aċċessibbiltà, jingħata tagħrif lill-utenti u jiġi monitorjat u evalwat il-progress fil-qasam tal-aċċessibbiltà

(Test b'rilevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat id-Direttiva (UE) 2016/797 tal-Parlament Ewropew u tal-Kunsill tal-11 ta' Mejju 2016 dwar l-interoperabbiltà tas-sistema ferrovjarja fl-Unjoni Ewropea (1), u b'mod partikolari l-Artikolu 5(11) tagħha,

Billi:

(1)

Skont l-Artikolu 7 tar-Regolament tal-Kummissjoni (UE) Nru 1300/2014 (2), il-Kapitolu 7 tal-Anness tar-Regolament (UE) Nru 1300/2014 għandu jiġi emendat biex jiġu speċifikati l-karatteristiċi tal-inventarju tal-assi, inkluż il-kontenut, il-format tad-data, l-arkitettura funzjonali u teknika, il-mod operattiv, ir-regoli għall-input u l-konsultazzjoni tad-data, u r-regoli għall-awtovalutazzjoni u għall-ħatra tal-entitajiet responsabbli għall-provvediment tad-data.

(2)

Skont l-Artikolu 5(1) tar-Regolament (UE) 2016/796 tal-Parlament Ewropew u tal-Kunsill (3) u l-Artikolu 7(2) tar-Regolament (UE) Nru 1300/2014, ġie stabbilit grupp ta' ħidma biex jagħmel proposta għal rakkomandazzjoni dwar l-istruttura u l-kontenut minimu tad-data li trid tinġabar għall-inventarju tal-assi bil-ħsieb li jiġu identifikati l-ostakli għall-aċċessibbiltà, jingħata tagħrif lill-utenti u jiġi monitorjat u evalwat il-progress fil-qasam tal-aċċessibbiltà. Dak il-grupp ta' ħidma lesta ħidmitu f'Mejju 2017, u minħabba f'hekk, l-Aġenzija ffinalizzat ir-rakkomandazzjoni ERA-REC-128 biex jiġi emendat ir-Regolament (UE) Nru 1300/2014.

(3)

L-Inventarju tal-Assi hu għodda statika li tindika l-eżistenza tat-tagħmir u għalhekk mhix maħsuba biex tipprovdi informazzjoni dwar l-istatus u l-funzjonament tat-tagħmir.

(4)

Meta stazzjon jew elementi tiegħu jsirilhom aġġornament, tiġdid jew xi xogħol previst minn pjan ta' implimentazzjoni nazzjonali b'konformità mal-Artikolu 8 tar-Regolament (UE) Nru 1300/2014, jenħtieġ tinġabar l-informazzjoni dwar il-konformità ta' dak ix-xogħol mar-Regolament (UE) Nru 1300/2014 tal-istazzjon, jew tal-elementi tiegħu.

(5)

Il-miżuri previsti f'dan ir-Regolament huma skont l-opinjoni tal-Kumitat stabbilit bl-Artikolu 51(1) tar-Regolament (UE) 2016/797.

ADOTTAT DAN IR-REGOLAMENT:

Artikolu 1

Ir-Regolament (UE) Nru 1300/2014 huwa emendat kif ġej:

(1)

Wara l-Artikolu 7 jiddaħħal dan l-Artikolu 7a li ġej:

“Artikolu 7a

Il-ġbir, iż-żamma u l-iskambju ta' data tal-aċċessibbiltà

1.   Fi żmien disa' xhur wara s-16 ta' Ġunju 2019, kull Stat Membru għandu jiddeċiedi liema entitajiet huma responsabbli għall-ġbir, iż-żamma u l-iskambju tad-data tal-aċċessibbiltà.

2.   L-Istati Membri jistgħu jitolbu lill-Kummissjoni għal estensjoni tal-limitu taż-żmien. Din l-estensjoni għandha tkun eċċezzjonali, ġustifikata u limitata fiż-żmien. B'mod partikolari, din titqies ġustifikata jekk l-għodda tal-ġbir tad-data u l-modi moperattivi stabbiliti fl-Anness ta' dan ir-Regolament ma jsirux disponibbli u operazzjonali għalkollox mill-Aġenzija tal-Unjoni Ewropea għall-Ferroviji fi żmien xahrejn mid-dħul fis-seħħ tiegħu.

3.   Għal kull stazzjon, għandu jkun hemm entità responsabbli għall-iskambju tad-data tal-aċċessibbiltà.

4.   Il-ġbir u l-konverżjoni tad-data għandhom jiġu ffinalizzati fi żmien 36 xahar wara d-dħul fis-seħħ ta' dan ir-Regolament.

5.   Sakemm l-arkitettura għall-iskambju tad-data deskritta fit-taqsimiet 7.2, 7.3 u 7.4 tal-Anness I tar-Regolament tal-Kummissjoni (UE) Nru 454/2011 (*1) tkun operattiva għalkollox, l-iskambju tad-data tal-aċċessibbiltà għandu jikkonsisti minn trasferiment ta' dik id-data lejn il-Bażi tad-Data tal-Aċċessibbiltà tal-Istazzjonijiet tal-Aġenzija Ferrovjarja Ewropea (ERSAD) ospitata mill-Aġenzija tal-Unjoni Ewropea għall-Ferroviji.

(*1)  Ir-Regolament tal-Kummissjoni (UE) Nru 454/2011 tal-5 ta' Mejju 2011 dwar l-ispeċifikazzjoni teknika għall-interoperabbiltà relatata mas-subsistema ‘applikazzjonijiet telematiċi għal servizzi tal-passiġġieri’ tas-sistema ferrovjarja trans-Ewropea (ĠU L 123, 12.5.2011, p. 11).” "

(2)

l-Anness qed jiġi emendat skont l-Anness ta' dan ir-Regolament.

Artikolu 2

Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f'Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, is-16 ta' Mejju 2019.

Għall-Kummissjoni

Il-President

Jean-Claude JUNCKER

(1)   ĠU L 138, 26.5.2016, p. 44.

(2)  Ir-Regolament tal-Kummissjoni (UE) Nru 1300/2014 tat-18 ta' Novembru 2014 dwar l-ispeċifikazzjonijiet tekniċi tal-interoperabbiltà relatati mal-aċċessibbiltà tas-sistema ferrovjarja tal-Unjoni għall-persuni b'diżabbiltà u għall-persuni b'mobbiltà mnaqqsa (ĠU L 356, 12.12.2014, p. 110).

(3)  Ir-Regolament (UE) 2016/796 tal-Parlament Ewropew u tal-Kunsill tal-11 ta' Mejju 2016 dwar l-Aġenzija tal-Unjoni Ewropea għall-Ferroviji u li jħassar ir-Regolament (KE) Nru 881/2004 (ĠU L 138, 26.5.2016, p. 1).

ANNESS

L-Anness tar-Regolament (UE) Nru 1300/2014 huwa emendat kif ġej:

(1)

Fil-Kapitolu 2, it-Taqsima 2.3, jiddaħħal il-paragrafu li ġej wara l-ewwel sentenza:

“ Data tal-aċċessibbiltà

Id-data tal-aċċessibbiltà tikkonsisti mill-informazzjoni relatata mal-aċċessibbiltà tal-istazzjonijiet ferrovjarji tal-passiġġieri li jeħtieġ tinġabar, tinżamm u tiġi skambjata, jiġifieri, li tagħti deskrizzjoni tal-karatteristiċi u tat-tagħmir tal-istazzjonijiet ferrovjarji tal-passiġġieri. Meta rilevanti, din id-deskrizzjoni tiġi kkumplimentata bl-informazzjoni rigward l-istat ta' konformità tal-istazzjonijiet ma' din it-TSI.”

(2)

Fil-Kapitolu 7, it-Taqsima 7.2, is-Subtaqsima 7.2.1, jiddaħħlu dawn is-subtaqsimiet li ġejjin:

“7.2.1.1.   Inventarju tal-assi — infrastruttura

7.2.1.1.1.   L-arkitettura funzjonali u teknika

Il-funzjonijiet tal-inventarju tal-assi huma li:

(1)

jidentifika l-ostakli eżistenti u x-xkiel għall-aċċessibbiltà;

(2)

jagħti informazzjoni prattika lill-utenti;

(3)

jimmonitorja u jevalwa l-progress fil-qasam tal-aċċessibbiltà.

L-arkitettura għall-iskambju tad-data tal-aċċessibbiltà hija prevista fir-Regolament (UE) Nru 454/2011 (TSI tat-TAP).

L-istandards li ġejjin għandhom japplikaw għall-format u l-iskambju tad-data tal-aċċessibbiltà:

(1)

CEN/TS 16614-1:2014 Public transport — Network and Timetable Exchange (NeTEx) — Part 1: Public transport network topology exchange format 2014-05-14

(2)

EN 12896-1:2016 Public transport. Mudell tad-data ta' referenza. Kunċetti komuni (Transmudell)

Għall-użu partikolari maħsub, profil transmudell speċifiku armonizzat kif previst fid-dokumenti tekniċi msemmija għall-Appendiċi O, l-indiċi 1.

7.2.1.1.2.   Regoli għall-input u l-awtovalutazzjoni tad-data tal-aċċessibbiltà

Ir-regoli għall-input u l-awtovalutazzjoni tad-data tal-aċċessibbiltà għandhom ikunu kif ġej:

(1)

entitajiet li jiġbru d-data tal-aċċessibbiltà relattiva għall-assi ma għandhomx għalfejn ikunu indipendenti mill-ġestjoni ta' kuljum ta' dawk l-assi;

(2)

waqt l-ewwel ġbir tad-d-data tal-aċċessibbiltà skont id-dħul fis-seħħ tar-Regolament ta' Implimentazzjoni tal-Kummissjoni (UE) 2019/772 (*1), l-istat ta' konformità tal-istazzjonijiet ma' din it-TSI jista' jiġi rreġistrat fl-inventarju bħala mhux ivvalutat;

(3)

meta stazzjon jew elementi tiegħu jsirilhom aġġornament, tiġdid jew xi tip ta' xogħol previst minn pjan ta' implimentazzjoni nazzjonali għal din it-TSI, għandha tiġi aġġornata d-data tal-aċċessibbiltà korrispondenti, inkluż l-istat ta' konformità ta' din it-TSI, meta rilevanti;

(4)

l-istat ta' konformità ta' din it-TSI jista' jiġi aġġornat abbażi ta' ISV kif deskritt fil-punt 6.2.4. ta' din it-TSI;

(5)

il-kundizzjoni operattiva ma hemmx għalfejn tiġi rreġistrata fl-inventarju.

L-għodda għall-ġbir tad-data, li l-modi operattivi tagħha huma deskritti fid-dokumenti tekniċi msemmija fl-Appendiċi O, l-indiċi 2, għandha ssir disponibbli mill-Kummissjoni.

Inkella, meta tkun teżisti data strutturata tal-aċċessibbiltà u tkun tista' tiġi konvertita għal profil armonizzat, dik id-data tista' tiġi trasferita wara l-konverżjoni. Il-metodoloġija għall-konverżjoni tad-data tal-aċċessibbiltà eżistenti u l-protokoll ta' komunikazzjoni huma previsti fid-dokumenti tekniċi msemmija fl-Appendiċi O, l-indiċi 3.

7.2.1.1.3.   Regoli għall-konsultazzjoni

Mill-ERSAD:

(1)

il-pubbliku għandu jkun jista' jaċċessa l-informazzjoni minn sit web pubbliku ospitat mill-Aġenzija tal-Unjoni Ewropea għall-Ferroviji;

(2)

l-awtoritajiet nazzjonali rreġistrati għandhom ikunu jistgħu jiġbru d-data tal-aċċessibbiltà kollha li tkun rilevanti għall-Istat Membru;

(3)

il-Kummissjoni u l-Aġenzija għandhom ikunu jistgħu jiksbu d-data tal-aċċessibbiltà kollha.

Il-bażi tad-data tal-ERSAD ospitata mill-Aġenzija ma għandhiex tkun konnessa ma' bażi(jiet) tad-data oħra.

7.2.1.1.4.   Regoli għall-ġestjoni ta' rispons tal-utenti

Ir-rispons tal-utenti jista' jkollu l-għamla ta':

(1)

rispons istituzzjonali mingħand l-assoċjazzjonijiet tal-utenti, inkluż l-organizzazzjonijiet li jirrappreżentaw lill-persuni b'diżabbiltà: jistgħu jintużaw l-istrutturi eżistenti diment li dawn ikunu jinkludu rappreżentanti minn organizzazzjonijiet tal-persuni b'diżabbiltà u tal-persuni b'mobbiltà mnaqqsa u jkunu jirriflettu s-sitwazzjoni f'livell xieraq, mhux bilfors fil-livell nazzjonali. Il-proċedura li tagħti r-rispons tal-utenti għandha tkun organizzata b'mod li dawk l-organizzazzjonijiet ikunu jistgħu jieħdu sehem b'mod ugwali;

(2)

rispons individwali: il-viżitaturi tas-sit web għandhom ikunu jistgħu jirrappurtaw informazzjoni żbaljata dwar id-data tal-aċċessibbiltà b'rabta ma' stazzjon partikolari u jiġu mgħarrfa li l-kumment tagħhom ikun wasal.

Fiż-żewġ sitwazzjonijiet, ir-rispons tal-utenti għandu jitqies kif xieraq mill-entità(jiet) responsabbli għall-ġbir, iż-żamma u l-iskambju tad-data.

(*1)  Ir-Regolament ta' Implimentazzjoni tal-Kummissjoni (UE) 2019/772 tas-16 ta' Mejju 2019 li jemenda r-Regolament (UE) Nru 1300/2014 fir-rigward tal-inventarju tal-assi bil-ħsieb li jiġu identifikati l-ostakli għall-aċċessibbiltà, jingħata tagħrif lill-utenti u jiġi monitorjat u evalwat il-progress fil-qasam tal-aċċessibbiltà (ĠU L 139 I, 27.5.2019, p. 1).” "

(3)

Jiżdied dan l-Appendiċi li ġej:

“Appendiċi O

Lista ta' dokumenti tekniċi

Nru tal-Indiċi

Tikketta

1

Il-profil speċifiku armonizzat għall-Iskambju tan-Netwerk u tal-Iskedi (NeTEx) użat għad-deskrizzjoni tal-istazzjonijiet.

2

Il-modi operattivi tal-għodda għall-ġbir tad-data

3

Il-metodoloġija għall-konverżjoni tad-data tal-aċċessibbiltà eżistenti, inkluż deskrizzjoni tal-interfaċċja esterna u tal-protokoll ta' komunikazzjoni.

(*1)  Ir-Regolament ta' Implimentazzjoni tal-Kummissjoni (UE) 2019/772 tas-16 ta' Mejju 2019 li jemenda r-Regolament (UE) Nru 1300/2014 fir-rigward tal-inventarju tal-assi bil-ħsieb li jiġu identifikati l-ostakli għall-aċċessibbiltà, jingħata tagħrif lill-utenti u jiġi monitorjat u evalwat il-progress fil-qasam tal-aċċessibbiltà (ĠU L 139 I, 27.5.2019, p. 1).” ”

Top