16.3.2016

MT

Il-Ġurnal Uffiċjali tal-Unjoni Ewropea

L 71/3

---

FTEHIM TA’ STABBILIZZAZZJONI U ASSOĊJAZZJONI

bejn l-Unjoni Ewropea u l-Komunità Ewropea tal-Enerġija Atomika, minn naħa waħda u l-Kosovo (*), min-naħa l-oħra

L-UNJONI EWROPEA, minn hawn ’il quddiem imsejħa “l-Unjoni” jew “l-UE” u L-KOMUNITÀ EWROPEA TAL-ENERĠIJA ATOMIKA, minn hawn ’il quddiem “Euratom”,

minn naħa waħda, u

IL-KOSOVO (*),

min-naħa l-oħra,

minn hawn ‘il quddiem imsejħa konġuntament “il-Partijiet”,

WARA LI KKUNSIDRAW ir-rabtiet b’saħħithom bejn il-Partijiet u l-valuri li jaqsmu bejniethom, ix-xewqa tagħhom għat-tisħiħ ta’ dawk ir-rabtiet u sabiex jistabbilixxu relazzjoni mill-qrib u dejjiema msejsa fuq ir-reċiproċità u l-interess reċiproku, li għandha tippermetti li l-Kosovo jsaħħaħ u jestendi ulterjorment ir-relazzjonijiet mal-UE;

WARA LI KKUNSIDRAW l-importanza ta’ dan il-Ftehim, fil-qafas tal-Proċess ta’ Stabbilizzazzjoni u Assoċjazzjoni (PSA) mal-Balkani tal-Punent, fil-ħolqien u l-konsolidazzjoni ta’ ordni Ewropew stabbli msejjes fuq il-kooperazzjoni, li tiegħu l-UE hija pilastru,

WARA LI KKUNSIDRAW li l-UE hija lesta li tieħu passi konkreti biex tirrealizza l-perspettiva Ewropea tal-Kosovo u t-tqarrib tiegħu mal-UE b’konformità mal-perspettiva tar-reġjun billi tintegra l-Kosovo mal-qalba politika u ekonomika tal-Ewropa, permezz tal-parteċipazzjoni rikorrenti tal-Kosovo fil-PSA bl-iskop li jilħaq il-kriterji relevanti u l-kundizzjonalitajiet tal-PSA, soġġett għall-implimentazzjoni b’suċċess ta’ dan il-Ftehim, notevolment fir-rigward tal-kooperazjoni reġjonali; dan il-proċess se jwassal għall-progress fil-perspettiva Ewropea u t-tqarrib tal-Kosovo mal-UE, jekk ċirkostanzi oġġettivi jippermettu dan u jekk il-Kosovo jilħaq il-kriterji definiti mill-Kunsill Ewropew ta’ Kopenħagen tal-21-22 ta’ Ġunju 1993 u l-imsemmija kundizzjonalitajiet;

WARA LI KKUNSIDRAW l-impenn tal-Partijiet sabiex jikkontribwixxu bil-mezzi kollha xierqa għall-istabbilizzazzjoni politika, ekonomika u istituzzjonali fil-Kosovo kif ukoll fir-reġjun, permezz tal-iżvilupp tas-soċjetà ċivili u d-demokratizzazzjoni, il-bini tal-istituzzjonijiet u r-riforma fl-amministrazzjoni pubblika, l-integrazzjoni tal-kummerċ reġjonali u kooperazzjoni ekonomika msaħħa, kooperazzjoni f’firxa wiesgħa ta’ oqsma, inkluż fil-ġustizzja u l-affarijiet interni, u t-tisħiħ tas-sigurtà;

WARA LI KKUNSIDRAW l-impenn tal-Partijiet lejn żieda fil-libertajiet politiċi u ekonomiċi bħala l-bażi ta’ dan il-Ftehim, kif ukoll l-impenn tagħhom li jirrispettaw id-drittijiet tal-bniedem inklużi d-drittijiet tal-persuni li jappartjenu għal minoranzi u gruppi vulnerabbli,

WARA LI KKUNSIDRAW l-impenn tal-Partijiet lejn istituzzjonijiet imsejsin fuq l-istat tad-dritt, amministrazzjoni tajba u l-prinċipji demokratiċi permezz ta’ sistema multipartitarja b’elezzjonijiet liberi u ġusti;

WARA LI KKUNSIDRAW l-impenn tal-Partijiet li jirrispettaw il-prinċipji tal-Karta tan-Nazzjonijiet Uniti, tal-Organizzazzjoni għas-Sigurtà u l-Kooperazzjoni fl-Ewropa (OSKE), notevolment dawk tal-Att Finali tal-Konferenza dwar is-Sigurtà u l-Kooperazzjoni fl-Ewropa tal-1975 (minn hawn ‘il quddiem “l-Att Finali ta’ Ħelsinki” u l-Karta ta’ Pariġi għal Ewropa Ġdida tal-1990;

WAQT LI JAFFERMAW MILL-ĠDID ir-rabta tal-Partijiet mal-implimentazzjoni tal-obbligi internazzjonali, b’mod partikolari imma mhux biss, b’relazzjoni mal-protezzjoni tad-drittijiet tal-bniedem u l-protezzjoni tal-persuni li jappartjenu għal minoranzi u gruppi vulnerabbli, u f’dar-rispett jinnotaw l-impenn tal-Kosovo li jimxi skont l-istrumenti internazzjonali relevanti;

WAQT LI JAFFERMAW MILL-ĠDID id-dritt tar-ritorn għar-refuġjati u l-persuni spustati internament kollha u għall-protezzjoni tal-propjetà tagħhom u drittijiet tal-bniedem oħra relatati;

WARA LI KKUNSIDRAW l-impenn tal-Partijiet lejn il-prinċipji tal-ekonomija tas-suq liberu u għall-iżvilupp sostenibbli kif ukoll ir-rieda tal-UE sabiex tikkontribwixxi għar-riformi ekonomiċi fil-Kosovo;

WARA LI KKUNSIDRAW l-impenn tal-Partijiet lejn il-kummerċ ħieles, konsisteni mal-prinċipji relevanti tal-Organizzazzjoni Dinjija tal-Kummerċ (minn hawn ‘il quddiem “WTO”) li għandhom jiġu applikati b’mod trasparenti u mhux diskriminatorju;

WARA LI KKUNSIDRAW l-impenn tal-Partijiet li jkomplu jiżviluppaw djalogu politiku regolari dwar materji ta’ interess reċiproku, inklużi aspetti reġjonali;

WARA LI KKUNSIDRAW l-importanza li l-Partijiet jagħtu għat-taqtigħa kontra l-kriminalità organizzata u t-tisħiħ tal-kooperazjoni fil-ġlieda kontra t-terroriżmu b’konformità mal-acquis tal-UE, u biex jipprevjenu il-migrazzjoni irregolari filwaqt li jsostnu l-mobilità f’ambjent sigur u legali;

B’KONVINZJONI li dal-Ftehim se joħloq atmosfera ġdida għar-relazzjonijiet ekonomiċi bejn il-Partijiet u, fuq kollox, għall-iżvilupp tan-negozju u l-investiment, fatturi kruċjali għar-ristrutturar u l-immodernizzar ekonomiku;

KONXJI tal-impenn min-naħa tal-Kosovo li jqarreb il-leġiżlazzjoni tiegħu fis-setturi relevanti ma’ dik tal-UE, u li jimplimentaha b’mod effettiv;

BIL-KUNSIDERAZZJONI tar-rieda tal-UE sabiex tipprovdi appoġġ deċiżiv għall-implimentazzjoni tar-riformi u għall-użu tal-istrumenti disponibbli kollha ta’ kooperazzjoni u għajnuna teknika, finanzjarja u ekonomika fuq bażi komprensiva, indikattiva u multiannwali għal dan il-għan, jekk iċ-ċirkostanzi oġġettivi jippermetu;

FILWAQT LI JINNOTAW li dan il-Ftehim huwa mingħajr preġudizzju għall-pożizzjonijiet dwar l-istatus, u huwa konformi ma’ UNSCR 1244/1999 u l-Opinjoni tal-QIĠ dwar id-dikjarazzjoni tal-indipendenza tal-Kosovo.

FILWAQT LI JINNOTAW li l-impenji u l-kooperazzjoni li għandhom jiddaħħlu mill-Unjoni skont dan il-Ftehim jirrelataw biss ma’ oqsma koperti mill-acquis tal-UE jew il-politiki eżistenti tal-Unjoni;

FILWAQT LI JINNOTAW li l-proċeduri interni tal-Istati Membri tal-Unjoni Ewropea (minn hawn ‘il quddiem “l-Istati Membri”) jistgħu jiġu applikati meta jiġu riċevuti dokumenti maħruġa mill-Awtoritajiet tal-Kosovo skont dan il-Ftehim;

FILWAQT LI JINNOTAW li n-negozjati għat-twaqqif ta’ Komunità tat-Trasport mal-Balkani tal-Punent għadhom għaddejjin.

FILWAQT LI JFAKKRU fis-Samit ta’ Żagreb tal-2000, li sejjaħ għal iktar konsolidament tar-relazzjonijiet permezz tal-PSA kif ukoll kooperazzjoni reġjonali msaħħa;

FILWAQT LI JFAKKRU li l-Kunsill Ewropew ta’ Tessaloniki tad-19 u l-20 ta’ Ġunju 2003 saħħaħ il-PSA bħala qafas ta’ politika għar-relazzjoniijiet tal-UE mal- Balkani tal-Punent u enfasizza l-prospett tal-integrazzjoni tagħhom mal-UE abbażi tal-progress individwali tagħhom fir-riformi u l-mertu;

FILWAQT LI JFAKKRU fl-impenji tal-Kosovo fil-kuntest tal-Ftehim ta’ Kummerċ Ħieles tal-Ewropa Ċentrali ffirmat f’Bukarest fid-19 ta’ Diċembru 2006, konkluż bħala mezz ta’ tisħiħ tal-abbiltà tar-reġjun sabiex jiġbed investimenti u l-prospetti tal-integrazzjoni tiegħu fl-ekonomija globali, jekk iċ-ċirkostanzi jippermettu dan;

FILWAQT LI JURU X-XEWQA li tiġi stabbilita kooperazzjoni kulturali eqreb u li jiġu żviluppati skambji ta’ informazzjoni.

FILWAQT LI JINNOTAW li, fil-każ li l-Partijiet jiddeċiedu, fil-qafas ta’ dan il-Ftehim, li jidħlu fi ftehimiet speċifiċi fl-Ispazju ta’ Libertà, Sigurtà u Ġustizzja li kellhom jiġi konklużi mill-UE skont it-Titolu V ta’ Parti Tlieta tat-Trattat dwar il-Funzjonament tal-Unjoni Ewropea, il-provvedimenti ta’ tali ftehimiet speċifiċi futuri ma jorbtux lir-Renju Unit u/jew l-Irlanda sakemm l-UE, simultanjament mar-Renju Unit u/jew l-Irlanda sa fejn jirrigwarda r-relazzjonijiet bilaterali preċedenti tagħhom, ma tinnotifikax lill-Kosovo li r-Renju Unit u/jew l-Irlanda intrabat/intrabtu minn tali ftehimiet speċifiċi futuri bħala parti mill-UE b’konformità mal-Protokoll Nru 21 dwar il-pożizzjoni tar-Renju Unit u l-Irlanda fir-rigward tal-ispazju ta’ Libertà, Sigurtà u Ġustizzja anness mat-Trattat dwar l-Unjoni Ewropea u t-Trattat dwar il-Funzjonament tal-Unjoni Ewropea. B’mod simili, kwalunkwe miżuri interni għall-UE li kellhom jiġu adottati skont l-imsemmi Titolu V biex jiġi implimentat dan il-Ftehim ma jorbtux lir-Renju Unit u/jew l-Irlanda sakemm dawn ma jkunux innotifikaw ix-xewqa tagħhom li jieħdu sehem jew jaċċettaw tali miżuri b’konformità mal-Protokoll Nru 21. Jiġi nnutat ukoll li tali ftehimiet speċifiċi futuri jew tali miżuri interni għall-UE jaqgħu taħt il-Protokoll Nru 22 dwar il-pożizzjoni tad-Danimarka annessa ma’ dawk it-Trattati.

FTIEHMU KIF ĠEJ:

Artikolu 1

1.   Hija b’dan stabbilita Assoċjazzjoni bejn l-UE, minn naħa waħda, u l-Kosovo min-naħa l-oħra.

2.   L-għanijiet tal-Assoċjazzjoni huma:

(a)	li jkunu appoġġjati l-isforzi tal-Kosovo biex isaħħaħ id-demokrazija u l-istat tad-dritt;

(b)	li jsir kontribut għall-istabbiltà politika, ekonomika u istituzzjonali fil-Kosovo kif ukoll għall-istabbilizzazzjoni tar-reġjun;

(c)	li jkun ipprovdut qafas xieraq għad-djalogu politiku, li jippermetti l-iżvilupp ta’ relazzjonijiet politiċi eqreb bejn il-Partijiet;

(d)	li jkunu appoġġjati l-isforzi tal-Kosovo sabiex tkun żviluppata kooperazzjoni ekonomika u internazzjonali, jekk iċ-ċirkostanzi oġġettivi jippermettu, anke permezz tat-tqarrib tal-leġiżlazzjoni tiegħu għal dik tal-UE;

(e)	li jingħata appoġġ għall-isforzi tal-Kosovo sabiex ilesti t-tranżazzjoni għal ekonomija tas-suq li tiffunzjona;

(f)	li ssir promozzjoni ta’ relazzjonijiet ekonomiċi armonjużi u l-iżvilupp gradwali ta’ żona kummerċjali libera bejn l-UE u l-Kosovo;

(g)	li titrawwem kooperazzjoni reġjonali fl-oqsma kollha koperti minn dan il-Ftehim.

Artikolu 2

L-ebda terminu, għażla ta’ kliem jew definizzjonijiet użati f’dan il-Ftehim, inklużi l-Annessi u l-Protokolli għalihom, ma jikkostitwixxu rikonoxximent tal-Kosovo mill-UE bħala Stat indipendenti u lanqas ma jikkostitwixxu rikonoxximent minn Stati Membri indidwali tal-Kosovo f’dik il-kapaċità fejn huma ma jkunux għamlu tali pass.

TITOLU I

PRINĊIPJI ĠENERALI

Artikolu 3

Ir-rispett għall-prinċipji demokratiċi u għad-drittijiet tal-bniedem kif proklamat fid-Dikjarazzjoni Universali tad-Drittijiet tal-Bniedem tan-Nazzjonijiet Uniti tal-1948 u kif definit fil-Konvenzjoni għall-Protezzjoni tad-Drittijiet tal-Bniedem u l-Libertajiet Fundamentali tal-1950, fl-Att Finali ta’ Ħelsinki u fil-Karta ta’ Pariġi għal Ewropa Ġdida, ir-rispett għall-prinċipji tal-liġi internazzjonali, inkluża l-kooperazzjoni sħiħa mat-Tribunal Kriminali Internazzjonali għal dik li kienet il-Jugoslavja (ICTY) u l-mekkaniżmu residwu tiegħu, il-Qorti Kriminali Internazzjonali, u r-rispett għall-istat tad-dritt, kif ukoll għall-prinċipji tal-ekonomija tas-suq kif tidher fid-Dokument tal-Konferenza ta’ Bonn dwar kooperazzjoni Ekonomika tal-Konferenza dwar is-Sigurtà u l-Kooperazzjoni fl-Ewropa, għandhom ikunu s-sisien tal-politiki tal-UE u tal-Kosovo u jkunu elementi essenzjali ta’ dan il-Ftehim.

Artikolu 4

Il-Kosovo jikkommetti ruħu li jimxi mad-dritt u l-istrumenti internazzjonali, b’mod partikolari, iżda mhux biss, b’relazzjoni mal-ħarsien tad-drittijiet tal-bniedem u fundamentali, mal-protezzjoni tal-persuni li jappartjenu għal minoranzi, u mingħajr diskriminazzjoni fuq l-ebda bażi.

Artikolu 5

Il-Kosovo jikkommetti ruħu għat-tkomplija tal-ħidma favur titjib viżibbli u sostenibbli fir-relazzjonijiet tiegħu mas-Serbja, u għal kooperazzjoni effettiva mal-missjoni tal-Politika Ewropea ta’ Sigurtà u Difiża la tkun fis-seħħ, kif definit iktar fl-Artikolu 13. Dawn l-impenji jikkostitwixxu prinċipji essenzjali ta’ dan il-Ftehim u għandhom jirfdu l-iżvilupp tar-relazzjonijiet u l-kooperazzjoni bejn il-Partijiet. Fil-każ li l-Kosovo ma jikkonformax ma’ dawn l-impenji, l-UE tista’ tieħu miżuri li tqis xierqa, inkluż li tissospendi l-Ftehim kollu jew parti minnu.

Artikolu 6

Il-Partijiet jirrijaffermaw li l-iktar delitti serji li jħassbu lill-komunità internazzjonali inġenerali għandhom jiġu kkastigati u l-prosekuzzjoni tagħhom għandha tiġi żgurata permezz ta’ miżuri fil-livell domestiku jew f’dak internazzjonali.

F’dan ir-rigward, il-Kosovo jimpenja ruħu, b’mod partikolari, li jikkoopera b’mod sħiħ mal-ICTY u l-mekkaniżmu residwu tagħha, u kull investigazzjoni u prosekuzzjoni oħra magħmula taħt l-awspiċji internazzjonali.

Il-Kosovo jimpenja ruħu wkoll li jżomm konformità mal-Istatut ta’ Ruma tal-Qorti Kriminali Internazzjonali u, f’dar-rigward, li jieħu l-passi neċessarji għall-implimentazzjoni tiegħu fuq livell domestiku.

Artikolu 7

L-iżvilupp tal-kooperazzjoni reġjonali u relazzjonijiet tajbin mal-ġirien kif ukoll ir-rispett lejn id-drittijiet tal-bniedem, inkluż id-drittijet tal-persuni li jappartjenu għall-minoranzi, huma ċentrali għal dan il-PSA. Il-konklużjoni u l-implimentazzjoni ta’ dan il-Ftehim iseħħu fil-qafas tal-PSA u huma bbażati fuq il-merti tal-Kosovo stess.

Artikolu 8

Il-Kosovo jimpenja ruħu li jkompli jrawwem il-kooperazzjoni u r-relazzjonijiet tajbin mal-ġirien fir-reġjun, inkluż livell xieraq ta’ konċessjonijiet reċiproċi rigward il-moviment tal-persuni, merkanzija, kapital u servizzi, kif ukoll l-iżvilupp ta’ proġetti ta’ interess komuni f’firxa wiesgħa ta’ oqsma, inkluż l-istat tad-dritt. Dan l-impenn jikkostitwixxi fattur ewlieni fl-iżvilupp tar-relazzjonijiet u l-kooperazzjoni bejn il-Partijiet, u b’hekk jikkontribwixxi għal stabbiltà reġjonali.

Artikolu 9

L-assoċjazzjonigħandha titwettaq gradwalment b’mod sħiħ fuq perjodu ta’ għaxar snin.

Il-Kunsill ta’ Stabbilizzazzjoni u Assoċjazzjoni (minn hawn ‘il quddiem imsejjaħ “KSA”), stabbilit taħt l-Artikolu 126,għandu jagħmel rieżami, fuq bażi annwali, tal-implimentazzjoni tal-Ftehim u l-adozzjoni u l-implimentazzjoni tar-riformi legali, amministrattivi, istutuzzjonali u ekonomiċi min-naħa tal-Kosovo. Dan ir-rieżażmi għandu jitwettaq fid-dawl tal-preambolu u skont il-prinċipji ġenerali ta’ dan il-Ftehim. Għandu jkun konsistenti mal-mekkaniżmi stabbiliti taħt il-PSA, notevolment ir-rapport ta’ progress dwar il-PSA.

Fuq il-bażi ta’ dan ir-rieżami, il-KSA se joħroġ rakkomandazzjonijiet u jista’ jieħu d-deċiżjonijiet.

Meta r-reviżjoni tidentifika diffikultajiet partikolari, dawn jistgħu jitressqu quddiem il-mekkaniżmi għas-soluzzjoni tat-tilwim stabbiliti taħt dan il-Ftehim.

Mhux aktar tard mill-ħames sena wara d-dħul fis-seħħ ta’ dan il-Ftehim, il-KSA għandu jagħmel rieżami fid-dettall tal-implimentazzjoni ta’ dan il-Ftehim. Fuq il-bażi ta’ dan ir-rieżami, il-KSA għandu jevalwa l-progress li jkun għamel il-Kosovo u jista’ jieħu deċiżjonijiet dwar il-proċessi segwenti tal-assoċjazzjoni. Għandhom jittieħdu passi simili mill-KSA qabel tmiem l-għaxar sena mid-dħul fis-seħħ ta’ dan il-Ftehim. Jekk ir-riżultati tar-reviżjoni jitolbu dan, il-KSA jista’ jieħu deċiżjoni li jestendi l-perjodu stipulat fil-paragrafu 1 b’mhux iktar minn ħames snin. Fin-nuqqas ta’ tali deċiżjonijiet mill-KSA, dan il-Ftehim għandu jkompli jiġi implimentat kif maqbul hawn.

Ir-reviżjoni msemmija mhix se tapplika fuq il-moviment ħieles tal-merkanzija, billi dwar dan hemm prevista skeda speċifika fit-Titolu IV.

Artikolu 10

Dan il-Ftehim għandu jkun kompatibbli bis-sħiħ, kif ukoll implimentat b’mod konsistenti mad-dispożizzjonijiet rilevanti tal-Ftehimiet WTO, partikolarment mal-Artikolu XXIV tal-Ftehim Ġenerali dwar it-Tariffi u l-Kummerċ 1994 (GATT 1994) u l-Artikolu V tal-Ftehim Ġenerali dwar il-Kummerċ fis-Servizzi (GATS).

TITOLU II

DJALOGU POLITIKU

Artikolu 11

1.   Id-djalogu politiku bejn il-Partijiet għandu jiġi żviluppat ulterjorment fil-kuntest ta’ dan il-Ftehim. Huwa għandu jakkumpanja u jikkonsolida t-tqarrib bejn l-UE u l-Kosovo u jikkontribwixxi għall-ħolqien ta’ rabtiet mill-qrib ta’ solidarjetà u ta’ forom ġodda ta’ kooperazzjoni bejn il-Partijiet.

2.   B’mod partikolari, id-djalogu politiku huwa intiż li jippromwovi:

(a)	il-parteċipazzjoni tal-Kosovo fil-komunità demokratika internazzjonali, jekk iċ-ċirkustanzi oġġettivi jippermettu;

(b)	l-avvanz tal-perspettiva Ewropea tal-Kosovo u t-tqarrib tiegħu mal-UE, b’konformità mal-perspettiva Ewropea tar-reġjun, abbażi tal-merti individwali u b’konformità mal-impenji tal-Kosovo skont l-Artikolu 5 ta’ dan il-Ftehim;

(c)

konverġenza ikbar ma’ ċerti miżuri tal-Politika Estera u ta’ Sigurtà Komuni, partikolarment miżuri restrittivi meħudin mill-UE kontra pajjiżi terzi, persuni fiżiċi jew ġuridiċi jew entitajiet mhux tal-Istattal-Istat wkoll permezz tal-iskambju tal-informazzjoni kif xieraq, u, b’mod partikolari, dwar dawk il-kwistjonijiet li aktarx ikollhom effetti sostanzjali fuq il-Partijiet;

(d)	kooperazzjoni reġjonali effettiva, inklużiva u rappreżentattiva, u l-iżvilupp ta’ relazzjonijiet tajbin bejn il-ġirien fil-Balkani tal-Punent.

Artikolu 12

Il-Partijiet għandu jkollhom djalogu politiku rigward il-kwistjonijiet l-oħrajn koperti minn dan il-Ftehim.

Artikolu 13

1.   Id-djalogu politiku u d-djalogu dwar il-politiki, kif xieraq, jikkontribwixxu lejn il-proċess tan-normalizzazzjoni tar-relazzjonijiet bejn il-Kosovo u s-Serbja.

2.   Kif previst mill-Artikolu 5, il-Kosovo jimpenja ruħu li jaħdem għal titjib viżibbli u sostenibbli fir-relazzjonijiet tiegħu mas-Serbja. Dan il-proċess jiżgura li t-tnejn ikunu jistgħu jkomplu fil-mixjiet tagħhom lejn l-Ewropa, filwaqt li jevita li pajjiż jimblokka lill-ieħor f’dawn l-isforzi, u gradwalment għandu jwassal għan-normalizzazzjoni komprensiva tar-relazzjonijiet bejn il-Kosovo u s-Serbja, fil-forma ta’ ftehim legalment vinkolanti, bil-prospett li t-tnejn li huma jkunu kapaċi jeżerċitaw id-drittijiet tagħhom u jaqdu r-responsabbiltajiet tagħhom.

3.   Fil-qafas imsemmi fuq, il-Kosovo kontinwament:

(a)	jimplementa bona fide kull ftehim milħuq fid-djalogu mas-Serbja;

(b)	jirrispetta b’mod sħiħ il-prinċipji ta’ kooperazzjoni reġjonali inklussiva;

(c)	jirrisolvi permezz tad-djalogu u spirtu ta’ kompromess kwistjonijiet oħrajn pendenti, fuq il-bażi ta’ soluzzjonijiet prattiċi u sostenibbli u jikkoopera mas-Serbja fuq il-materji tekniċi u legali neċessarji;

(d)	jikkoopera b’mod effettiv mal-missjoni tal-Politika Ewropea ta’ Sigurtà u Difiża sakemm tibqa’ topera u jikkontribwixxi b’mod attiv għal eżekuzzjoni sħiħa u mingħajr xkiel tal-mandat tagħha fil-Kosovo.

4.   Il-KSA għandu jirrevedi l-progress ta’ dan il-proċess regolarment, u jista’ jieħu deċiżjonijiet u joħroġ rakkomandazzjonijiet f’dan ir-rigward. Il-Kumitat ta’ Stabbilizzazzjoni u Assoċjazzjoni jista’ jgħin lil dal-proċess b’mod konformi mal-Artikolu 129.

Artikolu 14

1.   Id-djalogi politiċi u ta’ politika jseħħu primarjament fi ħdan il-KSA, li jkollu r-responsabbiltà ġenerali ta’ kull kwistjoni li l-Partijiet ikunu jixtiequ jressqulu.

2.   Fuq it-talba ta’ kwalunkwe waħda mill-Partijiet, dawn id-djalogi jistgħu jseħħu wkoll fil-formati li ġejjin:

(a)	laqgħat, fejn meħtieġ, ta’ uffiċjali għoljin jirrappreżentaw lill-Kosovo, minn naħa waħda, u r-Rappreżentant Għoli tal-Unjoni għall-Affarijiet Barranin u l-Politika ta’ Sigurtà u/jew rappreżentant tal-Kummissjoni, min-naħa l-oħra;

(b)	billi jittieħed vantaġġ sħiħ minn kull mezz adattat bejn il-Partijiet, inklużi l-kuntatti adattati f’pajjiżi mhux fl-UE u ġewwa organizzazzjonijiet internazzjonali u fora internazzjonali oħra, jekk iċ-ċirkustanzi oġġettivi jippermettu dan;

(c)	kull mezz ieħor li jista’ jagħti kontribut utli għat-tisħiħ, l-iżvilupp u t-titjib ta’ dawn id-djalogi, inklużi dawk identifikati fl-aġenda ta’ Tessaloniki, adottati fil-Konklużjonijiet tal-Kunsill Ewropew ta’ Tessaloniki fid-19 u l-20 ta’ Ġunju tal-2003.

Artikolu 15

Id-djalogu politiku fuq livell parlamentari jseħħ fi ħdan il-qafas tal-Kumitat Parlamentari ta’ Stabbilizzazzjoni u Assoċjazzjoni stabbilit skont l-Artikolu 132.

TITOLU III

KOOPERAZZJONI REĠJONALI

Artikolu 16

B’konformità mal-impenn tiegħu skont l-Artikoli 5 u 13, u lejn il-paċi u stabbiltà internazzjonali u reġjonali, u lejn l-iżvilupp tar-relazzjonijiet tajbin bejn il-ġirien, il-Kosovo jippromwovi l-kooperazzjoni reġjonali b’mod attiv. L-UE, permezz ta’ strumenti adatti, inkluż l-assistenza għal proġetti b’dimensjoni reġjonali jew transfruntiera/transkonfinali, tista’ tappoġġja dawn l-isforzi.

Kull meta l-Kosovo jippjana li jsaħħaħ mill-ġdid il-kooperazzjoni tiegħu ma’ wieħed mill-pajjiżi msemmijin fl-Artikoli 17, 18 u 19, huwa għandu javża u jikkonsulta lill-UE b’mod konformi mad-dispożizzjonijet stipulati fit-Titolu X.

Il-Kosovo għandu jkompli jimplementa l-Ftehim dwar il-Kummerċ Ħieles tal-Ewropa Ċentrali.

Artikolu 17

Kooperazzjoni ma’ pajjiżi li ffirmaw Ftehim ta’ Stabbilizzazzjoni u Assoċjazzjoni

Wara li jiġi ffirmat dan il-Ftehim, il-Kosovo, jekk iċ-ċirkostanzi oġġettivi jippermettu, għandu jiftaħ negozjati mal-pajjiżi li diġà ffirmaw Ftehim ta’ Stabbilizzazzjoni u Assoċjazzjoni mal-UE sabiex jikkonkludi konvenzjonijiet bilaterali dwar il-kooperazzjoni reġjonali, li l-għan tagħhom ikun li jitwessa’ l-ambitu tal-kooperazzjoni bejn il-pajjiżi konċernati.

L-elementi ewlenin ta’ dawn il-konvenzjonijiet ikunu:

(a)	id-djalogu politiku;

(b)	il-ħolqien ta’ żoni ta’ kummerċ ħieles, li jkunu konsistenti mad-dispożizzjonijiet rilevanti tad-WTO;

(c)

konċessjonijiet reċiproċi dwar il-moviment tal-ħaddiema, l-istabbiliment, l-għotja ta’ servizzi, il-pagamenti kurrenti u movimenti tal-kapital kif ukoll politiki oħra relatati mal-moviment tal-persuni fuq livell ekwivalenti għal dak tal-Ftehimiet ta’ Stabbilizzazzjoni u Assoċjazzjoni li dak il-pajjiż rispettiv ikun ikkonkluda mal-UE;

(d)	id-dispożizzjonijiet dwar il-kooperazzjoni f’oqsma oħra koperti, u oħrajn li mhumiex, minn dan il-Ftehim, u notevolment fl-ispazju tal-Libertà, il-Ġustizzja u s-Sigurtà.

Dawn il-konvenzjonjiet għandhom jinkludu dispożizzjonijiet għall-ħolqien tal-mekkaniżmi istituzzjonali meħtieġa, kif xieraq.

Il-konvenzjonijiet jiġu konklużi fi żmien sentejn mid-dħul fis-seħħ ta’ dan il-Ftehim.

Artikolu 18

Kooperazzjoni ma’ pajjiżi ikkonċernati mill-PSA

Il-Kosovo għandu jfittex il-kooperazzjoni reġjonali mal-pajjiżi kkonċernati mill-PSA f’xi oqsma tal-kooperazzjoni koperti minn dan il-Ftehim, jew kollha kemm huma, kif ukoll oqsma oħra relatati mal-PSA, notevolment dawk ta’ interess komuni. Din il-kooperazzjoni għandha tkun dejjem kompatibbli mal-prinċipji u l-għanijiet ta’ dan il-Ftehim.

Artikolu 19

Kooperazzjoni ma’ pajjiżi kandidati għall-adeżjoni mal-UE mhux konċernati mill-PSA

Il-Kosovo għandu jrawwem il-kooperazzjoni tiegħu u jikkonkludi, jekk iċ-ċirkustanzi oġġettivi jippermettu dan, konvenzjonijiet dwar il-kooperazzjoni ma’ kull pajjiż kandidat għall-adeżjoni mal-UE mhux ikkonċernata mill-PSA fl-oqsma tal-kooperazzjoni koperti minn dan il-Ftehim u oqsma oħra ta’ interess reċiproku għall-Kosovo u dawn il-pajjiżi. Dawn il-konvenzjonijiet għandu jkollhom l-għan li gradwalment jikkonverġu r-relazzjonijiet bilaterali bejn il-Kosovo u dawk il-pajjiżi għall-parti relevanti tar-relazzjonijiet bejn l-UE u l-Kosovo.

TITOLU IV

MOVIMENT LIBERU TAL-MERKANZIJA

Artikolu 20

1.   L-UE u l-Kosovo jistabbilixxu gradwalment żona ta’ kummerċ ħieles fuq perjodu massimu ta’ għaxar snin li jibda mid-dħul fis-seħħ ta’ dan il-Ftehim, skont id-disposizzjonijiet ta’ dan il-Ftehim u f’konformità mal-GATT 1994 u d-dispożizzjonijiet li jinstabu fil-ftehimiet relevanti tad-WTO. Meta jagħmlu dan huma jikkunsidraw ir-rekwiżiti speċifiċi stipulati fil-paragrafi 2 sa 6 ta’ dan l-Artikolu.

2.   In-Nomenklatura Magħquda għandha tapplika għall-klassifikazzjoni ta’ prodotti fil-kummerċ bejn il-Partijiet.

3.   Għall-finijiet ta’ dan il-Ftehim dazji doganali u ħlasijiet li għandhom effett ekwivalenti għal dazji doganali jinkludu kull dazju jew kull ħlas impost b’rabta mal-importazzjoni jew esportazzjoni ta’ prodott, inkluża kull sura ta’ soprataxxa jew ħlas addizzjonali b’rabta ma’ din l-importazzjoni jew esportazzjoni, iżda ma jinkludu l-ebda:

(a)	ħlas ekwivalenti għal taxxa interna imposta konsistentement mal-paragrafu 2 tal-Artikolu III tal-GATT tal-1994,

(b)	miżuri ta’ antidumping jew miżuri kompensatorji,

(c)	miżati jew ħlasijiet oħra proporzjonali għall-ispejjeż tas-servizzi mogħtija.

4.   Għal kull prodott, id-dazju bażiku li fuqu jiġi applikat it-tnaqqis suċċessiv tat-tariffi stabbilit f’dan il-Ftehim għandu jkun:

(a)	Għall-UE, it-Tariffa Doganali Komuni tal-UE, stabbilita skont ir-Regolament tal-Kunsill (KEE) Nru 2658/87 (1), attwalment applikata erga omnes minn jum l-iffirmar ta’ dan il-Ftehim;

(b)	Għall-Kosovo, it-tariffa applikata mill-Kosovo sa mill-31 ta’ Diċembru 2013.

5.   Jekk, wara li jiġi ffirmat dan il-Ftehim, ikun applikat kwalunkwe tnaqqis fit-tariffi fuq bażi ta’ erga omnes, id-dazji mnaqqsa ta’ din ix-xorta għandhom jissostitwixxu d-dazju bażiku li jissemma fil-paragrafu 4 mid-data ta’ meta jiġi applikat tnaqqis ta’ din ix-xorta.

6.   L-UE u l-Kosovo għandhom jikkomunikaw lil xulxin id-dazji bażiċi rispettivi tagħhom u kull tibdil fihom.

KAPITOLU I

Prodotti industrijali

Artikolu 21

Definizzjoni

1.   Dan il-Kapitolu għandu japplika għal prodotti li joriġinaw mill-UE jew il-Kosovo elenkati fil-Kapitoli 25 sa 97 tan-Nomenklatura Magħquda, ħlief għal prodotti elenkati fil-lista fl-Anness I, paragrafu I, punt (ii) tal-Ftehim WTO dwar l-Agrikoltura.

2.   Il-kummerċ bejn il-Partijiet fi prodotti koperti mit-Trattat li jistabbilixxi l-Komunità Ewropea tal-Enerġija Atomika għandu jitmexxa b’mod konformi ma’ dak it-Trattat.

Artikolu 22

Konċessjonijiet tal-UE fuq prodotti industrijali

1.   Id-dazji doganali fuq importazzjoni fl-UE u l-ħlasijiet b’effett ekwivalenti fuq prodotti industrijali li joriġinaw mill-Kosovo għandhom jitneħħew mad-dħul fis-seħħ ta’ dan il-Ftehim.

Ir-restrizzjonijiet kwantitattivi fuq l-importazzjoni fl-UE u l-miżuri li jkollhom effett ekwivalenti fuq prodotti industrijali li joriġinaw mill-Kosovo għandhom jitneħħew mad-dħul fis-seħħ ta’ dan il-Ftehim.

Artikolu 23

Konċessjonijiet tal-Kosovo fuq prodotti industrijali

1.   Id-dazji doganali fuq l-importazzjoni ta’ prodotti industrijali li joriġinaw mill-UE fil-Kosovo, ħlief għal dawk li huma elenkati fl-Anness I għandhom jitneħħew mad-dħul fis-seħħ ta’ dan il-Ftehim.

2.   Il-ħlasijiet li jkollhom effett ekwivalenti għal dazji doganali fuq l-importazzjonijiet lejn il-Kosovo ta’ prodotti industrijali li joriġinaw mill-UE għandhom jitneħħew mad-dħul fis-seħħ dan il-Ftehim.

3.   Id-dazji doganali fuq l-importazzjoni ta’ prodotti industrijali li joriginaw mill-UE fil-Kosovo, u li huma elenkati fl-Anness I, jitnaqqsu progressivament u għandhom jitneħħew skont l-iskeda indikata f’dak l-Anness.

4.   Ir-restrizzjonijiet kwantitattivi fuq importazzjoni ta’ prodotti industrijali li joriġinaw mill-UE fil-Kosovo u miżuri li jkollhom effett ekwivalenti għandhom jitneħħew mad-dħul fis-seħħ ta’ dan il-Ftehim.

Artikolu 24

Dazji u restrizzjonijiet fuq l-esportazzjoni

1.   L-UE u l-Kosovo għandhom ineħħu kull dazju doganali fuq l-esportazzjoni kif ukoll ħlasijiet li jkollhom effett ekwivalenti fuq il-kummerċ ta’ bejniethom mad-dħul fis-seħħ dan il-Ftehim.

2.   L-UE u l-Kosovo għandhom ineħħu kull restrizzjoni kwantitattiva fuq l-esportazzjoni ta’ bejniethom kif ukoll il-miżuri li jkollhom effett ekwivalenti mad-dħul fis-seħħ dan il-Ftehim.

Artikolu 25

Tnaqqis aktar rapidu fid-dazji doganali

Il-Kosovo jiddikjara li lest li jnaqqas id-dazji doganali fuq il-kummerċ mal-UE b’mod iktar mgħaġġel milli hu previst fl-Artikolu 23, jekk is-sitwazzjoni ekonomika ġenerali tiegħu u s-sitwazzjoni fil-qasam ekonomiku kkonċernat ikunu jippermettu.

Il-KSA għandu janalizza s-sitwazzjoni f’dan ir-rigward u jagħmel ir-rakkomandazzjonijiet relevanti.

KAPITOLU II

Agrikoltura u sajd

Artikolu 26

Definizzjoni

1.   Dan il-Kapitolu għandu japplika fuq il-kummerċ ta’ prodotti agrikoli u tas-sajd li joriġinaw fl-UE jew fil-Kosovo.

2.   It-terminu “prodotti agrikoli u tal-industrija tas-sajd” jirreferi għall-prodotti elenkati fil-Kapitoli 1 sa 24 tan-Nomenklatura Magħquda (2) u l-prodotti elenkati fl-Anness I, paragrafu I, punt (ii) tal-Ftehim WTO dwar l-Agrikoltura.

3.   Din id-definizzjoni tinkludi l-ħut u l-prodotti tas-sajd koperti mill-Kapitoli 3, intestaturi 1604 (Ħut preparat jew preservat; kavjar u sostituti tal-kavjar imħejjija minn bajd tal-ħut) u 1605 (Krustaċej, molluski u invertebrati akkwatiċi oħrajn, preparati jew preservati (ħlief affumikati)), u sottointestaturi 0511 91 (Skart tal-ħut), 2301 20 (Dqiq, pasta u gerbub, ta’ ħut jew ta’ krustaċji, molluski jew invertebrati akkwatiċi oħrajn, mhumiex tajbin għal konsum tal-bniedem) u ex 1902 20 (“għaġin mimli li fih iktar minn 20 % tal-piż ħut, krustaċej, molluski jew invertebrati akkwatiċi oħrajn”).

Tinkludi wkoll is-sottointestaturi 1212 21 00 (Alka tal-baħar u alki oħrajn), ex1603 00 (Estratti u sugu ta’ ħut jew krustaċej, molluski jew invertebrati akkwatiċi oħrajn) u ex 2309 9010 (Preparazzjonijiet ta’ tip użati għal għalf ta’ annimali: materjali li jinħallu ta’ ħut), kif ukoll 1504 10 u 1504 20 (Xaħmijiet u żjut u l-frazzjonijiet tagħhom, tal-ħut, raffinati jew le, iżda mhux modifikati kimikament):

—	Żjut tal-fwied tal-ħut u l-frazzjonijiet tagħhom;

—	Xaħmijiet u żjut u l-frazzjonijiet tagħhom, tal-ħut, ħlief żjut tal-fwied).

Artikolu 27

Prodotti agrikoli pproċessati

Il-Protokoll 1 jistabbilixxi l-arranġamenti kummerċjali għal prodotti agrikoli proċessati li huma elenkati fih.

Artikolu 28

Konċessjonijiet tal-UE fuq importazzjonijiet ta’ prodotti agrikoli li joriġinaw mill-Kosovo

1.   Mid-data tad-dħul fis-seħħ ta’ dan il-Ftehim, l-UE għandha tabolixxi kull restrizzjoni jew miżura kwantitattiva li jkollha effett ekwivalenti fuq l-importazzjonijiet ta’ prodotti agrikoli li joriġinaw mill-Kosovo.

2.   Mid-data tad-dħul fis-seħħ ta’ dan il-Ftehim, l-UE għandha tabolixxi d-dazji doganali u l-imposti li jkollhom effett ekwivalenti fuq l-importazzjonijiet tal-prodotti agrikoli joriġinaw mill-Kosovo għajr għal dawk tal-intestaturi 0102 (annimali tal-ifrat ħajjin), 0201, (Laħam ta’ annimali tal-ifrat, frisk jew imkessaħ) 0202 (Laħam tal-annimali tal-ifrat, iffriżat), 1701 (Zokkor tal-kannamieli jew tal-pitravi u sukrows kimikalment pur, f’forma solida), 1702 (Zokkrijiet oħrajn, inklużi laktows kimikament pur, maltosju, glukows u fruktows, f’forma solida; ġuleppijiet taz-zokkor li ma fihomx miżjudin ħwawar u materjal li jagħti l-kulur; għasel artifiċjali, kemm jekk imħallat ma’ għasel naturali kif ukoll jekk le; karamella) u 2204 (Inbid ta’ għeneb frisk, inklużi inbejjed imsaħħin; għeneb magħsur qabel jeħmer ħlief dak tal-intestatura 2009) tan-Nomenklatura Magħquda.

Għall-prodotti li huma koperti mil-Kapitoli 7 u 8 tan-Nomenklatura Magħquda, li għalihom it-Tariffa Doganali Komuni tipprevedi l-applikazzjoni ta’ dazji doganali ad valorem u ta’ dazju doganali speċifiku, it-tneħħija għandha tapplika biss għall-parti ad valorem tad-dazju.

3.   Mid-data tad-dħul fis-seħħ ta’ dan il-Ftehim, l-UE għandha tiffissa d-dazji tad-dwana applikabbli għall-importazzjoni fl-UE ta’ prodotti tal-“baby-beef”, definiti fl-Anness II u li joriġinaw mill-Kosovo ta’ 20 % tad-dazju ad valorem u ta’ 20 % tad-dazju speċifiku kif stabbilit fit-Tariffa Doganali Komuni, fil-limitu ta’ kwota ta’ tariffa annwali ta’ 475 tunnellata espressi f’piż ta’ karkassa.

Artikolu 29

Konċessjonijiet tal-Kosovo fuq prodotti agrikoli

1.   Mid-data tad-dħul fis-seħħ ta’ dan il-Ftehim, il-Kosovo għandu jabolixxi r-restrizzjonijiet kwantitattivi kollha u miżuri li jkollhom effett ekwivalenti fuq l-importazzjoni ta’ prodotti agrikoli li joriġinaw mill-UE.

2.   Mid-data tad-dħul fis-seħħ ta’ dan il-Ftehim, il-Kosovo għandu:

(a)	jneħħi d-dazji doganali applikabbli għall-importazzjoni ta’ ċerti prodotti agrikoli li joriginaw fl-UE, ħlief dawk elenkati fl-Anness III;

(b)	jneħħi progressivament id-dazji doganali applikabbli fuq l-importazzjonijiet ta’ ċerti prodotti agrikoli li joriġinaw mill-UE, li huma elenkati fl-Anness IIIa, IIIb u IIIc u konformi mal-iskeda ta’ żmien indikata f’dak l-Anness.

3.   Id-dazju applikabbli għal ċerti prodotti elenkati fl-Anness IIId għandu jkun id-dazju bażiku applikat fil-Kosovo fil-31 ta’ Diċembru 2013.

Artikolu 30

Protokoll dwar l-inbid u xarbiet alkoħoliċi

L-arranġamenti applikabbli għall-prodotti ta’ nbid u xarbiet alkoħoliċi msemmija fil-Protokoll II huma stabbiliti f’dak il-Protokoll.

Artikolu 31

Konċessjonijiet tal-UE fuq prodotti ta’ ħut u ta’ prodotti tas-sajd

1.   Mid-data tad-dħul fis-seħħ ta’ dan il-Ftehim, l-UE għandha tneħħi r-restrizzjonijiet kwantitattivi kollha u l-miżuri li jkollhom effett ekwivalenti fuq importazzjoni ta’ ħut u prodotti tas-sajd li joriġinaw mill-Kosovo.

2.   Mid-data tad-dħul fis-seħħ ta’ dan il-Ftehim, l-UE għandha tneħħi d-dazji doganali kollha u l-miżuri li jkollhom effett ekwivalenti fuq il-ħut u l-prodotti tas-sajd li joriġinaw fil-Kosovo ħlief dawk elenkati fl-Anness IV. Il-prodotti elenkati fl-Anness IV għandhom ikunu soġġetti għad-dispożizzjonijiet stipulati fih.

Artikolu 32

Konċessjonijiet tal-Kosovo fuq prodotti ta’ ħut u ta’ prodotti tas-sajd

1.   Mid-data tad-dħul fis-seħħ ta’ dan il-Ftehim, il-Kosovo għandu jneħħi r-restrizzjonijiet kwantitattivi kollha u l-miżuri li jkollhom effett ekwivalenti fuq l-importazzjoni ta’ ħut u prodotti tas-sajd li joriginaw fl-UE.

2.   Mid-dħul fis-seħħ ta’ dan il-Ftehim, il-Kosovo għandu jneħħi d-dazji doganali kollha u l-miżuri li jkollhom effett ekwivalenti fuq il-ħut u l-prodotti tas-sajd li joriġinaw fl-UE ħlief dawk elenkati fl-Anness V. Il-prodotti elenkati fl-Anness V għandhom ikunu soġġetti għad-dispożizzjonijiet stipulati fih.

Artikolu 33

Klawsola ta’ rieżami

Filwaqt li jitqies il-volum tal-kummerċ fil-prodotti agrikoli u tal-industriji tas-sajd bejn il-Partijiet, tas-sensittivitajiet partikolari tagħhom, tar-regoli tal-politika komuni tal-UE u tal-politika tal-Kosovo għall-agrikoltura u għall-industriji tas-sajd, tar-rwol tal-agrikoltura u tal-industriji tas-sajd fl-ekonomija tal-Kosovo kif ukoll l-iżviluppi fil-qafas tad-WTO, il-KSA għandu jeżamina, mhux aktar tard minn tliet snin wara d-dħul fis-seħħ ta’ dan il-Ftehim, prodott bi prodott u fuq bażi ordnata u reċiproka b’mod xieraq, l-opportunitajiet sabiex jagħtu lil xulxin aktar konċessjonijiet bl-għan li tkun implimentata liberalizzazzjoni akbar tal-kummerċ fil-prodotti agrikoli u tal-industriji tas-sajd.

Artikolu 34

Klawżola ta’ salvagwardja rigward l-agrikoltura u s-sajd

Minkejja disposizzjonijiet oħrajn ta’ dan il-Ftehim, u partikolarment l-Artikolu 43, meqjusa s-sensittività tas-swieq agrikoli u tas-sajd, jekk l-importazzjoni ta’ prodotti li joriginaw f’Parti waħda, u li jkunu s-suġġetti ta’ konċessjonijiet mogħtija skont l-Artikoli 27, 28, 29, 30, 31 u 32, tiddisturba serjament lis-swieq jew lill-mekkaniżmi regolatorji domestiċi ta’ Parti, iż-żewġ partijiet minnufih għandhom jikkonsultaw lil xulxin fi ħdan il-Kumitat ta’ Stabbilizzazzjoni u Assoċjazjoni sabiex isibu soluzzjoni adatta. Sakemm tinstab din is-soluzzjoni, il-Parti interessata tista’ tieħu l-miżuri xierqa li jidhrilha li jkunu neċessarji.

Artikolu 35

Protezzjoni ta’ indikazzjonijiet ġeografiċi għall-prodotti agrikoli u tas-sajd u prodotti tal-ikel li mhumiex inbid jew spirti

1.   Il-Kosovo għandu jipprovdi protezzjoni għall-indikazzjonijiet ġeografiċi tal-UE rreġistrati fl-UE taħt ir-Regolament (UE) Nru 1151/2012 tal-Parlament Ewropew u tal-Kunsill tal-21 ta’ Novembru 2012 dwar skemi tal-kwalità għal prodotti agrikoli u oġġetti tal-ikel (3), f’konformità mat-termini stipulati f’dan l-Artikolu. L-indikazzjonijiet ġeografiċi tal-Kosovo għandhom ikunu eliġibbli sabiex jiġu rreġistrati fl-UE skont il-kundizzjonijiet stabbiliti f’dak ir-Regolament.

2.   L-indikazzjonijiet ġeografiċi li saret referenza għalihom fil-paragrafu 1 għandhom jiġu protetti kontra:

(a)	kull użu kummerċjali dirett jew indirett ta’ isem protett: (i) għal prodotti komparabbli li ma jkunux konformi mal-ispeċifikazzjoni tal-prodott tal-isem protett, jew (ii) sa fejn tali użu jisfrutta r-reputazzjoni ta’ indikazzjoni ġeografika;

(b)	kulll użu ħażin, imitazzjoni jew evokazzjoni, anke jekk l-oriġini vera tal-prodott jew servizz ikun indikat jew jekk l-isem protett ikun tradott jew akkumpanjat minn espressjoni bħal “stil”, “tip”, “metodu”, “kif prodott fi”, “imitazzjoni”, “togħma”, “bħal” jew xi espressjoni simili;

(c)

kull indikazzjoni falza jew qarrieqa dwar il-provenjenza, l-oriġini, in-natura jew il-kwalitajiet essenzjali tal-prodott, dwar l-imballaġġ intern jew estern, il-materjal tar-reklamar jew id-dokumenti relatati mal-prodott ikkonċernat, u l-ippakkjar tal-prodott f’kontenitur li jista’ jagħti impressjoni falza dwar l-oriġini tiegħu;

(d)	kull prattika oħra li tista’ tiżgwida lill-konsumatur dwar l-oriġini vera ta’ prodott simili.

3.   Isem propost għar-reġistrazzjoni li jkun kompletament jew parzjalment omonimu ma’ isem diġà protett, ma għandux jiġi protett sakemm ma hemmx distinzjoni suffiċjenti fil-prattika bejn il-kundizzjonijiet tal-użu lokali u tradizzjonali u l-preżentazzjoni tal-omonimu protett sussegwentement u l-isem diġà protett, filwaqt li jitqies il-bżonn li jiġi żgurat trattament ekwu tal-produtturi kkonċernati u li l-konsumaturi ma jiġux imqarrqa. Ma għandux jiġi reġistrat isem omonimu li jiżgwida lill-konsumatur biex jemmen li l-prodotti jiġu minn territorju ieħor anki jekk l-isem ikun preċiż sa fejn ikun ikkonċernat it-territorju, ir-reġjun jew il-post ta’oriġini attwali tal-prodotti kkonċernati.

4.   Il-Kosovo għandu jirrifjuta r-reġistrazzjoni ta’ marka kumerċjali li l-użu tagħha jikkorrispondi għas-sitwazzjonijiet imsemmija fil-paragrafu 2.

5.   Il-marki kummerċjali li l-użu tagħhom jikkorrispondi għas-sitwazzjonijiet imsemmija fil-paragrafu 2, li jkunu ġew irreġistrati fil-Kosovo jew stabbiliti permezz tal-użu, ma għandhomx jibqgħu jintużaw wara ħames snin mid-dħul fis-seħħ ta’ dan il-Ftehim. Madankollu, dan ma għandux japplika għal marki kummerċjali irreġistrati fil-Kosovo u trademarks stabbiliti permezz tal-użu u li huma propjetà ta’ ċittadini ta’ pajjiżi terzi, kemm-il darba ma jkunux ta’ natura li bi kwalunkwe mod tqarraq bil-pubbliku fir-rigward tal-kwalità, l-ispeċifikazzjoni u l-oriġini ġeografika tal-prodotti.

6.   Kull użu ta’ indikazzjonijiet ġeografiċi protetti skont il-paragrafu 1, bħala termini abitwali fil-lingwaġġ komuni għal dawn il-prodotti fil-Kosovo, għandu jieqaf sa mhux iktar tard minn ħames snin mid-dħul fis-seħħ ta’ dan il-Ftehim.

7.   Il-Kosovo għandu jiżgura li l-prodotti esportati mit-territorju tiegħu ħames snin wara d-dħul fis-seħħ ta’ dan il-Ftehim ma jiksrux id-dispożizzjonijiet ta’ dan l-Artikolu.

8.   Il-Kosovo għandu jiżgura l-protezzjoni msemmija fil-paragrafi 1 sa 7 kemm b’inizjattiva tiegħu kif ukoll fuq it-talba ta’ parti interessata.

KAPITOLU III

Dispożizzjonijiet komuni

Artikolu 36

Kamp ta’ applikazzjoni

Dan il-Kapitolu għandu japplika għall-kummerċ tal-prodotti kollha bejn il-Partijiet ħlief fejn previst mod ieħor f’dan il-Kapitolu jew il-Protokoll I.

Artikolu 37

Konċessjonijiet imtejba

Dan it-Titolu bl-ebda mod ma għandu jaffettwa lil kwalunkwe Parti milli tapplika unilateralment miżuri aktar favorevoli.

Artikolu 38

Waqfien

1.   Mid-data tad-dħul fis-seħħ ta’ dan il-Ftehim, ma għandhomx jiddaħħlu dazji doganali ġodda fuq l-importazzjoni jew l-esportazzjoni, jew ħlasijiet li jkollhom effett ekwivalenti, u lanqas ma għandhom jiżdiedu dawk diġà applikati, fil-kummerċ bejn l-UE u l-Kosovo.

2.   Mid-data tad-dħul fis-seħħ ta’ dan il-Ftehim, ma għandhomx jiddaħħlu restrizzjonijiet kwantitattivi fuq l-importazzjoni jew l-esportazzjoni, jew miżuri li jkollhom effett ekwivalenti; lanqas dawk eżistenti ma għandhom isiru iktar restrittivi, fil-kummerċ bejn l-UE u l-Kosovo.

3.   Bla ħsara għall-konċessjonijiet mogħtija bl-Artikoli 28, 29, 30, 31 u 32, il-paragrafi 1 u 2 ta’ dan l-Artikolu m’għandhom bl-ebda mod ixekklu milli jitwettqu l-politiki tal-agrikoltura u tas-sajd rispettivi tal-UE u tal-Kosovo, jew milli jittieħdu miżuri taħt dawk il-politiki kemm-il darba dawn ma jaffettwawx il-proċedura tal-importazzjoni msemmija fl-Annessi II sa V u l-Protokoll I.

Artikolu 39

Projbizzjoni ta’ diskriminazzjoni fiskali

1.   L-UE u l-Kosovo ma għandhom idaħħlu l-ebda miżura jew prattika fiskali interna li, direttament jew indirettament, toħloq diskriminazzjoni bejn il-prodotti tal-Parti l-waħda u prodotti bħalhom li joriġinaw mit-territorju tal-Parti l-oħra. Fejn tali miżura jew prattika diġà teżisti, l-UE u l-Kosovo, kif xieraq, għandhom jirrevokawha jew iħassruha.

2.   Prodotti li jkunu esportati għat-territorju ta’ waħda mill-Partijiet ma għandhomx igawdu minn ħlas lura ta’ taxxa indiretta interna li tkun qabżet l-ammont ta’ taxxa indiretta li jkunu suġġetti għaliha.

Artikolu 40

Dazji ta’ natura fiskali

Id-disposizzjonijiet dwar it-tneħħija ta’ dazji tad-dwana fuq l-importazzjoni għandhom japplikaw ukoll għal dazji doganali ta’ natura fiskali.

Artikolu 41

Unjonijiet doganali, żoni ta’ kummerċ ħieles, arranġamenti transfruntiera/transkonfinali

1.   Dan il-Ftehim ma għandux jipprekludi l-manteniment u l-istabbiliment ta’ unjonijiet doganali, żoni ta’ kummerċ ħieles jew arranġamenti għall-kummerċ transfruntier/transkonfinali ħlief jekk dawn ibiddlu l-arranġamenti tal-kummerċ provduti f’dan il-Ftehim.

2.   Matul il-perjodi tranżizzjonali speċifikati fl-Artikolu 20, dan il-Ftehim ma għandux jaffettwa l-implimentazzjoni tal-arranġamenti preferenzjali speċifiċi li jirregolaw il-moviment tal-merkanzija li jew ikunu ġew stabbiliti fi Ftehimiet tal-fruntiera/tal-konfini milħuqin qabel bejn Stat Membru jew aktar u l-Kosovo, jew li jirriżultaw mill-Ftehimiet bilaterali speċifikati fit-Titolu III milħuqa mill-Kosovo sabiex jippromwovi l-kummerċ reġjonali.

3.   Għandhom isiru konsultazzjonijiet bejn il-Partijiet fil-KSA dwar il-Ftehimiet imsemmija fil-paragrafi 1 u 2 ta’ dan l-Artikolu u, jekk ikun hemm it-talba, dwar kwistjonijiet ewlenin oħra relatati mal-politika rispettiva tagħhom dwar il-kummerċ ma’ pajjiżi terzi. Dawn il-konsultazzjonijiet għandhom iseħħu, partikularment jekk pajjiż terz jissieħeb fl-UE, sabiex ikun żgurat li jiġu meqjusal-interessi reċiproċi tal-UE u l-Kosovo kif stipulat f’dan il-Ftehim.

Artikolu 42

Dumping u sussidji

1.   Dan il-Ftehim ma għandu jwaqqaf lil ebda Parti milli tieħu azzjoni ta’ difiża tal-kummerċ skont il-paragrafu 2 ta’ dan l-Artikolu u l-Artikolu 43.

2.   Jekk waħda mill-Partijiet issib li fil-kummerċ mal-Parti l-oħra jkun qed isir dumping u/jew issussidjar kompensatorju, hija tista’ tieħu miżuri adatti kontra din il-prattika skont il-Ftehim tad-WTO dwar l-Implimentazzjoni tal-Artikolu VI tal-GATT 1994 jew il-Ftehim tad-WTO dwar is-Sussidji u l-Miżuri Kompensatorji u skont il-leġiżlazzjoni rispettiva relattiva interna tagħha.

Artikolu 43

Klawżola ta’ salvagwardji

1.   Il-partijiet jaqblu li r-regoli u l-prinċipji tal-Artikolu XIX GATT 1994 u l-Ftehim tad-WTO dwar is-Salvagwardji jiġu applikati.

2.   Minkejja l-paragrafu 1, il-Parti importatriċi tista’ tieħu miżura ta’ salvagwardja bilaterali xierqa skont il-kundizzjonijiet u b’mod konformi mal-proċeduri stipulati f’dan l-Artikolu, fejn kull prodott ta’ Parti waħda qed jiġi importat fit-territorju tal-Parti l-oħra fi kwantitajiet tant ikbar u taħt kundizzjonijiet li joħolqu, jew jheddu li joħolqu:

(a)	ħsara serja lill-industrija domestika ta’ prodotti simili jew li jikkompetu fit-territorju tal-Parti importatriċi; jew

(b)	disturbi serji fi kwalunkwe qasam tal-ekonomija jew diffikultajiet li minħabba fihom il-qagħda ekonomika ta’ reġjun tal-Parti importatriċi tista’ teħżien serjament.

3.   Il-miżuri ta’ salvagwardja bilaterali diretti lejn l-importazzjoni mill-parti l-oħra ma għandhomx jeċċedu dak li hu meħtieġ sabiex jiġu rrimedjati l-problemi, kif definiti fil-paragrafu 2, li jkunu nqalgħu minħabba l-applikazzjoni ta’ dan il-Ftehim. Il-miżura ta’ salvagwardja adottata għandha tikkonsisti fis-sospensjoni taż-żieda jew fit-tnaqqis tal-marġini ta’ preferenza previsti taħt dan il-Ftehim għall-prodott ikkonċernat sa limitu massimu li jikkorrispondi għad-dazju bażiku li ssir referenza għalih fl-Artikolu 20, paragrafu 4(a) u (b) u l-paragrafu 5 għall-istess prodott. Dawn il-miżuri għandhom jinkludu elementi ċari li progressivament iwasslu għall-eliminazzjoni tagħhom sa mhux iktar tard mit-tmiem tal-perjodu stipulat, u ma għandhomx jittieħdu għal perjodu ta’ iktar minn sentejn.

F’ċirkostanzi eċċezzjonali għall-aħħar, il-miżuri jistgħu jiġu estiżi għal perjodu ulterjuri ta’ mhux aktar minn sentejn. L-ebda miżura ta’ salvagwardja bilaterali ma għandha tiġi applikata għall-importazzjoni ta’ prodott li qabel kien soġġett għal miżura ta’ din ix-xorta għal perjodu ta’ żmien ekwivalenti għal dak li matulu miżura bħal din kienet ġiet applikata qabel, sakemm dak il-perjodu ta’ nuqqas ta’ applikazzjoni ikun, mill-inqas, sentejn minn mindu tkun skadiet il-miżura.

4.   Fil-każijiet speċifikati f’dan l-Artikolu, qabel ma jieħdu l-miżuri msemmija hemmhekk, jew, fil-każijiet li għalihom japplika l-paragrafu 5(b) ta’ dan l-Artikolu, l-UE jew il-Kosovo, malajr kemm jista’ jkun, għandhom jagħtu t-tagħrif rilventi kollu lill-KSA sabiex isir eżami dettaljat tas-sitwazzjoni bl-għan li tinstab soluzzjoni aċċettabbli għaż-żewg Partijiet.

5.   Għall-implimentazzjoni tal-paragrafi 1, 2, 3 u 4 għandhom japplikaw id-dispożizzjonijiet li ġejjin:

(a)

Id-diffikultajiet li jinqalgħu mis-sitwazzjoni li għaliha ssir referenza f’dan l-Artikolu għandhom jintbagħtu mill-ewwel biex ikunu eżaminati mill-KSA, li jista’ jieħu kull deċiżjoni meħtieġa biex jintemmu dawn id-diffikultajiet. Jekk il-KSA jew il-Parti esportatriċi ma jiħdux deċiżjoni li ttemm id-diffikultajiet jew ma tkun instabet l-ebda soluzzjoni sodisfaċenti fi żmien 30 jum minn meta l-kwistjoni tkun intbagħtet lill-KSA, il-Parti importatriċi tista’ tadotta l-miżuri xierqa biex jinstab rimedju għad-diffikultà skont dan l-Artikolu. Fl-għażla tal-miżuri ta’ salvagwardja, trid tingħata prijorità lil dawk li l-inqas jiddisturbaw il-funzjonament tal-arranġamenti stabbiliti f’dan il-Ftehim. Il-miżuri ta’ salvagwardja għandhom jippreservaw il-livell/marġini ta’ preferenza mogħti taħt dan il-Ftehim.

(b)

Fejn ċirkostanzi eċċezzjonali jew kritiċi li jeħtieġu azzjoni immedjata jagħmluha impossibli li jkun hemm informazzjoni jew analiżi minn qabel, skont il-każ, il-Parti kkonċernata tista’, fis-sitwazzjonijiet speċifikati f’dan l-Artikolu, tapplika minnufih il-miżuri proviżorji neċessarji sabiex tiġi indirizzata s-sitwazzjoni u tgħarraf lill-Parti l-oħra dwar dan immedjatament.

Il-miżuri ta’ salvagwardja għandhom ikunu nnotifikati minnufih lill-KSA u għandhom ikunu s-suġġett għal konsultazzjonijiet minn żmien għall-ieħor f’dak il-korp, partikolarment bl-għan li ssir skeda biex dawn jitneħħew malli ċ-ċirkostanzi jippermettu.

6.   F’każ li l-UE, jew il-Kosovo, jissuġġettaw l-importazzjonijiet ta’ prodotti li jistgħu jagħtu lok għad-diffikultajiet li jissemmew f’dan l-Artikolu għal proċedura amministrattiva bl-għan li tkun provduta malajr l-informazzjoni dwar it-tendenza tal-flussi kummerċjali, il-Parti l-oħra għandha tiġi infurmata.

Artikolu 44

Klawsola ta’ nuqqas

1.   Fejn il-konformità ta’ dan it-Titolu twassal għal:

(a)	nuqqas kritiku, jew it-theddida ta’ dan, ta’ prodotti tal-ikel jew prodotti oħrajn essenzjali għall-Parti esportatriċi; jew

(b)

ir-riesportazzjoni lejn pajjiż terz ta’ prodott li fil-konfront tiegħu l-Parti esportatriċi żżomm restrizzjonijiet kwantitattivi fuq l-esportazzjoni, dazji fuq l-esportazzjoni jew miżuri jew ħlasijiet li jkollhom effett ekwivalenti, u fejn is-sitwazzjonijiet imsemmija hawn fuq iwasslu, jew probabbilment iwasslu, għal diffikultajiet maġġuri għall-Parti esportatriċi,

dik il-Parti tista’ tieħu miżuri xierqa taħt il-kundizzjonijiet u skont il-proċeduri stabbiliti f’dan l-Artikolu.

2.   Fl-għażla ta’ liema miżuri għandhom jittieħdu, trid tingħata prijorità lil dawk li l-inqas jiddisturbaw il-funzjonament tal-arranġamenti stabbiliti f’dan il-Ftehim. Dawn il-miżuri ma għandhomx japplikaw b’mod li jkun mezz ta’ diskriminazzjoni arbitrarja jew mhux ġustifikata fejn ikunu jinstabu l-istess kundizzjonijiet, jew inkella jkunu ta’ restrizzjoni moħbija fuq il-kummerċ, u għandhom jiġu eliminati fejn il-kundizzjonijiet ma jkunux jiġġustifikaw aktar iż-żamma tagħhom.

3.   Qabel ma jieħdu l-miżuri msemmija fil-paragrafu 1, jew, malajr kemm jista’ jkun f’każijiet li għalihom japplika l-paragrafu 4, l-UE jew il-Kosovo, għandhom jagħtu lill-KSA t-tagħrif kollu rilevanti, bl-għan li tinstab soluzzjoni aċċettabbli għall-Partijiet. Il-KSA jista’ jaqbel fuq kwalunkwe mezz meħtieġ sabiex jintemmu d-diffikultajiet. Jekk ma jintlaħaqx ftehim fi żmien 30 jum minn meta l-kwistjoni tkun ġiet quddiem il-KSA, il-Parti esportatriċi tista’ tapplika miżuri skont dan l-Artikolu dwar l-esportazzjoni tal-prodott inkwistjoni.

4.   Fejn ċirkostanzi eċċezzjonali jew kritiċi li jeħtieġu azzjoni immedjata jagħmluha impossibli li jkun hemm informazzjoni jew analiżi minn qabel, skont il-każ, l-UE jew il-Kosovo jistgħu japplikaw minnufih il-miżuri ta’ prekawzjoni meħtieġa biex tiġi indirizzata s-sitwazzjoni, u għandhom jgħarrfu lill-Parti l-oħra dwar dan minnufih.

5.   Il-KSA għandu jiġi mgħarraf minnufih jekk jittieħdu kwalkunkwe miżuri skont dan l-Artikolu, u għandhom ikunu soġġetti għal konsultazzjonijiet minn żmien għall-ieħor f’dak il-korp, partikolarment bil-għan li tiġi stabbilita skeda għall-eliminazzjoni tagħhom malli ċ-ċirkostanzi jippermettu.

Artikolu 45

Monopolji tal-Istat

Fir-rigward ta’ monopolji tal-Istat ta’ xorta kummerċjali, il-Kosovo jiżgura li, bid-dħul fis-seħħ ta’ dan il-Ftehim, ma sseħħ l-ebda diskriminazzjoni bejn ċittadini tal-Istati Membri u tal-Kosovo dwar il-kundizzjonijiet ta’ provvista jew ikkumerċjalizzar tal-prodotti.

Artikolu 46

Regoli ta’ oriġini

Sakemm mhux stipulat mod ieħor f’dan il-Ftehim, il-Protokoll III jistabbilixxi r-regoli tal-oriġini għall-implimentazzjoni ta’ dan il-Ftehim.

Artikolu 47

Restrizzjonijiet awtorizzati

Dan il-Ftehim ma għandux jipprekludi l-projbizzjonijiet jew ir-restrizzjonijiet fuq l-importazzjonijiet, l-esportazzjonijiet jew merkanzija fi tranżitu ġġustifikati fuq il-bażi ta’ moralità pubblika, politika pubblika jew sigurtà pubblika; il-protezzjoni tas-saħħa u l-ħajja ta’ bnedmin, annimali jew pjanti; il-protezzjoni ta’ teżori pubbliċi ta’ valur artistiku, storiku jew arkeoloġiku, jew il-protezzjoni ta’ proprjetà intellettwali, industrijali u kummerċjali, jew regoli relatati mad-deheb u l-fidda. Madanakollu, dawn il-projbizzjonijiet jew restrizzjonijiet ma għandhomx ikunu mezz ta’ diskriminazzjoni arbitrarja jew restrizzjoni moħbija bejn il-Partijiet.

Artikolu 48

Nuqqas fl-għoti ta’ kooperazzjoni amministrattiva

1.   Il-Partijiet jaqblu li l-kooperazzjoni amministrattiva hija essenzjali għall-implimentazzjoni u l-kontroll tat-trattament preferenzjali mogħti taħt dan it-Titolu u jenfasizzaw l-impenn tagħhom fil-ġlieda kontra l-irregolaritajiet u l-frodi fid-dwana u fi kwistjonijiet relatati.

2.   Fejn Parti ssib, fuq il-bażi ta’ informazzjoni oġġettiva, nuqqas ta’ kooperazzjoni amministrattiva u/jew ta’ irregolaritajiet jew frodi taħt dan it-Titolu, dik il-Parti (referenza għaliha f’dan l-Artikolu bħala “il-Parti konċernata”) tista’ temporanjament tissospendi t-trattament preferenzjali rilevanti tal-prodott(i) kkonċernat(i) skont dan l-Artikolu.

3.   Għall-finijiet ta’ dan l-Artikolu n-nuqqas ta’ kooperazzjoni amministrattiva tfisser, fost l-oħrajn:

(a)	in-nuqqas ripetut li jiġu rrispettati l-obbligi għall-verifika tal-istatus oriġinali tal-prodott(i) kkonċernat(i);

(b)	ir-rifjut ripetut jew id-dewmien bla bżonn fit-twettiq u/jew il-komunikazzjoni tar-riżultati tal-verifika sussegwenti tal-prova tal-oriġini;

(c)	ir-rifjut ripetut jew id-dewmien mhux bla bżonn biex tinkiseb l-awtorizzazzjoni sabiex jitwettqu missjonijiet ta’ kooperazzjoni amministrattiva għall-verifika tal-awtentiċità ta’ dokumenti jew ir-reqqa tal-informazzjoni rilevanti għall-għotja tat-trattament preferenzjali inkwistjoni.

Għall-fini ta’ dan l-Artikolu, jistgħu jinstabu irregolaritajiet jew frodi, fost l-oħrajn, fejn hemm żieda rapida, mingħajr spjegazzjoni sodisfaċenti, fl-importazzjonijiet ta’ prodotti li jeċċedu l-livell tas-soltu ta’ produzzjoni u l-kapaċità ta’ esportazzjoni tal-Parti l-oħra, li hija marbuta ma’ informazzjoni oġġettiva li tikkonċerna irregolaritajiet jew frodi.

4.   L-applikazzjoni ta’ sospensjoni temporanja tkun soġġetta għall-kundizzjonijiet li ġejjin:

(a)

Il-Parti li tkun għamlet is-sejba, fuq il-bażi ta’ informazzjoni oġġettiva, ta’ nuqqas ta’ għoti ta’ kooperazzjoni amministrattiva u/jew ta’ irregolaritajiet jew frodi tavża immedjatament lill-Kumitat ta’ Stabbilizzazzjoni u Assoċjazzjoni dwar is-sejbiet tagħha flimkien mal-informazzjoni oġġettiva u tibda konsultazzjonijiet mal-Parti l-oħra fi ħdan il-Kumitat ta’ Stabbilizzazzjoni u Assoċjazzjoni, fuq il-bażi tal-informazzjoni rilevanti kollha u s-sejbiet oġġettivi, bil-għan li tinstab soluzzjoni aċċettabbli għaż-żewġ Partijiet.

(b)

Fejn il-Partijiet ikunu daħlu f’konsultazzjonijiet fi ħdan il-Kumitat ta’ Stabbilizzazzjoni u Assoċjazzjoni skont il-punt (a) u ma rnexxilhomx jaqblu fuq soluzzjoni aċċettabbli fi żmien tliet xhur wara n-notifika, il-Parti kkonċernata tista’ tissospendi b’mod temporanju t-trattament preferenzjali li huwa rilevanti għall-prodott(i) kkonċernat(i). Il-Kumitat ta’ Stabbilizzazzjoni u Assoċjazzjoni jiġi notifikat dwar sospensjoni temporanja immedjatament.

(c)

Is-sospensjonijiet temporanji taħt dan l-Artikolu għandhom ikunu limitati għall-minimu meħtieġ sabiex jitħarsu l-interessi finanzjarji tal-Parti kkonċernata. M’ għandhomx jaqbżu l-perjodu ta’ sitt xhur, li jista’ jiġġedded. Il-Kumitat ta’ Stabbilizzazzjoni u Assoċjazzjoni għandu jiġi notifikat immedjatament wara li jkunu ġew adottati sospensjonijiet temporanji. Dawn għandhom ikunu soġġetti għal konsultazzjonijiet perjodiċi fi ħdan il-Kumitat ta’ Stabbilizzazzjoni u Assoċjazzjoni, partikularment sabiex jintemmu hekk kif il-kondizzjonijiet tal-applikazzjoni tagħhom ma jibqgħux jipprevalu.

5.   Fil-ħin tan-notifika lill-Kumitat ta’ Stabbilizzazzjoni u Assoċjazzjoni taħt il-paragrafu 4 (a), il-Parti kkonċernata għandha tippubblika avviż lill-importaturi fil-Ġurnal Uffiċjali tagħha. L-avviż għall-impurtaturi għandu jindika li hemm sejba dwar il-prodott ikkonċernat, fuq il-bażi ta’ informazzjoni oġġettiva, ta’ nuqqas ta’ kooperazzjoni amministrattiva u/jew ta’ irregolaritajiet jew frodi.

Artikolu 49

Fil-każ ta’ żball mill-awtoritajiet kompetenti fil-ġestjoni xierqa tas-sistema preferenzjali fl-esportazzjoni, u partikolarment fl-applikazzjoni tal-Protokoll III, fejn dan l-iżball ikollu konsegwenzi f’termini ta’ dazji ta’ importazzjoni, il-Parti Kontraenti li tkun qed taffaċċja dawn il-konsegwenzi tista’ titlob lill-KSA sabiex jeżamina l-possibiltajiet li jiġu adottati l-miżuri xierqa kollha bl-għan li tissolva l-problema.

TITOLU V

STABBILIMENT, FORNIMENT TAS-SERVIZZI U KAPITAL

Artikolu 50

Definizzjoni

Għall-finijiet ta’ dan il-Ftehim:

(1)

“Kumpanija tal-UE” jew “kumpanija Kosovara” jfissru, rispettivament, kumpanija stabbilita konformement mal-liġijiet ta’ Stat Membru, jew tal-Kosovo, u li jkollha l-uffiċju jew l-amministrazzjoni ċentrali jew il-post prinċipali tan-negozju tagħha rreġistrati fit-territorju tal-UE jew tal-Kosovo. Madankollu, jekk il-kumpanija jkollha biss l-uffiċċju reġistrat tagħha fit-territorju tal-UE jew tal-Kosovo rispettivament, din għandha titqies biss bħala kumpanija tal-UE jew Kosovara jekk il-ħidmiet tagħha jkollhom rabta reali u kontinwa mal-ekonomija ta’ wieħed mill-Istati Membri jew il-Kosovo;

(2)	“Sussidjarja” ta’ kumpanija tfisser kumpanija li hija effettivament ikkontrollata minn kumpanija oħra;

(3)

“Fergħa” ta’ kumpanija tfisser post tan-negozju mingħajr personalità ġuridika li jkollu d-dehra ta’ permanenza, bħal estensjoni ta’ entità prinċipali, ikollu ġestjoni u jkun materjalment mgħammar sabiex jinnegozja kummerċ ma’ partijiet terzi sabiex dawn tal-aħħar, għalkemm ikunu jafu li, jekk neċessarju, jkun hemm rabta ġuridika mal-entità prinċipali, li l-uffiċju ewlieni tagħha jkun f’pajjiż barrani, ma jkollhomx għalfejn jinnegozjaw direttament mal-entità prinċipali iżda jagħmlu tranżazzjonijiet kummerċjali fil-post ta’ negozju li jikkostitwixxi l-estensjoni;

(4)	“Stabbiliment” tfisser id-dritt li tibda attivitajiet kummerċjali permezz tal-istabbiliment ta’ kumpaniji, inkluż sussidjarji u fergħat, fl-UE jew il-Kosovo rispettivament;

(5)	“Operazzjonijiet” tfisser it-twettiq ta’ attivitajiet ekonomiċi;

(6)	“Attivitajiet ekonomiċi” fil-prinċipju tinkludi attivitajiet ta’ xejra industrijali, kummerċjali jew professjonali, u attivitajiet ta’ nies tas-sengħa;

(7)	“Ċittadin tal-UE” u “ċittadin tal-Kosovo” rispettivament ifissru persuna fiżika ċittadina ta’ Stat Membru jew tal-Kosovo;

(8)	“Servizzi finanzjarji” tfisser dawk l-attivitajiet deskritti fl-Anness VI.

KAPITOLU I

Stabbiliment

Artikolu 51

1.   Il-Kosovo għandu jiffaċilita t-twaqqif tal-operazzjonijiet fit-territorju tiegħu minn kumpaniji tal-UE. Għal dak il-għan, mid-dħul fis-seħħ ta’ dan il-Ftehim, il-Kosovo għandu jagħti:

(a)	fir-rigward tal-istabbiliment ta’ kumpaniji tal-UE fit-territorju tal-Kosovo, trattament mhux inqas favorevoli milli jingħata lill-kumpaniji tiegħu jew lil kwalunkwe kumpanija minn pajjiż terz, skont liema trattament ikun l-aħjar;

(b)

fir-rigward tal-istabbiliment ta’ sussidjarji u fergħat ta’ kumpaniji tal-UE fit-territorju tal-Kosovo ladarba dawn jiġu stabbiliti, trattament mhux inqas favorevoli milli jingħata lil kumpaniji u fergħat tiegħu jew lil kwalunkwe sussidjarja u fergħa ta’ kumpanija minn pajjiż terz, skont liema trattament ikun l-aħjar;

2.   L-UE għandha tagħti, mid-dħul fis-seħħ ta’ dan il-Ftehim:

(a)	fir-rigward tal-istabbiliment ta’ kumpaniji Kosovari, trattament mhux inqas favorevoli milli jingħata mill-UE lill-kumpaniji tagħha jew lil kwalunkwe kumpanija minn pajjiż terz, skont liema trattament ikun l-aħjar;

(b)

fir-rigward tal-operazzjoni ta’ sussidjarji u fergħat ta’ kumpaniji Kosovari, stabbiliti fit-territorju tagħha, trattament mhux inqas favorevoli milli jingħata mill-UE lill-kumpanniji jew fergħat tagħha stess, jew lil kwalunkwe sussidjarja jew fergħa ta’ kumpanija minn pajjiż terz, stabbilita fit-territorju tagħha, skont liema trattament ikun l-aħjar.

3.   Il-Partijiet m’għandhomx jadottaw regolamenti jew miżuri ġodda li jiddiskriminaw fir-rigward tal-istabbiliment ta’ kumpaniji tal-Parti l-oħra fit-territorju tagħhom jew fir-rigward tal-operazzjoni, ladarba din tiġi stabbilita, b’paragun mal-kumpaniji tagħhom stess.

4.   Minkejja dan l-Artikolu,

(a)	is-sussidjarji u l-fergħat ta’ kumpaniji tal-UE għandu jkollhom id-dritt, mad-dħul fis-seħħ ta’ dan il-Ftehim, li jużaw u jikru propjetà immobbli fil-Kosovo;

(b)

fi żmien ħames snin mid-dħul fis-seħħ ta’ dan il-Ftehim, is-sussidjarji u l-fergħat ta’ kumpaniji tal-UE għandu jkollhom id-dritt li jakkwistaw u jgawdu drittijiet ta’ sjieda ta’ propjetà immobbli bħall-kumpaniji Kosovari, u fir-rigward ta’ beni pubbliċi/ta’ interess komuni, l-istess drittijiet li jgawdu minnhom il-kumpaniji Kosovari rispettivament fejn dawn id-drittijiet huma neċessarji biex jitwettqu l-attivitjiet ekonomiċi li għalihom ġew stabbiliti.

Artikolu 52

1.   Mingħajr ħsara għall-Artikolu 54, il-Partijiet jistgħu jirregolaw l-istabbiliment u l-operazzjoni ta’ kumpaniji fit-territorju tagħhom, kemm-il darba dawn ir-regolamenti ma jiddiskriminawx kontra l-kumpaniji u ċ-ċittadini tal-Parti l-oħra b’paragun mal-kumpaniji tagħhom.

2.   Fir-rigward tas-servizzi finanzjarji, minkejja kwalunkwe dispożizzjoni oħra ta’ dan il-Ftehim, Parti minnhom ma għandhiex titwaqqaf milli tieħu miżuri għal raġunijiet ta’ prudenza, inkluż għall-protezzjoni ta’ investituri, depożitanti, detenturi ta’ poloz jew persuni li lejhom ikun jeżisti dmir fiduċjarju minn fornitur ta’ servizzi finanzjarji, jew milli tiżgura l-integrità u l-istabbiltà tas-sistema finanzjarja. Dawn il-miżuri ma għandhomx jintużaw bħala mezz sabiex jiġu evitati l-obbligi tal-Parti taħt dan il-Ftehim.

3.   L-ebda parti ta’ dan il-Ftehim ma għandha tinftiehem li tirrikjedi lil Parti sabiex tikxef informazzjoni b’rabta mal-affarijiet u l-kontijiet ta’ konsumaturi individwali jew kwalunkwe informazzjoni kunfidenzjali jew ta’ propjetà fil-pussess ta’ entitajiet pubbliċi.

Artikolu 53

1.   Dan il-Kapitolu huwa mingħajr ħsara għad-dispożizzjonijiet tat-Trattat li jistabbilixxi l-Komunità tat-Trasport mal-Balkani tal-Punent u tal-Ftehim Multilaterali dwar l-istabbiliment ta’ Żona ta’ Avjazzjoni Komuni Ewropea ffirmat fid-9 ta’ Ġunju 2006 (4).

2.   Il-KSA jista’, fil-kamp ta’ applkazzjoni tal-politika tat-trasport tal-UE, jagħmel rakkomandazzjonijiet f’każi speċifiċi biex jittejbu l-istabbiliment u l-operazzjoni fl-oqsma koperti mill-paragrafu 1.

3.   Dan il-Kapitolu ma għandux japplika għat-trasport marittimu.

Artikolu 54

1.   L-Artikoli 51 u 52 ma jipprekludux l-applikazzjoni, min-naħa ta’ Parti minnhom, ta’ regoli partikolari li jikkonċernaw l-istabbiliment u l-operazzjoni fit-territorju tagħha ta’ fergħat ta’ kumpaniji ta’ Parti oħra li mhumiex inkorporati fit-territorju tal-ewwel Parti, li huma ġustifikati minn differenzi legali jew tekniċi bejn dawn il-fergħat meta mqabbla ma’ fergħat ta’ kumpaniji inkorporati fit-territorju tagħha jew, fir-rigward tas-servizzi finanzjarji, għal raġunijiet prudenzjali.

2.   Id-differenza fit-trattament m’għandhiex tmur lil hinn minn dak li hu strettament neċessarju bħala riżultat ta’ dawn id-differenzi legali jew tekniċi jew, fir-rigward tas-servizzi finanzjarji, għal raġunijiet prudenzjali.

KAPITOLU II

Forniment ta’ servizzi

Artikolu 55

1.   Kumpanija tal-UE stabbilita fit-territorju tal-Kosovo jew kumpanija Kosovara stabbilita fl-UE għandha tkun intitolata li timpjega, jew li timpjega permezz ta’ waħda mis-sussidjarji jew fergħat tagħha, konformi mal-leġiżlazzjoni fis-seħħ fit-territorju ospitanti tal-istabbiliment, fit-territorju tal-UE u tal-Kosovo rispettivament, impjegati li jkunu ċittadini tal-UE jew ċittadini tal-Kosovo rispettivament, kemm-il darba dawn l-impjegati jkunu persunal prinċipali skont kif definit fil-paragrafu 2 u li huma impjegati esklussivament minn kumpaniji, sussidjarji jew fergħat.

2.   Il-persunal prinċipali tal-imsemmija kumpaniji, minn hawn ‘il quddiem imsejħa “organizzazzjonijiet” huma “ħaddiema bi trasferiment intra-ażjendali” kif definit fil-punt (c) fil-kategoriji li ġejjin, kemm-il darba l-organizzazzjoni tkun persuna ġuridika u l-persuni kkonċernati jkunu ġew impjegati minnha jew kienu sħab fiha (ħlief jekk bħala azzjonisti bil-maġġoranza tal-ishma), mill-inqas għas-sena li ppreċediet tali ċaqliq:

(a)

Persuni li jaħdmu f’kariga għolja fi ħdan organizzazzjoni, li primarjament jidderieġu l-ġestjoni tal-istabbiliment, u li huma ssorveljati jew ikkontrollati b’mod ġenerali prinċiparjament minn bord ta’ diretturi jew azzjonisti tal-kumpanija, jew l-ekwivalenti tagħhom, inkluż: (i) li jidderieġu l-istabbiliment ta’ dipartiment jew subdiviżjoni tal-istabbiliment; (ii) jissorveljaw u jikkontrollaw ix-xogħol ta’ impjegati li jissorveljaw, professjonali jew li jimmaniġjaw; (iii) li għandhom personalment l-awtorità li jirreklutaw u jkeċċu jew li jirrakkomandaw ir-reklutaġġ, it-tkeċċija jew azzjonijiet oħra relatati mal-persunal;

(b)

Il-persuni li jaħdmu fi ħdan organizzazzjoni u li għandhom għarfien speċjalizzat essenzjali għas-servizz, għat-tagħmir ta’ riċerka, għat-tekniki u l-ġestjoni tal-istabbiliment. Il-valutazzjoni ta’ dan l-għarfien tista’ tirrifletti, apparti l-għarfien speċifiku għall-istabbiliment, livell għoli ta’ kwalifika dwar tip ta’ ħidma jew sengħa li tirrekjedi għarfien tekniku speċifiku, inkluża s-sħubija fi professjoni akkreditata;

(c)

“Ħaddiem bi trasferiment intra-ażjendali” hija definita bħala persuna fiżika li taħdem fi ħdan organizzazzjoni fit-territorju ta’ Parti minnhom, u li tkun temporanjament trasferita fil-kuntest tat-twettiq ta’ attivitajiet ekonomiċi fit-territorju tal-Parti l-oħra; l-organizzazzjoni kkonċernata jkollha s-sede prinċipali tagħha fit-territorju ta’ Parti minnhom u t-trasferiment ikun lejn stabbiliment (fergħa, sussidjarja) ta’ dik l-organizzazzjoni li effettivament twettaq attivitajiet ekonomiċi simili fit-territorju tal-Parti l-oħra.

3.   Id-dħul u l-preżenza temporanja fit-territorju tal-UE jew fil-Kosovo ta’ ċittadini Kosovari u ċittadini tal-UE rispettivament jiġu permessi meta dawn ir-rappreżentanti tal-kumpaniji jkunu persuni li jokkupaw kariga għolja, kif definit fil-paragrafu 2(a), fi ħdan kumpanija, u jkunu responsabbli mill-istabbiliment fl-UE ta’ sussidjarja jew fergħa ta’ kumpanija Kosovara, jew ta’ sussidjarja jew fergħa Kosovara ta’ kumpanija tal-UE fi Stat Membru jew fil-Kosovo rispettivament, meta:

(a)	dawk ir-rappreżentanti ma jkunux involuti f’bejgħ dirett jew fl-għoti ta’ servizzi, u ma jirċevux remunerazzjoni minn sors li jinsab fit-territorju li jospita l-istabbiliment; kif ukoll

(b)	il-kumpanija jkollha s-sede prinċipali tagħha barra l-UE jew il-Kosovo, rispettivament, u ma jkollha l-ebda rappreżentant, uffiċċju, fergħa jew sussidjarja f’dak l-Istat Membru jew fil-Kosovo rispettivament.

Artikolu 56

Sabiex tkun iktar faċli għaċ-ċittadini tal-UE u ċ-ċittadini tal-Kosovo li jibdew u jwettqu attivitajiet professjonali regolati fil-Kosovo u l-UE rispettivament, fi żmien sentejn mid-dħul fis-seħħ ta’ dan il-Ftehim, il-KSA jeżamina liema passi huma meħtieġa għar-rikonoxximent reċiproku tal-kwalifiki. Jista’ jieħu l-miżuri kollha li huma meħtieġa għal dak il-għan.

Artikolu 57

Sitt snin mid-dħul fis-seħħ ta’ dan il-Ftehim, il-KSA għandu jistabbilixxi l-modalitajiet sabiex jiġu estiżi d-dispożizzjonijiet ta dan il-kapitolu lejn iċ-ċittadini tal-UE u tal-Kosovo bil-għan tad-dħul u soġġorn temporanju ta’ fornituri tas-servizzi li jaħdmu għal rashom ġewwa territorju ta’ Parti waħda u li kkonkludew kuntratt bona fide biex ifornu servizzi b’konsumatur finali ġewwa dik il-parti, li jirrekjedu preżenza temporanja ġewwa dik il-Parti sabiex ikunu jistgħu jonoraw il-kuntratt li jfornu s-servizzi.

Artikolu 58

1.   L-UE u l-Kosovo jimpenjaw ruħhom, konformement mal-paragrafi 2 u 3, li jieħdu l-passi neċessarji sabiex progressivament jippermettu l-għoti ta’ servizzi minn kumpaniji tal-UE, kumpaniji Kosovari jew ċittadini tal-UE jew Kosovari li huma stabbiliti fit-territorju ta’ Parti li mhix l-istess waħda tal-persuna li għaliha huma intiżi s-servizzi.

2.   Konformement mal-proċess ta’ liberalizzazzjoni msemmi fil-paragrafu 1, il-Partijiet għandhom jippermettu l-moviment temporanju ta’ persuni fiżiċi li jipprovdu s-servizz jew li huma impjegati bħala persunal ewlieni mal-fornitur ta’ servizz kif imfisser fl-Artikolu 55, inklużi persuni fiżiċi li huma rappreżentanti ta’ kumpanija tal-UE jew Kosovara jew ċittadin tal-UE jew tal-Kosovo u li qed ifittxu dħul temporanju għall-finijiet tan-negozjar għall-bejgħ ta’ servizzi jew li jidħlu fi ftehim sabiex ibigħu servizzi f’isem dak il-fornitur ta’ servizzi, fejn dawk ir-rappreżentanti ma jkunux involuti fil-bejgħ dirett lill-pubbliku ġenerali jew fl-għoti tas-servizzi nfushom.

3.   Wara ħames snin mid-dħul fis-seħħ ta’ dan il-Ftehim, il-KSA għandu jieħu l-miżuri meħtieġa sabiex jimplementa progressivement il-paragrafi 1 u 2. Il-progress li għamel il-Kosovo fl-approssimazzjoni tal-liġijiet tiegħu mal-acquis tal-UE għandu jiġi kkunsidrat.

Artikolu 59

1.   Il-Partijiet ma għandhom jieħdu l-ebda miżura jew azzjoni li twassal sabiex il-kundizzjonijiet tal-għoti ta’ servizzi minn ċittadini jew kumpaniji tal-UE jew ċittadini jew kumpaniji Kosovari li għandhom ir-residenza għat-tul jew huma stabbiliti f’Parti li mhix dik tal-persuna destinatarja tas-servizzi jkunu sinifikantement aktar ristrettivi meta mqabbla mas-sitwazzjoni eżistenti fil-jum qabel id-dħul fis-seħħ ta’ dan il-Ftehim.

2.   Jekk Parti minnhom hi tal-fehma li l-miżuri introdotti mill-Parti l-oħra mid-dħul fis-seħħ ta’ dan il-Ftehim iwasslu għal sitwazzjoni aktar restrittiva b’mod sinifikanti fir-rigward tal-għoti ta’ servizzi meta mqabbel mas-sitwazzjoni eżistenti fid-data tad-dħul fis-seħħ dan il-Ftehim, din il-Parti tista’ titlob lill-Parti l-oħra sabiex tibda l-konsultazzjonijiet.

Artikolu 60

Fir-rigward tal-għoti ta’ servizzi tat-trasport bejn l-UE u l-Kosovo, għandhom japplikaw id-dispożizzjonijiet li ġejjin:

(1)	Fir-rigward tat-trasport bl-ajru, il-kundizzjonijiet tal-aċċess reċiproku għas-suq jaqa’ taħt il-Ftehim Multilaterali dwar l-Istabbiliment ta’ Żona ta’ Avjazzjoni Komuni Ewropea.

(2)	Fir-rigward tat-trasport fuq l-art, il-kundizzjonijiet għall-aċċess reċiproku għas-suq u t-traffiku ta’ tranżitu fuq it-triq għandu jaqa’ taħt it-Trattat li jistabbilixxi l-Komunità tat-Trasport.

(3)

Il-Kosovo għandu jadatta l-leġiżlazzjoni tiegħu, inklużi r-regoli amministrattivi, tekniċi u oħrajn, għal dawk tal-UE eżistenti fi kwalunkwe żmien fil-qasam tat-trasport bl-ajru u fuq l-art kemm-il darba jservu għal għanijiet ta’ liberalizzazzjoni u l-aċċess reċiproku għas-swieq tal-Partijiet u jiffaċilitaw il-moviment ta’ passiġġieri u tal-merkanzija.

(4)	Il-Kosovo jimpenja ruħu li jimxi ma’ kull konvenzjoni internazzjonali marbuta mas-sigurtà fit-toroq, b’attenzjoni speċjali għan-netwerk komprensiv miftiehem tal-Osservatorju tat-Trasport tax-Xlokk tal-Ewropa (SEETO).

(5)	Dan il-Kapitolu ma għandux japplika għas-servizzi marittimi.

KAPITOLU III

Traffiku ta’ tranżitu

Artikolu 61

Definizzjonijiet

Għall-finijiet ta’ dan il-Ftehim, għandhom japplikaw id-definizzjonijiet li ġejjin:

(1)	Traffiku ta’ tranżitu tal-UE: il-ġarr, minn trasportatur stabbilit fl-UE, ta’ merkanzija li tkun għaddejja mit-territorju tal-Kosovo fi triqitha lejn jew minn Stat Membru.

(2)	Traffiku ta’ tranżitu tal-Kosovo: il-ġarr, minn trasportatur stabbilit fil-Kosovo, ta’ merkanzija mill-Kosovo li tkun għaddejja mit-territorju tal-UE u huwa destinat lejn pajjiż terz jew ta’ merkanzija minn pajjiż terz fi triqtu lejn il-Kosovo.

Artikolu 62

Dispożizzjonijiet Ġenerali

1.   Dan il-kapitolu ma għandux jibqa’ japplika ladarba t-Trattat li jistabbilixxi l-Komunità tat-Trasport jidħol fis-seħħ.

2.   Il-Partijiet jaqblu li jagħtu aċċess bla restrizzjonijiet lit-traffiku tal-UE li jkun għaddej mill-Kosovo u lit-traffiku Kosovar fi tranżitu mill-UE b’effett mid-data tad-dħul fis-seħħ ta’ dan il-Ftehim.

3.   Jekk, bħala riżultat tad-drittijiet mogħtija taħt il-paragrafu 2, it-traffiku fi tranżitu mit-trasportaturi tal-UE jiżdied sal-grad li joħloq jew jhedded li joħloq dannu serju lill-infrastruttura u/jew il-fluwidità tat-traffiku fuq l-assi, u taħt l-istess ċirkostanzi jinqalgħu xi problemi fit-territorju tal-UE qrib tal-fruntiera tal-Kosovo, il-kwistjoni għandha tiġi sottomessa lill-KSA skont l-Artikolu 128 ta’ dan il-Ftehim. Il-Partijiet jistgħu jipproponu miżuri eċċezzjonali, temporanji u nondiskriminatorji kif meħtieġ biex jillimitaw jew inaqqsu tali dannu.

4.   Il-Partijiet għandhom joqogħdu lura milli jieħdu xi azzjoni unilaterali li tista’ twassal għal diskriminazzjoni bejn it-trasportaturi jew il-vetturi mill-UE u t-trasportaturi jew il-vetturi mill-Kosovo. Il-Partijiet għandhom jieħdu l-miżuri kollha meħtieġa biex jiffaċilitaw it-trasport fit-triq lejn jew minn ġewwa t-territorju tal-Parti l-oħra.

Artikolu 63

Simplifikazzjoni tal-formalitajiet

1.   Il-Partijiet jaqblu li jissimplifikaw iċ-ċirkolazzjoni tal-merkanzija bil-ferrovija u bit-triq, kemm jekk bilaterali kemm jekk fi tranżitu.

2.   Il-Partijiet jaqblu, sa fejn hu neċessarju, li jieħdu azzjoni konġunta dwar, u li jinkoraġġixxu, l-adozzjoni ta’ miżuri ta’ simplifikazzjoni ulterjuri.

KAPITOLU IV

Pagamenti kurrenti u l-moviment ta’ kapital

Artikolu 64

Il-Partijiet jimpenjaw ruħhom li jawtorizzaw, f’munita liberament konvertibbli, b’mod konformi mal-Artikolu VIII tal-Artikoli tal-Ftehim tal-Fond Monetarju Internazzjonali, kull pagament u trasferiment fil-kont kurrenti ta’ bilanċ ta’ pagamenti bejn l-UE u l-Kosovo.

Artikolu 65

1.   Fir-rigward ta’ tranżazzjonijiet fuq il-kont kapitali u finanzjarju tal-bilanċ tal-pagamenti, mid-dħul fis-seħħ ta’ dan il-Ftehim, il-Partijiet għandhom jiżguraw il-moviment liberu ta’ kapital relatat ma’ investimenti diretti f’kumpaniji ffurmati skont il-leġiżlazzjoni applikabbli u investimenti magħmula konformement mal-Kapitolu I tat-Titolu V, u l-likwidazzjoni jew ir-ripatrijazzjoni ta’ dawn l-investimenti u kull profitt li joħroġ minnhom.

2.   Fir-rigward ta’ tranżazzjonijiet fuq il-kont kapitali u finanzjarju tal-bilanċ tal-pagamenti, mid-dħul fis-seħħ ta’ dan il-Ftehim, il-Partijiet jiżguraw il-moviment liberu ta’ kapital b’rabta ma’ krediti relatati ma’ tranżazzjonijiet kummerċjali jew mal-għoti ta’ servizzi, inkluż is-self u l-kreditu finanzjarju, li resident ta’ waħda mill-Partijiet ikun qed jipparteċipa fihom. Dan l-Artikolu ma jkoprix l-investiment f’forma ta’ portafoll, notevolment l-akkwiżizzjoni ta’ ishma fuq is-suq finanzjarju bl-intenzjoni waħdanija li jsir investiment finanzjarju, mingħajr l-intenzjoni li jiġi influwenzat il-maniġment u l-kontroll tal-impriża.

3.   Fi żmien ħames snin mid-dħul fis-seħħ ta’ dan il-Ftehim, il-Kosovo għandu jikkonċedi trattament nazzjonali liċ-ċittadini tal-UE li jakkwistaw proprjetà immobbli fit-territorju tiegħu.

4.   Mingħajr ħsara għall-paragrafu 1, il-Partijiet ma għandhom jintroduċu l-ebda restrizzjoni ġdida dwar il-moviment tal-kapital u l-pagamenti kurrenti bejn residenti tal-UE u tal-Kosovo u ma għandhomx jagħmlu l-arranġamenti eżistenti iktar restrittivi.

5.   Mingħajr ħsara għal dan l-Artikolu u l-Artikolu 64, fejn, f’ċirkostanzi eċċezzjonali, il-movimenti tal-kapital jikkawżaw, jew jheddu li jikkawżaw, diffikultajiet serji għall-ħidma tal-politika dwar ir-rati tal-kambju jew għall-politika monetarja fl-UE jew il-Kosovo, l-UE u l-Kosovo, rispettivament, jistgħu jieħdu miżuri ta’ salvagwardja fir-rigward tal-movimenti tal-kapital bejn l-UE u l-Kosovo għal perjodu li ma jaqbiżx is-sitt xhur jekk dawn il-miżuri jkunu strettament neċessarji.

6.   Il-Partijiet għandhom jikkonsultaw lil xulxin bil-għan li jiffaċilitaw il-moviment tal-kapital bejn l-UE u l-Kosovo sabiex jippromwovu l-għanijiet ta’ dan il-Ftehim.

Artikolu 66

1.   Matul l-ewwel sena mid-dħul fis-seħħ ta’ dan il-Ftehim, il-Kosovo għandu jieħu miżuri li jippermettu l-ħolqien tal-kundizzjonijiet neċessarji għall-applikazzjoni gradwali ulterjuri tar-regoli tal-UE dwar il-moviment liberu tal-kapital.

2.   Sa tmiem it-tieni sena mid-data tad-dħul fis-seħħ ta’ dan il-Ftehim, il-KSA għandu jiddettermina l-modalitajiet għall-applikazzjoni sħiħa tar-regoli tal-UE dwar il-moviment liberu tal-kapital fil-Kosovo.

KAPITOLU V

Dispożizzjonijiet ġenerali

Artikolu 67

1.   Dan it-Titolu għandu jiġi applikat soġġett għal-limitazzjonijiet ġustifikati fuq il-bażi ta’ ordni pubbliku, sigurtà pubblika jew saħħa pubblika.

2.   Dan it-Titolu ma għandux japplika għal attivitajiet li fit-territorju ta’ kwalunkwe waħda mill-Partijiet huma marbuta, anke jekk okkażjonalment, mal-eżerċizzju tal-awtorità uffiċjali.

Artikolu 68

1.   Għall-finijiet ta’ dan it-Titlolu, l-ebda parti minn dan il-Ftehim ma għandha tostakola lill-Partijiet milli japplikaw il-liġijiet u r-regolamenti tagħhom rigward id-dħul u s-soġġorn, l-impjiegi, il-kundizzjonijiet tax-xogħol, l-istabbiliment ta’ persuna fiżika u l-għoti ta’ servizzi, notevolment fir-rigward tal-għoti, it-tiġdid jew ir-rifjut ta’ permess ta’ residenza, kemm-il darba meta jsir dan ma japplikawhomx b’tali manjiera li jħassru jew idgħajfu l-benefiċċji li jakkumulaw għal kwalunkwe Parti taħt it-termini ta’ dispożizzjoni speċifika ta’ dan il-Ftehim u l-acquis tal-UE. Din id-dispożizzjoni ma tkun tal-ebda ħsara għall-applikazzjoni tal-Artikolu 67.

2.   Dan it-Titolu ma għandux japplika għal miżuri li jaffettwaw persuni fiżiċi li jkunu qegħdin ifittxu aċċess għas-suq tax-xogħol ta’ xi Parti, u lanqas ma japplika għal miżuri fir-rigward taċ-ċittadinanza, ir-residenza jew l-impjieg fuq bażi permanenti.

Artikolu 69

Il-kumpaniji li huma kkontrollati u l-proprjetà esklussiva konġunta ta’ kumpaniji tal-UE jew ta’ ċittadini tal-UE u ta’ kumpaniji Kosovari jew ta’ ċittadini Kosovari wkoll għandhom ikunu koperti minn dan it-Titolu.

Artikolu 70

1.   It-trattament ta’ Nazzjon l-Aktar Iffavorit mogħti skont dan it-Titolu ma għandux japplika għall-vantaġġi ta’ taxxa li l-Partijiet qegħdin jagħtu jew se jagħtu fil-ġejjieni fuq il-bażi ta’ Ftehimiet imfassla biex tiġi evitata t-tassazzjoni doppja jew arranġamenti ta’ taxxa oħrajn.

2.   Dan it-Titolu m’għandux jiġi interpretat sabiex tiġi ostakolata l-adozzjoni jew l-infurzar mill-Partijiet ta’ kwalunkwe miżura bil-għan li tipprevjeni l-evitar jew l-evażjoni tat-taxxi skont il-provvedimenti tat-taxxa ta’ Ftehimiet biex tiġi evitata t-tassazzjoni doppja u arranġamenti ta’ taxxa oħrajn jew il-leġiżlazzjoni fiskali domestika.

3.   Dan it-Titolu m’għandux jiġi interpretat b’tali mod li jwaqqaf lill-Partijiet, meta japplikaw il-provvedimenti relevanti tal-leġiżlazzjoni fiskali tagħhom, milli jiddistingwu bejn kontribwenti li mhumiex f’sitwazzjoni identika, b’mod partikolari f’dak li jirrigwarda l-post tar-residenza tagħhom.

Artikolu 71

1.   Il-Partijiet għandhom jistinkaw sabiex, fejn possibbli, jevitaw l-impożizzjoni ta’ miżuri restrittivi, inklużi miżuri relatati mal-importi, għal skopijiet ta’ bilanċ ta’ pagamenti. Il-Parti li tadotta dawn il-miżuri, mill-aktar fis, għandha tibgħat skeda għat-tneħħija tagħhom lill-Parti l-oħra.

2.   Meta Stat Membru, jew aktar minn wieħed, jew il-Kosovo, isib ruħu f’diffikultajiet serji dwar bilanċ ta’ pagamenti, jew ikun hemm theddida imminenti ta’ dan, l-UE u l-Kosovo jistgħu, skont il-kundizzjonijiet stabbiliti fil-Ftehim tad-WTO, jadottaw miżuri restrittivi, inklużi miżuri dwar l-importazzjoni, li jkunu għal żmien limitat u li ma jmorrux lil hinn minn dak li hu strettament meħtieġ sabiex jinstab rimedju għall-qagħda tal-bilanċ tal-pagamenti. L-UE u l-Kosovo għandhom jgħarrfu lill-Parti l-oħra minnufih.

Artikolu 72

Dan it-Titolu għandu jiġi aġġustat progressivament, speċjalment fid-dawl tar-rekwiżiti li joħorġu mill-Artikolu V tal-GATS.

Artikolu 73

Dan il-Ftehim ma għandu jwaqqaf l-ebda Parti milli tuża kwalunkwe miżura li tkun meħtieġa sabiex ma jinħarbux il-miżuri li tkun ħadet rigward l-aċċess tal-pajjiżi terzi għas-suq tagħha permezz ta’ dan il-Ftehim.

TITOLU VI

APPROSSIMAZZJONI TAL-LIĠIJIET TAL-KOSOVO LEJN L-ACQUIS TAL-UE, INFURZAR TAL-LIĠI U REGOLI TAL-KOMPETIZZJONI

Artikolu 74

1.   Il-Partijiet jirrikonoxxu l-importanza tal-approssimazzjoni tal-leġiżlazzjoni eżistenti fil-Kosovo lejn dik tal-UE u tal-implimentazzjoni effettiva tagħha. Il-Kosovo għandu jistinka sabiex jiżgura li l-liġijiet eżistenti tiegħu u leġiżlazzjoni ġejjiena gradwalment isiru kompatibbli mal-acquis tal-UE. Il-Kosovo għandu jiżgura li l-leġiżlazzjoni eżistenti u ġejjiena tiġi implimentata u infurzata b’mod adegwat.

2.   Din l-approssimazzjoni għandha tibda mid-data tal-iffirmar ta’ dan il-Ftehim, u għandha gradwalment testendi għall-elementi kollha tal-acquis tal-UE msemmija f’dan il-Ftehim sa tmiem il-perjodu tranżitorju definit fl-Artikolu 9.

3.   Fi stadju bikri l-approssimazzjoni se tiffoka fuq elementi fundamentali tal-acquis tal-UE fil-qasam tas-Suq Intern, fl-ispazju tal-Libertà, Sigurtà u Ġustizzja, kif ukoll f’oqsma relatati mal-kummerċ. Fi stadju sussegwenti, il-Kosovo jiffoka fuq il-bqija tal-partijiet tal-acquis tal-UE.

L-approssimazzjoni għandha titwettaq fuq il-bażi ta’ programm li jiġi miftiehem bejn il-Kummissjoni Ewropea u l-Kosovo.

4.   Il-Kosovo għandu jiddefinixxi wkoll, bi ftehim mal-Kummissjoni Ewropea, il-modalitajiet għall-monitoraġġ tal-implimentazzjoni tal-approssimazzjoni tal-leġiżlazzjoni u ta’ azzjonijiet ta’ infurzar tal-liġi li għandhom jittieħdu, inklużi l-isforzi mill-Kosovo biex jirriforma l-ġudikatura sabiex timplementa l-qafas legali ġenerali tiegħu.

Artikolu 75

Kompetizzjoni u dispożizzjonijiet ekonomiċi oħra

1.   Dawn li ġejjin mhumiex kompatibbli mal-funzjonament korrett ta’ dan il-Ftehim, kemm-il darba jistgħu jaffettwaw il-kummerċ bejn l-UE u l-Kosovo:

(a)	kull Ftehim bejn impriżi, deċiżjonijiet ta’ assoċjazzjonijiet ta’ impriżi u prattika konġunta bejn impriżi li l-għan jew l-effett tiegħu huwa li jostakola, jirrestrinġi jew ifixkel il-kompetizzjoni;

(b)	l-abbuż minn intrapriża jew aktar minn waħda b’pożizzjoni dominanti fit-territorji tal-UE jew tal-Kosovo kollha jew f’parti sostanzjali minnha;

(c)	kull għajnuna mill-Istat li tfixkel il-kompetizzjoni billi tiffavorixxi lil ċerti impriżi jew ċerti prodotti.

2.   Kull prattika li tmur kontra dan l-Artikolu għandha tkun ivvalutata fuq il-bażi tal-kriterji li ġejjin mill-applikazzjoni tar-regoli ta’ kompetizzjoni li japplikaw fl-UE, b’mod partikolari mill-Artikoli 101, 102, 106 u 107 tat-Trattat dwar il-Funzjonament tal-Unjoni Ewropea u l-istrumenti interpretattivi li ġew adottati mill-istituzzjonijiet tal-UE.

3.   Il-Partijiet għandhom jiżguraw li awtorità pubblika, li tkun operattivament indipendenti, tkun fdata bis-setgħat meħtieġa għall-applikazzjoni sħiħa tal-paragrafi 1(a) u (b) ta’ dan l-Artikolu, fejn għandhom x’jaqsmu l-intrapriżi privati u pubbliċi u l-intrapriżi mogħnija bi drittijiet speċjali.

4.   Il-Kosovo għandu jiżgura li awtorità operattivament independenti tiġi fdata bis-setgħat meħtieġa għall-applikazzjoni sħiħa tal-paragrafu 1(c). Din l-awtorità għandu jkollha, fost l-oħrajn, is-setgħat li tawtorizza skemi ta’ għajnuna mill-Istat u għoti ta’ għajnuna individwali skont il-paragrafu 2, kif ukoll is-setgħat sabiex tordna l-irkupru ta’ għajnuna mill-Istat mogħtija bi ksur tal-liġi.

5.   L-UE minn naħa waħda u l-Kosovo min-naħa l-oħra għandhom jiżguraw it-trasparenza fil-qasam tal-għajnuna mill-Istat, fost l-oħrajn billi jipprovdu rapport annwali regolari lill-Parti l-oħra, li jsegwi l-metodoloġija u l-preżentazzjoni tal-istħarriġ tal-UE dwar l-għajnuna mill-Istat. Fuq talba ta’ Parti minnhom, il-Parti l-oħra għandha tipprovdi tagħrif dwar każijiet individwali partikolari ta’ għajnuna mill-Istat.

6.   Il-Kosovo għandu jistabbilixxi inventarju komprensiv ta’ skemi ta’ għajnuna istitwiti u għandu jallinja dawn l-iskemi ta’ għajnuna mal-kriterji msemmija fil-paragrafu 2 fi żmien perjodu ta’ mhux iktar minn tliet snin mid-dħul fis-seħħ ta’ dan il-Ftehim.

7.

(a) Għall-finijiet tal-applikazzjoni tal-paragrafu 1(c), il-Partijiet jirrikonoxxu li matul l-ewwel ħames snin wara d-dħul fis-seħħ ta’ dan il-Ftehim, kull għajnuna mill-Istat mogħtija mill-Kosovo għandha tiġi vvalutata b’kunsiderazzjoni tal-fatt li l-Kosovo għandu jitqies bħala żona identika għal dawk iż-żoni tal-Unjoni Ewropea deskritti fl-Artikolu 107(3)(a) tat-Trattat dwar il-Funzjonament tal-Unjoni Ewropea. (b) Fi żmien erba’ snin mid-dħul fis-seħħ ta’ dan il-Ftehim, il-Kosovo għandu jressaq quddiem il-Kumissjoni Ewropea ċ-ċifri tal-PDG per capita armonizzati fuq il-livell ta’ NUTS II. L-awtorità msemmija fil-paragrafu 4 u l-Kumissjoni Ewropea imbagħad għandhom jevalwaw flimkien l-eliġibbiltà tar-reġjuni tal-Kosovo kif ukoll l-intensitajiet massimi ta’ għajnuna fir-rigward tagħhom sabiex ifasslu pjan għall-għajnuna reġjonali msejjes fuq il-linji gwida tal-UE rilevanti.

8.   Fir-rigward tal-prodotti msemmija fil-Kapitolu II tat-Titolu IV;

(a)	ma għandux japplika l-paragrafu 1(c) ta’ dan l-Artikolu;

(b)	kwalunkwe prattika li tmur kontra l-paragrafu 1(a) ta’ dan l-Artikolu tiġi vvalutata skont il-kriterji li ġew stabbiliti mill-UE fuq il-bażi tal-Artikoli 42 u 43 tat-Trattat dwar il-Funzjonament tal-Unjoni Ewropea u l-istrumenti speċifiċi tal-UE li ġew adottati fuq din il-bażi.

9.   Jekk waħda mill-Partijiet jidhrilha li prattika partikolari hija inkompatibbli mat-termini tal-paragrafu 1, hija tista’ tieħu miżuri adatti wara konsultazzjonijiet mal-KSA jew wara 30 jum tax-xogħol wara li tkun intbagħtet talba għal tali konsultazzjoni. Dan l-Artikolu ma għandux jippreġudika jew jaffettwa b’xi mod it-teħid, mill-UE jew il-Kosovo, ta’ miżuri kompensatorji konsistenti mal-GATT 1994 u l-Ftehim tad-WTO dwar is-Sussidji u Miżuri Kompensatorji u l-leġiżlazzjoni interna rilevanti rispettiva.

Artikolu 76

Impriżi pubbliċi

Sa tmiem it-tielet sena wara d-dħul fis-seħħ ta’ dan il-Ftehim il-Kosovo għandu japplika l-prinċipji stabbiliti fit-Trattat dwar il-Funzjonament tal-Unjoni Ewropea, b’referenza partikolari għall-Artikolu 106 tiegħu, għall-impriżi pubbliċi u l-impriżi li jkunu ngħataw drittijiet speċjali u esklużivi.

Id-drittijiet speċjali tal-impriżi pubbliċi matul il-perjodu tranżitorju ma għandhomx jinkludu l-possibbiltà li jiġu imposti restrizzjonijiet kwantitattivi jew miżuri b’effett ekwivalenti għall-importazzjonijiet mill-UE lejn il-Kosovo.

Artikolu 77

Aspetti ġenerali tal-proprjetà intellettwali

1.   Skont dan l-Artikolu u l-Anness VII, il-Partijiet jikkonfermaw l-importanza li jagħtu għall-iżgurar tal-protezzjoni adegwata u effettiva u t-tisħiħ tad-drittijiet tal-proprjetà intellettwali, industrijali u kummerċjali.

2.   Il-Kosovo għandu jieħu l-miżuri meħtieġa sabiex jiggarantixxi, mhux iktar tard minn ħames snin mid-dħul fis-seħħ ta’ dan il-Ftehim, livell ta’ protezzjoni tad-drittijiet tal-proprjetà intelletwali, industrijali u kummerċjali li jkun bħal dak li hemm fl-UE, inklużi mezzi effettivi għall-infurzar ta’ dawn id-drittijiet.

3.   Il-Kosovo jintrabat li jimxi mal-konvenzjonijiet multilaterali dwar id-drittijiet tal-proprjetà intellettwali, industrijali u kummerċjali msemmija fl-Anness VII. Il-KSA jista’ jiddeċiedi li jobbliga lill-Kosovo li jimxi ma’ Konvenzjonijiet multilaterali speċifiċi f’dan il-qasam.

Artikolu 78

Aspetti tal-proprjetà intellettwali relatati mal-kummerċ

1.   Mid-dħul fis-seħħ dan il-Ftehim il-Partijiet għandhom jagħtu lill-kumpaniji ta’ xulxin, ċittadini tal-UE u tal-Kosovo, fir-rigward tar-rikonoxximent u l-protezzjoni tal-proprjetà intellettwali, industrijali u kummerċjali, trattament mhux inqas favorevoli minn dak li jagħtu lil kwalunkwe pajjiż terz taħt ftehim bilaterali.

2.   Jekk ikun hemm problemi fil-qasam tal-proprjetà intelletwali, industrijali u kummerċjali li jaffettwaw il-kundizzjonijiet tal-kummerċ, dawn għandhom jiġu mwieġba minnufih quddiem il-KSA, fuq talba ta’ Parti minnhom, bl-għan li tintlaħaq soluzzjoni sodisfaċenti għaż-żewg naħat.

Artikolu 79

Akkwist pubbliku

1.   L-UE u l-Kosovo jqisu l-liberalizzazzjoni tal-għoti ta’ kuntratti pubbliċi fuq il-bażi ta’ nondiskriminazzjoni u r-reċiproċità, partikolarment skont ir-regoli tal-WTO, bħala għan mixtieq.

2.   Mid-dħul fis-seħħ ta’ dan il-Ftehim, il-kumpaniji Kosovari, kemm jekk stabbiliti fil-Komunità jew le, għandhom jingħataw aċċess għal proċeduri ta’ għotja ta’ kuntratti fl-UE skont ir-regoli ta’ akkwist tal-UE taħt trattament mhux inqas favorevoli minn dak mogħti lil kumpaniji tal-UE.

Id-dispożizzjonijiet ta’ hawn fuq għandhom japplikaw ukoll għal kuntratti fis-settur tas-servizzi ladarba l-Kosovo jkun adotta l-leġiżlazzjoni li tintroduċi r-regoli tal-UE f’dan il-qasam. Minn żmien għal żmien l-UE għandha teżamina jekk il-Kosovo fil-fatt ikunx introduċa din il-leġiżlazzjoni.

3.   Mid-dħul fis-seħħ ta’ dan il-Ftehim, kumpaniji tal-UE stabbiliti fil-Kosovo taħt il-Kapitolu I tat-Titolu V għandhom jingħataw aċċess għal proċeduri ta’ għotja ta’ kuntratti fil-Kosovo taħt trattament mhux inqas favorevoli minn dak mogħti lil kumpaniji Kosovari.

4.   Mid-dħul fis-seħħ ta’ dan il-Ftehim, kumpaniji tal-UE mhux stabbiliti fil-Kosovo taħt il-Kapitolu I tat-Titolu V għandhom jingħataw aċċess għal proċeduri ta’ għotja ta’ kuntratti fil-Kosovo taħt trattament mhux inqas favorevoli minn dak mogħti lil kumpaniji Kosovari u kumpaniji tal-UE stabbiliti fil-Kosovo, bl-eċċezzjoni tal-preferenzi abbażi tal-prezz deskritti fil-paragrafu 5.

5.   Mid-dħul fis-seħħ ta’ dan il-Ftehim, il-Kosovo għandu jikkonverti kwalunkwe preferenzi eżistenti għal kumpaniji Kosovari jew kumpaniji tal-UE stabbiliti fil-Kosovo, u għall-kuntratti mogħtija bil-proċeduri skont il-kriterji tal-offerta bl-aħjar kwalità meta mqabbla mal-prezz u l-iktar prezz baxx, għal preferenza abbażi tal-prezz, u jelimina din tal-aħħar fi żmien ħames snin bi qbil ma’ din l-iskeda ta’ żmien:

—	il-preferenzi ma għandhomx jeċċedu l-15 % sa tmiem it-tieni sena wara d-dħul fis-seħħ ta’ dan il-Ftehim;

—	il-preferenzi għandhomx jeċċedu l-10 % sa tmiem it-tielet sena wara d-dħul fis-seħħ ta’ dan il-Ftehim;

—	il-preferenzi għandhomx jeċċedu l-5 % sa tmiem ir-raba’ sena wara d-dħul fis-seħħ ta’ dan il-Ftehim; kif ukoll

—	il-preferenzi għandhom jiġu eliminati kompletament mhux iktar tard mill-ħames sena wara d-dħul fis-seħħ ta’ dan il-Ftehim;

6.   Fi żmien sentejn mid-dħul fis-seħħ tal-Ftehim, il-KSA jista’ jirrevedi l-preferenzi stipulati fil-paragrafu 5 u jiddeċiedi li jqassar il-perjodi stipulati fil-paragrafu 5.

7.   Fi żmien ħames snin mid-dħul fis-seħħ ta’ dan il-Ftehim, il-Kosovo għandu jgħaddi leġiżlazzjoni biex jimplementa l-istandards proċedurali li jipprevedi l-acquis tal-UE.

8.   Kull sena l-Kosovo għandu jirrapporta lill-KSA dwar il-miżuri li jkun ħa biex itejjeb it-trasparenza u biex jipprovdi għal stħarriġ ġudizzjarju effettiv ta’ deċiżjonijiet meħuda fil-qasam tal-akkwisti pubbliċi.

9.   Fir-rigward tal-istabbiliment, l-operazzjonijiet, l-għoti ta’ servizzi bejn l-UE u l-Kosovo, għandhom japplikaw l-Artikoli 50 sa 66. Fir-rigward tal-impjieg u l-moviment tal-ħaddiema b’rabta mat-twettiq ta’ kuntratti pubbliċi, l-acquis tal-UE relatat ma ċittadini ta’ pajjiżi terzi għandu japplika għaċ-ċittadini Kosovari fl-UE. Fir-rigward ta’ ċittadini tal-UE fil-Kosovo, il-Kosovo għandu jagħti drittijiet reċiproċi lil ħaddiema li huma ċittadini ta’ Stat Membru li huma simili għal dawk taċ-ċittadini Kosovari fl-UE, f’dak li jirrigwarda l-impjieg u l-moviment ta’ ħaddiema b’rabta mat-twettiq ta’ kuntratti pubbliċi.

Artikolu 80

Standardizzazzjoni, metroloġija, akkreditament u valutazzjoni tal-konformità

1.   Il-Kosovo għandu jieħu l-miżuri meħtieġa sabiex gradwalment jiġi konformi mal-leġiżlazzjoni orizzontali u settorjali tas-sigurtà tal-prodotti tal-UE u jġib infrastruttura ta’ kwalità, bħal proċeduri tal-valutazzjoni tal-istandardizzazzjoni, akkreditament l-konformità, għal-livell Ewropew.

2.   Għal dan il-għan, il-Partijiet għandhom jistinkaw sabiex:

(a)	jippromwovu l-użu tar-regolamenti tekniċi tal-UE, standards Ewropej u proċeduri tal-valutazzjoni tal-konformità;

(b)	jipprovdu għajnuna sabiex jitrawwem l-iżvilupp ta’ infrastruttura ta’ kwalità: valutazzjoni tal-istandardizzazzjoni, tal-metroloġija, tal-akkreditament u tal-konformità;

(c)	jippromwovu l-kooperazzjoni tal-Kosovo mal-organizzazzjonijet relatati mal-istandards, valutazzjoni tal-konformità, metroloġija, akkreditament u funzjonijiet simili (pereż. CEN, CENELEC, ETSI, EA, WELMEC, EURAMET) (5) jekk iċ-ċirkostanzi oġġettivi jippermettu dan;

(d)	fejn xieraq, jikkonkludu Ftehim dwar il-Valutazzjoni tal-Konformità u l-Aċċettazzjoni ta’ Prodotti Industrijali ladarba l-qafas u l-proċeduri leġiżlattivi tal-Kosovo jkunu suffiċjentement allinjati ma’ dawk tal-UE u jkun disponibbli t-tagħrif speċjalizzat adattat.

Artikolu 81

Protezzjoni tal-konsumaturi

Il-Partijiet għandhom jikkooperaw bl-għan li japprossimaw il-leġiżlazzjoni tal-Kosovo dwar il-protezzjoni tal-konsumatur għall-acquis tal-UE bl-għan li jiżguraw:

(a)	politika ta’ protezzjoni attiva tal-konsumatur, skont il-liġi tal-UE, inkluż iż-żieda tal-informazzjoni u l-iżvilupp ta’ organizzazzjonijiet indipendenti fil-Kosovo;

(b)	l-armonizzazzjoni tal-leġiżlazzjoni dwar il-protezzjoni tal-konsumatur fil-Kosovo ma’ dik fis-seħħ fl-UE;

(c)	il-protezzjoni effettiva u legali tal-konsumatur sabiex tittejjeb il-kwalità tal-prodotti tal-komsumatur u jinżammu standards xierqa ta’ sikurezza.

(d)	il-monitoraġġ tar-regoli mill-awtoritajiet kompetenti u l-għoti ta’ aċċess għar-rimedji ġuridiċi meta jinqalgħu l-kwistjonijiet;

(e)	l-iskambju ta’ informazzjoni dwar prodotti perikolużi.

Artikolu 82

Kundizzjonijiet tax-xogħol u opportunitajiet indaqs

Il-Kosovo għandu progressivament jarmonizza l-leġiżlazzjoni tiegħu ma’ dik tal-UE fl-oqsma tal-kundizzjonijiet tax-xogħol, notevolment dwar is-saħħa u s-sigurtà fuq il-post tax-xogħol, u l-opportunitajiet indaqs.

TITOLU VII

LIBERTÀ, SIGURTÀ U ĠUSTIZZJA

Artikolu 83

Tisħiħ tal-istituzzjonijiet u stat tad-dritt

Fil-kooperazzjoni tagħhom fl-ispazju tal-libertà, is-sigurtà u l-ġustizzja, il-Partijiet għandhom jagħtu importanza partikolari għall-konsolidazzjoni tal-istat tad-dritt, it-tisħiħ tal-istituzzjonijiet fil-livelli kollha fl-oqsma tal-amministrazzjoni b’mod ġenerali u l-infurzar tal-liġi u l-amministrazzjoni tal-ġustizzja b’mod partikolari. Il-kooperazzjoni għandha tkun immirata b’mod speċjali biex issaħħaħ l-indipendenza, l-imparzjalità u l-kontabilità tal-ġudikatura fil-Kosovo u biex ittejjeb l-effiċjenza tagħha, biex tiżviluppa l-istrutturi adegwati għall-pulizija, prosekuturi u mħallfin u korpi oħrajn ġudizzjarji u tal-infurzar tal-liġi biex jitħejjew b’mod adegwat għal kooperazzjoni fuq kwistjonijiet ċivili, kummerċjali u kriminali, u biex tgħinhom jipprevjenu, jinvestigaw, jagħmlu prosekuzzjoni ta’ u jaġġudikaw il-kriminalità organizzata, il-korruzzjoni u t-terroriżmu b’mod effettiv.

Artikolu 84

Protezzjoni ta’ data personali

Il-Partijiet jikkooperaw fuq il-leġiżlazzjoni dwar il-protezzjoni ta’ data personali bl-għan li jintlaħaq livell ta’ protezzjoni ta’ data personali mill-Kosovo li jikkorrespondi ma’ dak tal-acquis tal-UE. Il-Kosovo għandu jiżgura li jiġu allokati biżżejjed riżorsi umani u finanzjarji għal korp wieħed jew iktar superviżorju indipendenti sabiex b’mod effiċjenti jimmonitorja u jiggarantixxi l-infurzar tal-leġiżlazzjoni dwar il-protezzjoni ta’ data personali tiegħu.

Artikolu 85

Viżi, kontroll tal-fruntieri/transkonfinali, ażil u migrazzjoni

Il-Partijiet għandhom jikkooperaw fl-oqsma tal-viżi, tal-kontroll tal-fruntieri/transkonfinali, tal-ażil u l-migrazzjoni u għandhom jistabbilixxu qafas għall-kooperazzjoni, inkluż fuq livell reġjonali, f’dawn l-oqsma, b’kunsiderazzjoni u permezz ta’ użu sħiħ ta’ inizjattivi eżistenti oħra f’dan il-qasam kif meħtieġ.

Il-kooperazzjoni fil-kwistjonijiet imsemmija fl-ewwel paragrafu għandha tkun imsejsa fuq konsultazzjonijiet reċiproċi u koordinazzjoni mill-qrib bejn il-Partijiet u tista’ tinkludi għajnuna teknika u amministrattiva għal:

(a)	l-iskambju ta’ statistika u informazzjoni dwar leġiżlazzjoni u prattiċi;

(b)	l-abbozzar ta’ leġiżlazzjoni;

(c)	it-titjib tal-effiċjenza tal-istituzzjonijiet;

(d)	it-taħriġ tal-persunal;

(e)	is-sigurtà tad-dokumenti tal-ivvjaġġar u l-iskoperta ta’ dokumenti foloz;

(f)	il-ġestjoni tal-kontrolli tal-fruntieri/transkonfinali

Il-kooperazzjoni għandha tiffoka partikolarment fuq:

(a)

fil-qasam tal-ażil, dwar l-adozzjoni u l-implimentazzjoni tal-leġiżlazzjoni mill-Kosovo sabiex ikun konformi mal-istandards tal-Konvenzjoni dwar l-Istatus tar-Refuġjati, magħmul f’Ġinevra fit-28 ta’ Lulju 1951, u mal-Protokoll dwar l-Istatus ta’ Refuġjati, magħmul fi New York fil-31 ta’ Jannar 1967, biex b’hekk ikun żgurat li l-prinċipju ta’ “non-refoulment”, kif ukoll drittijiet oħra ta’ min ifittex ażil u għar-refuġjati jiġu rrispettati.

(b)

fil-qasam tal-migrazzjoni legali, dwar ir-regoli tad-dħul u d-drittijiet u l-istatus tal-persuna li titħalla tidħol. F’relazzjoni mal-migrazzjoni, il-Partijiet jaqblu dwar it-trattament ġust ta’ ċittadini mhux mill-UE li huma legalment residenti fit-territorju ta’ Stat Membru jew ġol-Kosovo, u li jesploraw possibiltajiet sabiex jistabbilixxu miżuri biex jipprovdu inċentivi u appoġġ għall-azzjonijiet tal-Kosovo bl-għan li tiġi promossal-integrazzjoni ta’ ċittadini mhux mill-UE li jirresjedu legalment ġewwa l-Kosovo.

Artikolu 86

Migrazzjoni legali

Il-Partijiet għandhom jikkooperaw mal-objettiv li jappoġġaw il-Kosovo fl-approssimazzjoni tal-leġiżlazzjoni tiegħu mal-acquis tal-UE dwar il-migrazzjoni legali.

Il-Partijiet jagħrfu li ċ-ċittadini tal-Kosovo jgawdu drittijiet taħt l-acquis tal-UE, b’mod speċjali fl-oqsma tal-kundizzjonijiet tax-xogħol, remunerazzjoni u s-sensja, riunifikazzjoni tal-familja, residenza għal żmien twil, studenti, riċerkaturi u impjegati bi kwalifiki għoljin, ħaddiema staġjonali, ħaddiema bi trasferimenti intra-ażjendali, u l-pensjonijiet. Il-Partijiet jagħrfu wkoll li dan huwa mingħajr ħsara għall-kundizzjonijiet u l-modalitajiet applikabbli f’kull Stat Membru.

Fi żmien erba’ snin mid-dħul fis-seħħ ta’ dan il-Ftehim, il-Kosovo għandu jagħti drittijiet reċiproċi lil ċittadini tal-UE fl-oqsma msemmija fit-tieni paragrafu. Il-KSA jeżamina l-miżuri meħtieġa li jittieħdu għal dak il-għan. Il-KSA jista’ jikkunsidra kwalunkwe kwistjoni oħra relatata mal-implimentazzjoni ta’ dan l-Artikolu.

Artikolu 87

Prevenzjoni u kontroll tal-immigrazzjoni illegali

Il-KSA għandu jistabbilixi sforzi konġunti li jistgħu isiru mill-Partijiet biex jipprevjenu u jikkontrollaw l-immigrazzjoni illegali, inkluż it-traffikar u l-kuntrabandu tal-bnedmin, filwaqt li jiġu żgurati r-rispett u l-protezzjoni tad-drittijiet fundamentali tal-migranti u l-assistenza lejn il-migranti f’diffikulta.

Artikolu 88

Riammissjoni

Bl-għan li jikooperaw sabiex jipprevjenu u jikkontrollaw il-migrazzjoni illegali, il-Partijiet għandhom,meta jintalbu u mingħajr iktar formalitajiet:

(a)	jerġgħu jilqgħu kwalunkwe ċittadini Kosovari jew ċittadini tal-UE preżenti illegalment fil-Parti l-oħra rispettiva;

(b)	jerġgħu jilqgħu ċittadini mhux tal-UE u persuni apolidi li daħlu fit-territorju ta’ Stat Membru minn ġol-Kosovo jew fil-Kosovo minn ġot-territorju ta’ Stat Membru.

Il-Kosovo għandu jipprovdi liċ-ċittadini tiegħu b’dokumenti tal-identità xierqa u għandu joffrilhom il-faċilitajiet amministrattivi meħtieġa għal tali għan.

Il-partijiet jaqblu li jesploraw il-possibiltajiet li jinbdew negozjati bl-għan li jikkonkludu ftehim li jirregola l-proċeduri speċifiċi għar-riammissjoni tal-persuni msemmija fil-punti (a) u (b) tal-ewwel paragrafu.

Il-Kosovo għandu jesplora l-possibiltajiet li jikkonkludi ftehimiet ta’ riammissjoni, jekk iċ-ċirkostanzi oġġettivi jippermettu, mal-pajjiżi li qed jipparteċipaw fil-PSA u jimpenja ruħu li jieħu kull miżura neċessarja biex tiġi żgurata l-implimentazzjoni flessibbli u rapida ta’ dawn il-ftehimiet. L-UE se tesplora l-possibiltajiet li tassisti l-pajjiżi rispettivi matul dal-proċess, jekk iċ-ċirkostanzi oġġettivi jippermettu.

Artikolu 89

Ħasil tal-flus u finanzjament tat-terroriżmu

Il-Partijiet għandhom jikkooperaw sabiex jipprevjenu l-użu tas-sistemi finanzjarji tagħhom għall-ħasil tal-flus li jiġi minn attivitajiet kriminali in ġenerali u partikolarment reati tad-droga, kif ukoll għall-għan tal-finanzjament tat-terroriżmu.

Il-kooperazzjoni f’dan il-qasam għandha tinkludi l-għajnuna amministrattiva u teknika lill-Kosovo bil-għan tal-iżvilupp tal-implimentazzjoni tar-regolamenti u tal-funzjonament effiċjenti tal-istandards u l-mekkaniżmi xierqa għall-ġlieda kontra l-ħasil tal-flus u tal-finanzjament tat-terroriżmu ekwivalenti għal dawk adottati mill-UE u mill-fora internazzjonali f’dan il-qasam, partikolarment it-Task Force ta’ Azzjoni Finanzjarja (FATF).

Artikolu 90

Kooperazzjoni kontra drogi illegali

Il-Partijiet għandhom jikkooperaw sabiex jiżguraw strateġija bbilanċjata u integrata fir-rigward ta’ kwistjonijiet relatati mad-droga. Il-politika u l-azzjonijiet dwar id-drogi għandu jkollhom l-għan li jsaħħu l-istrutturi tal-Kosovo għall-ġlieda kontra d-drogi illegali u l-prekursuri tagħhom, it-tnaqqis tal-provvista, it-traffikar ta’ drogi illegali u d-domanda għalihom, it-trattament tal-konsegwenzi soċjali u fuq is-saħħa tal-abbuż mid-droga u kif ukoll li jkun hemm kontroll iktar effettiv tal-prekursuri.

Il-Partijiet għandhom jiftiehmu dwar il-metodi neċessarji ta’ kooperazzjoni għall-ksib ta’ dawn l-għanijiet. L-azzjonijiet għandhom ikunu msejsa fuq prinċipji miftiehma skont l-Istrateġija tal-UE dwar id-Drogi 2013-2020 u d-dokumenti sussegwenti tagħha.

Artikolu 91

Prevenzjoni u ġlieda kontra l-kriminalità organizzata u attivitajiet illegali oħra

Il-Partijiet għandhom jikkooperaw bil-għan li jsaħħu l-istrutturi li għandu l-Kosovo biex jiġġieled u jipprevjeni l-attività kriminali, partikolarment il-kriminalità organizzata, il-korruzzjoni u forom oħra ta’ delitti serji b’dimensjoni transfruntiera/transkonfinali. Il-Kosovo għandu jimxi skont il-konvenzjonijiet internazzjonali u strumenti relevanti f’dan il-qasam. Il-kooperazzjoni reġjonali fil-ġlieda kontra l-kriminalità organizzata għandha tiġi promossa.

Fir-rigward tal-falsifikazzjoni ta’ flus fil-Kosovo, il-Kosovo għandu jikkoopera mill-qrib mal-UE biex jiġġieled il-falsifikazzjoni tal-karti tal-flus u l-muniti u biex jissoprimi u jikkastiga kull falsifikazzjoni. Fuq il-livell tal-prevenzjoni, il-Kosovo għandu jimmira li jimplimenta miżuri li huma ekwivalenti għal dawk stabbiliti fil-leġiżlazzjoni rilevanti tal-UE, u li jirrispetta l-konvenzjonijiet interenazzjonali u strumenti relevanti li huma marbutin ma’ dan il-qasam. Il-Kosovo jista’ jgawdi mill-appoġġ tal-UE għall-iskambju, l-għajnuna u t-taħriġ fil-protezzjoni kontra l-falsifikazzjoni tal-flus.

Artikolu 92

Ġlieda kontra t-terroriżmu

Il-Partijiet għandhom jikkooperaw bil-għan li jsaħħu l-istrutturi li għandu l-Kosovo biex jipprevjeni u jissoprimi atti terroristiċi u l-finanzjament tagħhom, partikularment dawk b’dimensjoni transfruntiera/transkonfinali. Il-kooperazzjoni f’dan il-kunest għandha ssir b’mod konsistenti mal-istat tad-dritt, id-drittijiet tal-bniedem u libertajiet fundamentali, id-dritt internazzjonali dwar ir-refuġjati u d-dritt umanitarju internazzjonali. Il-Kosovo għandu jimxi skont il-konvenzjonijiet internazzjonali u strumenti relevanti f’dan il-qasam.

TITOLU VIII

POLITIKA TA’ KOOPERAZZJONI

Artikolu 93

L-UE u l-Kosovo għandhom jistabbilixxu kooperazzjoni mill-qrib bil-għan li jikkontribwixxu għall-iżvilupp u l-potenzjal tat-tkabbir tal-Kosovo. Din il-kooperazzjoni għandha ssaħħaħ ir-rabtiet ekonomiċi eżistenti fuq l-usa’ sisien possibbli, għall-benefiċċju taż-żewġ Partijiet.

Għandhom jitfasslu politiki u miżuri oħra b’mod li jwasslu għal żvilupp ekonomiku sostenibbli u soċjali fil-Kosovo. Dawn il-politiki għandhom jiżguraw li l-kunsiderazzjonijiet ambjentali u klimatiċi jiġu inkorporati bis-sħiħ sa mill-bidu nett u li jkunu marbuta mar-rekwiżiti ta’ żvilupp soċjali armonjuż.

Il-politiki ta’ kooperazzjoni jiġu integrati f’qafas reġjonali ta’ kooperazzjoni. Għandha tingħata attenzjoni speċjali għal miżuri li jistgħu jrawmu kooperazzjoni bejn il-Kosovo u l-pajjiżi ġirien tiegħu, sabiex b’hekk jingħata kontribut għall-istabbiltà reġjonali. Il-KSA għandu jiddefinixxi l-prijoritajiet bejn u ġol-politika ta’ kooperazzjoni deskritti f’dan it-Titolu.

Artikolu 94

Politika dwar l-ekonomija u l-kummerċ

L-UE u l-Kosovo għandhom jiffaċilitaw il-proċess ta’ riforma ekonomika billi jikkoperaw sabiex itejbu l-fehim tal-elementi fundamentali tal-ekonomiji rispettivi tagħhom u l-formulazzjoni u l-implimentazzjoni tal-politika ekonomika fl-ekonomiji tas-suq.

Għalhekk, l-UE u l-Kosovo għandhom jikkoperaw sabiex:

(a)	jiskambjaw informazzjoni dwar il-prestazzjoni u l-prospetti makroekonomiċi u dwar l-istrateġiji ta’ żvilupp;

(b)	janalizzaw flimkien kwistjonijiet ekonomiċi ta’ interess reċiproku, inkluż li jappoġġjaw il-politika ekonomika u l-implimentazzjoni tagħha; kif ukoll

(c)	jippromwovu kooperazzjoni usa’ bil-għan li jitħaffef l-influss tal-kompetenzi u l-aċċess għal teknoloġiji ġodda.

Il-Kosovo għandu jistinka sabiex jistabbilixxi ekonomija tas-suq funzjonanti u gradwalment japprossima l-politiki tiegħu mal-politiki orjentati lejn l-istabbiltà tal-Unjoni Ekonomika u Monetarja. Fuq talba tal-awtoritajiet tal-Kosovo, l-UE tista’ tipprovdi għajnuna mfassla biex tappoġġja l-isforzi tal-Kosovo f’dan ir-rigward.

Il-kooperazzjoni għandu jkollha wkoll l-għan li jissaħħaħ l-istat tad-dritt fil-qasam tan-negozju permezz ta’ qafas ġuridiku stabbli u nondiskriminatorju relatat mal-kummerċ.

Il-kooperazzjoni f’dan il-qasam tinkludi l-iskambju ta’ informazzjoni dwar il-prinċipji u l-funzjonament tal-Unjoni Ekonomika u Monetarja.

Artikolu 95

Kooperazzjoni fl-istatistika

Il-kooperazzjoni bejn il-Partijiet għandha tiffoka primarjament fuq oqsma ta’ prijorità relatati mal-acquis tal-UE fil-qasam tal-istatistika. Għandha tiġi mmirata b’mod partikolari sabiex tiżviluppa sistema tal-istatistika effiċjenti u sostenibbli ġewwa l-Kosovo li tkun kapaċi tipprovdi data affidabbli, oġġettiva u preċiża, li tista’ titqabbel ma’ statistika Ewropea, meħtieġa sabiex il-proċess ta’ tranżizzjoni u riforma fil-Kosovo jiġi monitorjat. Il-mira tagħha għandha tkun li tippermetti lill-Aġenzija Kosovara tal-Istatistika li tilħaq il-bżonnijiet tal-konsumaturi tagħha b’mod aħjar (kemm dawk fis-settur pubbliku kif ukoll dak privat). Is-sistema tal-istatisika għandha tkun konsistenti mal-prinċipji tal-Kodiċi ta’ Prattika tal-Istatistika Ewropea, il-prinċipji fundamentali tan-NU tal-istatistika, l-istipulazzjonijiet tad-dritt statistiku Ewropew, u tiżviluppa lejn l-applikazzjoni tal-acquis tal-UE fil-qasam tal-istatistika. Il-Partijiet għandhom jikkooperaw b’mod partikolari sabiex jiżguraw il-kunfidenzjalità tad-data individwali, sabiex progressivament iżidu l-ġbir tad-data u t-trażmissjoni tagħha lis-Sistema Ewropea tal-Istatistika, u sabiex isir skambju ta’ informazzjoni dwar il-metodi, it-trasferiment tal-kompetenzi u t-taħriġ.

Artikolu 96

Servizzi bankarji, tal-assigurazzjoni u servizzi finanzjarji oħra

Il-kooperazzjoni bejn l-UE u l-Kosovo għandha tiffoka fuq oqsma prijoritajri b’rabta mal-acquis tal-UE fl-oqsma tas-servizzi bankarji, tal-assigurazzjoni u dawk finanzjarji. Il-Partijiet għandhom jikkooperaw bl-għan li jistabbilixxu u jiżviluppaw qafas adegwat biex jinkoraġġixxi s-setturi tas-servizzi bankarji, tal-assigurazzjoni u finanzjarji ġewwa l-Kosovo, imsejjes fuq prattiċi ta’ kompetizzjoni ġusta u li jiżgura l-kundizzjonijiet ekwi meħtieġa.

Artikolu 97

Kontroll finanzjarju intern pubbliku u awditjar estern

Il-kooperazzjoni bejn il-Partijiet għandha tiffoka fuq oqsma prijoritarji li huma relatati mal-acquis tal-UE fl-oqsma tal-kontroll finanzjarju intern pubbliku. Il-partijiet għandhom, b’mod partikolari, jikkooperaw bl-għan li jkomplu jiżviluppaw l-implimentazzjoni ta’ kontroll intern effiċjenti u sistemi ta’ awditjar interni funzjonalment indipendenti fis-settur pubbliku ġewwa l-Kosovo, konsistenti mal-qafas aċċettat internazzjonalment u l-prassi tajba tal-UE.

Sabiex jiġu sodisfatti r-responsabbiltajiet ta’ koordinazzjoni u armonizzazzjoni li jirriżultaw mill-ħtiġijiet imsemmija hawn fuq, il-kooperazzjoni tiffoka wkoll fuq l-istabbiliment u t-tisħiħ ta’ unitajiet ta’ armonizzazzjoni ċentrali għall-ġestjoni u kontroll finanzjarju u tal-awditjar intern.

Fil-qasam tal-Awditjar Estern, il-Partijiet għandhom jikkooperaw b’mod partikolari bl-għan li jkomplu jiżviluppaw funzjoni tal-awditjar estern indipendenti ġewwa l-Kosovo konsistenti ma’ standards aċċettati internazzjonalment u l-prassi tajba tal-UE. Il-kooperazzjoni tiffoka wkoll fuq il-bini ta’ kapaċità fl-uffiċċju tal-Awditur Ġenerali.

Artikolu 98

Promozzjoni u protezzjoni tal-investiment

Il-kooperazzjoni bejn il-Partijiet fil-qasam tal-promozzjoni u l-protezzjoni tal-investiment għandha tiffoka fuq il-protezzjoni tal-investiment dirett barrani, u għandha timmira li toħloq ambjent li jiffavorixxi l-investiment privat, kemm domestiku kif ukoll barrani, li huwa essenzjali sabiex l-ekonomija u l-industrija tal-Kosovo jingħataw ħajja ġdida. L-għanijiet partikolari tal-kooperazzjoni għandhom ikunu li l-Kosovo jtejjeb il-qafas ġuridiku kif ukoll jiffavorixxi u jippromwovi l-investiment.

Artikolu 99

Kooperazzjoni industrijali

Il-kooperazzjoni għandha timmira li tippromwovi l-modernizzazzjoni u r-ristrutturar tal-industrija u tas-setturi individwali fil-Kosovo. Għandu jkollha wkoll l-għan li tiżgura li l-kundizzjonijiet meħtieġa sabiex l-industrija tal-Kosovo tkun kompetittiva jeżistu f’ambitu li jiżgura li l-ambjent ikun imħares.

Il-kooperazzjoni għandha tqis l-aspetti reġjonali tal-iżvilupp industrijali, u tippromwovi s-sħubijiet transkonfinali/transfruntieri fejn dawn huma relevanti. L-inizjattivi jistgħu jfittxu b’mod partikolari li jistabbilixxu qafas adegwat għall-impriżi, biex itejbu l-amministrazzjoni, il-kompetenzi u jippromwovu s-swieq, it-trasparenza tas-swieq u l-ambjent kummerċjali. Għandha tingħata attenzjoni speċjali għall-ħolqien ta’ attivitajiet ta’ promozzjoni tal-esportazzjoni effiċjenti fil-Kosovo.

Il-kooperazzjoni għandha tieħu kont, kif meħtieġ, tal-acquis tal-UE fil-qasam tal-politika industrijali.

Artikolu 100

Intrapriżi żgħar u medji

Il-kooperazzjoni bejn il-Partijiet għandha jkollha l-għan li tiżviluppa u ssaħħaħ l-intrapriżi żgħar u medji fis-settur privat (SMEs), li tinkoraġġixxi ambjent li jiffavorixxi l-inizjattiva u l-iżvilupp tal-intrapriżi, partikolarment dawk żgħar u medji, kif ukoll biex tinkoraġġixxi ambjent li jiffavorixxi l-kooperazzjoni bejn l-intrapriżi. Il-kooperazzjoni għandha tkun konformi mal-prinċipji tal-Att dwar in-Negozji ż-Żgħar u tieħu kont tal-oqsma ta’ prijorità relatati mal-acquis tal-UE fil-qasam tal-SMEs.

Artikolu 101

Turiżmu

Il-Kooperazzjoni bejn il-Partijiet fil-qasam tat-turiżmu għandu jkollha l-għan li:

(a)	tiżgura żvilupp bilanċjat u sostenibbli fit-turiżmu u kwistjonijiet relatati;

(b)	issaħħaħ it-trażmissjoni tal-informazzjoni dwar it-turiżmu (permezz ta’ netwerks internazzjonali, banek ta’ data, eċċ.);

(c)	tinkoraġġixxi l-iżvilupp tal-infrastruttura li jwassal għall-investiment fil-qasam turistiku.

Il-kooperazzjoni għandu jkollha wkoll l-għan li tanalizza l-opportunitajiet għal operazzjonijiet konġunti u t-tisħiħ tal-kooperazzjoni bejn impriżi u esperti fit-turiżmu u istituzzjonijiet u l-aġenziji kompetenti tagħhom fil-qasam tat-turiżmu, kif ukoll it-trasferiment tal-kompetenzi (permezz ta’ taħriġ, skambji u seminars). Il-kooperazzjoni għandha tieħu kont, kif meħtieġ, tal-acquis tal-UE fil-qasam tat-turiżmu.

Il-kooperazzjoni tista’ tiġi integrata f’qafas reġjonali ta’ kooperazzjoni.

Artikolu 102

Agrikoltura u l-qasam agroindustrijali

Il-kooperazzjoni bejn il-Partijiet għandha tiġi żviluppata fl-oqsma prijoritarji kollha relatati mal-acquis tal-UE fil-qasam tal-agrikoltura, kif ukoll dwar l-iskemi ta’ kwalità għall-prodotti agrikoli u tal-ikel, sikurezza tal-ikel, fis-settur veterinarju u dak fitosanitarju. Notevolment, il-kooperazzjoni għandu jkollha l-għan li timmodernizza u tirristruttura s-settur agrikolu u agroindustrijali fil-Kosovo, partikolarment sabiex jintlaħqu r-rekwiżiti sanitarji tal-UE, tittejjeb il-ġestjoni tal-ilma u tal-iżvilupp rurali kif ukoll l-iżvilupp tas-settur tal-forestrija fil-Kosovo, u għall-appoġġ tal-approssimazzjoni gradwali tal-leġiżlazzjoni u l-prattiċi Kosovari mal-acquis tal-UE.

Artikolu 103

Sajd

Il-Partijiet għandhom jesploraw il-possibbiltà li jidentifikaw oqsma ta’ benefiċċju reċiproku ta’ interess komuni fis-setturi tal-akkwakultura u s-sajd. Il-kooperazzjoni għandha tieħu kont kif meħtieġ tal-oqsma ta’ prijorità marbuta mal-acquis tal-UE f’dawn l-oqsma u l-prinċipji tal-ġestjoni u l-konservazzjoni tar-riżorsi tas-sajd abbażi tar-regoli żviluppati mill-organizzazzjonijiet internazzjonali u reġjonali tas-sajd relevanti.

Artikolu 104

Dwana

Il-Partijiet għandhom jistabbilixxu kooperazzjoni f’dan il-qasam sabiex jiggarantixxu konformità mad-dispożizzjonijiet li għandhom ikunu adottati fil-qasam tan-negozju u sabiex tinkiseb l-approssimazzjoni tas-sistema doganali tal-Kosovo għal dik tal-UE, sabiex b’hekk jgħinu sabiex titħejja t-triq għall-miżuri ta’ liberalizzazzjoni li huma ppjanati taħt dan il-Ftehim u għall-approssimazzjoni gradwali tal-leġiżlazzjoni doganali Kosovara għall-acquis tal-UE.

Il-kooperazzjoni għandha tieħu kont kif meħtieġ, tal-oqsma prijoritarji relatati mal-acquis tal-UE fil-qasam tad-dwana.

Ir-regoli dwar assistenza amministrattiva reċiproka bejn il-Partijiet fil-qasam tad-dwana huma stabbiliti fl-Protokoll IV.

Artikolu 105

Tassazzjoni

L-UE għandha tikkoopera mal-Kosovo sabiex tgħinu jiżviluppa fil-qasam tat-tassazzjoni, inkluż miżuri bil-għan li s-sistema fiskali tal-Kosovo tkompli tiġi riformata u li l-amministrazzjoni tat-taxxa tiġi ristrutturata bl-għan li tiżgura l-effettività tal-ġbir ta’ taxxa u tal-ġlieda kontra l-frodi fiskali.

Il-kooperazzjoni għandha tieħu kont kif meħtieġ tal-oqsma prijoritarji li huma relatati mal-acquis tal-UE fil-qasam tat-tassazzjoni u fil-ġlieda kontra kompetizzjoni dannuża fit-taxxi. Il-Kosovo, meta jħejji l-leġiżlazzjoni tiegħu dwar l-eliminazzjoni tal-kompetizzjoni dannuża fit-taxxi, għandu jikkunsidra, kif xieraq, il-prinċipji tal-Kodiċi ta’ Kondotta dwar it-tassazzjoni tal-intrapriżi adottat mill-Kunsill u r-Rappreżentati tal-Gvernijiet tal-Istati Membri, li ltaqgħu fi ħdan il-Kunsill fl-1 ta’ Diċembru 1997 (6).

Il-kooperazzjoni għandu jkollha l-għan li tippromwovi l-prinċipji tal-governanza tajba fil-qasam tat-taxxa, it-trasparenza, l-iskambju tal-informazzjoni u l-kompetizzjoni tat-taxxa ġusta fil-Kosovo, sabiex l-infurzar tal-miżuri li jipprevjenu l-frodi fiskali, l-evażjoni jew l-evitar jiġi infurzat.

Artikolu 106

Kooperazzjoni soċjali

Il-Partijiet għandhom jikkooperaw sabiex jiffaċilitaw ir-riforma tal-politika tal-Kosovo dwar l-impjiegi, fil-kuntest ta’ riforma u integrazzjoni ekonomika msaħħa, u bil-għan li jappoġġjaw it-tkabbir inklużiv. Il-kooperazzjoni għandu jkollha wkoll l-għan li tippromwovi d-djalogu soċjali kif ukoll l-approssimazzjoni tal-leġiżlazzjoni tal-Kosovo fuq l-impjiegi, is-saħħa, is-sikurezza operazzjonali u l-opportunitajiet indaqs għan-nisa u l-irġiel, għal nies b’diżabbiltà u għal nies li jappartjenu f’minoranzi u gruppi vulnerabbli lejn l-acquis tal-UE, bil-livell ta’ protezzjoni eżistenti fl-UE bħala punt ta’ riferiment. Din tista’ wkoll tinkludi l-allinjament tal-Kosovo mal-acquis tal-UE fil-qasam tal-liġi tax-xogħol u rigward il-kundizzjonijiet tax-xogħol tan-nisa. Il-kooperazzjoni għandha tippromwovi wkoll l-adozzjoni fil-Kosovo ta’ politiki komprensivi dwar l-inklużjoni soċjali u kontra d-diskriminazzjoni. Il-kooperazzjoni għandha tinkludi wkoll l-istabbiliment ta’ sistema ta’ ħarsien soċjali fil-Kosovo li tkun tista’ ssostni l-impjiegi u t-tkabbir inklużiv.

Il-Partijiet għandhom jikkooperaw bil-ħsieb li jiżguraw l-approssimazzjoni tal-leġiżlazzjoni tal-Kosovo għall-acquis tal-UE, bit-tir li tittejjeb is-saħħa u jiġi prevenut il-mard fil-popolazzjoni, li jiġu żviluppati strutturi amministrattivi indipendenti u effettivi u setgħat tal-infurzar biex ir-rekwiżiti tas-saħħa u s-sikurezza jiġu żgurati, id-drittijiet tal-pazjenti jiġu mħarsa, li ċ-ċittadini jiġu protetti mit-theddid għal saħħithom u l-mard, u li jiġu promossi stili ta’ ħajja sani.

Il-Kosovo għandu jirrispetta l-konvenzjonijiet internazzjonali u strumenti oħrajn f’dawn l-oqsma. Il-kooperazzjoni għandha tieħu kont kif meħtieġ tal-oqsma prijoritarji relatati mal-acquis tal-UE f’dawn l-oqsma.

Artikolu 107

Edukazzjoni u taħriġ

Il-Partijiet għandhom jikkooperaw bil-għan li jogħla l-livell tal-edukazzjoni ġenerali, l-edukazzjoni u taħriġ vokazzjonali, kif ukoll il-politika dwar iż-żgħażagħ u x-xogħol maż-żgħażagħ fil-Kosovo, bħala mezz li jiġu avvanzati l-iżvilupp tal-ħiliet, l-impjegabbiltà, l-inklużjoni soċjali u l-iżvilupp ekonomiku ġewwa l-Kosovo. Waħda mill-prijoritajiet għas-sistemi tal-edukazzjoni għolja għandha tkun il-kisba ta’ standards ta’ kwalità adegwati tal-istituzzjonijiet u l-programmi tagħhom, konsistenti mal-objettivi tal-proċess u d-Dikjarazzjoni ta’ Bolonja.

Il-Partijiet għandhom jikkooperaw ukoll bl-għan li jkun żgurat li l-aċċess għal-livelli kollha tal-edukazzjoni u tat-taħriġ ikun ħieles mid-diskriminazzjoni abbażi tas-sess, l-oriġini razzjali jew etnika, ir-reliġjon jew it-twemmin, diżabbiltà, età, jew orjentazzjoni sesswali. Il-kooperazzjoni għandha tfittex li tindirizza l-bżonnijiet tal-istudenti b’diżabbiltà fil-Kosovo.

Il-kooperazzjoni għandha tfittex ukoll li tiżviluppa l-kapaċità fir-riċerka u l-innovazzjoni, partikolarment permezz ta’ proġetti konġunti fuq ir-riċerka u l-innovazzjoni bl-involviment tal-partijiet konċernati kollha u l-iżgurar tat-trasferiment tal-kompetenzi.

Il-programmi u l-istrumenti tal-UE rilevanti għandhom jikkontribwixxu għall-aġġornament tal-istrutturi u tal-attivitajiet edukattivi, ta’ taħriġ u tar-riċerka u l-innovazzjoni fil-Kosovo.

Il-kooperazzjoni għandha tieħu kont kif meħtieġ tal-oqsma prijoritarji relatati mal-acquis tal-UE f’dan il-qasam.

Artikolu 108

Kooperazzjoni kulturali

Il-Partijiet jimpenjaw irwieħhom li jinkoraġġixxu l-kooperazzjoni kulturali. Il-kooperazzjoni għandha tgħin biex issaħħaħ il-kapaċità tal-politika kulturali tal-Kosovo, tirrinforza l-kapaċità tal-operaturi kulturali u żżid il-fehim reċiproku bejn individwi, minoranzi u ġnus. Il-kooperazzjoni għandha tappoġġja wkoll riformi strutturali biex javvanzaw id-diversità kulturali fil-Kosovo, inkluż fuq il-bażi tal-prinċipji mnaqqxa fil-Konvenzjoni dwar il-Protezzjoni u l-Promozzjoni tad-Diversità tal-Espressjonijiet Kulturali tal-Unesco, adottata ġewwa Pariġi fl-20 ta’ Ottubru 2005.

Artikolu 109

Koperazzjoni fil-qasam awdjoviżiv

Il-Partijiet għandhom jikkooperaw sabiex jippromwovu l-industrija awdjoviżiva fl-Ewropa u jinkoraġġixxu l-koproduzzjonijiet fl-oqsma taċ-ċinema u tal-midja awdjoviżiva.

Il-kooperazzjoni tista’ tinkludi, fost l-oħrajn, programmi u faċilitajiet għat-taħriġ ta’ ġurnalisti u ta’ professjonisti oħra tal-industrija awdjoviżiva, kif ukoll assistenza teknika lill-midja pubblika u privata tal-Kosovo, sabiex jiġu msaħħa l-indipendenza u l-professjonaliżmu tagħhom, u r-rabtiet tagħhom mal-midja Ewropea.

Il-Kosovo għandu jallinja l-politiki tiegħu dwar l-aspetti tar-regolamentazzjoni tal-kontenut tax-xandir transkonfinali/transfruntier tiegħu ma’ dawk tal-UE u jarmonizza l-leġiżlazzjoni tiegħu mal-acquis tal-UE. Il-Kosovo għandu joqgħod partikolarment attent lejn kwistjonijiet relatati mal-akkwiżizzjoni tad-drittijiet ta’ proprjetà intellettwali għal programmi u xandiriet, kif ukoll li jiżgura u jsaħħaħ l-indipendenza tal-awtoritajiet regolatorji relevanti.

Artikolu 110

Soċjetà tal-informazzjoni

Il-kooperazzjoni għandha tiġi żviluppata fl-oqsma kollha relatati mal-acquis tal-UE fir-rigward tas-soċjetà tal-informazzjoni. Din tappoġġja prinċiparjament il-konverġenza gradwali tal-politika u tal-leġiżlazzjoni min-naħa tal-Kosovo f’dan is-settur ma’ dawk tal-UE.

Il-Partijiet għandhom jikkooperaw ukoll bl-għan li tkompli tiġi żviluppata s-soċjetà tal-informazzjoni ġewwa l-Kosovo. L-għanijiet globali se jkunu li titkompla titħejja s-soċjetà kollha għall-era diġitali, kif ukoll li jiġu identifikati miżuri li jiżguraw l-interoperabbiltà tan-netwerks u s-servizzi.

Artikolu 111

Networks u servizzi tal-komunikazzjoni elettronika

Il-kooperazzjoni għandha tiffoka primarjament fuq l-oqsma prijoritarji relatati mal-acquis tal-UE f’dan il-qasam.

Il-Partijiet, b’mod partikolari, għandhom isaħħu l-kooperazzjoni fil-qasam tan-netwerks u s-servizzi tal-komunikazzjoni elettronika, bl-għan aħħari li l-Kosovo jadotta l-acquis tal-UE fis-settur ħames snin mid-dħul fis-seħħ ta’ dan il-Ftehim, b’attenzjoni speċjali tingħata lejn l-iżgurar u t-tisħiħ tal-indipendenza tal-awtoritajiet regolatorji relevanti.

Artikolu 112

Informazzjoni u komunikazzjoni

Il-Partijiet għandhom jieħdu l-miżuri neċessarji sabiex jistimolaw l-iskambju reċiproku ta’ informazzjoni. Għandha tingħata prijorità lill-programmi li huma mmirati sabiex il-pubbliku ġenerali jingħata informazzjoni bażika dwar l-UE, u li gruppi professjonali fil-Kosovo jingħataw informazzjoni aktar speċjalizzata.

Artikolu 113

Trasport

Il-kooperazzjoni bejn il-Partjiet għandha tiffoka fuq l-oqsma prijoritarji relatati mal-acquis tal-UE fil-qasam tat-trasport.

Il-kooperazzjoni tista’ timmira, b’mod notevoli, li tirristruttura u timmodernizza s-sistemi ta’ trasport tal-Kosovo u li ttejjeb infrastrutturi relatati (inkluż il-konnessjonijiet reġjonali kif identifikati mill-Osservatorju tat-Trasport tax-Xlokk tal-Ewropa), li ttejjeb il-moviment liberu tal-passiġġieri u l-merkanzija, li tilħaq standards interoperabbli u komparabbli ma’ dawk prevalenti fl-UE, u li tallinja l-leġiżlazzjoni tat-trasport ma’ dik tal-UE, jekk iċ-ċirkostanzi oġġettivi jippermettu dan.

Il-Kooperazzjoni għandu jkollha l-mira li tikkontribwixxi għall-aċċess reċiproku għas-swieq u l-faċilitajiet tat-trasport tal-UE u l-Kosovo kif previst f’dan il-Ftehim, li tiżviluppa sistema tat-trasport fil-Kosovo li hija kompatibbli, interoperabbli u allinjata mas-sistema tal-UE, u li ttejjeb il-protezzjoni ambjentali fil-qasam tat-trasport.

Artikolu 114

Enerġija

B’mod konformi mal-acquis tal-UE relevanti, il-Partijiet għandhom jiżviluppaw u jsaħħu l-kooperazzjoni taħghom fil-qasam tal-enerġija konsisteni mal-prinċipji tal-ekonomija tas-suq u t-Trattat li Jistabbilixxi l-Komunità tal-Enerġija, iffirmat f’Ateni fil-25 ta’ Ottubru 2005 (7). Il-kooperazzjoni għandha tiżviluppa bl-għan li l-Kosovo jintegra gradwalment fis-swieq tal-enerġija Ewropej.

Il-kooperazzjoni tista’ tinkludi assistenza lill-Kosovo partikolarment fir-rigward ta’:

(a)

it-titjib u d-diversifikazzjoni tal-provvista u t-tijib tal-aċċess lejn is-suq tal-enerġija, b’mod konformi mal-acquis tal-UE dwar is-sigurtà tal-provvista tal-enerġija u l-istrateġija tal-enerġija reġjonali tal-Komunità tal-Enerġija, u l-applikazzjoni tar-regoli tal-UE u Ewropej fuq it-tranżitu, it-trażmissjoni u d-distribuzzjoni u r-restawr tal-interkonnessjonijiet tal-elettriċità ta’ importanza reġjonali mal-ġirien tagħha.

(b)

għajnuna lill-Kosovo sabiex jimplementa l-acquis tal-UE rigward l-effiċjenza enerġetika, is-sorsi ta’ enerġija rinnovabbli, u l-impatt ambjentali tas-settur tal-enerġija, u b’hekk tippromwovi l-iffrankar tal-enerġija, l-effiċjenza enerġetika, l-enerġija rinnovabbli, u l-istudju u l-mitigazzjoni tal-impatt ambjentali tal-produzzjoni u l-konsum tal-enerġija;

(c)	il-formolazzjoni tal-kundizzjonijiet ta’ qafas għar-ristrutturar tal-kumpaniji tal-enerġija u l-kooperazzjoni bejn impriżi fis-settur, b’konformità mar-regoli tas-suq intern tal-enerġija tal-UE dwar is-separazzjoni (unbundling).

Artikolu 115

Ambjent

Il-Partijiet għandhom jiżviluppaw u jsaħħu l-kooperazzjoni tagħhom fil-qasam ambjentali bir-responsabbiltà vitali li ma ssirx iktar degradazzjoni u jibda jsir titjib fis-sitwazzjoni ambjentali bl-għan ta’ żvilupp sostenibbli fil-Kosovo. Il-Partijiet għandhom jikkooperaw fl-oqsma tal-kwalità tal-arja u tal-ilma (inkluż fir-rigward ta’ sustanzi radjoattivi fl-ilma intiż għall-konsum mill-bnedmin), standards bażiċi tas-sikurezza għall-ħarsien kontra perikli kkawżati minn esponiment għar-radjazzjoni jonizzanti, kull tip ta’ ġestjoni tal-iskart (inkluż il-ġestjoni responsabbli u sigura tal-iskart radjoattiv) u l-protezzjoni tan-natura, il-monitoraġġ u t-tnaqqis tal-emissjonijiet industrijali, l-iżgurar tas-sikurezza f’istallazzjonijiet industrijali, u l-klassifikazzjoni u t-trattament sigur tal-kimiki fil-Kosovo.

Il-Partijiet, b’mod partikolari, għandhom jistabbilixxu kooperazzjoni bl-għan li jissaħħu l-istrutturi u l-proċeduri amministrattivi għall-iżgurar ta’ ppjanar strateġiku ta’ kwistjonijiet ambjentali u l-koordinazzjoni bejn l-atturi rilevanti u jiffokaw fuq l-approssimazzjoni gradwali tal-leġiżlazzjoni tal-Kosovo mal-acquis tal-UE, u, fejn xieraq, l-acquis Euratom. Il-kooperazzjoni tista’ wkoll tkun iċċentrata fuq l-iżvilupp ta’ strateġiji mill-Kosovo sabiex jitnaqqas b’mod sinifikanti it-tniġġis lokali, reġjonali, u t-tniġġis transkonfinali tal-arja u tal-ilma, sabiex jiġi stabbilit qafas għall-produzzjoni u l-konsum effiċjenti, nadif, sostenibbli u rinnovabbli tal-enerġija, u sabiex jitwettqu valutazzjoni ambjentali tal-impatt u valutazzjoni strateġika tal-impatt.

Artikolu 116

Tibdil fil-klima

Il-Partijiet għandhom jikkooperaw bil-għan li jassistu l-Kosovo sabiex jiżviluppa l-politika dwar it-tibdil fil-klima tiegħu u sabiex jintegra konsiderazzjonijiet dwar il-klima fil-politiki tal-enerġija, tat-trasport, tal-industrija, tal-agrikoltura, tal-edukazzjoni, u politiki relevanti oħra. Tali kooperazzjoni għandha tkun ta’ sostenn ukoll għall-approssimazzjoni gradwali tal-leġiżlazzjoni tal-Kosovo mal-acquis tal-UE dwar it-tibdil fil-klima, b’mod partikolari l-monitoraġġ, ir-rapportar u l-verifikazzjoni effettivi tal-emissjonijiet tal-gassijiet serra. Din il-kooperazzjoni għandha tassisti wkoll lill-Kosovo biex jistabbilixxi kapaċitajiet amministrattivi adegwati u proċeduri tal-koordinament bejn l-atturi relevanti kollha sabiex jagħmel possibbli l-adozzjoni u l-implimentazzjoni ta’ politiki ta’ tkabbir b’użu baxx tal-karbonju u reżistenti għat-tibdil fil-klima. Il-Partijiet għandhom jikkooperaw bil-għan li, jekk iċ-ċirkostanzi oġġettivi jippermettu, jgħinu l-involviment tal-Kosovo fi sforzi globali u reġjonali għall mitigazzjoni ta’ u l-adattament għat-tibdil fil-klima.

Artikolu 117

Protezzjoni Ċivili

Il-Partijiet għandhom jiżviluppaw u jsaħħu l-kooperazzjoni tagħhom biex itejbu l-prevenzjoni ta’ diżastri naturali, it-tħejjija u r-rispons għalihom u diżastri kkawżati mill-bniedem. Il-kooperazzjoni, b’mod partikolari, għandha timmira li ttejjeb il-kapaċitajiet għall-protezzjoni ċivili u l-approssimazzjoni gradwali tal-Kosovo mal-acquis tal-UE b’rabta mal-ġestjoni tad-diżastri.

Il-kooperazzjoni tista’ tkun iċċentrata fuq il-prijoritajiet li ġejjin:

(a)	tgħarrif u twissija bikrija dwar id-diżastri; li l-Kosovo jkun kopert mis-sistemi ta’ twissija bikrija u l-għodod tal-monitoraġġ Ewropej

(b)	twaqqif ta’ komunikazzjoni effettiva fuq bażi ta’ 24 siegħa bejn is-servizzi ta’ emerġenza tal-Kosovo u dawk tal-Kummissjoni Ewropea.

(c)	tiżgura li jkun hemm kooperazzjoni f’każ ta’ emerġenzi maġġuri, inkluż l-iffaċilitar tal-għoti u l-qligħ tal-assistenza u s-sostenn tal-ospitant,

(d)	ittejjeb il-bażi ta’ għarfien dwar id-diżastri u l-perikli, u l-iżivilupp tal-valutazzjoni ta’ riskju ta’ diżastri matul il-Kosovo u l-pjanijiet tal-ġestjoni tad-diżastri,

(e)	timplementa l-aħjar prassi u linji gwida fil-qasam tal-prevenzjoni tad-diżastri, it-tħejjija u r-rispons għalihom.

Artikolu 118

Żvilupp ta’ riċerka u teknoloġija

Il-Partijiet għandhom jinkoraġġixxu l-kooperazzjoni fir-riċerka xjentifika ċivili u fl-iżvilupp teknoloġiku (RTD) fuq il-bażi ta’ benefiċċju reċiproku u b’kunsiderazzjoni tad-disponibilità tar-riżorsi, aċċess adegwat għall-programmi rispettivi tagħhom, bla ħsara għal-livelli xierqa ta’ protezzjoni effettiva tad-drittijiet tal-proprjetà intelletwali, industrijali u kummerċjali.

Il-kooperazzjoni tieħu kont kif dovut tal-oqsma prijoritarji relatati mal-acquis tal-UE fil-qasam tar-riċerka u tal-iżvilupp tekniku.

Artikolu 119

Żvilupp reġjonali u lokali

Il-Partijiet għandhom ifittxu li jidentifikaw miżuri biex isaħħu l-kooperazzjoni għall-iżvilupp reġjonali u lokali, bil-għan li jingħata kontribut għall-iżvilupp ekonomiku u sabiex jitnaqqsu l-iżbilanċi reġjonali. Għandha tingħata attenzjoni speċifika għall-kooperazzjoni transfruntiera/transkonfinali, transnazzjonali u interreġjonali.

Il-kooperazzjoni għandha tieħu kont, kif dovut, tal-oqsma prijoritarji relatati mal-acquis tal-UE fil-qasam tal-iżvilupp reġjonali.

Artikolu 120

Amministrazzjoni pubblika

Il-kooperazzjoni u d-djalogu għandhom ikunu mmirati li jiżguraw li tkompli tiġi żviluppata amministrazzjoni pubblika professjonali, effiċjenti u responsabbli fil-Kosovo, u li jitkomplew l-isforzi ta’ riforma li diġà saru s’issa f’dan il-qasam, inkluż dawk relatati mal-proċess ta’ deċentralizzazzjoni u t-twaqqif ta’ muniċipalitajiet ġodda. Il-kooperazzjoni għandha timmira partikolarment li tappoġġja l-implimentazzjoni tal-istat tad-dritt, li l-istituzzjonijiet jaħdmu kif suppost għall-benefiċċju tal-popolazzjoni sħiħa tal-Kosovo, u l-iżvilupp bla intoppi tar-relazzjonijiet bejn l-UE u l-Kosovo.

Il-kooperazzjoni f’dan il-qasam għandha tkun iffokata prinċipalment fuq il-bini tal-istituzzjonijiet, li jinkludu l-iżvilupp u l-implimentazzjoni ta’ proċeduri ta’ reklutaġġ trasparenti u imparzjali ibbażat fuq il-mertu fuq il-livell ċentrali u lokali, fuq il-ġestjoni tar-riżorsi umani, l-iżvilupp tal-karrieri fis-servizz ċivili, it-taħriġ kontinwu u l-promozzjoni tal-etika fi ħdan l-amministrazzjoni pubblika. Il-kooperazzjoni għandha tinkludi wkoll it-titjib tal-effiċjenza u l-kapaċità ta’ korpi indipendenti li huma strumentali għall-funzjonament tal-amministrazzjoni pubblika u għal sistema effettiva ta’ kontrokontrolli.

TITOLU IX

KOOPERAZZJONI FINANZJARJA

Artikolu 121

Sabiex jintlaħqu l-għanijiet ta’ dan il-Ftehim u skont l-Artikoli 7, 122, 123 u 125, il-Kosovo jista’ jirċievi għajnuna finanzjarja mill-UE fis-sura ta’ għotjiet u self, inkluż self mill-Bank Ewropew tal-Investiment. L-assistenza finanzjarja mill-UE hija kundizzjonali fuq il-progress ulterjuri fl-issodisfar tal-kriterji politiċi ta’ Copenhagen. Għandu jittieħed ukoll kont ta’ kemm il-Kosovo jissodisfa l-obbligi tiegħu taħt dan il-Ftehim, kif ukoll tar-rapporti ta’ progress annwali dwar il-Kosovo. L-assistenza finanzjarja mill-UE għandha tkun ukoll soġġetta għall-kundizzjonalitajiet tal-PSA, b’mod partikolari fir-rigward tal-impenji tar-riċeventi li jwettaq riformi demokratiċi, ekonomiċi u istituzzjonali. L-assistenza finanzjarja mogħtija lill-Kosovo għandha tkun orjentata lejn il-ħtiġijiet li ġew osservati, il-prijoritajiet miftiehma, il-kapaċità ta’ assorbiment u ta’ rimborż, u l-miżuri li ttieħdu sabiex tiġi riformata u ristrutturata l-ekonomija.

Artikolu 122

L-assistenza finanzjarja, fis-sura ta’ għotjiet, se tkun mogħtija b’mod konformi mar-regolament relevanti tal-Parlament Ewropew u l-Kunsill fil-kuntest ta’ qafas multiannwali indikattiv u bbażat fuq programmi annwali jew multiannwali stabbiliti mill-UE wara li li jkunu saru konsultazzjonijiet mal-Kosovo.

Artikolu 123

L-assistenza finanzjarja tista’ tkopri s-setturi kollha ta’ kooperazzjoni, b’attenzjoni speċjali tingħata lill-ispazji tal-Libertà, Sigurtà u Ġustizzja, l-approssimazzjoni tal-leġiżlazzjoni lejn l-acquis tal-UE, l-iżvilupp soċjali u ekonomiku, l-amministrazzjoni tajba, ir-riforma fl-amministrazzjoni pubblika, l-enerġija, u l-agrikoltura.

Artikolu 124

Fuq talba tal-Kosovo u f’każ ta’ ħtiġijiet speċjali, l-UE tista’ teżamina, f’koordinazzjoni mal-istituzzjonijiet finanzjarji internazzjonali, il-possibbiltà li tingħata għajnuna makrofinanzjarja fuq bażi eċċezzjonali bla ħsara għal ċerti kondizzjonijiet u b’kunsiderazzjoni għad-disponibilità tar-riżorsi finanzjarji kollha. L-għajnuna tingħata jekk jiġu ssodisfati l-kundizzjonijiet li jiġu stabbiliti fil-kuntest ta’ programm miftiehem bejn il-Kosovo u l-Fond Monetarju Internazzjonali.

Artikolu 125

Sabiex jippermettu l-aħjar użu tar-riżorsi disponibbli, il-Partijiet għandhom jiżguraw li l-assistenza finanzjarja tal-UE tingħata f’koordinazzjoni mill-qrib ma’ dik mogħtija minn sorsi oħra, bħalma huma l-Istati Membri, pajjiżi oħra u istituzzjonijiet finanzjarji internazzjonali.

Għaldaqstant, il-Kosovo jagħti tagħrif dwar kull sors ta’ assistenza.

TITOLU X

DISPOŻIZZJONIJIET ISTITUZZJONALI, ĠENERALI U FINALI

Artikolu 126

B’dan huwa stabbilit Kunsill ta’ Stabbilizzazzjoni u Assoċjazzjoni (KSA) li jissorvelja l-applikazzjoni u l-implimentazzjoni ta’ dan il-Ftehim. Għandu jiltaqa’ fil-livell xieraq f’intervalli regolari, u jsejjaħ laqgħat straordinarji skont kif jirrekjedu ċ-ċirkostanzi. Għandu jeżamina kull kwistjoni ewlenija li tinqala’ fi ħdan il-qafas ta’ dan il-Ftehim u kwalunkwe kwistjoni oħra ta’ interess reċiproku.

Artikolu 127

1.   Il-KSA għandu jkun magħmul minn rappreżentati tal-UE, minn naħa waħda, u tal-Kosovo min-naħa l-oħra.

2.   Il-KSA jistabbilixxi r-regoli ta’ proċedura tiegħu.

3.   Il-membri tal-KSA jistgħu jirranġaw li jkunu rrappreżentati, skont il-kondizzjonijiet li se jiġu stabbiliti fir-regoli ta’ proċedura tiegħu.

4.   Il-KSA għandu jkun ippresedut b’rotazzjoni minn rappreżentant tal-UE u rappreżentant tal-Kosovo, skont id-dispożizzjonijiet li se jiġu stabbiliti fir-regoli ta’ proċedura tiegħu.

5.   Fi kwistjonijiet li jikkonċernawh, il-Bank Ewropew tal-Investiment għandu jieħu sehem, bħala osservatur, fil-ħidma tal-KSA.

Artikolu 128

Sabiex jinkisbu l-għanijiet ta’ dan il-Ftehim, il-KSA għandu jkollu s-setgħa li jieħu deċiżjonijiet fil-kamp ta’ applikazzjoni ta’ dan il-Ftehim fil-każi provduti fih. Id-deċiżjonijiet meħuda għandhom jorbtu liż-żewġ Partijiet, li jieħdu l-miżuri meħtieġa sabiex jimplimentaw id-deċiżjonijiet li jkunu ttieħdu. Il-KSA jista’ jagħmel ukoll rakkomandazzjonijiet kif xieraq. Għandu jfassal id-deċiżjonijiet u r-rakkomandazzjonijiet tiegħu bi ftehim bejn il-Partijiet.

Artikolu 129

1.   Il-KSA għandu jkun assistit f’ħidmietu minn Kumitat ta’ Stabbilizzazzjoni u Assoċjazzjoni, magħmul minn rappreżentati tal-UE, minn naħa, u tal-Kosovo, min-naħa l-oħra.

2.   Fir-regoli ta’ proċedura tiegħu, il-KSA għandu jiddetermina d-dmirijiet tal-Kumitat ta’ Stabbilizzazzjoni u Assoċjazjoni, li jinkludu t-tħejjija tal-laqgħat tal-KSA, u jiddeterminaw kif għandu jaħdem il-Kumitat.

3.   Il-KSA jista’ jiddelega lill-Kumitat ta’ Stabbilizzazzjoni u Assoċjazjoni kwalunkwe setgħa minn tiegħu. F’dan il-każ, il-Kumitat ta’ Stabbilizzazzjoni u Assoċjazzjoni għandu jieħu d-deċiżjonijiet tiegħu skont il-kundizzjonijiet stabbiliti fl-Artikolu 128.

Artikolu 130

Il-Kumitat ta’ Stabbilizzazzjoni u Assoċjazzjoni jista’ joħloq sottokumitati u gruppi speċjali. Qabel tmiem l-ewwel sena wara d-data tad-dħul fis-seħħ ta’ dan il-Ftehim, il-Kumitat ta’ Stabbilizzazzjoni u Assoċjazzjoni għandu jwaqqaf is-sottokumitati meħtieġa għall-implimentazzjoni adegwata ta’ dan il-Ftehim.

Għandu jiġi stabbilit sottokumitat responsabbli mill-kwistjonijiet dwar migrazzjoni.

Artikolu 131

Il-KSA jista’ jiddeċiedi li jistabbilixxi kumitati jew korpi speċjali oħra li jistgħu jgħinuh iwettaq dmirijietu. Fir-regoli ta’ proċedura tiegħu, il-KSA għandu jiddetermina l-kompożizzjoni u d-dmirijiet ta’ dawn il-kumitati jew korpi u kif jiffunzjonaw.

Artikolu 132

B’dan, qiegħed jitwaqqaf Kumitat Parlamentari ta’ Stabbilizzazzjoni u Assoċjazzjoni (minn hawn ‘il quddiem magħruf bħala l-“Kumitat Parlamentari”). Dan għandu jkun forum għall-Membri tal-Parlament Ewropew u Membri tal-Parlament tal-Kosovo biex jiltaqgħu u jaqsmu l-fehmiet tagħhom ma’ xulxin. Għandu jiltaqa’ f’intervalli li jistabbilixxi hu stess, imma tal-anqas irid jiltaqa’ darba fis-sena.

Il-Kumitat Parlamentari għandu jkun magħmul minn membri tal-Parlament Ewropew u minn membri tal-Parlament tal-Kosovo.

Il-Kumitat Parlamentari għandu jistabbilixxi r-regoli tal-proċedura tiegħu.

Il-Kumitat Parlamentari għandu jkun ippresedut darba minn membru tal-Parlament Ewropew u d-darba ta’ wara minn membru tal-Parlament tal-Kosovo, skont id-dispożizzjonijiet li jiġu stabbiliti fir-regoli tiegħu ta’ proċedura.

Il-Kumitat Parlamentari jista’ jagħmel rakkomandazzjonijiet lill-KSA.

Artikolu 133

Fil-kamp ta’ applikazzjoni ta’ dan il-Ftehim, il-Partijiet għandhom jimpenjaw ruħhom li jiżguraw li l-persuni fiżiċi u ġuridiċi tal-Parti l-oħra jkollhom aċċess, ħieles mid-diskriminazzjoni, li jieħdu rimedju legali għad-difiża tad-drittijiet legali tagħhom.

Artikolu 134

Dan il-Ftehim ma għandux iwaqqaf lil Parti milli tieħu miżuri li tikkunsidra neċessarji biex tipprevjeni l-kxif ta’ informazzjoni li jmur kontra l-interessi tas-sigurtà essenzjali tagħha.

Artikolu 135

1.   Fl-oqsma koperti minn dan il-Ftehim:

(a)	l-arranġamenti applikati mill-Kosovo b’rabta mal-Unjoni m’għandhomx iwasslu għal xi diskriminazzjoni bejn l-Istati Membri, iċ-ċittadini tagħhom, jew il-kumpaniji jew id-ditti tagħhom;

(b)	l-arranġamenti applikati mill-UE fir-rigward tal-Kosovo m’għandhomx jagħtu lok għall-ebda diskriminazzjoni bejn iċ-ċittadini tal-Kosovo, kif ukoll bejn id-ditti jew kumpaniji tal-Kosovo.

2.   Il-Paragrafu 1 għandu jkun mingħajr ħsara għal kwalunkwe provvediment speċjali f’dan il-Ftehim, inkluż, u b’mod partikolari, l-Artikolu 70(3).

Artikolu 136

1.   Il-Partijiet għandhom jieħdu kwalunkwe miżura ġenerali jew speċifika li hija meħtieġa sabiex ikunu sodisfatti l-obbligi tagħhom taħt dan il-Ftehim. Għandhom jiżguraw li l-għanijiet li huma stabbiliti f’dan il-Ftehim jintlaħqu.

2.   Il-Partijiet għandhom jaqblu li jikkonsultaw minnufih permezz tal-mezzi adatti fuq it-talba ta’ kwalunkwe waħda mill-Partijiet sabiex tiġi diskussa kwalunkwe kwistjoni li tikkonċerna l-interpretazzjoni jew l-implimentazzjoni ta’ dan il-Ftehim u aspetti rilevanti oħra tar-relazzjonijiet bejn il-Partijiet.

3.   Kull Parti għandha tressaq quddiem il-KSA kull tilwima dwar l-applikazzjoni jew l-interpretazzjoni ta’ dan il-Ftehim. F’dak il-każ, għandu japplika l-Artikolu 137 u l-Protokoll V, skont il-każ.

Il-KSA jista’ jtemm it-tilwima b’deċiżjoni vinkolanti.

4.   Jekk kwalunkwe waħda mill-Partijiet tqis li l-Parti l-oħra naqset milli tissodisfa obbligu taħt dan il-Ftehim, tista’ tieħu miżuri xierqa. Qabel ma tagħmel hekk, ħlief għal każijiet ta’ urġenza speċjali, din għandha tipprovdi lill-KSA bit-tagħrif relevanti kollu meħtieġ għal stħarriġ bir-reqqa dwar is-sitwazzjoni bil-ħsieb li tinstab soluzzjoni li tkun aċċettabbli għall-Partijiet.

Fl-għażla tal-miżuri, il-prijorità tingħata lil dawk li l-inqas ifixklu l-ħidma ta’ dan il-Ftehim. Dawn il-miżuri għandhom jiġu mgħarrfa minnufih lill-KSA u ssir konsultazzjoni dwarhom, jekk il-Parti l-oħra titlob dan, fi ħdan il-KSA, il-Kumitat ta’ Stabbilizzazzjoni u Assoċjazzoni jew minn kwalunkwe entità oħra stabbilita fuq il-bażi tal-Artikoli 130 u 131.

5.   Il-paragrafi 2, 3 u 4 ta’ dan l-Artikolu bl-ebda mod ma għandhom jaffetwaw lil u huma mingħajr ħsara għall-Artikoli 34, 42, 43, 44, 48 u l-Protokoll III (definizzjoni tal-kunċett ta’ prodotti li joriġinaw u l-metodi ta’ kooperazzjoni amministrattiva).

6.   Il-paragrafi 3 u 4 ta’ dan l-Artikolu ma għandhomx japplikaw għall-Artikoli 5 u 13.

Artikolu 137

1.   Meta tinqala’ tilwima bejn il-Partijiet fir-rigward tal-interpretazzjoni u l-implimentazzjoni ta’ dan il-Ftehim, kwalunkwe Parti għandha tinnotifika lill-Parti l-oħra u lill-KSA b’talba formali sabiex il-kwistjoni tat-tilwima tiġi solvuta.

Fejn Parti minnhom tqis li xi miżura adottata mill-Parti l-oħra, jew in-nuqqas ta’ azzjoni ta’ Parti minnhom, tikkostitwixxi ksur tal-obbligi tagħha taħt dan il-Ftehim, it-talba formali għas-soluzzjoni tat-tilwima tagħti r-raġunijiet għal din l-opinjoni u tindika, skont il-każ, li l-Parti tista’ tadotta miżuri kif previst fl-Artikolu 136(4).

2.   Il-Partijiet għandhom jagħmlu ħilithom biex jirranġaw it-tilwima billi b’rieda tajba jersqu għall-konsultazzjonijit mal-KSA jew korpi oħra kif provdut fil-paragrafu 3, bil-għan li jaslu għal soluzzjoni aċċettabbli għat-tnejn li huma.

3.   Il-Partijiet għandhom jipprovdu lill-KSA bl-informazzjoni rilevanti meħtieġa għal analiżi bir-reqqa tas-sitwazzjoni.

Sakemm it-tilwima tibqa’ ma tiġix solvuta, din għandha tiġi diskussa f’kull laqgħa tal-KSA, sakemm ma tkunx inbdiet il-proċedura ta’ arbitraġġ kif prevista fil-Protokoll V. It-tilwima għandha titqies riżolta meta l-KSA jkun ħa deċiżjoni vinkolanti biex jagħlaq il-kwistjoni kif previst mill-Artikolu 136(3), jew meta jkun iddikjara li t-tilwima m’għadhiex teżisti.

Il-konsultazzjonijiet dwar tilwima jistgħu jsiru fi kwalunkwe laqgħa tal-Kumitat ta’ Stabbilizzazzjoni u Assoċjazzjoni jew fi kwalunkwe kumitat jew entità stabbilita fuq il-bażi tal-Artikoli 130 u 131, kif miftiehem bejn il-Partijiet jew fuq it-talba ta’ kwalunkwe Parti minnhom. Il-konsultazzjonijiet jistgħu jsiru wkoll bil-miktub.

L-informazzjoni kollha żvelata matul il-konsultazzjoni għandha tibqa’ kunfidenzjali.

4.   Għal kwistjonijet li jaqgħu fil-kamp ta’ applikazzjoni tal-Protokoll V, jekk il-Partijiet ma jirnexxilhomx isolvu t-tilwima fi żmien xahrejn wara l-bidu tal-proċedura għas-soluzzjoni tat-tilwima skont il-paragrafu 1, kwalunkwe Parti minnhom tista’ tfittex soluzzjoni għat-tilwima permezz ta’ arbitraġġ skont dan il-Protokoll.

Artikolu 138

Sakemm ma jinkisbux drittijiet ekwivalenti għall-individwi u għall-operaturi ekonomiċi taħt dan il-Ftehim, dan il-Ftehim ma għandux jaffettwa d-drittijiet li ġew żgurati lilhom permezz ta’ ftehimiet eżistenti li jorbtu lil Stat Membru wieħed jew aktar minn naħa waħda u lill-Kosovo min-naħa l-oħra.

Artikolu 139

L-Annessi I sa VII, il-Protokolli I, II, III, IV u V, u d-Dikjarazzjoni għandhom ikunu parti integrali minn dan il-Ftehim.

Artikolu 140

Dan il-Ftehim huwa konkluż għal perjodu bla limitu.

Kwalunkwe waħda mill-Partijiet tista’ tiddenunzja dan il-Ftehim billi tinnotifika lill-Parti l-oħra. Dan il-Ftehim għandu jintemm sitt xhur wara d-data tan-notifika.

Kwalunkwe Parti tista’ tissospendi l-Ftehim jew parti minnu, b’effett immedjat, fil-każ li l-Parti l-oħra ma tirrispettax wieħed mill-elementi essenzjali ta’ dan il-Ftehim.

L-UE tista’ tieħu miżuri li hi tqis xierqa, inkluż is-sospensjoni ta’ dan il-Ftehim sħiħ jew parti minnu, b’effett immedjat, fil-każ li l-Kosovo ma jkunx konformi mal-prinċipji essenzjali stipulati fl-Artikoli 5 u 13.

Artikolu 141

Dan il-Ftehim għandu japplika, minn naħa, għat-territorji li fihom jiġu applikati t-Trattat dwar l-Unjoni Ewropea, it-Trattat dwar il-Funzjonament tal-Unjoni Ewropea u t-Trattat li jistabbilixxi l-Komunità Ewropea tal-Enerġija Atomika, bil-kundizzjonijiet stipulati f’dawk it-Trattati, u min-naħa l-oħra għat-territorju tal-Kosovo.

Artikolu 142

Is-Segretarjat Ġenerali tal-Kunsill tal-Unjoni Ewropea għandu jkun id-depożitarju ta’ dan il-Ftehim.

Artikolu 143

Dan il-Ftehim jitfassal f ‘żewġ kopji bil-lingwa Bulgara, Ċeka, Daniża, Estonjana, Finlandiża, Franċiża, Ġermaniża, Griega, Ingliża, Kroata, Latvjana, Litwana, Maltija, Netherlandiża, Pollakka, Portugiża, Rumena, Slovakka, Slovena, Spanjola, Taljana, Ungeriża, Żvediża, Albaniża u Serba, b’kull test ikun awtentiku indaqs.

Artikolu 144

Il-Partijiet għandhom japprovaw dan il-Ftehim skont il-proċeduri tagħhom.

Dan il-Ftehim għandju jidħol fis-seħħ fl-ewwel jum tat-tieni xahar wara d-data li fiha l-Partijiet jinnotifikaw lil xulxin li ttieħdu l-proċeduri msemmija fl-ewwel paragrafu.

---

(*)  Dan l-isem huwa mingħajr preġudizzju għall-pożizzjonijiet dwar l-istatus, u huwa konformi mal-UNSCR 1244/99 u l-Opinjoni tal-QIĠ dwar id-dikjarazzjoni tal-indipendenza tal-Kosovo.

(1)  Ir-Regolament tal-Kunsill (KEE) Nru 2658/87 (ĠU UE L 256, 7.9.1987, p. 1).

(2)  Ir-referenzi għall-kodiċi tal-merkanzija huma b’mod konformi man-Nomenklatura Magħquda applikata fl-2014 b’konformità mar-Regolament ta’ Implimentazzjoni tal-Kummissjoni (UE) Nru 1001/2013 tal-4 ta’ Ottubru 2013 li jemenda l-Anness I tar-Regolament tal-Kunsill (KEE) Nru 2658/87 dwar in-nomenklatura tat-tariffa u l-istatistika u dwar it-Tariffa Doganali Komuni (ĠU UE L 290, 31.10.2013, p. 1).

(3)  ĠU UE L 343, 14.12.2012, p. 1.

(4)  ĠU UE L 285, 16.10.2006, p. 3.

(5)  Kumitat Ewropew għall-Istandardizzazzjoni, Kumitat Ewropew għall-Istandardizzazzjoni Elettroteknika, Istitut Ewropew ta’ Standards tat-Telekomunikazzjoni, kooperazzjoni Ewropea għall-Akkreditazzjoni, Kooperazzjoni Ewropea fil-Metroloġija Legali, l-Assoċjazzjoni Ewropea tal-Istituti Nazzjonali tal-Metroloġija.

(6)  Konklużjonijiet tal-laqgħa tal-Kunsill tal-ECOFIN tal-1 ta’ Diċembru 1997 dwar il-politika ta’ tassazzjoni (ĠU UE C 2, 6.1.1998, p. 1).

(7)  ĠU UE L 198, 20.7.2006, p. 18.

(**)  Ky përcaktim nuk paragjykon qëndrimin ndaj statusit dhe është në përputhje me Rezolutën 1244/1999 dhe Opinionin e Gjykatës Ndërkombëtare të Drejtësisë mbi shpalljen e pavarësisë së Kosovës.

(***)  Ovaj naziv ne prejudicira stavove о statusu i u skladu je sa RSBUN 1244/1999 i mišljenjem Međunarodnog Suda Pravde о deklaraciji о nezavisnosti Kosova.

---

---

---

---

---

---

---

---

---

---

---

---

---

---

---