28.1.2012   

MT

Il-Ġurnal Uffiċjali tal-Unjoni Ewropea

C 24/119

1.1

Il-Kumitat ifaħħar lill-Kummissjoni għar-reviżjoni komprensiva li għamlet tal-leġislazzjoni eżistenti dwar l-ikel u jirrikonoxxi li huwa diffiċli li tiġi ċċarata d-distinzjoni bejn l-ikel maħsub għall-pubbliku inġenerali u l-ikel maħsub għal gruppi speċifiċi. Dan in-nuqqas ta’ ċarezza jagħmel l-interpretazzjoni, l-applikazzjoni u l-infurzar tal-leġislazzjoni attwali diffiċli, b'mod partikolari għall-Istati Membri u s-soċjetà ċivili.

1.2

Il-Kummissjoni għamlet valutazzjoni tal-impatt dettaljata u konsultazzjonijiet marbuta magħha sabiex tindirizza l-għanijiet ta’ koerenza, semplifikazzjoni u armonizzazzjoni tas-suq intern. Il-valutazzjoni tal-impatt analizzat kwistjonijiet bħall-piżijiet amministrattivi, ir-riformulazzjoni u t-tikkettar, l-innovazzjoni, il-kompetittività, il-prezzijiet, il-protezzjoni u l-informazzjoni tal-konsumatur, il-konsegwenzi potenzjali għall-impjieg u l-intrapriżi ż-żgħar u l-benesseri soċjali.

1.3

Huwa importanti ħafna li tinżamm id-definizzjoni attwali ta’ “ikel għal skopijiet mediċi speċjali” sabiex ikun possibbli li ssir distinzjoni bejn dan l-ikel u l-ikel għall-konsum ġenerali u sabiex jiġi żgurat li l-formulazzjoni tiegħu tinkludi ingredjenti vitali bħall-aċidi amminiċi u l-oligopeptidi.

1.4

Barra minn hekk, il-KESE jemmen li l-ħalib tat-trab għal trabi prematuri, li huma grupp estremament vulnerabbli, għandu jiġi inkluż fil-kategorija tal-ikel nutrizzjonalment komplet b'formulazzjoni ta’ nutrijenti standard.

1.5

L-applikazzjoni attwali tal-leġislazzjoni qafas, kif rikonoxxuta mill-Kummissjoni, qed twassal għad-distorsjoni tal-kummerċ fis-suq intern minħabba l-fatt li l-interpretazzjoni u l-infurzar tagħha jvarjaw minn Stat Membru għal ieħor. Nittamaw li r-Regolament il-ġdid propost jikkoreġi din id-distorsjoni, mingħajr ma jkun hemm konsegwenzi koroh għall-impjieg jew għall-SMEs fi ħdan is-settur u jiżgura t-tkomplija tal-innovazzjoni.

1.6

Il-prodotti kollha maħsuba għall-konsum mill-bniedem huma attwalment protetti permezz tal-leġislazzjoni tal-UE dwar is-sikurezza tal-ikel, it-tikkettar u l-indikazzjonijiet, bl-appoġġ tal-EFSA (European Food Safety Authority – l-Awtorità Ewropea dwar is-Sigurtà fl-Ikel). Il-proposta l-ġdida ser tappoġġja l-armonizzazzjoni tar-regoli tal-UE fil-qasam tas-sikurezza tal-ikel u l-protezzjoni tal-konsumatur, billi tneħħi kwalunkwe duplikazzjoni u ambigwità. Il-prinċipju tas-sussidjarjetà ser jiġi rispettat billi l-Istati Membri jitħallew japplikaw regoli nazzjonali meta dan ikun iġġustifikat fl-interess tal-protezzjoni tas-saħħa pubblika.

1.7

Il-KESE jħeġġeġ lill-Kummissjoni tikkunsidra mill-ġdid il-preparazzjonijiet ta’ ikel maħsuba għall-iżvilupp tat-tfal żgħar bejn it-12 u s-36 xahar, wara li ssir valutazzjoni xjentifika bir-reqqa. Attwalment, il-konklużjonijiet xjentifiċi huma konfliġġenti, u l-pubbliku jeħtieġ linji gwida u informazzjoni ċari.

1.8

Fil-fehma tal-KESE, il-leġislazzjoni l-ġdida għandha żżomm id-dispożizzjoni legali attwali (Artikolu 8(2) tad-Direttiva 2009/39/KE tal-Parlament Ewropew u tal-Kunsill tas-6 ta’ Mejju 2009 dwar l-oġġetti tal-ikel għal użu ta’ nutriment partikolari) li tippermetti li l-informazzjoni dwar il-prodotti tal-ikel speċjali u dwar l-użu adegwat tagħhom tiġi kkomunikata lill-professjonisti tas-saħħa, bil-għan li jkunu jistgħu jinfurmaw lill-konsumaturi u lill-pazjenti b'mod adegwat u jagħtuhom rakkomandazzjonijiet korretti.

1.9

Il-KESE jitlob lill-Kummissjoni tiżgura li ma jkun hemm l-ebda distorsjoni fil-qasam tal-ikel maħsub għall-persuni sportivi, li s-suq Ewropew tal-konsumaturi tiegħu jirrappreżenta madwar EUR 2 357, b'rata ta’ tkabbir annwali ta’ 7 %. Rigward il-kuntest usa' tas-sikurezza u t-tikkettar tal-ikel, il-KESE jħeġġeġ ukoll lill-Kummissjoni tikkunsidra li, f'leġislazzjoni futura, tintroduċi twissijiet bil-miktub fuq il-prodotti tal-ikel li l-profili nutrittivi tagħhom (b'mod partikolari fil-każ ta’ prodotti maħsuba għall-persuni sportivi u dawk maħsuba għat-tnaqqis fil-piż/il-kontroll tad-dieta) jista' jkollhom effett ħażin, jekk jiġu kkunsmati għal perjodu twil jew fi kwantitajiet imprudenti.

1.10

Il-KESE jirrikonoxxi li, minħabba d-diversità ekonomika, soċjali u kulturali attwali fl-Ewropa, jista' ma jkunx possibbli li l-gruppi kollha fi ħdan il-popolazzjoni jirċievu n-nutrijenti kollha meħtieġa biex jgħixu stil ta’ ħajja li jagħmel tajjeb għas-saħħa, u dan wassal għall-iżvilupp ta’ ikel imsaħħaħ bin-nutrijenti, u flimkien ma’ dan il-Kummissjoni żviluppat ukoll regoli dwar ir-reklamar u t-tikkettar. F'dan ir-rigward, il-KESE jappoġġja bil-qawwa l-miżuri leġislattivi u ta’ implimentazzjoni attwali tal-UE, li jiżguraw li l-indikazzjonijiet volontarji kollha li jsiru b'rabta ma’ prodotti tal-ikel ikunu ċari, ġusti u ssostanzjati. Dawn l-affermazzjonijiet ma jistgħux ikunu qarrieqa sabiex il-konsumaturi finali jkunu jistgħu jagħmlu għażla tajba u, fil-każ tal-ikel għal skopijiet mediċi speċjali, sabiex il-persunal ikkwalifikat fil-qasam tal-mediċina, in-nutrizzjoni u l-farmaċija jkollu informazzjoni adegwata dwar il-kontenut nutrittiv u l-użu korrett tiegħu.

1.11

Fl-aħħar nett, il-KESE jappoġġja r-rekwiżit kontinwu, kif stipulat fil-premessa tal-proposta tal-Kummissjoni, għal Sistema ta’ Twissija Bikrija għall-Ikel u l-Għalf (RASFF – Rapid Alert System for Food and Feed) li għandha tiġi implimentata f'każ li jfaqqgħu kriżijiet tal-ikel li jistgħu jolqtu lill-konsumaturi fl-inħawi kollha tal-Ewropa.

2.1

Il-moviment liberu ta’ ikel sigur u bnin huwa aspett importanti tas-suq intern u jikkontribwixxi b'mod sinifikanti għas-saħħa u l-benesseri taċ-ċittadini. F'dan il-kuntest, il-leġislazzjoni tal-UE dwar l-ikel ġiet żviluppata sabiex tiżgura li “L-ikel m'għandux jitqiegħed fuq is-suq jekk ma jkunx tajjeb”. Dan ir-rekwiżit jikkonċerna kemm il-kontenut fiżiku tiegħu kif ukoll ir-regoli dwar it-tikkettar.

2.2

Id-Direttiva Qafas dwar l-Ikel Djetetiku (Direttiva 2009/39/KE) ġiet adottata fl-1977 biex tindirizza l-fatt li “d-differenzi bejn il-liġijiet nazzjonali dwar l-oġġetti ta’ ikel għal użu ta’ nutriment partikolari jfixklu l-moviment liberu tagħhom, [u] jistgħu jkawżaw kondizzjonijiet ta’ kompetizzjoni mhux ugwali”. It-termini mid-definizzjoni ta’ “ikel għal skopijiet mediċi speċjali” nżammu fil-proposta, bil-għan li jiġi żgurat li ssir distinzjoni bejn dan l-ikel u l-ikel normali, u bil-għan ukoll li jiġu inklużi ingredjenti essenzjali fil-formulazzjoni tiegħu. Id-“definizzjoni komuni ta’ ikel djetetiku” żviluppata skont “id-dispożizzjonijiet ġenerali u r-regoli komuni tat-tikkettar” tgħid li l-ikel djetetiku għandu tliet karatteristiċi prinċipali:

2.3

Fost l-ikel djetetiku, kif definit fid-Direttiva Qafas dwar l-Ikel Djetetiku, insibu ikel maħsub għat-trabi jew it-tfal iż-żgħar, għall-persuni li jbatu minn intolleranza għall-glutina jew għal skopijiet mediċi speċjali, u f'dawn il-każi trid tiġi indikata “stqarrija ta’ adegwatezza għall-użu nutrittiv partikolari” fuq l-imballaġġ. Għal xi wħud minn dawn il-gruppi (ħalib tat-trabi, ikel ipproċessat ibbażat fuq iċ-ċereali u ikel għat-trabi, ikel maħsub sabiex jintuża f'dieti ta’ restrizzjoni ta’ enerġija, ikel għal skopijiet mediċi u ikel għal persuni li ma taqbilx magħhom il-glutina), diġà ġiet stabbilita leġislazzjoni speċifika dwar ir-regoli marbuta mal-kompożizzjoni u t-tikkettar. Iżda, fil-każ tal-ikel għall-persuni sportivi, l-ikel għall-persuni bid-dijabete u l-persuni li ma jaqbilx magħhom il-lattosju, ma ġewx stabbiliti regoli speċifiċi.

2.4

Fl-2007, il-Kummissjoni bdiet proċess ta’ konsultazzjoni mal-Istati Membri dwar id-Direttiva Qafas dwar l-ikel djetetiku. Minn dak iż-żmien 'l hawn, saru iżjed konsultazzjonijiet mal-Istati Membri, il-gruppi ta’ tmexxija fi ħdan id-dipartimenti tal-Kummissjoni (SANCO, AGRI, ENTR, RTD, TRADE u s-segretarjat ġenerali) u gruppi tal-industrija u tal-konsumatur u tħejja wkoll rapport ta’ konsulenza esterna.

2.5

Fuq il-bażi ta’ dawn il-konsultazzjonijiet, il-Kummissjoni ressqet din il-Proposta għal Regolament dwar ikel maħsub għat-trabi u t-tfal żgħar u dwar ikel għal skopijiet mediċi speċjali. Il-Proposta għal Regolament ser tirrevoka d-Direttivi li ġejjin:

2.6

L-azzjoni li qed tipproponi l-Kummissjoni hija li tissemplifika u tiċċara r-rekwiżiti legali li japplikaw biss għal numru limitat ta’ kategoriji ta’ ikel u tistabbilixxi lista unika ta’ sustanzi li jistgħu jiġu miżjuda mal-ikel (“lista tal-Unjoni”) kopert minn din il-proposta. B'mod partikolari, din:

2.7

Kif imniżżel fl-Artikolu 6 tal-Proposta għal Regolament tal-Kummissjoni, huma maħsuba proċeduri ta’ emerġenza f'sitwazzjonijiet li fihom l-ikel kopert minn din il-proposta jinvolvi riskju serju għal ħajjet il-bniedem.