Access to European Union law
<a href="https://eur-lex.europa.eu/content/help/eurlex-content/experimental-features.html" target="_blank">More about the experimental features corner</a>
Choose the experimental features you want to try
EUR-Lex
Access to European Union law

This document is an excerpt from the EUR-Lex website

You are here
Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search

Document 32013L0063

Direttiva ta’ Implimentazzjoni tal-Kummissjoni 2013/63/UE tas- 17 ta’ Diċembru 2013 li temenda l-Annessi I u II tad-Direttiva tal-Kunsill 2002/56/KE fir-rigward ta’ kundizzjonijiet minimi li jridu jiġu sodisfatti minn patata taż-żriegħ u lottijiet tal-patata taż-żriegħ Test b’relevanza għaż-ŻEE

ĠU L 341, 18.12.2013, pp. 52–55 (BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)

Legal status of the document In force

ELI: http://data.europa.eu/eli/dir_impl/2013/63/oj

18.12.2013   

MT

Il-Ġurnal Uffiċjali tal-Unjoni Ewropea

L 341/52

DIRETTIVA TA’ IMPLIMENTAZZJONI TAL-KUMMISSJONI 2013/63/UE

tas-17 ta’ Diċembru 2013

li temenda l-Annessi I u II tad-Direttiva tal-Kunsill 2002/56/KE fir-rigward ta’ kundizzjonijiet minimi li jridu jiġu sodisfatti minn patata taż-żriegħ u lottijiet tal-patata taż-żriegħ

(Test b’relevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat id-Direttiva tal-Kunsill 2002/56/KE tat-13 ta’ Ġunju 2002 dwar il-bejgħ fis-suq tal-patata taż-żerriegħa [taż-żriegħ] (1), u b’mod partikolari l-Artikolu 24 tagħha,

Billi:

(1)

Sa mill-adozzjoni tad-Direttiva 2002/56/KE ġew żviluppati metodi ġodda għat-tkabbir tal-patata, u sar progress fl-għodod djanjostiċi li jidentifikaw organiżmi ta’ ħsara u fil-prattiki agronomiċi li jiġġieldu l-firxa ta’ dawn l-organiżmi.

(2)

Dawn l-iżviluppi tekniċi jippermettu l-produzzjoni ta’ patata taż-żriegħ li tissodisfa rekwiżiti aktar stretti minn dawk stabbiliti fl-Annessi I u II tad- Direttiva 2002/56/KE. Fl-istess ħin sar disponibbli għarfien dwar l-aġenti tal-mard ġodda filwaqt li evolva l-għarfien dwar mard eżistenti li jindika li ċertu mard jeħtieġ miżuri aktar stretti.

(3)

Kontra dan l-isfond, l-istandard tal-Kummissjoni Ekonomika għall-Ewropa tan-Nazzjonijiet Uniti (UNECE) li jikkonċerna l-kummerċjalizzazzjoni u l-kontroll tal-kwalità kummerċjali tal-patata taż-żriegħ ġie adattat fid-dawl ta’ dawn l-iżviluppi tekniċi u xjentifiċi (2).

(4)

Filwaqt li jitqiesu dawk l-iżviluppi, ċerti kundizzjonijiet u tolleranzi minimi, kif stabbilit fl-Annessi I u II tad-Direttiva 2002/56/KE, għandhom jiġu aġġornati u restrizzjonijiet dwar l-iskabbja sewda, l-iskabbja f’forma ta’ trab u l-patata taż-żriegħ, li jkunu ġew deidratati u niexfa b’mod eċċessiv, għandhom jiddaħħlu fl-Anness II.

(5)

Sa mill-adozzjoni tad-Direttiva 2002/56/KE, ġie żviluppat għarfien xjentifiku dwar ir-rabta bejn in-numru ta’ ġenerazzjonijiet u l-livell ta’ preżenza ta’ pesti ta’ patata taż-żriegħ. Il-limitazzjoni tan-numru ta’ ġenerazzjonijiet hija mezz neċessarju biex jiġi mmitigat ir-riskju fitosanitarju li jinħoloq minn pesti f’forma latenti. Din il-limitazzjoni hija meħtieġa għall-mitigazzjoni ta’ dak ir-riskju, u mhemm disponibbli l-ebda miżura anqas stretta biex tissostitwixxiha. Il-limitu massimu ta’ seba’ ġenerazzjonijiet għall-patata taż-żriegħ pre-bażika u l-patata taż-żriegħ bażika jikostitwixxi kompromess bejn il-ħtieġa li jiġi mmultiplikat għadd suffiċjenti ta’ patata taż-żriegħ għall-produzzjoni ta’ patata taż-żriegħ iċċertifikata, u l-protezzjoni tal-istatus tas-saħħa tagħhom.

(6)

Ir-rekwiżiti li jikkonċernaw l-organiżmu ta’ ħsara Synchytrium endobioticum (Schilb.) Perc. għandhom jitneħħew mill-Anness I billi l-presenza tiegħu fuq il-patata taż-żriegħ hija rregolata bid-Direttiva tal-Kunsill 69/464/KEE (3). Ir-rekwiżiti li jikkonċernaw l-organiżmu ta’ ħsara Corynebacterium sepedonicum (Spieck. et Kotth.) Skapt. and Burkh., l-isem li ġie sostitwit minn Clavibacter michiganensis subsp. sepedonicus (Spieck. et Kotth.) Davis et al., għandhom jitneħħew mill-Annessi I u II billi l-presenza tiegħu fuq il-patata taż-żriegħ hija rregolata bid-Direttiva tal-Kunsill 93/85/KEE (4). Ir-rekwiżiti li jikkonċernaw l-organiżmu ta’ ħsara Heterodera rostochiensis Woll., l-isem li ġie sostitwit minn Globodera rostochiensis (Wollenweber) Behrens għandhom jitneħħew mill-Anness II billi l-presenza tiegħu fuq il-patata taż-żriegħ hija rregolata bid-Direttiva tal-Kunsill 2007/33/KE (5). Ir-rekwiżiti li jikkonċernaw l-organiżmu ta’ ħsara Pseudomonas solanacearum (Smith) Smith, l-isem li ġie sostitwit minn Ralstonia solanacearum (Smith) Yabuuchi et al., għandhom jitneħħew mill-Anness II billi l-presenza tiegħu fuq il-patata taż-żriegħ hija rregolata bid-Direttiva tal-Kunsill 98/57/KE (6).

(7)

L-Annessi I u II għad-Direttiva 2002/56/KE għandhom għalhekk jiġu emendati skont dan.

(8)

Il-miżuri stipulati f’din id-Direttiva huma skont l-opinjoni tal-Kumitat Permanenti għaż-Żrieragħ u għall-Materjal ta’ Propagazzjoni għall-Agrikultura, l-Ortikultura u l-Forestrija,

ADOTTAT DIN ID-DIRETTIVA:

Artikolu 1

Emendi għad-Direttiva 2002/56/KE

L-Annessi I u II għad-Direttiva (KE) Nru 2002/56/KE huma emendati skont l-Anness għal din id-Direttiva.

Artikolu 2

Traspożizzjoni

L-Istati Membri għandhom jadottaw u jippubblikaw, sa mhux iktar tard mill-31 ta’ Diċembru 2015, il-liġijiet, ir-regolamenti u d-dispożizzjonijiet amministrattivi meħtieġa biex jikkonformaw ma’ din id-Direttiva. Huma għandhom jikkomunikaw minnufih it-test ta’ dawk id-dispożizzjonijiet lill-Kummissjoni.

Huma għandhom japplikaw dawn id-dispożizzjonijiet mit-1 ta’ Jannar 2016.

Meta l-Istati Membri jadottaw dawk id-dispożizzjonijiet, dawn għandhom jirreferu għal din id-Direttiva jew ikunu akkumpanjati mit-tali referenza waqt il-pubblikazzjoni uffiċjali tagħhom. L-Istati Membri għandhom jiddeċiedu kif għandha ssir it-tali referenza.

Artikolu 3

Dħul fis-seħħ

Din id-Direttiva għandha tidħol fis-seħħ fl-għoxrin jum wara l-pubblikazzjoni tagħha f’Il-Ġurnal Uffiċjali tal-Unjoni Ewropea.

Artikolu 4

Destinatarji

Din id-Direttiva hija indirizzata lill-Istati Membri.

Magħmul fi Brussell, is-17 ta’ Diċembru 2013.

Għall-Kummissjoni

Il-President

José Manuel BARROSO

(1)   ĠU L 193, 20.7.2002, p. 60.

(2)  L-ISTANDARD tal-UNECE S-1 dwar il-kummerċjalizzazzjoni u l-kontroll tal-kwalità kummerċjali tal-patata taż-żriegħ, Edizzjoni 2011, New York.

(3)  Id-Direttiva tal-Kunsill 69/464/KEE tat-8 ta’ Diċembru 1969 dwar il-kontroll tal-marda tal-ġlata fil-patata (ĠU L 323, 24.12.1969, p. 1).

(4)  Id-Direttiva tal-Kunsill 93/85/KEE tal-4 ta’ Ottubru 1993 dwar il-kontroll tat-tħassir forma ta’ ċirku tal-patata (ĠU L 259, 18.10.1993, p. 1).

(5)  Id-Direttiva tal-Kunsill 2007/33/KE tal-11 ta’ Ġunju 2007 dwar il-kontroll ta’ nematodi taċ-ċisti fil-patata u li tħassar id-Direttiva 69/465/KEE (ĠU L 156, 16.6.2007, p. 12).

(6)  Id-Direttiva tal-Kunsill 98/57/KE tal-20 ta’ Lulju 1998 dwar il-kontroll tar-Ralstonia solanacearum (Smith) Yabuuchi et al. (ĠU L 235, 21.8.1998, p. 1).

ANNESS

L-Annessi I u II għad-Direttiva 2002/56/KE huma emendati kif ġej:

(1)

L-Anness I huwa emendat kif ġej:

(a)

Il-punti 1 u 2 jinbidlu b’dan li ġej:

“1.

Il-patata taż-żriegħ bażika għandha tissodisfa l-kundizzjonijiet li ġejjin:

(a)

waqt l-ispezzjoni uffiċjali tal-pjanti li qegħdin jikbru n-numru affettwat minn blackleg ma jridx jaqbeż l-1,0 %;

(b)

in-numru ta’ pjanti li qegħdin jikbru li ma jitkabbrux b’mod leali għall-varjetà u n-numru ta’ pjanti ta’ varjetà differenti, kumplessivament m’għandhomx jaqbżu ż-0,1 % u fil-proġenija diretta, kumplessivament m’għandhomx jaqbżu ż-0,25 %;

(c)

fil-proġenija diretta n-numru ta’ pjanti li juru sintomi ta’ infezzjoni b’virus gravi ma jridx jaqbeż l-4,0 %;

(d)

waqt l-ispezzjonijiet uffiċjali tal-pjanti li qegħdin jikbru, in-numru ta’ pjanti li juru sintomi ta’ mużajk u n-numru ta’ pjanti li juru sintomi kkawżati minn virus tal-werqa kumplessivament m’għandhomx jaqbżu ż-0,8 %.

2.

Il-patata taż-żriegħ iċċertifikata għandha tissodisfa l-kundizzjonijiet li ġejjin:

(a)

waqt l-ispezzjoni uffiċjali tal-pjanti li qegħdin jikbru n-numru affettwat minn blackleg m’għandux jaqbeż l-4,0 %;

(b)

in-numru ta’ pjanti li ma jitrabbewx b’mod leali għall-varjetà u n-numru ta’ pjanti ta’ varjetà differenti, kumplessivament, m’għandhomx jaqbżu ż-0,5 % u fil-proġenija diretta, kumplessivament, m’għandhomx jaqbżu ż-0,5 %;

(c)

fil-proġenija diretta n-numru ta’ pjanti li juru sintomi ta’ infezzjoni b’virus gravi m’għandux jaqbeż l-10,0 %;

(d)

waqt l-ispezzjonijiet uffiċjali tal-pjanti li qegħdin jikbru, in-numru ta’ pjanti li juru sintomi ta’ mużajk u n-numru ta’ pjanti li juru sintomi kkawżati minn virus tal-werqa kumplessivament m’għandhomx jaqbżu s-6,0 %.”

(b)

Il-punt 3 huwa mħassar.

(c)

Il-punt 4 jinbidel b’dan li ġej:

“4.

It-tolleranzi permessi taħt il-punti 1(c) u (d), u l-punti 2(c) u (d) huma applikabbli biss meta l-mard tal-virus jkun ikkawżat minn virus li huma prevalenti fl-Ewropa.”

(d)

Il-punti 5 u 6 huma mħassra.

(e)

Il-punt li ġej huwa miżjud:

“7.

L-għadd massimu ta’ ġenerazzjonijiet ta’ patata bażika għandu jkun ta’ erbgħa„ u l-ġenerazzjonijiet kkombinati ta’ patata pre-bażika u patata bażika fl-għalqa għandhom ikunu sebgħa.

L-għadd massimu ta’ ġenerazzjonijiet ta’ patata taż-żriegħ iċċertifikata għandu jkun ta’ tnejn.

Jekk il-ġenerazzjoni ma tkunx indikata fuq it-tikketta uffiċjali, il-patata kkonċernata għandha titqies li tappartjeni lill-ġenerazzjoni massima li hija permessa għal kull kategorija rispettiva.”

(2)

L-Anness II jinbidel b’li ġej:

“ANNESS II

KUNDIZZJONIJIET TA’ KWALITÀ MINIMI GĦAL LOTTIJIET TA’ PATATA TAŻ-ŻRIEGĦ

It-tolleranzi permessi għall-impuritajiet, it-tbajja u l-mard li ġejjin għal patata taż-żriegħ:

(1)

il-presenza ta’ ħamrija u materja barranija; 1,0 % skont il-massa għal patata taż-żriegħ bażika u 2,0 % skont il-massa għal patata taż-żriegħ iċċertifikata;

(2)

it-taħsir niexef jew imxarrab, minbarra jekk ikun ikkawżat minn Synchytrium endobioticum, Clavibacter michiganensis subsp. sepedonicus jew Ralstonia solanacearum: 0,5 % skont il-massa, li minnhom 0,2 % skont il-massa ta’ taħsir imxarrab;

(3)

it-tbajja’ esterni p.e. tuberi li jkunu tilfu l-għamla tagħhom jew danneġġjati; 3,0 % skont il-massa;

(4)

l-iskabbja komuni li taffettwa t-tuberi fuq aktar minn terz tal-wiċċ tagħhom: 5,0 % skont il-massa;

(5)

l-iskabbja sewda li taffettwa t-tuberi fuq aktar minn 10,0 % tal-wiċċ tagħhom: 5,0 % skont il-massa;

(6)

l-iskabbja f’forma ta’ trab li taffettwa t-tuberi fuq aktar minn 10,0 % tal-wiċċ tagħhom: 3,0 % skont il-massa;

(7)

it-tuberi imkemxa minħabba deidratazzjoni eċċessiva jew id-deidrazzjoni kkawżata minn skabbja tal-fidda: 1,0 % skont il-massa.

It-tolleranza totali għall-partiti 2 sa 7: 6,0 % skont il-massa għal patata taż-żriegħ bażika, u 8,0 % skont il-massa għal patata taż-żriegħ iċċertifikata.”

Top