This document is an excerpt from the EUR-Lex website
Document 32011D0363
2011/363/EU: Council Implementing Decision of 20 June 2011 authorising Romania to introduce a special measure derogating from Article 193 of Directive 2006/112/EC on the common system of value added tax
2011/363/UE: Deċiżjoni ta’ Implimentazzjoni tal-Kunsill tal- 20 ta’ Ġunju 2011 li tawtorizza lir-Rumanija tintroduċi miżura speċjali li tidderoga mill-Artikolu 193 tad-Direttiva 2006/112/KE dwar is-sistema komuni ta’ taxxa fuq il-valur miżjud
2011/363/UE: Deċiżjoni ta’ Implimentazzjoni tal-Kunsill tal- 20 ta’ Ġunju 2011 li tawtorizza lir-Rumanija tintroduċi miżura speċjali li tidderoga mill-Artikolu 193 tad-Direttiva 2006/112/KE dwar is-sistema komuni ta’ taxxa fuq il-valur miżjud
ĠU L 163, 23.6.2011, p. 26–27
(BG, ES, CS, DA, DE, ET, EL, EN, FR, IT, LV, LT, HU, MT, NL, PL, PT, RO, SK, SL, FI, SV)
No longer in force, Date of end of validity: 31/05/2013
23.6.2011 |
MT |
Il-Ġurnal Uffiċjali tal-Unjoni Ewropea |
L 163/26 |
DEĊIŻJONI TA’ IMPLIMENTAZZJONI TAL-KUNSILL
tal-20 ta’ Ġunju 2011
li tawtorizza lir-Rumanija tintroduċi miżura speċjali li tidderoga mill-Artikolu 193 tad-Direttiva 2006/112/KE dwar is-sistema komuni ta’ taxxa fuq il-valur miżjud
(2011/363/UE)
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea,
Wara li kkunsidra d-Direttiva tal-Kunsill 2006/112/KE tat-28 ta’ Novembru 2006 dwar is-sistema komuni ta’ taxxa fuq il-valur miżjud (1), u b’mod partikolari l-Artikolu 395(1) tagħha,
Wara li kkunsidra l-proposta mill-Kummissjoni Ewropea,
Billi:
(1) |
Permezz ta’ ittri li ġew irreġistrati għand il-Kummissjoni fl-4 ta’ Novembru 2009, fit-2 ta’ Lulju 2010, fis-26 ta’ Lulju 2010 u fl-20 ta’ Diċembru 2010, ir-Rumanija talbet l-awtorizzazzjoni, għal periodu ta’ sentejn, biex tkun tista’ tiddikjara bħala soġġetti għat-taxxa fuq il-valur miżjud (VAT) lill-persuni taxxabbli li lilhom isiru fornimenti ta’ ċerti ċereali u ta’ żerriegħa taż-żejt, b’deroga mill-Artikollu 193 tad-Direttiva 2006/112/KE. Hija stqarret li mhux ser titlob tiġdid ta’ din l-awtorizzazzjoni. |
(2) |
Il-Kummissjoni ttrażmettiet it-talba li ġiet ippreżentata mir-Rumanija lill-Istati Membri l-oħra permezz ta’ ittra tal-15 ta’ Marzu 2011. Permezz ta’ ittra tat-22 ta’ Marzu 2011, il-Kummissjoni infurmat lir-Rumanija li għandha għad-dispożizzjoni tagħha l-informazzjoni kollha li tqis utli biex tkun tista’ tevalwa t-talbiet. |
(3) |
Ir-Rumanija skopriet każijiet ta’ frodi fiskali fil-kummerċ ta’ ċerti prodotti agrikoli mhux ipproċessati, ċereali u żerriegħa taż-żejt. Xi operaturi ma jħallsux il-VAT lit-Teżor wara li jkunu wasslu l-prodotti tagħhom, speċjalment jekk ikunu akkwistawhom mingħajr il-ħlas ta’ taxxa fuq ix-xiri. Il-klijenti tagħhom, sakemm ikollhom f’idejhom riċevuta valida, jibqagħlhom id-dritt madanakollu li titnaqqsilhom il-VAT. |
(4) |
Li jiġi ddikjarat li l-persuna taxxabbli li lilha jsir il-forniment tal-oġġetti hija dik responsabbli għall-VAT minflok il-fornitur tkun miżura temporanja ta’ emerġenza li twassal għat-tmien ta’ din il-forma ta’ evażjoni. L-applikazzjoni ta’ dik il-miżura speċjali għal sentejn għandha tagħti żmien biżżejjed lir-Rumanija biex tintroduċi fis-settur agrikolu miżuri definittivi li jkunu kompatibbli mad-Direttiva 2006/112/KE li jipprevenu u jiġġieldu din il-forma ta’ evażjoni. |
(5) |
Sabiex l-attività frawdulenti ma tiġix trasferita għall-istadju ta’ pproċessar ta’ oġġetti tal-ikel jew dawk industrijali, jew għal prodotti oħra, ir-Rumanija għandha tintroduċi fl-istess ħin miżuri xierqa ta’ dikjarazzjoni u ta’ kontroll u tinnotifika lill-Kummissjoni bihom. |
(6) |
Sabiex tiżgura li l-miżura speċjali tapplika biss għal prodotti agrikoli mhux ipproċessati u li l-persuni taxxabbli kkonċernati ma jeħlux spejjez amministrattivi sproporzjonati jew li ma jħabbtux wiċċhom ma’ xi riskju fejn tidħol iċ-ċertezza legali, l-oġġetti koperti mill-miżura speċjali għandhom jiġu ddeterminati billi tintuża n-nomenklatura magħquda stabbilita fir-Regolament tal-Kunsill (KEE) Nru 2658/87 tat-23 ta’ Lulju 1987 dwar in-nomenklatura tat-tariffa u l-istatistika u dwar it-Tariffa Doganali Komuni ta’ Dwana (2). |
(7) |
Il-miżura speċjali hija ġustifikata u proporzjonali għall-għanijiet mixtieqa. Hija stabbilita għal perijodu partikolari u tikkonċerna biss ċerti prodotti identifikati b’mod preċiż li normalment ma jaslux għand il-konsumaturi finali fl-istat mhux maħdum tagħhom u li kienu s-suġġett ta’ attivitajiet ta’ evażjoni fiskali li kkawżaw telf sostanzjali ta’ introjtu mill-VAT. Fid-dawl tal-portata ta’ dan l-introjtu fiskali mitluf, il-miżura għandha tiġi adottata kemm jista’ jkun malajr. |
(8) |
Il-miżura speċjali ma taffettwax l-ammont globali ta’ introjtu mill-VAT tar-Rumanija miġbur fl-istadju tal-konsum finali u ma jkollha l-ebda effett negattiv fuq ir-riżorsi proprji tal-Unjoni li jkunu ġejjin mill-VAT, |
ADOTTA DIN ID-DEĊIŻJONI:
Artikolu 1
B’deroga mill-Artikolu 193 tad-Direttiva 2006/112/KE, ir-Rumanija hija b’dan awtorizzata li tiddikjara bħala l-persuna responsabbli biex tħallas il-VAT il-peruna taxxabbli li lilha jsiru fornimenti tal-oġġetti li ġejjin, kif elenkati fin-nomenklatura magħquda stabbilita bir-Regolament (KEE) Nru 2658/87:
Kodiċi NM |
Prodott |
1001 10 00 |
Qamħ durum |
1001 90 10 |
Spelt għaż-żrigħ |
ex 1001 90 91 |
Qamħ għaż-żrigħ |
ex 1001 90 99 |
Spelt u qamħ ieħor, mhux għaż-żrigħ |
1002 00 00 |
Segala |
1003 00 |
Xgħir |
1005 |
Qamħirrun |
1201 00 |
Sojja, imkissra jew le |
1205 |
Lift jew żerriegħa tal-kolza, imkissra jew le |
1206 00 |
Żerriegħa tal-ġirasol, imkissra jew le |
1212 91 |
Pitravi |
Artikolu 2
L-awtorizzazzjoni prevista fl-Artikolu 1 hija soġġetta għall-kondizzjoni li r-Rumanija ddaħħal obbligi ta’ dikjarazzjoni u miżuri ta’ kontroll xierqa u effettivi fir-rigward tal-persuni taxxabbli li jfornu l-prodotti li għalihom tapplika dik l-awtorizzazzjoni.
Ir-Rumanija għandha tgħarraf lill-Kummissjoni bl-introduzzjoni tal-obbligi u l-miżuri msemmija fl-ewwel paragrafu.
Artikolu 3
Din id-Deċiżjoni għandha tieħu effett fid-data tan-notifika tagħha.
Għandha tapplika mill-1 ta’ Ġunju 2011 sal-31 ta’ Mejju 2013.
Artikolu 4
Din id-Deċiżjoni hija indirizzata lir-Rumanija.
Magħmul fil-Lussemburgu, l-20 ta’ Ġunju 2011.
Għall-Kunsill
Il-President
MATOLCSY Gy.
(1) ĠU L 347, 11.12.2006, p. 1.