(1)

Ir-Regolament (KE) Nru 1831/2003 jistipula l-awtorizzazzjoni tal-addittivi għall-użu fin-nutrizzjoni tal-annimali u r-raġunijiet u l-proċeduri għall-għoti ta' din l-awtorizzazzjoni. L-Artikolu 10 ta' dak ir-Regolament jistipula l-valutazzjoni mill-ġdid ta' addittivi awtorizzati skont id-Direttiva tal-Kunsill 70/524/KEE (2).

(2)

4-allil-2,6-dimetossifenol u l-aċetat tal-ewġenil kienu ġew awtorizzati mingħajr limitu ta' żmien bħala addittivi tal-għalf għall-ispeċijiet kollha tal-annimali skont id-Direttiva 70/524/KEE. Dawk il-prodotti mbagħad iddaħħlu fir-Reġistru tal-addittivi tal-għalf bħala prodotti eżistenti, skont l-Artikolu 10(1) tar-Regolament (KE) Nru 1831/2003. 4-allil-2,6-dimetossifenol u l-aċetat tal-ewġenil għat-tjur u l-ħut mhux se jiġu awtorizzati mill-ġdid minħabba li ġew irtirati mill-applikant.

(3)

F'konformità mal-Artikolu 10(2) tar-Regolament (KE) Nru 1831/2003, flimkien mal-Artikolu 7 tiegħu, ġiet ippreżentata applikazzjoni għall-valutazzjoni mill-ġdid ta' 4-allil-2,6-dimetossifenol u tal-aċetat tal-ewġenil bħala addittivi tal-għalf għall-ispeċijiet kollha tal-annimali. L-applikant talab li dawk l-addittivi jiġu kklassifikati fil-kategorija “addittivi sensorjali”. Ma' din l-applikazzjoni ntbagħtu wkoll id-dettalji u d-dokumenti meħtieġa skont l-Artikolu 7(3) tar-Regolament (KE) Nru 1831/2003.

(4)

Fl-opinjoni tagħha tal-15 ta' Novembru 2011 (3), l-Awtorità Ewropea dwar is-Sigurtà fl-Ikel (“l-Awtorità”) ikkonkludiet li fil-kundizzjonijiet tal-użu fl-għalf li ġew proposti, 4-allil-2,6-dimetossifenol u l-aċetat tal-ewġenil ma jħallux effetti negattivi fuq is-saħħa tal-annimali u tal-bniedem jew fuq l-ambjent. L-Awtorità kkonkludiet ukoll li l-funzjoni ta' 4-allil-2,6-dimetossifenol u l-aċetat tal-ewġenil fl-għalf hija simili għal dik fl-ikel. L-Awtorità diġà kkonkludiet li għall-ikel, dawk is-sustanzi huma effikaċji, billi jżidu r-riħa u l-palat tal-ikel. Għalhekk, dik il-konklużjoni tista' tiġi estrapolata għall-għalf. L-Awtorità mhijiex f'pożizzjoni li tevalwa l-użu ta' 4-allil-2,6-dimetossifenol u tal-aċetat tal-ewġenil fl-ilma għax-xorb. Madankollu, dawk is-sustanzi jistgħu jintużaw f'għalf kompost li sussegwentement jiġi amministrat permezz tal-ilma.

(5)

Għandhom jiġu stipulati restrizzjonijiet u kundizzjonijiet sabiex ikun hemm kontroll aħjar. Peress li r-raġunijiet ta' sikurezza ma jitolbux l-iffissar ta' kontenut massimu u b'kont meħud tal-valutazzjoni mill-ġdid imwettqa mill-Awtorità, fuq it-tikketta tal-addittiv għandhom jiġu indikati l-kontenuti rakkomandati. Fejn tali kontenuti jinqabżu, fuq it-tikketta ta' taħlitiet lesti minn qabel, ta' għalf kompost u ta' materjali tal-għalf għandha tiġi indikata ċerta informazzjoni.

(6)

L-Awtorità kkonkludiet li 4-allil-2,6-dimetossifenol huwa irritanti għall-għajnejn u għall-ġilda u li l-aċetat tal-ewġenil huwa irritanti għall-ġilda biss. Konsegwentement, għandhom jittieħdu miżuri protettivi xierqa. L-Awtorità tqis li ma hemmx bżonn ta' rekwiżiti speċifiċi għall-monitoraġġ wara l-kummerċjalizzazzjoni. Hija vverifikat ukoll ir-rapport dwar il-metodu ta' analiżi tal-addittivi tal-għalf fl-għalf li ressaq il-Laboratorju ta' Referenza mwaqqaf bir-Regolament (KE) Nru 1831/2003.

(7)

Il-valutazzjoni ta' 4-allil-2,6-dimetossifenol u tal-aċetat tal-ewġenil turi li l-kundizzjonijiet għall-awtorizzazzjoni, kif stipulati fl-Artikolu 5 tar-Regolament (KE) Nru 1831/2003, huma ssodisfati. Għaldaqstant, l-użu ta' dawk is-sustanzi għandu jiġi awtorizzat kif speċifikat fl-Anness ta' dan ir-Regolament.

(8)

Minħabba li r-raġunijiet ta' sigurtà ma jeħtiġux l-applikazzjoni immedjata tal-modifiki fil-kundizzjonijiet ta' awtorizzazzjoni għal 4-allil-2,6-dimetossifenol u l-aċetat tal-ewġenil, jixraq li jingħata perjodu tranżitorju biex il-partijiet interessati jħejju lilhom infushom biex jissodisfaw ir-rekwiżiti l-ġodda li jirriżultaw mill-awtorizzazzjoni.

(9)

Il-miżuri stipulati f'dan ir-Regolament huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,