(1)

Ir-Regolament ta’ Delega tal-Kummissjoni (UE) Nru 906/2014 (2) jistabbilixxi regoli dettaljati applikabbli għal nefqa ta’ intervent pubbliku taħt il-Fond Agrikolu Ewropew ta’ Garanzija (FAEG). Id-dispożizzjonijiet ta’ dak ir-Regolament jeħtieġu li jiġu adattati sabiex jitqies li l-intervent pubbliku jintuża biss okkażjonalment.

(2)

Il-parti I tal-Anness I tar-Regolament ta’ Delega (UE) Nru 906/2014 tiddefinixxi r-rati tal-imgħax applikabbli għall-finanzjament tan-nefqa ta’ intervent pubbliku taħt il-FAEG.

(3)

Sabiex jiġu ddeterminati dawn ir-rati tal-imgħax, l-Istati Membri għandhom jinnotifikaw lill-Kummissjoni dwar ir-rata medja tal-imgħax li effettivament kellhom matul il-perjodu ta’ referenza. Jekk Stat Membru ma ġarrab l-ebda kost tal-imgħax, minħabba li ma kellux prodotti agrikoli fil-ħżin pubbliku, il-Kummissjoni għandha tistabbilixxi r-rata ta’ imgħax ta’ referenza abbażi tar-rati medji tal-imgħax ta’ referenza. Għall-Istati Membri li l-munita tagħhom hija l-euro, ir-rata ta’ imgħax ta’referenza hija r-Rata Interbankarja Offruta f’Euro (EURIBOR). Għall-Istati Membri li l-munita tagħhom mhijiex l-euro, ir-rata ta’ imgħax ta’ referenza hija r-Rata Interbankarja Offruta (IBOR).

(4)

Minħabba n-numru dejjem jonqos ta’ tranżazzjonijiet sottostanti għall-EURIBOR, ir-rata tal-euro fuq terminu qasir (EURSTR) jenħtieġ li tiġi pprovduta bħala rata ta’ riżerva għal każijiet fejn l-EURIBOR ma jkunx disponibbli. Għall-Istati Membri li l-munita tagħhom mhijiex l-euro, jenħtieġ li tiġi pprovduta wkoll il-possibbiltà li tintuża r-rata ta’ riżerva li tissostitwixxi l-IBOR nazzjonali.

(5)

Bħalissa, skont ir-regoli stabbiliti fil-Parti I tal-Anness I tar-Regolament ta’ Delega (UE) Nru 906/2014 , il-Kummissjoni għandha tadotta, għal kull sena kontabilistika, regolament ta’ implimentazzjoni li jistabbilixxi r-rata tal-imgħax, anki jekk ma jkun hemm l-ebda bidla fir-rata tal-imgħax u anki jekk ma jkun hemm l-ebda prodott fil-ħżin pubbliku. Għal raġunijiet ta’ simplifikazzjoni u effiċjenza fir-riżorsi, huwa xieraq li jiġi previst li r-regolament ta’ implimentazzjoni tal-Kummissjoni li jistabbilixxi r-rata tal-imgħax jibqa’ fis-seħħ sakemm jitħassar. Għalhekk, jenħtieġ li l-Kummissjoni taġġorna r-rata tal-imgħax biss jekk iseħħ intervent għall-ħżin pubbliku jew jekk ikun mistenni li jseħħ xiri sfurzat b’intervent.

(6)

Il-punt 4, tal-Parti I, tal-Anness III tar-Regolament ta’ Delega (UE) Nru 906/2014 jistabbilixxi r-regoli għall-istabbiliment tal-ammonti standard applikabbli għall-Unjoni meta inqas minn erba’ Stati Membri jqiegħdu prodott partikolari fil-ħżin pubbliku. Madankollu, jista’ jiġri li aktar minn erba’ Stati Membri jqiegħdu prodott partikolari fil-ħżin pubbliku iżda inqas minn erba’ Stati Membri jinnotifikaw l-ispejjeż irreġistrati tagħhom. Sabiex tiġi evitata l-inċertezza legali fl-istabbiliment tal-ammonti standard applikabbli, jenħtieġ li tiżdied dispożizzjoni għal każijiet fejn inqas minn erba’ Stati Membri jinnotifikaw l-ispejjeż irreġistrati tagħhom.

(7)

Il-punt 3, tal-Parti II, tal-Anness III tar-Regolament ta’ Delega (UE) Nru 906/2014 jipprovdi li l-Kummissjoni tista’ tirrapporta l-ammonti standard stabbiliti preċedentement għal prodott f’każ li ma kien hemm ebda ħżin pubbliku, jew f’każ li mhux se jkun hemm ħżin pubbliku, għas-sena kontabilistika kurrenti. Għal raġunijiet ta’ simplifikazzjoni u effiċjenza fir-riżorsi, jenħtieġ li l-ammonti standard applikabbli ma jiġux stabbiliti regolarment kull sena. Minflok, id-deċiżjoni ta’ implimentazzjoni tal-Kummissjoni li tistabbilixxi dawk l-ammonti standard jenħtieġ li tibqa’ applikabbli sakemm titħassar.

(8)

Għalhekk, l-Annessi I u III tar-Regolament ta’ Delega (UE) Nru 906/2014 jenħtieġ li jiġu emendati skont din,

(1)

L-Anness I, Parti I huwa emendat kif ġej:

(2)

L-Anness III huwa emendat kif ġej: