(1)

Skont l-Artikolu 18.1 tal-Istatut tas-Sistema Ewropea ta’ Banek Ċentrali u tal-Bank Ċentrali Ewropew, il-Bank Ċentrali Ewropew (BĊE) u l-banek ċentrali nazzjonali tal-Istati Membri li l-munita tagħhom hija l-euro (iktar ’il quddiem il-“BĊNi”) jistgħu, sabiex jinkisbu l-għanijiet tas-Sistema Ewropea ta’ Banek Ċentrali, iwettqu operazzjonijiet ta’ kreditu ma’ istituzzjonijiet ta’ kreditu u parteċipanti oħrajn fis-suq, bis-self ikun ibbażat fuq kollateral adegwat. Il-kundizzjonijiet ġenerali li taħthom il-BĊE u l-BĊNi jinsabu lesti biex jidħlu f’operazzjonijiet ta’ kreditu, inklużi l-kriterji li jiddeterminaw l-eliġibbiltà ta’ kollateral għall-finijiet ta’ operazzjonijiet ta’ kreditu tal-Eurosistema, huma stabbiliti fil-Linja Gwida (UE) 2015/510 tal-Bank Ċentrali Ewropew (BĊE/2014/60) (1).

(2)

Huwa meħtieġ li tiġi pprovduta aktar ċarezza fir-rigward tat-trattament għall-finijiet ta’ eliġibbiltà tar-rati ta’ referenza tal-imgħax għal assi negozjabbli.

(3)

Il-Kunsill Governattiv wettaq reviżjoni komprensiva tal-miżuri ta’ faċilitazzjoni tal-kollateral adottati mill-2020 b’reazzjoni għaċ-ċirkostanzi ekonomiċi u finanzjarji eċċezzjonali assoċjati mat-tixrid tal-marda tal-coronavirus (COVID-19). Dawn il-miżuri kienu jinkludu t-tnaqqis temporanju tal-haircuts tal-valutazzjoni; iż-żamma tal-eliġibilità ta’ assi, u l-emittenti u l-garanti ta’ dawn l-assi, li ssodisfaw ir-rekwiżiti minimi tal-kwalità tal-kreditu tal-Eurosistema fis-7 ta’ April 2020 iżda li sussegwentement ġew degradati; u li tippermetti lill-BĊNi jaċċettaw bħala kollaterali eliġibbli titoli ta’ dejn sovran maħruġa mill-gvern ċentrali tar-Repubblika Ellenika li ma jissodisfawx ir-rekwiżiti tal-kwalità tal-kreditu tal-Eurosistema. Din ir-reviżjoni qieset (a) li l-kontropartijiet tal-Eurosistema li qed jipparteċipaw f’operazzjonijiet ta’ rifinanzjament immirati fuq żmien itwal mwettqa taħt id-Deċiżjoni (UE) 2019/1311 tal-Bank Ċentrali Ewropew (BĊE/2019/21) (2) għandhom ikunu jistgħu jkomplu jimmobilizzaw kollateral suffiċjenti għal dawn l-operazzjonijiet; (b) l-impatt kollaterali għall-kontropartijiet tal-Eurosistema assoċjati ma’ kull waħda minn dawn il-miżuri; (c) kunsiderazzjonijiet ta’ riskju assoċjati ma’ kull waħda minn dawn il-miżuri; (d) kunsiderazzjonijiet oħra tas-suq u tal-politika.

(4)

F’dak il-kuntest, il-Kunsill Governattiv iddeċieda fit-23 ta’ Marzu 2022, inter alia, li jelimina gradwalment it-tnaqqis tal-haircut imsemmi hawn fuq f’żewġ stadji, l-ewwel wieħed għandu jibda fit-8 ta’ Lulju 2022, sabiex jiżdiedu l-protezzjoni tar-riskju u l-effiċjenza tar-riskju tal-Eurosistema.

(5)

Iddeċida ukoll li ma jibqax taċċetta, mit-8 ta’ Lulju 2022, bħala assi negozjabbli eliġibbli, u l-emittenti u l-garanti ta’ dawn l-assi li ssodisfaw ir-rekwiżiti minimi tal-kwalità tal-kreditu tal-Eurosistema fis-7 ta’ April 2020 iżda li sussegwentement ġew degradati mill-aġenziji tal-klassifikazzjoni tal-kreditu aċċettati fl-Eurosistema għal livell ta’ kreditu ta’ kwalità taħt il-minimu tal-Eurosistema, sabiex jerġa’ lura għal trattament konsistenti ta’ emittenti, assi negozjabbli u garanti fi ħdan il-qafas kollaterali tal-Eurosistema indipendenti miż-żmien tal-azzjonijiet tal-aġenziji ta’ klassifikazzjoni tal-kreditu.

(6)

Il-Kunsill Governattiv iddeċieda wkoll li jkompli jippermetti lill-BĊNi jaċċettaw bħala kollateral eliġibbli titoli ta’ dejn negozjabbli maħruġa mill-gvern ċentrali tar-Repubblika Ellenika li ma jissodisfawx ir-rekwiżiti tal-kwalità tal-kreditu tal-Eurosistema iżda jissodisfaw il-kriterji ta’ eliġibbiltà l-oħra kollha applikabbli għal assi negozjabbli, sakemm tal-inqas dawn l-investimenti mill-ġdid f’dawn it-titoli taħt il-programm ta’ xiri ta’ emerġenza fil-każ ta’ pandemija (PEPP) (3) jkomplu, soġġett għal skeda ta’ haircut speċifika. Din il-miżura se tkun temporanja u hija bbażata fuq il-kunsiderazzjonijiet addizzjonali li ġejjin: (a) il-ħtieġa li tkompli tiġi evitata l-frammentazzjoni fl-aċċess għall-operazzjonijiet tal-politika monetarja tal-Eurosistema li tfixkel il-funzjonament tajjeb tal-mekkaniżmu ta’ trażmissjoni tal-politika monetarja lill-ekonomija Griega waqt li tkun għadha qed tirkupra mill-konsegwenzi tal-pandemija; (b) l-impenji meħuda mir-Repubblika Ellenika fil-kuntest tas-sorveljanza msaħħa skont ir-Regolament (UE) Nru 472/2013 tal-Parlament Ewropew u tal-Kunsill (4) u l-monitoraġġ tal-implimentazzjoni tiegħu mill-istituzzjonijiet tal-Unjoni; (c) il-fatt li miżuri ta’ ħelsien mid-dejn fuq żmien medju għar-Repubblika Ellenika mogħtija permezz tal-Faċilità Ewropea ta’ Stabbiltà Finanzjarja u l-Mekkaniżmu Ewropew ta’ Stabbiltà jiddependu fuq l-implimentazzjoni kontinwa ta’ dawn l-impenji; (d) l-informazzjoni disponibbli għall-BĊE dwar is-sitwazzjoni ekonomika u finanzjarja tar-Repubblika Ellenika bħala riżultat tal-involviment tal-BĊE fil-qafas ta’ sorveljanza msaħħa; (e) il-fatt li anki wara t-tmiem tas-sorveljanza msaħħa: (i) is-sitwazzjoni ekonomika, fiskali u finanzjarja tar-Repubblika Ellenika se tiġi riveduta regolarment fil-kuntest tas-sorveljanza ta’ wara l-programm skont l-Artikolu 14 tar-Regolament (UE) Nru 472/2013 u s-sistema ta’ twissija bikrija trimestrali tal-Mekkaniżmu Ewropew ta’ Stabbiltà, (ii) il-miżuri ta’ ħelsien mid-dejn għar-Repubblika Ellenika se jkomplu jkunu marbuta ma’ dik is-sorveljanza ta’ wara l-programm, u (iii) ħlasijiet ippjanati lir-Repubblika Ellenika fil-kuntest tal-Faċilità ta’ Rkupru u Reżiljenza taħt ir-Regolament (UE) 2021/241 tal-Parlament Ewropew u tal-Kunsill (5) huma soġġetti għat-tlestija b’suċċess tal-istadji u l-miri miftiehma skont l-Artikolu 24 ta’ dak ir-Regolament; (f) il-valutazzjonijiet regolari tas-sostenibbiltà tad-dejn sovran li se jsiru mill-Mekkaniżmu Ewropew ta’ Stabbiltà, il-Kummissjoni Ewropea u l-BĊE; (g) il-fatt li l-BĊE se jkompli jkollu aċċess għal informazzjoni dwar is-sitwazzjoni ekonomika u finanzjarja tar-Repubblika Ellenika anki wara t-tmiem tas-sorveljanza msaħħa, permezz tal-mekkaniżmi deskritti taħt il-punti (e)(i) u (e)(iii) hawn fuq.

(7)

Għalhekk, il-Linja Gwida 2014/528/UE tal-Bank Ċentrali Ewropew (BĊE/2014/31) (6) għandha tiġi emendata f’dan is-sens,