Tástáil comhréireachta le haghaidh rialáil nua gairmeacha

PRÍOMHPHOINTÍ

Gairmeacha rialaithe

• Tá feidhm ag an treoir maidir le rialacha nua i dtíortha AE lena gcuirtear srian ar rochtain ar ghairmeacha rialaithe nó ar thabhairt faoi ghairmeacha rialaithe.
• Ciallaíonn gairm rialaithe go bhfuil an rochtain ar ghníomhaíocht ghairmiúil nó ar ghrúpa gníomhaíochtaí gairmiúla nó ar thabhairt faoi ghníomhaíocht ghairmiúil nó faoi ghrúpa gníomhaíochtaí gairmiúla teoranta, le rialachán, do dhaoine ag a bhfuil cáilíochtaí gairmiúla sonracha. Cumhdaítear leis sin chomh maith an úsáid as teidil ghairmiúla atá teoranta do shealbhóirí cáilíochtaí sonracha.

An leas poiblí

Ní mór do thíortha AE a áirithiú go bhfuil bonn cirt le rialacha nua nó rialacha leasaitheacha ar bith agus go bhfuil siad comhréireach i ndáil le cuspóirí leas an phobail arna n–aithint ag Cúirt Bhreithiúnais an Aontais Eorpaigh, amhail:

• beartas poiblí, slándáil phoiblí nó sláinte phoiblí;
• tomhaltóirí, faighteoirí na seirbhísí, agus oibrithe a chosaint;
• éifeachtúlacht na maoirseachta fioscaí a chosaint;
• calaois a chomhrac agus imghabháil cánach agus seachaint cánach a chosc;
• cosaint an chomhshaoil.

Measúnú ar na bearta nua roimh ré agus faireachán orthu ina dhiaidh sin

Ní mór do thíortha AE:

• measúnú a dhéanamh ar chomhréireacht birt sula dtabharfar isteach rialacha nua reachtacha, rialála nó riaracháin nó sula leasófar rialacha reachtacha, rialála nó riaracháin atá ann cheana; agus
• faireachán a dhéanamh ar chomhlíonadh na mbeart sin maidir le prionsabal na comhréireachta i ndiaidh a nglactha.

Measúnú

Maidir leis an measúnú:

• ní mór míniú sách mionsonraithe a bheith ag gabháil leis lenar féidir measúnú a dhéanamh ar cibé an gcomhlíonann sé prionsabal na comhréireachta nó nach gcomhlíonann;
• ní mór é a dhéanamh ar bhonn fianaise cháilíochtúil, agus más féidir, fianaise chainníochtúil;
• ní mór é a dhéanamh ar mhodh oscailte agus oibiachtúil.

Comhréireacht

Agus measúnú á dhéanamh ar chomhréireacht rialacha nua nó rialacha leasaitheacha, ní mór do thíortha AE roinnt critéar comhréireachta arna mbunú ag an gCúirt Bhreithiúnais a chur san áireamh, lena n–áirítear:

• cibé an féidir cuspóir leas an phobail a bhaint amach leis nó nach féidir, agus cibé an bhfuiltear ag féachaint leis an gcuspóir sin ar bhealach comhsheasmhach agus córasach le haghaidh gníomhaíochtaí inchomparáide nó nach bhfuil;
• mura bhfuiltear ábalta an cuspóir a bhaint amach le rialacha atá ann cheana, amhail an dlí um shábháilteacht táirgí nó an dlí um chosaint tomhaltóirí;
• an tionchar ar shaorghluaiseacht daoine agus seirbhísí laistigh de AE, ar rogha tomhaltóirí agus ar cháilíocht na seirbhísí atá á soláthar;
• cibé an bhféadfaí cuspóir leas an phobail a bhaint amach le modhanna nach bhfuil chomh sriantach nó nach bhféadfaí;
• éifeacht na rialacha nua nuair a chomhcheanglaítear iad le ceanglais eile.

Trédhearcacht

Sula dtugtar rialacháin nua isteach, ní mór do thíortha AE:

• faisnéis a chur ar fáil do na daoine ábhartha lena mbaineann; agus
• an deis a thabhairt dóibh a dtuairimí a chur in iúl.

Ba cheart na cúiseanna le comhréireacht a thaifeadadh i mBunachar Sonraí na nGairmeacha agus iad a chur ar fáil go poiblí.