Back to EUR-Lex homepage

EUR-Lex Access to European Union law

Back to EUR-Lex homepage

This document is an excerpt from the EUR-Lex website

Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search
You are here

Document 32013D0314

2013/314/UE: Deċiżjoni tal-Kunsill tal- 21 ta' Ġunju 2013 li tirrevoka d-Deċiżjoni 2010/286/UE dwar l-eżistenza ta' defiċit eċċessiv fl-Italja

ĠU L 173, 26.6.2013, p. 41–42 (BG, ES, CS, DA, DE, ET, EL, EN, FR, IT, LV, LT, HU, MT, NL, PL, PT, RO, SK, SL, FI, SV)

Legal status of the document In force

ELI: http://data.europa.eu/eli/dec/2013/314/oj

26.6.2013   

MT

Il-Ġurnal Uffiċjali tal-Unjoni Ewropea

L 173/41

DEĊIŻJONI TAL-KUNSILL

tal-21 ta' Ġunju 2013

li tirrevoka d-Deċiżjoni 2010/286/UE dwar l-eżistenza ta' defiċit eċċessiv fl-Italja

(2013/314/UE)

IL-KUNSILL TAL-UNJONI EWROPEA,

Wara li kkunsidraw it-Trattat dwar il-Funzjonament tal-Unjoni Ewropea, u b'mod partikolari l-Artikolu 126(12) tiegħu,

Wara li kkunsidra r-rakkomandazzjoni mill-Kummissjoni Ewropea,

Billi:

(1)

Fit-2 ta' Diċembru 2009, konsegwentement għal rakkomandazzjoni mill-Kummissjoni, il-Kunsill iddeċieda, bid-Deċiżjoni 2010/286/UE (1), li kien jeżisti defiċit eċċessiv fl-Italja. Il-Kunsill innota li d-defiċit tal-amministrazjzoni pubblika ppjanat għall-2009 kien ta’ 5,3 % tal-PDG, li kien ogħla mill-valur referenzjarju ta' 3 % tal-PDG taħt it-Trattat, filwaqt li d-dejn gross tal-amministrazzjoni pubblika kien ippjanat li jilħaq l-115,1 % tal-PDG fl-2009, b'hekk ogħla mill-valur referenzjarju ta' 60 % tal-PDG taħt it-Trattat (2).

(2)

Fit-2 ta’ Diċembru 2009, taħt l-Artikolu 126(7) tat-Trattat u l-Artikolu 3(4) tar-Regolament tal-Kunsill (KE) 1467/97 tas-7 ta' Lulju 1997 dwar li titħaffef u tiġi ċċarata l-implimentazzjoni tal-proċedura ta’ defiċit eċċessiv (3), il-Kunsill, fuq il-bażi ta' Rakkomandazzjoni mill-Kummissjoni, għamel rakkomandazzjoni indirizzata lill-Italja bil-għan li s-sitwazzjoni tad-defiċit eċċessiv tinġieb fi tmiemha sa mhux aktar tard mill-2012. Dik ir-Rakkomandazzjoni ġiet ippubblikata.

(3)

Taħt l-Artikolu 4 tal-Protokoll dwar il-proċedura ta’ defiċit eċċessiv anness mat-Trattati, il-Kummissjoni tipprovdi d-dejta għall-implimentazzjoni tal-proċedura. Bħala parti mill-applikazzjoni ta’ dan il-Protokoll, l-Istati Membri għandhom jinnotifikaw dejta dwar id-defiċits u d-dejn tal-gvern u dwar varjabbli assoċjati oħra darbtejn fis-sena, jiġifieri qabel l-1 ta’ April u qabel l-1 ta' Ottubru, konformement mal-Artikolu 3 tar-Regolament tal-Kunsill (KE) Nru 479/2009 tal-25 ta’ Mejju 2009 dwar l-applikazzjoni tal-Protokoll dwar il-proċedura ta’ defiċit eċċessiv anness mat-Trattat li jistabbilixxi l-Komunità Ewropea (4).

(4)

Meta jikkunsidra jekk deċiżjoni dwar l-eżistenza ta’ defiċit eċċessiv għandhiex tiġi revokata, il-Kunsill għandu jieħu deċiżjoni fuq il-bażi tad-dejta notifikata. Barra minn hekk, Deċiżjoni dwar l-eżistenza ta’ defiċit eċċessiv għandha tiġi revokata biss jekk il-previżjonijiet tal-Kummissjoni jindikaw li d-defiċit ma jkunx se jaqbeż il-valur referenzjarju ta’ 3 % tal-PDG tul il-perjodu ta’ previżjoni.

(5)

Fuq il-bażi tad-dejta pprovduta mill-Kummissjoni (Eurostat) taħt l-Artikolu 14 tar-Regolament (KE) Nru 479/2009 wara n-notifka mill-Italja qabel l-1 ta’ April 2013, il-Programm ta’ Stabbiltà tal-2013, it-tbassir tar-rebbiegħa tas-servizzi tal-Kummissjoni għall-2013, u l-valutazzjoni ta’ miżuri addizzjonali adottati fid-Digriet Leġislattiv 54 tal-21 ta’ Mejju 2013, il-konklużjonijiet li ġejjin huma ġġustifikati:

—

Wara li laħaq il-quċċata ta' 5,5 % tal-PDG fl-2009, id-defiċit tal-amministrazzjoni pubblika tal-Italja tnaqqas b'mod konsistenti u laħaq it-3,0 % tal-PDG fl-2012, li kienet l-iskadenza stabbilita mill-Kunsill. It-titjib kien xprunat minn konsolidazzjoni fiskali sinifikanti, filwaqt li fl-2012 in-nefqa f’imgħax kienet ta' 0,8 punt perċentwali tal-PDG ogħla milli fl-2009 u l-kompożizzjoni ta’ attività ekonomika kienet ifqar għat-taxxa.

—

Il-programm ta’ stabbiltà għall-perjodu 2013-17, adottat mill-Gvern Taljan fl-10 ta’ April 2013 u approvat mill-Parlament fis-7 ta’ Mejju, jippjana li d-defiċit jonqos ftit għal 2.9 % tal-PDG fl-2013 u konsegwentement jaqa’ għal 1,8 % tal-PDG fl-2014. Fuq il-bażi ta' preżunzjoni ta' ebda bidla politika, it-tbassir tar-rebbiegħa tas-servizzi tal-Kummissjoni għall-2013 jipprevedi defiċit ta’ 2,9 % tal-PDG fl-2013 u 2,5 % tal-PDG fl-2014. Kemm il-programm ta’ stabbiltà kif ukoll it-tbassir tar-rebbiegħa jinkludu l-impatt tad-Digriet Leġislattiv 35 tat-8 ta’ April 2013, li jipprevedi s-saldu tal-arretrati tad-dejn kummerċjali dovuti mis-settur tal-amministrazzjoni pubblika lil fornituri privati, għal ammont globali ta’ EUR 40 biljun (jew madwar 2,5 % tal-PDG) matul il-perjodu 2013-14. Filwaqt li dan l-ammont jirriżulta f’żieda korrispondenti tad-dejn tal-amministrazzjoni pubblika, huwa jinċidi fuq id-defiċit biss għall-parti li hija marbuta man-nefqa kapitali. Id-Digriet Leġislattiv jistabbilixxi dawn il-pagamenti għal 0,5 % tal-PDG fl-2013, b’żieda korrispondenti fid-defiċit. Dan jinkludi wkoll klawżola ta’ salvagwardja li tawtorizza lill-Gvern biex jittardja s-saldu ta' arretrati ta' dejn kummerċjali li jżidu d-defiċit jew jadotta miżuri korrettivi oħrajn, sabiex ikun żgurat li tintlaħaq il-mira baġitarja tal-2013.

—

Il-Parlament Taljan approva formalment l-objettivi baġitarji ppreżentati fil-programm ta’ stabbiltà tal-2013 fis-7 ta’ Mejju. Fis-17 ta’ Mejju, jiġifieri wara t-tbassir tar-rebbiegħa, il-ġvern il-ġdid ħareġ dikjarazzjoni formali biex jikkonferma dawn l-impenji u jħabbar l-adozzjoni ta' miżuri ġodda fir-rispett sħiħ tal-objettivi baġitarji fil-programm ta’ stabbiltà. Id-Digriet Leġislattiv 54, adottat fl-istess data, jispeċifika miżuri ġodda. Dawn jinkludu:

—

is-sospensjoni tal-pagament ta’ Ġunju tat-taxxa fuq il-proprjetà fuq djar okkupati mis-sid — esklużi residenzi lussużi — kif ukoll tal-proprjetà agrikola, filwaqt li jimpenja lill-gvern għal tfassil mill-ġdid tal-leġiżlazzjoni dwar it-tassazzjoni fuq il-proprjetà immobbli. Klawżola ta’ salvagwardja tiżgura li t-tfassil mill-ġdid għandu jsir f’rispett sħiħ tal-miri baġitarji f’termini primarji; barra minn hekk, jekk ir-riforma newtrali fir-rigward tal-baġit tonqos milli tkun approvata sal-aħħar ta’ Awwissu 2013, il-ħlas sospiż tat-taxxa fuq il-proprjetà jkollu jsir sas-16 ta’ Settembru.

—

l-estensjoni tal-iskema ta’ supplimentazzjoni tal-pagi għall-ħaddiema li mhumiex diġà koperti għas-sena 2013, b’allokazzjoni mill-ġdid ta’ riżorsi baġitarji disponibbli apparti dawk imwarrba bir-riforma tas-suq tax-xogħol tal-2012.

—

B’mod ġenerali, d-dispożizzjonijiet il-ġodda huma vvalutati li ma għandhom l-ebda impatt sinifikanti fuq id-defiċit, jekk implimentati b’mod konsistenti. B’hekk id-defiċit għandu jibqa’ taħt il-valur referenzjarju ta’ 3 % tal-PDG bmod duratur.

—

Wara titjib bi kważi 2¾ punti perċentwali tal-PDG f’termini kumulattivi bejn l-2009 u l-2012, il-bilanċ strutturali, jiġifieri aġġustat għaċ-ċiklu ekonomiku u nett minn miżuri ta' darba u miżuri temporanji oħrajn, huwa mbassar li jkompli jitjieb b’madwar 1,0 punt perċentwali fl-2013 (għal madwar -½ % tal-PDG) u jmur ftit għall-agħar fl-2014, fuq il-bażi ta' preżunzjoni ta' ebda bidla politika.

—

Il-proporzjon tad-dejn mal-PDG tela’ minn 10,6 punti perċentwali bejn l-2009 u l-2012, għal 127,0 %, anke minħabba l-kontribuzzjoni tal-Italja għal assistenza finanzjarja lill-Istati Membri taż-żona tal-euro. Minħabba li l-kundizzjonijiet ċikliċi jibqgħu negattivi, id-dejn gross tal-gvern huwa mbassar li jiżdied għal 131,4 % tal-PDG fl-2013 u 132,2 % fl-2014 anki minħabba is-saldu ta' 2,5 punti perċentwali tal-PGD tal-arretrati tad-dejn kummerċjali ppjanat matul il-perjodu 2013-14 u kontribuzzjonijiet ulterjuri għal assistenza finanzjarja lill-Istati Membri taż-żona tal-euro.

(6)

Mill-2013, li hija s-sena wara l-korrezzjoni tad-defiċit eċċessiv, l-Italja għandha tipprogressa lejn l-objettiv baġitarju tagħha fuq perjodu ta’ żmien medju b’pass xieraq, anke bir-rispett tal-valur referenzjarju fir-rigward tal-infiq, u tagħmel progress suffiċjenti lejn konformità mal-kriterju tad-dejn f’konformità mal-Artikolu 2(1a) tar-Regolament (KE) 1467/97.

(7)

F’konformità mal-Artikolu 126(12) tat-TFUE, Deċiżjoni tal-Kunsill dwar l-eżistenza ta’ defiċit eċċessiv għandha tiġi revokata meta d-defiċit eċċessiv tal-Istat Membru konċernat, fil-fehma tal-Kunsill ikun ġie kkorreġut.

(8)

Fil-fehma tal-Kunsill, id-defiċit eċċessiv fl-Italja ġie kkorreġut u d-Deċiżjoni 2010/286/KE għandha għalhekk tiġi revokata,

ADOTTA DIN ID-DEĊIŻJONI:

Artikolu 1

Minn valutazzjoni kumplessiva jirriżulta li s-sitwazzjoni ta’ defiċit eċċessiv fl-Italja ġiet ikkorreġġuta.

Artikolu 2

Id-Deċiżjoni 2010/286/UE hija b’dan revokata.

Artikolu 3

Din id-Deċiżjoni hija indirizzata lir-Repubblika Taljana.

Magħmul fil-Lussemburgu, il-21 ta’ Ġunju 2013.

Għall-Kunsill

Il-President

M. NOONAN

(1)  ĠU L 125, 21.5.2010, p. 40.

(2)  Konsegwentement għad-Deċiżjoni 2010/286/UE, id-defiċit u d-dejn tal-amministrazzjoni pubblika għall-2009 ġew riveduti għal 5,5 % tal-PDG u 116,4 % tal-PDG rispettivament.

(3)  ĠU L 209, 2.8.1997, p. 6.

(4)  ĠU L 145, 10.6.2009, p. 1.

Top