(1)

Permezz tar-Regolament (UE) Nru 791/2011 (3), il-Kunsill impona dazji anti-dumping definittivi fuq l-importazzjonijiet ta’ ċerti drappijiet b’malja miftuħa tal-fibri tal-ħġieġ li joriġinaw mir-Repubblika tal-Poplu taċ-Ċina.

(2)

Wara investigazzjonijiet antiċirkomvenzjoni, dawn il-miżuri ġew estiżi bir-Regolamenti ta’ Implimentazzjoni tal-Kunsill (UE) Nru 672/2012 (4), (UE) Nru 21/2013 (5) u (UE) Nru 1371/2013 (6), kif emendati l-aħħar bir-Regolament ta’ Implimentazzjoni tal-Kummissjoni (UE) 2018/1711 (7), għal importazzjonijiet ta’ ċerti drappijiet b’malja miftuħa tal-fibri tal-ħġieġ ikkunsinjati mill-Indja, l-Indoneżja, il-Malażja, it-Tajwan u t-Tajlandja, kemm jekk iddikjarati li joriġinaw minn dawn il-pajjiżi kif ukoll jekk le, bl-eċċezzjoni ta’ dawk prodotti minn Montex Glass Fibre Industries Pvt. Ltd. u Pyrotek India Pvt. Ltd.

(3)

Dawn il-miżuri ġew estiżi ulterjorment bir-Regolament ta’ Implimentazzjoni tal-Kummissjoni (UE) Nru 976/2014 (8), għall-importazzjonijiet ta’ drappijiet kemxejn modifikati b’malja miftuħa tal-fibri tal-ħġieġ.

(4)

Il-miżuri attwalment fis-seħħ huma imposti mir-Regolament ta’ Implimentazzjoni (UE) 2017/1993 wara rieżami ta’ skadenza, kif emendat bir-Regolament ta’ Implimentazzjoni tal-Kummissjoni (UE) 2018/788 (9), li ta eżenzjoni lil SPG Glass Fibre PVT. Ltd.

(5)

Fit-23 ta’ Awwissu 2021, il-Kummissjoni Ewropea (“il-Kummissjoni”) irċeviet talba għal eżenzjoni mill-miżuri anti-dumping applikabbli għall-importazzjonijiet ta’ ċerti drappijiet b’malja miftuħa tal-fibri tal-ħġieġ ikkunsinjati mill-Indja, kemm jekk iddikjarati li joriġinaw mill-Indja kif ukoll jekk le. It-talba saret mill-kumpanija Urja Products Private Limited (“l-applikant”).

(6)

It-talba kien fiha evidenza li l-applikant kien produttur esportatur ġdid u ssodisfa l-kriterji għal eżenzjoni skont l-Artikolu 13(4) tar-Regolament anti-dumping bażiku, jiġifieri: (1) ma esportax il-prodott taħt rieżami lejn l-Unjoni matul il-perjodu ta’ investigazzjoni li l-miżuri huma bbażati fuqu, jiġifieri mill-1 ta’ April 2012 sal-31 ta’ Marzu 2013 (“il-perjodu oriġinali ta’ investigazzjoni”); (2) mhuwa relatat mal-ebda wieħed mill-esportaturi jew produtturi li huma soġġetti għall-miżuri anti-dumping imposti mir-Regolament oriġinali; (3) fil-fatt esporta lejn l-Unjoni l-prodott taħt rieżami wara tmiem il-perjodu tal-investigazzjoni oriġinali jew daħal f’obbligu kuntrattwali irrevokabbli biex jesporta kwantità sinifikanti lejn l-Unjoni, u (4) ma kienx involut fi prattiki ta’ ċirkomvenzjoni.

(7)

Il-Kummissjoni sabet li t-talba pprovdiet biżżejjed evidenza biex tiġġustifika t-tnedija ta’ investigazzjoni skont l-Artikolu 13(4) tar-Regolament anti-dumping bażiku għall-fini li tiġi ddeterminata l-possibbiltà li l-applikant jingħata eżenzjoni mill-miżuri estiżi.

(8)

Fl-20 ta’ April 2022, permezz tar-Regolament ta’ Implimentazzjoni (UE) 2022/651 (10), il-Kummissjoni bdiet ir-rieżami tar-Regolament ta’ Implimentazzjoni (UE) 2017/1993 bl-għan li tiddetermina l-possibbiltà li tingħata eżenzjoni lill-applikant. Fl-istess Regolament, il-Kummissjoni ħassret id-dazji anti-dumping imposti mir-Regolament ta’ Implimentazzjoni (UE) 2017/1993 fir-rigward tal-importazzjonijiet tal-prodott taħt rieżami mill-applikant u ordnat lill-awtoritajiet doganali jieħdu l-passi xierqa biex jirreġistraw tali importazzjonijiet (“ir-Regolament tal-bidu”).

(9)

Il-Kummissjoni stiednet lill-partijiet interessati jikkuntattjawha sabiex jipparteċipaw fl-investigazzjoni tar-rieżami. Il-partijiet interessati kollha kellhom l-opportunità li jikkummentaw dwar il-bidu tal-investigazzjoni u li jitolbu smigħ mal-Kummissjoni jew mal-Uffiċjal tas-Seduta fi proċedimenti kummerċjali jew mat-tnejn li huma sal-limiti ta’ żmien stipulati fir-Regolament ta’ Implimentazzjoni (UE) 2022/651. Ma wasal l-ebda kumment jew talba għal seduta ta’ smigħ.

(10)

Il-prodott taħt rieżami huwa drappijiet b’malja miftuħa tal-fibri tal-ħġieġ, b’daqs taċ-ċellula ta’ aktar minn 1,8 mm kemm fit-tul kif ukoll fil-wisa’ u li jiżnu aktar minn 35 g/m2, esklużi d-diski tal-fibra tal-ħġieġ, ikkonsenjati mill-Indja, kemm jekk iddikjarati li joriġinaw mill-Indja kif ukoll jekk le, li bħalissa jaqgħu taħt il-kodiċijiet NM ex 7019 63 00, ex 7019 64 00, ex 7019 65 00, ex 7019 66 00 u ex 7019 69 90 (kodiċijiet TARIC 7019630014, 7019640014, 7019650014, 7019660014 u 7019699014). Il-kodiċijiet NM u TARIC huma mogħtija għall-informazzjoni biss.

(11)

Drappijiet b’malja miftuħa tal-fibri tal-ħġieġ jistgħu jinstabu f’daqsijiet ta’ ċelloli u piżijiet għal kull metru kwadru differenti u jintużaw l-aktar bħala materjal tat-tisħiħ fil-qasam tal-kostruzzjoni (insulazzjoni termali esterna, tisħiħ tal-art, u tiswija tal-ħitan).

(12)

Il-perjodu ta’ investigazzjoni tar-rieżami kopra l-perjodu mill-1 ta’ April 2012 sal-31 ta’ Diċembru 2021 (“il-perjodu ta’ investigazzjoni tar-rieżami”).

(13)

Il-Kummissjoni talbet lill-applikant jimla kwestjonarju sabiex tikseb l-informazzjoni li hija qieset neċessarja għall-investigazzjoni tagħha. L-applikant issottometta t-tweġiba għall-kwestjonarju fit-2 ta’ Ġunju 2022.

(14)

Sussegwentement, il-Kummissjoni wettqet żjara ta’ verifika fil-bini tal-applikant f’Settembru 2022. Il-Kummissjoni rat li tivverifika l-informazzjoni kollha li qieset meħtieġa bil-għan li tiddetermina jekk l-applikant kienx jissodisfa l-kundizzjonijiet neċessarji.

(15)

Fir-rigward tal-kundizzjoni (1), il-Kummissjoni rreferiet għas-sejbiet preċedenti (11) li l-applikant ma pproduċiex jew ma esportax lejn l-Unjoni l-prodott li qed jiġi investigat matul il-perjodu ta’ investigazzjoni oriġinali. Konsegwentement, ġie konkluż li l-kundizzjoni (1) ġiet issodisfata.

(16)

Fir-rigward tal-kundizzjoni (2), l-investigazzjoni identifikat diversi kumpaniji relatati, jiġifieri Jayatma Industries Ltd li jittrattaw tessuti u ħwejjeġ, Mihikita Enterprises Ltd li jittrattaw il-bini u l-kostruzzjoni u Denis Chem Lab Ltd li jittrattaw apparat mediku. L-ebda waħda minn dawn il-kumpaniji ma kienet involuta fil-produzzjoni, l-ipproċessar, il-bejgħ jew ix-xiri tal-prodott investigat. Għalhekk, ġie konkluż li l-kundizzjoni (2) ġiet issodisfata.

(17)

Fir-rigward tal-kundizzjoni (3), l-applikant esporta l-prodott investigat lil żewġ kumpaniji fl-UE fl-2021. Għalhekk, ġie konkluż li l-applikant issodisfa l-kundizzjoni (3).

(18)

Fl-aħħar nett, matul l-investigazzjoni, instab li l-applikant ipproduċa l-kwantità kollha li esporta lejn l-Unjoni. Instab ukoll li l-applikant ma importa l-ebda materja prima miċ-Ċina għall-produzzjoni tal-prodott taħt rieżami. Għalhekk, l-investigazzjoni kkonfermat li l-applikant ma kienx involut fi prattiki ta’ ċirkomvenzjoni kif definit fl-Artikolu 13 tar-Regolament bażiku. Għalhekk, il-Kummissjoni kkonkludiet li l-kriterju (4) ġie ssodisfat ukoll.

(19)

Għaldaqstant, il-Kummissjoni kkonkludiet li l-applikant issodisfa l-kriterji skont l-Artikolu 13(4) tar-Regolament anti-dumping bażiku. Għalhekk, l-applikant jenħtieġ li jiġi eżentat mill-miżuri anti-dumping fis-seħħ f’konformità mar-Regolament ta’ Implimentazzjoni (UE) 2017/1993.

(20)

Għaldaqstant, jenħtieġ li r-Regolament ta’ Implimentazzjoni (UE) 2017/1993 jiġi emendat.

(21)

Minħabba s-sejbiet imsemmija hawn fuq, u skont l-Artikoli 13(4) u 11(4) tar-Regolament bażiku, il-Kummissjoni kkonkludiet li l-applikant jenħtieġ li jiżdied mal-lista ta’ kumpaniji li huma eżentati mill-miżuri anti-dumping imposti mir-Regolament ta’ Implimentazzjoni (UE) 2017/1993.

(22)

L-applikant u l-industrija tal-Unjoni ġew infurmati bl-intenzjoni tal-Kummissjoni li teżenta lil Urja Products Private Limited mill-miżuri anti-dumping fis-seħħ.

(23)

Il-partijiet ingħataw il-possibbiltà li jibagħtu xi kummenti. Ma wasal l-ebda kumment.

(24)

Ir-Regolament huwa f’konformità mal-opinjoni tal-Kumitat stabbilit mill-Artikolu 15(1) tar-Regolament (UE) 2016/1036.