(1)

Skont l-Artikolu 11 tar-Regolament (UE) Nru 1380/2013, jistgħu jiġu adottati l-miżuri ta' konservazzjoni fis-sajd li jkunu meħtieġa biex tinżamm konformità mal-obbligi tas-sajd skont il-leġiżlazzjoni ambjentali tal-Unjoni, fost dawn, l-Artikolu 6 tad-Direttiva tal-Kunsill 92/43/KEE (2) u l-Artikolu 13(4) tad-Direttiva 2008/56/KE tal-Parlament Ewropew u tal-Kunsill (3).

(2)

L-Artikolu 6 tad-Direttiva 92/43/KEE jeħtieġ li l-Istati Membri jistabbilixxu l-miżuri ta' konservazzjoni meħtieġa għaż-Żoni Speċjali ta' Konservazzjoni li jikkorrispondu mar-rekwiżiti ekoloġiċi tat-tipi ta' ħabitats naturali u l-ispeċijiet preżenti fis-siti. Jeħtieġ ukoll li l-Istati Membri jieħdu l-passi xierqa biex, fiż-żoni speċjali ta' konservazzjoni, jevitaw id-deterjorament tal-ħabitats naturali u tal-ħabitats tal-ispeċijiet kif ukoll jevitaw id-disturbi sinifikanti tal-ispeċijiet li għalihom ġew iddeżinjati ż-żoni.

(3)

Skont l-Artikolu 13(4) tad-Direttiva 2008/56/KE, l-Istati Membri għandhom jadottaw programmi ta' miżuri, li jinkludu miżuri ta' protezzjoni spazjali li jikkontribwixxu għal netwerks koerenti u rappreżentattivi ta' żoni marini protetti, u jkopru b'mod adegwat id-diversità tal-ekosistemi kostitwenti, bħal żoni speċjali ta' konservazzjoni skont id-Direttiva dwar il-Ħabitats, ta' żoni ta' protezzjoni speċjali skont id-Direttiva dwar l-Għasafar (4), u ta' żoni marittimi protetti kif miftiehma mill-Komunità jew mill-Istati Membri kkonċernati fil-qafas ta' ftehimiet internazzjonali jew reġjonali li għalihom ikunu partijiet.

(4)

Id-Danimarka kienet tal-fehma li, għall-finijiet ta' konformità mal-Artikolu 6 tad-Direttiva 92/43/KEE, kien hemm bżonn li jiġu adottati miżuri ta' konservazzjoni f'ċerti żoni taħt is-sovranità tagħha f'Kattegat, fil-Baħar tat-Tramuntana. Jekk il-miżuri ta' konservazzjoni tas-sajd meħtieġa jaffettwaw is-sajd ta' Stati Membri oħrajn, l-Istati Membri jistgħu jippreżentaw dawn il-miżuri f'rakkomandazzjonijiet konġunti lill-Kummissjoni.

(5)

Id-Danimarka, il-Ġermanja u l-Iżvezja għandhom interess ta' ġestjoni dirett fis-sajd li se jiġi affettwat mit-tali miżuri. B'konformità mal-Artikolu 11(3) tar-Regolament (UE) Nru 1380/2013, id-Danimarka pprovdiet lill-Ġermanja bl-informazzjoni rilevanti dwar il-miżuri meħtieġa, u bir-raġunijiet għalihom, bl-evidenza xjentifika li ssostnihom u bid-dettalji dwar l-implimentazzjoni u l-infurzar tagħhom fil-prattika.

(6)

Fit-13 ta' Marzu 2015, wara li kkonsultaw mal-Kunsill Konsultattiv għall-Baħar tat-Tramuntana, id-Danimarka, il-Ġermanja u l-Iżvezja lill-Kummissjoni ppreżentawlha żewġ rakkomandazzjonijiet konġunti għall-miżuri ta' konservazzjoni tas-sajd biex jipproteġu strutturi ta' skolji fi tliet siti tan-Natura 2000 tad-Danimarka f'Kattegat, fil-Baħar tat-Tramuntana u seba' siti fil-Baltiku. Jinvolvu l-projbizzjoni ta' attivitajiet tas-sajd bl-irkaptu ta' kuntatt mal-qiegħ mobbli fiż-żoni tal-iskoll (tip ta' ħabitat 1170) u l-projbizzjoni ta' kull attività tas-sajd fiż-żoni tal-iskoll tal-bżieżaq (tat-tip ta' ħabitat 1180).

(7)

Fil-parir xjentifiku tiegħu tas-17 ta' April 2015, il-Kumitat Xjentifiku, Tekniku u Ekonomiku għas-Sajd (5) iddikjara li l-għanijiet ta' konservazzjoni fiż-Żoni Speċjali ta' Konservazzjoni msemmijin fir-rakkomandazzjonijiet konġunti ma jistgħux jintlaħqu bis-sħiħ mingħajr miżuri xierqa għall-prevenzjoni ta' attività tas-sajd f'dawn iż-żoni.

(8)

Il-Kumitat Xjentifiku, Tekniku u Ekonomiku għas-Sajd identifika ċertu tħassib dwar il-kontroll u l-infurzar tal-miżuri ta' konservazzjoni u wera l-fehma li jista' jkun xieraq li jittieħdu miżuri ta' kontroll addizzjonali. Skont l-Artikolu 5 tar-Regolament tal-Kunsill (KE) Nru 1224/2009 (6). L-Istati Membri jenħtieġ li l-Istati Membri jadottaw miżuri xierqa, jallokaw ir-riżorsi adegwati u jistabbilixxu l-istrutturi meħtieġa għall-iżgurar tal-kontroll, l-ispezzjoni u l-infurzar tal-attivitajiet li jitwettqu fil-kamp ta' applikazzjoni tal-politika komuni tas-sajd (PKS). Dawn jistgħu jinkludu miżuri bħar-rekwiżit li l-pożizzjonijiet tas-sistemi ta' monitoraġġ tal-bastimenti (VMS) jingħataw b'aktar frekwenza minn kull bastiment ikkonċernat, jew iż-żoni b'riskju għoli jiġu identifikati fis-sistema ta' kontroll nazzjonali fuq il-bażi ta' mmaniġġjar tar-riskji, sabiex jiġi indirizzat it-tħassib tal-Kumitat Xjentifiku, Tekniku u Ekonomiku għas-Sajd.

(9)

Fil-25 ta' Ġunju 2015, il-Kummissjoni adottat ir-Regolament ta' Delega (UE) 2015/1778 (7) biex jiġu stabbiliti l-miżuri ta' konservazzjoni fis-sajd għall-protezzjoni taż-żoni tal-iskoll rilevanti fil-Baħar Baltiku u fil-Kattegat.

(10)

Ir-Regolament ta' Delega (UE) 2015/1778 ippreveda l-projbizzjoni tas-sajd bi rkaptu ta' kuntatt mal-qiegħ mobbli fiż-żoni tal-iskoll rilevanti fil-Baħar Baltiku u fil-Kattegat, peress li dan it-tip ta' sajd għandu impatt negattiv fuq il-ħabitats tal-iskoll u jaffettwa kemm l-istrutturi tal-iskoll kif ukoll il-bijodiversità li tinsab fl-iskolji.

(11)

Barra minn hekk, dak ir-Regolament ipprojbixxa kull attività tas-sajd fiż-żoni rilevanti tal-iskolji tal-bżieżaq fil-Kattegat peress li l-iskolji tal-bżieżaq huma strutturi partikolarment fraġli u kull impatt fiżiku huwa theddida għall-istatus ta' konservazzjoni tagħhom.

(12)

Kien jixraq li tiġi żgurata l-valutazzjoni tal-miżuri stabbiliti minn dak ir-Regolament, b'mod partikolari rigward il-kontroll tal-konformità mal-projbizzjonijiet fuq is-sajd.

(13)

Illum l-Iżvezja hija tal-fehma li, għall-fini ta' konformità mal-Artikolu 6 tad-Direttiva 92/43/KEE u mal-Artikolu 13(4) tad-Direttiva 2008/56/KE, hemm bżonn li jiġu adottati miżuri ta' konservazzjoni f'ċerti żoni taħt is-sovranità u l-ġurisdizzjoni tagħha fi Skagerrak, fil-Baħar tat-Tramuntana.

(14)

Id-Danimarka, il-Ġermanja u l-Iżvezja għandhom interess ta' ġestjoni dirett fis-sajd li se jiġi affettwat mit-tali miżuri. B'konformità mal-Artikolu 11(3) tar-Regolament (UE) Nru 1380/2013, l-Iżvezja pprovdiet l-informazzjoni rilevanti dwar il-miżuri meħtieġa, inklużi r-raġunijiet għalihom, l-evidenza xjentifika li ssostnihom u d-dettalji dwar l-implimentazzjoni u l-infurzar tagħhom fil-prattika lid-Danimarka u lill-Ġermanja.

(15)

Fl-10 ta' Ġunju 2016, wara li kkonsultaw mal-Kunsill Konsultattiv dwar il-Baħar tat-Tramuntana, id-Danimarka, il-Ġermanja u l-Iżvezja lill-Kummissjoni ppreżentawlha rakkomandazzjoni konġunta oħra għall-miżuri ta' konservazzjoni tas-sajd sabiex jipproteġu l-istrutturi tal-iskoll, il-ħofriet f'qiegħ il-baħar u l-komunitajiet tal-pjumi tal-baħar u tal-megafawna li jħaffru fiż-żona ta' Bratten li tinsab fi Skagerrak. Il-miżuri jipprojbixxu l-attivitajiet tas-sajd f'għadd ta' żoni.

(16)

Fi Bratten, jeħtieġ li tiġi pprojbita kull attività tas-sajd fiż-żoni tal-iskoll rilevanti, minħabba li l-kontroll tal-attivitajiet tas-sajd u tas-sajd pelaġiku minimu huma aktar diffiċli.

(17)

Sabiex jiġi żgurat li jkun hemm biżżejjed kontroll tal-attivitajiet tas-sajd fiż-żona marittima protetta ta' Bratten, il-bastimenti kollha tas-sajd għandhom ikunu mgħammrin b'sistema ta' identifikazzjoni awtomatika (AIS) u għandhom iżommuha operattiva meta jkunu fi Bratten, sabiex b'hekk tinħoloq żona ta' twissija madwar iż-żoni magħluqin.

(18)

Fil-pariri xjentifiċi tiegħu tat-8 ta' Lulju 2016, il-Kumitat Xjentifiku, Tekniku u Ekonomiku għas-Sajd (8) jiddikjara li l-għanijiet ta' konservazzjoni proposti fiż-żona protetta tal-baħar ta' Bratten, fejn hemm l-iskolji, il-ħofriet f'qiegħ il-baħar u l-ispeċijiet mheddin, ma jistgħux jinkisbu bis-sħiħ mingħajr ma jittieħdu miżuri xierqa biex titwaqqaf kull attività tas-sajd fiż-żoni.

(19)

Madankollu, il-Kumitat Xjentifiku, Tekniku u Ekonomiku għas-Sajd josserva li l-limiti proposti taż-żoni protetti jinsabu ferm qrib l-iskolji u ma jkoprux żona ta' lqugħ iddefinita skont il-Linji Gwida tal-ICES. Il-Kumitat Xjentifiku, Tekniku u Ekonomiku għas-sajd huwa tal-fehma li ż-żoni ta' lqugħ huma siewja għal skopijiet ta' konservazzjoni u kontrollabbiltà, filwaqt li l-kurituri ddefiniti fil-proposti jidhru li huma żgħar ħafna. Barra minn hekk, hemm biss ftit ħabitats sensittivi fiż-żona 14, li l-għeluq tagħha, approvat mill-partijiet ikkonċernati kollha, huwa ġġustifikat primarjament minn approċċ prekawzjonali sabiex tiġi evitata żieda fil-pressjoni tas-sajd fuq il-qigħan tal-baħar fond fil-ġejjieni.

(20)

Wara r-rakkomandazzjoni konġunta l-ġdida ppreżentata fl-10 ta' Ġunju 2016, jixraq li jiġi revokat ir-Regolament ta' Delega (UE) 2015/1778 u li l-miżuri ta' konservazzjoni rilevanti jitqassmu skont il-baċir tal-baħar f'żewġ strumenti legali differenti.

(21)

Dan ir-Regolament għandu japplika biss għall-Baħar tat-Tramuntana u jinvolvi l-miżuri ta' konservazzjoni li bħalissa huma applikabbli fil-Kattegat u dawk issuġġeriti għaż-żona ta' Bratten fir-rakkomandazzjoni konġunta tal-10 ta' Ġunju 2016.

(22)

Il-miżuri ta' konservazzjoni li bħalissa huma applikabbli fil-Baħar Baltiku għandhom jiġu inklużi f'Regolament separat ġdid.

(23)

Il-miżuri ta' konservazzjoni tas-sajd stabbiliti minn dan ir-Regolament huma mingħajr ħsara għal kull miżura eżistenti jew futura oħra ta' ġestjoni bil-mira li jiġu kkonservati s-siti kkonċernati, inklużi l-miżuri ta' konservazzjoni tas-sajd,

(a)

“irkaptu tal-kuntatt mal-qiegħ” tfisser kwalunkwe wieħed mill-irkapti li ġejjin: xibka tat-tkarkir tal-qiegħ, xibka tat-tkarkir bi travu, għażel tat-tkarkir tal-qiegħ, għażel tat-tkarkir tewmi, xibka tat-tkarkir għall-awwisti, xibka tat-tkarkir għall-gambli, tartarun, tartarun Daniż, tartarun Skoċċiż, tartarun ta' barra jew bastiment bit-tartarun u bil-gangmu;

(b)

“Żoni 1” tfisser iż-żoni ġeografiċi magħluqin bil-ġonġiment sekwenzjali tal-linji rombu fil-pożizzjonijiet elenkati fl-Anness I ta' dan ir-Regolament, li għandhom jitkejlu skont is-sistema ta' koordinati WGS84;

(c)

“Żoni 2” tfisser iż-żoni ġeografiċi magħluqin b'ġonġiment sekwenzjali tal-linji rombu fil-pożizzjonijiet elenkati fl-Anness II ta' dan ir-Regolament, li għandhom jitkejlu skont is-sistema ta' koordinati WGS84.

(d)

“Bratten” tfisser iż-żona ġeografika magħluqa b'ġonġiment sekwenzjali tal-linji rombu fil-pożizzjonijiet elenkati fl-Anness III ta' dan ir-Regolament, li għandhom jitkejlu skont is-sistema ta' koordinati WGS84.

(e)

“L-Istati Membri kkonċernati” tfisser id-Danimarka, il-Ġermanja u l-Iżvezja.