4.10.2012   

MT

Il-Ġurnal Uffiċjali tal-Unjoni Ewropea

C 299/145

1.1

Il-KESE jinsab sodisfatt ħafna bis-suċċess tal-pjan għall-istokkijiet ta’ merluzz fil-Baħar Baltiku u jħoss li huwa importanti li l-pjan jiġi estiż.

1.2

Il-KESE jemmen li l-emendi proposti għall-Artikoli 4, 5 u 8 u għall-Artikolu 29(2), (3) u (4) huma bidliet tekniċi aċċettabbli u neċessarji sabiex ikun hemm konformità mat-TFUE.

1.3

Il-KESE mhuwiex favur id-delega ta’ setgħa leġislattiva lill-Kummissjoni biex jiġu determinati r-rati ta’ mortalità għas-sajd, kif ġie propost fl-Artikoli 27 u 29a. Il-KESE jaħseb li huwa l-privileġġ tal-Kunsill li jieħu deċiżjonijiet f'dan il-qasam taħt l-Artikolu 43(3) tat-TFUE.

2.1

Skont rapporti tal-Kunsill Internazzjonali għall-Esplorazzjoni tal-Baħar (ICES), sar sajd eċċessiv tal-istokkijiet tal-merluzz tal-Baħar Baltiku fil-bidu tas-snin 2000. Fis-sottotaqsimiet 25-32 tal-ICES, ir-rata ta’ mortalità mis-sajd għall-merluzz tal-Lvant tal-Baltiku naqqset l-istokk għal livell fejn kien hemm il-periklu li jikkollassa. L-istokk tal-merluzz tal-Punent tal-Baltiku fis-sottotaqsimiet 22-24 tal-ICES kien f'qagħda daqsxejn aħjar, iżda l-qabda tal-istokk kienet taħt il-livell potenzjali għat-tul. Huwa għalhekk li fit-18 ta’ Settembru 2007, permezz tar-Regolament tal-Kunsill (KE) Nru 1098/2007, twaqqaf pjan pluriennali għall-istokkijiet tal-merluzz fil-Baħar Baltiku u għas-sajd li jisfrutta dawn l-istokkijiet. L-għan tal-pjan kien li jiġi żgurat li l-istokkijiet tal-merluzz tal-Baltiku jkunu jistgħu jiġu sfruttati taħt kundizzjonijiet ekonomiċi, ambjentali u soċjali sostenibbli.

2.2

Sabiex jintlaħaq dan il-għan, il-pjan stabbilixxa regoli għat-twaqqif ta’ opportunitajiet għas-sajd annwali għall-istokk, f'termini tal-qabda totali u l-isforz tas-sajd aċċettabbli. Dawn ir-regoli jinkludu parametru tal-mortalità mis-sajd imsejjes fuq rakkomandazzjonijiet xjentifiċi annwali u użat biex tiġi diterminata l-vijabilità tal-istokk. Barra minn hekk, l-Artikolu 27 tar-Regolament stipola li l-Kunsill jiddetermina r-rata ta’ mortalità mis-sajd permezz ta’ maġġoranza kkwalifikata u abbażi ta’ proposta mill-Kummissjoni sabiex jiġi żgurat li l-objettivi ta’ ġestjoni tal-pjan ikunu jistgħu jintlaħqu. B'mod simili, l-Artikolu 26 ippermetta li l-Kunsill jimmodifika l-pjan u jiżgura li jintlaħqu l-objettivi.

2.3

L-implimentazzjoni tal-pjan kienet suċċess. Ir-rata ta’ mortalità mis-sajd taż-żewġ stokkijiet ta’ merluzz tal-Baltiku hija inqas mill-objettiv fil-pjan attwali. Il-mortalità mis-sajd għall-istokk ta’ merluzz fil-Lvant tal-Baltiku wkoll hija inqas mir-rendiment massimu sostenibbli (Maximum Sustainable Yield – MSY) u l-istokk riproduttiv żdied b'iktar minn erba' darbiet minn mindu l-pjan ġie implimentat. Ix-xejra għall-istokk tal-merluzz fil-Punent tal-Baltiku kienet iżjed gradwali, iżda jidher ċar li miexja fid-direzzjoni t-tajba.

3.1

L-għan tal-proposta tal-Kummissjoni huwa li temenda r-Regolament tal-Kunsill (KE) Nru 1098/2007 tat-18 ta’ Settembru 2007 li jistabbilixxi pjan pluriennali għall-istokkijiet tal-merluzz fil-Baħar Baltiku u s-sajd li jisfrutta dawk l-istokkijiet. Dan l-att ġie adottat qabel id-dħul fis-seħħ tat-Trattat dwar il-Funzjonament tal-Unjoni Ewropea (TFUE), u għaldaqstant trid tiġi emendata skont it-Trattat il-ġdid.

3.2

L-Artikolu 290 TFUE jipprevedi li att leġislattiv jista' jiddelega lill-Kummissjoni s-setgħa li tadotta atti mhux leġislattivi ta’ applikazzjoni ġenerali li jissupplementaw jew jemendaw ċerti elementi mhux essenzjali tal-att leġislattiv. Il-Kummissjoni qed tipproponi li l-proċedura tat-teħid tad-deċiżjonijiet prevista fl-Artikoli 26 u 27 tar-Regolament tiġi kkonvertita f'sistema ta’ setgħat iddelegati li għandhom jiġu eżerċitati mill-Kummissjoni sabiex jiġu monitorjati l-pjan u l-miri tal-mortalità mis-sajd.

3.3

Il-pjan jesiġi li kull tliet snin issir valutazzjoni tal-impatt tal-miżuri ta’ ġestjoni tal-istokkijiet u s-sajd ikkonċernati. Huwa diffiċli ħafna li wieħed jirrispetta dan ir-rekwiżit minħabba d-disponibilità limitata ta’ data relevanti sabiex issir valutazzjoni adatta. Skont il-pariri xjentifiċi, valutazzjoni sħiħa tal-prestazzjoni tul it-tliet snin tal-pjan ma tistax issir qabel ħames snin wara li jiġi introdott il-pjan. Konsegwentement, il-kalendarju għall-valutazzjoni tal-pjan għandu jiġu modifikat.

3.4

Il-Kummissjoni tipproponi wkoll li tingħata setgħat ta’ implimentazzjoni sabiex tikkonferma jekk jiġux rispettati jew le l-kundizzjonijiet stabbiliti fl-Artikolu 29 dwar it-tneħħija ta’ ċerti żoni tal-Baltiku mill-ambitu tal-miżuri.

3.5

Barra minn hekk, il-Kummissjoni u l-Istati Membri impenjaw ruħhom li sa mhux aktar tard mill-2015 jilħqu l-qabda massima sostenibbli għall-istokkijiet li naqsu ħafna, iżda dan mhuwiex iddikjarat bħala objettiv tal-pjan. Sabiex jiġu evitati ambigwitajiet fil-pjan, għandu jinkludi referenza għall-MSY.

3.6

L-Artikoli 5 u 8, li jistabbilixxu l-qabda totali permissibbli (TAC) għall-istokkijiet tal-merluzz u n-numru massimu ta’ jiem ta’ assenza mill-port, għandhom jiġu emendati b'mod adatt sabiex jiġi kkjarifikat li l-proċedura inkwistjoni hija dik prevista fit-Trattat.

4.1

Il-KESE jinsab sodisfatt ħafna bis-suċċess tal-pjan għall-istokkijiet ta’ merluzz fil-Baħar Baltiku u jħoss li huwa importanti li l-pjan jiġi estiż.

4.2

Il-proposta tal-Kummissjoni temenda l-objettivi tal-pjan, fl-Artikolu 4. Il-KESE jaħseb li r-referenza proposta għall-MSY hija konformi mal-mira komuni tal-UE għall-istokkijiet tal-ħut.

4.3

Il-Kummissjoni tipproponi li temenda l-Artikoli 5 u 8 tal-pjan, tissostitwixxi deċiżjonijiet b'maġġoranza kkwalifikata tal-Kunsill b'deċiżjonijiet li jikkonformaw mat-Trattat il-ġdid. Dawn huma bidliet tekniċi li jirriflettu t-tibdil fil-proċedura tat-teħid tad-deċiżjonijiet introdott mit-TFUE.

4.4

Fir-rigward tal-Artikolu 26, il-Kummissjoni tipproponi li l-valutazzjoni tal-pjan issir f'intervalli ta’ ħames snin. Il-KESE jaċċetta r-raġunijiet mogħtija għal dan, iżda josserva li l-qagħda tal-istokkijiet tal-merluzz għandha tiġi mmonitorjata kull sena b'referenza għall-pjan f'konnessjoni mal-valutazzjonijiet tal-istokkijiet tal-ħut tal-ICES.

4.5

Fid-dawl tal-proċedura attwali għat-teħid tad-deċiżjonijiet, il-Kummissjoni tipproponi li jiġu emendati l-Artikolu 29 (2), (3) u (4) sabiex tkun tista' tagħti eżenzjonijiet għal-limiti tal-qabdiet. Taħt il-proposta, il-Kummissjoni għandha tikkonferma l-eżenzjonijiet kull sena permezz ta’ atti ta’ implimentazzjoni, u kumitat ta’ rappreżentanti mill-Istati Membri għandu jevalwa u joħroġ rapport dwar il-kwistjoni. Il-KESE huwa favur it-twessigħ tal-mandat tal-Kummissjoni f'dan il-qasam, iżda jenfasizza li l-abbozzi ta’ deċiżjonijiet għandhom jitressqu kmieni biżżejjed sabiex issir valutazzjoni qabel ma jibda l-perjodu tas-sajd ta’ wara.

4.6

Il-proposta temenda l-Artikoli 27 u 29 sabiex il-Kummissjoni tingħata s-setgħa li tadotta atti delegati. Il-KESE esprima l-fehma tiegħu dwar din il-kwistjoni f'opinjonijiet preċedenti (1). Dawn l-opinjonijiet jinnotaw li s-setgħa biex jiġu adottati atti delegati trid tkun soġġetta għal perjodu ta’ żmien limitat. Barra minn hekk, atti delegati għandhom ikunu riżervati għal oqsma fejn deċiżjonijiet iridu jittieħdu malajr.

4.7

Il-proposta fl-Artikolu 29 biex il-Kummissjoni tingħata s-setgħa li tadotta atti delegati abbażi tal-Artikoli 26 u 27 għandha tibdel b'mod sinifikanti l-prinċipji tat-tfassil tal-politika tas-sajd tal-UE. Il-pass bil-mod li bih attwalment jittieħdu deċiżjonijiet mill-Kunsill u l-Parlament jiġġustifika d-delega tas-setgħa. Il-KESE huwa tal-fehma li soluzzjoni għal din il-problema għandha tinstab l-ewwel permezz ta’ kjarifika tad-distribuzzjoni tal-awtorità bejn il-Parlament u l-Kunsill taħt l-Artikolu 43(2) u (3) tat-TFUE. Il-KESE jifhem li r-rata ta’ mortalità mis-sajd li hija determinata skont l-Artikolu 27 tal-pjan hija marbuta direttament mat-twaqqif u l-allokazzjoni ta’ opportunitajiet tas-sajd, jiġifieri taqa' taħt il-kompetenza eskussiva tal-Kunsill skont l-Artikolu 43(3) tat-TFUE.

4.8

Il-pjan għall-istokkijiet ta’ merluzz tal-Baltiku huwa maħsub ukoll biex jiżgura opportunitajiet tas-sajd stabbli, li abbażi tiegħu l-kumpaniji tas-sajd kummerċjali jistgħu jiżviluppaw l-attivitajiet tas-sajd tagħhom b'sens ta’ ċertezza. Il-KESE jibża' li jekk il-Kummissjoni tingħata d-delega tas-setgħa biex tibdel ir-rata ta’ mortalità mmirata fis-sajd, li abbażi tagħha jiġu determinati l-kwoti tal-qbid, dan jista' jwassal f'qasir żmien għal bidla rapida fil-kwoti tal-qbid li tista' tagħmel ħsara lill-industrija tas-sajd.

4.9

Raġuni oħra biex il-Kunsill iżomm ir-responsabilità għat-teħid tad-deċiżjonijiet dwar ir-rata ta’ mortalità mmirata fis-sajd kif applikata fil-pjan hija l-bidla fil-prinċipji li fuqhom jissejjes il-parir xjentifiku mogħti minn sena għal oħra. Il-parir xjentifiku ma jqisx il-ħtieġa għal stabilità soċjoekonomika. Bidla fil-prinċipji jew il-metodu ta’ kalkolu tista' tibdel b'mod sinifikanti r-rata ta’ mortalità mmirata fis-sajd rakkomandata mir-riċerkaturi, mingħajr ma jkun sar xi bdil notevoli fl-istokk tal-ħut.

4.10

Il-KESE jinnota wkoll l-isforzi li qed isiru attwalment biex jiġi żviluppat mudell għar-regolazzjoni tal-ispeċijiet tal-merluzz tal-Baltiku u pelaġiċi. Pjan ibbażat fuq dan il-mudell eventwalment se jieħu post il-pjan pluriennali għall-istokkijiet tal-merluzz tal-Baltiku, u m'hemmx raġuni biex isiru bidliet għajr dawk neċessarji għall-pjan attwali, li qed iwassal għal riżultati pożittivi.