5.6.2007

MT

Il-Ġurnal Uffiċjali ta’ l-Unjoni Ewropea

660

---

DEĊIŻJONI TAL-KUMMISSJONI

tat-30 ta' Novembru 2006

li tapprova l-programmi għall-qerda u s-sorveljanza ta' mard ta' l-annimali, ta' ċerti TSEs, u għall-prevenzjoni taż-żoonożi ppreżentati mill-Bulgarija u r-Rumanija għas-sena 2007 u li temenda d-Deċiżjoni 2006/687/KE

(innotifikata taħt dokument numru C(2006) 5702)

(2006/876/KE)

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat it-Trattat ta' l-Adeżjoni tal-Bulgarija u r-Rumanija, u partikolarment l-Artikolu 4(3) tiegħu,

Wara li kkunsidrat l-Att ta' Adeżjoni tal-Bulgarija u r-Rumanija, u partikolarment l-Artikolu 42 tiegħu,

Wara li kkunsidrat id-Deċiżjoni tal-Kunsill 90/424/KEE tas-26 ta' Ġunju 1990 dwar in-nefqa fil-kamp veterinarju (1), u b'mod partikolari l-Artikolu 24(5) u (6) u l-Artikoli 29 u 32 tagħha,

Billi:

(1)	Id-Deċiżjoni tal-Kunsill 90/424/KEE tipprovdi għall-possibiltà ta' kontribuzzjoni finanzjarja mill-Komunità għall-qerda u s-sorveljanza tal-mard ta' l-annimali u għal kontrolli bil-għan li jipprevenu ż-żoonożi.

(2)

Ir-Regolament (KE) Nru 999/2001 tal-Parlament Ewropew u tal-Kunsill tat-22 ta' Mejju 2001 li jistipola regoli għall-prevenzjoni, il-kontroll u l-qerda ta' ċerti enċefalopatiji sponġiformi trażmissibbli (2), jistipula programmi annwali għall-qerda u s-sorveljanza ta' enċefalopatiji sponġiformi trażmissibbli (TSEs (transmissible spongiform encephalopathies)) fl-annimali bovini, ovini u kaprini.

(3)	Minħabba fl-Adeżjoni tal-Bulgarija u r-Rumanija, huwa xieraq li tiġi stabbilita l-kontribuzzjoni finanzjarja mill-Komunità għal programmi għall-qerda u s-sorveljanza tal-mard ta' l-annimali u ta' ċerti TSEs ippreżentati mill-Bulgarija u r-Rumanija għas-sena 2007.

(4)	Il-Bulgarija u r-Rumanija issottomettew programmi għall-qerda u s-sorveljanza ta' ċertu mard ta' l-annimali, għall-prevenzjoni taż-żoonożi u għall-qerda u s-sorveljanza ta' TSEs fit-territorji tagħhom.

(5)

Wara eżaminazzjoni ta' dawk il-programmi huma nstabu konformi mal-leġislazzjoni veterinarja Komunitarja rilevanti u b'mod partikolari mal-kriterji tal-Komunità relatati mal-qerda ta' dan il-mard, fi qbil mad-Deċiżjoni tal-Kunsill 90/638/KEE tas-27 ta' Novembru 1990 li tistipola kriterji tal-Komunità għall-qerda u s-sorveljanza ta' ċertu mard ta' l-annimali (3).

(6)

Minħabba l-importanza ta' dawn il-programmi għall-kisba ta' l-għanijiet tal-Komunità fil-qasam tas-saħħa ta' l-annimali u s-saħħa pubblika, kif ukoll l-applikazzjoni obbligatorja fl-Istati Membri kollha fil-każ tal-programmi tat-TSE, huwa xieraq li tiġi ffissata r-rata adattata tal-kontribuzzjoni finanzjarja mill-Komunità sabiex trodd lura n-nefqa li se jidħlu għaliha l-Bulgarija u r-Rumanija għall-miżuri msemmija f'din id-Deċiżjoni sa ammont massimu għal kull programm.

(7)

Il-preżenza ta' deni klassiku tal-majjal fl-irziezet tal-ħnieżer fir-Rumanija hija sfida partikolarment serja għall-irziezet tal-ħnieżer fil-bqija tal-Komunità. Għalhekk ir-rata ta' kontribuzzjoni tal-Komunità għax-xiri ta' vaċċini għat-tilqim tal-ħnieżer bit-tilqim ħaj imdgħajjef għandha tiġi stabbilita għal rata ta' 100 % ta' l-ispejjeż.

(8)

Għar-raġunijiet ta' tmexxija aħjar, għal użu aktar effiċjenti tal-finanzi Komunitarji u għat-trasparenza mtejba huwa wkoll meħtieġ li jiġu ffissati, għal kull programm, fejn xieraq, ammonti massimi li għandhom jinraddu lura lill-Bulgarija u lir-Rumanija għal ċerti spejjeż ta' oġġetti bħalma huma testijiet, vaċċini u kumpens lis-sidien għat-telf tagħhom minħabba fil-qtil jew it-tbiċċir ta' l-annimali.

(9)

Taħt ir-Regolament tal-Kunsill (KE) Nru 1290/2005 tal-21 ta' Ġunju 2005 dwar il-finanzjament tal-politika agrikola komuni (4), il-programmi għall-qerda u s-sorveljanza tal-mard ta' l-annimali għandhom ikunu ffinanzjati taħt il-Fond Agrikolu Ewropew ta' Garanzija. Għal raġunijiet ta' kontroll finanzjarju, għandhom japplikaw l-Artikoli 9, 36 u 37 ta' dan ir-Regolament.

(10)	Il-kontribuzzjoni finanzjarja mill-Komunità għandha tiġi mogħtija soġġetta għall-kundizzjoni li l-azzjonijiet pjanati jitwettqu b'mod effiċjenti u li l-awtoritajiet kompetenti jfornu l-informazzjoni kollha meħtieġa fil-limiti taż-żmien stabbiliti f'din id-Deċiżjoni.

(11)	Skond ir-Regolament tal-Kunsill (KE) Nru 1290/2005, ir-rata ta' konverżjoni għan-nefqa għandha tkun ir-rata l-aktar reċenti stabbilita mill-Bank Ċentrali Ewropew qabel l-ewwel jum tax-xahar li fih l-applikazzjoni titressaq mill-Bulgarija jew mir-Rumanija u n-nefqa għandha tingħata f'euro.

(12)	L-approvazzjoni ta' uħud mill-programmi ma għandhiex tippreġudika deċiżjoni tal-Kummissjoni dwar regoli għall-qerda ta' dak il-mard imsejsa fuq parir xjentifiku.

(13)

Il-lista ta' programmi fid-Deċiżjoni tal-Kummissjoni 2006/687/KE tat-12 ta' Ottubru 2006 dwar programmi li jikkwalifikaw għal kontribuzzjoni finanzjarja tal-Komunità fl-2007 għall-qerda u s-sorveljanza ta' ċertu mard ta' l-annimali, għall-prevenzjoni taż-żoonożi, għas-sorveljanza ta' TSEs kif ukoll għal programmi għall-qerda tal-BSE u l-iscrapie (5) għandha tiġi emendata biex tinkludi l-Bulgarija u r-Rumanija.

(14)	Il-miżuri pprovduti f'din id-Deċiżjoni huma konformi ma' l-opinjoni tal-Kumitat Permanenti dwar il-Katina Alimentari u Saħħa ta' l-Annimali,

ADOTTAT DIN ID-DEĊIŻJONI:

KAPITOLU I

IR-RABBJA

Artikolu 1

1.   Il-programmi għall-qerda tar-rabbja ppreżentati mill-Bulgarija u mir-Rumanija huma hawnhekk approvati għall-perjodu mill-1 ta' Jannar 2007 sal-31 ta' Diċembru 2007.

2.   Il-kontribuzzjoni finanzjarja mill-Komunità għandha tkun bir-rata ta' 50 % ta' l-ispiża msemmija fil-paragrafu 1 li se jidħol għaliha kull Stat Membru għall-ispiża tat-testijiet tal-laboratorju u għax-xiri u t-tqassim tal-vaċċin flimkien ma' lixki għall-programmi u din m'għandhiex taqbeż:

(a)	l-EUR 830 000 għall-Bulgarija;

(b)	l-EUR 800 000 għar-Rumanija.

3.   L-ammonti massimi ta' l-ispejjeż li għandhom jinraddu lura lill-Istati Membri għall-programmi msemmija fil-paragrafu 1 m'għandhomx jaqbżu l-EUR 0.5 għal kull doża għax-xiri ta' doża waħda ta' vaċċin għall-progammi msemmija fil-paragrafu 2.

KAPITOLU II

ID-DENI KLASSIKU TAL-MAJJAL

Artikolu 2

1.   Il-programmi għall-kontroll u s-sorveljanza tal-marda tad-deni klassiku tal-majjal ippreżentati mill-Bulgarija u r-Rumanija huma hawnhekk approvati għall-perjodu mill-1 ta' Jannar 2007 sal-31 ta' Diċembru 2007.

2.   Il-kontribuzzjoni finanzjarja mill-Komunità għandha tkun bir-rata ta' 50 % ta' l-ispejjeż imsemmija fil-paragrafu 1 li se jidħol għalihom kull Stat Membru għall-ispiża ta' testijiet viroloġiċi u seroloġiċi ta' ħnieżer domestiċi u ta' ċingjali u għat-tilqim ta' ċingjali, ix-xiri u t-tqassim ta' vaċċini flimkien ma' lixki kif ukoll għat-tilqim tal-ħnieżer domestiċi filwaqt li l-kontribuzzjoni finanzjarja mill-Komunità għandha tkun bir-rata ta' 100 % ta' l-ispejjeż li se tidħol għalihom ir-Rumanija għax-xiri ta' vaċċin u għat-tilqim tal-ħnieżer domestiċi bil-vaċċin ħaj imdgħajjef u din m'għandhiex taqbeż:

(a)	l-EUR 425 000 għall-Bulgarija;

(b)	l-EUR 5 250 000 għar-Rumanija.

3.   L-ammonti massimi ta' spejjeż li għandhom jinraddu lura għall-programmi msemmija fil-paragrafu 1 m'għandhomx jaqbżu:

(a) għal test ELISA	l-EUR 2.5 għal kull test;
(b) għax-xiri ta' doża waħda ta' vaċċin għat-tilqim taċ-ċingjali	l-0.5 EUR għal kull doża;
(ċ) għax-xiri ta' doża waħda ta' vaċċin vaċċin ħaj imdgħajjef għat-tilqim tal-ħnieżer	l-EUR 0.30 għal kull doża.

KAPITOLU III

ĊERTA SALMONELLA ŻOONOTIKA FIT-TJUR GĦAT-TGĦAMMIR

Artikolu 3

1.   Il-programm għall-kontroll tas-salmonella fit-tjur għat-tgħammir ippreżentat mill-Bulgarija u r-Rumanija huwa hawnhekk approvat għall-perjodu mill-1 ta' Jannar 2007 sal-31 ta' Diċembru 2007.

2.   Il-kontribuzzjoni finanzjarja mill-Komunità għandha tkun bir-rata ta' 50 % ta' l-ispejjeż imsemmija fil-paragrafu 1 li se jidħol għalihom kull Stat Membru għall-ispiża tat-testijiet batterjoloġiċi, il-kumpens għas-sidien għat-telf tagħhom minħabba l-qtil ta' l-għasafar u l-qerda tal-bajd u x-xiri ta' dożi ta' vaċċin u m'għandhiex taqbeż:

(a)	l-EUR 508 000 għall-Bulgarija;

(b)	l-EUR 215 000 għar-Rumanija.

3.   L-ammonti massimi ta' spejjeż li għandhom jinraddu lura lill-Bulgarija u lir-Rumanija għall-programmi msemmija fil-paragrafu 1 m'għandhomx jaqbżu:

(a) għal test batterjoloġiku	l-EUR 5,0 għal kull test;
(b) għax-xiri ta' doża waħda ta' vaċċin	l-EUR 0,05 għal kull doża.

4.   L-ispejjeż eliġibbli għall-kumpens għat-telf minħabba l-qtil ta' bhejjem għandu jkun limitat kif stipulat fil-paragrafu 5.

5.   Il-kumpens medju li għandu jinradd lura lill-Istati Membri għandu jiġi kkalkulat fuq il-bażi ta' l-għadd ta' bhejjem maqtula fl-Istat Membru u għat-tjur għat-tgħammir, sa massimu ta' EUR 2.5 għal kull għasfur.

KAPITOLU IV

PROGRAMMI TA' STĦARRIĠ DWAR L-INFLUWENZA TAT-TJUR FIT-TJUR TA' L-IRZIEZET U FIT-TAJR SELVAĠĠ

Artikolu 4

1.   Il-programmi għall-influwenza tat-tjur fit-tjur ta' l-irziezet u fit-tajr selvaġġ ippreżentati mill-Bulgarija u r-Rumanija huma hawnhekk approvati għall-perjodu mill-1 ta' Jannar 2007 sal-31 ta' Diċembru 2007.

2.   Il-kontribuzzjoni finanzjarja mill-Komunità għall-ispiża ta' l-analiżi ta' kampjuni għandha tkun bir-rata ta' 50 % għall-ispejjeż li se jidħlu għalihom kull Stat Membru u din m'għandhiex taqbeż:

(a)	l-EUR 23 000 għall-Bulgarija;

(b)	l-EUR 105 000 għar-Rumanija.

3.   Il-limiti massimi ta' l-infiq li għandhom jintraddu lura lill-Bulgarija u lir-Rumanija għat-testijiet koperti mill-programmi ma jistgħux jaqbżu iċ-ċifri li ġejjin:

(a) għat-test ELISA:	EUR 1 għal kull test;
(b) għall-agar gel immune diffusion test:	EUR 1.2 għal kull test;
(ċ) għat-test HI għall-H5/H7:	EUR 12 għal kull test;
(d) għat-test ta' l-iżolament tal-virus:	EUR 30 għal kull test;
(e) għat-test PCR:	EUR 15 għal kull test.

KAPITOLU V

IS-SORVELJANZA TA' ENĊEFELOPATIJI SPONĠIFORMI TRAŻMISSIBBLI

Artikolu 5

1.   Il-programm għas-sorveljanza ta' enċefelopatiji sponġiformi trażmissibbli (TSEs) mressaq mir-Rumanija huwa hawnhekk approvat għall-perjodu mill-1 ta' Jannar 2007 sal-31 ta' Diċembru 2007.

2.   Il-kontribuzzjoni finanzjarja mill-Komunità se tkun bir-rata ta' 100 % ta' l-ispejjeż li se tidħol għalihom ir-Rumanija imsemmija fil-paragrafu 1 għall-implimentazzjoni ta' dan il-programm u m'għandhiex taqbeż iż-2 370 000 EUR.

3.   Il-kontribuzzjoni finanzjarja mill-Komunità tal-programm imsemmi fil-paragrafi 1 għandha tkun għat-testijiet imwettqa u l-ammont massimu m' għandux jaqbeż:

(a)	l-EUR 6 għal kull test, għat-testijiet imwettqa fl-annimali bovini msemmija fl-Annex III għar-Regolament (KE) Nru 999/2001;

(b)	l-EUR 30 għal kull test, għat-testijiet imwettqa fl-annimali ovini u kaprini msemmija fl-Annex III għar-Regolament (KE) Nru 999/2001;

(ċ)	l-EUR 50 għal kull test, għat-testijiet imwettqa fiċ-ċriev imsemmija fl-Annex III għar-Regolament (KE) Nru 999/2001;

(d)	l-EUR 145 għal kull test, għal testijiet primarji molekolari diskriminatorji mwettqa kif imsemmi fl-Annex X, il-Kapitolu C, il-punt 3.2(c)(i) għar-Regolament (KE) Nru 999/2001.

KAPITOLU VI

IL-QERDA TA' L-ISCRAPIE

Artikolu 6

1.   Il-programm għall-eradikazzjoni ta' l-iscrapie ppreżentat mir-Rumanija huwa hawnhekk approvat għall-perjodu mill-1 ta' Jannar 2007 sal-31 ta' Diċembru 2007.

2.   Il-kontribuzzjoni finanzjarja mill-Komunità għall-programm imsemmi fil-paragrafu 1 għandha tkun bir-rata ta' 50 % ta' l-ispiża mħallsa mir-Rumanija għall-kumpens tas-sidien għall-valur tal-bhejjem tagħhom maqtula jew meqruda skond il-programm ta' qerda tagħhom, sa massimu ta' EUR 100 għal kull bhima u b'rata ta' 50 % ta' l-ispejjeż għall-genotyping, sa massimu ta' EUR 10 għal kull test ta' genotyping u din m'għandhiex taqbeż id-980 000 EUR.

KAPITOLU VII

DISPOŻIZZJONIJIET ĠENERALI U FINALI

Artikolu 7

In-nefqa ppreżentata mill-Bulgarija u mir-Rumanija għal kontribuzzjoni finanzjarja mill-Komunità għandha tingħata f'euro u għandha teskludi t-taxxa fuq il-valur miżjud u taxxi oħra.

Artikolu 8

Ir-rata ta' konverżjoni għan-nefqa għandha tkun ir-rata l-aktar reċenti stabbilita mill-Bank Ċentrali Ewropew qabel l-ewwel jum tax-xahar li fih l-applikazzjoni titressaq mill-Bulgarija jew mir-Rumanija.

Artikolu 9

1.   Il-kontribuzzjoni finanzjarja mill-Komunità għall-programmi msemmija fl-Artikoli 1 sa 6 se tingħata sakemm il-Bulgarija u r-Rumanija jimplimentaw il-programmi skond id-dispożizzjonijiet rilevanti tal-liġi Komunitarja, inklużi r-regoli dwar il-kompetizzjoni u l-għoti ta' kuntratti pubbliċi, u soġġetta għall-kundizzjonijiet provduti fil-punti (a) sa (f):

(a)	li jġibu fis-seħħ sa l-1 ta' Jannar 2007 il-liġijiet, regolamenti u dispożizzjonijiet amministrattivi mill-Istat Membru konċernat għall-implimentazzjoni tal-programm;

(b)	li jippreżentaw mhux iktar tard mill-1 ta' Ġunju 2007, l-evalwazzjoni teknika u finanzjarja preliminari tal-programm, skond l-Artikolu 24(7) tad-Deċiżjoni 90/424/KEE;

(ċ)	li jressqu rapport intermedju, għal programmi msemmija fl-Artikoli 1 sa 3, li jkopri l-ewwel sitt xhur tal-programm, mhux aktar tard minn erba' ġimgħat wara l-perjodu ta' implimentazzjoni li hu kopert mir-rapport;

(d)	għall-programmi msemmija fl-Artikolu 4, il-Bulgarija u r-Rumanija għandhom jirrapportaw lill-Kummissjoni ir-riżultati pożittivi u negattivi li nkisbu mill-investigazzjonijiet matul is-sorveljanza tagħhom tat-tjur ta' l-irziezet u t-tajr selvaġġ kull tliet xhur sa tmiem ix-xahar ta' wara.

(e)	għall-programmi msemmija fl-Artikoli 5 u 6, li jippreżentaw rapport kull xahar lill-Kummissjoni dwar il-progress tal-programm ta' sorveljanza tat-TSE u dwar l-ispejjeż imħallsa mir-Rumanija; li r-rapport għandu jitressaq fi żmien erba' ġimgħat wara t-tmiem tax-xahar kopert mir-rapport;

(f)	li jippreżentaw rapport finali mhux aktar tard mill-1 ta' Ġunju 2008, dwar l-eżekuzzjoni teknika tal-programm flimkien ma' evidenza li tiġġustifika l-ispejjeż imġarrba mill-Bulgarija u r-Rumanija u r-riżultati miksuba matul il-perjodu mill-1 ta' Jannar 2007 sal-31 ta' Diċembru 2007;

(g)	id-dettalji ta' l-ispejjeż imġarrba mill-Bulgarija u r-Rumanija kif imsemmija fil-punti (d) u (e) għandhom jingħataw f'għamla skond it-tabella stipulata fl-Annessi I u II;

(h)	implimentazzjoni effiċjenti tal-programm;

(i)	l-ebda kontribuzzjoni oħra Komunitarja ma ntalbet jew m'hi se tiġi mitluba għal dawn il-miżuri.

2.   Fil-każ li l-Istat Membru kkonċernat ma jkunx konformi mal-paragrafu 1, il-Kummissjoni għandha tnaqqas il-kontribuzzjoni finanzjarja mill-Komunità skond in-natura u l-gravità tal-ksur, u t-telf finanzjarju sostnut mill-Komunità.

Artikolu 10

L-Annessi mad-Deċiżjoni 2006/687/KE huma sostitwiti bit-test fl-Anness III ma' din id-Deċiżjoni.

Artikolu 11

Din id-Deċiżjoni għandha tapplika suġġetta għal u mid-data tad-dħul fis-seħħ tat-Trattat ta' Adeżjoni tal-Bulgarija u r-Rumanija.

Artikolu 12

Din id-Deċiżjoni hija indirizzata lill-Istati Membri.

---

(1)  ĠU L 224, 18.8.1990, p. 19. Deċiżjoni kif emendata l-aħħar bid-Deċiżjoni 2006/53 (ĠU L 29, 2.2.2006, p. 37).

(2)  ĠU L 147, 31.5.2001, p. 1. Ir-Regolament kif emendat l-aħħar bir-Regolament tal-Kummissjoni (KE) Nru 1041/2006 (ĠU L 187, 8.7.2006, p. 10).

(3)  ĠU L 347, 12.12.1990, p. 27. Id-Deċiżjoni kif emendata bid-Deċiżjoni 92/65/KEE (ĠU L 268, 14.9.1992, p. 54).

(4)  ĠU L 209, 11.8.2005, p. 1. Ir-Regolament kif emendat l-aħħar bir-Regolament (KE) Nru 320/2006 (ĠU L 58, 28.2.2006, p. 42).

(5)  ĠU L 282, 13.10.2006, p. 52.

---

---

---

---