FTEHIM

bejn il-Komunità Ewropea u l-Gvern tar-Repubblika Popolari taċ-Ċina war kooperazzjoni u assistenza amministrattiva reċiproka fi kwistjonijiet doganali

IL-KOMUNITÀ EWROPEA,

u

IL-GVERN TAR-REPUBBLIKA POPOLARI TAĊ-ĊINA

minn hawn 'il quddiem imsejħa “l-Partijiet Kontraenti”,

WAQT LI JIKKUNSIDRAW l-importanza tar-rabtiet kummerċjali bejn ir-Repubblika Popolari taċ-Ċina u l-Komunità Ewropea, u xewqana li jikkontribwixxu għall-benefiċċju taż-żewġ Partijiet Kontraenti, għall-iżvilupp armonjuż ta' dawn ir-rabtiet;

WAQT LI JEMMNU LI, sabiex jinkiseb dan il-għan, għandu jkun hemm impenn biex tiġi żviluppata l-kooperazzjoni doganali;

WAQT LI jqisu l-iżvilupp tal-kooperazzjoni doganali bejn il-Partijiet Kontraenti, rigward il-proċeduri doganali;

WAQT LI JIKKUNSIDRAW li l-operazzjonijiet fi ksur tal-leġislazzjoni doganali inklużi ksur tad-drittijiet tal-proprjetà intellettwali, huma ta' preġudizzju għall-interessi ekonomiċi, fiskali u kummerċjali taż-żewġ Partijiet Kontraenti, u filwaqt li jagħrfu l-importanza li tiġi żgurata l-valutazzjoni korretta tad-dazji doganali u taxxi oħra, b'mod partikolari, permezz ta' applikazzjoni korretta tar-regoli dwar l-evalwazzjoni, l-oriġini u l-klassifikazzjoni tariffarja doganali;

KONVINTI li l-azzjoni kontra tali operazzjonijiet tista' ssir iktar effettiva permezz ta' kooperazzjoni bejn l-awtoritajiet amministrattivi kompetenti;

WARA LI KKUNSIDRAW l-obbligi imposti taħt konvenzjonijiet internazzjonali diġà aċċettati mill-Partijiet Kontraenti jew applikati lilhom; kif ukoll attivitajiet relatati mad-Dwana mwettqa mill-Organizzazzjoni Dinjija tal-Kummerċ;

WARA LI kkunsidraw il-Ftehim dwar il-Kummerċ u l-Kooperazzjoni Ekonomika bejn il-Komunità Ekonomika Ewropea u r-Repubblika Popolari taċ-Ċina ffirmat fl-1985,

QABLU KIF ĠEJ:

TITOLU 1

DISPOŻIZZJONIJIET ĠENERALI

Artikolu 1

Tifsiriet

Għall-finijiet tal-Ftehim:

(a)

“leġislazzjoni doganali” tfisser kwalunkwe liġi, dispożizzjoni jew strument legali li jorbot tal-Komunità Ewropea jew tar-Repubblika Popolari taċ-Ċina, li jirregola l-importazzjoni, l-esportazzjoni u t-transitu ta' merkanzija u t-tqegħid tagħhom taħt kwalunke reġim jew proċedura doganali, inklużi miżuri ta' projbizzjoni, restrizzjoni u kontroll;

(b)

“awtorità doganali” għandha tfisser, fir-Repubblika Popolari taċ-Ċina, l-Amministrazzjoni Ġenerali tad-Dwana tar-Repubblika Popolari taċ-Ċina, u fil-Komunità Ewropea, is-servizzi kompetenti responsabbli għall-kwistjonijiet doganali tal-Kummissjoni tal-Komunitajiet Ewropej u l-awtoritajiet doganali ta' l-Istati Membri tal-Komunità Ewropea;

(ċ)	“awtorità applikanti” għandha tfisser awtorità doganali kompetenti maħtura minn Parti Kontraenti għal dan il-fini u li tagħmel talba għal assistenza amministrattiva, abbażi ta' dan il-Ftehim;

(d)	“awtorità interpellata” għandha tfisser awtorità doganali kompetenti maħtura minn Parti Kontraenti għal dan il-fini u li tirċievi talba għal assistenza amministrattiva, abbażi ta' dan il-Ftehim;

(e)	“data personali” għandha tfisser l-informazzjoni kollha relatata ma’ individwu identifikat jew identifikabbli;

(f)	“operazzjoni bi ksur tal-leġislazzjoni doganali” għandha tfisser kull ksur jew attentat ta' ksur tal-leġislazzjoni doganali;

(g)	“persuna” għandha tfisser persuna naturali jew entità legali;

(h)	“informazzjoni” għandha tfisser data, kemm jekk ipproċessata jew analizzata u kemm jekk le, u dokumenti, rapporti u komunikazzjonijiet oħra fi kwalunkwe forma, inklużi kopji elettroniċi, jew ċertifikati jew awtentikati tagħhom.

Artikolu 2

Applikazzjoni territorjali

Dan il-Ftehim għandu japplika, min-naħa waħda, għat-territorju doganali tar-Repubblika Popolari taċ-Ċina u, min-naħa l-oħra, għat-territorji li fihom huwa applikat it-Trattat li jistabbilixxi l-Komunità Ewropea u skond il-kondizzjonijiet stabbiliti f’dak it-Trattat.

Artikolu 3

Żviluppi futuri

Il-Partijiet Kontraenti jistgħu b'kunsens reċiproku jwessgħu dan il-Ftehim bil-għan li jżidu l-livelli ta' kooperazzjoni doganali u li jissupplimentawhom, skond il-leġislazzjoni doganali rispettiva tagħhom, permezz ta' ftehim dwar setturi jew materji speċifiċi.

TITOLU II

KAMP TA' APPLIKAZZJONI TAL-FTEHIM

Artikolu 4

Twettiq ta’ kooperazzjoni u assistenza

Il-kooperazzjoni u l-assistenza kollha taħt dan il-Ftehim għandha titwettaq mill-Partijiet Kontraenti skond il-liġijiet, id-dispożizzjonijiet, u strumenti legali oħra tagħhom. Barra minn hekk, il-kooperazzjoni u l-assistenza kollha taħt dan il-Ftehim minn kwalunkwe waħda mill-Partijiet Kontraenti għandha titwettaq fil-limiti tal-kompetenza tiegħu u r-riżorsi disponibbli.

Artikolu 5

Obbligi imposti taħt ftehim oħra

1.   Waqt li jitqiesu tal-kompetenzi rispettivi tal-Komunità Ewropea u l-Istati Membri, id-dispożizzjonijiet ta' dan il-Ftehim għandhom:

(a)	ma jaffettwawx l-obbligi tal-Partijiet Kontraenti taħt kwalunkwe ftehim jew konvenzjoni internazzjonali oħra;

(b)	jitqiesu komplimentarji ma' ftehim dwar kooperazzjoni doganali u assistenza amministrattiva reċiproka li ġew jew li jistgħu jiġu konklużi bejn l-Istati Membri individwali u r-Repubblika Popolari taċ-Ċina,

(ċ)	ma jaffettwawx id-dispożizzjonijiet Komunitarji li jirregolaw il-komunikazzjoni bejn is-servizzi kompetenti tal-Kummissjoni u l-awtoritajiet doganali ta' l-Istati Membri dwar kwalunkwe informazzjoni miksuba taħt dan il-Ftehim li tista' tkun ta' interess għall-Komunità;

2.   Minkejja d-dispożizzjonijiet tal-paragrafu 1, id-dispożizzjonijiet ta' dan il-Ftehim għandhom jieħdu preċedenza fuq id-dispożizzjonijiet ta' kwalunkwe ftehim bilaterali dwar kooperazzjoni doganali u assistenza amministrattiva reċiproka li jkunu ġew jew li jistgħu jiġu konklużi bejn l-Istati Membri individwali u r-Repubblika Popolari taċ-Ċina, safejn id-dispożizzjonijiet ta' dan ta' l-aħħar ikunu inkompatibbli ma' dawk ta' dan il-Ftehim.

3.   Rigward il-kwistjonijiet li għandhom x'jaqsmu ma' kif jiġi applikat dan il-Ftehim, il-Partijiet Kontraenti għandhom jikkonsultaw lil xulxin sabiex jirrisolvu l-kwistjoni fil-qafas tal-Kumitat Konġunt tal-Kooperazzjoni Doganali stabbilit taħt l-Artikolu 21 ta' dan il-Ftehim.

TITOLU III

KOOPERAZZJONI DOGANALI

Artikolu 6

Ambitu tal-kooperazzjoni

1.   Il-Partijiet Kontraenti għandhom jimpenjaw ruħhom li jiżviluppaw kooperazzjoni doganali. B'mod partikolari, il-Partijiet Kontraenti għandhom ifittxu li jikkooperaw fl-oqsma li ġejjin:

(a)	l-istabbiliment u ż-żamma ta' mezzi ta' komunikazzjoni bejn l-awtoritajiet doganali tagħhom biex jiffaċilitaw u jiżguraw l-iskambju bil-ħeffa ta' l-informazzjoni;

(b)	l-iffaċilitar ta' koordinazzjoni effettiva bejn l-awtoritajiet doganali tagħhom;

(ċ)	kwalunkwe kwistjoni amministrattiva oħra relatata ma' dan il-Ftehim li minn żmien għall-ieħor tista' teħtieġ l-azzjoni konġunta tagħhom.

2.   Il-Partijiet Kontraenti jimpenjaw ruħhom li jiżviluppaw azzjonijiet ta' tħaffif tal-kummerċ fi kwistjonijiet doganali waqt li titqies il-ħidma li saret f'dan ir-rigward minn organizzazzjonijiet internazzjonali.

3.   Taħt dan il-Ftehim, il-kooperazzjoni doganali għandha tkopri l-kwistjonijiet kollha relatati ma' l-applikazzjoni tal-leġislazzjoni doganali.

Artikolu 7

Kooperazzjoni fil-proċeduri doganali

Il-Partijiet Kontraenti jaffermaw l-impenn tagħhom li jiffaċilitaw il-moviment leġittimu tal-merkanzija u għandhom jiskambjaw informazzjoni u kompetenza dwar miżuri li jtejbu l-karatteristiċi tekniċi u l-proċeduri doganali u dwar sistemi kompjuterizzati bil-ħsieb li jimplimentaw dak l-impenn skond id-dispożizzjonijiet ta' dan il-Ftehim.

Artikolu 8

Kooperazzjoni teknika

L-Awtoritajiet Doganali tal-Partijiet Kontraenti jistgħu jipprovdu lil xulxin b'assistenza teknika meta dan ikun ta' benefiċċju reċiproku fi kwistjonijiet doganali inkluż:

(a)	l-iskambju ta' persunal u esperti, għall-finijiet ta' promozzjoni tal-fehim reċiproku tal-liġi, il-proċeduri u l-karatteristiċi t-tekniċi doganali ta' xulxin;

(b)	it-taħriġ, b'mod partikolari l-iżvilupp ta' ħiliet speċjalizzati ta' l-uffiċjali tagħhom tad-dwana;

(ċ)	l-iskambju ta' data professjonali, xjentifika u teknika relatata mal-liġi u l-proċeduri doganali.

(d)	l-karatteristiċi tekniċi u metodi mtejba ta' pproċessar ta' passiġġieri u tagħbija.

(e)	kwalunkwe kwistjoni amministrattiva ġenerali li tista' minn żmien għall-ieħor teħtieġ azzjonijiet konġunti mill-amministrazzjonijiet doganali tagħhom.

Artikolu 9

Koordinazzjoni f'organizzazzjonijiet internazzjonali

L-awtoritajiet doganali għandhom ifittxu li jiżviluppaw u jsaħħu l-kooperazzjoni tagħhom dwar suġġetti ta' interess komuni sabiex ifittxu pożizzjoni koordinata meta jiġu diskussi dawk is-suġġetti fil-qafas ta' organizzazzjonijiet internazzjonali.

TITOLU IV

ASSISTENZA AMMINISTRATTIVA REĊIPROKA

Artikolu 10

Kamp ta' applikazzjoni

1.   L-awtoritajiet doganali għandhom jassistu lil xulxin billi jipprovdu informazzjoni xierqa li tgħin biex tkun żgurata l-applikazzjoni xierqa ta' leġislazzjoni doganali u l-prevenzjoni, l-investigazzjoni u l-ġlieda kontra kwalunkwe ksur tal-leġislazzjoni doganali.

2.   Assistenza fi kwistjonijiet doganali, kif previst f’dan il-Ftehim, għandha tapplika għal kwalunkwe awtorità amministrattiva tal-Partijiet Kontraenti li hija kompetenti għall-applikazzjoni ta’ dan il-Ftehim. Din m'għandhiex tippreġudika n-normi li jirregolaw l-assistenza reċiproka fi kwistjonijiet kriminali. Lanqas ma għandha tkopri l-informazzjoni miksuba taħt il-poteri eżerċitati fuq it-talba ta' awtorità ġudizzjarja;

3.   Assistenza biex jinġabru dazji, taxxi jew multi, jew l-arrest jew id-detenzjoni ta' kwalunkwe persuna jew il-qbid jew id-detenzjoni ta' proprjetà mhumiex koperti b'dan il-ftehim.

Artikolu 11

Assistenza fuq talba

1.   Fuq it-talba ta' l-awtorità applikanti, l-awtorità interpellata għandha tipprovdilha l-informazzjoni kollha rilevanti li tista' tgħinha sabiex tiżgura li l-leġislazzjoni doganali tiġi applikata b'mod korrett, inkluża l-informazzjoni rigward l-attivitajiet mikxufa jew ippjanati li huma jew jistgħu jkunu operazzjonijiet bi ksur tal-leġislazzjoni doganali. B'mod partikolari, fuq talba, l-awtoritajiet doganali għandhom jipprovdu lil xulxin informazzjoni rigward attivitajiet li jistgħu jirriżultaw f'reati fit-territorju tal-Parti l-oħra, per eżempju, dikjarazzjonijiet doganali inkorretti u ċertifikati ta' l-oriġini, fatturi jew dokumenti oħra magħrufa li huma, jew suspettati li huma, inkorretti jew falsifikati.

2.   Fuq it-talba ta' l-awtorità applikanti, l-awtorità interpellata għandha tinfurmaha dwar:

(a)	l-awtentiċità tad-dokumenti uffiċjali prodotti b'appoġġ ta' dikjarazzjoni ta' merkanzija magħmula lill-awtorità doganali tal-parti li qed tagħmel it-talba;

(b)	jekk il-merkanzija esportata minn territorju ta’ waħda mill-Partijiet Kontraenti ġietx importata legalment fit-territorju tal-Parti Kontraenti l-oħra, waqt li tispeċifika, fejn xieraq, il-proċedura doganali applikata għall-merkanzija;

(ċ)	jekk il-merkanzija importata fit-territorju ta’ waħda mill-Partijiet Kontraenti kinitx esportata legalment fit-territorju tal-Parti Kontraenti l-oħra, waqt li tispeċifika, fejn xieraq, il-proċedura doganali applikata għall-merkanzija.

3.   Fuq it-talba ta' l-awtorità applikanti, l-awtorità interpellata għandha, fil-qafas tal-liġijiet, ir-regolamenti u l-istrumenti legali l-oħra li jorbtu tagħha, tieħu l-passi meħtieġa sabiex tiżgura li jkun hemm sorveljanza speċjali ta':

(a)	persuni li fir-rigward tagħhom jeżistu raġunijiet tajbin biex jitwemmen li dawn huma jew kienu involuti f'operazzjonijiet bi ksur tal-leġislazzjoni doganali;

(b)	postijiet fejn ħażniet ta’ merkanzija kienu jew jistgħu jiġu maħżuna jew immuntati b’tali mod li hemm raġunijiet tajbin biex jitwemmen li din il-merkanzija hija intenzjonata biex tintuża f’operazzjonijiet bi ksur tal-leġislazzjoni doganali;

(ċ)	merkanzija li hija jew tista' tiġi trasportata b’tali mod li hemm raġunijiet tajbin biex jitwemmen li din hija intenzjonata biex tintuża f’operazzjonijiet bi ksur tal-leġislazzjoni doganali;

(d)	mezzi ta’ trasport li huma jew jistgħu jiġu użati b’tali mod li hemm raġunijiet tajbin biex jitwemmen li huma intenzjonati biex jintużaw f’operazzjonijiet bi ksur tal-leġislazzjoni doganali.

Artikolu 12

Assistenza spontanja

Il-Partijiet Kontraenti għandhom jassistu lil xulxin, fuq inizjattiva tagħhom stess u skond il-liġijiet, id-dispożizzjonijiet jew strumenti oħra li jorbtu legalment tagħhom jekk huma jikkunsidraw li jkun meħtieġ għall-applikazzjoni korretta tal-leġislazzjoni doganali, b'mod partikolari f'sitwazzjonijiet li jistgħu jinvolvu ħsara sostanzjali għall-ekonomija, is-saħħa pubblika, is-sigurtà pubblika jew interess vitali simili tal-Parti Kontraenti l-oħra li tappartjeni għal:

(a)	attivitajiet li huma jew jidhru li huma operazzjonijiet bi ksur tal-leġislazzjoni doganali u li jistgħu jkunu ta’ interess għall-Parti Kontraenti l-oħra;

(b)	mezzi jew metodi ġodda adottati fit-twettiq ta’ l-operazzjonijiet bi ksur tal-leġislazzjoni doganali;

(ċ)	merkanzija magħrufa li hija soġġetta għal operazzjonijiet bi ksur tal-leġislazzjoni doganali;

(d)	persuni li fir-rigward tagħhom jeżistu raġunijiet tajbin biex jitwemmen li dawn huma jew kienu involuti f'operazzjonijiet bi ksur tal-leġislazzjoni doganali;

(e)	mezzi ta’ trasport li fir-rigward tagħhom hemm raġunijiet tajbin biex jitwemmen li dawn intużaw, qegħdin jintużaw jew jistgħu jintużaw f’operazzjonijiet bi ksur tal-leġislazzjoni doganali.

Artikolu 13

Forma u sustanza tat-talbiet għall-assistenza

1.   It-talbiet skond dan il-Ftehim għandhom isiru bil-miktub. Dawn għandhom ikunu akkumpanjati mid-dokumenti meħtieġa biex ikunu konformi mat-talba. Fejn ikun meħtieġ minħabba l-urġenza tas-sitwazzjoni, talbiet verbali jistgħu jiġu aċċettati, iżda għandhom jiġu kkonfermati fil-pront bil-miktub.

2.   It-talbiet skond il-paragrafu 1 għandhom jinkludu l-informazzjoni li ġejja:

(a)	il-kontrofirmar formali ta' l-awtorità applikanti;

(b)	l-azzjoni mitluba;

(ċ)	l-għan u r-raġuni għat-talba;

(d)	il-liġijiet, ir-regolamenti u strumenti oħra li jorbtu legalment involuti;

(e)	indikazzjonijiet kemm jista' jkun eżatti u komprensivi dwar il-persuni li huma l-mira ta' l-investigazzjonijiet;

(f)	taqsira tal-fatti rilevanti u ta' l-istħarriġ li diġà twettaq.

3.   It-talbiet għandhom isiru f'lingwa uffiċjali ta' l-awtorità interpellata jew f'lingwa aċċettabbli għal din ta' l-aħħar. Din il-ħtieġa m’għandhiex tapplika għal kwalunkwe dokument li jakkumpanja t-talba taħt il-paragrafu 1.

4.   Jekk talba ma tkunx konformi mar-rekwiżiti formali ta' hawn fuq, tista' tintalab il-korrezzjoni jew it-tkomplija tagħha; fil-frattemp jistgħu jiġu ordnati miżuri ta' prekawzjoni.

Artikolu 14

Esekuzzjoni tat-talbiet

1.   Sabiex tikkonforma mat-talba ta’ assistenza, l-awtorità interpellata għandha tipproċedi, fil-limiti tal-kompetenza tagħha stess u tar-riżorsi disponibbli, daqs li kieku kienet qiegħda taġixxi fuq inizjattiva tagħha jew fuq talba ta’ awtoritajiet oħra ta’ l-istess Parti Kontraenti, billi tipprovdi l-informazzjoni li diġà tinsab fil-pussess tagħha, billi twettaq stħarriġ xieraq jew billi tirranġa sabiex dawn jitwettqu.

2.   It-talbiet għall-assistenza għandhom jiġu mwettqa skond il-liġijiet, ir-regolamenti u l-istrumenti l-oħra li jorbtu legalment tal-Parti interpellata.

3.   L-uffiċjali debitament awtorizzati ta' Parti Kontraenti jistgħu, bi qbil mal-Parti Kontraenti l-oħra u soġġett għall-kondizzjonijiet stabbiliti minn din ta' l-aħħar, ikunu preżenti waqt l-inkjesti mwettqa fil-ġurisdizzjoni ta' din ta' l-aħħar rigward każijiet speċifiċi.

4.   Fl-eventwalità li t-talba ma tkunx tista' tiġi mħarsa, l-awtorità applikanti għandha tiġi nnotifikata minnufih dwar dan il-fatt, permezz ta' dikjarazzjoni tar-raġunijiet u ta' kwalunkwe informazzjoni oħra li l-awtorità interpellata tikkunsidra li tista' tkun ta' assistenza lill-awtorità applikanti.

Artikolu 15

Forma li fiha l-informazzjoni għandha tiġi kkomunikata

1.   L-awtorità interpellata għandha tikkomunika r-riżultati ta’ l-inkjesti lill-awtorità applikanti bil-miktub flimkien mad-dokumenti rilevanti, kopji ċċertifikati jew oġġetti oħrajn.

2.   Din l-informazzjoni tista' tkun f'forma kompjuterizzata li għandha, fejn hu meħtieġ, tkun ikkonfermata bil-miktub immedjatament wara.

Artikolu 16

Eċċezzjonijiet għall-obbligu li tingħata assistenza

1.   L-assistenza tista’ tiġi rrifjutata jew tista’ tkun soġġetta għas-sodisfazzjon ta’ ċerti kondizzjonijiet jew ħtiġiet f'każijiet fejn Parti Kontraenti hija ta' l-opinjoni li dik l-assistenza taħt dan il-Ftehim tkun:

(a)	x'aktar tippreġudika s-sovranità tar-Repubblika Popolari taċ-Ċina jew dik ta' Stat Membru tal-Komunità Ewropea li ġiet mitluba tipprovdi assistenza taħt dan il-Ftehim; jew

(b)	x’aktarx tippreġudika l-ordni pubbliku, is-sigurtà jew interessi essenzjali oħrajn, b'mod partikolari fil-każijiet imsemmija taħt l-Artikolu 17(2); jew

(ċ)	tmur kontra sigriet industrijali, kummerċjali jew professjonali.

2.   L-assistenza tista’ tiġi posposta mill-awtorità interpellata għar-raġuni li din tinterferixxi ma' investigazzjoni, prosekuzzjoni jew proċedimenti li jkunu għaddejjin. F’każ bħal dan, l-awtorità interpellata għandha tikkonsulta lill-awtorità applikanti biex ikun determinat jekk tistax tingħata assistenza soġġetta għal tali termini jew kondizzjonijiet kif meħtieġa mill-awtorità interpellata.

3.   Fejn l-awtorità applikanti tfittex assistenza li hi nnifisha ma tkunx tista’ tagħti jekk tintalab, hija għandha tiġbed l-attenzjoni għal dan il-fatt fit-talba tagħha. Huwa mbagħad f’idejn l-awtorità interpellata li tiddeċiedi kif twieġeb għal tali talba.

4.   Għall-każijiet imsemmija fil-paragrafi 1 u 2, id-deċiżjoni ta' l-awtorità interpellata u r-raġunijiet għal din għandhom jiġu kkomunikati lill-awtorità applikanti mingħajr dewmien żejjed.

Artikolu 17

Skambju ta’ informazzjoni u kunfidenzjalità

1.   Kwalunkwe informazzjoni kkomunikata tkun xi tkun il-forma tagħha skond dan il-Ftehim għandha tkun ta' natura kunfidenzjali jew ristretta, skond ir-regoli li japplikaw f'kull waħda mill-Partijiet Kontraenti. Din għandha tkun koperta mill-obbligu ta’ segretezza uffiċjali u għandha tgawdi l-protezzjoni estiża għal informazzjoni simili skond il-liġijiet rilevanti tal-Parti Kontraenti li rċevietha u skond id-dispożizzjonijiet korrispondenti li japplikaw għall-awtoritajiet Komunitarji.

2.   Data personali tista' tiġi skambjata biss meta l-Parti Kontraenti li tista' tirċeviha timpenja ruħha li tipproteġi tali data b'mod mill-inqas ekwivalenti għal dak applikabbli għal dak il-każ partikolari fil-Parti Kontraenti li tista' tforniha. Il-Parti Kontraenti li tista' tforni l-informazzjoni ma għandha tistipula l-ebda ħtieġa li tkun aktar oneruża minn dik li tapplika għaliha fil-ġurisdizzjoni tagħha stess. Il-Partijiet Kontraenti għandhom jikkomunikaw lil xulxin l-informazzjoni dwar ir-regoli applikabbli tagħhom, inklużi fejn xieraq, id-dispożizzjonijiet legali fis-seħħ fl-Istati Membri tal-Komunità.

3.   Xejn f'dan il-Ftehim ma għandu jipprekludi l-użu ta' informazzjoni jew dokumenti miksuba skond dan il-Ftehim bħala evidenza fi proċedimenti amministrattivi istitwiti sussegwentement fir-rigward ta' operazzjonijiet bi ksur tal-leġislazzjoni doganali. Għalhekk, il-Partijiet Kontraenti, fir-reġistri ta’ evidenza, fir-rapporti u fix-xhieda tagħhom u fi proċedimenti amministrattivi jistgħu jużaw bħala evidenza l-informazzjoni miksuba u d-dokumenti kkonsultati skond id-dispożizzjonijiet ta' dan il-Ftehim. L-awtorità kompetenti li forniet dik l-informazzjoni jew li tat aċċess għal dawk id-dokumenti għandha tkun innotifikata b’tali użu.

4.   L-informazzjoni miksuba għandha tintuża biss għall-iskopijiet ta' dan il-Ftehim. Fejn waħda mill-Partijiet Kontraenti tixtieq tuża tali informazzjoni għal finijiet oħra, din għandha tikseb minn qabel il-kunsens bil-miktub ta’ l-awtorità li pprovdiet l-informazzjoni. Tali użu mbagħad għandu jkun soġġett għal kwlaunkwe restrizzjoni stipulata minn dik l-awtorità.

5.   Għandhom jiġu stabbiliti arranġamenti prattiċi sabiex jiġi implimentat dan l-Artikolu mill-Kumitat Konġunt tal-Kooperazzjoni Doganali stabbilit skond l-Artikolu 21.

Artikolu 18

Esperti u xhieda

Uffiċjal ta' l-awtorità interpellata jista' jiġi awtorizzat jidher, fil-limitazzjonijiet ta' l-awtorizzazzjoni mogħtija lilu, bħala espert jew xhud fi proċedimenti amministrattivi fir-rigward tal-kwistjonijiet koperti minn dan il-Ftehim fit-territorju tal-Parti Kontraenti l-oħra, u jipproduċi tali oġġetti, dokumenti u kopji ċertifikati tagħhom, li jistgħu jkunu utli għall-proċedimenti. It-talba għal dehra trid tindika speċifikament quddiem liema awtorità għandu jidher l-uffiċjal, dwar liema kwistjonijiet u bis-saħħa ta' liema titolu jew kwalifika l-uffiċjal irid jiġi mistoqsi.

Artikolu 19

Spejjeż għall-assistenza

1.   Il-Partijiet Kontraenti għandhom jeżentaw it-talbiet kollha reċiproċi għar-rimborż ta’ l-ispejjeż magħmula skond dan il-Ftehim, ħlief, kif xieraq, għall-ispejjeż ta’ l-esperti u x-xhieda, u dawk ta’ l-interpreti u t-tradutturi li mhumiex impjegati tas-servizz pubbliku.

2.   Jekk biex tiġi esegwita t-talba hemm bżonn, jew ser ikun hemm bżonn, ta' spejjeż ta' natura konsiderevoli jew straordinarja, il-Partijiet Kontraenti għandhom jikkonsultaw biex jistabbilixxu l-modalitajiet u l-kondizzjonijiet li taħthom tiġi esegwita t-talba kif ukoll il-mod kif l-ispejjeż jiġu sostnuti.

TITOLU V

DISPOŻIZZJONIJIET FINALI

Artikolu 20

Implimentazzjoni

1.   L-implimentazzjoni ta' dan il-Ftehim għandha tiġi fdata lill-awtoritajiet doganali tal-Kummissjoni tal-Komunitajiet Ewropej u, fejn xieraq, ta' l-Istati Membri tal-Komunità Ewropea min-naħa waħda, u lill-awtorità Doganali tar-Repubblika Popolari taċ-Ċina, min-naħa l-oħra. Huma għandhom jiddeċiedu dwar il-miżuri prattiċi kollha u l-arranġamenti meħtieġa għall-applikazzjoni tiegħu, waqt li jieħdu in konsiderazzjoni r-regoli fis-seħħ b'mod partikolari fil-qasam tal-protezzjoni tad-data. Huma jistgħu jirrakkomandaw lill-korpi kompetenti l-emendi li jikkunsidraw li għandhom isiru għal dan il-Ftehim.

2.   Il-Partijiet Kontraenti għandhom jikkonsultaw lil xulxin u għandhom sussegwentement iżommu lil xulxin infurmati bir-regoli dettaljati ta' implimentazzjoni li jiġu adottati skond id-dispożizzjonijiet ta' dan il-Ftehim.

Artikolu 21

Kumitat Konġunt tal-Kooperazzjoni Doganali

1.   Huwa b'dan stabbilit Kumitat Konġunt tal-Koperazzjoni Doganali, li jikkonsisti minn rappreżentanti ta' l-awtoritajiet doganali tar-Repubblika Popolari taċ-Ċina u l-Komunità Ewropea. Dan għandu jiltaqa' f'post, f'data u b'aġenda, stabbiliti bi qbil reċiproku.

2.   Il-Kumitat Konġunt tal-Kooperazzjoni Doganali għandu inter alia:

(a)	jara li l-Ftehim jiffunzjona kif jixraq;

(b)	jeżamina l-kwistjonijiet kollha li jirriżultaw mill-applikazzjoni tiegħu;

(ċ)	jieħu miżuri meħtieġa għall-kooperazzjoni doganali skond il-finijiet ta' dan il-Ftehim;

(d)	jiskambja opinjonijiet dwar kwalunkwe punt ta' interess komuni li jirrigwarda l-kooperazzjoni doganali, inklużi miżuri futuri u r-riżorsi għalihom;

(e)	jirrakkommanda soluzzjonijiet immirati sabiex jgħinu l-kisba ta' l-għanijiet ta' dan il-Ftehim.

3.   Il-Kumitat Konġunt tal-Kooperazzjoni Doganali għandu jadotta r-regoli interni ta' proċedura tiegħu.

4.   Il-Kumitat tal-Kooperazzjoni Doganali għandu fejn hu xieraq iżomm infurmata lill-Kummissjoni Konġunta stabbilita taħt l-Artikolu 15 tal-Ftehim dwar il-Kummerċ u l-Kooperazzjoni Ekonomika bejn il-Komunità Ekonomika Ewropea u ċ-Ċina b'attivitajiet li qed isiru taħt dan il-Ftehim.

Artikolu 22

Dħul fis-seħħ u tul ta' żmien

1.   Dan il-Ftehim għandu jidħol fis-seħħ fl-ewwel jum tax-xahar wara d-data ta' meta l-Partijiet Kontraenti jinnotifikaw lil xulxin dwar it-tlestija tal-proċeduri meħtieġa għal dan il-fini.

2.   Kull Parti Kontraenti tista' ttemm dan il-Ftehim billi tagħti avviż bil-miktub lill-Parti l-oħra. It-tmiem għandu jidħol b'effett tliet xhur mid-data tan-notifika lill-Parti Kontraenti l-oħra. It-talbiet għall-assistenza li jkunu ġew irċevuti qabel it-tmiem tal-Ftehim għandhom jiġu kkompletati skond id-dispożizzjonijiet ta' dan il-Ftehim.

Artikolu 23

Testi awtentiċi

Dan il-Ftehim għandu jitfassal f'żewġ kopji fil-lingwa Ċeka, Daniża, Olandiża, Ingliża, Estonjana, Finlandiża, Franċiża, Ġermaniża, Griega, Ungeriża, Taljana, Latvjana, Litwana, Maltija, Pollakka, Portugiża, Slovakka, Slovena, Spanjola, Svediża u Ċiniża, b'kull wieħed minn dawn it-testi ugwalment awtentiku.