18.5.2018   

MT

Il-Ġurnal Uffiċjali tal-Unjoni Ewropea

L 123/4

(1)

L-Anness I tar-Regolament (KE) Nru 273/2004 u l-Anness tar-Regolament (KE) Nru 111/2005 fihom lista ta' sustanzi skedati li huma soġġetti għal għadd ta' miżuri ta' kontroll u ta' monitoraġġ armonizzati previsti f'dawn ir-Regolamenti.

(2)

Permezz tad-Deċiżjonijiet 60/12 u 60/13 tal-Kummissjoni dwar id-Drogi Narkotiċi tan-Nazzjonijiet Uniti, li ttieħdu fis-sittin seduta tagħha fis-16 ta' Marzu 2017, l-4-anilino-N-fenetilpiperidina (ANPP) u l-N-fenetil-4-piperidon (NPP) inżiedu mat-Tabella I tal-Konvenzjoni tan-Nazzjonijiet Uniti kontra t-Traffikar Illeċtu tad-Drogi Narkotiċi u s-Sustanzi Psikotropiċi tad-19 ta' Diċembru 1988 (3) (“il-Konvenzjoni tan-NU tal-1988”).

(3)

L-għan tar-Regolament (KE) Nru 273/2004 u tar-Regolament (KE) Nru 111/2005 huwa li jiġi implimentat l-Artikolu 12 tal-Konvenzjoni tan-Nazzjonijiet Uniti tal-1988 fl-Unjoni. Għaldaqstant, l-ANPP u l-NPP għandhom jinżiedu fl-Anness I tar-Regolament (KE) Nru 273/2004 u fl-Anness tar-Regolament (KE) Nru 111/2005.

(4)

Is-sustanzi skedati elenkati f'dawk l-Annessi huma maqsuma f'kategoriji li għalihom japplikaw miżuri differenti, biex jintlaħaq bilanċ proporzjonat bejn il-livell ta' riskju ppreżentat minn kull sustanza speċifika u l-piż fuq il-kummerċ leċitu. Għas-sustanzi fil-Kategorija 1 japplikaw il-kontrolli u l-miżuri ta' monitoraġġ l-iżjed stretti. Pereżempju, is-sustanzi fil-Kategorija 1 iridu jinħażnu f'bini sikur u kull operatur li jaħdem b'dawn is-sustanzi għandu bżonn liċenzja.

(5)

L-ANPP huwa prekursur immedjat tal-fentanil u tal-aċetil fentanil. L-NPP jista' jintuża bħala materjal prim għall-ANPP, li sossegwentement jista' jiġi ssintetizzat f'fentanil, jew jista' jkun prekursur dirett għal għadd ta' analogi tal-fentanil. Fi kliem ieħor, iż-żewġ sustanzi t-tnejn jistgħu jiġu ttrasformati f'fentanil jew f'analogi tal-fentanil.

(6)

L-użu ħażin u l-abbuż tal-fentanil u tal-analogi tal-fentanil qegħdin jikkawżaw problemi soċjali u tas-saħħa pubblika serji (b'mod partikolari mwiet minn dożi eċċessivi) f'xi reġjuni tal-Unjoni. Hemm indikazzjonijiet li fl-Unjoni qiegħda ssir il-manifattura illegali sostanzjali ta' fentanil ibbażata fuq l-ANPP u l-NPP. Biex tiġi indirizzata din il-problema, jeħtieġ li jiġu introdotti l-kontrolli fuq l-importazzjoni tal-ANPP u l-NPP.

(7)

Fl-Unjoni jeżistu biss il-produzzjoni, in-negozju u l-użu tal-ANPP u tal-NPP limitati. Għaldaqstant, l-iskedar ta' dawn is-sustanzi fil-Kategorija 1 ikun jeħtieġ biss piż żejjed amministrattiv limitat għall-operaturi ekonomiċi u għall-awtoritajiet kompetenti fl-Unjoni. Barra minn hekk, il-konsultazzjoni mal-operaturi ekonomiċi u mal-Istati Membri wriet li hemm preferenza ċara li dawn iż-żewġ sustanzi t-tnejn li huma jiġu elenkati fil-Kategorija 1 fir-Regolamenti.

(8)

Fid-dawl tal-konsiderazzjonijiet fil-premessi 5, 6, u 7, jenħtieġ li l-ANPP u l-NPP jiġu skedati bħala sustanzi tal-Kategorija 1 fl-Anness I tar-Regolament (KE) Nru 273/2004 u fl-Anness tar-Regolament (KE) Nru 111/2005.

(9)

Għalhekk jenħtieġ li r-Regolament (KE) Nru 273/2004 u r-Regolament (KE) Nru 111/2005 jiġu emendati skont dan.

(10)

Billi jeżistu xi ftit produzzjoni, negozju u użu legali tal-ANPP u tal-NPP fl-Unjoni, jenħtieġ li l-operaturi ekonomiċi u l-awtoritajiet kompetenti jingħataw biżżejjed ħin biex jaddattaw ruħhom għall-emendi li qegħdin isiru permezz ta' dan ir-Regolament.

(11)

Ir-Regolament (KE) Nru 273/2004 u r-Regolament (KE) Nru 111/2005 jimplimentaw b'mod konġunt ċerti dispożizzjonijiet tal-Konvenzjoni tan-Nazzjonijiet Uniti tal-1988. Fid-dawl tar-rabta materjali mill-qrib bejn dawn iż-żewġ Regolamenti, huwa ġġustifikat li l-emendi jiġu adottati permezz ta' att delegat wieħed,