16.12.2014   

MT

Il-Ġurnal Uffiċjali tal-Unjoni Ewropea

C 451/81

Relatur:

is-Sur Simons

1.1

Il-Kumitat Ekonomiku u Soċjali Ewropew (KESE) jappoġġja d-deċiżjoni tal-introduzzjoni ta' regolament ibbażat fuq l-Artikolu 114 tat-TFUE billi jeżistu interpretazzjonijiet differenti ta' ċerti punti tad-Direttiva eżistenti.

1.2

Il-KESE jilqa' l-fatt li l-Proposta għal Regolament hija konformi mad-Direttiva 2000/9/KE, li għandha tiġi allinjata mal-Pakkett dwar il-Prodotti adottat fl-2008, u b'mod partikolari d-Deċiżjoni NLF (KE) Nru 768/2008 li dwarha l-Kumitat diġà ħareġ opinjoni favorevoli.

1.3

Il-KESE jħeġġeġ li jiġu eżaminati mill-qrib it-terminoloġija, b'mod partikolari tal-verżjoni Ġermaniża tat-test, kif ukoll id-definizzjonijiet u ż-żamma ta' partijiet validi tad-Direttiva eżistenti jew elementi li ġejjin minnha.

1.4

Il-KESE jinnota wisq dgħufijiet biex isemmihom kollha f'din is-sezzjoni tal-Konklużjonijiet; għalhekk jiġbed l-attenzjoni b'mod partikolari għal punt 4.2 u l-punti sussegwenti, kif ukoll għas-sezzjoni 5 li tipproponi s-soluzzjonijiet.

2.1

Fl-1994, il-KESE ħareġ Opinjoni (1) dwar Proposta tal-Kummissjoni Ewropea għal Direttiva dwar l-installazzjonijiet tal-funikular iddisinjati għat-trasport tal-persuni. Fiha huwa appoġġja lill-Kummissjoni b'mod partikolari fir-rigward "tal-għan tagħha li tiżgura li l-Istati Membri jaġixxu b'mod koordinat u li jiġi organizzat monitoraġġ bażiku fl-Unjoni Ewropea sabiex jinkiseb u jinżamm livell għoli ta' sigurtà u b'hekk jonqsu r-riskju ta' inċidenti futuri''.

2.2

Ir-riżultat kellu jkun "industrija iktar mifruxa u kompetittiva f'pożizzjoni aħjar li tikkompeti fis-swieq globali. Billi ħafna mill-manifatturi tas-swieq globali jinsabu fl-Ewropa, kwalunkwe azzjoni li tittieħed sabiex jiżdiedu l-prospetti tal-bejgħ għandha tkun raġonevoli u prattikabbli.''

2.3

L-installazzjonijiet tar-rotta b'kablaġġ huma prinċipalment imħaddma b'konnessjoni mat-turiżmu, partikolarment f'żoni tal-muntanji, fejn jaqdu sehem importanti fl-ekonomija tar-reġjuni konċernati u qed isiru fattur importanti dejjem akbar fil-bilanċi tal-kummerċ tal-Istati Membri (2).

2.4

L-Istati Membri huma responsabbli biex jiżguraw is-sigurtà tal-installazzjonijiet tar-rotta b'kablaġġ matul il-manifattura, it-tqegħid fis-servizz u t-tħaddim tagħhom. Barra minn hekk, huma responsabbli flimkien mal-awtoritajiet kompetenti għal dawk il-kwistjonijiet bħad-drittijiet tal-art, il-ġestjoni tat-territorju u l-ħarsien tal-ambjent. Ir-regolamenti nazzjonali jvarjaw ħafna b'riżultat tal-metodipartikolari tal-industrija nazzjonali kif ukoll l-użanzi u l-għarfien reġjonali. Huma jistipulaw daqsijiet u mekkaniżmi speċifiċi u karatteristiċi partikolari. Din is-sitwazzjoni qed tobbliga lill-manifatturi li ma' kull talba jiddefinixxu l-prodotti tagħhom mill-ġdid u tmur kontra s-soluzzjonijiet standard disponibbli.

2.5

Ir-rekwiżiti essenzjali għall-ħarsien tas-saħħa u s-sigurtà għandhom jitħarsu biex jiġi żgurat li l-installazzjonijiet tar-rotta b'kablaġġ ikunu siguri. Dawn ir-rekwiżiti għandhom ikunu applikati b'dixxerniment sabiex jiġu meqjusa l-aħħar avvanzi fit-teknoloġija fil-ħin tat-tqegħid fis-suq, it-tnedija u matul it-tħaddim tagħhom kif ukoll ir-rekwiżiti tekiniċi u ekonomiċi.

2.6

L-installazzjonijiet tar-rotta b'kablaġġ jistgħu jkunu transkonfinali u f'dawn il-każijiet, regoli nazzjonali kontradittorji jisgtħu jfixklu l-kostruzzjoni tagħhom.

2.7

Il-kompetenza tal-leġislazzjoni ilha fis-seħħ biss mill-2000. Id-Direttiva 2000/9/KE dwar l-installazzjonijiet tal-funikular iddisinjati għat-trasport ta’ persuni (3) ġiet adottata fl-20 ta’ Marzu 2000 u saret applikabbli fit-3 ta’ Mejju 2002. It-tipi ewlenin ta’ installazzjonijiet tar-rotta b’kablaġġ koperti mid-Direttiva 2000/9/KE huma l-funikulari, il-gondoli, iċ-chairlifts li jinqalgħu, iċ-chairlifts b’maqbad fiss, it-tramms tal-ajru, il-funitels, l-installazzjonijiet ikkombinati (magħmula minn diversi tipi ta’ rotta b’kablaġġ, bħal dawk ta’ gondoli u chairlifts) u drag lifts.

2.8

Illum il-ġurnata, għaxar snin wara u għal diversi raġunijiet, hemm bżonn ta' reviżjoni tal-leġislazzjoni dwar l-installazzjonijiet tar-rotta b'kablaġġ.

3.1

Permezz ta' din il-Proposta, id-Direttiva 2000/9/KE għandha tiġi sostitwita minn regolament u din id-Direttiva għandha tiġi allinjata mal-“pakkett dwar il-prodotti” adottat fl-2008 u b’mod partikolari mad-Deċiżjoni NLF (KE) Nru 768/2008.

3.1.1

Id-Deċiżjoni NLF tistabbilixxi qafas komuni għal-leġiżlazzjoni tal-UE dwar l-armonizzazzjoni tal-prodotti. Dan il-qafas jikkonsisti fid-dispożizzjonijiet li jintużaw spiss fil-leġiżlazzjoni tal-UE dwar il-prodotti (eż. id-definizzjonijiet, l-obbligi tal-operaturi ekonomiċi, il-korpi notifikati, il-mekkaniżmi ta’ salvagwardja, eċċ.). Dawn id-dispożizzjonijiet komuni ssaħħu biex jiġi żgurat li d-direttivi jistgħu jiġu applikati u infurzati fil-prattika, b’mod aktar effettiv. Ġew introdotti wkoll elementi ġodda, bħall-obbligi għall-importaturi, li huma kruċjali għat-titjib tas-sikurezza tal-prodotti fis-suq.

3.1.2

Il-Proposta għandha wkoll l-intenzjoni li tindirizza xi diffikultajiet li nqalgħu fl-implimentazzjoni tad-Direttiva 2000/9/KE. B’mod iktar partikolari, l-awtoritajiet, il-korpi notifikati u l-manifatturi kellhom fehmiet differenti dwar jekk ċerti tipi ta’ installazzjonijiet jaqgħux taħt il-kamp ta’ applikazzjoni tad-Direttiva 2000/9/KE u b’hekk għandhomx jiġu manifatturati u ċertifikati f’konformità mar-rekwiżiti u l-proċeduri tad-Direttiva.

3.1.3

Kien hemm ukoll fehmiet differenti dwar jekk ċertu tagħmir għandux jitqies bħala sottosistema, infrastruttura jew komponent tas-sikurezza.

3.1.4

Barra minn hekk, id-Direttiva ma tispeċifikax liema tip ta’ proċedura ta’ valutazzjoni tal-konformità għandu jiġi applikat għas-sottosistemi.

3.2

Dawn l-approċċi diverġenti wasslu għal distorsjonijiet fis-suq u trattament differenti tal-operaturi ekonomiċi. Il-manifatturi u l-operaturi tal-installazzjonijiet ikkonċernati kellhom jimmodifikaw it-tagħmir jew jgħaddu minn ċertifikazzjoni ulterjuri li wasslu għal spejjeż żejda u għal dewmien fl-awtorizzazzjoni u t-tħaddim ta’ dawk l-installazzjonijiet.

3.3

Għalhekk, il-Proposta għal Regolament għandha l-għan li ssaħħaħ iċ-ċarezza legali dwar il-kamp ta’ applikazzjoni tad-Direttiva 2000/9/KE u b’hekk twassal għal implimentazzjoni aħjar tad-dispożizzjonijiet legali rilevanti.

3.4

Id-Direttiva 2000/9/KE fiha dispożizzjonijiet ukoll dwar il-valutazzjoni tal-konformità għas-sottosistemi. Madankollu, ma tistabbilixxix il-proċedura konkreta li għandha tiġi segwita mill-manifattur u l-korp notifikat. Barra minn hekk, ma toffrix lill-manifatturi l-firxa ta’ proċeduri ta’ valutazzjoni tal-konformità li huma disponibbli għall-komponenti tas-sikurezza. B’hekk il-Proposta għal-Regolament tallinja l-proċeduri ta’ valutazzjoni tal-konformità disponibbli għas-sottosistemi ma’ dawk li diġà huma użati għall-komponenti tas-sikurezza, fuq il-bażi tal-moduli ta’ valutazzjoni tal-konformità stabbiliti fid-Deċiżjoni Nru 768/2008/KE li tistabblixxi qafas legali komuni għall-kummerċjalizzazzjoni tal-prodotti (Deċiżjoni NLF). F’dan il-kuntest, tipprovdi wkoll għat-twaħħil tat-tikketta CE biex tiġi indikata konformità mad-dispożizzjonijiet tiegħu, skont is-sistema eżistenti għall-komponenti tas-sikurezza.

3.5

Il-Proposta tqis ir-Regolament (UE) Nru 1025/2012 tal-Parlament Ewropew u tal-Kunsill tal-25 ta’ Ottubru 2012 dwar l-Istandardizzazzjoni Ewropea (4). Il-proposta tinkludi:

Esklużi huma dawn:

3.6

Il-proċeduri ta’ valutazzjoni tal-konformità għall-komponenti tas-sikurezza inżammu fil-Proposta. Madankollu, il-Proposta taġġorna l-moduli korrispondenti b’konformità mad-Deċiżjoni NLF.

3.7

Hija żżomm ukoll ir-rekwiżit għal intervent minn korp notifikat fil-fażi ta' kostruzzjoni u ta' produzzjoni tas-sottosistemi u l-komponenti tas-sikurezza kollha.

3.8

Il-Proposta tintroduċi firxa ta’ proċeduri ta’ valutazzjoni tal-konformità għas-sottosistemi fuq il-bażi tal-moduli ta’ valutazzjoni tal-konformità tad-Deċiżjoni NLF. Barra minn hekk, hija tintroduċi t-twaħħil tat-tikketta CE għas-sottosistemi billi ma hemmx raġuni għalfejn dawn m'għandhomx jiġu trattati bħall-komponenti tas-sikurezza.

3.9

Il-Proposta ssaħħaħ il-kriterji ta’ notifika għall-korpi notifikati u tintroduċi rekwiżiti speċifiċi għall-awtoritajiet notifikanti. Hemm bżonn l-adattament għal teknoloġiji ġodda biex tkun tista’ ssir notifika online. Għaldaqstant, huwa importanti li jkun previst perjodu li matulu kull dubju jew tħassib dwar il-kompetenza tal-korpi ta’ valutazzjoni tal-konformità jkun jista’ jiġi ċċarat qabel ma jibdew jaħdmu bħala korpi notifikati.

4.1

Billi ma tistax tiġi garantita dejjem interpretazzjoni konsistenti tad-dispożizzjonijiet tad-Direttivi, il-KESE jirrimarka li fi sforzi favur l-armonizzazzjoni ta' dan it-tip (5), li għandhom l-għan li jiksbu l-moviment ħieles tal-oġġetti fis-suq intern, ir-Regolamenti jiggarantixxu interpretazzjoni uniformi. Il-KESE jappoġġja għalhekk l-għażla ta' regolament kif ukoll tal-Artikolu 114 tat-TFUE bħala bażi legali.

4.1.1

Sakemm l-Istati Membri jingħataw il-kontroll tal-implimentazzjoni tar-Regolament, il-Kummissjoni Ewropea għandha timmonitorja li din issir b'mod uniformi.

4.2

Għaldaqstant, l-elementi validi tad-Direttiva attwali ur-regoli u l-prattiki tajba li jirriżultaw minnhom għandhom jidħlu fir-regolament b'mod preċiż (6) u elementi ġodda oħra fir-Regolament għandhom jingħataw formulazzjoni lingwistika preċiża wkoll.

4.2.1

Mhuwiex ċar għalfejn il-frażi ''għat-trasport tal-persuni'' tħassret mit-titlu tar-regolament meta premessa 8 tgħid li l-kamp ta' applikazzjoni tar-regolament huwa l-istess bħal dak tad-Direttiva.

4.2.2

It-termini tekniċi ħafna drabi jvarjaw wisq mill-istandards tekniċi armonizzati għall-installazzjonijiet tar-rotta b'kablaġġ u għandhom jiġu koordinati.

4.2.3

It-test tal-Proposta għal Regolament (Artikolu 2(2a)) ma jippermettix distinzjoni ċara bejn liftijiet (b'mod partikolari liftijiet inklinati) fis-sens tad-Direttiva 95/16/KE u l-funikulari. L-informazzjoni relatata ta' premessa 11 mhix biżżejjed għal klassifikazzjoni ċara fil-prattika. Huwa importanti li ikunu jistgħu jkomplu jinbnew fil-beraħ u għal diversi skopijiet liftijiet inklinati fis-sens tad-Direttiva dwar il-Lifts (konnessjonijiet bejn parkeġġi f'wied u kastell jew ċentru antik iktar 'il fuq, konnessjonijiet bejn il-korsi għall-ġiri bl-iski eċċ.).

4.2.4

Artikolu 2(2)(f) jeskludi wkoll l-installazzjonijiet fuq l-ilma mir-Regolament. Sabiex jiġu evitati nuqqas ta' ftehim u interpretazzjonijiet differenti, ġiet introdota l-premessa addizzjonali nru 12 li madanakollu ma tiċċarax is-sitwazzjoni. Jeħtieġ li jiġi ċċarat li l-Artikolu 2(2)(f) ser jinqasam bejn ''trasport b'kablaġġ fuq l-ilma'', kif definit fid-Direttiva 2000/9/KE u ''liftijiet għall-ġiri bl-iski fuq l-ilma''.

4.2.5

Għall-kuntrarju ta' Direttivi oħra (pereżempju d-Direttiva dwar il-Makkinarju), l-installazzjonijiet tar-rotta b'kablaġġ iddisinjati għat-trasport tal-persuni huma soġġetti għal proċeduri ta' awtorizzazzjoni definiti mill-Istati Membri. Għalhekk ma hemmx bżonn jiġu indikati l-isem kummerċjali u l-indirizzi postali fuq il-komponenti tas-sikurezza u s-sottosistemi, b'mod partikolari billi d-dikjarazzjonijiet tal-konformità (7) tal-UE, li jinkludu din l-informazzjoni huma meħtieġa kemm waqt l-installazzjoni kif ukoll għand l-awtorità kompetenti. Biex jagħti indikazzjoni tal-finanzi li jimplika dan l-Artikolu, il-Kumitat jinnota pereżempju li chairlift b’maqbad fiss jeħtieġ madwar 500 tikketta. L-Artikolu 11 (Kapitolu II) għandu għalhekk jinbidel billi titħassar din il-parti tal-ewwel sentenza ''is-sottosistema jew il-komponent tas-sikurezza, jew jekk dan ma jkunx possibbli, fuq l-imballaġġ tiegħu u''.

4.2.6

Artikolu 2(2) jeskludi mill-ambitu tar-Regolament dawk l-installazzjonijiet li jintużaw f'parks ta' divertiment għal skopijiet ta' divertiment biss. Mhuwiex ċar x'differenza tagħmel f'termini ta' regoli ta' sikurezza u rekwiżiti bażiċi jekk il-persuna li qed tuża l-installazzjonijiet hiex qed tużahom għal skopijiet ta' divertiment jew trasportazzjoni. Il-KESE jirrakkomanda għalhekk li tinżamm biss ir-referenza għal ''apparat fuq is-sit jew mobbli għall-użu f’fieri''.

4.2.7

Il-premessi 57 u 58 tal-Anness u l-Artikolu 41 jiddefinixxu dispożizzjonijiet tranżitorji. Madanakollu ma hemmx stqarrija ġenerali li tindika li l-abbozz ta' regolament ma japplikax għall-installazzjonijiet li diġà qed jintużaw. Jeħtieġ li f'inċiż 3 ġdid fl-Artikolu 9 jiżdied it-test ''Mhuwiex neċessarju li l-installazzjonijiet tar-rotta b'kablaġġ eżistenti jinġiebu f'konformità mal-installazzjonijiet il-ġodda'', li jinsab fid-Direttiva dwar l-installazzjonijiet tal-funikular (premessa 28, mhux disponibbli bil-Malti). Barra minn hekk, wara l-inċiż 3 attwali tal-Artikolu 9 għandhom jiddaħħlu dispożizzjonijiet għall-possibbiltà ta' bini mill-ġdid tal-installazzjonijiet tar-rotta b'kablaġġ. "Il-bini mill-ġdid ta' installazzjonijiet tar-rotta b'kablaġġ għandu jkun possibbli taħt dawn il-kundizzjonijiet li ġejjin:

4.2.8

Skont l-Artikolu 36(2), fuq talba, il-korpi notifikati għandhom jipprovdu lil korpi notifikati oħra ir-riżultati pożittivi ta’ valutazzjoni tal-konformità. Il-korpi notifikati huma istituzzjonijiet indipendenti li jridu jaġixxu fuq livell ekonomiku. Sabiex jiġi evitat it-trasferiment tal-għarfien f'dawn il-każijiet għandha titħassar il-frażi ''u, fuq talba, mar-riżultati pożittivi''.

4.3

Il-KESE jilqa' l-fatt li l-Proposta għal Regolament hija konformi mad-Direttiva 2000/9/KE u tirrifletti l-“Pakkett dwar il-Prodotti”, li ġie adottat fl-2008, u b'mod partikolari d-Deċiżjoni NLF (KE) Nru 768/2008 li dwarha diġà ħareġ opinjoni favorevoli (8).

5.1

Fil-verżjoni Ġermaniża tal-Proposta, il-kliem ''konstruiert'' jew ''Konstruktion'' ħafna drabi jintużaw minflok ''geplant'' jew ''Planung'' (bħal fid-Direttiva 2000/9/KE). Dan jidher fit-test Ġermaniż kollu. Dawn huma xi eżempji: premessa 1, Artikolu 1, Artikolu 2(1), Artikolu 3(1), Artikolu 3(3) u Artikolu 8(1).

5.2

Id-definizzjoni ta' ''komponenti tas-sikurezza'' ta' Artikolu 3(4) għandha tiġi emendata billi jitħassru l-kliem ''jew installazzjoni tar-rotta b’kablaġġ''. Ir-raġuni għal dan hija li l-infrastruttura li dwar il-proċeduri tagħha jiddeċiedu l-Istati Membri ma tistax tinkludi l-''komponenti tas-sikurezza'' fis-sens tar-Regolament, dawn il-komponenti huma magħrufa minflok bħala ''komponenti ta' sikurezza kritika''.

5.3

Artikolu 11(9) jgħid li l-manifatturi għandhom, fuq talba motivata mill-Istati Membri, jipprovdu l-informazzjoni u d-dokumentazzjoni kollha meħtieġa għal proċedura tal-valutazzjoni tal-konformità. Sabiex jiġi żgurat li l-komponenti mibnija skont għadd ta' standards armonizzati (u li għalhekk għalihom tgħodd il-presuppożizzjoni ta' konformità) ma jaqgħux taħt dan l-Artikolu, il-KESE jirrakkomanda li l-paragrafu 9 jiġi ċċarart billi jiżdied dan it-test fil-bidu: ''Fir-rigward tal-komponenti li ma tpoġġewx fis-suq skont għadd ta' standards armonizzati, il-manifatturi għandhom ... ''.

5.4

Il-kelma “Drahtseilbahn” fil-premessa 8 tat-test Ġermaniż mhix rikonoxxuta u ma tikkonformax mal-verżonijiet Olandiżi u Ingliżi tat-test.

5.5

Fl-abbozz ta' Regolament, pereżempju fil-premessa 17 tintuża l-kelma ''Wartung'' (servizzjar). Madanakollu s-servizzjar huwa biss parti waħda mil-manteniment li jkopri l-ispezzjoni, is-servizzjar u t-tiswija. Il-kelma ''Wartung'' għandha għalhekk tinbidel u minflokha tintuża ''Instandhaltung'' fit-test sħiħ. It-terminu “maintained” użat fil-verżjoni Ingliża huwa korrett.

5.6

Minflok it-terminu “grundlegende Anforderungen” użat fil-verżjoni Ġermaniża tad-Direttiva dwar l-installazzjonijiet tal-funikular intuża “wesentliche Anforderungen” (pereżempju Artikolu 6). Il-verżjoni Ingliża tkompli tirreferi għal “Essential requirements” b'konformità mad-Direttiva 2000/9/KE. Il-verżjoni Ġermaniża tal-Proposta għal Regolament għandha tiġi modifikata sabiex jintuża t-terminu “Grundlegende Anforderungen”.

5.7

Il-premessa 19 ma tikkorrispondi mal-ebda test u għandha għalhekk titħassar.

5.8

Il-premessa 23 hija sors ta' konfużjoni billi tpoġġi l-moviment ħieles tal-oġġetti u l-analiżi tas-sikurezza fl-istess kuntest u għalhekk għandha titħassar.

5.9

Artikolu 1 jiddefinixxi s-suġġett tar-regolament. Madanakollu l-oqsma tad-disinn, l-assemblaġġ u t-tqegħid fis-suq tad-Direttiva 2000/9/KE ma ġewx inklużi hawn. Dawn għandhom jiġu inklużi jew għandu jintuża minflok it-test tad-Direttiva.

5.10

Id-definizzjoni ta' ''installazjoni tar-rotta b'kablaġġ'' ta' Artikolu 3(1) mhix ċara. Għandha tintuża minflok id-definizzjoni tad-Direttiva 2000/9/KE.

5.11

Minflok it-terminu “Schleppaufzug” f'Artikolu 3(8) tal-verżjoni Ġermaniża tat-test għandu jintuża t-terminu “Schlepplift”. Din il-korrezzjoni saret ukoll matul ir-reviżjoni tal-istandards armonizzati relatati.

5.12

Billi l-frażi ta' Artikolu 3(12) ''it-tqegħid fis-suq'' mhux dejjem tirreferi għall-installazzjoni sħiħa, pereżempju fil-każ tal-konverżjonijiet, it-test għandu jgħid minflok ''jew il-komponenti tiegħu''.

5.13

Ir-rekwiżiti tal-analiżi tas-sikurezza ta' Artikolu 8(1) ġew emendati b'mod li ma jispeċifikawx ir-responsabbiltajiet. Billi l-analiżi tas-sikurezza hija d-dokument prinċipali tal-kuntrattur, fl-Artikolu għandu jiżdied it-test ''skont it-talba tal-kuntrattur jew l-aġent tal-kuntrattur''.

5.14

Skont Artikolu 8(2), l-analiżi tas-sikurezza għandha tiġi inkluża fir-rapport tas-sikurezza. Madanakollu d-Direttiva 2009/KE tistipula li rapport tas-sikurezza għandu jitfassal abbażi tal-analiżi tas-sikurezza, li hija differenza importanti. Il-KESE jirrakkomanda li jiġi adottat it-test ta' Artikolu 4(2) tad-Direttiva.

5.15

Artikolu 9(4) diffiċli biex jinftiehem u għalhekk għandu jintuża minflok it-test ta' Artikolu 12 tad-Direttiva 2000/9/KE.

5.16

Artikolu 10(1) jistipula li l-installazzjoni tar-rotta b'kablaġġ tista' tibqa' titħaddem biss jekk tikkonforma mal-kundizzjonijiet stabbilti fir-rapport tas-sikurezza. Il-manwal tas-servizzjar u l-manteniment huwa dokument importanti għas-sikurezza tat-tħaddim ta' installazzjoni. Il-KESE jirrakkomanda għalhekk li t-test jiġi emendat billi minflok il-frażi ''tibqa’ titħaddem'' tintuża biss il-kelma ''titħaddem'' u minflok ''rapport tas-sikurezza'' tintuża ''id-dokumentazzjoni speċifikata f'Artikolu 9(2)''.

5.17

Skont il-moduli definiti fl-Anness, il-manifattur jista' jwettaq il-proċedura ta’ valutazzjoni tal-konformità biss ma' korp notifikat. It-test ta' Artikolu 11(2) għandu jirrifletti dan billi minnu titħassar il-frażi ''jew iqabbdu lil xi ħadd jagħmilhielhom''.

5.18

It-terminu ''l-informazzjoni dwar is-sikurezza'' li intuża f'Artikolu 11(7) mhux ċar u għandu jiġi speċifikat.

5.19

Artikolu 16 jirreferi għall-''ewwel paragrafu'' minkejja li dan ma jeżistix.

5.20

Id-dispożizzjonijiet tad-Deċiżjoni Nru 768 dwar oġġezzjonijiet formali għal standards armonizzati (Artikolu R9 u R19) għandhom jidħlu wkoll f'Artikolu 17.

5.21

Hemm ir-riskju li Artikolu 18(4) jiġi applikat ukoll għal ferroviji ta' prova. Sabiex dan jiġi evitat għandu jiżdied it-test ''ħlief għall-ferroviji ta' prova''.

5.22

Artikolu 19(2) jista' jinftiehem li qed ifisser li d-dikjarazzjonijiet ta' konformità tal-komponenti tas-sikurezza jew is-sottosistemi li diġà qiegħdin fis-suq għandhom jiġu aġġornati wkoll. Għalhekk l-aħħar parti tal-ewwel sentenza ''għandha tiġi aġġornata kontinwament'' għandha tgħid minflok hekk ''għandha tiġi aġġornata meta sottosistema jew komponent tas-sikurezza jitqiegħdu fis-suq''.

5.23

Skont Artikolu 21(2), anki s-sottosistemi għandhom jirċievu t-tikketta CE. Billi ma hemm l-ebda sottosistema fuq is-suq li ma fihiex mill-inqas komponent wieħed tas-sikurezza li jkollha t-tikketta CE tagħha, dan ir-rekwiżit għandu jiġi eliminat. Il-KESE jirrakkomanda għalhekk li jitħassru l-kliem ''s-sottosistema jew''.

5.24

L-Anness II għandu jiġi rivedut ukoll. Madankollu, dan għandu jsir b'mod komprensiv u ċertament bil-parteċipazzjoni tal-imsieħba kollha involuti.