Rikors ippreżentat fis-16 ta’ Ġunju 2009 — Kalliópi Nikoláou vs Il-Qorti tal-Awdituri

(Kawża T-241/09)

2009/C 205/76

Lingwa tal-kawża: Il-Grieg

Partijiet

Rikorrent: Kalliópi Nikoláou (Ateni) (rappreżentant: V. Christianós)

Konvenut: Il-Qorti tal-Awdituri

Talbiet tar-rikorrent

Motivi u argumenti prinċipali

Ir-rikorrenti ssostni li l-Qorti tal-Awdituri, b’mod flagranti, kisret kemm id-dispożizzjonijiet speċifiċi li jagħtu drittijiet lill-individwi kif ukoll drittijiet fundamentali, li hija għandha l-obbligu li tirrispetta fit-twettiq tal-kompetenzi tagħha.

L-ewwel nett, ir-rikorrenti ssostni li l-Qorti tal-Awdituri, b’mod flagranti, kisret l-Artikolu 4 tar-Regolament (KE) Nru 45/2001 (1) u l-Artikolu 2 tad-Deċiżjoni tal-Qorti tal-Awdituri 99/50 u li naqset mill-obbligu ta’ assistenza tagħha, minħabba li hija ppermettiet li terzi jsiru jafu b’akkużi magħmulin fil-konfront ta’ K. Nikoláou qabel ma nfetħet investigazzjoni uffiċjali. Skont ir-rikorrenti, il-Qorti tal-Awdituri m’għamlet xejn sabiex timpedixxi li dawn l-akkużi jinxterdu u, iktar minn hekk, sussegwentement hija fl-ebda mument ma pproċediet sabiex terġa’ tivverifika dawn l-akkużi u tirtirhom, minkejja li r-rikorrenti batiet dannu morali gravi b’riżultat ta’ dan.

It-tieni nett, meta hija bdiet l-investigazzjoni fil-konfront tar-rikorrenti, il-Qorti tal-Awdituri, b’mod flagranti, kisret l-Artikoli 2 u 4 tad-Deċiżjoni 99/50, id-dritt tad-difiża tar-rikorrenti u l-prinċipju ta’ imparzjalità ta’ investigazzjoni, flimkien mal-prinċipju ta’ amministrazzjoni tajba. Dan l-aġir kellu l-konsegwenza li jikkawża mhux biss dannu morali lir-rikorrenti iżda wkoll dannu materjali gravi, peress li, abbażi tal-informazzjoni tal-investigazzjoni, r-rikorrenti ġiet irrinvijata quddiem l-awtoritajiet ġudizzjarji Lussemburgiżi u kellha ssostni spejjeż għoljin.

It-tielet nett, il-Qorti tal-Awdituri, b’mod flagranti, kisret l-obbligu tagħha ta’ assistenza u l-prinċipju ta’ amministrazzjoni tajba, minħabba li hija ma bagħtitx l-informazzjoni li hija kellha u li kienet ta’ importanza determinanti sabiex ir-rikorrenti tiġi skolpata mill-akkużi mressqa kontriha lill-awtoritajiet ġudizzjarji Lussemburgiżi. Ir-rikorrenti ssostni, sussegwentement, li din l-informazzjoni kienet tikkonċerna l-kwistjoni tal-leave tal-persunal tal-Qorti tal-Awdituri u, li tali informazzjoni, kieku intbagħtet mill-Qorti tal-Awdituri, kienet tipprekludi li r-rikorrenti tiġi msejħa quddiem il-maġistrati inkwirenti u quddiem il-qorti kriminali Lussemburgiża u din kienet twassal sabiex jiġu rripristinati l-unur u r-reputazzjoni tagħha.

Ir-raba’ nett, ir-rikorrenti ssostni li l-Qorti tal-Awdituri, b’mod flagranti, kisret il-prinċipju ta’ imparzjalità u ta’ amministrazzjoni tajba meta tat deċiżjoni dwar ir-rinviju tal-kawża tar-rikorrenti quddiem il-qorti. Dan l-aġir ikkawża dannu morali saħansitra ikbar lir-rikorrenti.

Il-ħanes nett, skont id-dikjarazzjonijiet tar-rikorrenti, il-Qorti tal-Awdituri, b’mod flagranti, naqset milli twettaq l-obbligu tagħha ta’ assistenza billi ma adottatx deċiżjoni li tiskolpaha uffiċjalment u billi naqset milli tirripristina l-unur tagħha wara li din ġiet skolpata. Dan in-nuqqas kellu bħala konsegwenza li baqgħu dubji dwar l-innoċenza ta’ K. Nikoláou u kkawżala dannu morali addizzjonali.

(1)  Regolament (KE) Nru 45/2001 tal-Parlament Ewropew u tal-Kunsill tat-18 ta’ Diċembru 2000 dwar il-protezzjoni ta’ individwu fir-rigward tal-ipproċessar ta’ data personali mill-istituzzjonijiet u l-korpi tal-Komunità u dwar il-movement liberu ta’ dak id-data