16.12.2016   

MT

Il-Ġurnal Uffiċjali tal-Unjoni Ewropea

L 342/30

(1)

Fid-29 ta' Marzu 2016 in-Netherlands talbu l-awtorizzazzjoni biex japplikaw, f'konformitá l-Artikolu 19(1) tad-Direttiva 2003/96/KE, rata mnaqqsa ta' tassazzjoni fuq l-elettriku pprovdut lill-vetturi elettriċi. Fuq talba tal-Kummissjoni, in-Netherlands ipprovdew informazzjoni addizzjonali fis-6 ta' April, l-20 ta' Ġunju u t-18 ta' Awwissu 2016.

(2)

Ir-rata mnaqqsa ta' tassazzjoni għandha l-għan li tippromwovi l-użu tal-vetturi elettriċi billi tnaqqas l-ispiża tal-elettriku użat biex iħaddem dawn il-vetturi.

(3)

L-użu ta' vetturi elettriċi jevita l-emissjonijiet ta' sustanzi li jniġġsu l-arja li joriġinaw mill-kombustjoni ta' petrol u diżil jew karburanti fossili oħrajn u għaldaqstant jikkontribwixxi għal titjib fil-kwalità tal-arja fl-ibliet. Barra minn hekk, l-użu ta' vetturi elettriċi jista' wkoll inaqqas l-emissjonijiet ta' CO2 fejn l-elettriku użat ikun prodott minn sorsi ta' enerġija rinnovabbli. Il-miżura għalhekk hija mistennija li tagħti kontribut lgħall-objettivi tal-politiki ambjentali, tas-saħħa u tal-klima tal-Unjoni.

(4)

In-Netherlands talbet b'mod espliċitu li r-rata mnaqqsa ta' tassazzjoni tkun applikata għall-elettriku pprovdut lil vetturi elettriċi kemm għall-użu kummerċjali kif ukoll għall-użu mhux kummerċjali u li l-istazzjonijiet tal-iċċarġjar li mhumiex aċċessibbli għall-pubbliku jkunu koperti wkoll.

(5)

In-Netherlands talbu li r-rata mnaqqsa tat-tassazzjoni fuq l-elettriku tapplika biss għall-istazzjonijiet tal-iċċarġjar fejn l-elettriku jintuża biex tiġi ċċarġjata vettura elettrika direttament u li ma tapplikax għall-elettriku pprovdut permezz ta' skambju ta' batteriji.

(6)

Rata mnaqqsa ta' tassazzjoni fuq l-elettriku pprovdut lill-vetturi elettriċi permezz ta' stazzjonijiet tal-iċċarġjar ittejjeb il-prospettivi kummerċjali għal stazzjonijiet tal-iċċarġjar aċċessibbli għall-pubbliku fin-Netherlands, li għandu jwassal biex l-użu ta' karozzi elettriċi ikun attraenti u jirriżulta f'titjib fil-kwalità tal-arja.

(7)

Meta wieħed iqis in-numru limitat ta' vetturi elettriċi u l-fatt li l-livell ta' tassazzjoni fuq l-elettriku pprovdut lill-vetturi elettriċi permezz ta' stazzjonijiet tal-iċċarġjar ser ikunu ogħla mil-livell minimu ta' tassazzjoni għall-użu kummerċjali stipulat fl-Artikolu 10 tad-Direttiva 2003/96/KE, mhuwiex probabbli il-miżura twassal għal distorsjonijiet fil-konkorrenza matul il-perijodu li tkun fis-seħħ u għaldaqstant mhijiex ser taffettwa ħażin il-funzjonament tajjeb tas-suq intern.

(8)

Il-livell ta' tassazzjoni fuq l-elettriku pprovdut lill-vetturi elettriċi permezz ta' stazzjonijiet tal-iċċarġjar li mhumiex għall-użu kummerċjali ser ikun ogħla mil-livell minimu ta' tassazzjoni għall-użu mhux kummerċjali stipulat fl-Artikolu 10 tad-Direttiva 2003/96/KE.

(9)

F'konformità mal-Artikolu 19(2) tad-Direttiva 2003/96/KE, kull awtorizzazzjoni mogħtija taħt l-Artikolu 19(1) ta' dik id-Direttiva għandu jkollha żmien strettament limitat. In-Netherlands talbu li l-awtorizzazzjoni tingħata għal erba' snin sabiex ikun żgurat li l-perjodu ta' awtorizzazzjoni jkun twil biżżejjed biex l-operaturi ekonomiċi ma jaqtgħux qalbhom milli jagħmlu l-investimenti meħtieġa.

(10)

Din id-Deċiżjoni hija mingħajr preġudizzju għall-applikazzjoni tar-regoli tal-Unjoni dwar l-għajnuna mill-Istat,