(1)

Ir-Regolamenti tal-Kummissjoni (KE) Nru 451/2000 (2) u (KE) Nru 703/2001 (3) jistipolaw regoli dettaljati għall-implimentazzjoni tat-tieni stadju tal-programm ta’ ħidma msemmi fl-Artikolu 8(2) tad-Direttiva tal-Kunsill 91/414/KEE u jistabbilixxu lista ta’ sustanzi attivi li għandhom jiġu assessjati, sabiex jiġu possibilment inklużi fl-Anness I tad-Direttiva 91/414/KEE. Dik il-lista tinkludi l-oxamyl.

(2)

Għall-oxamyl l-effetti fuq is-saħħa tal-bniedem u fuq l-ambjent ġew assessjati skond id-dispożizzjonijiet stipolati mir-Regolamenti (KE) Nru 451/2000 u (KE) Nru 703/2001 għal firxa ta’ użi proposti min-notifikant. Aktar minn hekk, dawk ir-regolamenti jaħtru l-Istati Membri Rapporteurs li għandhom jissottomettu r-rapporti evalwattivi u r-rakkomandazzjonijiet rilevanti lill-Awtorità Ewropea dwar is-Sigurtà Alimentari (EFSA) skond l-Artikolu 8(1) tar-Regolament (KE) Nru 451/2000. Għall-oxamyl l-Istat Membru Rapporteur kien l-Irlanda u kull informazzjoni rilevanti ġiet sottomessa nhar it-25 ta’ Awissu 2003.

(3)

Ir-rapport evalwattiv ġie analizzat abbażi ta’ mpar (peer review) mill-Istati Membri u mill-EFSA fi ħdan il-Grupp ta’ Ħidma u ġie ppreżentat lill-Kummissjoni fl-14 ta’ Jannar 2005 fil-format tar-Rapport Xjentifiku EFSA għall-oxamyl (4). Dan ir-rapport ġie rivedut mill-Istati Membri u mill-Kummissjoni fi ħdan il-Kumitat Permanenti dwar il-Katina Alimentari u s-Saħħa ta’ l-Annimal u ġie ffinalizzat fil-15 ta’ Lulju 2005 fil-format tar-rapport ta’ reviżjoni tal-Kummissjoni għall-oxamyl.

(4)

Minn bosta eżaminazzjonijiet li saru deher li l-prodotti għall-protezzjoni tal-pjanti li fihom l-oxamyl jistgħu jiġu mistennija li jissodisfaw, b’mod ġenerali, il-kondizzjonijiet stipolati fl-Artikolu 5(1) (a) u (b) tad-Direttiva 91/414/KEE, b’mod partikolari dwar l-użi li ġew eżaminati u mniżżla fid-dettall fir-rapport ta’ reviżjoni tal-Kummissjoni. Huwa għalhekk xieraq li l-oxamyl jiġi inkluż fl-Anness I, biex jiġi żgurat li fl-Istati Membri kollha l-awtorizzazzjonijiet tal-prodotti tal-protezzjoni tal-pjanti li fihom din is-sustanza jingħataw skond id-dispożizzjonijiet ta’ dik id-Direttiva.

(5)

Mingħajr preġudizzju għal dik il-konklużjoni, huwa xieraq li tinkiseb iktar informazzjoni dwar ċerti punti speċifiċi. L-Artikolu 6(1) tad-direttiva 91/414/KE jistipola li l-inklużjoni ta’ sustanza fl-Anness I tista’ tkun soġġetta għal ċerti kondizzjonijiet. Għalhekk huwa xieraq li jinħtieġ li l-oxamyl għandu jiġi soġġett għal iktar testjar għall-konferma ta’ l-assessjar tar-riskju dwar ċerti kwistjonijiet u li studji bħal dawn għandhom jiġu ppreżentati min-notifikant.

(6)

L-esperjenza miksuba minn inklużjonijiet preċedenti fl-Anness I tad-Direttiva 91/414/KEE ta’ sustanzi attivi li ġew assessjati fil-kwadru tar-Regolament (KE) Nru 3600/92 (5) wriet li diffikoltajiet jistgħu jinħolqu fl-interpretazzjoni tad-dmirijiet tad-detenturi ta’ l-awtorizzazzjonijiet eżistenti meta mqabbla ma’ l-aċċess għad-data. Sabiex jiġu evitati iktar diffikoltajiet jidher neċessarju li jiġu ċċarati d-dmirijiet ta’ l-Istati Membri, speċjalment id-dmir li jiġi vverifikat li d-detentur ta’ awtorizzazzjoni juri aċċess għal dossier li huwa f’ konformità mal-kondizzjonijiet ta’ l-Anness II ta’ dik id-Direttiva. Madankollu, din il-kjarifika ma timponix xi obbligi ġodda fuq l-Istati Membri jew fuq id-detenturi ta’ l-awtorizzazzjonijiet meta mqabbla mad-direttivi li ġew adottati sa issa li jemendaw l-Anness I.

(7)

Għandu jitħalla jgħaddi perjodu ta’ żmien raġonevoli qabel ma sustanza attiva tiġi inkluża fl-Anness I sabiex l-Istati Membri u l-partijiet interessati jħejju rwieħhom sabiex jilħqu l-kondizzjonijiet l-ġodda li jirriżultaw mill-inklużjoni.

(8)

Mingħajr preġudizzju għall-obbligazzjonijiet stipolati mid-Direttiva 91/414/KEE b’konsegwenza ta’ l-inklużjoni ta’ sustanza attiva fl-Anness I, l-Istati Membri għandhom jingħatawperjodu ta’ sitt xhur wara l-inklużjoni ħalli jirrevedu l-awtorizzazzjonijiet ta’ prodotti għall-protezzjoni tal-pjanti eżistenti li fihom l-oxamyl sabiex jaċċertaw li l-kondizzjonijiet stipolati fid-Direttiva 91/414/KEE, u b’mod partikolari l-Artikolu 13 tagħha u l-kondizzjonijiet rilevanti stipolati fl-Anness I, jiġu ssodisfati. L-Istati Membri għandhom ivarjaw, jissostitwixxu jew jirtiraw, kif xieraq, l-awtorizzazzjonijiet eżistenti, skond id-dispożizzjonijiet tad-Direttiva 91/414/KEE. Permezz ta’ deroga mil-limitu ta’ żmien stabbilit hawn fuq, għandu jiġi pprovdut perjodu itwal għas-sottomissjoni u għall-evalwazzjoni tad-dossier komplut ta’ l-Anness III għal kull prodott għall-protezzjoni tal-pjanti għal kull użu intenzjonat skond il-prinċipji uniformi stipolati fid-Direttiva 91/414/KEE.

(9)

Huwa għalhekk xieraq li d-Direttiva 91/414/KEE tiġi emendata skond dan.

(10)

Il-miżuri previsti f’din id-Direttiva huma in konformità ma’ l-opinjoni tal-Kumitat Permanenti dwar il-Katina Alimentari u s-Saħħa ta’ l-Annimali,