Access to European Union law
<a href="https://eur-lex.europa.eu/content/help/eurlex-content/experimental-features.html" target="_blank">More about the experimental features corner</a>
Choose the experimental features you want to try
EUR-Lex
Access to European Union law

This document is an excerpt from the EUR-Lex website

You are here
Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search

Document 32021R1703

Regolament Delegat tal-Kummissjoni (UE) 2021/1703 tat-13 ta’ Lulju 2021 li jemenda r-Regolament Delegat (UE) 2020/692, fir-rigward tar-rekwiżiti tas-saħħa tal-annimali għad-dħul fl-Unjoni ta’ prodotti li joriġinaw mill-annimali li jinsabu fi prodotti komposti (Test b’rilevanza għaż-ŻEE)

C/2021/4298

ĠU L 339, 24.9.2021, p. 29–32 (BG, ES, CS, DA, DE, ET, EL, EN, FR, GA, HR, IT, LV, LT, HU, MT, NL, PL, PT, RO, SK, SL, FI, SV)

Legal status of the document In force

ELI: http://data.europa.eu/eli/reg_del/2021/1703/oj

24.9.2021   

MT

Il-Ġurnal Uffiċjali tal-Unjoni Ewropea

L 339/29

REGOLAMENT DELEGAT TAL-KUMMISSJONI (UE) 2021/1703

tat-13 ta’ Lulju 2021

li jemenda r-Regolament Delegat (UE) 2020/692, fir-rigward tar-rekwiżiti tas-saħħa tal-annimali għad-dħul fl-Unjoni ta’ prodotti li joriġinaw mill-annimali li jinsabu fi prodotti komposti

(Test b’rilevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (UE) 2016/429 tal-Parlament Ewropew u tal-Kunsill tad-9 ta’ Marzu 2016 dwar il-mard trasmissibbli tal-annimali u li jemenda u jħassar ċerti atti fil-qasam tas-saħħa tal-annimali (“Liġi dwar is-Saħħa tal-Annimali”) (1), u partikolarment l-Artikoli 234(2), 237(4) u 239(2) tiegħu,

Billi:

(1)

Ir-Regolament Delegat tal-Kummissjoni (UE) 2020/692 (2) jissupplimenta r-regoli dwar is-saħħa tal-annimali stabbiliti fir-Regolament (UE) 2016/429, fir-rigward tad-dħul fl-Unjoni, u l-moviment u l-immaniġġjar wara d-dħul fl-Unjoni, ta’ konsenji ta’ ċerti annimali, ta’ prodotti ġerminali u ta’ prodotti li joriġinaw mill-annimali. B’mod partikolari, l-Artikoli 162 u 163 tar-Regolament Delegat (UE) 2020/692 jistabbilixxu rekwiżiti speċifiċi għad-dħul fl-Unjoni ta’ prodotti li joriġinaw mill-annimali li jinsabu fi prodotti komposti. L-Artikoli 162 u 163 tar-Regolament Delegat (UE) 2020/692 ma jipprovdux rekwiżiti speċifiċi għall-prodotti bbażati fuq il-kolostru li jinsabu fi prodotti komposti. Għalhekk, jenħtieġ li dan ir-Regolament jiċċara r-rekwiżiti li japplikaw għad-dħul fl-Unjoni ta’ dawk il-prodotti meta jkunu fi prodotti komposti f’konformità mar-regoli applikabbli għad-dħul fl-Unjoni ta’ prodotti bbażati fuq il-kolostru previsti fl-Artikolu 153 tar-Regolament Delegat (UE) 2020/692.

(2)

Il-ġelatina u l-kollaġen jaqgħu fid-definizzjoni ta’ “prodotti tal-laħam” previsti fl-Artikolu 2, il-punt (44), tar-Regolament Delegat (UE) 2020/692 u għalhekk huma biss il-konsenji tal-ġelatina u tal-kollaġen li jikkonformaw mar-rekwiżiti għad-dħul fl-Unjoni ta’ prodotti tal-laħam li huma awtorizzati jidħlu fl-Unjoni. Madankollu, il-ġelatina u l-kollaġen li jinsabu fi prodotti komposti b’data ta’ konservazzjoni twila joħolqu riskju baxx ħafna għas-saħħa tal-annimali minħabba t-trattamenti li jgħaddu minnhom waqt li jiġu pproċessati. Għal din ir-raġuni, jenħtieġ li l-prodotti komposti li fihom biss dawn it-tip ta’ prodotti tal-laħam jiżdiedu mal-lista ta’ prodotti komposti koperti mid-deroga prevista fl-Artikolu 163 tar-Regolament Delegat (UE) 2020/692 u għalhekk ma jintalbux ikunu akkumpanjati minn ċertifikat tas-saħħa tal-annimali, iżda minflok jintalbu biss li jkunu akkumpanjati minn dikjarazzjoni.

(3)

F’konformità mal-Artikolu 163 tar-Regolament Delegat (UE) 2020/692, prodotti komposti b’data ta’ konservazzjoni twila li ma jkunx fihom prodotti tal-laħam għandhom ikunu akkumpanjati minn dikjarazzjoni mħejjija u ffirmata minn operatur. Il-prodotti pproċessati li joriġinaw mill-annimali iridu madankollu jkunu soġġetti għal trattament strett għall-mitigazzjoni tar-riskju li jiżgura s-sikurezza mill-perspettiva tas-saħħa tal-annimali. Madankollu, jkun jidher sproporzjonat li jintalbu tali trattamenti stretti għall-mitigazzjoni tar-riskju għall-prodotti tal-ħalib li joriġinaw minn pajjiżi li diġà huma awtorizzati għad-dħul fl-Unjoni ta’ ħalib mhux ipproċessat jew ta’ prodotti tal-ħalib. Għal dawk il-pajjiżi terzi, jenħtieġ li r-rekwiżiti jkunu proporzjonati għar-riskju li jirriżulta mill-pajjiż tal-oriġini u li jitqiesu l-garanziji pprovduti mill-awtoritajiet kompetenti. Għalhekk, jenħtieġ li r-Regolament Delegat (UE) 2020/692 jiġi emendat biex jippermetti d-dħul fl-Unjoni ta’ prodotti b’data ta’ konservazzjoni twila li fihom prodotti tal-ħalib li joriġinaw minn pajjiżi terzi elenkati għad-dħul fl-unjoni ta’ ħalib mhux ipproċessat u prodotti tal-ħalib mhux soġġetti għal trattament għall-mitigazzjoni tar-riskju, mingħajr ma jgħaddu minn trattament speċifiku għall-mitigazzjoni tar-riskju. Barra minn hekk, jenħtieġ li r-Regolament Delegat (UE) 2020/692 jiġi emendat ukoll biex jippermetti d-dħul fl-Unjoni ta’ prodotti komposti b’data ta’ konservazzjoni twila li jkun fihom prodotti tal-ħalib li joriġinaw minn pajjiżi terzi elenkati għad-dħul fl-Unjoni ta’ prodotti tal-ħalib soġġetti għal trattament għall-mitigazzjoni tar-riskju, jekk dawn ikunu għaddew minn trattament għall-mitigazzjoni tar-riskju f’konformità mal-Artikolu 157 tar-Regolament Delegat (UE) 2020/692.

(4)

Il-prodotti tal-ħalib li jkunu għaddew minn trattamenti stretti għall-mitigazzjoni tar-riskju u l-prodotti tal-bajd li jinsabu fil-prodotti komposti b’data ta’ konservazzjoni twila jirrappreżentaw biss riskju limitat, kemm mill-perspettiva tas-saħħa tal-annimali kif ukoll minn dik tas-saħħa pubblika. Għalhekk, jenħtieġ li dawk il-prodotti jitħallew jidħlu fl-Unjoni jekk ikunu ġejjin minn pajjiż terz, territorju jew żona tiegħu li ma jkunx elenkat għad-dħul fl-Unjoni tal-ispeċi partikolari ta’ prodotti li joriġinaw mill-annimali, iżda li jkun elenkat għad-dħul fl-Unjoni ta’ prodotti tal-laħam, prodotti tal-ħalib jew prodotti tal-bajd.

(5)

Sabiex jiġi evitat piż amministrattiv żejjed għad-dħul fl-Unjoni ta’ kunsinni ta’ prodotti komposti li joħolqu riskju baxx għas-saħħa tal-annimali, jenħtieġ li jkun permess li l-operatur responsabbli għad-dħul fl-Unjoni tal-konsenji jiffirma d-dikjarazzjoni msemmija fl-Artikolu 163 tar-Regolament Delegat (UE) 2020/692.

(6)

Ir-regoli previsti fir-Regolament Delegat (UE) 2020/692 jissupplimentaw dawk stabbiliti fir-Regolament (UE) 2016/429. Peress li dawk ir-regoli huma interrelatati, huma stabbiliti flimkien f’att wieħed. Fl-interess taċ-ċarezza u għall-applikazzjoni effettiva tagħhom, jixraq li r-regoli li jemendaw ir-Regolament Delegat (UE) 2020/692 jiġu stabbiliti wkoll f’att delegat wieħed li jipprovdi sett komprensiv ta’ rekwiżiti għad-dħul fl-Unjoni ta’ prodotti li joriġinaw mill-annimali.

(7)

Għalhekk, jenħtieġ li r-Regolament Delegat (UE) 2020/692 jiġi emendat skont dan.

(8)

Billi r-Regolament Delegat (UE) 2020/692 japplika mill-21 ta’ April 2021, fl-interess taċ-ċertezza legali, jenħtieġ li dan ir-Regolament jidħol fis-seħħ b’urġenza,

ADOTTA DAN IR-REGOLAMENT:

Artikolu 1

Ir-Regolament Delegat (UE) 2020/692 huwa emendat kif ġej:

1.

L-Artikolu 162 huwa emendat kif ġej:

(a)

it-titolu huwa sostitwit b’dan li ġej:

“Artikolu 162

Prodotti komposti li fihom prodotti tal-laħam, prodotti tal-ħalib, prodotti bbażati fuq il-kolostru u/jew prodotti tal-bajd”

(b)

il-paragrafu 1 huwa sostitwit b’dan li ġej:

“1.   Il-konsenji tal-prodotti komposti li ġejjin għandhom ikunu awtorizzati jidħlu fl-Unjoni biss jekk il-prodotti komposti tal-konsenji jkunu ġejjin minn pajjiż terz jew minn territorju jew żona tiegħu elenkati għad-dħul fl-Unjoni tal-prodotti speċifiċi ta’ oriġini mill-annimali li jinsab f’dawk il-prodotti komposti:

(a)

prodotti komposti li jkun fihom prodotti tal-laħam;

(b)

prodotti komposti b’data ta’ konservazzjoni twila li jkun fihom prodotti tal-ħalib u/jew tal-bajd

(c)

prodotti komposti li jkun fihom prodotti bbażati fuq il-kolostru.”;

2.

L-Artikolu 163 huwa sostitwit b’dan li ġej:

“L-Artikolu 163

Rekwiżiti speċifiċi għal prodotti komposti b’data ta’ konservazzjoni twila

1.   B’deroga mill-Artikolu 3, il-punt (c)(i), il-konsenji ta’ prodotti komposti li ma fihomx prodotti tal-laħam, għajr il-ġelatina u l-kollaġen, jew prodotti bbażati fuq il-kolostru, u li ġew ittrattati biex ikollhom data ta’ konservazzjoni twila f’temperatura ambjentali, għandhom ikunu awtorizzati jidħlu fl-Unjoni akkumpanjati minn dikjarazzjoni, kif jipprevedi l-paragrafu 2, jekk ikun fihom:

(a)

prodotti tal-ħalib li jikkonformaw ma’ waħda mill-kundizzjonijiet li ġejjin:

(i)

ma jkunux għaddew minn trattament għall-mitigazzjoni tar-riskju previst fl-Anness XXVII, diment li l-prodotti tal-ħalib ikunu nkisbu jew:

—

fl-Unjoni; jew

—

f’pajjiż terz jew territorju jew żona tiegħu elenkati għad-dħul ta’ dawk il-prodotti fl-Unjoni mingħajr ma jsirilhom trattament speċifiku għall-mitigazzjoni tar-riskju, f’konformità mal-Artikolu 156, jekk il-pajjiż terz jew it-territorju jew iż-żona tiegħu fejn ikun immanifatturat il-prodott kompost ikunu elenkati wkoll għad-dħul ta’ dawk il-prodotti fl-Unjoni mingħajr l-obbligu li japplikaw trattament speċifiku għall-mitigazzjoni tar-riskju;

(ii)

ikunu għaddew minn trattament għall-mitigazzjoni tar-riskju previst fil-kolonna A jew B tal-Anness XXVII, rilevanti għall-ispeċi tal-oriġini tal-ħalib, diment li jkunu nkisbu f’pajjiż terz jew f’territorju jew żona tiegħu elenkati għad-dħul fl-Unjoni ta’ prodotti tal-ħalib li jkunu għaddew minn trattament speċifiku għall-mitigazzjoni tar-riskju, f’konformità mal-Artikolu 157, u l-pajjiż terz jew it-territorju jew iż-żona tiegħu fejn il-prodott kompost jiġi prodott, jekk differenti, ikun elenkat ukoll għad-dħul fl-Unjoni ta’ dawk il-prodotti jekk ikunu għaddew minn trattament speċifiku għall-mitigazzjoni tar-riskju;

(iii)

ikunu għaddew minn trattament għall-mitigazzjoni tar-riskju mill-inqas ekwivalenti għal dawk imsemmija fil-kolonna B tal-Anness XXVII, irrispettivament mill-ispeċijiet ta’ oriġini tal-ħalib, jekk il-prodotti tal-ħalib ma jikkonformawx mar-rekwiżiti kollha previsti fil-punti (i) jew (ii) jew ikunu nkisbu f’pajjiż terz, territorju jew żona tiegħu li mhuwiex awtorizzat għad-dħul fl-Unjoni ta’ prodotti tal-ħalib iżda huwa awtorizzat għad-dħul fl-Unjoni ta’ prodotti oħra li joriġinaw mill-annimali f’konformità ma’ dan ir-Regolament;

(b)

prodotti tal-bajd li jkunu għaddew minn trattament għall-mitigazzjoni tar-riskju ekwivalenti għal dawk previsti fl-Anness XXVIII.

2.   Id-dikjarazzjoni msemmija fil-paragrafu 1:

(a)

għandha takkumpanja biss kunsinni ta’ prodotti komposti f’każijiet meta d-destinazzjoni finali tal-prodotti komposti tkun fl-Unjoni;

(b)

għandha tinħareġ mill-operatur responsabbli għad-dħul fl-Unjoni tal-prodotti komposti, li tiċċertifika li l-prodotti komposti fil-kunsinna jikkonformaw mar-rekwiżiti previsti fil-paragrafu 1.

3.   B’deroga mill-Artikolu 3, il-punt (a)(i), il-prodotti tal-ħalib imsemmija fil-paragrafu 1, il-punt (a)(iii), ta’ dan l-Artikolu, u l-prodotti tal-bajd li jinsabu fi prodotti komposti li ġew ittrattati biex ikollhom data ta’ konservazzjoni twila f’temperatura ambjentali għandhom ikunu awtorizzati jidħlu fl-Unjoni jekk ikunu ġejjin minn pajjiż terz, territorju jew żona tiegħu li ma jkunx speċifikament elenkat għad-dħul fl-Unjoni ta’ dawk il-prodotti li joriġinaw mill-annimali iżda jkun elenkat għad-dħul fl-Unjoni ta’ jew:

(a)

prodotti tal-laħam, prodotti tal-ħalib jew prodotti tal-bajd;

jew

(b)

prodotti tal-ħut, f’konformità mar-Regolament (UE) 2017/625.”

Artikolu 2

Ir-referenzi għall-ex Artikolu 163(a) tar-Regolament Delegat (UE) 2020/692 għandhom jinftiehmu bħala referenzi għall-Artikolu 163(1) ta’ dak ir-Regolament Delegat.

Artikolu 3

Dan ir-Regolament għandu jidħol fis-seħħ l-għada tal-jum tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, it-13 ta’ Lulju 2021.

Għall-Kummissjoni

Il-President

Ursula VON DER LEYEN

(1)   ĠU L 84, 31.3.2016, p. 1.

(2)  Ir-Regolament Delegat tal-Kummissjoni (UE) 2020/692 tat-30 ta’ Jannar 2020 li jissupplimenta r-Regolament (UE) 2016/429 tal-Parlament Ewropew u tal-Kunsill fir-rigward tar-regoli għad-dħul fl-Unjoni, u l-moviment u l-immaniġġjar wara d-dħul ta’ konsenji ta’ ċerti annimali, prodotti ġerminali u prodotti li joriġinaw mill-annimali (ĠU L 174, 3.6.2020, p. 379).

Top