—

tannulla d-Deċiżjoni tal-Kummissjoni C(2019) 2526 final tat-2 ta’ April 2019 dwar l-Għajnuna mill-Istat SA.44896 implimentata mir-Renju Unit dwar l-Eżenzjoni mill-Finanzjament tal-Gruppi ta’ CFC;

—

fi kwalunkwe każ, tordna lill-Kummissjoni tbati l-ispejjeż tar-rikorrenti relatati ma’ din il-kawża.

1.

L-ewwel motiv ibbażat fuq il-fatt li l-Kummissjoni wettqet żball ta’ liġi u żball manifest ta’ evalwazzjoni meta kkonkludiet li s-sistema rilevanti ta’ referenza hija s-sistema CFC u mhux is-sistema tat-taxxa fuq il-kumpanniji tar-Renju Unit. B’mod partikolari, il-konklużjoni tal-Kummissjoni li s-sistema ta’ referenza hija s-sistema CFC tar-Renju Unit tapplika l-ġurisprudenza tal-qrati tal-Unjoni Ewropea b’mod żbaljat. Minflok, il-Kummissjoni kellha tikkonkludi li s-sistema ta’ referenza xierqa kienet is-sistema tat-taxxa fuq il-kumpanniji tar-Renju Unit, li minnha s-sistema CFC tagħmel parti intrinsika u inseparabbli.

2.

It-tieni motiv ibbażat fuq il-fatt li l-Kummissjoni wettqet żball ta’ liġi u żball manifest ta’ evalwazzjoni fir-rigward tal-għanijiet tas-sistema ta’ referenza.

3.

It-tielet motiv ibbażat fuq il-fatt li l-Kummissjoni wettqet żball ta’ liġi u żball manifest ta’ evalwazzjoni u naqset milli timmotiva l-konklużjoni tagħha li l-Eżenzjoni mill-Finanzjament tal-Gruppi tammonta għal deroga selettiva mis-sistema ta’ referenza u, b’mod partikolari, li impriżi li jirċievu tipi oħra ta’ profitti finanzjarji mhux kummerċjali huma f’pożizzjoni legali u fattwali li hija komparabbli għal dik ta’ impriżi li jirċievu profitti finanzjarji mhux kummerċjali minn self kwalifikanti. Fil-fatt, il-Kummissjoni żbaljat meta kkonkludiet li l-profitti finanzjarji mhux kummerċjali li joriġinaw minn self upstream u kaxex tal-flus ma joħolqux riskju materjalment ikbar ta’ devjazzjoni artifiċjali minn self kwalifikanti. Barra minn hekk, il-Kummissjoni żbaljat billi ffokat fuq it-teknika leġiżlattiva, iktar milli l-effetti, tal-Eżenzjoni mill-Finanzjament tal-Gruppi.

4.

Ir-raba’ motiv ibbażat fuq il-fatt li l-Kummissjoni wettqet żball ta’ liġi u żball manifest ta’ evalwazzjoni u naqset milli timmotiva l-konklużjoni tagħha li l-Eżenzjoni mill-Finanzjament tal-Gruppi ma kinitx iġġustifikata min-natura u mill-istruttura globali tar-regoli tat-taxxa fir-rigward tat-test tal-funzjonijiet tal-persuni sinjifikattivi. B’mod partikolari, il-Kummissjoni wettqet żball meta kkonkludiet li l-piż amministrattiv għall-applikazzjoni tat-test tal-funzjonijiet tal-persuni sinjifikattivi ma jiġġustifikax l-Eżenzjoni mill-Finanzjament tal-Gruppi, u li l-Eżenzjoni mill-Finanzjament tal-Gruppi ma hijiex iġġustifikata min-neċessità li jiġu osservati l-libertajiet fit-Trattat dwar il-Funzjonament tal-Unjoni Ewropea.

5.

Il-ħames motiv ibbażat fuq il-fatt li l-Kummissjoni wettqet żball ta’ liġi u żball manifest ta’ evalwazzjoni fir-rigward tal-eżistenza ta’ vantaġġ, kif meħtieġ mill-Artikolu 107 TFUE. L-evalwazzjoni tal-Kummissjoni hija bbażata fuq affermazzjonijiet mhux issostanzjati u hija naqset milli effettivament turi li jeżisti vantaġġ, mhux sempliċement tistipula li seta’ kien hemm vantaġġ f’ċerti ċirkustanzi.