8.5.2007   

MT

Il-Ġurnal Uffiċjali ta’ l-Unjoni Ewropea

86

(1)

Skond id-Direttiva 97/78/KE u r-Regolament (KE) Nru 178/2002, il-miżuri neċessarji għandhom jiġu adottati fir-rigward ta' l-importazzjonijiet ta' prodotti minn pajjiżi terzi li probabilment jistgħu jikkawżaw periklu serju għas-saħħa ta' l-annimali jew dik tal-bniedem jew fejn dan il-periklu qed jinfirex.

(2)

Id-Direttiva tal-Kunsill 96/22/KE tad-29 ta' April 1996 li tikkonċerna l-projbizzjoni ta' l-użu fl-istockfarming ta' ċerti sustanzi li jkollhom azzjoni ormonika u tirostatika u ta' beta-agonists u li tħassar id-Direttivi 81/602/KEE, 88/146/KEE u 88/299/KEE (3) tipprojbixxi importazzjonijiet minn pajjiżi terzi ta' annimali u ta' laħam jew prodotti tal-laħam meħuda minn annimali li ngħataw tali sustanzi, barra fil-każ fejn ingħataw għal skopijiet terapewtiċi jew bħala trattament żootekniku.

(3)

Ir-Regolament tal-Kunsill (KEE) Nru 2377/90 tas-26 ta' Ġunju 1990 li jistabbilixxi proċedura tal-Komunità għal iffissar ta' limiti massimi ta' residwi ta' prodotti mediċinali veterinarji fi prodotti ta' l-ikel ta' oriġini mill-annimali (4) jipprevedi lista ta' sustanzi li ma jistgħux jintużaw fil-produzzjoni tal-laħam u lista ta' sustanzi li għalihom ġew iffissati limiti massimi ta' residwi. Jipprevedi wkoll lista ta' ċerti prodotti mediċinali veterinarji li għalihom ġew iffissati limiti massimi ta' residwi provviżorji. Dawn il-prodotti jistgħu jkunu preżenti fil-laħam ta' l-ekwini.

(4)

L-aħħar żjara ta' spezzjoni tal-Komunità fil-Messiku rrivelat difetti serji fil-kapaċità ta' l-awtoritajiet Messikani biex iwettqu kontrolli serji tal-laħam ta' l-ekwini partikolarment biex jiġu osservati s-sustanzi pprojbiti mid-Direttiva 96/22/KE.

(5)

Dik l-ispezzjoni rrivelat ukoll difetti serji fir-rigward ta' kontrolli tas-suq tal-mediċini veterinarji, li jinkludu prodotti mhux awtorizzati. Dawn id-difetti jwasslu biex l-użu ta' sustanzi pprojbiti fil-produzzjoni tal-laħam taż-żiemel ikun iktar faċli. Għalhekk, dawk is-sustanzi jistgħu jkunu preżenti fil-laħam u fil-prodotti tal-laħam ta' l-ekwini maħsuba għall-konsum mill-bniedem. Il-preżenza ta' dawk is-sustanzi fl-ikel tesponi lis-saħħa tal-bniedem għal riskju serju potenzjali.

(6)

L-Istati Membri għandhom jagħmlu l-kontrolli xierqa fuq il-laħam u l-prodotti tal-laħam ta' l-ekwini impurtati mill-Messiku mal-wasla tagħhom fuq il-fruntiera tal-Komunità biex b'hekk jkun evitat li laħam jew prodotti tal-laħam ta' l-ekwini bħal dawn, li mhumiex tajba għall-konsum tal-bniedem, ma jitqiegħdux fis-suq.

(7)

Ir-Regolament (KE) Nru 178/2002 jistabbilixxi s-sistema ta' allarm rapida li għandha tintuża biex tiġi implimentata l-kondizzjoni meħtieġa ta' informazzjoni reċiproka prevista fl-Artikolu 22(2) tad-Direttiva 97/78/KE. Flimkien ma' dan, l-Istati Membri se jżommu lill-Kummissjoni infurmata permezz ta' rapporti perjodiċi tar-riżultati analitiċi kollha tal-kontrolli uffiċjali li jkunu saru fir-rigward ta' konsenji ta' laħam u prodotti tal-laħam ta' l-ekwini mill-Messiku.

(8)

Din id-Deċiżjoni se terġa' tiġi riveduta fid-dawl tal-garanziji offruti mill-awtoritajiet kompetenti tal-Messiku u fuq il-bażi tar-riżultati tat-testijiet imwettqa mill-Istati Membri.

(9)

Il-miżuri previsti f'din id-Deċiżjoni huma skond l-opinjoni tal-Kumitat Permanenti dwar il-Katina Alimentari u s-Saħħa ta' l-Annimali,