This document is an excerpt from the EUR-Lex website
Document 52008AE0504
Opinion of the European Economic and Social Committee on the Proposal for a Council Directive amending VAT Directive 2006/112/EC of 28 November 2006 on the common system of value added tax COM(2007) 677 final
Opinjoni tal-Kumitat Ekonomiku u Soċjali Ewropew dwar Il-proposta għal Direttiva tal-Kunsill li temenda d-Direttiva 2006/112/KE tat- 28 ta' Novembru 2006 dwar is-sistema komuni ta' taxxa fuq il-valur miżjud COM(2007) 677 finali
Opinjoni tal-Kumitat Ekonomiku u Soċjali Ewropew dwar Il-proposta għal Direttiva tal-Kunsill li temenda d-Direttiva 2006/112/KE tat- 28 ta' Novembru 2006 dwar is-sistema komuni ta' taxxa fuq il-valur miżjud COM(2007) 677 finali
ĠU C 204, 9.8.2008, p. 119–119
(BG, ES, CS, DA, DE, ET, EL, EN, FR, IT, LV, LT, HU, MT, NL, PL, PT, RO, SK, SL, FI, SV)
9.8.2008 |
MT |
Il-Ġurnal Uffiċjali ta’ l-Unjoni Ewropea |
C 204/119 |
Opinjoni tal-Kumitat Ekonomiku u Soċjali Ewropew dwar Il-proposta għal Direttiva tal-Kunsill li temenda d-Direttiva 2006/112/KE tat-28 ta' Novembru 2006 dwar is-sistema komuni ta' taxxa fuq il-valur miżjud
COM(2007) 677 finali
(2008/C 204/24)
Nhar it-22 ta' Novembru 2007, il-Kunsill iddeċieda, b'konformità ma' l-Artikolu 93 tat-Trattat li jistabbilixxi l-Komunità Ewropea, li jikkonsulta lill-Kumitat Ekonomiku u Soċjali Ewropew dwar
Il-proposta għal Direttiva tal-Kunsill li temenda d-Direttiva 2006/112/KE tat-28 ta' Novembru 2006 dwar is-sistema komuni ta' taxxa fuq il-valur miżjud
Is-Sezzjoni Speċjalizzata għall-Unjoni Ekonomika u Monetarja u l-Koeżjoni Ekonomika u Soċjali, inkarigata sabiex tipprepara l-ħidma tal-Kumitat dwar is-suġġett, adottat l-opinjoni tagħha nhar l-20 ta' Frar 2008. Ir-rapporteur kien is-Sur Burani.
Matul l-443 sessjoni plenarja tiegħu li nżammet fit-12 u t-13 ta' Marzu (seduta tat-12 ta' Marzu), il-Kumitat Ekonomiku u Soċjali Ewropew adotta din l-opinjoni b'123 voti favur, vot kontra u 6 astensjonijiet.
1. Introduzzjoni
1.1 |
Id-Direttiva dwar it-taxxa fuq il-valur miżjud, (minn issa 'l quddiem, “id-Direttiva dwar il-VAT”) (1), li daħlet fis-seħħ fl-2007, ġabret flimkien f'test wieħed id-diversi dispożizzjonijiet dwar il-VAT li ġew introdotti u emendati matul is-snin. L-implimentazzjoni ġabet magħha numru ta' diffikultajiet jew aspetti prattiċi, li kemm in-negozji kif ukoll xi Stati Membri ddeċidew li jikkummentaw jew li jressqu proposti dwarhom. Il-Kummissjoni eżaminathom u ddeċidiet li tippreżenta xi suġġerimenti biex temenda l-proposta kkonċernata. |
1.2 |
Peress li l-emendi jvarjaw u jikkonċernaw kwistjonijiet differenti, u bil-għan li titnaqqas il-burokrazija u li jiġi aċċellerat il-proċess, il-Kummissjoni għażlet li tiġborhom f'proposta waħda. Il-Kumitat jaqbel ma dan. |
2. Kontenut tal-proposta
2.1 |
Uħud mill-emendi jikkonċernaw lis-settur ta' l-enerġija li għandu sistema ta' taxxa li oriġinarjament kienet ibbażata fuq direttiva ta' l-2003 (2) u li sussegwentement ġiet trasposta fid-Direttiva dwar il-VAT. Il-lingwaġġ tekniku li ntuża llimita l-kamp ta' applikazzjoni tad-direttiva u ma rriflettiex ir-realtajiet ekonomiċi. Fi ftit kliem, fost il-prodotti ta' l-enerġija soġġetti għad-dazju ġew inklużi l-gass naturali li jiġi konsenjat permezz ta' sistemi ta' pajpijiet fissi u permezz ta' bastimenti li jittrasportaw il-gass naturali, l-elettriku u s-sħana jew il-kesħa konsenjati permezz ta' netwerks tas-sħana u tal-kesħa (“remote supply”). Il-Kummissjoni tipproponi li dawn il-prodotti jiġu eżentati mill-ħlas tad-dazju. |
2.2 |
Skond il-proposta, dawn is-sorsi ta' l-enerġija jistgħu jiġu intaxxati fl-Istati Membri fejn is-servizz huwa pprovdut skond il-forniment jew l-aċċess. Barra minn hekk, il-fatt li l-Istati Membri jistgħu japplikaw rata mnaqqsa ta' VAT jissemplifika l-proċedura. |
2.3 |
Fejn jidħlu derogi, fil-perijodu ta' l-adeżjoni tagħhom, il-Bulgarija u r-Rumanija ġew awtorizzati jagħtu eżenzjoni mit-taxxa lill-impriżi żgħar u li jibqgħu japplikaw eżenzjoni mill-VAT fuq it-trasport internazzjonali tal-passiġġieri. Ma nbidel xejn f'dan il-qasam: l-inkorporazzjoni ta' dawn id-derogi fit-test tad-Direttiva tal-VAT, kif ġara fl-Istati Membri, kienet ikkunsidrata utli. |
2.4 |
Rigward id-dritt tat-tnaqqis, il-proposta tindroduċi jew tiċċara prinċipju prominenti li huwa inerenti fl-idea oriġinali li fuqha kien imsejjes il-VAT: li l-eżerċizzju inizjali tat-tnaqqis ikun ristrett għall-proporzjon ta' l-użu kummerċjali effettiv meta l-proprjetà immobbli għall-użu mħallat tkun inkluża fl-assi u l-passivi tal-kumpanija. Ġie pprovdut ukoll għal sistema ta' rettifika sabiex jitqiesu l-varjazzjonijiet bejn l-użu kummerċjali u dak privat (jew mhux kummerċjali). |
3. Kummenti u konklużjonijiet
3.1 |
Il-proposti msemmija f'punti 2.3 u 2.4 ma jirrikjedu l-ebda kumment partikolari: l-għan ta' punt 2.3 huwa li jikkoreġi ommissjoni li saret fil-passat u l-għan ta' punt 2.4 huwa li jagħti kjarifika neċessarja għalkemm ovvja ta' prinċipju bażiku, li huwa magħruf bil-bosta u implimentat ukoll. |
3.2 |
Fir-rigward tal-punti 2.1 u 2.2, il-KESE japprova l-proposta li għandha l-għan li tassigura li l-leġislazzjoni tikkonforma mar-realtajiet ekonomiċi u li s-sorsi differenti ta' l-enerġija jiġu trattati b'mod ugwali. |
3.3 |
Il-KESE għalhekk jappoġġja l-proposta tal-Kummissjoni. |
Brussell, it-12 ta' Marzu 2008.
Il-President
tal-Kumitat Ekonomiku u Sociali Ewropew
Dimitris DIMITRIADIS
(1) Direttiva tal-Kunsill 2006/112/KE tat-28 ta' Novembru 2006 dwar is-sistema komuni ta' taxxa fuq il-valur miżjud.
(2) Direttiva tal-Kunsill 2003/92/KE tas-7 ta' Ottubru 2003.