12.4.2008   

MT

Il-Ġurnal Uffiċjali ta’ l-Unjoni Ewropea

C 92/15

1)

Ir-Regolament tal-Kunsill (KEE) Nru 1788/2003 (1) tad-29 ta' Settembru 2003, li jistabbilixxi taxxa supplimentari fuq il-produzzjoni tal-ħalib u tal-prodotti tal-ħalib li jeċċedu l-kwota nazzjonali attribwita, mingħajr ma jieħu in kunsiderazzjoni l-aġġornament perijodiku tal-kwantità attribwita lil kull pajjiż Komunitarju wara kontroll konkret tal-produzzjoni rispettiva tagħhom, huwa kompatibbli ma' l-Artikolu 32 tat-Trattat u ma' l-iskopijiet tal-politika agrikola komuni stipulati f'dan l-Artikolu, fosthom it-tkabbir tal-produzzjoni agrikola, l-iżvilupp tal-progress tekniku, l-assigurazzjoni ta' l-iżvilupp razzjonali ta' produzzjoni agrikola anke bħala l-aħjar utilizzazzjoni possibbli tal-fatturi ta' produzzjoni, speċjalment tal-ħaddiema, peress li dan il-mekkaniżmu japplika wkoll għall-produtturi Taljani tal-ħalib u tal-prodotti tal-ħalib u b'hekk jippreġudikalhom kemm livell ta' għixien xieraq kif ukoll l-iżvilupp minħabba nuqqas ta' ħlas xieraq tal-fatturi ta' produzzjoni u anke għaliex fir-realtà l-Italja hi pajjiż bi produzzjoni nieqsa tal-ħalib (ara r-Rapport tal-Gvern, […], paragrafu 6.5), kostrett li jimporta l-materja prima biex isostni l-industriji ta' l-ipproċessar u tal-kummerċjalizzazzjoni ta' prodotti ta' kwalità (ara r-Rapport fuq l-agrikoltura tal-15 ta' Frar 2004, anness)?

2)

Ir-Regolament KEE Nru 1788/2003 iċċitat huwa kompatibbli ma' l-Artikolu 33 tat-Trattat KE fejn dan jipprovdi għall-organizzazzjoni tas-suq komuni, imma fl-istess ħin jeskludi kull diskriminazzjoni bejn produtturi jew konsumaturi tal-Komunità, filwaqt li l-applikazzjoni uniformi tat-taxxa supplimentari mingħajr distinzjoni effettiva bejn produtturi bi produzzjoni nieqsa u dawk bi produzzjoni żejda, tispiċċa biex tiddiskrimina kontra l-produtturi Taljani li jappartjenu għal pajjiż bi produzzjoni nieqsa tal-ħalib?

3)

Ir-Regolament KEE Nru 1788/2003 iċċitat huwa kompatibbli ma' l-Artikolu 34 tat-Trattat fejn dan jipprovdi li l-kisba ta' l-għanijiet previsti fl-Artikolu 33, “għandha teskludi kull diskriminazzjoni bejn il-produtturi u l-konsumaturi tal-Komunità” filwaqt li tali diskriminazzjoni hija maħluqa mir-regolament li, għall-finijiet tat-taxxa supplimentari, jitlob kontribuzzjoni uniformi kemm mill-produtturi ta' pajjiżi bi produzzjoni żejda kif ukoll minn dawk bi produzzjoni nieqsa bħall-Italja?

4)

Ir-Regolament tal-Kunsill Nru 1788/2003 tad-29 ta' Settembru 2003 huwa kompatibbli mal-prinċipju tal-proporzjonalità rikonoxxut mill-Artikolu 5 tat-Trattat fejn dan jillimita l-azzjoni tal-Komunità għal “dak li hu neċessarju biex jintlaħqu l-għanijiet ta' dan it-Trattat” filwaqt li l-applikazzjoni uniformi tat-taxxa supplimentari tmur oltre l-iskop ta' l-organizzazzjoni komuni tas-suq għaliex tipperpetwa fil-konfront tal-medja tal-bdiewa Taljani produzzjoni baxxa, dħul baxx u l-ħtieġa permanenti ta' għajnuna pubblika?