(1)

Is-suġġett tal-proposta għal inizjattiva taċ-ċittadini bl-isem “Insalvaw in-naħal! Il-ħarsien tal-bijodiversità u t-titjib tal-ħabitats għall-insetti fl-Ewropa” jirreferi għal dan li ġej: “L-insetti neħtiġuhom għall-ekosistemi tagħna u biex niżguraw is-sigurtà alimentari. Jeħtieġ li l-Kummissjoni tadotta leġiżlazzjoni li tħares u ttejjeb il-ħabitats għall-insetti bħala indikaturi ta' ambjent b'saħħtu”.

(2)

L-għanijiet tal-proposta għal inizjattiva taċ-ċittadini jirreferu għal dan li ġej: “Biex intejbu l-bażi naturali għall-ħajja b'mod evidenti nappellaw għal miri obbligatorji: biex il-promozzjoni tal-bijodiversità ssir għan ġenerali tal-PAK; biex jinqatal-użu tal-pestiċidi, jiġu pprojbiti pestiċidi dannużi mingħajr eċċezzjoni u ssir riforma tal-kriterji ta' eliġibbiltà; biex issir il-promozzjoni tad-diversità strutturali fil-pajsaġġi agrikoli; biex in-nutrijenti jitnaqqsu b'mod effettiv (pereż. Natura 2000); biex jinħolqu żoni ta' konservazzjoni b'mod effettiv (pereż. id-DQI); biex jiġu intensifikati r-riċerka u l-monitoraġġ u tissaħħaħ l-edukazzjoni.”

(3)

It-Trattat dwar l-Unjoni Ewropea (TUE) isaħħaħ iċ-ċittadinanza tal-Unjoni u jqawwi aktar il-funzjonament demokratiku tal-Unjoni billi jipprevedi, fost l-oħrajn, li kull ċittadin ikollu d-dritt li jipparteċipa fil-ħajja demokratika tal-Unjoni permezz ta'inizjattiva taċ-ċittadini Ewropej.

(4)

Għal dan l-għan, jenħtieġ li l-proċeduri u l-kundizzjonijiet meħtieġa għal inizjattiva taċ-ċittadini jkunu ċari, sempliċi, faċli biex jintużaw u proporzjonati man-natura tal-inizjattiva taċ-ċittadini, sabiex tiġi mħeġġa l-parteċipazzjoni taċ-ċittadini u biex l-Unjoni ssir iktar aċċessibbli.

(5)

Jistgħu jiġu adottati atti ġuridiċi tal-Unjoni għall-fini tal-implimentazzjoni tat-Trattati:

(6)

Għal dawn ir-raġunijiet, il-proposta ta' inizjattiva taċ-ċittadini ma taqax manifestament barra mill-qafas tas-setgħat tal-Kummissjoni li tressaq proposta għal att legali tal-Unjoni għall-fini tal-implimentazzjoni tat-Trattati, b'konformità mal-Artikolu 4(2)(b) tar-Regolament.

(7)

Barra minn hekk, il-kumitat taċ-ċittadini ġie ffurmat u l-persuni ta' kuntatt inħatru skont l-Artikolu 3(2) tar-Regolament, u l-inizjattiva taċ-ċittadini proposta la tidher li hija manifestament abbużiva, fiergħa jew vessatorja, u lanqas ma tidher li tmur manifestament kontra l-valuri tal-Unjoni, kif stipulati fl-Artikolu 2 tat-TUE.

(8)

Għaldaqstant il-proposta għal inizjattiva taċ-ċittadini bl-isem “Insalvaw in-naħal! Il-ħarsien tal-bijodiversità u t-titjib tal-ħabitats għall-insetti fl-Ewropa” jenħtieġ li tiġi rreġistrata.