23.12.2011   

MT

Il-Ġurnal Uffiċjali tal-Unjoni Ewropea

L 343/97

(1)

Skont l-Artikolu 8(5) tar-Regolament (KE) Nru 443/2009, il-Kummissjoni hija meħtieġa li kull sena tikkonferma l-medja tal-emissjonijiet speċifiċi ta’ CO2 u l-mira tal-emissjonijiet speċifiċi għal kull manifattur ta’ karozzi tal-passiġġieri fl-Unjoni kif ukoll għal kull konsorzju ta’ manifatturi ffurmat skont l-Artikolu 7(7) ta’ dak ir-Regolament. Abbażi ta’ dik il-konferma, il-Kummissjoni għandha tiddetermina jekk il-manifatturi u l-konsorzji kkonformawx mar-rekwiżiti tal-Artikolu 4 ta’ dak ir-Regolament. Fejn jidher ċar li manifattur jew konsorzju naqas milli jilħaq il-mira tiegħu ta’ emissjonijiet speċifiċi, il-Kummissjoni hija meħtieġa, skont l-Artikolu 9(1) ta’ dak ir-Regolament, timponi l-ħlas ta’ primjums fuq l-emissjonijiet żejda skont deċiżjonijiet individwali indirizzati lill-manifatturi jew lill-maniġers tal-konsorzji kkonċernati.

(2)

Skont l-Artikolu 4 tar-Regolament (KE) Nru 443/2009, il-miri huma vinkolanti għall-manifatturi u l-konsorzji b’effett mill-2012. Għas-snin kalendarji 2010 u 2011, il-Kummissjoni għandha madankollu tikkalkula miri indikattivi u, skont l-Artikolu 8(6) ta’ dak ir-Regolament, tinnotifika lil dawk il-manifattuir jew konsorzji li l-medja tal-emissjonijet speċifiċi tagħhom taqbeż il-miri indikattivi tagħhom. Peress li dawk il-miri għall-2010 u l-2011 se jservu bħala indikaturi għall-manifatturi tal-isforz meħtieġ biex tintlaħaq il-mira mandatorja fl-2012, huwa xieraq li tiġi ddeterminata l-medja tal-emissjonijiet speċifiċi tal-manifatturi għall-2010 u l-2011 skont ir-rekwiżiti stabbiliti fit-tieni paragrafu tal-Artikolu 4 ta’ dak ir-Regolament u li jitqiesu biss 65 % tal-karozzi li jirrilaxxaw l-anqas emissjonijiet għal kull manifattur.

(3)

Id-dejta li għandha tintuża għall-kalkolu tal-medja tal-emissjonijiet speċifiċi u l-miri tal-emissjonijiet speċifiċi hija stabbilita fil-Parti C tal-Anness II għar-Regolament (KE) Nru 443/2009 u hija bbażata fuq ir-reġistrazzjonijiet tal-Istati Membri ta’ karozzi tal-passiġġieri ġodda matul is-sena kalendarja ta’ qabel. Id-dejta tittieħed miċ-ċertifikati ta’ konformità maħruġa mill-manifatturi jew minn dokumenti li jipprovdu informazzjoni ekwivalenti skont l-Artikolu 3(1) tar-Regolament tal-Kummissjoni (UE) Nru 1014/2010 tal-10 ta’ Novembru 2010 dwar il-monitoraġġ u r-rapportar ta’ dejta fuq ir-reġistrazzjoni ta’ karozzi ġodda tal-passiġġieri skont ir-Regolament (KE) Nru 443/2009 tal-Parlament Ewropew u tal-Kunsill (2).

(4)

Id-dejta għall-2010 ntbagħtet lill-Kummissjoni sal-iskadenza tat-28 ta’ Frar 2011 speċifikata fl-Artikolu 8(2) tar-Regolament (KE) Nru 443/2009 minn maġġoranza tal-Istati Membri. Is-settijiet tad-dejta kompluti għall-Istati Membri kollha, madankollu, kienu finalment għad-disponibbiltà tal-Kummissjoni f’nofs April u sussegwentement ġew ivverifikati provviżorjament.

(5)

Fejn, b’riżultat tal-verifika inizjali, kien evidenti li ċerta dejta kienet nieqsa jew ċarament mhux korretta, il-Kummissjoni kkuntattjat lill-Istati Membri kkonċernati u soġġett għall-qbil ta’ dawk l-Istati Membri, id-dejta ġiet aġġustata jew ikkompletata skont dan. Fejn ma seta’ jintlaħaq l-ebda ftehim ma’ Stat Membru, id-dejta provviżorja ta’ dak l-Istat Membru ma ġietx aġġustata.

(6)

Fid-29 ta’ Ġunju 2011, il-Kummissjoni ppubblikat, skont l-Artikolu 8(4) tar-Regolament (KE) Nru 443/2009, id-dejta provviżorja u nnotifikat lil 89 manifattur dwar il-kalkoli provviżorji tal-medja tal-emissjonijiet speċifiċi tagħhom fl-2010 u tal-miri tal-emissjonijiet speċifiċi tagħhom. Il-manifatturi ntalbu jivverifikaw id-dejta u jinnotifikaw lill-Kummissjoni dwar kwalunkwe żball fi żmien tliet xhur minn meta jkunu rċevew in-notifika skont l-ewwel subparagrafu tal-Artikolu 8(5) ta’ dak ir-Regolament.

(7)

Fit-12 ta’ Awwissu ġew ippubblikati fuq is-sit tal-Internet tal-Kummissjoni linji gwida għan-notifika ta’ żbalji fid-dejta tad-CO2 mill-karozzi. Il-linji gwida jipprovdu format għan-notifika u jindikaw l-informazzjoni meħtieġa mill-manifatturi biex il-Kummissjoni tkun tista’ tqis dawk l-iżbalji.

(8)

Ħmistax-il manifattur issottomettew notifiki ta’ żbalji fi żmien l-iskadenza ta’ tliet xhur. Wieħed mill-manifatturi ssottometta notifika kompluta wara l-iskadenza. Seba’ manifatturi minn dawn il-ħmistax issottomettew notifiki li kienu jinkludu informazzjoni dettaljata dwar l-iżbalji u l-ġustifikazzjonijiet għall-korrezzjonijiet proposti. It-tmien manifatturi li kien baqa’ ssottomettew notifiki fil-qosor li kienu biss parzjalment konformi mar-rakkomandazzjonijiet tal-Kummissjoni fir-rigward ta’ format u kontenut tan-notifiki. Minbarra dawk il-manifatturi li ssottomettew notifiki ta’ żball, tmien manifatturi infurmaw lill-Kummissjoni li kien hemm żbalji fis-settijiet tad-dejta mingħajr ma pprovdew aktar informazzjoni jew evidenza rigward in-natura jew ir-raġunijiet għal dawk l-iżbalji.

(9)

Fil-każ tat-73 manifattur li ma nnotifikaw l-ebda żball fis-settijiet tad-dejta jew infurmaw lill-Kummissjoni biss dwar żbalji fis-settijiet tad-dejta mingħajr ma pprovdew l-evidenza meħtieġa, id-dejta provviżorja u l-kalkoli provviżorji tal-medja tal-emissjonijiet speċifiċi u l-miri tal-emissjonijiet speċifiċi għandhom jiġu kkonfermati mingħajr aġġustamenti.

(10)

Fejn il-manifatturi jkunu pprovdew l-informazzjoni meħtieġa u evidenza li tappoġġa l-eżistenza ta’ żbalji fis-settijiet tad-dejta, il-Kummissjoni għandha tqis dawk in-notifiki u, fejn xieraq, temenda l-kalkoli provviżorji tal-medja tal-emissjonijiet speċifiċi u tal-miri speċifiċi.

(11)

L-awtoritajiet tar-reġistrazzjoni tal-Istati Membri huma l-uniċi responsabbli għall-għadd ta’ reġistrazzjonijiet irrapportati lill-Kummissjoni. Peress li d-dejta dwar il-bejgħ mhux neċessarjament tirrifletti b’mod korrett l-għadd ta’ reġistrazzjonijiet fi Stat Membru partikolari għal perjodu ta’ żmien partikolari, mhuwiex possibbli li jitqiesu żbalji fl-għadd ta’ reġistrazzjonijiet għall-kalkolu tal-medja tal-emissjonijiet speċifiċi. Għalhekk għandhom jitqiesu biss l-iżbalji relatati mal-kontenut tas-settijiet tad-dejta għall-vetturi rreġistrati. Madankollu, f’xi każijiet, il-manifatturi nnotifikaw li r-reġistrazzjonijiet għandhom jiġu attribwiti lil manifattur ieħor. Dawk ir-riattribuzzjonijiet għandhom ikunu riflessi fis-settijiet tad-dejta finali kkonfermati.

(12)

Jirriżulta min-notifiki kompleti li l-manifatturi setgħu jidentifikaw parti mis-settijiet tad-dejta bħala korretti u pproponew korrezzjonijiet lil dawk il-partijiet tas-settijiet tad-dejta li setgħu jiġu vverifikati. Bejn 4 u 15 fil-mija tas-settijiet tad-dejta jikkonsistu, madankollu, minn reġistrazzjonijiet li jirreferu għal vetturi li mhumiex identifikabbli u li l-valuri tagħhom bħal dawk għall-emissjonijiet tad-CO2 jew tal-massa ma jistgħux jiġu vverifikati mill-manifattur. Il-kawża ta’ dan ġeneralment tkun informazzjoni nieqsa li hija meħtieġa sabiex il-manifattur jidentifika l-vetturi individwali, b’mod aktar preċiż il-kodiċi tal-identifikazzjoni li huwa magħmul mit-tip, il-varjant u l-verżjoni tal-vetturi kkonċernati. F’għadd żgħir ta’ każijiet, ir-reġistrazzjonijiet setgħu jiġu attribwiti lill-manifatturi, madankollu, dejta essenzjali dwar l-emissjonijiet tad-CO2 u l-massa ma kinitx disponibbli.

(13)

Il-Kummissjoni vverifikat il-korrezzjonijiet proposti mill-manifatturi u l-evidenza li ssostnihom. Fejn l-entrati ġew ikkoreġuti jew billi ddaħħal valur nieqes jew bis-sostituzzjoni ta’ valur inkorrett għal dawk ir-reġistrazzjonijiet li jistgħu jiġu vverifikati mill-manifattur u l-valuri kkoreġuti huma konsistenti mal-valuri li jirriżultaw mis-sorsi tad-dejta ta’ referenza, bħal pereżempju dejta minn dokumenti ta’ omologazzjoni, tali korrezzjonijiet huma ġġustifikati. Madankollu, fejn manifattur ikun nnotifika żbalji iżda ma jkunx ippropona korrezzjonijiet, minkejja li dawk l-iżbalji setgħu ġew ivverifikati u kkoreġuti u ma jkunx wera b’mod suffiċjenti li dawk il-korrezzjonijiet ma setgħux isiru fi żmien il-perjodu ta’ verifika ta’ tliet xhur, dawk l-iżbalji ma għandhomx jitqiesu għall-kalkolu finali.

(14)

F’każ ta’ reġistrazzjonijiet li jistgħu jiġu attribwiti lil manifatturi, iżda mhux ivverifikati minnhom, il-valuri għall-emissjonijiet u l-massa tad-CO2 inklużi f’dawk ir-reġistrazzjonijiet għandhom xorta waħda jintużaw biex jiġu kkalkulati l-medja tal-emissjonijiet tad-CO2 u l-mira tal-emissjonijiet speċifiċi. Madankollu huwa meħtieġ li jitqies il-fatt li l-manifatturi ma jistgħux jivverifikaw dawk il-valuri u jiżguraw li l-inklużjoni ma jkollhiex impatt negattiv fuq il-valuri finali ddeterminati għall-manifatturi kkonċernati. Skont dan, għandu jiġi applikat marġni ta’ żball lil dak il-kalkolu biex jirrifletti s-sitwazzjoni individwali tal-manifattur kif deskritt u ġġustifikat fin-notifika tal-iżbalji. B’mod aktar preċiż, marġni ta’ żball għandu jiġi kkalkulat għall-medja tal-emissjonijiet speċifiċi u l-medja tal-massa, peress li dawn iż-żewġ parametri jiddeterminaw id-distanza ta’ kull manifattur mill-mira tiegħu tal-emissjonijiet speċifiċi, jiġifieri kemm il-manifattur huwa qrib li jilħaq il-mira tiegħu għall-emissjonijiet speċifiċi.

(15)

Il-marġni ta’ żball għandu jiġi ddeterminat bħala d-differenza bejn id-distanzi għall-mira tal-emissjonijiet speċifiċi espressi bħala l-medja tal-emissjonijiet imnaqqsa mill-miri tal-emissjonijiet speċifiċi kkalkulati inklużi u esklużi dawk ir-reġistrazzjonijiet li ma jistgħux jiġu vverifikati mill-manifatturi. Kemm jekk id-differenza tkun pożittiva kif ukoll jekk tkun negattiva l-marġni ta’ żball għandu dejjem inaqqas id-distanza għall-mira tal-manifattur.

(16)

F’każ ta’ reġistrazzjonijiet fejn il-valuri dwar l-emissjonijiet jew il-massa tad-CO2 kif ukoll il-kodiċi tal-identifikazzjoni jkunu neqsin, dawk ir-reġistrazzjonijiet ma għandhomx jitqiesu għall-kalkolu finali tal-medja tal-emissjonijiet.

(17)

Peress li l-eżerċizzju tal-verifika tad-dejta tal-2010 huwa l-ewwel wieħed li twettaq skont ir-Regolament (KE) Nru 443/2009, huwa xieraq li b’mod eċċezzjonali jitqiesu wkoll dawk in-notifiki li ma nkludewx l-informazzjoni kollha meħtieġa mill-Kummissjoni biex tqis b’mod sħiħ l-iżbalji.Il-marġnijiet ta’ żball li għandhom jiġu applikati lill-kalkoli finali msemmija f’dawk in-notifiki madankollu għandhom jiġu kkalkulati abbażi tal-valutazzjoni stess tal-Kummissjoni tal-għadd ta’ reġistrazzjonijiet li ma jistgħux jiġu vverifikati minn dawk il-manifatturi. Huwa xieraq ukoll, b’mod eċċezzjonali, li titqies, għall-konferma tad-dejta tal-2010, in-notifika tal-iżbalji li ġiet sottomessa ftit wara l-iskadenza.

(18)

Il-medja tal-emissjonijiet speċifiċi tad-CO2 mill-karozzi tal-passiġġieri ġodda rreġistrati fl-2010, il-miri tal-emissjonijiet speċifiċi u d-differenza bejn dawk iż-żewġ valuri għandhom jiġu kkonfermati skont dan,

(a)

il-mira għall-emissjonijiet speċifiċi;

(b)

il-medja tal-emissjonijiet speċifiċi tad-CO2, fejn xieraq aġġustati bil-marġni ta’ żball rilevanti;

(c)

id-differenza bejn il-valuri msemmija fil-punti (a) u (b);

(d)

il-medja tal-emissjonijiet speċifiċi tad-CO2 għall-karozzi tal-passiġġieri ġodda kollha;

(e)

il-medja tal-massa għall-karozzi tal-passiġġieri ġodda kollha fl-Unjoni.