Back to EUR-Lex homepage

EUR-Lex Access to European Union law

Back to EUR-Lex homepage

This document is an excerpt from the EUR-Lex website

Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search
You are here

Document 62016TN0625

Kawża T-625/16: Rikors ippreżentat fit-2 ta’ Settembru 2016 – Przedsiębiorstwo Energetyki Cieplnej vs ECHA

ĠU C 402, 31.10.2016, p. 51–53 (BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)

31.10.2016   

MT

Il-Ġurnal Uffiċjali tal-Unjoni Ewropea

C 402/51

Rikors ippreżentat fit-2 ta’ Settembru 2016 – Przedsiębiorstwo Energetyki Cieplnej vs ECHA

(Kawża T-625/16)

(2016/C 402/61)

Lingwa tal-kawża: il-Pollakk

Partijiet

Rikorrenti: Przedsiębiorstwo Energetyki Cieplnej sp. z o. o. (Grajewo, il-Polonja) (rappreżentanti: T. Dobrzyński, radca prawny [avukat])

Konvenuta: L-Aġenzija Ewropea għas-Sustanzi Kimiċi (ECHA)

Talbiet

—

tannulla d-Deċiżjoni tal-ECHA Nru SME (2016) 2851, tat-23 ta’ Ġunju 2016, li tiddikjara li r-rikorrenti ma tissodisfax il-kundizzjonijiet għall-għoti ta’ tnaqqis fit-tariffi għall-impriżi ta’ daqs medju, u li r-rikorrenti għandha tħallas dritt amministrattiv;

—

tannulla l-kont Nru 10058238 maħruġ mill-ECHA fit-23 ta’ Ġunju 2016 fir-rigward tad-differenza bejn it-tariffa mħallsa mir-rikorrenti u t-tariffa dovuta fil-każ ta’ impriża kbira kif stabbilita fid-Deċiżjoni tal-ECHA Nru SME (2016) 2851;

—

tannulla l-kont Nru 10058239 maħruġ mil-ECHA fit-23 ta’ Ġunju 2016 li jistabbilixxi l-ammont tad-dritt amministrattiv dovut skont id-Deċiżjoni tal-ECHA Nru SME (2016) 2851;

—

tannulla d-Deċiżjoni tal-Bord tat-Tmexxija tal-ECHA Nru 14/2015, tal-4 ta’ Ġunju 2015 (MB/43/2014) ME (2016) 2851;

—

tikkundanna lill-konvenuta għall-ispejjeż.

Motivi u argumenti prinċipali

Insostenn tar-rikors tagħha, ir-rikorrenti tinvoka ħames motivi.

1.

L-ewwel motiv: ksur tal-prinċipju ta’ għoti tal-kompetenzi

—

L-ammont tad-dritt amministrattiv, previst fid-Deċiżjoni tal-Bord tat-Tmexxija MB/43/2014, li tikkostitwixxi l-bażi għad-deċiżjoni u għall-kontijiet ikkontestati, huwa, fid-dawl tal-funzjonijiet li għandu jissodisfa d-dritt amministrattiv, sproporzjonalment għoli u għalhekk huwa ekwivalenti għal multa. Dan jammonta għal ksur tal-prinċipju ta’ għoti tal-kompetenzi rrikonoxxut fl-Artikolu 5 TUE, moqri flimkien mal-premessa 11 tar-Regolament tal-Kummissjoni (KE) Nru 340/2008.

2.

It-tieni motiv: ksur tal-prinċipju ta’ ċertezza legali u tad-dritt għal amministrazzjoni tajba

—

Ir-rikorrenti bbażat id-dikjarazzjoni tagħha dwar id-daqs tal-impriża fuq informazzjoni li, fost oħrajn, kienet toriġina mill-ECHA, u fuq informazzjoni nazzjonali. Id-daqs tal-impriża kellu jiġi ddeterminat skont il-Liġi dwar il-libertà tal-attivitajiet ekonomiċi tat-2 ta’ Lulju 2004. Skont din il-liġi, l-impriżi ma għandhomx jiġu ddeterminati skont l-istruttura tal-ishma. L-ECHA naqset milli tipprovdi informazzjoni suffiċjenti dwar ir-regoli ta’ inkorporazzjoni u imponiet it-tariffi, mingħajr ma kien possibbli li jiġi rrimedjat l-iżball.

3.

It-tielet motiv: ksur tal-prinċipju ta’ proporzjonalità

—

Skont id-dispożizzjonijiet tar-Regolament tal-Kummissjoni (KE) Nru 1907/2006 u tar-Regolament tal-Kummissjoni (KE) Nru 340/2008, id-drittijiet amministrattivi għandhom ikunu stabbiliti fuq il-bażi tal-ispejjeż konkreti tal-kontroll imwettaq mill-ECHA. Il-prassi tal-ECHA, fejn l-impriżi li jkunu ddikjaraw b’mod żbaljat id-daqs tagħhom ibatu l-ispejjeż tal-kontrolli mwettqa fir-rigward tal-impriżi kollha, għandha titqies li hija inammissibbli.

4.

Ir-raba’ motiv: ksur tal-prinċipju ta’ ugwaljanza fit-trattament

—

Bl-impożizzjoni ta’ drittijiet amministrattivi u bl-iffissar tal-ammont ta’ dawn id-drittijiet skont id-daqs tal-impriżi, l-ECHA kisret il-prinċipju ta’ ugwaljanza fit-trattament. Il-fatt li impriża li hija kklassifikata bħala impriża kbira għas-sempliċi raġuni li entità pubblika għandha sehem mill-kapital tagħha tiġi suġġetta għall-istess dritt amministrattiv bħal impriża li hija kklassifikata bħala impriża kbira fuq il-bażi tad-dħul mill-bejgħ annwali tagħha u tad-daqs tal-persunal tagħha, jikkostitwixxi ksur tal-prinċipju ta’ ugwaljanza fit-trattament.

5.

Il-ħamis motiv: nullità tal-kontijiet stabbiliti fuq il-bażi tad-deċiżjoni kkontestata

—

L-annullament tad-Deċiżjoni tal-ECHA Nru SME (2016) 2851 għandu jwassal għall-annullament tal-kontijiet li huma bbażati fuq il-fatturi maħruġa mill-ECHA. It-tariffi imposti lanqas ma huma dovuti għaliex, fil-mument tal-adozzjoni tad-Deċiżjoni tal-ECHA Nru SME (2016) 2851 u tal-ħruġ tal-kontijiet, ir-rikorrenti ma kinitx obbligata tirreġistra fis-sistema REACH.
Top