28.12.2010   

MT

Il-Ġurnal Uffiċjali tal-Unjoni Ewropea

C 354/85

1.1

Il-KESE jqis li l-kriżi toħloq opportunità urġenti biex tiġi kkonkretizzata riforma sinjifikanti tas-sistema ta' superviżjoni. L-objettivi ta' din ir-riforma għandhom jinkludu l-prevenzjoni, kemm ta' inċidenti iżolati kif ukoll ta' kriżijiet fuq skala akbar, u r-reżistenza għal sitwazzjonijiet bħal dawn. Għal dan, hemm bżonn ta' bażijiet imfissra fil-livell Komunitarju, u fuq interazzjoni bejn sistema Komunitarja u l-ekwivalenti tagħha f’pajjiżi oħra.

1.2

Il-KESE jikkundanna l-fatt li l-armonizzazzjoni imperfetta tal-kondizzjonijiet ta' aċċess għas-swieq kif ukoll tar-rekwiżiti prudenzjali qed tippermetti arbitraġġi regolatorji u toħloq distorsjonijiet fil-kompetizzjoni. L-armonizzazzjoni ta' dawn ir-rekwiżiti fuq il-bażi ta' robustezza, il-kontroll tar-riskji tal-aġenti finanzjarji u l-kwalità tal-informazzjoni lill-pubbliku tikkostitwixxi bażi indispensabbli ta' komunità ta' interessi fi ħdan iż-Żona Ekonomika Ewropea. Flimkien ma' dan kollu għandha tingħata attenzjoni kontinwa lill-kwalifiki tal-kontrolluri b’mod partikolari abbażi ta' kollaborazzjoni reċiproka.

1.3

Għal dawn ir-raġunijiet, il-KESE jappoġġja lill-Kummissjoni fil-ħidmiet tagħha biex tipprovdi lill-awtoritajiet superviżorji tas-settur b’poteri li jippermettulhom ifissru standards tekniċi komuni u jsolvu l-kontroversji bejn l-awtoritajiet nazzjonali. Japprova l-progress fir-relazzjonijiet bejn l-awtoritajiet ta' kontroll lejn metodu konsenswali ta' soluzzjoni ta' kwalunkwe kontroversja fir-rigward tal-prattika tagħhom fl-oqsma li għalihom hemm previsti proċessi konġunti għat-teħid ta' deċiżjonijiet. Jingħaqad mal-Kummissjoni fix-xewqa li ssir distinzjoni ċara bejn il-kwistjonijiet tekniċi fuq naħa, u dawk li huwa ta' natura politika u r-responsabbiltà tal-istituzzjonijiet Komunitarji mogħnija b’mandat politiku, fuq in-naħa l-oħra.

1.4

Il-KESE jistieden lill-Kummissjoni biex tkun ambizzjuża fil-ħidmiet li jidhru fil-programm tagħha biex jitlestew il-modifiki li nbdew, fil-qasam tal-istandards tekniċi applikabbli għas-settur tat-titoli u f’dak tad-direttivi mistennija dwar l-assigurazzjoni u l-pensjonijiet tax-xogħol.

2.1

Fis-26 ta' Ottubru 2009, il-Kummissjoni Ewropea ressqet proposta għal Direttiva, Omnibus I, bil-għan li jiġu modifikati numru ta' direttivi li jittrattaw l-attivitajiet fis-settur tas-servizzi finanzjarji. Dawn id-direttivi jkopru l-ħtiġijiet għall-fondi proprji, il-konglomerati finanzjarji, il-pensjonijiet tax-xogħol, l-abbużi tas-swieq, is-swieq tal-istrumenti finanzjarji, il-prospetti, in-natura definittiva tar-regolament, it-trasparenza, il-ħasil tal-flus u l-fondi ta' investiment.

2.2

L-għanijiet tal-Kummissjoni huma l-protezzjoni tal-pubbliku, l-istabbiltà finanzjarja u t-titjib tas-suq uniku, u s-sistemi ta' superviżjoni nazzjonali, anke jekk huma parzjalment armonizzati, qed jipprevjenu milli jinkisbu dawn l-għanijiet.

2.3

Sabiex jinkisbu dawn l-objettivi hemm bżonn għalhekk li jiġi definit l-iskop tal-kompetenzi previst fir-Regolamenti bil-għan li jitwaqqfu l-awtoritajiet b’riżultat tat-trasformazzjoni tal-kumitati eżistenti ta' superviżjoni Ewropea. Il-proposta ta' Direttiva ta' emenda ser tippermetti li jsir tibdil fit-testi eżisteni bil-għan li tinkiseb l-uniformità mixtieqa.

2.4

Din il-proposta hija konsistenti mal-politika żviluppata mill-Kummissjoni wara li ġew analizzati l-konklużjonijiet tar-rapport tal-grupp ta' esperti ta' livell għoli, ippresedut mis-Sur Jacques de Larosière, biex tiġi stabbilita sistema ta' superviżjoni Ewropea aktar effiċjenti, integrata u sostenibbli. Skont il-Komunikazzjoni tal-Kummissjoni ta' Mejju 2009, din is-sistema għandha tikkonsisti f’Bord Ewropew dwar ir-Riskju Sistemiku responsabbli mis-superviżjoni makroekonomika u mill-monitoraġġ tar-riskji li jaffettwaw l-istabbiltà finanzjarja u f’Sistema Ewropea tas-Superviżuri Finanzjarji, magħmula minn netwerk ta' superviżuri finanzjarji nazzjonali, li jaħdmu flimkien ma' awtoritajiet superviżorji Ewropej ġodda.

2.5

Dawn l-awtoritajiet għandhom jintagħżlu minn tliet kumitati superviżorji li jokkupaw il-“livell 3” fl-istruttura li rriżultat mill-proċess tat-teħid ta' deċiżjonijiet bl-isem tal-professur Lamfalussy, u li jkunu rispettivament responsabbli għall-attivitajiet bankarji, l-assigurazzjonijiet u l-pensjonijiet tax-xogħol, u fl-aħħar is-swieq finanzjarji.

2.6

Biex l-Ewropa tkun attrezzata b’numru ta' regoli finanzjarji aktar armonizzati, il-Komunikazzjoni tal-Kummissjoni ta' Mejju 2009 intitolata “Superviżjoni finanzjarja Ewropea” (1) għandha l-għan li tippermetti lill-awtoritajiet iħejju abbozzi ta' standards tekniċi u jiffaċilitaw l-iskambju ta' informazzjoni mikroprudenzjali.

2.7

Din il-proposta tkompli mal-Komunikazzjoni fuq tliet oqsma prinċipali: tiddefinixxi l-kamp ta' applikazzjoni tal-istandards ġenwinament tekniċi (għodod, metodi, statistika, formoli,…) immirati biex jassiguraw konverġenza tas-superviżjoni lejn aktar uniformità, li għandhom jiġu adottati sussegwentement mill-Kummissjoni.

2.8

Tippermetti lill-awtoritajiet biex isolvu l-kontroversji bejn l-awtoritajiet nazzjonali f’sitwazzjonijiet fejn il-kooperazzjoni hija meħtieġa fi spirtu fejn l-interess nazzjonali jittaffa bl-interess komuni, u fejn il-konċiljazzjoni tippreċedi kwalunkwe deċiżjoni vinkolanti.

2.9

Fl-aħħar, tistabbilixxi mezzi adatti għall-iskambju ta' informazzjoni li jwasslu għal prinċipju ta' twemmin komuni mingħajr ostakli legali, b’mod partikulari fir-relazzjonijiet bejn l-awtoritajiet nazzjonali u l-awtoritajiet Ewropej il-ġodda.

2.10

Barra minn hekk, dawn l-awtoritajiet ser ikunu awtorizzati jittrattaw mal-kontropartijiet tagħhom f’pajjiżi terzi biex jippubblikaw opinjonijiet fuq l-aspetti prudenzjali tal-fużjonijiet u akkwiżizzjonijiet transkonfinali u jħejju listi Komunitarji ta' atturi finanzjarji approvati.

3.1

Din l-opinjoni tal-KESE ssegwi l-linja tal-opinjonijiet adottati wara l-kriżi finanzjarja tal-2007–2008, b’mod partikulari l-Opinjoni dwar ir-Rapport tal-Grupp de Larosière (2) u dwar is-superviżjoni makroprudenzjali u mikroprudenzjali. Minkejja li l-kawżi prinċipali immedjati ta' din il-kriżi jistgħu jiġu attribwiti għan-nuqqasijiet fis-sistema finanzjarja tal-Istati Uniti, din tefgħet dawl ukoll fuq in-nuqqasijiet fis-sistemi superviżorji Ewropej kif ukoll id-differenzi prinċipali bejniethom. Il-Kumitat jiddispjaċih li la l-kriżi u lanqas l-inċidenti preċedenti (b’mod partikulari l-każ Equitable Life) ma kienux biżżejjed biex jitwettqu minn qabel ir-riformi neċessarji.

3.2

Il-problemi esperjenzati mill-klijenti ta' istituzzjonijiet li żviluppaw attivitajiet transkonfinali fil-fatt huma tali li jipperikolaw il-kunfidenza tal-konsumaturi fis-suq uniku.

3.3

L-awtoritajiet il-ġodda jridu jkunu attrezzati bi strutturi għall-konsultazzjoni tal-interessi professjonali kkonċernati, bi trejdjunjins u b’konsumaturi tas-servizzi finanzjarji u sabiex jinżamm djalogu mal-KESE bħala rappreżentant tas-soċjetà ċivili.

3.4

Il-KESE jenfasizza n-natura teknika tat-tliet awtoritajiet ġodda. L-istatut tagħhom ta' korpi awtonomi jrid jibqa’ subordinat għall-kompetenzi politiċi tal-Kummissjoni u, fl-aħħar, tal-Parlament Ewropew.

3.5

Il-KESE josserva li l-istituzzjonijiet finanzjarji li l-attivitajiet tagħhom ikopru diversi Stati Membri jridu jibbenefikaw minn uniformità akbar tal-prattiki ta' superviżjoni. Huwa partikularment konxju mill-fatt li s-sistema proposta minnha nnifisha ma toħloq l-ebda limitu ġdid għall-atturi finanzjarji, li l-ispejjeż tagħhom jgħaddu għand l-utenti, ħlief fil-każijiet fejn l-Istati li bbenefikaw minn arbitraġġ regolatorju u distorsjonijiet fil-kompetizzjoni jridu jarmonizzaw il-prattiki tagħhom.

3.6

Il-KESE japprova l-inklużjoni tal-prinċipju ta' “Regolamentazzjoni aħjar” fl-iskema proposta, permezz ta' konsultazzjonijiet pubbliċi u studji ta' impatt mill-bidu tal-istadju tal-ħolqien tal-miżuri. Bl-istess mod, jilqa’ l-importanza tal-flessibbiltà u tan-neċessità li l-Kummissjoni beħsiebha tippromovi.

3.7

Fir-rigward tan-natura kolleġjali tat-tliet awtoritajiet ġodda, il-Kumitat huwa favur li jkun hemm bilanċ bejn l-awtoritajiet nazzjonali differenti f’każ ta' kontroversji. Skont il-KESE, il-kolleġjalità tkun tfisser li l-awtoritajiet nazzjonali jadottaw deċiżjonijiet komuni mingħajr ma juru preferenzi għad-daqs tas-swieq jew għall-preżenza ta' operaturi barra l-pajjiż tagħhom ta' oriġini.