Sentenzi fi kwistjonijiet matrimonjali u kwistjonijiet ta’ responsabbiltà tal-ġenituri — ġurisdizzjoni, rikonoxximent u infurzar

 

SOMMARJU TA’:

Ir-Regolament tal-Kunsill (UE) 2019/1111 dwar il-ġurisdizzjoni, ir-rikonoxximent u l-infurzar ta’ deċiżjonijiet fi kwistjonijiet matrimonjali u kwistjonijiet ta’ responsabbiltà tal-ġenituri, u dwar sekwestru internazzjonali ta’ minuri

X’INHU L-GĦAN TAR-REGOLAMENT?

• Dan iħassar ir-Regolament (KE) Nru 2201/2003, magħruf bħala “r-Regolament Brussell IIa ”, biex jipprovdi regoli aktar effettivi li jipproteġu t-tfal u l-ġenituri tagħhom li nqabdu f’tilwim transfruntier dwar ir-responsabbiltà tal-ġenituri, pereżempju dwar il-kustodja, id-drittijiet ta’ aċċess u s-sekwestru ta’ minuri.
• Għandu l-għan li jħaffef il-proċeduri minħabba l-ħtieġa li tittieħed azzjoni immedjata biex jiġu protetti l-aħjar interessi tal-minuri f’ħafna minn dawn iċ-ċirkostanzi.

PUNTI EWLENIN

Ir-Regolament japplika għal kwistjonijiet ċivili* ta’:

• divorzju;
• separazzjoni legali;
• annullament ta’ żwieġ;
• responsabbiltà tal-ġenituri (attribuzzjoni, eżerċizzju, delega, restrizzjoni jew terminazzjoni), b’mod partikolari:
  • kustodja u drittijiet ta’ aċċess;
  • tutela, kurazija* u istituzzjonijiet simili;
  • tfal taħt kura istituzzjonali jew f’familja;
  • il-protezzjoni tat-tfal b’rabta mal-proprjetà personali tagħhom.

L-obbligi ta’ manteniment huma esklużi mill-kamp ta’ applikazzjoni tar-regolament.

F’kuntest transfruntier, ir-regolament jipprevedi:

• regoli armonizzati dwar il-ġurisdizzjoni fi kwistjonijiet ta’ divorzju, separazzjoni legali u annullament ta’ żwieġ;
• regoli armonizzati dwar il-ġurisdizzjoni f’tilwim dwar ir-responsabbiltà tal-ġenituri bħal kustodja, drittijiet ta’ aċċess jew it-tqegħid ta’ minuri f’pajjiż ieħor tal-UE;
• proċedura ta’ ritorn imtejba f’każijiet ta’ sekwestru ta’ minuri billi jiġu introdotti skadenzi ċari biex dawk il-każijiet ikunu jistgħu jiġu solvuti malajr; il-qrati tal-ewwel u tat-tieni istanza se jkollhom jagħtu d-deċiżjonijiet tagħhom fi żmien 6 ġimgħat;
• il-promozzjoni ta’ medjazzjoni;
• it-tfal jingħataw l-opportunità li jinstemgħu fil-proċedimenti li jikkonċernawhom;
• l-eliminazzjoni tal-ħtieġa għal proċedura intermedjarja (“exequatur”) għal deċiżjonijiet dwar ir-responsabbiltà tal-ġenituri, u b’hekk jiġu ffrankati l-ħin u l-ispejjeż għall-individwi;
• regoli aktar ċari dwar it-tqegħid ta’ tfal f’pajjiż ieħor tal-UE, inkluża l-ħtieġa għal kunsens fis-sitwazzjonijiet kollha, ħlief fejn minuri jitqiegħed ma’ ġenitur;
• deċiżjonijiet ta’ implimentazzjoni aktar effettivi, li jintroduċu r-raġunijiet possibbli għas-sospensjoni jew ir-rifjut ta’ infurzar;
• ċirkolazzjoni simplifikata tad-deċiżjonijiet, strumenti awtentiċi* u ċerti ftehimiet fi ħdan l-UE permezz ta’ regoli dwar ir-rikonoxximent u l-infurzar f’pajjiżi oħra tal-UE;
• kollaborazzjoni aħjar bejn l-awtoritajiet ċentrali ta’ pajjiżi differenti tal-UE u bejn il-qrati, filwaqt li jiġu rispettati d-drittijiet tal-partijiet u l-kunfidenzjalità.

L-aħjar interessi tal-wild jibqgħu l-kunsiderazzjoni primarja, skont l-Artikolu 24 tal-Karta tad-Drittijiet Fundamentali tal-Unjoni Ewropea u l-Konvenzjoni dwar id-Drittijiet tat-Tfal tal-20 ta’ Novembru 1989, kif implimentati mil-liġi u l-proċedura nazzjonali.

Ir-regolament jikkomplementa l-Konvenzjoni tal-Aja tal-1980 dwar Aspetti Ċivili tal-Ħtif Internazzjonali ta’ Minuri li tindirizza deċiżjonijiet li jordnaw ir-ritorn tal-minuri lejn il-pajjiż ta’ oriġini tagħhom.

Tħassir

Ir-Regolament (UE) 2019/1111 iħassar ir-Regolament (KE) Nru 2201/2003 mill-1 ta’ Awwissu 2022.

MINN META JAPPLIKA R-REGOLAMENT?

Dan japplika mill-1 ta’ Awwissu 2022. Xi regoli li jikkonċernaw atti delegati u r-rekwiżit li l-pajjiżi tal-UE jipprovdu informazzjoni lill-Kummissjoni Ewropea japplikaw mit-22 ta’ Lulju 2019.

SFOND

Għal aktar informazzjoni, ara:

• Adozzjoni ta’ regoli ġodda li jipproteġu aħjar lill-minuri li jinqabdu f’tilwim transfruntier tal-ġenituri — stqarrija għall-istampa (il-Kummissjoni Ewropea).

TERMINI EWLENIN

DOKUMENT EWLIENI

Ir-Regolament tal-Kunsill (UE) 2019/1111 tal-25 ta’ Ġunju 2019 dwar il-ġurisdizzjoni, ir-rikonoxximent u l-infurzar ta’ deċiżjonijiet fi kwistjonijiet matrimonjali u kwistjonijiet ta’ responsabbiltà tal-ġenituri, u dwar sekwestru internazzjonali ta’ minuri (ĠU L 178, 2.7.2019, pp. 1-115)

DOKUMENTI RELATATI

Ir-Regolament tal-Kunsill (KE) Nru 2201/2003 tas-27 ta’ Novembru 2003 dwar il-ġurisdizzjoni u r-rikonoxximent u l-infurzar ta’ sentenzi fi kwistjonijiet matrimonjali u kwistjonijiet ta’ responsabbilità tal-ġenituri, u li jirrevoka r-Regolament (KE) Nru 1347/2000 (ĠU L 138, 23.12.2003, pp. 1-29)

Emendi suċċessivi għar-Regolament (KE) Nru 2201/2003 ġew inkorporati fid-dokument oriġinali. Din il-verżjoni konsolidata għandha valur dokumentarju biss.

Ir-Regolament tal-Kunsill (KE) Nru 4/2009 tat-18 ta’ Diċembru 2008 dwar il-ġurisdizzjoni, il-liġi applikabbli, ir-rikonoxximent u l-eżekuzzjoni tad-deċiżjonijiet u l-kooperazzjoni f’materji relatati ma’ obbligi ta’ manteniment (ĠU L 7, 10.1.2009, pp. 1-79)

Ara l-verżjoni konsolidata.

l-aħħar aġġornament 13.11.2019