—

L-implimentazzjoni tal-pjanijiet ta' azzjoni skont l-Artikolu 102(4) tar-Regolament (KE) Nru 1224/2009 biex jitneħħew in-nuqqasijiet fis-sistema ta' kontroll ta' Stat Membru,

—

L-implimentazzjoni ta' azzjonijiet speċifiċi biex jiġu sodisfatti ċerti kondizzjonalitajiet ex ante stabbiliti fl-Anness IV tar-Regolament (UE) Nru 508/2014, kif previst mill-Artikolu 19(2) tar-Regolament (UE) Nru 1303/2013 tal-Parlament Ewropew u tal-Kunsill (4). Skont l-Artikolu 19(2) tar-Regolament (UE) Nru 1303/2013, fejn ma jiġux sodisfatti l-kondizzjonalitajiet, il-programm għandu jkun fih deskrizzjoni tal-azzjoni li għandha titwettaq li tinkludi l-miżuri li se jiġu ffinanzjati,

—

L-implimentazzjoni tas-sistemi ta' validazzjoni tad-dejta kif previst fl-Artikolu 109 tar-Regolament (KE) Nru 1224/2009, u b'mod partikolari l-proġetti li għandhom l-għan li jistabbilixxu l-interoperabbiltà bejn is-sistemi rispettivi tal-Istati Membri, billi sistema ta' rappurtar tal-qabdiet u tat-tentattivi sħiħa u affidabbli hija fattur ewlieni fil-ġestjoni tar-riżorsi tas-sajd tal-Unjoni,

—

L-infurzar u l-kontroll tal-obbligu li l-qabdiet kollha jittellgħu l-art, kif stipulat fl-Artikolu 15 tar-Regolament (UE) Nru 1380/2013 tal-Parlament Ewropew u tal-Kunsill (5). Dan l-obbligu ġdid huwa żieda importanti ħafna għall-Politika Komuni tas-Sajd il-ġdida, u ddaħħal biex jikkontribwixxi għas-sostenibbiltà tal-isfruttar tal-istokkijiet tal-ħut li jista' jinstad. L-implimentazzjoni ta' dan l-obbligu l-ġdid se joħloq l-addattazzjonijiet fis-sistemi ta' kontroll tal-Istati Membri, li se jinvolvu nfiq ġdid,

—

L-infurzar u l-kontroll tal-iskema ta' ċertifikazzjoni tal-qabdiet għall-importazzjoni u l-esportazzjoni ta' prodotti tas-sajd kif stipulat fil-Kapitolu III tar-Regolament (KE) Nru 1005/2008. L-implimentazzjoni tal-iskema ta' ċertifikazzjoni tal-qabdiet hija l-qofol tal-ġlieda kontra l-attivitajiet IUU (illegali, mhux rapportat u mhux regolat),

—

Azzjonijiet effettivi li l-għan tagħhom hu li jinfurzaw l-limiti tal-kapaċità tal-flotot. Biex żgur ikun hemm bilanċ bejn l-opportunitajiet għas-sajd u l-kapaċità tas-sajd, l-Istati Membri jridu jiżguraw li l-limiti tal-kapaċitajiet jiġu rispettati, u għandhom jimplimentaw proġetti li l-għan tagħhom ikun iċ-ċertifikazzjoni, il-verifikazzjoni u l-kejl tas-saħħa tal-magni li qed jintalab finanzjament għalihom,

—

L-implimentazzjoni tal-Programmi Speċifiċi ta' Kontroll u Spezzjoni (SCIP) jew tal-koordinazzjoni tal-kontroll marbut ma' żona tas-sajd jew ma' żona li mhijiex koperta minn SCIP, skont l-Artikolu 95(4) tar-Regolament (KE) Nru 1224/2009 u l-Artikolu 15 tar-Regolament tal-Kunsill (KE) Nru 768/2005 (6). Dawn it-tipi ta' azzjoni jikkontribwixxu għall-iżvilupp tal-kultura ta' konformità, għar-rinforz tal-kooperazzjoni fost l-Istati Membri, u joħolqu sinerġija bejn l-għodda ta' kontroll diversi,

—

L-infurzar u l-kontroll tar-rekwiżiti tat-traċċabbiltà kif stabbilit fl-Artikolu 58 tar-Regolament (KE) Nru 1224/2009 u l-Artikolu 67(6) tar-Regolament ta' Implimentazzjoni (UE) Nru 404/2011 (7). L-Artikolu 58 tar-Regolament (KE) Nru 1224/2009 jeżiġi li l-lottijiet kollha tal-prodotti tas-sajd u tal-akkwakultura għandhom ikunu traċċabbli fl-istadji kollha tal-produzzjoni, tal-ipproċessar u tad-distribuzzjoni, mill-qbid jew il-ġbir sal-istadju tal-bejgħ bl-imnut. L-Artikolu 67(6) tar-Regolament ta' Implimentazzjoni (UE) Nru 404/2011 jeżiġi li l-operaturi kollha jwaħħlu l-informazzjoni fuq il-prodotti tas-sajd u tal-akkwakultura msemmijin fl-Artikolu 58(5) tar-Regolament (KE) Nru 1224/2009 bħala għodda ta' identifikazzjoni, bħal kodiċi, barcode, ċippa elettronika jew mezz jew sistema ta' mmarkar simili; dan ir-rekwiżit japplika mill-1 ta' Jannar 2013 għall-prodotti minn żoni tas-sajd li jagħmlu parti minn pjan multiannwali, u mill-1 ta' Jannar 2015, għall-prodotti tas-sajd u tal-akkwakultura l-oħrajn kollha. L-infurzar u l-kontroll tar-rekwiżiti tat-traċċabbiltà għandhom ikunu prijorità tal-Unjoni. L-implimentazzjoni tas-sistema ta' traċċabbiltà hija l-qofol tal-politika ta' kontroll tas-sajd biex tkun żgurata t-trasparenza tal-oriġini tal-prodotti tas-sajd.