This document is an excerpt from the EUR-Lex website
Document 62016TN0630
Case T-630/16: Action brought on 5 September 2016 — Dehtochema Bitumat v European Chemicals Agency
Kawża T-630/16: Rikors ippreżentat fil-5 ta’ Settembru 2016 – Dehtochema Bitumat vs L-Aġenżija Ewropea għas-Sustanzi Kimiċi
Kawża T-630/16: Rikors ippreżentat fil-5 ta’ Settembru 2016 – Dehtochema Bitumat vs L-Aġenżija Ewropea għas-Sustanzi Kimiċi
ĠU C 402, 31.10.2016, p. 53–54
(BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)
31.10.2016 |
MT |
Il-Ġurnal Uffiċjali tal-Unjoni Ewropea |
C 402/53 |
Rikors ippreżentat fil-5 ta’ Settembru 2016 – Dehtochema Bitumat vs L-Aġenżija Ewropea għas-Sustanzi Kimiċi
(Kawża T-630/16)
(2016/C 402/63)
Lingwa tal-kawża: iċ-Ċek
Partijiet
Rikorrenti: Dehtochema Bitumat, s.r.o. (Bělá pod Bezdězem, ir-Repubblika Ċeka) (rappreżentant: P. Holý, avukat)
Konvenuta: L-Aġenzija Ewropea għas-Sustanzi Kimiċi (ECHA)
Talbiet
Ir-rikorrenti titlob lill-Qorti Ġenerali jogħġobha:
— |
tannulla u tiddikjara invalida d-deċiżjoni tal-Aġenzija Ewropea għas-Sustanzi Kimiċi, tas-7 ta’ Lulju 2016, li skontha r-rikorrenti għandha tkompli titqies bħala impriża ta’ daqs kbir u b’riżultat ta’ dan ir-rikorrenti ma hijiex intitolata għal tnaqqis tal-obbligu ta’ ħlas għal impriżi ta’ daqs medju, u tawtorizza s-sospensjoni tal-eżekuzzjoni ta’ dik id-deċiżjoni. |
Motivi u argumenti prinċipali
Skont ir-rikorrenti, permezz tad-deċiżjoni msemmija hawn fuq u permezz tal-aġir tagħha l-konvenuta wettqet użu ħażin tal-poter tagħha u kisret il-prinċipji ta’ legalità u ta’ ċertezza legali.
Ir-rikorrenti ssostni li meta vverfikat l-istatus ta’ impriżi ta’ daqs żgħir jew medju (SME), il-konvenuta b’mod żbaljat evalwat l-indipendenza tal-impriża tar-rikorrenti u b’mod skorrett, fil-kalkolu inkludiet numru ta’ impjegati u ammont tad-dħul mill-bejgħ annwali tal-impriża tar-rikorrenti flimkien ma’ impriżi allegatament relatati jew imsieħba, li ma humiex relatati mal-impriża tar-rikorrenti jew mal-impriżi msieħba tagħha taħt ir-Regolament tal-Kummissjoni (KE) Nru 340/2008 jew ir-Rakkomandazzjoni tal-Kummissjoni 2003/361/KE.
Ir-rikorrenti tissottometti li d-dikjarazzjoni tagħha dwar id-daqs żbaljat tal-impriża, li hija għamlet fuq talba tal-konvenuta tat-2 ta’ Ġunju 2016, kienet saret b’fiduċja fl-evalwazzjoni tal-konvenuta u bil-wegħda ta’ tnaqqis tal-obbligu ta’ ħlas.
Ir-rikorrenti tindika li r-reġistrazzjoni tagħha kienet ġiet sospiża u b’mod espress hija kienet informat lill-konvenuta li hija ma pproduċietx il-prodotti rilevanti (sustanzi suġġetti għal reġistrazzjoni) sa mill-2011.
Ir-rikorrenti ssostni li mill-Artikolu 13(4) tar-Regolament tal-Kummissjoni (KE) Nru 340/2008 jirriżulta li d-dritt għal tnaqqis tal-obbligu ta’ ħlas fuq ir-reġistrazzjoni jitnissel meta jkun possibbli li tali dritt jintwera u li għaldaqstant huwa xieraq, kuntrarjament għal dak li ssostni l-konvenuta, li r-rikorrenti tiġi awtorizzata tistabbilixxi dak id-dritt.