MEMORANDUM TA’ SPJEGAZZJONI

1.KUNTEST TAL-ATT DELEGAT

L-Unjoni u l-Istati Membri tagħha huma Partijiet għall-Konvenzjoni ta’ Basel dwar il-kontroll tal-moviment barra l-konfini ta’ skart perikoluż u r-rimi tiegħu (“il-Konvenzjoni ta’ Basel”), li ġiet adottata fit-22 ta’ Marzu 1989 u li daħlet fis-seħħ fl-1992 1 . Il-Konvenzjoni ta’ Basel għandha 191 Parti.

Il-Konferenza tal-Partijiet tal-Konvenzjoni ta’ Basel iddeċidiet fil-ħmistax-il laqgħa tagħha fis-17 ta’ Ġunju 2022 li tinkludi l-iskart elettriku u elettroniku kollu taħt il-mekkaniżmi ta’ kontroll tal-Konvenzjoni (Deċiżjoni BC-15/18). Dawn it-tipi ta’ skart se jkunu inklużi fl-Annessi II u VIII tal-Konvenzjoni ta’ Basel. L-entrati attwali għal tali skart fl-Annessi VIII u IX se jiġu sostitwiti bl-entrati l-ġodda. Dawn il-bidliet se jtejbu l-kontrolli tal-vjeġġi transkonfinali tal-iskart elettriku u elettroniku, u b’hekk iħeġġu l-immaniġġjar ambjentalment korrett tagħhom u jikkontribwixxu biex jitrażżan il-moviment illegali tal-iskart li jaqsam il-fruntieri.

Dawn il-bidliet se jsiru effettivi fl-1 ta’ Jannar 2025.

2.KONSULTAZZJONIJIET QABEL L-ADOZZJONI TAL-ATT

Dan ir-Regolament Delegat issawwar biex jimplimenta fid-dritt tal-Unjoni l-bidliet ta’ hawn fuq fir-rigward tal-Annessi tal-Konvenzjoni ta’ Basel u jkompli jibni fuq il-formulazzjoni tad-deċiżjoni dwar din il-materja adottata mill-Konferenza tal-Partijiet (COP) fil-Konvenzjoni ta’ Basel fil-ħmistax-il laqgħa tagħha. Kien hemm konsultazzjoni sostanzjali mal-Istati Membri u mal-partijiet ikkonċernati dwar din il-kwistjoni, fl-okkażjoni tad-definizzjoni tal-pożizzjoni tal-UE fis-COP tal-Konvenzjoni ta’ Basel u wara.

Imbagħad, l-implimentazzjoni tal-bidliet rispettivi fil-Konvenzjoni ta’ Basel permezz ta’ dan ir-Regolament Delegat kompliet tiġi diskussa mal-Istati Membri fil-laqgħat tal-Grupp ta’ Ħidma tal-Kunsill dwar Kwistjonijiet Ambjentali Internazzjonali, li jittrattaw il-Konvenzjoni ta’ Basel u matul Laqgħa tal-Esperti dwar l-Iskart li saret fit-13 ta’ Mejju 2024 2 . Il-partijiet ikkonċernati ġew infurmati wkoll matul dan il-proċess u setgħu jieħdu sehem fil-laqgħa tal-grupp ta’ esperti. Il-partijiet ikkonċernati ġew ikkonsultati b’mod informali dwar il-kwistjoni mill-Kummissjoni matul Frar 2024. Il-Kummissjoni ddiskutiet l-abbozz ukoll matul diversi laqgħat bilaterali mal-partijiet ikkonċernati.

L-abbozz tal-att ġie ppubblikat għall-feedback pubbliku 3 , u matul il-perjodu bejn il-5 ta’ Ġunju 2024 u t-3 ta’ Lulju 2024 il-Kummissjoni rċeviet kummenti u kontribut minn 27 parti kkonċernata. Minħabba li l-qofol ta’ dan ir-Regolament Delegat hija simili għall-abbozz tar-Regolament Delegat li jemenda r-Regolament (UE) 2024/1157 li ġie ppubblikat għall-feedback pubbliku fl-istess perjodu ta’ żmien 4 u minħabba l-fatt li xi pożizzjonijiet tal-partijiet ikkonċernati previsti għal dak l-att huma rilevanti wkoll għal dan ir-Regolament Delegat, dawn id-dikjarazzjonijiet kollha tqiesu b’mod konġunt.

Il-konsultazzjoni ta’ feedback pubbliku wriet appoġġ estensiv għall-inkorporazzjoni tal-entrati l-ġodda tal-Konvenzjoni ta’ Basel dwar l-iskart elettriku u elettroniku fil-dritt tal-Unjoni, fir-rigward tar-regoli dwar l-esportazzjoni ta’ skart elettriku u elettroniku mill-UE lejn pajjiżi terzi, kif ukoll dwar l-importazzjoni minn dawn il-pajjiżi lejn l-UE. L-inkorporazzjoni tal-entrata l-ġdida dwar l-iskart elettriku u elettroniku perikoluż tal-Konvenzjoni ta’ Basel, fir-rigward tal-vjeġġi ta’ tali skart bejn l-Istati Membri, ġiet appoġġata wkoll b’mod ġenerali.

Min-naħa l-oħra, għadd ta’ assoċjazzjonijiet tar-riċiklaturi u tar-riċiklaturi, kif ukoll rappreżentanti minn diversi setturi industrijali, indikaw li jkun sproporzjonat li tiġi applikata l- “proċedura ta’ notifika u kunsens bil-miktub minn qabel” għall-vjeġġi ta’ skart elettriku u elettroniku mhux perikoluż bejn l-Istati Membri, li bħalissa huma soġġetti għar-“rekwiżiti ġenerali ta’ informazzjoni” skont l-Artikolu 18 tar-Regolament 1013/2006 (l-hekk imsejħa “proċedura tal-lista l-ħadra”). Huma jargumentaw li r-regoli għat-trattament ta’ tali skart huma armonizzati madwar l-UE u jiżguraw livell simili ta’ protezzjoni ambjentali fl-Istati Membri. Kwantitajiet kbar ta’ skart bħal dan jiġu ttrasportati għar-riċiklaġġ bejn l-Istati Membri. L-applikazzjoni tal-“proċedura ta’ notifika u kunsens bil-miktub minn qabel” tkun tinvolvi dewmien u kostijiet ġodda għal tali vjeġġi. Dan idgħajjef l-objettivi tal-UE li żżid ir-riċiklaġġ tal-iskart elettriku u elettroniku, b’mod partikolari għall-materja prima kritika.

Ħafna mill-partijiet ikkonċernati li esprimew dan it-tħassib issuġġerew li jinżammu r-regoli attwali dwar il-vjeġġi ta’ skart elettroniku fl-UE, inkluża l-klassifikazzjoni ta’ skart elettroniku mhux perikoluż taħt l-entrati GC010 u GC020, sal-1 ta’ Jannar 2027. F’dak iż-żmien is-sistema għall-implimentazzjoni tal-iskambju elettroniku obbligatorju ta’ informazzjoni u dokumenti relatati mal-vjeġġi ta’ skart stabbilita skont ir-Regolament (UE) 2024/1157 hija mistennija li tkun kompletament operazzjonali u tippermetti implimentazzjoni sħiħa effiċjenti tal-kontrolli ta’ Basel wara l-1 ta’ Jannar 2027. Dan ikun ifisser li għall-iskart elettroniku mhux perikoluż ir-rekwiżiti ta’ informazzjoni ġenerali tal-Artikolu 18 tar-Regolament (KE) Nru 1013/2006 jibqgħu applikabbli sakemm l-Artikolu 18 ta’ dak ir-Regolament ma jibqax applikabbli.

Il-Kummissjoni qieset l-argumenti kollha li tqajmu, inkluża d-data ġdida pprovduta mill-partijiet ikkonċernati dwar l-ammonti ta’ skart elettriku u elettroniku mhux perikoluż ittrasportat bejn l-Istati Membri f’konformità mar-rekwiżiti ta’ informazzjoni ġenerali tal-Artikolu 18 tar-Regolament (KE) Nru 1013/2006. B’riżultat ta’ dan, saru bidliet fl-att delegat, li dwaru l-Istati Membri u l-partijiet ikkonċernati ġew ikkonsultati f’Settembru 2024. Il-bidla hija relatata mar-reġim li japplika għall-vjeġġi ta’ skart elettroniku mhux perikoluż fl-UE, li jkomplu jkunu soġġetti għall-istess regoli bħal dawk li huma fis-seħħ bħalissa.

L-entrati l-ġodda fil-Konvenzjoni ta’ Basel dwar l-iskart elettriku u elettroniku se jsiru effettivi mill-1 ta’ Jannar 2025 fuq livell globali. L-implimentazzjoni tad-dħul il-ġdid fil-liġi tal-UE jenħtieġ li ssir sa dik id-data. Id-distinzjoni tal-bidu tal-applikazzjoni tar-regoli dwar l-esportazzjoni ta’ skart bħal dan barra mill-UE u dwar vjeġġi ta’ tali skart bejn l-Istati Membri tirriskja li jkollha impatt negattiv fuq iċ-ċarezza legali u tikkawża li l-azzjonijiet ta’ infurzar isiru aktar ikkumplikati. Min-naħa l-oħra, il-possibbiltà ta’ perjodu tranżitorju li fih ir-regoli attwali dwar it-trasport ta’ skart ta’ tagħmir elettriku u elettroniku elenkat fil-lista ħadra bejn l-Istati Membri jkomplu japplikaw sakemm l-applikazzjoni ta’ proċeduri diġitalizzati tnaqqas il-piżijiet amministrattivi meta l-iskart jiġi soġġett għall-proċedura ta’ notifika, se tiffaċilita l-vjeġġ ta’ tali skart lejn il-faċilitajiet xierqa ta’ riċiklaġġ f’konformità mal-objettivi tal-ekonomija ċirkolari filwaqt li tiżgura kontroll suffiċjenti. Il-vjeġġi ta’ skart elenkat fil-lista ħadra huma mmonitorjati skont ir-“rekwiżiti ta’ informazzjoni ġenerali” skont l-Artikolu 18 tar-Regolament (KE) 1013/2006. Dan ifisser li kull vjeġġ irid ikun akkumpanjat mill-informazzjoni li tinsab fl-Anness VII ta’ dak ir-Regolament. Din il-proċedura hija miżura speċifika skont il-leġiżlazzjoni tal-UE, li tapplika għall-iskart kollu elenkat fil-lista ħadra, bħala garanzija dwar it-traċċabbiltà u s-sostenibbiltà għall-vjeġġi ta’ dan l-iskart u l-ġestjoni tiegħu.

3.ELEMENTI LEGALI TAL-ATT DELEGAT

Il-Kummissjoni għandha s-setgħa tadotta atti delegati permezz tal-Artikolu 58 tar-Regolament (KE) Nru 1013/2006 dwar Vjeġġi ta’ Skart biex temenda l-Annessi tar-Regolament sabiex jitqiesu l-bidliet u jiġu riflessi d-deċiżjonijiet maqbula skont il-Konvenzjoni ta’ Basel.

Dan l-att delegat jipprevedi bidliet fl-Annessi III, IV u V tar-Regolament (KE) Nru 1013/2006, filwaqt li titqies id-Deċiżjoni tal-Kunsill (UE) 2020/1829 tal-24 ta’ Novembru 2020 5 .

Dawn il-bidliet tfasslu biex:

·jinkorporaw l-entrata l-ġdida dwar l-iskart elettriku u elettroniku perikoluż (A1181) maqbula skont il-Konvenzjoni ta’ Basel fir-Regolament (KE) Nru 1013/2006 (l-Anness V),

·jinkorporaw l-entrata l-ġdida dwar l-iskart elettriku u elettroniku mhux perikoluż (Y49) maqbula skont il-Konvenzjoni ta’ Basel fir-Regolament (KE) Nru 1013/2006 (l-Anness V),

·iħassru r-referenzi għall-entrata B1110 fl-Anness III, peress li din l-entrata mhux se tibqa’ tapplika mill-1 ta’ Jannar 2025,

·iħassru r-referenzi għall-entrata A1180 fl-Anness IV, peress li din l-entrata mhux se tibqa’ tapplika mill-1 ta’ Jannar 2025,

·iħassru r-referenzi għall-entrata A1180, kif ukoll għall-entrati B1110 u B4030, fl-Anness V, peress li dawn l-entrati mhux se jibqgħu japplikaw mill-1 ta’ Jannar 2025,

·jippermettu t-trasport ta’ skart elettroniku mhux perikoluż ikklassifikat taħt l-entrati GC010 u GC020 fl-Unjoni f’konformità mar-rekwiżiti ġenerali tal-Artikolu 18 tar-Regolament (KE) Nru 1013/2006,

·jiġu stabbiliti dispożizzjonijiet tranżizzjonali biex tiġi żgurata ċ-ċertezza tad-dritt għall-operaturi ekonomiċi u għall-awtoritajiet kompetenti kif ukoll biex jiġi żgurat approċċ armonizzat għall-implimentazzjoni tal-emendi introdotti minn dan ir-Regolament.

L-att delegat ma għandu ebda implikazzjoni fuq il-baġit tal-UE.

REGOLAMENT DELEGAT TAL-KUMMISSJONI (UE) .../...

ta'18.10.2024

li jemenda r-Regolament (KE) Nru 1013/2006 fir-rigward ta’ bidliet fuq vjeġġi ta’ skart elettriku u elettroniku maqbula skont il-Konvenzjoni ta’ Basel

(Test b’rilevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament tal-Parlament Ewropew u tal-Kunsill (KE) Nru 1013/2006 tal-14 ta’ Ġunju 2006 dwar vjaġġi ta’ skart 6 , u b’mod partikolari l-Artikolu 58(1), il-punt (a), tiegħu,

Billi:

(1)Fil-ħmistax-il laqgħa tagħha li saret f’Ġunju 2022, il-Konferenza tal-Partijiet għall-Konvenzjoni ta’ Basel iddeċidiet, permezz tad-Deċiżjoni BC-15/18, li tinkludi entrata ġdida għal skart elettriku u elettroniku perikoluż (entrata A1181) fl-Anness VIII tal-Konvenzjoni ta’ Basel, filwaqt li tħassar l-entrata A1180 f’dak l-Anness u żżid entrata ġdida għal skart elettriku u elettroniku mhux perikoluż (entrata Y49) fl-Anness II tal-Konvenzjoni ta’ Basel, filwaqt li tħassar l-entrata attwali għal tali skart (entrata B1110) fl-Anness IX tal-Konvenzjoni ta’ Basel kif ukoll tħassar l-entrata B4030 fl-Anness IX tal-Konvenzjoni ta’ Basel. Dawk il-bidliet se jsiru effettivi fl-1 ta’ Jannar 2025.

(2)Jixraq li l-Unjoni, li hija Parti għall-Konvenzjoni ta’ Basel, timmodifika l-entrati relatati mal-iskart elettriku u elettroniku fl-Annessi rilevanti tar-Regolament (KE) Nru 1013/2006 meta jirreferu għall-Annessi tal-Konvenzjoni ta’ Basel.

(3)Fir-rigward tal-esportazzjoni tal-iskart elettriku u elettroniku mill-Unjoni lejn pajjiżi terzi u l-importazzjoni tal-iskart ta’ dan it-tip fl-Unjoni minn pajjiżi terzi, jenħtieġ li l-Annessi III, IV u V tar-Regolament (KE) No 1013/2006 jenħtieġ li jitqiesu l-bidliet fl-Annessi II, VIII u IX tal-Konvenzjoni ta’ Basel. B’riżultat ta’ dan, mill-1 ta’ Jannar 2025, l-esportazzjonijiet mill-Unjoni lejn pajjiżi terzi li għalihom tapplika d-Deċiżjoni tal-Kunsill dwar il-Kontroll ta’ Movimenti Transkonfinali ta’ Skart Destinat għal Operazzjonijiet ta’ Rkupru tal-Organizzazzjoni għall-Kooperazzjoni u l-Iżvilupp Ekonomiċi 7 (OECD)(“id-Deċiżjoni tal-OECD”), u l-importazzjonijiet fl-Unjoni ta’ skart elettriku u elettroniku skont l-entrata A1181 fl-Anness VIII tal-Konvenzjoni ta’ Basel u skont l-entrata Y49 fl-Anness II tal-Konvenzjoni ta’ Basel, jenħtieġ li jkunu soġġetti għall-proċedura ta’ notifika u kunsens bil-miktub minn qabel. F’konformità mal-Artikolu 36(1), il-punti (a) u (b), tar-Regolament (KE) Nru 1013/2006 u l-Anness V ta’ dak ir-Regolament, jenħtieġ li tiġi pprojbita l-esportazzjoni tal-iskart elettriku u elettroniku skont l-entrati A1181 fl-Anness VIII tal-Konvenzjoni ta’ Basel u Y49 fl-Anness II tal-Konvenzjoni ta’ Basel lejn pajjiżi terzi li għalihom ma tapplikax l-OECD.

(4)Ir-rekwiżiti tal-Artikolu 18 tar-Regolament (KE) Nru 1013/2006 jenħtieġ li jibqgħu applikabbli għall-vjeġġi bejn l-Istati Membri ta’ skart elettriku u elettroniku mhux perikoluż skont l-entrati GC010 u GC020 sakemm jibqa’ japplika l-Artikolu 18 ta’ dak ir-Regolament. L-Artikolu 18 jiżgura s-superviżjoni u l-kontroll tal-vjeġġi bil-ħsieb tal-ġestjoni ambjentalment soda tagħhom.

(5)Dan ir-Regolament iqis il-fatt li ma ntlaħaq l-ebda ftehim fl-OECD biex jiġu inkorporati l-emendi għall-Annessi tal-Konvenzjoni ta’ Basel dwar l-iskart elettriku u elettroniku jiġu inkorporati fl-Appendiċijiet tad-Deċiżjoni tal-OECD. Għalhekk, jenħtieġ li l-entrati GC010 u GC020 fl-Annessi III u IV tar-Regolament (KE) Nru 1013/2006 ma jibqgħux jiġu applikati mill-1 ta’ Jannar 2025 għall-esportazzjoni tal-iskart elettriku u elettroniku mill-Unjoni lejn pajjiżi terzi u għall-importazzjoni ta’ tali skart fl-Unjoni minn pajjiżi terzi.

(6)Għalhekk, ir-Regolament (UE) Nru 1013/2006 jenħtieġ li jiġi emendat skont dan.

(7)Peress li l-bidliet fl-Annessi tal-Konvenzjoni ta’ Basel mhux se jkunu effettivi qabel l-1 ta’ Jannar 2025, l-applikazzjoni ta’ dan ir-Regolament jenħtieġ li tiġi differita għal dik id-data.

(8)Sabiex tiġi żgurata ċ-ċertezza legali għall-operaturi ekonomiċi u għall-awtoritajiet kompetenti kif ukoll biex jiġi żgurat approċċ armonizzat għall-implimentazzjoni tal-bidliet introdotti b’dan ir-Regolament, jenħtieġ li jiġu introdotti dispożizzjonijiet tranżizzjonali li jispeċifikaw li l-kunsens għall-vjeġġi ta’ skart elettriku u elettroniku maħruġ qabel id-data tal-applikazzjoni ta’ dan ir-Regolament jibqa’ validu sal-1 ta’ Jannar 2026 jew sal-iskadenza ta’ tali kunsens meta jiskadi qabel dik id-data. Barra minn hekk, in-notifikanti jenħtieġ li sal-1 ta’ Frar 2025 jitħallew jaġġornaw notifika li ġiet sottomessa qabel il-31 ta’ Diċembru 2024 biex jallinjawha mal-bidliet introdotti b’dan ir-Regolament.

(9)In-notifikaturi jenħtieġ li jitħallew jissottomettu notifiki dwar vjeġġi ta’ skart elettriku u elettroniku abbażi tal-entrati l-ġodda diġà qabel l-1 ta’ Jannar 2025, sabiex jiġi ffaċilitat it-teħid rapidu tad-deċiżjonijiet,

ADOTTAT DAN IR-REGOLAMENT:

Artikolu 1

L-Annessi III, IV u V tar-Regolament (KE) Nru 1013/2006 huma emendati f’konformità mal-Anness ta’ dan ir-Regolament.

Artikolu 2

Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Għandu jibda japplika mill-1 ta’ Jannar 2025. Madankollu, in-notifikaturi jistgħu diġà qabel dik id-data jissottomettu notifiki dwar vjeġġi ta’ skart elettriku u elettroniku skont ir-Regolament (KE) Nru 1013/2006 kif emendat b’dan ir-Regolament.

Fir-rigward ta’ vjeġġi ta’ skart elettriku u elettroniku kklassifikat taħt l-entrati A1180, B1110, B4030, GC010 jew GC020, jew ta’ skart mhux ikklassifikat taħt entrata waħda unika jew fl-Anness III, IIIB jew IV tar-Regolament (KE) Nru 1013/2006, li għalihom awtorità kompetenti tkun tat il-kunsens tagħha qabel l-1 ta’ Jannar 2025 ħlief għal vjeġġi ta’ skart elettriku u elettroniku mhux perikoluż lejn pajjiżi li għalihom ma tapplikax id-Deċiżjoni tal-OECD, il-kunsens għandu jibqa’ validu sal-1 ta’ Jannar 2026 jew sal-iskadenza ta’ tali kunsens meta dan jiskadi qabel dik id-data.

Meta notifikatur ikun ippreżenta notifika dwar vjeġġi ta’ skart ikklassifikat taħt l-entrati A1180, B1110, B4030, GC010 jew GC020 qabel il-31 ta’ Diċembru 2024 u l-awtoritajiet kompetenti ma jkunux ħadu deċiżjoni sa dik id-data, in-notifikatur għandu jitħalla jaġġorna n-notifika biex jallinjaha mar-regoli l-ġodda introdotti b’dan ir-Regolament sal-1 ta’ Frar 2025.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, 18.10.2024

(1)

DRAFT

(2)    Id-Deċiżjoni tal-Kunsill 93/98/KEE dwar it-tmiem, f’isem il-Komunità, tal-Konvenzjoni ta’ Basel tat-22 ta’ Marzu 1989 dwar il-kontroll tal-moviment barra l-konfini ta’ skart perikoluż u r-rimi tiegħu, ĠU L 39, 16.2.1993, p. 1.

(3)     https://ec.europa.eu/transparency/expert-groups-register/screen/meetings/consult?lang=mt&meetingId=53508&fromExpertGroups=03343  

(4)     https://ec.europa.eu/info/law/better-regulation/have-your-say/initiatives/14176-Kummerc-tal-iskart-elettroniku-1-emendi-g%C4%A7all-annessi-tal-Konvenzjoni-ta-Basel_mt

(5)     https://ec.europa.eu/info/law/better-regulation/have-your-say/initiatives/14174-Kummerc-tal-iskart-elettroniku-2-emendi-g%C4%A7all-annessi-tal-Konvenzjoni-ta-Basel_mt  

(6)    Ara d-Deċiżjoni tal-Kunsill (UE) 2020/1829 tal-24 ta’ Novembru 2020, disponibbli fuq chrome-extension://efaidnbmnnnibpcajpcglclefindmkaj/https://eur-lex.europa.eu/legal-content/MT/TXT/PDF/?uri=CELEX:32020D1829&from=mt

(7)    ĠU L 190, 12.7.2006, p. 1, ELI: https://eur-lex.europa.eu/eli/reg/2006/1013/oj?locale=mt.

(8)    OECD/LEGAL/0266.

ANNESS

Emendi għar-Regolament (KE) 1013/2006 fir-rigward ta’ bidliet fuq vjeġġi ta’ skart elettriku u elettroniku maqbula skont il-Konvenzjoni ta’ Basel

L-Annessi III, IV u V tar-Regolament (KE) Nru 1013/2006 huma emendati kif ġej:

(1)l-Anness III huwa emendat kif ġej:

(a)fil-Parti I, jitħassar il-punt (e);

(b)fil-Parti II, taħt l-intestatura “Skart ieħor li fih metalli”, in-nota f’qiegħ il-paġna li ġejja għandha tiżdied mal-kodiċi GC010:

“[1] l-entrata GC010 għandha tapplika biss għall-iskart ittrasportat fl-Unjoni.”

(c)fil-Parti II, taħt l-intestatura “Skart ieħor li fih metalli”, in-nota f’qiegħ il-paġna li ġejja għandha tiżdied mal-kodiċi GC020:

“[2] l-entrata GC020 għandha tapplika biss għall-iskart ittrasportat fl-Unjoni.”

(2)L-Anness IV, Parti I huwa emendat kif ġej:

(a)il-punt (c) huwa sostitwit b’dan li ġej:

“(c) l-entrata A2060 tal-klassifikazzjoni ta’ Basel ma għandhiex tapplika u minflok għandha tapplika l-entrata GG040 tal-OECD fil-Parti II tal-Anness III, fejn ikun xieraq.”

(b)jiżdied li punt li ġej:

“(g) Għall-iskart ittrasportat fl-Unjoni, l-entrata Y49 ta’ Basel ma għandhiex tapplika u minflok għandhom japplikaw l-entrati GC010 u GC020 fil-Parti II tal-Anness III, fejn xieraq.”

(3)L-Anness V huwa emendat kif ġej:

(a)il-Parti 1 hija emendata kif ġej:

(i)Fil-Lista A, it-taqsima A1, l-entrata A1180 hija sostitwita b’din l-entrata li ġejja:

“A1181    Skart elettriku u elettroniku (innota l-entrata relatata Y49 fil-Lista A tal-Parti 3 fl-Anness V):

–L-iskart ta’ tagħmir elettriku u elettroniku

–li fih jew li huwa kkontaminat bil-kadmju, biċ-ċomb, bil-merkurju, bil-komposti organoaloġeni jew b’kostitwenti oħra tal-Anness I sal-punt li l-iskart juri karatteristika tal-Anness III, jew

–b’komponent li jkun fih jew li jkun ikkontaminat bil-kostitwenti tal-Anness I sal-punt li l-komponent juri karatteristika tal-Anness III, inkluż iżda mhux limitat għal xi wieħed mill-komponenti li ġejjin:

–ħġieġ minn tubi katodiċi inklużi fil-lista A

–batterija inkluża fil-lista A

–swiċċ, lampa, tubu fluworexxenti jew apparat ta’ wiri bir-retroilluminazzjoni li fih il-merkurju

–kapaċitatur li fih il-PCBs

–komponent li fih l-asbestos

–ċerti bordijiet ta’ ċirkwiti

–ċerti apparati ta’ wiri

–ċerti komponenti tal-plastik li fihom ritardant tal-fjammi bromurat

–Komponenti ta’ skart ta’ tagħmir elettriku u elettroniku li fihom jew li huma kkontaminati b’kostitwenti tal-Anness I sal-punt li l-komponenti tal-iskart juru karatteristika tal-Anness III, sakemm ma jkunux koperti minn entrata oħra fil-lista A

–Skart li jiġi mill-ipproċessar ta’ skart ta’ tagħmir elettriku u elettroniku jew komponenti ta’ skart ta’ tagħmir elettriku u elettroniku, u li jkun fih jew li jkun ikkontaminat b’kostitwenti tal-Anness I sal-punt li l-iskart juri karatteristika tal-Anness III (eż. frazzjonijiet li jirriżultaw minn tqattigħ jew żarmar), sakemm ma jkunx kopert minn entrata oħra fil-lista A”

(ii) fil-Lista B, it-taqsima B1, titħassar l-entrata B1110;

(iii) fil-Lista B, it-taqsima B4, titħassar l-entrata B4030.

(b)fil-Parti 3, il-Lista A, tiżdied l-entrata Y49 li ġejja:

“Y49    Skart elettriku u elettroniku:

–L-iskart ta’ tagħmir elettriku u elettroniku

–ma fihx u mhux ikkontaminat bil-kostitwenti tal-Anness I sal-punt li l-iskart juri karatteristika tal-Anness III, u

–fejn l-ebda wieħed mill-komponenti (eż. ċerti bordijiet ta’ ċirkwiti, ċerti apparati ta’ wiri) ma fihom jew ma huma kkontaminati bil-kostitwenti tal-Anness I sal-punt li l-komponent juri karatteristika tal-Anness III

–Komponenti ta’ skart ta’ tagħmir elettriku u elettroniku (eż. ċerti bordijiet ta’ ċirkwiti, ċerti apparati ta’ wiri) li ma fihomx u li ma humiex ikkontaminati b’kostitwenti tal-Anness I sal-punt li l-komponenti tal-iskart juru karatteristika tal-Anness III, sakemm ma jkunux koperti minn entrata oħra fl-Anness II jew entrata fl-Anness IX

–Skart li jiġi mill-ipproċessar ta’ skart ta’ tagħmir elettriku u elettroniku jew komponenti ta’ skart ta’ tagħmir elettriku u elettroniku (eż. frazzjonijiet li jirriżultaw minn tqattigħ jew żarmar), li ma fihx u li mhux ikkontaminat b’kostitwenti tal-Anness I sal-punt li l-iskart juri karatteristika tal-Anness III, sakemm ma jkunx kopert minn entrata oħra fl-Anness II jew entrata fl-Anness IX.”