13.9.2013   

MT

Il-Ġurnal Uffiċjali tal-Unjoni Ewropea

CE 264/96

—

wara li kkunsidra l-Artikolu 123 tar-Regoli ta' Proċedura tiegħu,

A.

billi l-mard li jista' jiġi prevenut permezz ta' vaċċini, inklużi l-epatite, il-ħosba, il-mard tal-pnewmokokku, id-dijarrea tar-rotavirus, il-poljo u d-deni tas-suffejra, jikkostitwixxu kawża ewlenija ta' mwiet infantili fil-pajjiżi li qed jiżviluppaw;

B.

billi l-prevalenza tal-mard hija ostakolu għall-kisba ta' żvilupp soċjoekonomiku sostenibbli;

C.

billi l-mard li jista' jiġi prevenut permezz ta' vaċċini huwa magħruf li jaffetwa lin-nisa u lill-irġiel b'mod differenti;

D.

billi n-nisa jiffurmaw nofs il-popolazzjoni globali, u billi l-iżvilupp u s-saħħa ma jistgħux jintlaħqu jekk il-vuċi tagħhom tiġi injorata;

E.

billi l-kura tas-saħħa bażika – l-isptarijiet, it-tobba, l-infermiera, it-tagħmir mediku eċċ. - hija ta' importanza vitali u m'għandhiex tiġi traskurata;

F.

billi l-Alleanza Globali għall-Vaċċinazzjonijiet u l-Immunizzazzjoni (GAVI) ġiet rikonoxxuta bħala mezz effiċjenti ħafna li bih jistgħu jintlaħqu għanijiet umanitarji u ta' żvilupp;

G.

billi, fl-aħħar għaxar snin, GAVI għamlet progress kbir biex jiġu salvati l-ħajjiet u tiġi mkabbra l-kopertura tal-immunizzazzjoni fl-ifqar pajjiżi fid-dinja, u billi, bħala riżultat, 288 miljun tifel u tifla addizzjonali ġew immunizzati u 'l fuq minn ħames miljun mewta futura ġiet evitata;

H.

billi, minkejja dawn l-avvanzi, 1.7 miljun tifel u tifla jmutu kull sena minn mard li jista' jiġi prevenut permezz ta' vaċċini;

1.

Jifraħ lill-Kummissjoni għall-appoġġ li tat lill-GAVI permezz tal-Istrument ta' Kooperazzjoni għall-Iżvilupp u l-Fond Ewropew għall-Iżvilupp bejn l-2003 u l-2012;

2.

Iħeġġeġ lill-Kummissjoni biex turi impenn kontinwu fl-azzjonijiet esterni futuri tagħha biex jitnaqqas in-numru ta' mwiet minn mard li jista' jiġi prevenut permezz ta' vaċċini;

3.

Jagħti istruzzjonijiet lill-President tiegħu biex jgħaddi din id-dikjarazzjoni, flimkien mal-ismijiet tal-firmatarji (1), lill-parlamenti tal-Istati Membri.