—

Ir-rikorrenti ssostni li l-Bord tal-Appell kiser forma proċedurali sostanzjali meta llimita lilu nnifsu għal stħarriġ tal-legalità limitat, meta kellu jwettaq stħarriġ amministrattiv sħiħ tad-deċiżjoni triklosan. Skont ir-rikorrenti, il-Bord tal-Appell kiser ukoll żewġ forom proċedurali sostanzjali billi warrab diversi argumenti fundamentali u provi xjentifiċi prodotti mir-rikorrenti, mingħajr ma eżaminahom fil-mertu. Skont ir-rikorrenti, il-Bord tal-Appell, b’hekk, mhux biss naqas milli jeżerċita s-setgħa ta’ stħarriġ amministrattiv tiegħu, iżda wkoll kiser id-drittijiet tad-difiża tar-rikorrenti.

—

F’dak li jikkonċerna t-test fuq il-ġrieden, ir-rikorrenti ssostni li kemm l-ECHA kif ukoll il-Bord tal-Appell, minkejja li ammettew id-differenzi li jeżistu bejn is-sistema tat-tirojde tal-ġrieden u dik tal-bniedem, essenzjalment ibbażaw ruħhom fuq data li toriġina minn studji magħmula fuq il-ġrieden, fir-rigward tal-effetti potenzjali fuq it-tiroxin tal-bniedem (filwaqt li studji eżistenti magħmula fuq il-bniedem kienu jistabbilixxu l-assenza ta’ tali effetti). Skont ir-rikorrenti, id-deċiżjoni trikolosan, b’hekk, (i) tonqos milli tieħu inkunsiderazzjoni l-informazzjoni relevanti kollha disponibbli, (ii) hija vvizzjata b’kuntradizzjonijiet, (iii) hija bbażata fuq provi inkoerenti u, għall-imsemmija raġunijiet, hija vvizzjata bi żball manifest ta’ evalwazzjoni fir-rigward tan-neċessità tat-test fuq il-ġrieden, sa fejn tittratta tħassib dwar allegata newrotossiċità għall-iżvilupp tal-bniedem. Fir-rigward tal-konklużjonijiet dwar it-tossiċità fil-qasam tar-riproduzzjoni sesswali li jisabu fl-istudju fuq il-ġrieden, ir-rikorrenti tqis, barra minn hekk, li kemm l-ECHA kif ukoll il-Bord tal-Appell naqsu wkoll milli jieħdu inkunsiderazzjoni l-informazzjoni kollha disponibbli u bbażaw ruħhom fuq provi inkoerenti. Skont ir-rikorrenti, l-ECHA u l-Bord tal-Appell, b’hekk, wettqu żball manifest ta’ evalwazzjoni fir-rigward tal-bżonn tat-test fuq il-ġrieden għall-konklużjoni dwar it-tossiċità riproduttiva. Skont ir-rikorrenti, it-test fuq il-ġrieden huwa manifestament mhux xieraq ukoll minħabba l-fatt li dawn ir-riżultati ma jistgħux jgħinu lill-ECHA titfa’ dawl fuq it-tħassib relatat mal-allegata perturbazzjoni endokrinali fil-bniedem. Fl-aħħar nett, ir-rikorrenti ssostni li d-deċiżjoni triklosan hija illegali sa fejn il-Bord tal-Appell kkonferma t-test fuq il-ġrieden mingħajr ma vverifika jekk ir-rekwiżiti li jirriżultaw mill-prinċipju ta’ proporzjonalità kienux sodisfatti; b’mod partikolari il-Bord tal-Appell naqas milli jistħarreġ jekk mezzi inqas vinkolanti kinux disponibbli sabiex jintefa’ dawl fuq it-tħassib relatat mal-allegat rwol tat-triklosan fil-qasam tal-perturbazzjoni endokrinali.

—

F’dak li jikkonċerna t-test fuq il-ħut, ir-rikorrenti ssostni li (i) il-Bord tal-Appell ma eżerċitax effettivament is-setgħa diskrezzjonali tiegħu u ma ddeterminax jekk, fid-dawl tal-provi xjentifiċi disponibbli, kienx jeżisti “riskju potenzjali” li seta’ jiġġustifika li jkunu meħtieġa testijiet supplimentari; (ii) l-ECHA u l-Bord tal-Appell (it-tnejn li huma) naqsu milli juru li, fid-dawl tal-provi xjentifiċi disponibbli, kien jeżisti riskju potenzjali ta’ perturbazzjoni endokrinali li kien jiġġustifika li jsiru testijiet supplimentari fuq il-ħut; u (iii) l-ECHA u l-Bord tal-Appell (it-tnejn li huma) dawru l-oneru tal-prova u kisru l-Artikolu 25(1) tar-Regolament Nru 1907/2006, billi eżiġew li tkun ir-rikorrenti li tipprova l-assenza ta’ tali riskju.

—

F’dak li jikkonċerna t-test tal-persistenza, ir-rikorrenti ssostni li l-ECHA u l-Bord tal-Appell, billi eżiġew li r-rikorrenti twettaq dan it-test kemm fl-ilma ħelu kif ukoll fl-ilma baħar sabiex allegatament titfa’ dawl fuq riskju potenzjali ta’ persistenza tat-triklosan fl-ambjent, naqsu milli jieħdu debitament inkunsiderazzjoni kemm l-oneru tal-prova dwar il-persistenza tat-triklosan u l-eżiġenza li jiġu eżaminati l-kundizzjonijiet pertinenti għall-ambjent b’applikazzjoni tal-Anness XIII tar-Regolament Nru 1907/2006. Ir-rikorrenti ssostni, barra minn hekk, li l-ECHA u l-Bord tal-Appell, billi jeżiġu li r-rikorrenti twettaq it-test tal-persistenza fl-ilma pelaġiku (jiġifieri l-ilma ċar mingħajr sediment), naqsu wkoll milli josservaw il-kriterju ċar li jinsab fl-Anness XIII tar-Regolament Nru 1907/2006 li jimponi li jiġu eżaminati l-provi li jirriflettu kundizzjonijiet “rilevanti” għall-ambjent. Barra minn hekk, ir-rikorrenti ssostni li kemm l-ECHA kif ukoll il-Bord tal-Appell, wara li ddeċidew li t-test derogatorju ta’ simulazzjoni għandu jirrifletti kundizzjonijiet relevanti għall-ambjent, naqsu milli jeżerċitaw ġudizzju espert xieraq sabiex jidentifikaw il-kundizzjonijiet ta’ test xierqa.