DEĊIŻJONI TAL-KUMITAT PERMANENTI TAL-ISTATI TAL-EFTA

Nru 2/2015/SC

tal-24 ta' Settembru 2015

li tistabbilixxi Kumitat Interim għall-Mekkaniżmu Finanzjarju taż-ŻEE 2014–2021 [2015/2024]

IL-KUMITAT PERMANENTI TAL-ISTATI TAL-EFTA,

Wara li kkunsidra l-Ftehim dwar iż-Żona Ekonomika Ewropea, minn hawn 'il quddiem imsejjaħ bħala l-Ftehim ŻEE,

Wara li kkunsidra l-ftehim li għandu jiġi konkluż li jistabbilixxi Mekkaniżmu Finanzjarju ġdid taż-ŻEE għall-perjodu 2014–2021,

Wara li kkunsidra l-ftehim li għandu jiġi konkluż bejn ir-Renju tan-Norveġja u l-Unjoni Ewropea biex ikun stabbilit Mekkaniżmu Finanzjarju tan-Norveġja għall-perjodu 2014–2021,

IDDEĊIEDA KIF ĠEJ:

Artikolu 1

1.   Kumitat Interim għall-Mekkaniżmu Finanzjarju taż-ŻEE 2014–2021, minn hawn 'il quddiem imsejjaħ il-Kumitat Interim, li għandu jibda' jopera mill-aktar fis, huwa b'dan stabbilit.

2.   Il-Kumitat Interim għandu jassisti lill-Istati tal-EFTA fit-tħejjija għall-implimentazzjoni tal-Mekkaniżmu Finanzjarju taż-ŻEE għall-2014–2021.

3.   Il-Kumitat Interim għandu jirrapporta lill-Kumitat Permanenti.

4.   Il-Kumitat Interim jista' jiġi assistit mill-Missjonijiet tal-Istati tal-EFTA u ż-ŻEE għall-UE.

5.   Il-Kumitat Interim għandu, dakinhar tad-dħul fis-seħħ tiegħu jew dakinhar tal-applikazzjoni proviżorja tal-ftehim li jistabbilixxi l-Mekkaniżmu Finanzjarju taż-ŻEE 2014–2021, jiġi ssostitwit minn Kumitat għall-Mekkaniżmu Finanzjarju taż-ŻEE 2014–2021.

6.   Il-Kumitat Interim għandu jiddiskuti u jivvaluta l-koordinazzjoni possibbli bejn il-Mekkaniżmu Finanzjarju taż-ŻEE u l-Mekkaniżmu Finanzjarju Norveġiż.

7.   Il-Kumitat Interim għandu bi qbil jagħżel President li għandu jkun ikkonfermat mill-Kumitat Permanenti.

Artikolu 2

Din id-Deċiżjoni jkollha effett immedjat.

Artikolu 3

Din id-Deċiżjoni għandha tiġi ppubblikata fit-Taqsima taż-ŻEE u fis-Suppliment taż-ŻEE ta' Il-Ġurnal Uffiċjali tal-Unjoni Ewropea.