This document is an excerpt from the EUR-Lex website
Document 32006R0953
Council Regulation (EC) No 953/2006 of 19 June 2006 amending Regulation (EC) No 1673/2000, as regards the processing aid for flax and hemp grown for fibre, and Regulation (EC) No 1782/2003, as regards hemp eligible for the single payment scheme
Regolament (KE) Nru 953/2006 tal-Kunsill tad- 19 Ġunju 2006 li jemenda r-Regolament (KE) Nru 1673/2000, rigward l-għajnuna għall-proċessar tal-kittien u tal-qanneb imkabbra għall-ħjut, u r-Regolament (KE) Nru 1782/2003, rigward il-qanneb eliġibbli għall-iskema ta' pagament uniku
Regolament (KE) Nru 953/2006 tal-Kunsill tad- 19 Ġunju 2006 li jemenda r-Regolament (KE) Nru 1673/2000, rigward l-għajnuna għall-proċessar tal-kittien u tal-qanneb imkabbra għall-ħjut, u r-Regolament (KE) Nru 1782/2003, rigward il-qanneb eliġibbli għall-iskema ta' pagament uniku
ĠU L 175, 29.6.2006, p. 1–3
(ES, CS, DA, DE, ET, EL, EN, FR, IT, LV, LT, HU, NL, PL, PT, SK, SL, FI, SV) Dan id-dokument ġie ppubblikat f’edizzjoni(jiet) speċjali
(BG, RO, HR)
ĠU L 294M, 25.10.2006, p. 276–278
(MT)
No longer in force, Date of end of validity: 31/12/2009; Impliċitament imħassar minn 32009R0073
25.10.2006 |
MT |
Il-Ġurnal Uffiċjali ta’ l-Unjoni Ewropea |
276 |
REGOLAMENT (KE) NRU 953/2006 TAL-KUNSILL
tad-19 ta' Ġunju 2006
li jemenda r-Regolament (KE) Nru 1673/2000, rigward l-għajnuna għall-proċessar tal-kittien u tal-qanneb imkabbra għall-ħjut, u r-Regolament (KE) Nru 1782/2003, rigward il-qanneb eliġibbli għall-iskema ta' pagament uniku
IL-KUNSILL TA' L-UNJONI EWROPEA,
Wara li kkunsidra t-Trattat li jistabbilixxi l-Komunità Ewropea, u b'mod partikolari t-tielet subparagrafu ta' l-Artikolu 37(2) tiegħu,
Wara li kkunsidra l-proposta mill-Kummissjoni,
Wara li kkunsidra l-opinjoni tal-Parlament Ewropew (1),
Billi:
(1) |
L-Artikolu 15(2) tar-Regolament tal-Kunsill (KE) Nru 1673/2000 tas-27 ta' Lulju 2000 dwar l-organizzazzjoni komuni tas-swieq tal-kittien u l-qanneb imkabbra għall-ħjut (2) jeħtieġ li l-Kummissjoni tressaq rapport lill-Parlament Ewropew u lill-Kunsill dwar l-għajnuna għall-proċessar, flimkien ma' proposti jekk ikun hemm bżonn. Fuq il-bażi ta' dak ir-rapport, huwa kunsiljabbli li s-sistema kurrenti tibqa' fis-seħħ sas-sena tas-suq 2007/2008, inklużivament. |
(2) |
L-għajnuna għall-proċessar għall-ħjut qosra tal-kittien u għall-ħjut tal-qanneb li ma jkunx fihom aktar minn 7,5 % ta' impuritajiet u ta' twarrib tapplika sas-sena tas-suq 2005/2006. Madankollu, fid-dawl tax-xejriet favorevoli tas-suq għal dan it-tip ta' ħjut taħt l-iskema kurrenti ta' għajnuna u bil-għan li jingħata kontribut għall-konsolidament ta' prodotti innovattivi u tal-postijiet tal-bejgħ tagħhom fis-suq, l-applikazzjoni ta' din l-għajnuna għandha tiġi estiża sas-sena tas-suq 2007/2008. |
(3) |
Ir-Regolament (KE) Nru 1637/2000 jipprovdi għal żieda fil-livell ta' l-għajnuna għall-proċessar tal-ħjut twal tal-kittien mis-sena tas-suq 2006/2007 'il quddiem. Ġaladarba l-għajnuna għall-proċessar għall-ħjut qosra qed tinżamm sas-sena tas-suq 2007/2008, l-għajnuna għall-proċessar għall-ħjut twal tal-kittien għandha tiġi limitata għal-livell kurrenti sas-sena tas-suq 2007/2008. |
(4) |
Bil-għan li tiġi promossa l-produzzjoni ta' ħjut qosra tal-kittien u ta' ħjut tal-qanneb ta' kwalità għolja, l-għajnuna qed tingħata lil ħjut li fihom massimu ta' 7,5 % ta' impuritajiet u ta' twarrib. Madankollu, l-Istati Membri jistgħu jidderogaw minn dan il-limitu u jagħtu għajnuna għall-proċessar tal-ħjut qosra tal-kittien li tkun fihom perċentwali ta' impuritajiet u ta' twarrib bejn 7,5 % u 15 %, u għall-ħjut tal-qanneb li tkun fihom perċentwali ta' impuritajiet u ta' twarrib bejn 7,5 % u 25 %. Ġaladarba din il-possibbiltà hija miftuħa biss sas-sena tas-suq 2005/2006, jeħtieġ li l-Istati Membri jingħataw il-possibbiltà li jidderogaw minn dak il-limitu għal sentejn oħra tas-suq. |
(5) |
Sabiex jiġu żgurati livelli raġonevoli ta' produzzjoni f'kull Stat Membru, jeħtieġ li jiġi estiż il-perjodu li fih japplikaw il-kwantitajiet garantiti nazzjonali. |
(6) |
L-għajnuna addizzjonali ilha xi żmien tappoġġa l-kontinwazzjoni tal-produzzjoni tradizzjonali tal-kittien f'ċerti reġjuni ta' l-Olanda, tal-Belġju u ta' Franza. Jeħtieġ li din l-għajnuna tranżizzjonali tiġi estiża sas-sena tas-suq 2007/2008, sabiex l-istrutturi ta' l-irziezet jibqgħu jitħallew jadattaw irwieħhom gradwalment għall-kundizzjonijiet il-ġodda tas-suq. |
(7) |
Il-Kummissjoni għandha tressaq rapport lill-Parlament Ewropew u lill-Kunsill kmieni biżżejjed qabel il-bidu tas-sena tas-suq 2008/2009 sabiex jiġi studjat jekk is-sistema kurrenti teħtieġx li tiġi adattata jew għandhiex tinżamm fil-futur kif inhi. |
(8) |
L-Artikolu 52 tar-Regolament tal-Kunsill (KE) Nru 1782/2003 tad-29 ta' Settembru 2003 li jistabbilixxi regoli komuni għal skemi diretti ta' appoġġ fi ħdan il-politika agrikola komuni u li jistabbilixxi ċerti skemi ta' appoġġ għall-bdiewa (3) jipprovdi li biss il-qanneb imkabbar għall-ħjut ikun eliġibbli għall-iskema ta' pagament uniku stabbilita taħt it-Titolu III ta' dak ir-Regolament. Huwa kunsiljabbli li jsir eliġibbli wkoll it-tkabbir tal-qanneb għal użi industrijali oħra. |
(9) |
B'kont meħud ta' l-amministrazzjoni annwali ta' pagamenti diretti, huwa kunsiljabbli li l-modifiki lill-kondizzjonijiet ta' eliġġibbiltà ta' l-iskema ta' pagament uniku japplikaw mill-1 ta' Jannar 2007. |
(10) |
Ir-Regolamenti (KE) Nru 1673/2000 u (KE) Nru 1782/2003 għandhom jiġu emendati kif meħtieġ, |
ADOTTA DAN IR-REGOLAMENT:
Artikolu 1
Ir-Regolament (KE) Nru 1673/2000 huwa b'dan emendat kif ġej:
(1) |
Fl-Artikolu 2, il-paragrafu 3 għandu jinbidel b'dan li ġej: “3. L-ammont ta' l-għajnuna għall-proċessar fuq kull tunnellata metrika ta' ħjut għandu jiġi stabbilit kie ġej:
|
(2) |
Fl-Artikolu 3(2), it-tieni subparagrafu għandu jinbidel b'dan li ġej: “Il-kwantitajiet nazzjonali garantiti għall-ħjut il-qosra tal-kittien u għall-ħjut tal-qanneb ma għandhomx jibqgħu japplikaw mis-sena tas-suq 2008/2009.”. |
(3) |
Fl-ewwel paragrafu ta' l-Artikolu 4, “2005/2006” għandha tinbidel b'“2007/2008”. |
(4) |
L-Artikolu 12 għandu jitħassar. |
(5) |
Il-paragrafu li ġej għandu jiżdied ma' l-Artikolu 15: “3. Il-Kummissjoni għandha tissottometti rapport lill-Parlament Ewropew u lill-Kunsill, jekk meħtieġ akkumpanjat bi proposti, kmieni biżżejjed sabiex il-miżuri proposti jkunu jistgħu jiġu implimentati matul is-sena tas-suq 2008/2009. Ir-rapport għandu jinkludi stima ta' l-impatt ta' l-għajnuna għall-proċessar fuq il-produtturi, fuq l-industrija tal-proċessar u s-suq tal-ħjut tessili. Għandu jeżamina l-possibbiltà li jiġu estiżi lil hinn mis-sena tas-suq 2007/2008 l-għajnuna għall-proċessar għall-ħjut qosra tal-kittien u għall-ħjut tal-qanneb u l-għajnuna addizzjonali, kif ukoll il-possibbiltà li din l-iskema ta' għajnuna tiġi integrata fil-qafas ġenerali ta' appoġġ għall-bdiewa taħt il-politika agrikola komuni stabbilita mir-Regolament (KE) Nru 1782/2003.”. |
Artikolu 2
L-Artikolu 52 tar-Regolament (KE) Nru 1782/2003 għandu jinbidel b'dan li ġej:
“Artikolu 52
Produzzjoni tal-qanneb
1. Fil-każ ta' produzzjoni tal-qanneb, il-varjetajiet użati għandu jkollhom kontenut ta' ‘tetrahydrocannabinol’ li ma jaqbiżx 0,2 %. L-Istati Membri għandhom jistabbilixxu sistema għall-verifika tal-kontenut ta' ‘tetrahydrocannabinol’ fil-prodotti mkabbra f'mill-inqas 30 % taż-żoni kultivati bil-qanneb. Madankollu, jekk Stat Membru jintroduċi sistema ta' approvazzjoni minn qabel għal tali kultivazzjoni, il-minimu għandu jkun 20 %.
2. Skond il-proċedura msemmija fl-Artikolu 144(2), l-għoti ta' pagamenti għandu jkun magħmul suġġett għall-użu ta' żrieragħ ċertifikati ta' ċerti varjetajiet.”.
Artikolu 3
Dan ir-Regolament għandu jidħol fis-seħħ fis-seba' jum wara dak tal-pubblikazzjoni tiegħu fil-Ġurnal Uffiċjali ta' l-Unjoni Ewropea.
Għandu jibda japplika mid-data tad-dħul fis-seħħ, ħlief l-Artikolu 2 li għandu jibda japplika mill-1 ta' Jannar 2007.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fil-Lussemburgu, nhar id-19 ta' Ġunju 2006.
Għall-Kunsill
Il-President
J. PRÖLL
(1) Għadha mhijiex pubblikata fil-Ġurnal Uffiċjali.
(2) ĠU L 193, 29.7.2000, p. 16. Regolament kif emendat l-aħħar mill-Att ta' l-Adeżjoni ta' l-2005.
(3) ĠU L 270, 21.10.2003, p. 1. Regolament kif emendat l-aħħar mir-Regolament (KE) Nru 319/2006 (ĠU L 58, 28.2.2006, p. 32).