(1)

I gcomhréir le hAirteagal 21 den Chonradh ar an Aontas Eorpach (CAE), tá an tAontas comhbheartais agus comhghníomhaíochtaí a shainiú agus a shaothrú, agus tá sé le feabhas a chur ar chomhar i réimsí uile an chaidrimh idirnáisiúnta, chun, inter alia, lánpháirtiú na dtíortha uile sa gheilleagar domhanda a chothú, lena n-áirítear trí shrianta ar an trádáil idirnáisiúnta a dhíothú de réir a chéile.

(2)

De bhun Airteagal 206 den Chonradh ar Fheidhmiú an Aontais Eorpaigh (CFAE), tá an tAontas le rannchuidiú, trí aontas custaim a bhunú, ar mhaithe leis an leas coiteann, le forbairt chomhchuí na trádála domhanda, le díothú comhleanúnach srianta ar an trádáil idirnáisiúnta agus ar infheistíocht dhíreach choigríche, agus le hísliú bacainní custaim agus bacainní eile.

(3)

I gcomhréir le hAirteagal 26 CFAE, tá an tAontas le bearta a ghlacadh is gá chun margadh inmheánach a bhunú nó chun oibriú an mhargaidh sin a áirithiú, arb é atá sa mhargadh sin limistéar gan teorainneacha inmheánacha ina n-áirithítear saorghluaiseacht earraí, daoine, seirbhísí agus caipitil i gcomhréir leis na Conarthaí. Tagann rochtain oibreoirí eacnamaíocha, earraí agus seirbhísí tríú tír ar mhargaí soláthair phoiblí agus lamháltais an Aontais faoi raon feidhme an chomhbheartais tráchtála.

(4)

Le hAirteagal III:8 den Chomhaontú Ginearálta um Tharaifí agus Trádáil, 1994 agus le hAirteagal XIII den Chomhaontú Ginearálta maidir le Trádáil Seirbhísí, eisiatar soláthar rialtais ó raon feidhme dhisciplíní iltaobhacha na hEagraíochta Domhanda Trádála (EDT).

(5)

Faoi chreat EDT agus trína chaidreamh déthaobhach, molann an tAontas oscailt uaillmhianach a dhéanamh ar mhargaí soláthair phoiblí agus lamháltais an Aontais agus a gcomhpháirtithe trádála, de mheon cómhalartachta agus comhshochair.

(6)

Le Comhaontú ilpháirtithe EDT maidir le Soláthar Rialtais agus comhaontuithe trádála an Aontais ina bhfuil forálacha maidir le soláthar poiblí, ní dhéantar foráil ach do rochtain a bheith ag oibreoirí eacnamaíocha an Aontais ar mhargaí soláthair phoiblí nó lamháltais na dtríú tíortha atá ina bpáirtithe sna comhaontuithe sin.

(7)

I gcás inar páirtí i gComhaontú EDT maidir le Soláthar Rialtais í tríú tír nó má tá comhaontú trádála tugtha i gcrích aici leis an Aontas ina bhfuil forálacha maidir le soláthar poiblí, ba cheart don Choimisiún cloí leis na sásraí comhairliúcháin nó leis na nósanna imeachta um réiteach díospóide a leagtar amach sna comhaontuithe sin i gcás ina mbaineann na cleachtais shriantacha le soláthar poiblí atá cumhdaithe ag gealltanais maidir le rochtain ar an margadh a thug an tríú tír sin i leith an Aontais.

(8)

Tá leisce ar chuid mhór tríú tíortha iomaíocht idirnáisiúnta a ligean isteach ina margaí soláthair phoiblí nó lamháltais, nó feabhas a chur ar an rochtain ar na margaí sin. Dá thoradh sin, bíonn oibrithe eacnamaíocha an Aontais faoi réir cleachtais shriantacha soláthair phoiblí i gcuid mhór tríú tíortha, rud is cúis le caillteanas mórdheiseanna trádála.

(9)

Le Rialachán (AE) Uimh. 654/2014 ó Pharlaimint na hEorpa agus ón gComhairle (3), leagtar síos rialacha agus nósanna imeachta chun feidhmiú chearta an Aontais a áirithiú faoi chomhaontuithe trádála idirnáisiúnta arna dtabhairt i gcrích ag an Aontas. Níl rialacha na nósanna imeachta den sórt sin ann i dtaca le conas déileáil le hoibreoirí eacnamaíocha, earraí agus seirbhísí nach gcumhdaítear le comhaontuithe idirnáisiúnta den sórt sin.

(10)

Le gealltanais idirnáisiúnta maidir le rochtain ar an margadh a thug an tAontas i leith tríú tíortha i réimse an tsoláthair phoiblí agus na lamháltas, éilítear, inter alia, go gcaithfear go cothrom le hoibreoirí eacnamaíocha ó na tríú tíortha sin. Dá bhrí sin, ní féidir feidhm a bheith ag bearta arna nglacadh faoin Rialachán seo ach amháin maidir le hoibreoirí eacnamaíocha, earraí nó seirbhísí ó thríú tíortha nach páirtithe iad i gComhaontú ilpháirtithe EDT maidir le Soláthar Rialtais nó i gcomhaontuithe trádála déthaobhacha nó iltaobhacha arna dtabhairt i gcrích leis an Aontas lena n-áirítear gealltanais i leith rochtain ar mhargaí soláthair phoiblí nó lamháltais, nó maidir le hoibreoirí eacnamaíocha, earraí nó seirbhísí ó thíortha ar páirtithe iad sna comhaontuithe sin, ach sin i ndáil le nósanna imeachta soláthair phoiblí le haghaidh earraí, seirbhísí nó lamháltais nach gcumhdaítear leis na comhaontuithe sin agus i ndáil leis sin amháin. I gcomhréir le Treoracha 2014/23/AE (4), 2014/24/AE (5) agus 2014/25/AE (6) ó Pharlaimint na hEorpa agus ón gComhairle agus mar a soiléiríodh le teachtaireacht ón gCoimisiún an 24 Iúil 2019 dar teideal Guidance on the participation of third country bidders and goods in the EU procurement market [Treoir maidir le rannpháirtíocht tairgeoirí agus earraí ó thríú tíortha i margadh soláthair an Aontais], oibreoirí eacnamaíocha ó thríú tíortha nach bhfuil aon chomhaontú acu lena bhforáiltear d’oscailt mhargadh soláthair an Aontais nó nach bhfuil a n-earraí, a seirbhísí ná a n-oibreacha cumhdaithe le comhaontú den sórt sin, níl slánrochtain acu ar nósanna imeachta soláthair san Aontas agus féadfar iad a eisiamh.

(11)

Chun aon bheart arna ghlacadh faoin Rialachán seo a chur i bhfeidhm go héifeachtach d’fhonn feabhas a chur ar an rochtain atá ag oibreoirí eacnamaíocha an Aontais ar mhargaí soláthair phoiblí nó lamháltais tríú tíortha áirithe, tá gá le sraith shoiléir rialacha tionscnaimh d’oibreoirí eacnamaíocha, d’earraí agus do sheirbhísí.

(12)

Ba cheart tionscnamh earra a chinneadh i gcomhréir le hAirteagal 60 de Rialachán (AE) Uimh. 952/2013 ó Pharlaimint na hEorpa agus ón gComhairle (7).

(13)

Ba cheart tionscnamh seirbhíse a chinneadh ar bhonn thionscnamh an duine nádúrtha nó dhlítheanaigh a bhfuil an tseirbhís á soláthar aige nó aici. Ba cheart tionscnamh duine dhlítheanaigh a mheas mar an tír ar faoina dlíthe a bunaíodh nó a eagraíodh ar shlí eile duine dlítheanach agus ar ina críoch atá an duine dlítheanach a gabháil d’oibríochtaí substainteacha gnó. Daoine dlítheanacha a bunaíodh nó a eagraíodh ar shlí eile faoi dhlíthe Ballstáit, níor cheart a mheas gur san Aontas atá a dtionscnamh ach amháin má tá nasc díreach éifeachtach acu le geilleagar Ballstáit. Chun imchéimniú féideartha ar bheart de chuid na hIonstraime Soláthair Phoiblí Idirnáisiúnta (IPI) a sheachaint, tionscnamh daoine dlítheanacha atá faoi rialú coigríche nó faoi úinéireacht choigríche nach bhfuil ag gabháil d’oibríochtaí substainteacha gnó ar chríoch tríú tír nó ar chríoch Ballstáit, ar faoina dlíthe nó dhlíthe a bunaíodh nó a eagraíodh ar shlí eile iad, féadfar gur gá an tionscnamh sin a chinneadh freisin trí ghnéithe eile a chur san áireamh, amhail tionscnamh na n-úinéirí nó daoine eile a fheidhmíonn tionchar ceannasach ar an duine dlítheanach sin.

(14)

Agus measúnú á dhéanamh ag an gCoimisiún cé acu an bhfuil bearta sonracha nó cleachtais shonracha i dtríú tír a d’fhéadfadh lagú a dhéanamh ar an rochtain atá ag oibreoirí eacnamaíocha, earraí nó seirbhísí an Aontais ar na margaí soláthair phoiblí nó lamháltais, ba cheart dó scrúdú a dhéanamh ar a mhéid a dhéanann dlíthe, rialacha nó bearta eile maidir le margaí soláthair phoiblí nó lamháltas an tríú tír lena mbaineann trédhearcacht a áirithiú i gcomhréir le caighdeáin idirnáisiúnta, agus nach bhfuil srianta tromchúiseacha athfhillteacha i gcoinne oibreoirí eacnamaíocha, earraí, nó seirbhísí an Aontais mar thoradh orthu. Lena chois sin, ba cheart don Choimisiún scrúdú a dhéanamh ar a mhéid a dhéanann údaráis chonarthacha nó eintitis chonarthacha aonair tríú tír cleachtais shriantacha a ghlacadh nó a choimeád ar bun i gcoinne oibreoirí eacnamaíocha, earraí nó seirbhísí an Aontais.

(15)

Ba cheart don Choimisiún a bheith in ann imscrúdú trédhearcach a thionscnamh aon uair ar bhearta nó cleachtais a líomhnaítear a bheith sriantach arna gcoimeád ar bun nó arna nglacadh ag tríú tír.

(16)

I bhfianaise chuspóir foriomlán beartais an Aontais tacú le fás eacnamaíoch na dtíortha is lú forbairt agus a lánpháirtiú i slabhraí luacha domhanda, níor cheart don Choimisiún tús a chur le himscrúdú i ndáil le tíortha a bhaineann tairbhe as an socrú “Aon rud Seachas Airm” a liostaítear in Iarscríbhinn IV de Rialachán (AE) Uimh. 978/2012 ó Pharlaimint na hEorpa agus ón gComhairle (8).

(17)

Agus an t-imscrúdú á dhéanamh aige, ba cheart don Choimisiún a iarraidh ar an tríú tír lena mbaineann dul i mbun comhairliúchán d’fhonn deireadh a chur le haon bhearta sriantacha nó cleachtais shriantacha nó d’fhonn iad a leigheas agus ar an gcaoi sin feabhas a chur ar na deiseanna tairisceana atá ag oibreoirí eacnamaíocha, earraí agus seirbhísí an Aontais maidir le margaí soláthair phoiblí nó lamháltais sa tríú tír sin.

(18)

Tá sé ríthábhachtach an t-imscrúdú a dhéanamh ar bhealach trédhearcach. Ba cheart, dá bhrí sin, tuarascáil ar phríomhthorthaí an imscrúdaithe a chur ar fáil don phobal.

(19)

I gcás ina ndearbhaítear leis an imscrúdú gurb ann do bhearta sriantacha nó do chleachtais shriantacha, agus mura rud é go leanfaidh gníomhaíochtaí ceartaitheacha sásúla as na comhairliúcháin leis an tríú tír lena mbaineann, ar gníomhaíochtaí iad a leigheasann an lagú tromchúiseach agus athfhillteach ar rochtain d’oibreoirí eacnamaíocha, earraí agus seirbhísí an Aontais laistigh d’achar ama réasúnta nó i gcás ina ndiúltaíonn an tríú tír lena mbaineann dul i mbun comhairliúchán, ba cheart don Choimisiún beart IPI a ghlacadh faoin Rialachán seo i bhfoirm coigeartú scóir nó tairiscintí a eisiamh má mheasann sé gur chun leasa an Aontais é a ghlacadh.

(20)

An cinneadh i dtaobh an chun leasa an Aontais beart IPI a ghlacadh, ba cheart é a bheith bunaithe ar léirthuiscint ar na leasanna éagsúla uile ina n-iomláine, lena n-áirítear leasanna oibreoirí eacnamaíocha an Aontais. Ba cheart don Choimisiún measúnú a dhéanamh ar na hiarmhairtí a bhaineann le beart den sórt sin a ghlacadh le hais thionchar an bhirt sin ar leasanna níos leithne an Aontais. Tá sé tábhachtach go dtabharfaí aird ar leith ar an gcuspóir ginearálta cómhalartacht a bhaint amach trí mhargaí tríú tíortha a oscailt agus deiseanna rochtana ar an margadh a fheabhsú d’oibreoirí eacnamaíocha an Aontais. Ba cheart an cuspóir maidir le haon ualach riaracháin nach bhfuil gá leis a theorannú d’údaráis chonarthacha agus d’eintitis chonarthacha mar aon le hoibreoirí eacnamaíocha a chur san áireamh freisin.

(21)

Níor cheart coigeartú scóir a chur i bhfeidhm ach amháin chun meastóireacht a dhéanamh ar thairiscintí arna dtíolacadh ag oibreoirí eacnamaíocha de thionscnamh an tríú tír lena mbaineann. Le beart den sórt sin, níor cheart difear a dhéanamh don phraghas atá le híoc faoin gconradh atá le déanamh leis an tairgeoir a n-éireoidh leis nó léi. Nuair a chinneann údaráis chonarthacha nó eintitis chonarthacha a meastóireacht ar thairiscintí a bhunú ar phraghas nó ar chostas mar an t-aon chritéar dámhachtana conartha, ba cheart leibhéal an choigeartaithe scóir a shocrú ar leibhéal atá i bhfad níos airde chun éifeachtacht inchomparáide an bhirt IPI a áirithiú.

(22)

Ba cheart feidhm a bheith ag bearta IPI maidir le nósanna imeachta soláthair phoiblí a thagann faoi raon feidhme an Rialacháin seo, lena n-áirítear creat-chomhaontuithe agus córais dhinimiciúla cheannaigh. I gcás ina ndéantar conradh sonrach a dhámhachtain faoi chóras dinimiciúil ceannaigh a bhfuil feidhm ag beart IPI maidir leis, ba cheart feidhm a bheith ag bearta IPI maidir leis an gconradh sonrach sin freisin. Níor cheart feidhm a bheith ag bearta IPI, áfach, maidir le conarthaí atá faoi bhun tairseach áirithe d’fhonn teorainn a chur leis an ualach foriomlán riaracháin atá ar údaráis chonarthacha agus ar eintitis chonarthacha. Chun cur i bhfeidhm dúbailte féideartha bhearta IPI a sheachaint, níor cheart feidhm a bheith ag bearta den sórt sin maidir le conarthaí arna ndámhachtain bunaithe ar chreat-chomhaontú más rud é gur cuireadh bearta IPI i bhfeidhm cheana ag an gcéim a tugadh an creat-chomhaontú sin i gcrích.

(23)

Chun imchéimniú féideartha ar bheart IPI a sheachaint, ba cheart oibleagáidí iomchuí a fhorchur ar thairgeoirí a n-éireoidh leo. Níor cheart feidhm a bheith ag na hoibleagáidí sin ach amháin maidir le nósanna imeachta soláthair phoiblí atá faoi réir beart IPI, agus maidir le conarthaí arna ndámhachtain bunaithe ar chreat-chomhaontú i gcás ina bhfuil luach conarthaí den sórt sin cothrom le tairseach áirithe nó os a chionn agus i gcás ina bhfuil an creat-chomhaontú sin faoi réir beart IPI.

(24)

I gcás ina dtéann tríú tír i mbun caibidlíocht substainteach a bhfuil dul chun cinn déanta ina leith leis an Aontas maidir le rochtain ar an margadh i réimse an tsoláthair phoiblí, d’fhonn deireadh a chur leis an lagú ar rochtain oibreoirí eacnamaíocha, earraí nó sheirbhísí an Aontais ar a margaí soláthair phoiblí nó lamháltais nó d’fhonn é a leigheas, ba cheart don Choimisiún a bheith in ann, le linn na caibidlíochta, bearta IPI a chur ar fionraí a thagraíonn don tríú tír lena mbaineann.

(25)

Tá sé tábhachtach go gcuirfeadh údaráis chonarthacha agus eintitis chonarthacha bearta IPI i bhfeidhm go haonfhoirmeach san Aontas. Chun éagsúlacht acmhainneacht riaracháin na n-údarás conarthach agus na n-eintiteas conarthach a chur san áireamh, ba cheart do na Ballstáit a bheith in ann an díolúine ó bhearta IPI a iarraidh do liosta teoranta d’údaráis chonarthacha áitiúla faoi dhiancheanglais áirithe. Agus é ag seiceáil liostaí na n-údarás conarthach áitiúil mar a mhol na Ballstáit, tá sé tábhachtach go gcuirfeadh an Coimisiún cás ar leith na n-údarás conarthach sin san áireamh maidir le, inter alia, leibhéil an daonra agus an staid gheografach. Le díolúine den sórt sin, d’fhéadfaí tagairt a dhéanamh freisin do nósanna imeachta soláthair phoiblí ar cheart do na húdaráis chonarthacha sin a bheith in ann a chur i gcrích faoi chreat-chomhaontuithe nó faoi chórais dhinimiciúla cheannaigh.

(26)

Tá sé ríthábhachtach rochtain a bheith ag údaráis chonarthacha agus eintitis chonarthacha, ag praghas iomaíoch, ar raon táirgí ardchaighdeáin a chomhlíonann a gceanglais cheannaigh. Dá bhrí sin, ba cheart d’údaráis chonarthacha agus eintitis chonarthacha a bheith in ann gan bearta IPI a chur i bhfeidhm lena gcuirtear teorainn le rochtain earraí agus seirbhísí neamhchumhdaithe i gcás nach bhfuil aon earraí nó seirbhísí de chuid an Aontais nó atá cumhdaithe ann a chomhlíonann ceanglais an údaráis chonarthaigh nó an eintitis chonarthaigh nó chun riachtanais bhunriachtanacha beartais phoiblí a choimirciú, mar shampla maidir le cúiseanna sáraitheacha a bhaineann leis an tsláinte phoiblí nó cosaint an chomhshaoil. Nuair a chuireann na húdaráis chonarthacha agus na heintitis chonarthacha na heisceachtaí sin i bhfeidhm, ba cheart an Coimisiún a chur ar an eolas faoi sin ar bhealach tráthúil agus cuimsitheach ionas gur féidir faireachán iomchuí a dhéanamh ar chur chun feidhme an Rialacháin seo.

(27)

I gcás ina ndéanann údaráis chonarthacha nó eintitis chonarthacha bearta IPI a mhífheidhmiú, rud a dhéanann difear diúltach do dheiseanna oibreoirí eacnamaíocha ceart a bheith acu páirt a ghlacadh sa nós imeachta soláthair phoiblí, ba cheart Treoracha 89/665/CEE (9) agus 92/13/CEE (10) ón gComhairle a bheith infheidhme. Ba cheart do na hoibreoirí eacnamaíocha a ndéantar difear dóibh a bheith in ann nós imeachta athbhreithniúcháin a thionscnamh i gcomhréir leis an dlí náisiúnta lena gcuirtear na Treoracha sin chun feidhme más rud é, mar shampla, go measann na hoibreoirí eacnamaíocha sin gur cheart oibreoir eacnamaíoch atá san iomaíocht a eisiamh nó gur cheart tairiscint a rangú níos ísle de bharr beart IPI a chur i bhfeidhm. Ina theannta sin, ba cheart don Choimisiún a bheith in ann an sásra ceartaitheach a chur i bhfeidhm i gcomhréir le hAirteagal 3 de Threoir 89/665/CEE nó Airteagal 8 de Threoir 92/13/CEE.

(28)

Chun coinníollacha aonfhoirmeacha a áirithiú maidir leis an Rialachán seo a chur chun feidhme, ba cheart cumhachtaí cur chun feidhme a thabhairt don Choimisiún. Ba cheart na cumhachtaí sin a fheidhmiú i gcomhréir le Rialachán (AE) Uimh. 182/2011 ó Pharlaimint na hEorpa agus ón gComhairle (11).

(29)

Ba cheart an nós imeachta scrúdúcháin a úsáid chun gníomhartha cur chun feidhme a ghlacadh maidir le beart IPI a ghlacadh, a tharraingt siar, a chur ar fionraí nó a chur i bhfeidhm arís nó maidir le síneadh a chur leis, agus ba cheart don Choiste um Bacainní Trádála a bunaíodh le Rialachán (AE) 2015/1843 ó Pharlaimint na hEorpa agus ón gComhairle (12) (“an Rialachán maidir le Bacainní Trádála”) cúnamh a thabhairt don Choimisiún. Ós rud é go bhféadfadh éifeachtaí éagsúla a bheith ag bearta IPI ar mhargaí soláthair phoiblí nó lamháltais an Aontais, ba cheart oiriúnú a dhéanamh ar an nós imeachta coiste is infheidhme maidir le dréachtghníomhartha cur chun feidhme lena ndéantar foráil maidir le tairiscintí a eisiamh agus i gcásanna den sórt sin, ba cheart feidhm a bheith ag Airteagal 5(4), an tríú fomhír, de Rialachán (AE) Uimh. 182/2011.

(30)

Más gá agus i gcás ábhair a dhéanann difear do chreat dlíthiúil an Aontais maidir le soláthar poiblí, ba cheart don Choimisiún a bheith in ann comhairle a lorg ón gCoiste Comhairleach um Chonarthaí Poiblí a bunaíodh le Cinneadh 71/306/CEE ón gComhairle (13).

(31)

Níor cheart faisnéis a fhaightear de bhun an Rialacháin seo a úsáid ach amháin chun na críche ar ina leith a iarradh í agus urraim chuí á tabhairt do na ceanglais is infheidhme de chuid an Aontais agus do na ceanglais náisiúnta is infheidhme maidir le cosaint sonraí agus rúndacht. Ba cheart feidhm dá réir a bheith ag Rialachán (CE) Uimh. 1049/2001 ó Pharlaimint na hEorpa agus ón gComhairle (14) agus ag Airteagal 28 de Threoir 2014/23/AE, ag Airteagal 21 de Threoir 2014/24/AE agus ag Airteagal 39 de Threoir 2014/25/AE.

(32)

I gcomhréir le Comhaontú Idirinstitiúideach an 13 Aibreán 2016 maidir le Reachtóireacht Níos Fearr (15) agus d’fhonn, inter alia, an t-ualach riaracháin, go háirithe ar na Ballstáit, a laghdú, ba cheart don Choimisiún athbhreithniú rialta a dhéanamh ar raon feidhme, feidhmiú agus éifeachtúlacht an Rialacháin. Le hathbhreithniú den sórt sin, thabharfaí aghaidh, inter alia, ar an bhféidearthacht úsáid a bhaint as aon mhodh atá ar fáil chun malartú faisnéise a éascú, lena n-áirítear saoráidí soláthair leictreonaigh amhail na foirmeacha caighdeánacha chun fógraí a fhoilsiú i réimse an tsoláthair phoiblí, de bhun Rialachán Cur Chun Feidhme (AE) 2019/1780 ón gCoimisiún (16), chomh maith leis an ualach a bhíonn ar údaráis chonarthacha agus eintitis chonarthacha agus an Rialachán seo á chur i bhfeidhm acu. Ba cheart don Choimisiún a mheasúnú a thuairisciú do Pharlaimint na hEorpa agus don Chomhairle agus, i gcás inarb iomchuí, ba cheart dó tograí reachtacha a thíolacadh.

(33)

Rialacha agus prionsabail maidir leis an soláthar poiblí is infheidhme maidir le conarthaí poiblí arna ndámhachtain ag institiúidí de chuid an Aontais as a stuaim féin, leagtar amach i Rialachán (AE, Euratom) 2018/1046 ó Pharlaimint na hEorpa agus ón gComhairle (17) iad agus, dá bhrí sin, ní thagann siad faoi raon feidhme an Rialacháin seo. Faoi Rialachán (AE, Euratom) 2018/1046, tá na rialacha sin bunaithe ar na rialacha a leagtar amach i dTreoracha 2014/23/AE agus 2014/24/AE. Dá bhrí sin, is iomchuí a mheas, i gcomhthéacs athbhreithniú ar Rialachán (AE, Euratom) 2018/1046, cibé ar cheart na rialacha agus na prionsabail a leagtar amach sa Rialachán seo a chur i bhfeidhm freisin maidir le conarthaí poiblí arna ndámhachtain ag institiúidí de chuid an Aontais.

(34)

Chun cur i bhfeidhm an Rialacháin seo ag údaráis chonarthacha, eintitis chonarthacha agus oibreoirí eacnamaíocha a éascú, ba cheart don Choimisiún treoirlínte a eisiúint. Ba cheart faisnéis a sholáthar sna treoirlínte sin, go háirithe, faoi na coincheapa maidir le tionscnamh daoine nádúrtha agus dlítheanacha, tionscnamh earraí agus seirbhísí, oibleagáid bhreise agus cur i bhfeidhm na bhforálacha sin faoi chuimsiú an Rialacháin seo. I bhfianaise chuspóir foriomlán beartais an Aontais tacú le fiontair bheaga agus mheánmhéide (FBManna), ba cheart a chur san áireamh sna treoirlínte sin riachtanais shonracha faisnéise FBManna agus an Rialachán seo á chur i bhfeidhm acu d’fhonn nach gcuirfí ró-ualach orthu,

(35)

I gcomhréir le prionsabal na comhréireachta agus chun an bunchuspóir a ghnóthú arb é atá ann feabhas a chur ar an rochtain atá ag oibreoirí eacnamaíocha, earraí agus seirbhísí an Aontais ar mhargaí soláthair phoiblí nó lamháltais tríú tíortha trí bhearta maidir le soláthar neamhchumhdaithe a bhunú, is gá agus is iomchuí rialacha a leagan síos maidir le nósanna imeachta don Choimisiún ionas gur féidir leis imscrúduithe a dhéanamh ar bhearta nó cleachtais líomhnaithe tríú tír i gcoinne oibreoirí eacnamaíocha, earraí agus seirbhísí an Aontais, agus dul i mbun comhairliúchán leis na tríú tíortha lena mbaineann. Ní théann an Rialachán seo thar a bhfuil riachtanach chun na cuspóirí arna saothrú a ghnóthú, i gcomhréir le hAirteagal 5(4) CAE,