EUR-Lex Access to European Union law
This document is an excerpt from the EUR-Lex website
Document 52014AE7442
Opinion of the European Economic and Social Committee on the ‘Communication from the Commission to the European Parliament, the Council, the European Economic and Social Committee and the Committee of the Regions on a new EU forest strategy: for forests and the forest-based sector’ — (COM(2013) 659 final)
Opinjoni tal-Kumitat Ekonomiku u Soċjali Ewropew dwar “Il-Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni – Strateġija ġdida tal-UE għall-Foresti: għall-foresti u s-settur ibbażat fuq il-foresti” — COM(2013) 659 final
Opinjoni tal-Kumitat Ekonomiku u Soċjali Ewropew dwar “Il-Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni – Strateġija ġdida tal-UE għall-Foresti: għall-foresti u s-settur ibbażat fuq il-foresti” — COM(2013) 659 final
ĠU C 451, 16.12.2014, p. 127–133
(BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)
16.12.2014 |
MT |
Il-Ġurnal Uffiċjali tal-Unjoni Ewropea |
C 451/127 |
Opinjoni tal-Kumitat Ekonomiku u Soċjali Ewropew dwar “Il-Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni – Strateġija ġdida tal-UE għall-Foresti: għall-foresti u s-settur ibbażat fuq il-foresti”
COM(2013) 659 final
(2014/C 451/21)
Relatur: |
is-sur KALLIO |
Korelatur: |
is-sur BURNS |
Nhar l-20 ta' Settembru 2013, il-Kummissjoni Ewropea ddeċidiet, b’konformità mal-Artikolu 304 tat-Trattat dwar il-Funzjonament tal-Unjoni Ewropea, li tikkonsulta lill-Kumitat Ekonomiku u Soċjali Ewropew dwar
il-Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni: Strateġija ġdida tal-UE għall-Foresti: għall-foresti u s-settur ibbażat fuq il-foresti
COM(2013) 659 final.
Is-Sezzjoni Speċjalizzata għall-Agrikoltura, l-Iżvilupp Rurali u l-Ambjent, inkarigata sabiex tipprepara l-ħidma tal-Kumitat dwar is-suġġett, adottat l-Opinjoni tagħha nhar id-19 ta' Ġunju 2014.
Matul il-500 sessjoni plenarja tiegħu tad-9 u l-10 ta' Lulju 2014 (seduta tal-10 ta' Lulju), il-Kumitat Ekonomiku u Soċjali Ewropew adotta din l-Opinjoni b'111-il vot favur u 5 stensjonijiet.
1. Konklużjonijiet u rakkomandazzjonijiet
1.1 |
Il-KESE jilqa' l-Istrateġija l-ġdida tal-UE għall-Foresti (UE SF) u ż-żewġ dokumenti ta' ħidma tal-persunal tal-Kummissjoni li jakkumpanjawha. Fil-kuntest ta' esiġenzi dejjem ikbar fuq il-foresti u t-theddid kontrihom, kif ukoll ħafna politiki settorjali tal-UE u regoli assoċjati li jaffettwaw lill-forestrija u l-foresti, l-istrateġija l-ġdida hija ferm bżonjuża. Għalhekk, il-KESE jħeġġeġ kemm lill-Kummissjoni kif ukoll l-Istati Membri biex jiżguraw li l-Istrateġija tiġi implimentata b'mod effettiv u effiċjenti. |
1.2 |
F'dan il-kuntest, il-Kumitat ifakkar lill-Kummissjoni li t-Trattat dwar il-Funzjonament tal-UE ma jagħmel l-ebda referenza għal politika komuni tal-UE dwar il-foresti u li l-kontroll tal-politika dwar il-foresti għandu jibqa' f'idejn l-Istati Membri. |
1.3 |
Il-Kumitat jappoġġja l-approċċ olistiku u bbilanċjat bejn it-tliet pilastri tas-sostenibbiltà (il-pilastru ekonomiku, dak ambjentali u dak soċjali), enfasizzati fl-intestaturi ġenerali tal-Istrateġija tal-UE għall-Foresti, maqsuma fi tmien prijoritajiet. Il-KESE jemmen li l-linji gwida strateġiċi għal kull waħda mit-tmien prijoritajiet għandhom jintużaw biex jiżguraw li l-Istrateġija qed tiġi implimentata malajr. |
1.4 |
Meta jitqies kemm il-foresti huma importanti għall-iżvilupp taż-żoni rurali u sabiex jinkisbu l-għanijiet stabbiliti fl-istrateġija, il-KESE jappella biex il-programmi għall-iżvilupp rurali jinkludu miżuri relatati mal-forestrija, u biex dawn il-miżuri jiġu promossi, sabiex jiġu assorbiti iktar fondi disponibbli. |
1.5 |
Biex jiġu indirizzati l-bżonnijiet dejjem ikbar tal-forza tax-xogħol minħabba livelli ta' mekkanizzazzjoni dejjem ogħla fil-katina ta' valur tal-forestrija u bħala tweġiba għall-isfidi tat-tibdil fil-klima u l-ambjent, il-KESE jenfasizza l-bżonn li l-edukazzjoni, it-taħriġ u t-trasferiment tal-għarfien jiġu promossi fil-livelli kollha tas-settur tal-foresti. F'dan il-kuntest, il-Kumitat jappella wkoll lill-Kummissjoni u lill-Istati Membri biex jixprunaw ir-riċerka dwar kif jistgħu jittejbu l-potenzjal tal-impjieg u l-kundizzjonijiet tax-xogħol tas-settur tal-forestrija. |
1.6 |
Il-KESE jemmen li d-diskussjoni dwar il-Kriterji ta' Ġestjoni Sostenibbli tal-Foresti, irrispettivament mill-użu aħħari tal-injam, għandhom ikunu bbażati fuq il-kriterji u l-indikaturi rikonoxxuti u aċċettati b'mod mifrux, imfassla matul il-proċess tal-FOREST EUROPE (1) u għandhom iqisu wkoll il-karatteristiċi partikolari tal-Istati Membri u s-sistemi u l-leġislazzjoni eżistenti għall-foresti. |
1.7 |
Fir-rigward tal-prinċipji li bihom jiġu prijoritizzati l-użi tal-injam, il-Kumitat ma jaċċetta l-ebda regola legalment vinkolanti u jappoġġja approċċ ibbażat fuq is-suq miftuħ u l-libertà tal-parteċipanti tas-suq. |
1.8 |
Sabiex jiġu indirizzati l-isfidi li jinbtu mit-tibdil fil-klima, il-KESE jħeġġeġ lill-Istati Membri biex jikkooperaw b'mod transkonfinali u jappoġġja t-talbiet biex il-foresti Ewropej isiru iktar adattabbli u reżiljenti, inklużi l-prevenzjoni tan-nar u soluzzjonijiet oħra adattivi bħala protezzjoni kontra l-perikli naturali. Sforzi adatti għandhom jiffokaw fuq ir-reżiljenza u l-multifunzjonalità tal-foresti. |
1.9 |
Il-KESE jappoġġja l-użu ta' pjani ta' ġestjoni tal-foresti imma jenfasizza li għandhom ikomplu jintużaw fuq bażi volontarja u jinżammu separati b'mod ċar mill-pjani ta' ġestjoni tan-Natura 2000 sabiex jiġu evitati l-ispejjeż mhux neċessarji u l-burokrazija. |
1.10 |
Bażi tal-għarfien imtejba hija s-soluzzjoni biex nifhmu l-ħafna sfidi li qed jiffaċċja s-settur tal-foresti. Il-KESE għalhekk iqis li jeħtieġ li naħdmu lejn l-armonizzazzjoni tad-data u skambju ta' informazzjoni u trasparenza iktar effettivi, filwaqt li fl-istess ħin jiġu rispettati d-drittijiet tal-proprjetà. |
1.11 |
Il-KESE jappoġġja l-promozzjoni tal-injam u materji oħra tal-foresti inkluż is-sufra bħala materja prima domestika, sostenibbli, rinnovabbli u favur il-klima u l-ambjent u jinsab konvint li s-settur tal-foresti jrid jaqdi rwol ewlieni fis-suċċess ta' bijoekonomija futura. |
1.12 |
Sabiex titrawwem il-kompetittività tas-settur tal-foresti, il-KESE jenfasizza l-importanza li jsir l-aħjar użu mill-opportunitajiet attwali u futuri għall-finanzjament biex jiġu appoġġjati r-riċerka u l-innovazzjoni, u jenfasizza r-rwol ta' inizjattivi bħas-Sħubija Ewropea għall-Innovazzjoni (EIP) (2) jew is-Sħubijiet Pubbliċi-Privati (PPP) għall-industriji bbażati fuq il-prodotti bijoloġiċi (3). |
1.13 |
Peress li l-użu tal-bijomassa tal-injam għandu potenzjal kbir u benefiċċji numerużi għall-ekonomija ekoloġika, il-KESE jħeġġeġ lill-Kummissjoni u lill-Istati Membri biex b'mod attiv ifittxu modi kif jippromovu l-ġestjoni attiva tal-foresti u jtejbu l-użu tal-injam b'segwitu tal-miri 2020 (4), filwaqt li jirrikonoxxu l-limiti tas-sostenibbiltà. |
1.14 |
Il-Kumitat jappella lill-Kummissjoni u lill-Istati Membri biex iżidu l-isforzi tagħhom biex jiġu valutati s-servizzi tal-ekosistema u jiġi żviluppat suq għalihom. L-Istati Membri għandhom jieħdu azzjoni kkoordinata u jistabbilixxu mekkaniżmu ta' kumpens biex jiġu kkumpensati l-fallimenti tas-suq li jeżistu attwalment. |
1.15 |
Ser ikun hemm bżonn koordinazzjoni u komunikazzjoni qawwija mal-gruppi kollha ta' interess rilevanti sabiex l-Istrateġija tal-UE għall-Foresti tiġi żviluppata u segwita. Għalhekk, il-KESE jenfasizza kemm hu importanti li l-parteċipazzjoni tal-partijiet interessati tissaħħaħ u tiġi żgurata, ħaġa li ser teħtieġ li jissaħħu l-gruppi rilevanti tad-djalogu ċivili, bħall-Kumitat Konsultattiv dwar il-Forestrija. Għandu jiġi kkunsidrat ukoll li jinħolqu gruppi ad hoc li jinkludu r-rappreżentanti tal-KESE u l-KtR. |
1.16 |
Il-KESE jħeġġeġ lill-Kummissjoni, lill-Istati Membri tal-UE u kull attur ieħor rilevanti biex jissoktaw bin-negozjati u fl-aħħar mill-aħħar jilħqu kunsens dwar ftehim legalment vinkolanti dwar il-foresti fl-Ewropa. Flimkien mal-Istrateġija tal-UE dwar il-Foresti, il-Ftehim Legalment Vinkolanti jkun jirrappreżenta strument ewlieni għat-tisħiħ tas-settur tal-foresti kollu kemm hu. Definizzjonijiet u miri ċari għall-ġestjoni sostenibbli tal-foresti f'livell pan-Ewropew ikollhom ukoll impatt madwar id-dinja. |
1.17 |
Fl-aħħar nett, il-KESE ser isegwi ujinvolvi ruħu f'kull inizjattiva attwali u futura bbażata fuq l-Istrateġija tal-UE għall-Foresti jew fuq dokumenti oħra relatati, inklużi d-dokumenti ta' ħidma tal-persunal tal-Kummissjoni. |
2. Daħla
2.1 |
Il-foresti u żoni ta' boskijiet oħra jirrappreżentaw iktar minn 40 % tal-massa tal-art tal-Ewropa u m'hemm l-ebda dubju dwar l-importanza straordinarja tagħhom. Hemm differenzi maġġuri bejn ir-reġjuni fir-riżorsi, l-istruttura, il-ġestjoni u l-użu tal-foresti. B'mod ġenerali, l-erja tal-foresti Ewropej qed tiżdied b'madwar 0,4 % fis-sena tul l-aħħar deċennji, u s-sitwazzjoni dwar l-istokk li qed jikber hija pożittiva wkoll, b'60-70 % biss taż-żieda annwali li qed tinqata'. Madwar 60 % tal-boskijiet għandhom sjieda privata, filwaqt li l-bqija huma pubbliċi. |
2.2 |
Madwar l-UE u b'mod partikolari f'reġjuni b'ħafna foresti, hemm enfasi konsiderevoli fuq il-multifunzjonalità, peress li l-foresti jaqdu finijiet kemm soċjali u ambjentali kif ukoll ekonomiċi. Huma jipprovdu ħabitat għall-annimali u l-pjanti u għandhom rwol importanti fil-mitigazzjoni tat-tibdil fil-klima u f'li jipprovdu servizzi oħra tal-ekosistema, inkluż il-kaċċa, il-frott tal-foresta jew is-saħħa tal-bniedem ir-rikreazzjoni jew it-turiżmu. Il-foresti huma importanti anke mil-lat soċjoekonomiku, imma ħafna drabi din l-importanza ma tiġix stmata biżżejjed. Il-forestrjia u industriji relatati jipprovdu impjiegi għal iktar minn tliet miljun persuna u huma kruċjali għall-benesseri u l-impjieg fiż-żoni rurali. |
2.3 |
Il-forestrija sostenibbli mhijiex idea ġdida. Il-kunċett tal-ġestjoni sostenibbli ġie stabbilit fis-settur tal-forestrija 300 sena ilu; minn dak iż-żmien 'il hawn dan l-approċċ ta' ġestjoni responsabbli ġie żviluppat b'mod kontinwu, u gradwalment infirex fis-setturi kollha tal-ekonomija. Id-definizzjoni bażika tal-ġestjoni tal-foresti sostenibbli stabbilita fir-Riżoluzzjoni ta' Ħelsinki tal-1993 tal-Konferenza Ministerjali dwar il-Protezzjoni tal-Foresti fl-Ewropa kienet stadju importanti f'dan il-proċess, u tqiegħed il-prinċipju tas-sostenibbiltà f'kuntest globali. |
2.4 |
L-Unjoni Ewropea ilha 15-il sena li għandha strateġija għas-settur tal-forestrija. Abbażi ta' riżoluzzjoni (5) tal-Parlament Ewropew, fl-1998 il-Kummissjoni ppubblikat komunikazzjoni (6) li timplimenta din il-gwida ta' politika. |
2.5 |
Fuq talba tal-Kunsill (7), fir-rebbiegħa tal-2005, il-Kummissjoni ppubblikat rapport dwar l-implimentazzjoni tal-istrateġija dwar il-forestrija (8) li mbagħad ġie kkomplementat bl-iżvilupp ta' pjan ta' azzjoni tal-UE għall-foresti li jkopri perjodu ta' ħames snin mill-2007 sal-2011 (9). |
2.6 |
Il-valutazzjoni ex-post tal-pjan ta' azzjoni (li serviet bħala mezz ta' implimentazzjoni tal-istrateġija għall-forestrija tal-1998) saret b'mod parallel mas-Sena Internazzjonali tal-Foresti 2011. |
2.7 |
Għad li t-Trattat dwar il-Funzjonament tal-UE ma jagħmel l-ebda referenza għal politika komuni tal-UE dwar il-foresti, ħafna politiki settorjali u regoli assoċjati dwar, pereżempju, il-provvista tal-enerġija jew kwistjonijiet ambjentali u tal-klima, qed iwasslu għall-iżvilupp de facto ta' politika komuni tal-UE dwar il-forestrija. Fl-20 ta' Settembru 2013, il-Kummissjoni Ewropea ppubblikat il-komunikazzjoni tagħha dwar strateġija ġdida tal-UE għall-foresti, bi tweġiba għall-isfidi li dejjem qed jiżdiedu u li kultant ikunu f'kunflitt li qed jiffaċċjaw il-foresti u s-settur ibbażat fuq il-foresti u għall-bżonn ta' politika iktar koerenti u konsistenti. |
3. Qafas tal-istrateġija l-ġdida dwar il-foresti
3.1 |
Id-dokument bażiku tal-Kummissjoni huwa akkumpanjat minn żewġ dokumenti oħra ta' ħidma tal-persunal tal-Kummissjoni. L-ewwel wieħed jiffoka fuq il-proċess, l-analiżi u t-triq 'il quddiem proposta mill-istrateġija, u t-tieni wieħed jipprovdi għarfien dettaljat dwar l-industrji tal-UE bbażati fuq il-foresti, jiġifieri x-xogħol tal-injam, l-għamara, il-manifattura u l-konverżjoni tal-polpa u l-karta, u tal-istampar (10). Fid-dawl tal-karattru komplementari u l-importanza tagħhom, id-dokumenti ta' akkumpanjament għandhom jiġu kkunsidrati bir-reqqa. Il-KESE għandu jsegwi u jkun involut f'kull inizjattiva attwali u futura bbażata fuq l-Istrateġija tal-UE għall-Foresti jew dokumenti oħra relatati. |
3.2 |
Il-Kummissjoni għażlet li tippreżenta l-oqsma futuri għall-azzjoni tal-istrateġija taħt tliet intestaturi ġenerali, maqsuma fi tmien prijoritajiet. |
3.3 |
Il-linji gwida strateġiċi previsti għal kull waħda minn dawn it-tmien oqsma prijoritarji jiżguraw li l-Istrateġija tindirizza l-ħtieġa li jiġu proposti miżuri konkreti u mhux biss li jsiru stqarrijiet ġenerali ta' intenzjoni. |
3.4 |
Sabiex tkun tista' ssir implimentazzjoni rapida tal-istrateġija l-ġdida għall-foresti, il-Kummissjoni ma pproponietx li jitfassal pjan ta' azzjoni ġdid separat. Minflok, l-Istrateġija tinkludi lista ta' miżuri speċifiċi intiżi biex jilħqu l-għanijiet tagħha. |
3.5 |
L-Istrateġija l-ġdida għall-foresti ġiet ippubblikata wara l-valutazzjoni finali tal-istrateġija preċedenti, u ftit żmien wara l-bidu tal-perjodu ta' programmazzjoni tal-UE li jmiss u l-qafas finanzjarju pluriennali għall-2014-2020. |
3.6 |
L-ambjent ekonomiku u politiku fl-UE nbidel drastikament minn meta ġiet ippubblikata l-istrateġija preċedenti fl-1998. B'mod partikolari f'termini ta' impenji internazzjonali, l-istrateġija l-ġdida hija mnaqqxa f'qafas regolatorju kompletament ġdid. |
3.7 |
Il-Kummissjoni ppubblikat l-istrateġija l-ġdida għall-foresti biex tikkoinċidi man-negozjati mill-Kumitat ta' Negozjar Intergovernattiv tal-FOREST EUROPE biex jiġi adottat ftehim legalment vinkolanti dwar il-foresti fl-Ewropa (11). Jekk jiġi implimentat, dan il-ftehim jissostitwixxi r-rakkomandazzjonijiet attwali, u jkun jinkludi definizzjonijiet u miri ċari għall-ġestjoni sostenibbli tal-foresti biex jiġu adottati mill-Istati firmatarji. |
3.8 |
Il-KESE, bis-saħħa tar-rakkomandazzjonijiet li għamel (ara l-Appendiċi 1), appoġġja bosta proċessi rilevanti għall-forestrija, inkluża l-istrateġija l-ġdida għall-foresti minn meta tfasslet (12). Meta ġie ppubblikat ir-rapport ta' implimentazzjoni tal-Kummissjoni fl-2005, il-Kumitat ħa l-opportunità biex ifassal Opinjoni komprensiva dwar ir-rwol tal-foresti u l-forestrija f'ambjent li nbidel. Din l-Opinjoni sservi parzjalment biex taġġorna l-Opinjoni preċedenti tal-Kumitat fid-dawl tal-isfidi futuri. |
4. Kummenti ġenerali dwar l-istrateġija l-ġdida għall-foresti
4.1 |
L-Istrateġija hija bbażata fuq il-fatt li t-Trattat dwar il-Funzjonament tal-UE ma jagħmel l-ebda referenza għal politika komuni tal-UE dwar il-foresti u b'hekk, il-kontroll fuq il-politiki dwar il-forestrija għadu f'idejn l-Istati Membri. L-Istrateġija hija wkoll waħda komprensiva li tibbilanċja l-aspett ekonomiku, soċjali u ambjentali tal-forestrija sostenibbli, inkluż l-industrija tal-ipproċessar biswit il-foresti u l-forestrija. |
4.2 |
Hija tenfasizza l-ġestjoni sostenibbli tal-foresti u l-multifunzjonalità, li tipproduċi firxa ta' prodotti u servizzi b'mod ibbilanċjat u tiżgura li l-foresti jitħarsu. Bħalissa fl-UE hemm biss ħarira iktar minn 60 % tat-tkabbir annwali tal-foresti li jinqata'; l-għan tal-Istrateġija għalhekk hu li tippromovi l-impjieg u l-prosperità bbażati fuq il-foresti fl-Ewropa billi s-settur tal-foresti jsir iktar kompetittiv u billi l-użu tal-injam isir iktar versatili bħala parti mill-isforzi biex tinbena bijoekonomija bbażata fuq materja prima rinnovabbli. |
4.3 |
Din l-Istrateġija l-ġdida tirrappreżenta approċċ olistiku u tentattiv biex tittejjeb il-koordinazzjoni tal-forestrija fl-UE, tiġi promossa implimentazzjoni effiċjenti u effettiva u jsir tentattiv biex tiġi evitata l-burokrazija mingħajr skop u biex tissaħħaħ il-prestazzjoni tal-foresti u l-forestrija fl-UE. |
4.4 |
L-industrija tal-ipproċessar tal-forestrija u dik ibbażata fuq il-foresti tista' tagħmel kontribut ġenwin għas-suċċess tal-Istrateġija Ewropa 2020. Madankollu, sabiex dan jinkiseb jeħtieġ li jkun hemm rabta mill-qrib bejn l-Istrateġija tal-foresti u s-segwitu tal-għanijiet tal-Ewropa 2020 billi tiġi promossa l-implimentazzjoni effiċjenti u effettiva tal-ewwel strateġija f'kull qasam ta' politika rilevanti. |
4.5 |
Il-valutazzjoni tal-aħħar data dwar l-implimentazzjoni tal-miżuri tal-forestrija mill-Istati Membri taħt l-iżvilupp rurali wriet li l-istrumenti tal-politika rurali ma ġewx sfruttati kompletament. Sabiex jinkisbu aħjar l-għanijiet stabbiliti fl-istrateġija għall-foresti, l-Istrateġija tħeġġeġ lill-Istati Membri jagħtu importanza adatta lill-miżuri relatati mal-foresti fil-programmazzjoni u l-implimentazzjoni. Dan huwa neċessarju b'mod partikolari biex jiżdiedu l-involviment u l-mobilizzazzjoni tal-ħafna rziezet żgħar u foresti b'sidien privati. Dan jista' jiġi appoġġjat billi jiġu semplifikati l-proċeduri u titnaqqas il-burokrazija. |
4.6 |
Fil-ġejjieni, l-intenzjoni hi li l-għanijiet tal-Istrateġija jiġu appoġġjati billi jintużaw il-miżuri u l-istrumenti fil-pakkett dwar il-forestrija fir-regolament dwar l-iżvilupp rurali (13). |
4.7 |
L-Istrateġija tħeġġeġ lill-Istati Membri biex, f'kooperazzjoni mal-imsieħba soċjali, jiżviluppaw miżuri biex isir użu aħjar tal-potenzjal għall-impjieg fis-settur, biex jittejbu l-ħiliet tal-persuni li jaħdmu fih, u biex ikomplu jittejbu l-kundizzjonijiet tax-xogħol. Għandha tinbeda riċerka ġdida u mmirata fil-forza tax-xogħol impjegata fil-foresti Ewropej, pereżempju fil-bini tat-toroq, it-tħawwil, il-manutenzjoni tal-foresti, il-ħsad, l-estrazzjoni, it-trasport, is-servizzi tal-informazzjoni u s-servizzi ambjentali. B'mod ġenerali, il-politiki u l-programmi tal-Istati Membri għandhom jgħinu biex itejbu l-kompetittività tal-forestrija u s-settur sħiħ ibbażat fuq il-foresti, sabiex jiġu ġenerati t-tkabbir u l-impjiegi fit-tul. |
4.8 |
L-Istrateġija tenfasizza r-rwol versatili tal-foresti biex jgħinu jiksbu l-miri tal-klima u l-enerġija. Dawn il-miri jistgħu jinkisbu bl-appoġġ tal-ġestjoni u l-użu attiv tal-foresti, ħaġa li tirriżulta fi tkabbir tal-foresti aħjar u ħżin tal-karbonju aħjar u tagħmilha possibbli li s-sorsi ta' enerġija u materjali bbażati fuq il-fossili jiġu sostitwiti b'injam rinnovabbli. |
4.9 |
L-Istrateġija tirrikonoxxi li l-foresti u l-ekosistemi tagħhom jeħtieġu protezzjoni speċjali b'riżultat tat-tibdil fil-klima u theddid ieħor estern. |
4.10 |
L-Istrateġija tirrikonoxxi kemm huwa importanti li tittejjeb l-informazzjoni pubblika dwar il-foresti u l-forestrija u dwar l-injam bħala materja prima rinnovabbli. Dan għandu jiġi appoġġjat minn kampanji mmirati mill-Kummissjoni u l-Istati Membri bil-għan li l-pubbliku jiġi sensibilizzat dwar ir-rwol li l-foresti jaqdu għas-soċjetà tagħna u viċiversa. |
5. Kummenti speċifiċi
5.1 |
L-Istrateġija tenfasizza li l-injam huwa materja prima sostenibbli, rinnovabbli, favur il-klima u l-ambjent b'varjetà wiesgħa ta' użi potenzjali. Il-proċessi u l-prodotti li huma effiċjenti fl-użu tar-riżorsi u l-enerġija u ambjentalment responsabbli jikkontribwixxu għall-kompetittività tas-settur tal-foresti u, b'mod partikolari, ser jaqdu rwol ikbar fil-bijoekonomija tal-UE. Dan ser iżid id-domanda u b'hekk, il-bżonn li l-injam jiġi mobilizzat iktar. Huwa meqjus neċessarju li jiġu vvalutati mill-ġdid il-provvista potenzjali tal-injam, pereżempju permezz tal-immappjar tal-istrutturi tas-sjieda tal-foresti, u l-kwistjoni li l-mobilizzazzjoni miżjuda tal-injam sostenibbli tiġi faċilitata. Għandhom jiġu żviluppati soluzzjonijiet adatti biex tiżdied il-mobilizzazzjoni tal-injam, u dan f'konsultazzjoni mal-katina ta' valur sħiħa tal-forestrija. |
5.2 |
L-Istrateġija teħtieġ li l-Kummissjoni tifformula prinċipji biex jiġu prijoritizzati l-użi tal-injam f'kooperazzjoni mal-Istati Membri u l-partijiet interessati. Madankollu, regoli legalment vinkolanti dwar il-ġerarkija tal-użu tal-bijomassa tal-foresti, li jiddefinixxu liema użi tal-injam għandhom jingħataw prijorità, b'mod ċar imorru kontra l-ekonomija tas-suq miftuħ u l-libertà tal-parteċipanti tas-suq. |
5.3 |
Kif intqal fl-Istrateġija, fl-2014 il-Kummissjoni, flimkien mal-Istati Membri, ser tniedi analiżi tal-ispejjeż kumulattivi tal-leġislazzjoni tal-UE li tolqot il-ktajjen ta' valur fl-industrija bbażata fuq il-foresti. Peress li dan huwa ta' importanza kruċjali għas-settur sħiħ tal-foresti, kull parti interessata fil-katina ta' valur tal-foresti għandha tkun involuta fil-valutazzoni. B'hekk jiġu żgurati stampa komprensiva u sħiħa tas-settur u approċċ koerenti. |
5.4 |
Il-foresti għandhom ammont kbir ta' bijodiversità u, apparti mill-injam u diversi prodotti tal-foresti bħala materja prima (pereżempju s-sufra), huma jipprovdu varjetà ta' servizzi tal-ekosistema li minnhom jiddependu l-komunitajiet rurali u urbani. Il-bidliet fil-kundizzjonijiet minħabba, pereżempju, it-tibdil fil-klima, il-firxa ta' speċi aljeni invażivi, l-iskarsezza tal-ilma, in-nirien, il-maltempati u l-pesti jżidu l-pressjoni fuq il-foresti u r-riskju tal-perikli naturali. L-isforzi adatti għall-protezzjoni għandhom jiffokaw fuq ir-reżiljenza u l-multifunzjonalità tal-foresti. |
5.5 |
L-Istrateġija tistabbilixxi l-għan li jiġi żgurat u li jintlaħaq bilanċ bejn il-ġestjoni sostenibbli u d-diversi funzjonijiet tal-foresti sal-2020. F'dan il-kuntest, l-UE għandha tagħmel iktar biex tevalwa s-servizzi tal-ekosistema u toħolqilhom suq. Sabiex jiġi żgurat li suq bħal dan ikun jista' jiffunzjona b'mod iktar effettiv, jinħtieġu mekkaniżmi ta' kumpens ikkoordinati mill-Istati Membri biex jiġu kkumpensati l-fallimenti tas-suq li jeżistu bħalissa, pereżempju billi jiġi żgurat li s-sidien tal-art jiġu kkumpensati b'mod adatt għal-limitazzjonijiet meħtieġa għall-protezzjoni tas-servizzi tal-ekosistemi. |
5.6 |
Apparti l-injam għall-produzzjoni u l-enerġija, hemm diversi prodotti oħra li jipprovdu l-foresti, li jingħataw ftit attenzjoni fl-Istrateġija. Il-produzzjoni tas-sufra, pereżempju, hija importanti ħafna, b'mod partikolari fil-Mediterran, u għandha bosta vantaġġi: hija prodott naturali magħmul minn sorsi rinnovabbli, li ssegwi proċess li jirrispetta l-ambjent u li ma jeħtieġx il-ħsad sħiħ tas-siġar. L-industrija tas-sufra turi l-importanza tagħha billi tikkontribwixxi b'mod konsiderevoli għall-ħolqien ta' impjiegi filwaqt li żżomm l-istabbiltà ekoloġika tal-ekosistema Mediterranja li hija fraġli u mhedda. |
5.7 |
L-iżvilupp u l-implimentazzjoni tal-pjani ta' ġestjoni tal-foresti huma bbażati fuq il-prinċipju tas-sostenibbiltà u l-prattika tajba. L-Istrateġija tinkludi proposta biex jiddaħħlu kunsiderazzjonijiet relatati mal-bijodiversità, bħall-għanijiet ta' konservazzjoni tan-Natura 2000, fil-pjani ta' ġestjoni tal-foresti. Il-ħolqien ta' rabta bejn il-pjani għall-ġestjoni tal-foresti, li jservu bħala għodod ta' pjanar operattiv għas-sidien tal-foresti, u l-pjani ta' ġestjoni ta' Natura 2000, li jservu bħala għodod ta' ppjanar fil-livell tal-awtoritajiet lokali, iċajpar id-demarkazzjoni bejn diversi livelli u responsabbiltajiet ta' ppjanar. Barra minn hekk, dan iżid b'mod konsiderevoli l-burokrazija u l-ispejjeż assoċjati biex jiġi żviluppat pjan ta' ġestjoni tal-foresti. |
5.8 |
Il-frekwenza dejjem ikbar ta' avvenimenti ta' temp estrem, bħala sinjali ta' tibdil fil-klima, teħtieġ ukoll approċċ attiv lejn il-foresti tal-Ewropa. L-għan tal-Kummissjoni hu li żżomm u ttejjeb ir-reżiljenza u l-adattabbiltà tal-foresti tal-Ewropa. Il-materjal riproduttiv tal-foresti tal-ispeċi ta' siġar u l-ibridi artifiċjali li huma importanti għall-finijiet tal-forestrija għalhekk m'għandhomx biss ikunu adatti ġenetikament għall-kundizzjonijiet u ta' kwalità għolja iżda għandhom jagħmlu wkoll kontribut sostenibbli biex tiġi konservata l-bijodiversità. |
5.9 |
Fl-Istrateġija, il-Kummissjoni tappella biex jitfassal qafas għal azzjoni biex jiġu evitati, minimizzati u mitigati l-impatti negattivi ta' speċi aljeni invażivi fuq is-servizzi tal-bijodiversità u l-ekosistema. Tali azzjoni għandha tindirizza wkoll il-ħsara soċjali u ekonomika. Madankollu, anke fil-prijoritizzazzjoni tal-ispeċi aljeni invażivi għandu jittieħed approċċ komprensiv u bbażat fuq ix-xjenza, abbażi ta' kriterji stretti ta' elenkar. Materjal riproduttiv aljen tal-foresti li ma jinfirixx b'mod invażiv u m'għandu l-ebda impatt negattiv fuq il-post il-ġdid għalhekk m'għandux ikun inkluż peress li – b'mod partikolari fid-dawl tat-tibdil fil-klima – jista' jagħmel kontribut pożittiv lill-provvista attwali u futura tal-materja prima u servizzi oħra tal-ekosistema. |
5.10 |
Fl-Istrateġija li għad trid tfassal il-Kummissjoni, bl-għajnuna tal-Istati Membri u l-partijiet interessati, tista' tinħoloq lista ta' kriterji ta' ġestjoni sostenibbli tal-foresti li jistgħu jiġu applikati irrispettivament mill-użu aħħari tal-injam. Meta jkunu qed jitfasslu l-kriterji, il-ġestjoni sostenibbli tal-foresti għandha titqies b'mod komprensiv, irrispettivament mill-użu aħħari tal-injam. Il-kriterji għandhom ikunu bbażati fuq il-kriterji, l-indikaturi u l-prinċipji eżistenti għall-ġestjoni sostenibbli tal-foresti bħal dawk fil-qafas tal-FOREST EUROPE, fejn is-sostenibbiltà hija kkunsidrata mil-lat nazzjonali u dak reġjonali. Il-kriterji għandhom iqisu wkoll il-karatteristiċi partikolari tal-Istati Membri u l-leġislazzjoni nazzjonali eżistenti dwar il-foresti. |
5.11 |
L-Istrateġija tipproponi li l-gruppi ta' interessi rilevanti għandhom ikomplu jiġu involuti wkoll fl-iżvilupp u l-implimentazzjoni tal-istrateġija dwar il-foresti. Korpi provati bħall-Kumitat Konsultattiv dwar il-Forestrija u s-Sufra u l-Kumitat Konsultattiv dwar l-Industriji bbażati fuq il-foresti għandhom jiġu inklużi wkoll fil-pjattaforma għall-kooperazzjoni futura bejn il-partijiet interessati u l-Kummissjoni. Fir-rigward tal-implimentazzjoni, il-kwistjonijiet relatati mal-foresti u l-progress fl-implimentazzjoni tal-istrateġija tal-foresti għandhom jiġu indirizzati b'mod regolari minn dawn il-gruppi. Fejn hemm bżonn, jista' jiġi kkunsidrat ukoll il-ħolqien ta' gruppi ad hoc li jkunu jinkludu rappreżentanti mill-KESE u l-KtR. |
Brussell, 10 ta' Lulju 2014
Il-President tal-Kumitat Ekonomiku u Soċjali Ewropew
Henri MALOSSE
(1) Il-Kumitat Integovernattiv għan-Negozjar ta' Ftehim Legalment Vinkolanti dwar il-Foresti fl-Ewropa tal-FOREST EUROPE (FOREST EUROPE Intergovernmental Negotiating Committee for a Legally Binding Agreement on Forests in Europe); ara wkoll http://www.forestnegotiations.org/
(2) Fil-kuntest tal-forestrija u l-foresti s-Sħubijiet Ewropej għall-Innovazzjoni li ġejjin huma rilevanti:
Sħubija Ewropea għall-Innovazzjoni dwar il-Produttività u s-Sostenibbiltà Agrikoli: http://ec.europa.eu/agriculture/eip/index_en.htm
Sħubija Ewropea għall-Innovazzjoni dwar il-Materja Prima https://ec.europa.eu/eip/raw-materials/en
Sħubija Ewropea għall-Innovazzjoni dwar l-Ilma: http://ec.europa.eu/environment/water/innovationpartnership/
(3) Ara http://bridge2020.eu
(4) http://ec.europa.eu/europe2020/targets/eu-targets/
(5) ĠU C 55, 24.2.1997, p. 22.
(6) COM(1998) 649 final, 18.11.1998.
(7) Riżoluzzjoni tal-Kunsill, ĠU C 56, 26.2.1999, p. 1, u l-konklużjonijiet tal-Kunsill dwar Pjan ta' Azzjoni tal-UE għall-Foresti, l-2662 laqgħa tal-Kunsill Agrikoltura u Sajd, 30-31 ta' Mejju 2005.
(8) COM(2005) 84 final, 10.3.2005.
(9) COM(2006) 302 final, 15.6.2006.
(10) SWD(2013) 342 u 343 final, A blueprint for the EU forest-based industries, 20.9.2013.
(11) Għat-test attwali tan-negozjati, ara http://www.forestnegotiations.org/INC/ResINC4/documents
(12) Opinjoni dwar l-istrateġija dwar il-forestrija tal-1998, ĠU C 51, 23.2.2000, p. 97-104 (mhux disponibbli bil-Malti); Opinjoni dwar ir-rappurtar dwar l-implimentazzjoni tal-istrateġija tal-UE dwar il-forestrija, ĠU C 28, 3.2.2006, p. 57-65.
(13) Ara l-Premessa 25 tar-Regolament FAEŻR, R 1305/2013.