(1)

Le Rialachán (AE) 2019/2144 leagtar síos oibleagáid ghinearálta maidir le mótarfheithiclí a fheistiú le hardchórais feithicle áirithe. Ba cheart a liostú in Iarscríbhinn II a ghabhann leis an Rialachán sin ceanglais maidir le cineálcheadú mótarfheithiclí i ndáil lena dtaifeadáin sonraí teagmhais agus maidir le cineálcheadú na gcóras sin mar aonaid theicniúla ar leithligh. Is gá na ceanglais sin a fhorlíonadh trí rialacha comhchuibhithe mionsonraithe a bhunú maidir leis na nósanna imeachta tástála sonracha agus na ceanglais theicniúla i ndáil le cineálcheadú den sórt sin.

(2)

Baineann na ceanglais theicniúla agus na nósanna imeachta tástála a leagtar amach sa Rialachán seo le catagóirí mótarfheithiclí M1 agus N1, i gcomhréir leis na dátaí is infheidhme maidir le diúltú cineálcheadú AE a dheonú maidir leis na catagóirí sin de mhótarfheithiclí, dátaí a leagtar amach i Rialachán (AE) 2019/2144.

(3)

I gcomhréir le hAirteagal 3, pointe (13) de Rialachán (AE) 2019/2144, is córas é an taifeadán sonraí teagmhais nach bhfuil de chuspóir aige ach na paraiméadair agus an fhaisnéis chriticiúil a bhaineann le tuairteanna a thaifeadadh agus a stóráil go gairid roimh imbhualadh, le linn imbhualadh agus díreach ina dhiaidh, d’fhonn grinnsonraí níos cruinne a fháil a chuirfidh ar chumas na mBallstát anailís a dhéanamh ar shábháilteacht ar bhóithre, agus éifeachtacht beart sonrach a mheas.

(4)

Na nósanna imeachta tástála agus na ceanglais theicniúla mhionsonraithe maidir le cineálcheadú cineálacha feithiclí i ndáil le taifeadáin sonraí teagmhais, tá siad faoi réir fhorálacha Rialachán Uimh. 160 ó na Náisiúin Aontaithe (2). Ba cheart, dá bhrí sin, an Rialachán sin ó na Náisiúin Aontaithe a chur le liosta na gceanglas is infheidhme dá dtagraítear in Airteagal 4(5) agus in Airteagal 5(3) de Rialachán (AE) 2019/2144.

(5)

Áirítear i Rialachán Uimh. 160 ó na Náisiúin Aontaithe na ceanglais maidir le heilimintí sonraí atá le taifeadadh ag taifeadáin sonraí teagmhais, formáid na sonraí sin, na ceanglais maidir le sonraí a ghabháil, a thaifeadadh agus a stóráil ar bord, chomh maith leis na ceanglais maidir le feidhmíocht tástála tuairte agus leis an gcumas teacht slán.

(6)

Na ceanglais theicniúla go léir a leagtar síos i Sraith Leasuithe 01 ar Rialachán Uimh. 160 ó na Náisiúin Aontaithe (3), beidh feidhm acu ó na dátaí a shonraítear in Iarscríbhinn II a ghabhann le Rialachán (AE) 2019/2144, gan dochar d’oibleagáidí idirnáisiúnta an Aontais.

(7)

Chun a áirithiú go ndéanfaidh monaróirí feithiclí bearta iomchuí chun a áirithiú go ndéanfar sonraí an taifeadáin sonraí teagmhais a chosaint ar ionramháil, sin agus go mbeidh sonraí an taifeadáin sonraí teagmhais ar fáil thar an gcomhéadan caighdeánaithe, agus chun go bhféadfar anaithnidiú a dhéanamh ar na sonraí sin, ba cheart na ceanglais sin a fhorlíonadh le ceanglais bhreise maidir le sonraí a aisghabháil, príobháideachas agus slándáil sonraí.

(8)

Na sonraí arna dtaifeadadh ag taifeadáin sonraí teagmhais, chun a áirithiú go bhfanfaidh siad anaithnid, ba cheart é a bheith d’oibleagáid ar na monaróirí bearta iomchuí a dhéanamh chun cosc a chur ar na sonraí sin a thuairisciú nó a aisghabháil i dteannta le haon fhaisnéis a bhaineann le duine nádúrtha.

(9)

Go dtí go mbeidh prótacail chumarsáide chaighdeánaithe maidir le rochtain agus aisghabháil sonraí teagmhais i bhfeidhm, ba cheart do mhonaróirí feithiclí, trí ghníomh tarmligthe ón gCoimisiún, faisnéis a sholáthar do pháirtithe ábhartha maidir le conas na sonraí sa taifeadán sonraí teagmhais a rochtain, a aisghabháil agus a léiriú.

(10)

Stádas ceart oibriúcháin an taifeadáin sonraí teagmhais, chomh maith le feidhmiúlacht cheart an taifeadáin agus le sláine na mbogearraí ann, is nithe iad sin ba cheart a fhíorú le tástálacha tréimhsiúla ródacmhainneachta ar fheithiclí.

(11)

Níl aon tagairt do ghníomhartha rialála maidir le taifeadáin sonraí teagmhais sa tábla ina bhfuil an liosta ceanglas in Iarscríbhinn II a ghabhann le Rialachán (AE) 2019/2144. Is gá, dá bhrí sin, tagairt don Rialachán seo agus do Rialachán Uimh. 160 ó na Náisiúin Aontaithe a chur isteach san Iarscríbhinn sin.

(12)

An liosta de na Rialacháin ó na Náisiúin Aontaithe dá dtagraítear in Airteagal 4(2) de Rialachán (AE) 2019/2144, liosta atá in Iarscríbhinn I a ghabhann leis an Rialachán sin, ba cheart é a leasú ionas go gcuimseofar tagairt do shraith leasuithe 01 ar Rialachán 160 ó na Náisiúin Aontaithe.

(13)

Dá bhrí sin, ba cheart Rialachán (AE) 2019/2144 a leasú dá réir.

(14)

Tá dlúthnasc idir forálacha an Rialacháin seo, mar is forálacha iad lena leagtar rialacha amach maidir leis na ceanglais theicniúla i ndáil le cineálcheadú mótarfheithiclí ó thaobh a dtaifeadán sonraí teagmhais de, agus i ndáil le cineálcheadú taifeadán sonraí teagmhais mar aonaid theicniúla ar leithligh. Mar thoradh ar na rialacha a leagtar síos sa Rialachán seo, is gá an tagairt don Rialachán seo, do Rialachán Uimh. 160 ó na Náisiúin Aontaithe agus do Shraith Leasuithe 01 ar Rialachán Uimh. 160 ó na Náisiúin Aontaithe a chur le hIarscríbhinn II a ghabhann le Rialachán (AE) 2019/2144. Is iomchuí, dá bhrí sin, na forálacha sin a leagan síos in aon Rialachán Tarmligthe amháin,

(15)

Ceanglais Rialachán (AE) 2019/2144 i ndáil le taifeadáin sonraí teagmhais le haghaidh feithiclí i gcatagóirí M1 agus N1, ós rud é go bhfuil feidhm le bheith acu ón 6 Iúil 2022, ba cheart feidhm a bheith ag an Rialachán seo ón dáta céanna,