(1)

Permezz tar-Regolament ta’ Implimentazzjoni tal-Kummissjoni (UE) 2019/159 (3), il-Kummissjoni Ewropea imponiet miżura ta’ salvagwardja definittiva fuq ċerti prodotti tal-azzar (“il-miżura tas-salvagwardja”), li tikkonsisti fi kwoti tariffarji (“TRQs”) fir-rigward ta’ ċerti prodotti tal-azzar (“il-prodott ikkonċernat”) li jinkludu 26 kategorija ta’ prodotti tal-azzar, stabbiliti f’livelli li jippreservaw il-flussi kummerċjali tradizzjonali għal kull kategorija ta’ prodott. Tariffa doganali ta’ 25 % tapplika biss jekk jinqabżu l-limiti kwantitattivi ta’ dawn it-TRQs. Il-miżura ta’ salvagwardja ġiet imposta għal perjodu inizjali ta’ tliet snin, jiġifieri, sat-30 ta’ Ġunju 2021 (“ir-Regolament Definittiv”).

(2)

Permezz tar-Regolament ta’ Implimentazzjoni tal-Kummissjoni (UE) 2021/1029 (4) (“ir-Regolament ta’ Estensjoni”), il-Kummissjoni estendiet il-miżura ta’ salvagwardja sat-30 ta’ Ġunju 2024.

(3)

Fil-premessa (161) tar-Regolament Definittiv, il-Kummissjoni impenjat ruħha li “twettaq valutazzjoni tas-sitwazzjoni fuq bażi regolari, u tikkunsidra rieżami tal-anqas fl-aħħar ta’ kull sena ta’ impożizzjoni ta’ miżuri”. F’dan l-ispirtu, il-Kummissjoni wettqet żewġ investigazzjonijiet ta’ rieżami tal-funzjonament fl-2019 u fl-2020 rispettivament.

(4)

Fil-premessa (85) tar-Regolament ta’ Estensjoni, il-Kummissjoni ddikjarat “sabiex sadanittant iżżomm it-tħaddim tas-salvagwardja adattata għall-evoluzzjoni tas-suq u f’konformità mal-interess tal-partijiet ikkonċernati kollha, il-Kummissjoni se twettaq rieżami tal-funzjonament, bħal dawk imwettqa fl-2019 u fl-2020. Dan ir-rieżami tal-funzjonament se jinbeda biżżejjed minn qabel biex tiġi introdotta kwalunkwe bidla meħtieġa mill-1 ta’ Lulju 2022, wara l-ewwel sena ta’ estensjoni”.

(5)

Għaldaqstant, il-Kummissjoni bdiet investigazzjoni ta’ rieżami tal-funzjonament permezz ta’ Notifika ta’ Bidu (“NOI”) ippubblikata f’Il-Ġurnal Uffiċjali tal-Unjoni Ewropea fis-17 ta’ Diċembru 2021 (5) fejn stiednet lill-partijiet interessati jesprimu l-fehmiet tagħhom u jissottomettu evidenza b’mod partikolari dwar ir-raġunijiet ta’ rieżami li ġejjin:

(6)

Il-proċess dovut sar skont proċedura bil-miktub f’żewġ stadji, fejn il-partijiet l-ewwel issottomettew il-kummenti u l-evidenza ta’ sostenn tagħhom, u sussegwentement, kellhom l-opportunità li jirribattu s-sottomissjonijiet inizjali ta’ partijiet oħra. B’kollox, il-Kummissjoni rċeviet aktar minn mitt sottomissjoni u konfutazzjoni.

(7)

Filwaqt li l-investigazzjoni ta’ rieżami tal-funzjonament kienet għadha għaddejja u qabel il-konklużjoni tagħha, saru sensiela ta’ emendi għall-miżura ta’ salvagwardja. F’Marzu 2022, permezz tar-Regolament (UE) 2022/428 (6) l-UE imponiet projbizzjoni fuq l-importazzjoni ta’ ċerti prodotti tal-azzar mir-Russja u mill-Belarussja (7) bħala parti mir-raba’ pakkett ta’ sanzjonijiet b’reazzjoni għall-invażjoni Russa tal-Ukrajna. Biex jiġi evitat kwalunkwe nuqqas potenzjali ta’ provvista fis-suq tal-azzar tal-Unjoni li jirriżulta minn din il-projbizzjoni, permezz tar-Regolament (UE) 2022/434 (8), il-Kummissjoni emendat il-miżura ta’ salvagwardja billi rridistribwiet il-kwoti speċifiċi għall-pajjiż tar-Russa u tal-Belarussja b’mod proporzjonali fost pajjiżi fornituri oħra f’kull kategorija ta’ prodotti affettwata.

(8)

Barra minn hekk, permezz tar-Regolament (UE) 2022/664 (9), il-Kummissjoni għamlet lill-Afrika t’Isfel u lil pajjiżi oħra tal-Ftehim ta’ Sħubija Ekonomika (FSE) tal-Komunità għall-Iżvilupp tan-Nofsinhar tal-Afrika (SADC) soġġetti għall-miżura ta’ salvagwardja mill-1 ta’ Mejju 2022 wara l-iskadenza tal-eżenzjoni li kienu qed jibbenefikaw minnha skont FSE bilaterali.

(9)

Fl-aħħar nett, il-Kummissjoni ssospendiet b’mod temporanju l-applikazzjoni tal-miżura ta’ salvagwardja vis-a-vis l-Ukrajna (10). L-effett ta’ din is-sospensjoni huwa li sakemm tibqa’ fis-seħħ, l-importazzjonijiet mill-Ukrajna ma jitqiesu fl-ebda kwota, speċifika għall-pajjiż jew residwa (11). Bl-istess mod, il-volumi tal-importazzjonijiet mill-Ukrajna matul il-perjodu ta’ referenza tal-investigazzjoni oriġinali (2015-2017) (12) ma jitqisux għall-kalkolu tal-kwoti residwi.

(10)

Wara analiżi fil-fond tas-sottomissjonijiet kollha li rċeviet u tad-data disponibbli għaliha, il-Kummissjoni waslet għall-konklużjonijiet li ġejjin. Dawn il-konklużjonijiet huma organizzati fis-subtaqsimiet li ġejjin, skont l-istruttura fl-NOI.

(11)

Xi partijiet interessati (ċerti pajjiżi terzi u utenti) talbu li l-amministrazzjoni trimestrali tal-kwoti tiġi sostitwita b’amministrazzjoni annwali, filwaqt li oħrajn (l-industrija tal-Unjoni) talbu li tiddaħħal amministrazzjoni ta’ kull xahar. Xi partijiet (l-industrija tal-Unjoni) talbu wkoll li r-riport tal-kwoti mhux użati jiġi limitat għal 4 %, filwaqt li oħrajn (ċerti pajjiżi terzi u utenti) talbu li jiġi ridistribwit is-sehem ta’ ċerti kwoti speċifiċi għall-pajjiż (“CSQ”) mhux użati. Barra minn hekk, partijiet oħra (ċerti pajjiżi terzi u utenti) talbu li titneħħa s-sistema tas-CSQ u li minflok il-kwoti jiġu amministrati globalment. Fl-aħħar nett, partijiet interessati oħra talbu li jitneħħew il-kwoti ta’ ċerti pajjiżi u li dawn il-kwoti jiġu ridistribwiti fost oriġini oħra, u li ċerti pajjiżi li jesportaw taħt il-kwota residwa jiġu allokati CSQ.

(12)

Il-kwoti, sew jekk speċifiċi għall-pajjiż kif ukoll jekk residwi, ġew allokati abbażi tal-prestazzjoni tal-esportazzjoni fil-perjodu ta’ referenza tal-investigazzjoni oriġinali (13). Is-sistema ta’ amministrazzjoni trimestrali tal-kwoti wriet li hija effettiva biex tinkiseb l-istabbiltà fis-suq tal-Unjoni, biex jiġu evitati żidiet f’daqqa fl-importazzjonijiet li jiddestabbilizzaw is-suq (14) u biex jiġi żgurat fluss ordnat u prevedibbli tal-importazzjonijiet matul is-sena. Din is-sistema tippermetti wkoll li l-flussi kummerċjali tradizzjonali f’termini ta’ volumi u oriġini jkunu permessi mingħajr ebda dazju addizzjonali.

(13)

Din is-sistema toħloq bilanċ fost l-interessi opposti involuti. L-ewwel nett, hija taħdem għall-benefiċċju tal-industrija tal-Unjoni minħabba li tevita fluss kbir ta’ importazzjonijiet f’perjodu qasir bl-effetti negattivi li jirriżultaw fuq is-suq. It-tieni, hija ta’ benefiċċju wkoll għal ċerti pajjiżi terzi u ċerti utenti tal-Unjoni, li kieku jkunu preklużi bla bżonn mis-suq minn fornituri akbar oħra u ma jkunux jistgħu jfornu lill-utenti tal-Unjoni, li min-naħa tagħhom ma jitħallewx jixtru l-materjal li jeħtieġu minn dawn l-oriġini speċifiċi. Fl-aħħar nett, hija tippermetti pajjiżi esportaturi akbar jaqbżu l-flussi kummerċjali tradizzjonali tagħhom fil-biċċa l-kbira tal-kategoriji ta’ prodotti billi jaċċessaw il-kwota residwa fl-aħħar trimestru ta’ perjodu meta l-fornituri eżistenti ma setgħux jużaw b’mod sħiħ il-kwoti.

(14)

L-aċċettazzjoni ta’ kwalunkwe waħda mill-affermazzjonijiet imressqa mill-partijiet interessati, kif miġbura fil-qosor fil-premessa(11), tfixkel dan il-bilanċ u tirriskja li timmina l-effettività tal-miżura. Barra minn hekk, fis-sottomissjonijiet tagħhom, il-partijiet ma wrew bl-ebda evidenza kif is-sistema attwali ma tkunx xierqa u kif l-aġġustamenti differenti li pproponew ikunu fl-interess ġenerali tal-Unjoni (u mhux biss fl-interess individwali tagħhom) u kompatibbli mal-loġika u l-funzjonament tajjeb tal-miżura.

(15)

Għal dawn ir-raġunijiet, il-Kummissjoni qieset li ż-żamma tas-sistema attwali tal-amministrazzjoni tal-kwoti (l-amministrazzjoni trimestrali u kombinazzjoni ta’ kwota speċifika għall-pajjiż u residwa), il-preservazzjoni tar-riport tal-kwoti mhux użati u l-aċċess għall-kwota residwa fil-Q4 għadha xierqa, u li hija ġusta vis-à-vis il-partijiet interessati kollha.

(16)

Filwaqt li s-sistema attwali tal-allokazzjoni u tal-amministrazzjoni tal-kwoti hija xierqa, il-Kummissjoni xorta waħda qieset li din teħtieġ xi aġġustamenti tekniċi biex jittejjeb il-funzjonament tagħha fid-dawl taċ-ċirkostanzi mibdula. Dawn jikkonċernaw il-kategoriji tal-prodotti 7 (pjanċi kwarto) u 17 (angoli, forom u sezzjonijiet).

(17)

F’dawn iż-żewġ kategoriji ta’ prodotti, l-Ukrajna storikament kienet esportatur importanti (15) (fejn kienet tirrappreżenta madwar 33 % tal-kwoti totali f’kull waħda minn dawn il-kategoriji) u użat b’mod konsistenti l-kwoti tagħha f’livelli pjuttost għoljin. Madankollu, il-Kummissjoni osservat (16) li mill-aggressjoni militari mhux provokata u mhux ġustifikata tar-Russja kontra l-Ukrajna, prattikament ma kien hemm l-ebda importazzjoni ta’ dawn iż-żewġ kategoriji mill-Ukrajna lejn l-Unjoni. Dan jissuġġerixxi li l-Ukrajna bħalissa ma tistax tipproduċi u/jew tesporta dawn il-kategoriji ta’ prodotti fi kwalunkwe volum sinifikattiv lejn is-suq tal-Unjoni. F’dawn iċ-ċirkostanzi, u wara li analizzat l-użu tal-kwota minn pajjiżi esportaturi oħra soġġetti għall-miżura, il-Kummissjoni qieset li jkun hemm riskju ta’ nuqqas potenzjali ta’ provvista għall-utenti tal-Unjoni f’dawn il-kategoriji kieku ma ħadet l-ebda azzjoni.

(18)

Għal din ir-raġuni, fl-interess tal-Unjoni, il-Kummissjoni qieset li kien meħtieġ li tiġi globalizzata l-amministrazzjoni tal-kwoti li jibqgħu taħt il-miżura (17) fil-kategoriji 7 u 17. Fi kliem ieħor, il-kwoti eżistenti speċifiċi għall-pajjiż se jitneħħew sabiex minflok issir disponibbli kwota waħda għall-oriġini kollha, u b’hekk tiżdied b’mod sostanzjali l-flessibbiltà għall-utenti biex jimportaw l-azzar li jista’ jkollhom bżonn minn kwalunkwe sors disponibbli fi ħdan il-volum tal-kwota f’dawn il-kategoriji.

(19)

Il-Kummissjoni kkonkludiet li minħabba l-istorja mgħoddija tal-volumi tal-importazzjonijiet (użu tal-kwoti) u tal-oriġini, dan l-aġġustament ma jirriskjax li jimmina l-effettività tal-miżura vis-a-vis il-produtturi tal-Unjoni u huwa improbabbli li sseħħ kwalunkwe esklużjoni u l-flussi kummerċjali tradizzjonali se jiġu ppreservati. Dan l-aġġustament se jiġi vvalutat mill-ġdid fid-dawl tal-iżvilupp tal-flussi kummerċjali f’dawn il-kategoriji u tas-sospensjoni tal-applikazzjoni tas-salvagwardja vis-a-vis l-Ukrajna, jew jekk jiġu identifikati effetti ta’ esklużjoni mhux dovuti.

(20)

Fil-miżura definittiva, il-Kummissjoni introduċiet mekkaniżmu li permezz tiegħu l-pajjiżi li jkunu eżawrew is-CSQ tagħhom ikunu jistgħu jaċċessaw ukoll (mingħajr dazju sal-eżawriment tagħha) il-kwota residwa inizjalment disponibbli fl-aħħar trimestru (April-Ġunju) ta’ kull perjodu annwali tal-miżura.

(21)

Il-Kummissjoni ġġustifikat dan il-mekkaniżmu fl-interess tal-importaturi u tal-utenti tal-Unjoni peress li dan mhux biss jiżgura ż-żamma tal-flussi kummerċjali tradizzjonali iżda jevita wkoll li, skont il-każ, partijiet mill-kwota tariffarja residwa jibqgħu ma jintużawx.

(22)

Fl-ewwel rieżami tal-funzjonament fl-2019, il-Kummissjoni osservat li f’żewġ kategoriji ta’ prodotti, il-pajjiżi li jibbenefikaw minn TRQ speċifika għall-pajjiż kienu użaw kważi esklussivament l-ammont sħiħ tal-kwota residwa fil-Q4 f’jumejn. B’riżultat ta’ dan, fornituri storiċi – iżgħar – ma setgħux jesportaw mingħajr dazju matul l-aħħar trimestru ta’ perjodu. Dan affettwa b’mod negattiv il-flussi kummerċjali tradizzjonali f’termini ta’ oriġini għad-detriment ta’ ċerti pajjiżi terzi u ċerti utenti tal-Unjoni. Biex tikkumpensa għal dan l-effett negattiv mhux intenzjonat, il-Kummissjoni introduċiet limitu massimu ta’ 30 % għal kull pajjiż li jaċċessa l-kwota residwa Q4 fil-Kategorija 13 (Rebars) u fil-Kategorija 16 (Vireg tal-wajer).

(23)

Fit-tieni rieżami tal-funzjonament fl-2020, u wara li identifikat aktar każijiet ta’ esklużjoni f’diversi kategoriji ta’ prodotti, il-Kummissjoni fasslet sistema li permezz tagħha l-aċċess għall-Q4 ikun jiddependi fuq ix-xejriet osservati tal-importazzjoni u l-użu reali tal-kwota residwa mill-fornituri iżgħar li huma l-benefiċjarji naturali ta’ din it-taqsima tat-TRQ (18).

(24)

Sabiex jiġi mminimizzat l-ispostament tal-oriġini tradizzjonali fil-kwota residwa, filwaqt li jkompli jiġi permess aċċess addizzjonali f’dawk il-kategoriji fejn ikun meħtieġ li jiġi żgurat l-użu massimu tal-kwota, il-Kummissjoni ħolqot sistema li biha kull kategorija ta’ prodotti taqa’ fi ħdan wieħed mit-tliet gruppi differenti li ġejjin, li jikkorrispondu għal tliet xenarji ta’ aċċess differenti. Din is-sistema tissodisfa wieħed mill-prinċipji u l-objettivi ewlenin tal-miżura ta’ salvagwardja, jiġifieri li jiġi żgurat li l-flussi kummerċjali tradizzjonali f’termini ta’ oriġini jiġu ppreservati.

(25)

Dawn it-tliet reġimi attwalment fis-seħħ huma:

(26)

Xi partijiet interessati (xi pajjiżi terzi u utenti) talbu li l-aċċess għall-kwota residwa fil-Q4 jitneħħa kompletament. Oħrajn talbu li ċerti bidliet isiru speċifiċi għal ċerti kategoriji ta’ prodotti, filwaqt li oħrajn (inklużi xi pajjiżi terzi u utenti, kif ukoll l-industrija tal-Unjoni) talbu l-projbizzjoni għal pajjiżi esportaturi akbar f’kategorija partikolari biex jaċċessaw il-kwota residwa kompletament jew biex jimplimentaw approċċ aktar restrittiv.

(27)

Il-Kummissjoni qieset, wara li eżaminat is-sottomissjonijiet li rċeviet u l-funzjonament tal-miżura, li s-sistema attwali kienet għadha l-aktar waħda xierqa sa fejn kienet tiżgura li l-utenti jimmassimizzaw iċ-ċansijiet tagħhom li jużaw il-kwota residwa, iżda wkoll li l-flussi kummerċjali tradizzjonali f’termini ta’ oriġini jiġu rrispettati (li huwa wkoll fl-interess tal-utenti). Is-sistema li tippermetti l-aċċess għall-kwota residwa kienet ir-regola fil-kategoriji kollha ta’ prodotti ħlief erbgħa.

(28)

L-aċċettazzjoni tat-talbiet mill-partijiet interessati tammonta jew għall-prevenzjoni ta’ ċerti utenti milli jżidu l-importazzjonijiet tagħhom mingħajr dazju fejn jista’ jkun hemm domanda għaliha fis-suq tal-Unjoni, jew tipprevjeni utenti oħra tal-Unjoni milli jixtru prodotti minn ċerti oriġini meħtieġa wkoll għas-suq tal-Unjoni minħabba l-effetti ta’ esklużjoni. Fl-istess ħin, is-sistema tiżgura li l-volumi addizzjonali li xi pajjiżi jistgħu jesportaw taħt din is-sistema jibqgħu fil-limiti li jiżguraw li dawn ma jimminawx l-effettività tal-miżura fir-rigward tal-produtturi tal-Unjoni. Għalhekk, is-sistema attwali hija l-aktar xierqa fl-interess ġenerali tal-Unjoni.

(29)

Fir-rieżami li kien għaddej, il-Kummissjoni vvalutat jekk kinux seħħew effetti ta’ esklużjoni. Biex tagħmel dan, il-Kummissjoni, abbażi tal-istess tip ta’ analiżi mwettqa fit-tieni rieżami, aġġornat ir-reġimi differenti abbażi tad-data disponibbli minn dak iż-żmien ’il quddiem. Dan ifisser li l-Kummissjoni analizzat id-data dwar l-importazzjoni u l-użu tal-kwota għal kull oriġini u kategorija mill-1 ta’ April 2020 sal-31 ta’ Marzu 2022.

(30)

Abbażi tal-istess metodoloġija applikata fit-tieni rieżami tal-funzjonament, iżda b’data aġġornata, ir-reġimi ta’ aċċess għal kull kategorija ta’ prodotti huma aġġornati kif ġej (għal volumi speċifiċi ara l-Anness II):

(31)

F’konformità mal-prinċipji applikati fir-rieżami tal-funzjonament preċedenti, il-kategoriji li ġejjin se jkunu soġġetti għal reġim speċjali:

(32)

Fil-każ tal-kategoriji 7, 8, 17 u 25A, dawn se jiġu amministrati globalment. Għalhekk, il-possibbiltà ta’ aċċess għall-Q4 ma hijiex applikabbli, peress li ma hemm l-ebda pajjiż li jesporta taħt kwota speċifika għall-pajjiż.

(33)

Għall-kategoriji 1 u 4B, ir-reġim attwali li bih jingħata aċċess fil-Q4 b’limitu massimu ta’ 30 % għal kull pajjiż esportatur għadu jitqies xieraq sabiex tiġi żgurata varjetà suffiċjenti ta’ sorsi ta’ provvista filwaqt li jiġu evitati l-effetti ta’ esklużjoni permezz ta’ fluss eċċessiv ta’ importazzjonijiet addizzjonali lil hinn mill-flussi kummerċjali tradizzjonali.

(34)

B’mod ġenerali, b’din il-karatteristika l-miżura tkompli tippermetti aċċess għall-kwota residwa fil-Q4 fil-maġġoranza l-kbira tal-kategoriji tal-prodotti (fil-kategoriji kollha ħlief tlieta).

(35)

Kwalunkwe pajjiż li qed jiżviluppa li huwa membru tad-WTO ġie eskluż mill-applikazzjoni tal-miżura definittiva, sakemm is-sehem tiegħu tal-importazzjonijiet jibqa’ anqas minn 3 % tal-importazzjonijiet totali għal kull kategorija ta’ prodotti. Il-Kummissjoni impenjat ruħha li timmonitorja l-iżvilupp tal-importazzjonijiet wara l-adozzjoni tal-miżura u li tirrieżamina l-lista tal-pajjiżi esklużi fuq bażi regolari.

(36)

L-aħħar aġġornament sar fil-qafas tal-investigazzjoni ta’ rieżami wara l-Ftehim dwar il-Ħruġ bejn l-Unjoni u r-Renju Unit (“ir-Renju Unit”), fl-1 ta’ Jannar 2021, u baqa’ ma nbidilx mill-1 ta’ Jannar 2021. Għalhekk, biex tadatta l-lista tal-pajjiżi fil-fażi tal-iżvilupp soġġetti għal, u esklużi mill-miżura, il-Kummissjoni reġgħet għamlet il-kalkoli abbażi tal-aktar data konsolidata disponibbli reċentement dwar l-importazzjonijiet, jiġifieri l-istatistika dwar l-importazzjonijiet għas-sena 2021 (19).

(37)

Il-bidliet li jirriżultaw minn dan l-aġġornament huma dawn li ġejjin (It-tabella aġġornata hija disponibbli fl-Anness I).

(38)

Ir-rata attwali ta’ liberalizzazzjoni tas-salvagwardja ġiet stabbilita b’rata annwali ta’ 3 %. F’din l-investigazzjoni, il-Kummissjoni vvalutat jekk dan il-livell ta’ liberalizzazzjoni kienx għadu xieraq.

(39)

Xi partijiet interessati (b’mod partikolari l-produtturi esportaturi u l-utenti tal-Unjoni) talbu li l-Kummissjoni żżid il-livell ta’ liberalizzazzjoni lil hinn minn 3 % (ħafna minnhom talbu rata ta’ liberalizzazzjoni ta’ 5 %), filwaqt li l-industrija tal-Unjoni talbet li l-pass tal-liberalizzazzjoni jitnaqqas għal 1 % minflok.

(40)

L-istrument ta’ salvagwardja huwa maħsub li jkun ta’ natura temporanja. Fl-1 ta’ Lulju 2022, il-miżura se tidħol fil-ħames sena ta’ applikazzjoni tagħha. L-objettiv tal-liberalizzazzjoni (li hija obbligu legali skont ir-regoli tad-WTO (21) u tal-UE (22)) huwa li progressivament tippermetti aktar kompetizzjoni fl-importazzjoni fis-suq waqt li l-industrija domestika qed taġġusta għal-livell ogħla ta’ importazzjonijiet. Dan biex tiġi evitata miżura li ma tinċentivax aġġustamenti għall-industrija domestika waqt li tkun fis-seħħ, u li toħloq problemi ta’ kompetittività meta l-industrija domestika tkun esposta għal kompetizzjoni barranija akbar f’xenarju ta’ wara l-miżura ta’ salvagwardja.

(41)

B’din il-loġika, il-Kummissjoni qieset li f’dan il-mument (wara erba’ snin tal-miżura) jenħtieġ li jiġi previst livell daqsxejn ogħla ta’ liberalizzazzjoni sena wara sena biex l-industrija domestika tiġi inkoraġġita tkompli bl-aġġustamenti tagħha, filwaqt li ssir attenzjoni biex ma tiġix imminata l-effettività tal-miżura.

(42)

Il-Kummissjoni qieset li l-istabbiliment tal-livell annwali ta’ liberalizzazzjoni għal 4 % mill-1 ta’ Lulju 2022 ikun xieraq.

(43)

Din iż-żieda jenħtieġ li tikkontribwixxi wkoll biex ittaffi kwalunkwe tensjoni għall-utenti tal-Unjoni f’ċerti kategoriji ta’ prodotti, f’kuntest ikkaratterizzat minn livell għoli ta’ inċertezza fis-suq. Min-naħa l-oħra, iż-żieda addizzjonali limitata ma toħloqx theddida għall-industrija tal-Unjoni u ma timminax l-effettività tal-miżura.

(44)

F’Marzu 2018, l-Istati Uniti imponew dazju ta’ 25 % fuq l-importazzjonijiet ta’ ċerti prodotti tal-azzar skont il-miżura tat-Taqsima 232 tal-Istati Uniti. Il-miżura attwalment għadha fis-seħħ għalkemm saru ċerti bidliet. F’din l-investigazzjoni ta’ rieżami, il-Kummissjoni vvalutat dawn il-bidliet sabiex tiddetermina jekk għandhomx xi impatt fuq il-miżura ta’ salvagwardja tal-UE, b’mod partikolari fir-rigward tar-riskju ta’ devjazzjoni tat-traffiku kummerċjali fis-suq tal-Unjoni.

(45)

It-talbiet li waslu f’dan ir-rigward jistgħu jinqasmu fi tliet tipi. Taħt l-ewwel tnejn, ċerti utenti u pajjiżi terzi sostnew li r-riskju ta’ devjazzjoni tat-traffiku kummerċjali huwa żgħir (iżgħar) minħabba l-aġġustamenti differenti għall-miżura tat-Taqsima 232. Imbagħad, xi partijiet sostnew li minħabba t-TRQs allokati lill-esportaturi tal-Unjoni, l-industrija tal-Unjoni tiddevja l-bejgħ lejn is-suq tal-Istati Uniti għad-detriment tal-bejgħ domestiku li joħloq nuqqas domestikament.

(46)

Min-naħa l-oħra, l-industrija tal-azzar tal-Unjoni sostniet li r-riskju ta’ devjazzjoni tat-traffiku kummerċjali jibqa’ hemm u l-aċċess imtejjeb tal-UE għas-suq tal-Istati Uniti mhux se jaffettwa l-kapaċità tagħhom li jfornu lis-suq domestiku (tal-Unjoni).

(47)

F’Ottubru 2021, l-Istati Uniti ddeċidew li jissoġġettaw l-importazzjonijiet tal-UE skont il-miżura tat-Taqsima 232 għal sistema ta’ TRQ. B’dan ir-reġim il-ġdid, l-UE tkun tista’ tesporta mingħajr dazju sa ċertu livell (abbażi tal-volumi storiċi tal-esportazzjoni) (23), u huwa biss meta dan il-livell jiġi eżawrit, li d-dazju ta’ 25 % isir applikabbli. Din l-azzjoni kellha l-għan li ttejjeb il-pożizzjoni tal-esportaturi tal-UE fis-suq tal-Istati Uniti, li sa dak iż-żmien kienet soġġetta għal dazju ta’ 25 % fuq kull tunnellata esportata. Din is-sistema l-ġdida hija applikabbli mill-1 ta’ Jannar 2022.

(48)

Xi partijiet interessati sostnew li minħabba li l-prezzijiet fl-Istati Uniti huma normalment ogħla milli fl-Unjoni, il-produtturi tal-UE jkollhom inċentiv biex jesportaw lejn l-Istati Uniti għad-detriment tal-bejgħ domestiku, u b’hekk jirriskjaw li joħolqu nuqqas fis-suq tal-Unjoni f’xi kategoriji.

(49)

Għal għadd ta’ raġunijiet, il-Kummissjoni qieset li dawn l-affermazzjonijiet jenħtieġ li jiġu miċħuda. L-ewwel nett, il-kunċett ta’ devjazzjoni tat-traffiku kummerċjali fis-suq tal-Unjoni ma jistax jinkludi l-limitazzjoni tal-esportazzjonijiet lejn l-Istati Uniti tal-industrija tal-UE nnifisha. Fi kliem ieħor, l-industrija tal-Unjoni qatt ma tista’ tkun f’riskju ta’ devjazzjoni tat-traffiku kummerċjali tal-bejgħ tagħha stess. Dan imur kontra l-loġika ta’ devjazzjoni tat-traffiku kummerċjali. Għalhekk, il-fatt li l-UE tista’ tkun kapaċi ttejjeb il-preżenza tagħha fis-suq tal-Istati Uniti huwa newtrali fir-rigward tar-riskju ta’ devjazzjoni tat-traffiku kummerċjali minn pajjiżi esportaturi lejn is-suq tal-Unjoni.

(50)

It-tieni, l-affermazzjonijiet li l-industrija tal-Unjoni tuża t-TRQs tagħha għad-detriment (prinċipalment jew saħansitra esklussivament) tal-bejgħ domestiku ma humiex issostanzjati b’evidenza. Dawn l-affermazzjonijiet ma kkunsidrawx li, teoretikament ukoll, l-industrija tal-Unjoni tista’ żżid il-volum tal-produzzjoni tagħha (24), u b’hekk ma tissagrifikax il-bejgħ domestiku u toħloq dħul addizzjonali permezz ta’ żieda fil-bejgħ għall-esportazzjoni lejn l-Istati Uniti, u li tista’ wkoll tidderieġi l-volumi lejn l-Istati Uniti mill-esportazzjonijiet lejn swieq oħra li jistgħu jkunu anqas attraenti għal għadd ta’ raġunijiet, inklużi l-livelli tal-prezzijiet (25).

(51)

Irrispettivament minn dawn il-possibbiltajiet teoretiċi kollha, ir-realtà wriet li fl-ewwel trimestru mid-dħul fis-seħħ tas-sistema tat-TRQ, l-UE għadha ’l bogħod milli tuża l-kwoti tagħha kollha. Fil-fatt, matul l-ewwel trimestru hija użat biss madwar 42 % tal-kwota (26).

(52)

Għalhekk, is-suppożizzjoni ewlenija magħmula minn xi partijiet interessati, u l-premessa li fuqha kienet ibbażata l-argumentazzjoni tagħhom, jiġifieri li l-produtturi esportaturi tal-UE jkunu jistgħu jużaw il-kwoti kollha tagħha fl-Istati Uniti, uriet li kienet żbaljata fl-ewwel lok.

(53)

Il-Kummissjoni kkonkludiet li l-fatt li l-UE hija soġġetta għal sistema ta’ TRQ skont il-miżuri tat-Taqsima 232 tal-Istati Uniti ma għandu l-ebda impatt fuq il-funzjonament tal-miżura ta’ salvagwardja fir-rigward tar-riskju ta’ devjazzjoni tat-traffiku kummerċjali. L-ebda parti lanqas ma wriet b’xi mod li l-esportazzjoni taħt reġim ta’ TRQ skont it-Taqsima 232 bħala tali toħloq riskju ta’ nuqqas ta’ provvista fis-suq tal-Unjoni.

(54)

Fir-rigward tal-affermazzjonijiet relatati mal-bidliet għat-Taqsima 232 tal-Istati Uniti vis-a-vis pajjiżi terzi oħra, id-data disponibbli għall-Kummissjoni wriet li kienu saru l-bidliet li ġejjin għall-miżura tat-Taqsima 232 tal-Istati Uniti:

(55)

L-investigazzjoni kkonkludiet li dawn l-aġġustamenti għat-Taqsima 232 tal-Istati Uniti b’mod ġenerali ftit għandhom impatt fuq il-funzjonament u r-raġunament tal-miżura ta’ salvagwardja tagħna għal għadd ta’ raġunijiet. L-ewwel nett, biex dawn il-bidliet jitqiegħdu f’perspettiva, il-biċċa l-kbira ta’ dawn il-pajjiżi attwalment bilkemm jesportaw kwalunkwe azzar lejn l-Unjoni (jekk xejn) (27), u lanqas ma huma fornituri storiċi (28). Fost il-ftit pajjiżi b’volumi ta’ esportazzjoni aktar sinifikattivi lejn l-Unjoni, jiġifieri r-Renju Unit, il-Ġappun u l-Korea, it-tlieta li huma għadhom soġġetti għall-miżura tat-Taqsima 232 tal-Istati Uniti, jiġifieri huma kostretti li jesportaw mingħajr dazju lejn is-suq tal-Istati Uniti. Fil-fatt, il-Korea hija permessa li tesporta biss taħt kwota (restrizzjoni kwantitattiva), mingħajr il-possibbiltà li tesporta lil hinn minn dak il-volum, u r-Renju Unit u l-Ġappun huma soġġetti għal TRQ li barra minnha japplika dazju ta’ 25 %. Barra minn hekk, il-fatt li jkun hemm TRQ fis-seħħ mhux neċessarjament ifisser li dawn il-pajjiżi se jkunu jistgħu jużaw b’mod effettiv il-volumi allokati lilha, kif muri mill-eżempju tat-TRQ allokata lill-UE. Fl-aħħar nett, il-biċċa l-kbira tal-oriġini li jirrappreżentaw il-biċċa l-kbira tal-importazzjonijiet lejn l-Unjoni għadhom soġġetti għal dazju ta’ 25 % fuq l-esportazzjonijiet tagħhom lejn l-Istati Uniti.

(56)

F’dan ir-rigward, ir-riskju ta’ devjazzjoni tat-traffiku kummerċjali jirriżulta, primarjament, mill-pajjiżi fornituri ewlenin tal-azzar lejn l-Unjoni, li għandhom kapaċitajiet ta’ riżerva (f’xi każijiet pjuttost kbar) u għalhekk jistgħu jżidu malajr (29) il-preżenza tagħhom fis-suq tal-Unjoni (30), li kif muri fl-investigazzjonijiet preċedenti huwa suq attraenti f’termini ta’ prezzijiet u ta’ daqs. (31)

(57)

Barra minn hekk, il-partijiet ma wrewx (jew saħansitra semmew) fis-sottomissjonijiet tagħhom kif is-sejbiet magħmula mill-Kummissjoni f’investigazzjonijiet preċedenti (32) kienu jinbidlu b’mod sostanzjali. B’mod partikolari l-kapaċità eċċessiva globali fis-settur tal-azzar li għadha tippersisti (33), it-tnaqqis sostanzjali tal-importazzjonijiet fis-suq tal-Istati Uniti meta mqabbel mal-perjodu ta’ qabel l-impożizzjoni tal-miżura tat-Taqsima 232 tal-Istati Uniti (34) jew in-nuqqas ta’ swieq sostituti għall-volumi mitlufa (35), fost l-oħrajn.

(58)

Fi kwalunkwe każ, it-titjib fl-aċċess għas-suq tal-Istati Uniti minn ċerti pajjiżi muri fil-premessa (54), jekk xejn, jagħmilha saħansitra aktar diffiċli għall-bqija tal-pajjiżi biex jesportaw lejn is-suq tal-Istati Uniti peress li huma komparattivament f’pożizzjoni kompetittiva agħar billi jkollhom iħallsu dazju ta’ 25 %. Fil-fatt, ir-ritmu tat-tnaqqis tal-importazzjonijiet tal-pajjiżi li ma huma soġġetti għall-ebda aċċess preferenzjali skont il-miżura tat-Taqsima 232 tal-Istati Uniti kien sostanzjalment ogħla mill-medja (36). Għalhekk, l-aġġustamenti għall-miżura tal-Istati Uniti jistgħu saħansitra jkomplu jżidu l-probabbiltà ta’ devjazzjoni tat-traffiku kummerċjali minn dawk il-pajjiżi terzi li ma jibbenefikaw minn ebda tip ta’ trattament preferenzjali skont il-miżura tat-Taqsima 232, li wħud minnhom min-naħa tagħhom huma l-pajjiżi aktar suxxettibbli li jikkawżaw żieda fl-importazzjonijiet lejn is-suq tal-Unjoni.

(59)

Għar-raġunijiet stabbiliti f’din is-subtaqsima, il-Kummissjoni kkonkludiet li l-bidliet għall-miżura tat-Taqsima 232 tal-Istati Uniti ma jaffettwawx il-funzjonament tas-salvagwardja tal-azzar tal-UE u ma jbiddlux il-bażi li fuqha hija bbażata l-valutazzjoni tagħha rigward ir-riskju ta’ devjazzjoni tat-traffiku kummerċjali.

(60)

Minbarra l-kwistjonijiet indirizzati fit-Taqsima 3, il-partijiet interessati għamlu talbiet oħra li huma indirizzati f’din it-taqsima.

(61)

Matul l-investigazzjoni u wara li ntemm l-istadju bil-miktub tal-proċediment, diversi partijiet interessati avviċinaw lill-Kummissjoni u talbu b’mod spontanju li l-miżura ta’ salvagwardja jenħtieġ li tiġi sospiża jew itterminata minħabba żieda fil-prezzijiet tal-azzar fl-Unjoni. Dawn il-partijiet argumentaw li t-terminazzjoni jew is-sospensjoni tas-salvagwardja tkun is-soluzzjoni biex il-prezzijiet tal-azzar jinġiebu f’livelli aktar baxxi.

(62)

L-ewwel nett, l-ambitu tar-rieżami ma kienx jinkludi terminazzjoni jew sospensjoni potenzjali tal-miżura. Għalhekk, it-tip ta’ evidenza miġbura u l-analiżi mwettqa matul l-investigazzjoni ma kinux tal-istess tip li terminazzjoni potenzjali ta’ miżura ta’ salvagwardja kienet tirrikjedi. Għalhekk, it-terminazzjoni tal-miżura ta’ salvagwardja kienet barra mill-ambitu tar-rieżami preżenti.

(63)

Madankollu, u għall-finijiet ta’ kompletezza, il-Kummissjoni qieset li kien xieraq li dawn it-talbiet jitqiegħdu f’kuntest u li tipprovdi analiżi fattwali tal-iżviluppi reċenti tas-suq f’dan ir-Regolament. F’dan ir-rigward, il-Kummissjoni stabbiliet li l-evoluzzjoni tal-prezzijiet tal-azzar fl-Unjoni wriet xejra ’l fuq fl-ewwel xhur tal-2022, fejn laħqu l-ogħla livell eżatt wara l-aggressjoni militari mhux provokata u mhux ġustifikata tar-Russja kontra l-Ukrajna, u li wrew sinjali ta’ tnaqqis kontinwu (bi tnaqqis ta’ 21 % meta mqabbel mal-ogħla livell milħuq fl-2022 (37)) mill-aħħar ta’ April 2022 (38).

(64)

Din ix-xejra fil-prezzijiet seħħet f’kuntest inflazzjonarju ġenerali, li affettwa wkoll il-materja prima u l-enerġija għall-produzzjoni tal-azzar. Fil-Prospettiva ta’ Medda Qasira tagħha (39)għall-2022 u għall-2023, l-Assoċjazzjoni Dinjija tal-Azzar (WSA) innotat li l-aggressjoni militari mhux provokata u mhux ġustifikata tar-Russja kontra l-Ukrajna se tkompli żżid il-pressjoni inflazzjonarja, minn naħa, permezz ta’ prezzijiet ogħla tal-enerġija u tal-materja prima għall-produzzjoni tal-azzar u, min-naħa l-oħra, permezz ta’ interruzzjonijiet kontinwi fil-katina tal-provvista. Dan ġie kkonfermat ukoll mill-aktar informazzjoni reċenti disponibbli dwar l-evoluzzjoni tal-prezzijiet tal-materja prima għall-produzzjoni tal-azzar (inkluża l-enerġija) minn sorsi bħall-OECD (40), il-Bank Dinji (41) u S&P Platts (42), li turi żieda fil-prezzijiet u xejra ġenerali ’l fuq b’livelli sostanzjalment ogħla milli f’perjodi preċedenti.

(65)

Il-valutazzjoni statistika proprja tal-Kummissjoni (43) kkonfermat ukoll li x-xejriet tal-prezzijiet fis-suq ewlieni tal-azzar madwar id-dinja kienu wrew xejra simili għal dik tal-Unjoni, u għalhekk, ix-xejra tal-prezzijiet osservata fis-suq tal-Unjoni kienet konsistenti b’mod sħiħ ma’ dik prevalenti fis-swieq ewlenin madwar id-dinja. F’dan l-isfond, il-Kummissjoni kkonkludiet li fi kwalunkwe każ, il-miżura ta’ salvagwardja ma setgħetx kienet il-kawża wara l-evoluzzjoni tal-prezzijiet fl-Unjoni.

(66)

Xi partijiet interessati sostnew li kien hemm nuqqas ta’ azzar fis-suq tal-Unjoni u li l-miżura ta’ salvagwardja tal-azzar kienet qed taggravah peress li ċerti kwoti ġew eżawriti. Għalhekk, fil-kuntest ta’ żieda fil-prezzijiet tal-azzar, huma talbu li l-miżura jenħtieġ li tiġi sospiża jew itterminata.

(67)

Il-Kummissjoni nnotat li l-użu tat-TRQ fl-ewwel tliet trimestri tar-raba’ sena tal-miżura (1 ta’ Lulju 2021 – 31 ta’ Marzu 2022) kien ta’ 77 %, jiġifieri aktar minn 5,6 miljun tunnellata tal-kwota baqgħu ma ntużawx, kif muri fit-tabella ta’ hawn taħt. Għalhekk, dan juri li l-utenti tal-Unjoni ġeneralment kellhom il-possibbiltà li jkomplu jżidu l-importazzjonijiet tal-azzar mingħajr dazju matul kull perjodu. Filwaqt li dan ma jeskludix li seta’ kien hemm aktar tensjonijiet fl-użu tal-kwota f’ċerti kategoriji meta mqabbla ma’ oħrajn, il-maġġoranza tal-kategoriji ta’ prodotti kellhom kwota mingħajr dazju disponibbli f’kull trimestru.

Tabella 1

Evoluzzjoni tal-użu tat-TRQ fl-ewwel tliet trimestri tas-sena 4  (44)

(68)

Il-Kummissjoni osservat ukoll li l-livell tal-importazzjonijiet fl-2021 kien qrib ħafna tal-ogħla livell ta’ importazzjonijiet li ntlaħaq fl-2018 (45). Barra minn hekk, il-Prospettiva ta’ Medda Qasira tal-Assoċjazzjoni Dinjija tal-Azzar (WSA) (46) għall-2022 u għall-2023 enfasizzat l-inċertezza fil-prospettiva ekonomika. Il-prospettiva tas-suq tal-azzar għall-2022 iddgħajfet b’mod partikolari b’riżultat tal-gwerra u d-domanda għall-azzar hija mistennija li tikber b’0,4 % fl-2022 u bi 2,2 % fl-2023.

(69)

F’dan l-isfond, u meta jitqies li l-livell tal-kwoti se jiżdied ulterjorment b’4 % mill-1 ta’ Lulju 2022, kif spjegat fit-Taqsima 3.4, il-Kummissjoni qieset li kwalunkwe pressjoni f’ċerti segmenti tas-suq jenħtieġ li fi kwalunkwe każ tittaffa, filwaqt li tiġi ppreservata l-effettività tal-miżura.

(70)

Xi partijiet interessati argumentaw li l-projbizzjoni tal-importazzjoni fuq ir-Russja u l-Belarussja kienet qed taffettwa b’mod sostanzjali l-kapaċità tagħhom li jimportaw, u sostnew li l-Kummissjoni jenħtieġ li ttemm il-miżura għal dawn ir-raġunijiet.

(71)

F’dan ir-rigward, il-Kummissjoni osservat li l-instabbiltà kkawżata mill-aggressjoni militari mhux provokata u mhux ġustifikata tar-Russja kontra l-Ukrajna u mis-sanzjonijiet sussegwenti fuq l-azzar imposti mill-UE huma fatturi inevitabbli preżenti fis-suq u li għalihom il-partijiet ikkonċernati kollha jeħtieġ li jaġġustaw progressivament.

(72)

Il-Kummissjoni madankollu ħadet azzjoni immedjata fl-ambitu tal-miżura ta’ salvagwardja biex timminimizza kemm jista’ jkun id-dannu kollaterali tal-projbizzjoni fuq l-importazzjoni permezz tar-ridistribuzzjoni tal-kwoti fis-seħħ minn April 2022. Dan l-aġġustament għall-miżura se jtaffi fil-biċċa l-kbira d-disturbi kkawżati lil ċerti utenti mill-projbizzjoni tal-importazzjoni fuq ir-Russja u l-Belarussja, billi jippermettilhom jaċċessaw dawk il-volumi mingħajr dazju minn oriġini oħra. Madankollu, inevitabbilment se jkun meħtieġ xi żmien biex l-utenti tal-Unjoni jadattaw għal din is-sitwazzjoni u jaqilbu għal fornituri ta’ oriġini oħra (47). B’mod partikolari, il-Kummissjoni rrikonoxxiet li f’xi każijiet, ċerti utenti jkunu jeħtieġu bidla prattikament sħiħa fil-fornituri, peress li d-dipendenza tagħhom fuq l-importazzjonijiet tal-azzar Russi u/jew Belarussi kienet għolja ħafna. Madankollu, l-eżistenza ta’ dawn is-sanzjonijiet fil-qasam tal-azzar ma tistax, minnha nnifisha, tqajjem dubji dwar il-validità jew in-neċessità tal-miżura ta’ salvagwardja.

(73)

Xi partijiet interessati talbu lill-Kummissjoni tirridistribwixxi l-kwoti speċifiċi għall-pajjiż allokati lill-Ukrajna minħabba li minħabba l-aggressjoni militari mhux provokata u mhux ġustifikata tar-Russja kontra l-Ukrajna, l-Ukrajna ma tkunx f’pożizzjoni li tesporta lejn l-Unjoni f’volumi sinifikattivi. Uħud minn dawn il-partijiet issuġġerew li l-Kummissjoni ssegwi l-istess approċċ użat fir-ridistribuzzjoni tal-kwoti mir-Russja u mill-Belarussja.

(74)

L-analiżi tal-Kummissjoni dwar l-użu tal-kwoti tal-Ukrajna qabel is-sospensjoni tar-regolament ta’ salvagwardja kif spjegat fil-premessa (9) uriet li fil-maġġoranza tal-kategoriji ta’ prodotti fejn kellha kwota speċifika għall-pajjiż, hija kienet kompliet tagħmel użu mill-kwoti. Għal dawk il-kategoriji fejn ma kinitx tirreġistra l-esportazzjonijiet, il-Kummissjoni globalizzat il-kwoti mill-oriġini l-oħra kollha soġġetti għall-miżura f’kull waħda minn dawk il-kategoriji ta’ prodotti, kif spjegat fit-Taqsima 3.1.1 hawn fuq. Il-Kummissjoni fakkret li l-kwoti li jappartjenu lill-Ukrajna (fin-nuqqas ta’ sospensjoni), ma jkunux disponibbli sakemm is-sospensjoni tal-miżura vis-a-vis dan il-pajjiż tibqa’ fis-seħħ.

(75)

Diversi partijiet interessati għamlu talbiet relatati ma’ kategoriji speċifiċi ta’ prodotti (dawn il-kategoriji kienu jvarjaw skont il-parti li għamlet it-talba). Dawn it-talbiet kienu jinkludu l-esklużjoni ta’ kategorija ta’ prodotti partikolari mill-miżura, it-trattament differenzjali ta’ oriġini partikolari f’ċerta kategorija ta’ prodotti, u l-applikazzjoni ta’ livell differenti ta’ liberalizzazzjoni skont il-kategorija tal-prodott.

(76)

Kif spjegat il-Kummissjoni f’regolamenti preċedenti, l-ambitu tal-miżura jikkonċerna prodott wieħed, jiġifieri ċerti prodotti tal-azzar. Bħala tali, il-Kummissjoni ma tistax tittratta l-kategoriji ta’ prodotti li jinkludu l-prodott ikkonċernat daqslikieku kienu individwalment prodott ikkonċernat fihom infushom. Il-Kummissjoni, fil-ġestjoni u l-amministrazzjoni tal-kwoti, u fejn kien fl-interess tal-Unjoni, aġġustat il-miżura biex tiżgura li l-objettivi tas-salvagwardja jkunu jistgħu jintlaħqu. Madankollu, il-Kummissjoni ma tistax tbiddel l-arkitettura bażika tal-miżura, pereżempju d-definizzjoni tal-ambitu tal-prodott, biex takkomoda talbiet minn partijiet interessati li jwasslu għal trattament diskriminatorju vis-a-vis kategoriji oħra ta’ prodotti u partijiet interessati, u fuq kollox, tkun inkonsistenti mad-disinn tal-miżura u l-ambitu tal-prodott definit mir-Regolament Definittiv.

(77)

Xi partijiet interessati talbu li l-Kummissjoni tneħħi l-miżura ta’ salvagwardja għal dawk il-kategoriji ta’ prodotti li huma soġġetti għal dazji anti-dumping u/jew kumpensatorji peress li, huma sostnew, dawn jagħtu lill-industrija tal-Unjoni protezzjoni suffiċjenti.

(78)

Il-Kummissjoni fakkret li r-raġunament u l-objettiv tal-istrument ta’ salvagwardja u dak ta’ strumenti oħra għad-difiża tal-kummerċ huma differenti, peress li ma jindirizzawx l-istess kwistjonijiet. Filwaqt li s-salvagwardji jindirizzaw iż-żieda fl-importazzjonijiet bħala r-riżultat ta’ żviluppi mhux previsti, l-istrumenti anti-dumping u kumpensatorji jindirizzaw prattiki kummerċjali inġusti. Wieħed jista’ jikkunsidra sitwazzjoni fejn pajjiż jinstab li qed jagħmel dumping f’kategorija ta’ prodotti partikolari f’mument partikolari, u li aktar tard, żieda fl-importazzjonijiet li tirriżulta minn żviluppi mhux previsti xorta waħda sseħħ minn kombinazzjoni ta’ oriġini. Barra minn hekk, l-ambitu taż-żewġ strumenti f’termini tal-oriġini koperti normalment ikun sostanzjalment differenti, kif inhuma wkoll it-tipi ta’ investigazzjonijiet imwettqa, inklużi r-regoli proċedurali. L-applikazzjoni taż-żewġ strumenti fuq kategorija ta’ prodotti partikolari fl-istess ħin hija għalhekk kompletament kompatibbli kemm skont ir-regoli tad-WTO kif ukoll skont ir-regoli tal-UE (48).

(79)

Xi partijiet interessati argumentaw li l-kwoti allokati lir-Renju Unit jenħtieġ li jiżdiedu biex jitqies il-kummerċ storiku bejn il-Gran Brittanja u l-Irlanda ta’ Fuq.

(80)

F’dan ir-rigward, il-Kummissjoni fakkret li l-Protokoll dwar l-Irlanda/l-Irlanda ta’ fuq (“il-Protokoll”) (49) huwa l-att legali rilevanti li jirregola l-istatus tal-Irlanda ta’ Fuq vis-a-vis ir-regoli kummerċjali u doganali tal-UE. Għalhekk, u f’konformità mad-dispożizzjonijiet tal-Protokoll, il-bejgħ tal-azzar fl-Irlanda ta’ Fuq (kemm jekk mill-Gran Brittanja jew minn kwalunkwe pajjiż terz ieħor) ma ngħaddx bħala importazzjonijiet storiċi fl-Unjoni u għalhekk ma kienx parti mill-kalkolu tal-kwota (50). Dan l-approċċ kien jiżgura li l-leġiżlazzjoni ta’ implimentazzjoni tal-UE fil-qasam tas-salvagwardji tibqa’ kompletament konsistenti mal-Protokoll. Għalhekk, din it-talba ġiet miċħuda.

(81)

Xi partijiet indikaw każijiet possibbli ta’ ċirkomvenzjoni tal-miżura. B’mod partikolari, xi partijiet indikaw l-allegata ċirkomvenzjoni mir-Russja fil-kategoriji 12 u 13, u b’mod ġenerali, fil-kategorija 28.

(82)

F’dan ir-rigward, il-Kummissjoni tinnota li r-Russja bħalissa hija soġġetta għal projbizzjoni fuq l-importazzjoni. Għalhekk, kwalunkwe tentattiv biex jiġu evitati l-miżuri attwali huwa mmonitorjat mill-UE u mill-awtoritajiet doganali nazzjonali.

(83)

Fl-aħħar nett, il-Kummissjoni tosserva li r-rieżami attwali li jemenda l-miżura ta’ salvagwardja li għaddejja jikkonforma wkoll mal-obbligi li jirriżultaw mill-Ftehimiet bilaterali ffirmati ma’ ċerti pajjiżi terzi.

(84)

Il-miżuri previsti f’dan ir-Regolament huma skont l-opinjoni tal-Kumitat dwar is-Salvagwardji stabbilit skont l-Artikolu 3(3) tar-Regolament (UE) 2015/478 u l-Artikolu 22(3) tar-Regolament (UE) 2015/755 rispettivament,