(1)

It-theddida eżistenzjali mit-tibdil fil-klima tirrikjedi ambizzjoni msaħħa u azzjoni klimatika akbar min-naħa tal-Unjoni u tal-Istati Membri. L-Unjoni hija impenjata li żżid l-isforzi biex tindirizza t-tibdil fil-klima u twettaq l-implimentazzjoni tal-Ftehim ta’ Pariġi adottat fl-ambitu tal-Konvenzjoni Qafas tan-Nazzjonijiet Uniti dwar it-Tibdil fil-Klima (il-“Ftehim ta’ Pariġi”) (4), iggwidata mill-prinċipji tiegħu u abbażi tal-aħjar għarfien xjentifiku disponibbli, fil-kuntest tal-għan fit-tul dwar it-temperatura tal-Ftehim ta’ Pariġi.

(2)

Fil-komunikazzjoni tagħha tal-11 ta’ Diċembru 2019 bl-isem “Il-Patt Ekoloġiku Ewropew” (il-‘Patt Ekoloġiku Ewropew’), il-Kummissjoni stabbiliet strateġija ġdida ta’ tkabbir li għandha l-għan li tittrasforma l-Unjoni f’soċjetà ġusta u prospera, b’ekonomija moderna, effiċjenti fl-użu tar-riżorsi u kompetittiva, fejn ma jkunx hemm emissjonijiet netti ta’ gassijiet b’effett ta’ serra fl-2050 u fejn it-tkabbir ekonomiku jkun diżakkoppjat mill-użu tar-riżorsi. Il-Patt Ekoloġiku Ewropew għandu l-għan ukoll li jipproteġi, jippreserva u jsaħħaħ il-kapital naturali tal-Unjoni, u jipproteġi s-saħħa u l-benesseri taċ-ċittadini minn riskji u l-impatti relatati mal-ambjent. Fl-istess ħin, din it-tranżizzjoni trid tkun waħda ġusta u inklużiva biex ħadd ma jitħalla lura.

(3)

Il-Grupp Intergovernattiv ta’ Esperti dwar it-Tibdil fil-Klima (l-IPCC), fir-Rapport Speċjali tiegħu tal-2018 dwar l-impatti tat-tisħin globali ta’ 1,5 °C ’il fuq mil-livelli preindustrijali u l-perkorsi relatati tal-emissjonijiet globali tal-gassijiet b’effett ta’ serra, fil-kuntest tat-tisħiħ tar-rispons globali għat-theddida tat-tibdil fil-klima, l-iżvilupp sostenibbli, u l-isforzi biex jinqered il-faqar, jipprovdi bażi xjentifika soda biex jiġi ttrattat it-tibdil fil-klima u juri l-ħtieġa li tiżdied malajr l-azzjoni klimatika u titkompla t-tranżizzjoni lejn ekonomija newtrali għall-klima. Dak ir-rapport jikkonferma li l-emissjonijiet tal-gassijiet b’effett ta’ serra jridu jitnaqqsu b’mod urġenti, u li t-tibdil fil-klima jrid ikun limitat għal tisħin ta’ 1,5 °C, b’mod partikulari biex titnaqqas il-probabbiltà li jkun hemm avvenimenti estremi tat-temp u li jintlaħqu l-punti kritiċi. Il-Pjattaforma Intergovernattiva tal-Politika tax-Xjenza dwar il-Bijodiversità u s-Servizzi Ekosistemiċi (IPBES) uriet fir-Rapport ta’ Valutazzjoni Globali tagħha tal-2019 dwar il-Bijodiversità u s-Servizzi Ekosistemiċi erożjoni dinjija tal-bijodiversità, bit-tibdil fil-klima bħala t-tielet l-aktar mutur importanti tat-telf tal-bijodiversità.

(4)

Objettiv fiss fit-tul huwa importanti ferm biex jingħata kontribut għat-trasformazzjoni tal-ekonomija u tas-soċjetà, għall-impjiegi ta’ kwalità għolja, għat-tkabbir sostenibbli u għall-kisba tal-Għanijiet ta’ Żvilupp Sostenibbli tan-Nazzjonijiet Uniti, kif ukoll biex jintlaħaq b’mod ġust, soċjalment ibbilanċjat, ekwu u kosteffettiv l-għan fit-tul dwar it-temperatura stabbilit fil-Ftehim ta’ Pariġi.

(5)

Huwa meħtieġ li jiġu indirizzati r-riskji għas-saħħa relatati mal-klima li qed jikbru, inklużi mewġiet ta’ sħana, nirien fil-foresti u għargħar aktar frekwenti u intensi, theddid għas-sigurtà u s-sikurezza tal-ikel u tal-ilma, u t-tfaċċar u t-tixrid ta’ mard infettiv. Kif imħabbar fil-komunikazzjoni tagħha tal-24 ta’ Frar 2021 intitolata “Insawru Ewropa reżiljenti għall-klima – L-istrateġija l-ġdida tal-UE dwar l-Adattament għat-Tibdil fil-Klima”, il-Kummissjoni nediet osservatorju Ewropew dwar il-klima u s-saħħa fl-ambitu tal-Pjattaforma Ewropea ta’ Adattament għat-Tibdil fil-Klima Climate-ADAPT, biex it-theddid għas-saħħa kkawżat mit-tibdil fil-klima jiġu mifhum aħjar, antiċipat u mminimizzat.

(6)

Dan ir-Regolament jirrispetta d-drittijiet fundamentali u josserva l-prinċipji rikonoxxuti mill-Karta tad-Drittijiet Fundamentali tal-Unjoni Ewropea, b’mod partikolari l-Artikolu 37 tagħha li huwa maħsub biex jippromwovi l-integrazzjoni fil-politiki tal-Unjoni ta’ livell għoli ta’ protezzjoni ambjentali u t-titjib tal-kwalità tal-ambjent f’konformità mal-prinċipju ta’ żvilupp sostenibbli.

(7)

L-azzjoni dwar il-klima jenħtieġ li tkun opportunità, għas-setturi kollha tal-ekonomija fl-Unjoni, biex jingħata kontribut għall-iżgurar ta’ tmexxija industrijali fl-innovazzjoni globali. Abbażi tal-qafas regolatorju tal-Unjoni u l-isforzi mwettqa mill-industrija, huwa possibbli li t-tkabbir ekonomiku jiġi diżakkoppjat mill-emissjonijiet ta’ gassijiet b’effett ta’ serra. Pereżempju, l-emissjonijiet ta’ gassijiet b’effett ta’ serra fl-Unjoni tnaqqsu b’24 % bejn l-1990 u l-2019, filwaqt li l-ekonomija kibret b’60 % fl-istess perjodu. Mingħajr preġudizzju għal leġiżlazzjoni vinkolanti u inizjattivi oħra adottati fil-livell tal-Unjoni, is-setturi kollha tal-ekonomija – inklużi l-enerġija, l-industrija, it-trasport, it-tisħin u t-tkessiħ u l-bini, l-agrikoltura, l-iskart u l-użu tal-art, it-tibdil fl-użu tal-art u l-forestrija, irrispettivament minn jekk dawk is-setturi jkunux koperti mis-skema għan-negozjar ta’ emissjonijiet ta’ gassijiet b’effett ta’ serra fi ħdan l-Unjoni (“EU ETS”) – jenħtieġ li jkollhom rwol fil-kontribut għall-kisba tan-newtralità klimatika fl-Unjoni sal-2050. Sabiex jissaħħaħ l-involviment tal-atturi ekonomiċi kollha, jenħtieġ li l-Kummissjoni tiffaċilita djalogi u s-sħubijiet dwar il-klima speċifiċi għas-settur billi tlaqqa’ flimkien lill-partijiet ikkonċernati ewlenin b’mod inklużiv u rappreżentattiv, sabiex tħeġġeġ lis-setturi nfushom ifasslu pjanijiet direzzjonali volontarji indikattivi u jippjanaw it-tranżizzjoni tagħhom lejn il-kisba tal-objettiv tan-newtralità klimatika tal-Unjoni sal-2050. Tali pjanijiet direzzjonali jistgħu jagħtu kontribut siewi biex is-setturi jiġu assistiti fl-ippjanar tal-investimenti meħtieġa favur it-tranżizzjoni lejn ekonomija newtrali għall-klima u jistgħu jservu wkoll biex jissaħħaħ l-impenn settorjali fit-tfittxija għal soluzzjonijiet newtrali għall-klima. Tali pjanijiet direzzjonali jistgħu jikkomplementaw ukoll inizjattivi eżistenti, inklużi l-Alleanza Ewropea tal-Batteriji u l-Alleanza Ewropea għall-Idroġenu Nadif, li jrawmu l-kollaborazzjoni industrijali fit-tranżizzjoni lejn in-newtralità klimatika.

(8)

Il-Ftehim ta’ Pariġi jistabbilixxi għan fit-tul dwar it-temperatura fil-punt (a) tal-Artikolu 2(1) tiegħu, u għandu l-għan li jsaħħaħ ir-rispons globali għat-theddida tat-tibdil fil-klima billi jżid il-kapaċità ta’ adattament għall-impatti negattivi tat-tibdil fil-klima kif stabbilit fil-punt (b) tal-Artikolu 2(1) tiegħu u billi jagħmel il-flussi finanzjarji konsistenti ma’ perkors lejn livell baxx ta’ emissjonijiet ta’ gassijiet b’effett ta’ serra u żvilupp reżiljenti għat-tibdil fil-klima kif stabbilit fil-punt (c) tal-Artikolu 2(1) tiegħu. Bħala l-qafas ġenerali għall-kontribut tal-Unjoni għall-Ftehim ta’ Pariġi, dan ir-Regolament jenħtieġ li jiżgura li kemm l-Unjoni kif ukoll l-Istati Membri jikkontribwixxu għar-rispons globali għat-tibdil fil-klima kif imsemmi fil-Ftehim ta’ Pariġi.

(9)

L-għan tal-azzjoni klimatika tal-Unjoni u tal-Istati Membri huwa li tipproteġi lin-nies u lill-pjaneta kif ukoll il-benesseri, il-prosperità, l-ekonomija, is-saħħa, is-sistemi tal-ikel, l-integrità tal-ekosistemi u l-bijodiversità mit-theddida tat-tibdil fil-klima, fil-kuntest tal-aġenda 2030 tan-Nazzjonijiet Uniti għall-iżvilupp sostenibbli u biex jintlaħqu l-objettivi tal-Ftehim ta’ Pariġi, u li tiżdied kemm jista’ jkun il-prosperità fil-limiti tal-pjaneta u li tiżdied ir-reżiljenza tas-soċjetà b’rabta mat-tibdil fil-klima u titnaqqas il-vulnerabbiltà tagħha għal dan it-tibdil. Fid-dawl ta’ dan, jenħtieġ li l-azzjonijiet tal-Unjoni u tal-Istati Membri jkunu ggwidati mill-prinċipji ta’ prekawzjoni u ta’ “min iniġġes iħallas” stabbiliti fit-Trattat dwar il-Funzjonament tal-Unjoni Ewropea, u jenħtieġ li jqisu wkoll il-prinċipju “l-effiċjenza enerġetika tiġi l-ewwel” tal-Unjoni tal-Enerġija u l-prinċipju ta’ “la tagħmilx ħsara” tal-Patt Ekoloġiku Ewropew.

(10)

Jenħtieġ li s-setturi ekonomiċi kollha, li għalihom l-emissjonijiet jew l-assorbimenti ta’ gassijiet b’effett ta’ serra huma regolati fil-liġi tal-Unjoni, ikunu obbligati jikkontribwixxu għall-kisba tan-newtralità klimatika.

(11)

Fid-dawl tal-importanza tal-produzzjoni u l-konsum tal-enerġija għal-livell ta’ emissjonijiet ta’ gassijiet b’effett ta’ serra, huwa essenzjali li tiġi żgurata tranżizzjoni lejn sistema tal-enerġija sikura, sostenibbli, affordabbli u sigura li tiddependi fuq l-użu ta’ sorsi ta’ enerġija rinnovabbli, suq intern tal-enerġija li jiffunzjona tajjeb u t-titjib tal-effiċjenza enerġetika, filwaqt li jitnaqqas il-faqar enerġetiku. Trasformazzjoni diġitali, innovazzjoni teknoloġika, u riċerka u żvilupp ukoll huma fatturi importanti biex jintlaħaq l-objettiv tan-newtralità klimatika.

(12)

L-Unjoni implimentat qafas regolatorju biex tikseb il-mira ta’ tnaqqis tal-emissjonijiet ta’ gassijiet b’effett ta’ serra għall-2030 li ġiet maqbula fl-2014, qabel id-dħul fis-seħħ tal-Ftehim ta’ Pariġi. Fost il-leġiżlazzjoni li timplimenta dik il-mira nsibu d-Direttiva 2003/87/KE tal-Parlament Ewropew u tal-Kunsill (5), li tistabbilixxi l-EU ETS, ir-Regolament (UE) 2018/842 tal-Parlament Ewropew u tal-Kunsill (6), li daħħal miri nazzjonali għat-tnaqqis tal-emissjonijiet tal-gassijiet b’effett ta’ serra sal-2030, u r-Regolament (UE) 2018/841 tal-Parlament Ewropew u tal-Kunsill (7), li jitlob lill-Istati Membri jibbilanċjaw l-emissjonijiet u l-assorbimenti tal-gassijiet b’effett ta’ serra mill-użu tal-art, mit-tibdil fl-użu tal-art u mill-forestrija.

(13)

L-EU ETS hija pedament tal-politika tal-Unjoni dwar il-klima u tikkostitwixxi l-għodda ewlenija tagħha għat-tnaqqis tal-emissjonijiet tal-gassijiet b’effett ta’ serra b’mod kosteffettiv.

(14)

Fil-komunikazzjoni tagħha tat-28 ta’ Novembru 2018 bl-isem “Pjaneta Nadifa għal kulħadd – Viżjoni strateġika Ewropea fit-tul għal ekonomija għanja, moderna, kompetittiva u newtrali għall-klima”, il-Kummissjoni ppreżentat viżjoni biex sal-2050 tinkiseb il-mira ta’ emissjonijiet ta’ gassijiet b’effett ta’ serra żero netti fl-Unjoni permezz ta’ tranżizzjoni soċjalment ekwa li tkun kosteffiċjenti.

(15)

Permezz tal-pakkett dwar l-“Enerġija Nadifa għall-Ewropej kollha” tat-30 ta’ Novembru 2016, l-Unjoni ilha żmien issegwi programm ambizzjuż ta’ dekarbonizzazzjoni, b’mod partikolari bil-ħolqien ta’ Unjoni b’saħħitha tal-Enerġija li tinkludi l-għanijiet għall-effiċjenza enerġetika u għall-użu tal-enerġija minn sorsi rinnovabbli għall-2030 fid-Direttivi 2012/27/UE (8) u (UE) 2018/2001 (9) tal-Parlament Ewropew u tal-Kunsill, u bit-tisħiħ tal-leġiżlazzjoni rilevanti, inkluża d-Direttiva 2010/31/UE tal-Parlament Ewropew u tal-Kunsill (10).

(16)

L-Unjoni hija mexxejja globali fit-tranżizzjoni lejn in-newtralità klimatika u hija deċiża li tgħin biex tiżdied l-ambizzjoni globali u biex jissaħħaħ ir-rispons globali għat-tibdil fil-klima, billi tuża l-għodod kollha li għandha għad-dispożizzjoni tagħha, fosthom id-diplomazija dwar il-klima.

(17)

Jenħtieġ li l-Unjoni tkompli għaddejja bl-azzjoni klimatika tagħha u tkompli tkun mexxejja internazzjonali fil-qasam tal-klima wara l-2050, sabiex tipproteġi lin-nies u lill-pjaneta mit-theddida ta’ tibdil perikoluż fil-klima, hija u tfittex li tilħaq l-għan fit-tul dwar it-temperatura tal-Ftehim ta’ Pariġi u filwaqt li ssegwi l-valutazzjonijiet xjentifiċi tal-IPCC, tal-IPBES u tal-Bord Konsultattiv Xjentifiku Ewropew dwar it-Tibdil fil-Klima, kif ukoll il-valutazzjonijiet ta’ korpi internazzjonali oħra.

(18)

Għad hemm riskju ta’ rilokazzjoni tal-emissjonijiet tal-karbonju fir-rigward ta’ dawk is-sħab internazzjonali li ma għandhomx l-istess standards ta’ protezzjoni tal-klima bħal dawk tal-Unjoni. Il-Kummissjoni għalhekk biħsiebha tipproponi mekkaniżmu ta’ aġġustament tal-karbonju fil-fruntiera għal setturi magħżula, biex dawn ir-riskji jitnaqqsu b’mod li jkun kompatibbli mar-regoli tal-Organizzazzjoni Dinjija tal-Kummerċ. Barra minn hekk, huwa importanti li jinżammu inċentivi ta’ politika effettivi b’appoġġ għal innovazzjonijiet u soluzzjonijiet teknoloġiċi li jippermettu t-tranżizzjoni lejn ekonomija tal-Unjoni kompetittiva u newtrali għall-klima, filwaqt li tiġi pprovduta ċ-ċertezza tal-investiment.

(19)

Il-Parlament Ewropew appella, fir-riżoluzzjoni tiegħu tal-15 ta’ Jannar 2020 dwar il-Patt Ekoloġiku Ewropew, għat-tranżizzjoni meħtieġa lejn soċjetà newtrali għall-klima sa mhux aktar tard mill-2050 u biex din tkun storja Ewropea ta’ suċċess u, fir-riżoluzzjoni tiegħu tat-28 ta’ Novembru 2019 dwar l-emerġenza klimatika u ambjentali, iddikjara emerġenza klimatika u ambjentali. Appella ripetutament ukoll lill-Unjoni biex iżżid il-mira klimatika tagħha għall-2030, u biex dik il-mira aktar ambizzjuża tkun parti minn dan ir-Regolament. Fil-konklużjonijiet tiegħu tat-12 ta’ Diċembru 2019, il-Kunsill Ewropew qabel dwar l-objettiv li tinkiseb Unjoni newtrali għall-klima sal-2050, f’konformità mal-objettivi tal-Ftehim ta’ Pariġi, filwaqt li rrikonoxxa wkoll li huwa meħtieġ li jiġi stabbilit qafas ta’ abilitazzjoni li minnu jibbenefikaw l-Istati Membri kollha u li jinkludi strumenti, inċentivi, appoġġ u investimenti adegwati biex tiġi żgurata tranżizzjoni kosteffettiva, ġusta, kif ukoll soċjalment ibbilanċjata u ekwa, filwaqt li jittieħed kont taċ-ċirkostanzi nazzjonali differenti f’termini ta’ punti tat-tluq. Huwa nnota wkoll li t-tranżizzjoni se tkun tirrikjedi investimenti pubbliċi u privati sinifikanti. Fis-6 ta’ Marzu 2020, l-Unjoni ppreżentat l-istrateġija fit-tul tagħha għal żvilupp b’emissjonijiet baxxi ta’ gassijiet b’effett ta’ serra u, fis-17 ta’ Diċembru 2020, il-kontribut stabbilit fil-livell nazzjonali tagħha, għall-Konvenzjoni Qafas tan-Nazzjonijiet Uniti dwar it-Tibdil fil-Klima (UNFCCC), wara li dawn ġew approvati mill-Kunsill.

(20)

Jenħtieġ li l-Unjoni timmira li tilħaq bilanċ bejn l-emissjonijiet antropoġeniċi mill-oqsma ekonomiċi kollha minn fonti u l-assorbimenti minn bjar ta’ gassijiet b’effett ta’ serra fuq livell domestiku fi ħdan l-Unjoni sal-2050 u sussegwentement, kif xieraq, tikseb emissjonijiet negattivi. Dak l-objettiv jenħtieġ li jinkludi l-emissjonijiet u l-assorbimenti ta’ gassijiet b’effett ta’ serra fl-Unjoni kollha rregolati mil-liġi tal-Unjoni. Jenħtieġ li jkun possibbli li tali emissjonijiet u assorbimenti jiġu indirizzati fil-kuntest tar-rieżami tal-leġiżlazzjoni rilevanti dwar il-klima u l-enerġija. Il-bjar jinkludu soluzzjonijiet naturali u teknoloġiċi, kif irrapportat lill-UNFCCC fl-inventarji tal-Unjoni ta’ gassijiet b’effett ta’ serra. Is-soluzzjonijiet ibbażati fuq it-teknoloġiji ta’ ġbir u ħżin tal-karbonju (CCS) u ta’ ġbir u użu tal-karbonju (CCU) jista’ jkollhom rwol fid-dekarbonizzazzjoni, speċjalment għall-mitigazzjoni tal-emissjonijiet mill-proċessi fl-industrija, għall-Istati Membri li jagħżlu din it-teknoloġija. Jenħtieġ li l-Istati Membri kollha jaħdmu flimkien biex jiksbu l-objettiv tan-newtralità klimatika fl-Unjoni sal-2050 u li l-Istati Membri, il-Parlament Ewropew, il-Kunsill u l-Kummissjoni jieħdu l-miżuri meħtieġa biex jippermettu li dan jinkiseb. Il-miżuri fil-livell tal-Unjoni se jkunu jiffurmaw parti importanti mill-miżuri meħtieġa biex jinkiseb dan l-objettiv.

(21)

Fil-konklużjonijiet tiegħu tat-8 u d-9 ta’ Marzu 2007 u tat-23 u l-24 ta’ Ottubru 2014, il-Kunsill Ewropew approva l-mira tal-Unjoni għat-tnaqqis tal-emissjoni tal-gassijiet b’effett ta’ serra għall-2020 u l-qafas ta’ politika għall-klima u l-enerġija għall-2030, rispettivament. Id-dispożizzjonijiet ta’ dan ir-Regolament dwar id-determinazzjoni tal-mira klimatika tal-Unjoni għall-2040 huma mingħajr preġudizzju għar-rwol tal-Kunsill Ewropew, kif stabbilit fit-Trattati, fid-definizzjoni tad-direzzjoni politika ġenerali tal-Unjoni u l-prijoritajiet għall-iżvilupp tal-politika tal-Unjoni dwar il-klima.

(22)

Il-bjar tal-karbonju għandhom rwol essenzjali fit-tranżizzjoni lejn in-newtralità klimatika fl-Unjoni, u b’mod partikolari s-setturi tal-agrikoltura, tal-forestrija u tal-użu tal-art jagħtu kontribut importanti f’dak il-kuntest. Kif imħabbar fil-komunikazzjoni tagħha tal-20 ta’ Mejju 2020 bl-isem “Strateġija mill-Għalqa sal-Platt għal sistema tal-ikel ġusta, tajba għas-saħħa u favur l-ambjent”, il-Kummissjoni se tippromwovi mudell ġdid ta’ negozju ekoloġiku biex tippremja lill-maniġers tal-art għat-tnaqqis tal-emissjoni tal-gassijiet b’effett ta’ serra u l-assorbimenti tal-karbonju fl-inizjattiva li jmiss dwar is-sekwestru tal-karbonju f’art agrikola. Barra minn hekk, fil-komunikazzjoni tagħha tal-11 ta’ Marzu 2020 bl-isem “Pjan ta’ Azzjoni ġdid dwar l-Ekonomija Ċirkolari Għal Ewropea aktar nadifa u kompetittiva”, il-Kummissjoni impenjat ruħha li tiżviluppa qafas regolatorju għaċ-ċertifikazzjoni ta’ assorbimenti tal-karbonju abbażi tal-kontabbiltà tal-karbonju robusta u trasparenti għall-monitoraġġ u l-verifika tal-awtentiċità tal-assorbimenti tal-karbonju, filwaqt li jiġi żgurat li ma jkun hemm l-ebda impatt negattiv fuq l-ambjent, b’mod partikolari l-bijodiversità, fuq is-saħħa pubblika jew fuq objettivi soċjali jew ekonomiċi.

(23)

Ir-restawr tal-ekosistemi jikkontribwixxi għaż-żamma, il-ġestjoni u t-titjib tal-bjar naturali u jippromwovi l-bijodiversità filwaqt li jiġġieled it-tibdil fil-klima. Barra minn hekk, ir-“rwol triplu” tal-foresti, jiġifieri, bħala bjar, ħżin u sostituzzjoni tal-karbonju, jikkontribwixxi għat-tnaqqis tal-gassijiet b’effett ta’ serra fl-atmosfera, filwaqt li jiżgura li l-foresti jkomplu jikbru u jipprovdu ħafna servizzi oħra.

(24)

L-għarfien espert xjentifiku u l-aqwa evidenza aġġornata disponibbli, flimkien ma’ informazzjoni dwar it-tibdil fil-klima li tkun kemm fattwali kif ukoll trasparenti huma fundamentali u jeħtieġ li jsejsu l-azzjoni u l-isforzi klimatiċi tal-Unjoni biex tinkiseb newtralità klimatika sal-2050. Jenħtieġ li jiġi stabbilit Bord Konsultattiv Xjentifiku Ewropew dwar it-Tibdil fil-Klima (il-“Bord Konsultattiv”) biex iservi bħala punt ta’ referenza dwar l-għarfien xjentifiku relatat mat-tibdil fil-klima minħabba l-indipendenza u l-għarfien espert xjentifiku u tekniku tiegħu. Il-Bord Konsultattiv jenħtieġ li jikkomplementa l-ħidma tal-Aġenzija Ewropea għall-Ambjent (EEA) filwaqt li jaġixxi b’mod indipendenti fit-twettiq tal-kompiti tiegħu. Jenħtieġ li l-missjoni tiegħu tevita kwalunkwe duplikazzjoni mal-missjoni tal-IPCC fil-livell internazzjonali. Għalhekk, ir-Regolament (KE) Nru 401/2009 tal-Parlament Ewropew u tal-Kunsill (11) jenħtieġ li jiġi emendat sabiex jiġi stabbilit il-Bord Konsultattiv. Il-korpi konsultattivi nazzjonali dwar il-klima jista’ jkollhom rwol importanti, fost l-oħrajn, fl-għoti ta’ pariri xjentifiċi esperti dwar il-politika dwar il-klima lill-awtoritajiet nazzjonali rilevanti kif preskritt mill-Istat Membru kkonċernat f’dawk l-Istati Membri fejn jeżistu. Għalhekk, l-Istati Membri li għadhom ma għamlux dan huma mistiedna jistabbilixxu korp konsultattiv nazzjonali dwar il-klima.

(25)

It-tranżizzjoni lejn in-newtralità klimatika tirrikjedi bidliet fl-ispettru kollu tal-politika u sforz kollettiv min-naħa tas-setturi ekonomiċi kollha u tas-setturi kollha tas-soċjetà, kif hu enfasizzat fil-Patt Ekoloġiku Ewropew. Fil-konklużjonijiet tiegħu tat-12 ta’ Diċembru 2019, il-Kunsill Ewropew iddikjara li l-leġiżlazzjoni u l-politiki rilevanti kollha tal-Unjoni jridu jkunu konsistenti mat-twettiq tal-objettiv tan-newtralità klimatika u jikkontribwixxu għalih, filwaqt li jħarsu l-kundizzjonijiet ekwi, u stieden lill-Kummissjoni teżamina jekk dan jirrikjedix aġġustament tar-regoli eżistenti.

(26)

Kif imħabbar fil-Il-Patt Ekoloġiku Ewropew, il-Kummissjoni vvalutat il-mira tal-Unjoni għall-2030 għat-tnaqqis tal-emissjonijiet ta’ gassijiet b’effett ta’ serra fil-komunikazzjoni tagħha tas-17 ta’ Settembru 2020 bl-isem “It-tisħiħ tal-ambizzjoni klimatika tal-Ewropa għall-2030 – Ninvestu f’futur newtrali għall-klima għall-benefiċċju tal-popli tagħna”. Il-Kummissjoni għamlet dan abbażi ta’ valutazzjoni tal-impatt komprensiva u filwaqt li qieset l-analiżi tagħha tal-pjanijiet nazzjonali integrati dwar l-enerġija u l-klima ppreżentati lilha f’konformità mar-Regolament (UE) 2018/1999 tal-Parlament Ewropew u tal-Kunsill (12). Fid-dawl tal-objettiv tan-newtralità klimatika għall-2050, sal-2030 l-emissjonijiet ta’ gassijiet b’effett ta’ serra jenħtieġ li jitnaqqsu u l-assorbimenti jiżdiedu, sabiex l-emissjonijiet netti ta’ gassijiet b’effett ta’ serra, jiġifieri l-emissjonijiet wara t-tnaqqis tal-assorbimenti, jitnaqqsu fl-ekonomija kollha u fuq livell domestiku b’mill-inqas 55 % sal-2030 meta mqabbla mal-livelli tal-1990. Il-Kunsill Ewropew approva dik il-mira fil-konklużjonijiet tiegħu tal-10 u l-11 ta’ Diċembru 2020. Huwa pprovda wkoll gwida inizjali dwar l-implimentazzjoni tagħha. Dik il-mira klimatika l-ġdida tal-Unjoni għall-2030 hija mira sussegwenti għall-finijiet tal-punt (11) tal-Artikolu 2 tar-Regolament (UE) 2018/1999, u għaldaqstant tissostitwixxi l-mira tal-Unjoni kollha għall-2030 għall-emissjonijiet ta’ gassijiet b’effett ta’ serra stabbilita f’dak il-punt. Barra minn hekk jenħtieġ li, sat-30 ta’ Ġunju 2021, il-Kummissjoni tivvaluta kif ikun meħtieġ li tiġi emendata l-leġiżlazzjoni tal-Unjoni li timplimenta dik il-mira klimatika tal-Unjoni għall-2030 sabiex jinkiseb dan it-tnaqqis fl-emissjonijiet netti. Fid-dawl ta’ dan, il-Kummissjoni ħabbret reviżjoni tal-leġiżlazzjoni rilevanti dwar il-klima u l-enerġija li se tiġi adottata f’pakkett li jkopri, fost l-oħrajn, is-sorsi rinnovabbli, l-effiċjenza enerġetika, l-użu tal-art, it-tassazzjoni fuq l-enerġija, l-istandards tal-prestazzjoni tal-emissjonijiet tas-CO2 għall-vetturi ħfief, il-kondiviżjoni tal-isforzi u l-EU ETS.

Il-Kummissjoni biħsiebha tivvaluta l-impatti tal-introduzzjoni ta’ miżuri addizzjonali tal-Unjoni li jistgħu jikkomplementaw il-miżuri eżistenti, bħal pereżempju miżuri bbażati fuq is-suq li jinkludu mekkaniżmu ta’ solidarjetà b’saħħtu.

(27)

Skont il-valutazzjonijiet tal-Kummissjoni, l-impenji eżistenti skont l-Artikolu 4 tar-Regolament (UE) 2018/841 jirriżultaw f’bir tal-karbonju nett ta’ 225 miljun tunnellata ta’ ekwivalenti ta’ CO2 fl-2030. Sabiex jiġi żgurat li jsiru biżżejjed sforzi ta’ mitigazzjoni sal-2030, huwa xieraq li l-kontribut tal-assorbimenti netti għall-mira klimatika tal-Unjoni għall-2030 jiġi limitat għal dak il-livell. Dan huwa mingħajr preġudizzju għar-rieżami tal-leġiżlazzjoni rilevanti tal-Unjoni sabiex tkun tista’ tintlaħaq il-mira.

(28)

In-nefqa fl-ambitu tal-baġit tal-Unjoni u l-Istrument tal-Unjoni Ewropea għall-Irkupru stabbiliti mir-Regolament tal-Kunsill (UE) 2020/2094 (13) tikkontribwixxi għall-objettivi klimatiċi, billi tiddedika mill-inqas 30 % tal-ammont totali tan-nefqa għall-appoġġ tal-objettivi klimatiċi, abbażi ta’ metodoloġija effettiva u f’konformità mal-leġiżlazzjoni settorjali.

(29)

Fid-dawl tal-objettiv li tinkiseb newtralità klimatika sal-2050 u fid-dawl tal-impenji internazzjonali skont il-Ftehim ta’ Pariġi, huma meħtieġa sforzi kontinwi biex tiġi żgurata t-tneħħija gradwali tas-sussidji tal-enerġija li huma inkompatibbli ma’ dak l-objettiv, b’mod partikolari għall-fjuwils fossili, mingħajr ma jkun hemm impatt fuq l-isforzi biex jitnaqqas il-faqar enerġetiku.

(30)

Sabiex jiġu pprovduti prevedibbiltà u fiduċja għall-atturi ekonomiċi kollha, fosthom in-negozji, il-ħaddiema, l-investituri u l-konsumaturi, biex jiġi żgurat tnaqqis gradwali tal-emissjonijiet ta’ gassijiet b’effett ta’ serra maż-żmien u li t-tranżizzjoni lejn in-newtralità klimatika tkun irreversibbli, jenħtieġ li l-Kummissjoni tipproponi mira klimatika intermedja tal-Unjoni għall-2040, kif xieraq, sa mhux aktar tard minn sitt xhur mill-ewwel rendikont globali mwettaq skont il-Ftehim ta’ Pariġi. Il-Kummissjoni tista’ tagħmel proposti għar-reviżjoni tal-mira intermedja, filwaqt li tqis is-sejbiet tal-valutazzjonijiet tal-progress u l-miżuri tal-Unjoni u tal-miżuri nazzjonali kif ukoll l-eżiti tar-rendikont globali u tal-iżviluppi internazzjonali, inkluż fuq l-iskedi ta’ żmien komuni għall-kontributi stabbiliti fil-livell nazzjonali. Bħala għodda biex jiżdiedu t-trasparenza u r-responsabbiltà tal-politiki tal-Unjoni dwar il-klima, jenħtieġ li l-Kummissjoni, meta tagħmel il-proposta leġiżlattiva tagħha għall-mira klimatika tal-Unjoni għall-2040, tippubblika l-baġit indikattiv projettat tal-Unjoni għall-gassijiet b’effett ta’ serra għall-perjodu 2030 – 2050, definit bħala l-volum totali indikattiv tal-emissjonijiet netti ta’ gassijiet b’effett ta’ serra li mistennija jiġu emessi f’dak il-perjodu mingħajr ma jitqiegħdu f’riskju l-impenji tal-Unjoni fl-ambitu tal-Ftehim ta’ Pariġi, kif ukoll il-metodoloġija li fuqha huwa bbażat dak il-baġit indikattiv.

(31)

L-adattament huwa komponent ewlieni tar-rispons globali fit-tul għat-tibdil fil-klima. L-effetti negattivi tat-tibdil fil-klima jistgħu potenzjalment jisbqu l-kapaċitajiet ta’ adattament tal-Istati Membri. Għalhekk jenħtieġ li l-Istati Membri u l-Unjoni jtejbu l-kapaċità ta’ adattament tagħhom, isaħħu r-reżiljenza u jnaqqsu l-vulnerabbiltà għat-tibdil fil-klima, kif previst fl-Artikolu 7 tal-Ftehim ta’ Pariġi, kif ukoll li dawn iżidu kemm jista’ jkun il-benefiċċji kollaterali ma’ politiki u leġiżlazzjoni oħra. Jenħtieġ li l-Kummissjoni tadotta strateġija tal-Unjoni dwar l-adattament għat-tibdil fil-klima f’konformità mal-Ftehim ta’ Pariġi. Jenħtieġ li l-Istati Membri jadottaw strateġiji u pjanijiet ta’ adattament komprensivi fuq livell nazzjonali, abbażi ta’ analiżijiet sodi, valutazzjonijiet tal-progress u indikaturi dwar it-tibdil fil-klima u l-vulnerabbiltà, u ggwidati mill-aqwa evidenza xjentifika disponibbli u l-aktar reċenti. Jenħtieġ li l-Unjoni tipprova toħloq ambjent regolatorju favorevoli għall-politiki u l-miżuri nazzjonali implimentati mill-Istati Membri biex jadattaw għat-tibdil fil-klima. It-titjib tar-reżiljenza għat-tibdil fil-klima u l-kapaċitajiet ta’ adattament għat-tibdil fil-klima jeħtieġu sforzi kondiviżi mis-setturi kollha tal-ekonomija u tas-soċjetà, kif ukoll koerenza u konsistenza tal-politika fil-leġiżlazzjoni u l-politiki rilevanti kollha.

(32)

L-ekosistemi, in-nies u l-ekonomiji fir-reġjuni kollha tal-Unjoni se jiffaċċjaw impatti kbar mit-tibdil fil-klima, bħal sħana estrema, għargħar, nixfiet, skarsezza tal-ilma, żieda fil-livell tal-baħar, tidwib tal-glaċieri, nirien tal-foresti, qlugħ ta’ siġar mill-għeruq ikkawżat mir-riħ u telf agrikolu. L-avvenimenti estremi reċenti diġà kellhom impatti sostanzjali fuq l-ekosistemi, u affettwaw il-kapaċitajiet ta’ sekwestru u ħżin tal-karbonju tal-foresti u tal-art agrikola. It-tisħiħ tal-kapaċitajiet ta’ adattament u r-reżiljenza, b’kont meħud tal-Għanijiet ta’ Żvilupp Sostenibbli tan-Nazzjonijiet Uniti, jgħin biex jiġu minimizzati l-impatti tat-tibdil fil-klima, biex jiġu indirizzati l-impatti inevitabbli b’mod soċjalment ibbilanċjat u biex jittejbu l-kundizzjonijiet tal-għajxien f’żoni milquta. It-tħejjija bikrija għal tali impatti hija kosteffettiva u tista’ wkoll iġġib benefiċċji kollaterali konsiderevoli għall-ekosistemi, is-saħħa u l-ekonomija. B’mod partikolari, is-soluzzjonijiet ibbażati fuq in-natura jistgħu jkunu ta’ benefiċċju għall-mitigazzjoni tat-tibdil fil-klima, l-adattament u l-protezzjoni tal-bijodiversità.

(33)

Il-programmi rilevanti stabbiliti fl-ambitu tal-Qafas Finanzjarju Pluriennali jipprevedu l-iskrinjar ta’ proġetti biex jiġi żgurat li tali proġetti jkunu reżiljenti għall-impatti negattivi potenzjali tat-tibdil fil-klima permezz ta’ valutazzjoni tal-vulnerabbiltà u tar-riskji klimatiċi, inkluż permezz ta’ miżuri ta’ adattament rilevanti, u li huma jintegraw il-kostijiet tal-emissjonijiet ta’ gassijiet b’effett ta’ serra u l-effetti pożittivi tal-miżuri ta’ mitigazzjoni tat-tibdil fil-klima fl-analiżi kost-benefiċċji. Dan jikkontribwixxi għall-integrazzjoni tar-riskji relatati mat-tibdil fil-klima kif ukoll il-valutazzjonijiet tal-vulnerabbiltà u l-adattament għat-tibdil fil-klima fid-deċiżjonijiet dwar l-investiment u l-ippjanar fl-ambitu tal-baġit tal-Unjoni.

(34)

Huma u jieħdu l-miżuri rilevanti fil-livell tal-Unjoni u f’dak nazzjonali biex jiksbu l-objettiv tan-newtralità klimatika, jenħtieġ li l-Istati Membri u l-Parlament Ewropew, il-Kunsill u l-Kummissjoni jqisu, fost affarijiet oħra: il-kontribut tat-tranżizzjoni lejn in-newtralità klimatika għas-saħħa pubblika, il-kwalità tal-ambjent, il-benesseri taċ-ċittadini, il-prosperità tas-soċjetà, l-impjiegi u l-kompetittività tal-ekonomija; it-tranżizzjoni enerġetika, it-tisħiħ tas-sigurtà tal-enerġija u l-indirizzar tal-faqar enerġetiku; is-sigurtà u l-affordabbiltà tal-ikel; l-iżvilupp ta’ sistemi ta’ mobbiltà u trasport sostenibbli u intelliġenti; l-ekwità u s-solidarjetà fost l-Istati Membri u fi ħdanhom, fid-dawl tal-kapaċità ekonomika tagħhom, iċ-ċirkustanzi nazzjonali tagħhom, bħal pereżempju l-ispeċifiċitajiet tal-gżejjer, u l-ħtieġa li jkun hemm il-konverġenza maż-żmien; il-ħtieġa li t-tranżizzjoni tkun waħda xierqa u soċjalment ekwa permezz ta’ programmi edukattivi u ta’ taħriġ xierqa; l-aqwa evidenza xjentifika disponibbli u l-aktar reċenti, b’mod partikolari s-sejbiet tal-IPCC; il-ħtieġa li r-riskji marbutin mat-tibdil fil-klima jiġu integrati fid-deċiżjonijiet dwar l-investiment u dwar l-ippjanar; il-kosteffettività u n-newtralità teknoloġika fil-kisba tat-tnaqqis tal-emissjoni tal-gassijiet b’effett ta’ serra u tal-assorbimenti tagħhom u fiż-żieda tar-reżiljenza; u l-progress li jkun qed isir maż-żmien b’rabta mal-integrità ambjentali u mal-livell ta’ ambizzjoni.

(35)

Kif indikat fil-Patt Ekoloġiku Ewropew, il-Kummissjoni adottat fid-9 ta’ Diċembru 2020 komunikazzjoni bl-isem “Strateġija għal Mobbiltà Sostenibbli u Intelliġenti – inqiegħdu t-trasport Ewropew fit-triq it-tajba għall-futur”. L-istrateġija tistabbilixxi pjan direzzjonali għal futur sostenibbli u intelliġenti għat-trasport Ewropew, bi pjan ta’ azzjoni lejn objettiv ta’ kisba ta’ tnaqqis ta’ 90 % fl-emissjonijiet mis-settur tat-trasport sal-2050.

(36)

Biex ikun żgurat li l-Unjoni u l-Istati Membri jibqgħu mexjin fit-triq it-tajba biex jiksbu l-objettiv tan-newtralità klimatika u biex jagħmlu progress fl-adattament, jenħtieġ li l-Kummissjoni tivvaluta b’mod regolari l-progress li jkun qed isir, filwaqt li tibbaża ruħha fuq l-informazzjoni kif stabbilit f’dan ir-Regolament, inkluża l-informazzjoni ppreżentata u rrappurtata skont ir-Regolament (UE) 2018/1999. Sabiex tkun tista’ ssir tħejjija fil-ħin għar-rendikont globali msemmi fl-Artikolu 14 tal-Ftehim ta’ Pariġi, il-konklużjonijiet ta’ din il-valutazzjoni jenħtieġ li jiġu ppubblikati sat-30 ta’ Settembru kull ħames snin, mill-2023 ’il quddiem. Dan jimplika li r-rapporti skont l-Artikoli 29(5) u l-Artikoli 35 ta’ dak ir-Regolament u, fis-snin applikabbli, ir-rapporti relatati skont l-Artikolu 29(1) u l-Artikolu 32 ta’ dak ir-Regolament jenħtieġ li jiġu ppreżentati lill-Parlament Ewropew u lill-Kunsill fl-istess ħin bħall-konklużjonijiet ta’ dik il-valutazzjoni. Fil-każ li l-progress kollettiv li l-Istati Membri jkunu għamlu biex jilħqu l-objettiv tan-newtralità klimatika jew b’rabta mal-adattament ma jkunx biżżejjed jew li l-miżuri tal-Unjoni ma jkunux konsistenti mal-objettiv tan-newtralità klimatika jew ma jkunux adegwati biex itejbu l-kapaċità ta’ adattament, biex isaħħu r-reżiljenza jew biex inaqqsu l-vulnerabbiltà, jenħtieġ li l-Kummissjoni tieħu l-miżuri meħtieġa skont it-Trattati. Jenħtieġ li l-Kummissjoni tivvaluta wkoll b’mod regolari l-miżuri nazzjonali rilevanti u tagħmel rakkomandazzjonijiet meta ssib li l-miżuri ta’ xi Stat Membru ma jkunux konsistenti mal-objettiv tan-newtralità klimatika jew ma jkunux adegwati biex itejbu l-kapaċità ta’ adattament, biex isaħħu r-reżiljenza u biex inaqqsu l-vulnerabbiltà għat-tibdil fil-klima.

(37)

Jenħtieġ li l-Kummissjoni tiżgura valutazzjoni oġġettiva soda li tkun ibbażata fuq l-iktar sejbiet xjentifiċi, tekniċi u soċjoekonomiċi aġġornati u li tkun tirrappreżenta firxa wiesgħa ta’ għarfien espert indipendenti, u li hija ssejjes il-valutazzjoni tagħha fuq informazzjoni rilevanti, fosthom l-informazzjoni li l-Istati Membri jibagħtu u jirrappurtaw dwarha, ir-rapporti tal-EEA, tal-Bord Konsultattiv u taċ-Ċentru Konġunt tar-Riċerka tal-Kummissjoni l-aqwa evidenza xjentifika disponibbli u l-aktar reċenti, fosthom ir-rapporti l-aktar aġġornati tal-IPCC, tal-IPBES u ta’ korpi internazzjonali oħra, kif ukoll id-data ta’ osservazzjoni tad-dinja pprovduta mill-Programm Ewropew ta’ Osservazzjoni tad-Dinja Copernicus. Jenħtieġ li l-Kummissjoni tkompli tibbaża l-valutazzjonijiet tagħha fuq trajettorja lineari indikattiva li torbot il-miri klimatiċi tal-Unjoni għall-2030 u l-2040, meta jiġu adottati, mal-objettiv tan-newtralità klimatika tal-Unjoni u sservi bħala għodda indikattiva biex jiġi stmat u evalwat il-progress kollettiv lejn il-kisba tal-objettiv tan-newtralità klimatika tal-Unjoni. It-trajettorja lineari indikattiva hija mingħajr preġudizzju għal kwalunkwe deċiżjoni biex tiġi ddeterminata mira klimatika tal-Unjoni għall-2040. Minħabba li l-Kummissjoni ntrabtet li tesplora kif is-settur pubbliku jista’ juża t-tassonomija tal-UE fil-kuntest tal-Patt Ekoloġiku Ewropew, jenħtieġ li din tkun tinkludi informazzjoni dwar investiment sostenibbli mil-lat tal-ambjent min-naħa tal-Unjoni jew min-naħa ta’ Stati Membri, b’mod konsistenti mar-Regolament (UE) 2020/852 tal-Parlament Ewropew u tal-Kunsill (14), meta t-tali informazzjoni ssir disponibbli. Jenħtieġ li l-Kummissjoni tuża l-istatistika u d-data Ewropej u globali meta dawn ikunu disponibbli, u li din titlob li jsir skrutinju min-naħa tal-esperti. Jenħtieġ li l-EEA tgħin lill-Kummissjoni kif xieraq, skont il-programm ta’ ħidma annwali tagħha.

(38)

Minħabba li ċ-ċittadini u l-komunitajiet għandhom rwol ewlieni x’jaqdu biex imexxu ’l quddiem it-trasformazzjoni lejn in-newtralità klimatika, jenħtieġ li tiġi kemm imħeġġa kif ukoll iffaċilitata parteċipazzjoni qawwija pubblika u soċjali b’rabta mal-azzjoni klimatika fil-livell kollha, inkluż fil-livell nazzjonali, reġjonali u lokali fil-qafas ta’ proċess inklużiv u aċċessibbli. Għalhekk jenħtieġ li l-Kummissjoni tikkollabora mal-partijiet kollha tas-soċjetà, inklużi partijiet ikkonċernati li jirrappreżentaw setturi differenti tal-ekonomija, biex tippermettilhom jieħdu azzjoni favur soċjetà newtrali għall-klima u reżiljenti għat-tibdil fil-klima u biex tagħtihom is-setgħa jagħmlu dan, inkluż permezz tal-Patt Klimatiku Ewropew.

(39)

Jenħtieġ li l-istrumenti tal-Unjoni marbutin mat-tnaqqis tal-emissjoni tal-gassijiet b’effett ta’ serra jkunu koerenti bejniethom biex il-Kummissjoni tkompli żżomm mal-prinċipji dwar it-Tfassil Aħjar tal-Liġijiet. Jenħtieġ li s-sistema użata biex jitkejjel il-progress li jkun qed isir biex jintlaħaq l-objettiv tan-newtralità klimatika, kif ukoll biex titkejjel il-konsistenza tal-miżuri li jkunu ttieħdu ma’ dak l-objettiv, tissejjes fuq il-qafas ta’ governanza stabbilit fir-Regolament (UE) 2018/1999 u tkun konsistenti miegħu, b’kont meħud tal-ħames dimensjonijiet kollha tal-Unjoni tal-Enerġija. B’mod partikulari, jenħtieġ li s-sistema ta’ rappurtar regolari u t-tqegħid tal-valutazzjoni u tal-azzjonijiet tal-Kummissjoni f’sekwenza abbażi tar-rappurtar ikunu allinjati mar-rekwiżiti stabbiliti fir-Regolament (UE) 2018/1999 biex l-Istati Membri jibagħtu l-informazzjoni u jipprovdu r-rapporti. Għalhekk jenħtieġ li r-Regolament (UE) 2018/1999 jiġi emendat biex l-objettiv tan-newtralità klimatika jiddaħħal fid-dispożizzjonijiet rilevanti.

(40)

Min-natura tagħha, l-isfida tat-tibdil fil-klima hija waħda transkonfinali u hemm bżonn ta’ azzjoni kkoordinata fil-livell tal-Unjoni biex jissaħħu u jiġu ssupplementati b’mod effettiv il-politiki nazzjonali. Minħabba li l-għan ta’ dan ir-Regolament, jiġifieri li tinkiseb in-newtralità klimatika fl-Unjoni sal-2050, ma jistax jinkiseb b’mod suffiċjenti mill-Istati Membri, iżda jista’ pjuttost, minħabba l-iskala u l-effetti, jinkiseb aħjar fil-livell tal-Unjoni, l-Unjoni tista’ tadotta miżuri, f’konformità mal-prinċipju ta’ sussidjarjetà kif stabbilit fl-Artikolu 5 tat-Trattat dwar l-Unjoni Ewropea. F’konformità mal-prinċipju ta’ proporzjonalità kif stabbilit f’dak l-Artikolu, dan ir-Regolament ma jmurx lil hinn minn dak li huwa meħtieġ sabiex jinkiseb dak l-għan,

(a)

l-aqwa evidenza xjentifika disponibbli u dik l-aktar reċenti, inklużi l-aħħar rapporti tal-IPCC u tal-Bord Konsultattiv;

(b)

l-iżviluppi u l-isforzi li jkunu saru fil-livell internazzjonali biex jintlaħqu l-objettivi fit-tul tal-Ftehim ta’ Pariġi.

(1)

jiddaħħal l-Artikolu li ġej:

(2)

fl-Artikolu 11, jiżdied il-paragrafu li ġej:

(1)

fl-Artikolu 1(1), il-punt (a) huwa sostitwit b’dan li ġej:

(*1)  Ir-Regolament (UE) 2021/1119 tal-Parlament Ewropew u tal-Kunsill tat-30 ta’ Ġunju 2021 li jistabbilixxi l-qafas biex tinkiseb in-newtralità klimatika u li jemenda r-Regolamenti (KE) Nru 401/2009 u (UE) 2018/1999 (‘il-Liġi Ewropea dwar il-Klima’) (ĠU L 243, 9.7.2021, p. 1).”;"

(2)

fl-Artikolu 2, il-punt (7), huwa sostitwit b’dan li ġej:

(3)

fl-Artikolu 3(2), il-punt (f) huwa sostitwit b’dan li ġej:

(4)

fl-Artikolu 8(2), jiżdied il-punt li ġej:

(5)

l-Artikolu 11 huwa sostitwit b’dan li ġej:

(6)

l-Artikolu 15 huwa emendat kif ġej:

(7)

l-Artikolu 17 huwa emendat kif ġej:

(8)

fl-Artikolu 29(1), il-punt (b) huwa sostitwit b’dan li ġej:

(9)

l-Artikolu 45 huwa sostitwit b’dan li ġej:

(10)

Il-Parti 1 tal-Anness I hija emendata kif ġej:

(11)

fil-punt (c) tal-Anness VI, il-punt (viii) huwa sostitwit b’dan li ġej: