This document is an excerpt from the EUR-Lex website
Document 32017D0168
Commission Implementing Decision (EU) 2017/168 of 31 January 2017 on the identification of ‘Internet Engineering Task Force’ Technical Specifications for referencing in public procurement (Text with EEA relevance. )
Deċiżjoni ta' Implimentazzjoni tal-Kummissjoni (UE) 2017/168 tal-31 ta' Jannar 2017 dwar l-identifikazzjoni tal-Ispeċifikazzjonijiet Tekniċi tal-“Internet Engineering Task Force” għar-referenzjar fl-akkwist pubbliku (Test b'rilevanza għaż-ŻEE. )
Deċiżjoni ta' Implimentazzjoni tal-Kummissjoni (UE) 2017/168 tal-31 ta' Jannar 2017 dwar l-identifikazzjoni tal-Ispeċifikazzjonijiet Tekniċi tal-“Internet Engineering Task Force” għar-referenzjar fl-akkwist pubbliku (Test b'rilevanza għaż-ŻEE. )
C/2017/0271
ĠU L 27, 1.2.2017, p. 151–154
(BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)
In force
1.2.2017 |
MT |
Il-Ġurnal Uffiċjali tal-Unjoni Ewropea |
L 27/151 |
DEĊIŻJONI TA' IMPLIMENTAZZJONI TAL-KUMMISSJONI (UE) 2017/168
tal-31 ta' Jannar 2017
dwar l-identifikazzjoni tal-Ispeċifikazzjonijiet Tekniċi tal-“Internet Engineering Task Force” għar-referenzjar fl-akkwist pubbliku
(Test b'rilevanza għaż-ŻEE)
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat ir-Regolament (UE) Nru 1025/2012 tal-Parlament Ewropew u tal-Kunsill tal-25 ta' Ottubru 2012 dwar l-Istandardizzazzjoni Ewropea, li jemenda d-Direttivi tal-Kunsill 89/686/KEE u 93/15/KEE u d-Direttivi 94/9/KE, 94/25/KE, 95/16/KE, 97/23/KE, 98/34/KE, 2004/22/KE, 2007/23/KE, 2009/23/KE u 2009/105/KE tal-Parlament Ewropew u tal-Kunsill u li jħassar id-Deċiżjoni tal-Kunsill 87/95/KEE u d-Deċiżjoni Nru 1673/2006/KE tal-Parlament Ewropew u tal-Kunsill (1), u b'mod partikolari l-Artikolu 13(1) tiegħu,
Wara li kkonsultat mal-pjattaforma Ewropea ta' bosta partijiet ikkonċernati dwar l-istandardizzazzjoni tal-ICT u l-esperti fis-settur
Billi:
(1) |
L-istandardizzazzjoni għandha rwol importanti fil-ħidma favur l-istrateġija Ewropa 2020, kif stabbilit fil-Komunikazzjoni tal-Kummissjoni “Ewropa 2020: Strateġija għal tkabbir intelliġenti, sostenibbli u inklussiv” (2). Diversi inizjattivi ewlenin tal-istrateġija Ewropa 2020 jisħqu fuq l-importanza tal-istandardizzazzjoni volontarja fis-swieq tal-prodotti jew tas-servizzi sabiex tiġi żgurata l-kompatibbiltà u l-interoperabbiltà bejn il-prodotti u s-servizzi, sabiex jitrawwem l-iżvilupp teknoloġiku u sabiex jingħata appoġġ lill-innovazzjoni. |
(2) |
Ir-rilevanza tal-istandards hija rrikonoxxuta wkoll fil-Komunikazzjoni tal-Kummissjoni “Naġġornaw is-Suq Uniku: aktar opportunitajiet għaċ-ċittadini u għan-negozji” (3) li tqis l-istandards bħala essenzjali għall-kompetittività Ewropea u kruċjali għall-innovazzjoni u l-progress fis-Suq Uniku għax iżidu s-sikurezza, l-interoperabbiltà u l-kompetizzjoni u jgħinu biex jitneħħew l-ostakli għall-kummerċ. |
(3) |
It-tlestija tas-Suq Uniku Diġitali hija prijorità ewlenija għall-Unjoni Ewropea, kif ġie enfasizzat fl-Istħarriġ Annwali dwar it-Tkabbir 2015 (4). Fil-Komunikazzjoni tagħha dwar l-Istrateġija għal Suq Uniku Diġitali għall-Ewropa (5), il-Kummissjoni saħqet fuq ir-rwol tal-istandardizzazzjoni u tal-interoperabbiltà fil-ħolqien ta' Ekonomija Diġitali Ewropea b'potenzjal ta' tkabbir fit-tul. |
(4) |
Fis-soċjetà diġitali, ir-riżultati tanġibbli tal-istandardizzazzjoni huma indispensabbli biex tiġi żgurata l-interoperabbiltà bejn l-apparati, l-applikazzjonijiet, ir-repożitorji tad-dejta, is-servizzi u n-netwerks. Il-Komunikazzjoni tal-Kummissjoni “Viżjoni strateġika għal standards Ewropej: il-mixja 'l quddiem biex jittejjeb u jitħaffef it-tkabbir sostenibbli tal-ekonomija Ewropea sal-2020” (6) tirrikonoxxi l-ispeċifiċità tal-istandardizzazjoni fil-qasam tat-teknoloġiji tal-informazzjoni u tal-komunikazzjoni (l-ICT), fejn is-soluzzjonijiet, l-applikazzjonijiet u s-servizzi ħafna drabi jiġu żviluppati minn Fora u Konsorzji globali tal-ICT, li saru organizzazzjonijiet ewlenin għall-iżvilupp tal-istandards tal-ICT. |
(5) |
Ir-Regolament (UE) Nru 1025/2012 għandu l-għan li jimmodernizza u jtejjeb il-qafas Ewropew tal-istandardizzazzjoni. Jistabbilixxi sistema li biha l-Kummissjoni tista' tiddeċiedi li tidentifika l-ispeċifikazzjonijiet tekniċi tal-ICT li huma l-iktar rilevanti u aċċettati maħruġin minn organizzazzjonijiet li mhumiex organizzazzjonijiet tal-istandardizzazzjoni Ewropej, internazzjonali jew nazzjonali. Il-possibbiltà li tintuża l-medda sħiħa tal-ispeċifikazzjonijiet tekniċi tal-ICT fl-akkwist ta' ħardwer, softwer u servizzi tat-teknoloġija tal-informazzjoni se tippermetti l-interoperabbiltà bejn l-apparati, is-servizzi u l-applikazzjonijiet, se tgħin lill-amministrazzjonijiet pubbliċi jevitaw ir-restrizzjonijiet li jseħħu meta x-xerrej pubbliku ma jkunx jista' jibdel il-fornitur wara l-iskadenza tal-kuntratt tal-akkwist minħabba l-użu ta' soluzzjonijiet proprjetarji tal-ICT, u se tħeġġeġ il-kompetizzjoni fil-provvista ta' soluzzjonijiet interoperabbli tal-ICT. |
(6) |
Sabiex l-ispeċifikazzjonijiet tekniċi tal-ICT ikunu eliġibbli għar-referenzjar fl-akkwist pubbliku, iridu jikkonformaw mar-rekwiżiti stabbiliti fl-Anness II tar-Regolament (UE) Nru 1025/2012. Il-konformità ma' dawk ir-rekwiżiti tiggarantixxi lill-awtoritajiet pubbliċi li l-ispeċifikazzjonijiet tekniċi tal-ICT huma stabbiliti skont il-prinċipji tal-aċċess miftuħ, tal-imparzjalità, tal-oġġettività u tan-nondiskriminazzjoni li huma rrikonoxxuti mill-Organizzazzjoni Dinjija tal-Kummerċ fil-qasam tal-istandardizzazzjoni. |
(7) |
Id-deċiżjoni li tiġi identifikata l-ispeċifikazzjoni tal-ICT għandha tiġi adottata wara konsultazzjoni tal-Pjattaforma Ewropea ta' bosta partijiet ikkonċernati dwar l-istandardizzazzjoni tal-ICT, stabbilita permezz tad-Deċiżjoni tal-Kummissjoni (7) ikkumplimentata minn forom oħra ta' konsultazzjoni ta' esperti fis-settur. |
(8) |
Fil-11 ta' Ġunju 2015, il-pjattaforma Ewropea ta' bosta partijiet ikkonċernati dwar l-istandardizzazzjoni tal-ICT evalwat 27 speċifikazzjoni teknika tal-“Internet Engineering Task Force” billi qabblithom mar-rekwiżiti stabbiliti fl-Anness II tar-Regolament (UE) Nru 1025/2012 u tat parir pożittiv dwar l-identifikazzjoni tagħhom għar-referenzjar fl-akkwist pubbliku. Sussegwentement, l-evalwazzjoni tal-ispeċifikazzjonijiet tekniċi tal-IETF ġiet ippreżentata għall-konsultazzjoni ta' esperti fis-settur li tennew il-parir pożittiv dwar l-identifikazzjoni. |
(9) |
Is-27 speċifikazzjoni teknika huma żviluppati u ġestiti mill-Internet Engineering Task Force (IETF), il-korp prinċipali involut fl-iżvilupp ta' speċifikazzjonijiet standard ġodda tal-Internet ta' kwalità għolja għat-tfassil, l-użu u l-ġestjoni tal-Internet. L-IETF hija organizzazzjoni globali bbażata fuq il-“proċess standard tal-Internet”, proċess miftuħ, trasparenti u bbażat fuq il-kunsens użat mill-komunità tal-Internet għall-istandardizzazzjoni ta' protokolli u proċeduri għall-benefiċċju tal-utenti kollha madwar id-dinja. |
(10) |
Is-27 speċifikazzjoni teknika tal-IETF jintużaw b'mod estensiv għall-finijiet tal-Internet. Dawn jikkonsistu fi standards u protokolli għall-istabbiliment ta' netwerk tal-Internet (il-Protokoll tal-Kontroll tat-Trażmissjoni/il-Protokoll tal-Internet (TCP/IP — Transmission Control Protocol/Internet protocol), il-Protokoll tad-Datagramma tal-Utent (UDP — User Datagram Protocol), is-Sistema tal-Isem ta' Dominju (DNS — Domain Name System), il-Protokoll ta' Konfigurazzjoni Dinamika tal-Host (DHCP — Dynamic Host Configuration Protocol), il-Protokoll Sempliċi għall-Ġestjoni tan-Netwerk (SNMP — Simple Network Management Protocol), l-Arkitettura ta' Sigurtà għall-Protokoll tal-Internet (Ipsec — Security Architecture for the Internet Protocol) u l-Protokoll għas-Sinkronizzazzjoni tan-Netwerk (NTP — Network Time Protocol)); l-istandards u l-protokolli għall-konnessjonijiet siguri (il-Protokoll Secure Shell-2 (SSH-2), il-Protokoll tat-Transport Layer Security (TLS) u l-Profil tal-Internet X.509 taċ-Ċertifikat għall-Infrastruttura taċ-Ċavetta Pubblika u tal-Lista ta' Revoka taċ-Ċertifikat (CRL — Certificate Revocation List) (PKIX — Public Key Infrastructure Certificate)); l-istandards u l-protokolli sabiex jiġi stabbilit sit web (il-Protokoll tat-Trasferiment tal-Hypertext (HTTP — Hypertext Transfer Protocol), l-Aġġornament għal TLS fl-HTTP/1.1 (HTTPS — Upgrading to TLS Within HTTP/1.1), l-Identifikaturi Uniformi tar-Riżorsi (URI — Uniform Resource Identifiers), il-Lokalizzatur Uniformi tar-Riżorsi (URL — Uniform Resource Locator), l-Ismijiet Uniformi tat-Riżorsi (URN — Uniform Resource Names), il-Protokoll tat-Trasferiment tal-Fajls (FTP — File Transfer Protocol), il-Format tat-Trasformazzjoni Unicode ta' 8 bits (UTF-8 — 8-bit Unicode Transformation Format), in-Notazzjoni tal-Oġġetti JavaScript (JSON — JavaScript Object Notation)); l-istandards u l-protokolli għall-applikazzjonijiet tal-posta elettronika, tal-kalendarju u tal-aħbarijiet (il-Protokoll Sempliċi għat-Trasferiment tal-Posta Elettronika (SMTP — Simple Mail Transfer Protocol), il-Protokoll ta' Aċċess tal-Messaġġi tal-Internet (IMAP — Internet Message Access Protocol), il-Post Office Protocol — verżjoni 3 (POP3), il-Multipurpose Internet Mail Extensions (MIME), il-Protokoll għat-Trasferiment tal-Aħbarijiet fuq in-Netwerk (NNTP — Network News Transfer Protocol), u l-Ispeċifikazzjoni tal-Oġġetti Bażiċi tal-Kalendarju u tal-Iskedar fuq l-Internet (iCalendar — Internet Calendaring and Scheduling Core Object Specification), il-vCard (VCF), il-Format Komuni u t-Tip MIME għall-Valuri Mifrudin b'Virgola (CSV — Common Format and MIME Type for Comma-Separated Values)) u l-istandards u l-protokolli għall-applikazzjonijiet tal-istreaming tal-multimedia (il-Protokoll tat-Trasport fil-Ħin Reali (RTP — Real-time Transport Protocol) u l-Protokoll tal-Inizjazzjoni tas-Sessjoni (SIP — Session Initiation Protocol). |
(11) |
Għalhekk, is-27 speċifikazzjoni teknika tal-IETF għandhom jiġu identifikati bħala speċifikazzjoni teknika tal-ICT eliġibbli għar-referenzjar fl-akkwist pubbliku. |
ADOTTAT DIN ID-DEĊIŻJONI:
Artikolu 1
L-ispeċifikazzjonijiet tekniċi tal-“Internet Engineering Task Force” elenkati fl-Anness huma eliġibbli għar-referenzjar fl-akkwist pubbliku.
Artikolu 2
Din id-Deċiżjoni għandha tidħol fis-seħħ fl-għoxrin jum wara dak tal-pubblikazzjoni tagħha f'Il-Ġurnal Uffiċjali tal-Unjoni Ewropea.
Magħmul fi Brussell, il-31 ta' Jannar 2017.
Għall-Kummissjoni
Il-President
Jean-Claude JUNCKER
(1) ĠU L 316, 14.11.2012, p. 12.
(2) COM(2010) 2020 final tat-3 ta' Marzu 2010.
(3) COM(2015) 550 final tat-28 ta' Ottubru 2015.
(4) COM(2014) 902 final tat-28 ta' Novembru 2014.
(5) COM(2015) 192 final tas-6 ta' Mejju 2015.
(6) COM(2011) 311 finali tal-1 ta' Ġunju 2011.
(7) Id-Deċiżjoni tal-Kummissjoni tat-28 ta' Novembru 2011 li twaqqaf Pjattaforma Ewropea ta' bosta Partijiet Interessati dwar l-Istandardizzazzjoni tal-ICT (ĠU C 349, 30.11.2011, p. 4).
ANNESS
Il-lista tal-Ispeċifikazzjonijiet Tekniċi tal-“Internet Engineering Task Force” (IETF) għar-referenzjar fl-akkwist pubbliku (1)
1. |
Il-Protokoll tal-Kontroll tat-Trażmissjoni/il-Protokoll tal-Internet (TCP/IP) |
2. |
Il-Protokoll tad-Datagramma tal-Utent (UDP) |
3. |
Is-Sistema tal-Isem ta' Dominju (DNS) |
4. |
Il-Protokoll ta' Konfigurazzjoni Dinamika tal-Host (DHCP) |
5. |
Il-Protokoll Sempliċi għall-Ġestjoni tan-Netwerk (SNMP) |
6. |
L-Arkitettura ta' Sigurtà għall-Protokoll tal-Internet (IPsec) |
7. |
Il-Protokoll għas-Sinkronizzazzjoni tan-Netwerk (NTP) |
8. |
Il-Protokoll Secure Shell-2 (SSH-2) |
9. |
Il-Protokoll tat-Transport Layer Security (TLS) |
10. |
Il-Profil tal-Internet X.509 taċ-Ċertifikat għall-Infrastruttura taċ-Ċavetta Pubblika u tal-Lista ta' Revoka taċ-Ċertifikat (CRL) (PKIX) |
11. |
Il-Protokoll tat-Trasferiment tal-Hypertext (HTTP) |
12. |
L-Aġġornament għal TLS fl-HTTP/1.1 (HTTPS) |
13. |
L-Identifikaturi Uniformi tar-Riżorsi (URI) |
14. |
Il-Lokalizzatur Uniformi tar-Riżorsi (URL) |
15. |
L-Ismijiet Uniformi tat-Riżorsi (URN) |
16. |
Il-Protokoll tat-Trasferiment tal-Fajls (FTP) |
17. |
Il-Format tat-Trasformazzjoni Unicode ta' 8 bits (UTF-8) |
18. |
il-Protokoll Sempliċi għat-Trasferiment tal-Posta Elettronika (SMTP) |
19. |
Il-Protokoll ta' Aċċess tal-Messaġġi tal-Internet (IMAP) |
20. |
Il-Post Office Protocol — verżjoni 3 (POP3) |
21. |
Il-Multipurpose Internet Mail Extensions (MIME) |
22. |
Il-Protokoll għat-Trasferiment tal-Aħbarijiet fuq in-Netwerk (NNTP) |
23. |
L-Ispeċifikazzjoni tal-Oġġetti Bażiċi tal-Kalendarju u tal-Iskedar fuq l-Internet (iCalendar) |
24. |
Il-format ta' fajl standard għall-business cards elettroniċi (vCard) |
25. |
Il-Format Komuni u t-Tip MIME għall-Valuri Mifrudin b'Virgola (CSV) |
26. |
Il-Protokoll tat-Trasport fil-Ħin Reali (RTP) |
27. |
Il-Protokoll tal-Inizjazzjoni tas-Sessjoni (SIP). |
(1) L-ispeċifikazzjonijiet tal-IETF jistgħu jitniżżlu mingħajr ħlas minn http://www.rfc-editor.org/