(1)

Abbażi ta’ valutazzjoni preliminari, ir-Regolament ta’ Implimentazzjoni tal-Kummissjoni (UE) 2018/2019 (2) jistabbilixxi lista ta’ pjanti, prodotti tal-pjanti u oġġetti oħra ta’ riskju għoli.

(2)

Ir-Regolament ta’ Implimentazzjoni tal-Kummissjoni (UE) 2018/2018 (3) jistabbilixxi regoli speċifiċi rigward il-proċedura li trid tiġi segwita sabiex issir il-valutazzjoni tar-riskju msemmija fl-Artikolu 42(4) tar-Regolament (UE) 2016/2031 għal dawk il-pjanti, il-prodotti tal-pjanti u l-oġġetti l-oħra ta’ riskju għoli.

(3)

Wara l-valutazzjoni preliminari, fl-Anness tar-Regolament ta’ Implimentazzjoni (UE) 2018/2019 iddaħħlu 34 ġeneru u speċi waħda ta’ pjanti għat-tħawwil li joriġinaw mill-pajjiżi terzi kollha, bħala pjanti ta’ riskju għoli, li fosthom hemm il-ġeneri Juglans L., Nerium L. u Robinia L.

(4)

F’konformità mar-Regolament (UE) 2016/2031, jekk jiġi konkluż, abbażi ta’ valutazzjoni tar-riskju, li pjanta, prodott tal-pjanti jew oġġett ieħor li joriġinaw minn pajjiż terz, minn grupp ta’ pajjiżi terzi jew minn żona speċifika tal-pajjiż terz ikkonċernat, ikun fihom riskju inaċċettabbli ta’ pesti, iżda li dak ir-riskju jista’ jitnaqqas għal livell aċċettabbli jekk jitwettqu ċerti miżuri, il-Kummissjoni trid tneħħi dik il-pjanta, dak il-prodott tal-pjanti jew dak l-oġġett l-ieħor mil-lista stabbilita mill-Anness tar-Regolament ta’ Implimentazzjoni (UE) 2018/2019 u żżidhom mal-lista msemmija fl-Artikolu 41(2) tar-Regolament (UE) 2016/2031.

(5)

Dik il-lista hija prevista mir-Regolament ta’ Implimentazzjoni tal-Kummissjoni (UE) 2020/1213 (4).

(6)

Fid-9 ta’ Awwissu 2019, it-Turkija ressqet talba lill-Kummissjoni għall-esportazzjoni lejn l-Unjoni ta’ pjanti għat-tħawwil imlaqqma ta’ sentejn tal-Juglans regia L., li għandhom l-għeruq mikxufin, huma ħielsa mill-weraq u għandhom dijametru massimu ta’ 2 cm fil-bażi taz-zokk. Dik it-talba ġiet sostnuta bid-dossier tekniku rispettiv.

(7)

Fid-19 ta’ Mejju 2021, l-Awtorità Ewropea dwar is-Sigurtà fl-Ikel (“l-Awtorità”) adottat opinjoni xjentifika dwar il-valutazzjoni tar-riskju ta’ komodità tal-pjanti għat-tħawwil tal-Juglans regia L. mit-Turkija (5). L-Awtorità identifikat Anoplophora chinensis, Euzophera semifuneralis, Garella musculana, Lasiodiplodia pseudotheobromae u Lopholeucaspis japonica bħala pesti rilevanti għal dawk il-pjanti għat-tħawwil, evalwat il-miżuri ta’ mitigazzjoni tar-riskji deskritti fid-dossier għal dawk il-pesti u stmat il-probabbiltà li dawn ikunu ħielsa minn dawk il-pesti.

(8)

Fis-27 ta’ Novembru 2019, it-Turkija ressqet talba lill-Kummissjoni għall-esportazzjoni lejn l-Unjoni ta’ pjanti għat-tħawwil ta’ bejn sena u erba’ snin bil-materjal għat-tkabbir tan-Nerium oleander L. Dik it-talba kienet akkumpanjata mid-dossier tekniku rispettiv.

(9)

Fil-25 ta’ Marzu 2021, l-Awtorità adottat opinjoni xjentifika dwar il-valutazzjoni tar-riskju ta’ komodità tal-pjanti għat-tħawwil tan-Nerium oleander L. mit-Turkija (6). L-Awtorità identifikat il-Phenacoccus solenopsis bħala pest rilevanti għal dawk il-pjanti għat-tħawwil, evalwat il-miżuri ta’ mitigazzjoni tar-riskji deskritti fid-dossier għal dak il-pest u stmat il-probabbiltà li dawn ikunu ħielsa minn dak il-pest.

(10)

Fis-27 ta’ Novembru 2019, it-Turkija ressqet talba lill-Kummissjoni għall-esportazzjoni lejn l-Unjoni ta’ pjanti għat-tħawwil ta’ bejn tlieta u seba’ snin, bl-għeruq mikxufin u pjanti bil-materjal għat-tkabbir tar-Robinia pseudoacacia L. Dik it-talba kienet akkumpanjata mid-dossier tekniku rispettiv.

(11)

Fil-25 ta’ Marzu 2021, l-Awtorità adottat opinjoni xjentifika dwar il-valutazzjoni tar-riskju ta’ komodità tal-pjanti tar-Robinia pseudoacacia L. mit-Turkija (7). L-Awtorità identifikat lil Anoplophora chinensis, Lopholeucapsis japonica, u Pochazia shantungensis bħala pest rilevanti għal dawk il-pjanti għat-tħawwil, evalwat il-miżuri ta’ mitigazzjoni tar-riskji deskritti fid-dossier għal dawk il-pesti u stmat il-probabbiltà li dawn ikunu ħielsa minn dawk il-pesti.

(12)

Abbażi ta’ dawk l-opinjonijiet, jenħtieġ li jiġu adottati l-miżuri meħtieġa biex jiġi indirizzat ir-riskju ta’ dawk il-pesti bħala rekwiżiti fitosanitarji tal-importazzjoni, sabiex jiġi żgurat li r-riskju fitosanitarju mill-introduzzjoni tal-pjanti speċifikati fl-Unjoni jitnaqqas għal livell aċċettabbli.

(13)

Għalhekk, il-pjanti li ġejjin jenħtieġ li jitneħħew mill-Anness għar-Regolament ta’ Implimentazzjoni (UE) 2018/2019: pjanti għat-tħawwil ta’ Juglans regia L. ta’ mhux aktar minn sentejn, bl-għeruq mikxufin, mingħajr weraq u b’dijametru massimu ta’ 2 cm fil-bażi taz-zokk, li joriġinaw mit-Turkija, pjanti għat-tħawwil ta’ Nerium oleander L. ta’ mhux aktar minn erba’ snin, li joriġinaw mit-Turkija, u pjanti għat-tħawwil ta’ Robinia pseudoacacia L. ta’ mhux aktar minn seba’ snin u b’dijametru massimu ta’ 25 cm, li joriġinaw mit-Turkija. Dawn il-pjanti għat-tħawwil jenħtieġ li jiżdiedu mal-Anness tar-Regolament ta’ Implimentazzjoni (UE) 2020/1213 u, jekk applikabbli, jenħtieġ li l-miżuri fitosanitarji tal-importazzjoni meħtieġa jiġu stabbiliti fih.

(14)

Minħabba l-inċertezzi identifikati mill-Awtorità f’dawk id-dossiers, l-applikazzjoni waħidha tal-miżuri proposti mit-Turkija fid-dossiers ma tistax tnaqqas għal livell aċċettabbli r-riskju mill-introduzzjoni tal-pjanti speċifikati fl-Unjoni. Sabiex jitnaqqas ir-riskju fitosanitarju għal tali livell, minbarra l-miżuri diga’ proposti fid-dossiers mit-Turkija, jenħtieġ li dawk il-pjanti jitkabbru f’siti ta’ produzzjoni ħielsa mill-pesti.

(15)

Anoplophora chinensis u Lopholeucaspis japonica huma elenkati bħala pesti ta’ kwarantina fl-Unjoni fl-Anness II tar-Regolament ta’ Implimentazzjoni tal-Kummissjoni (UE) 2019/2072 (8). Euzophera semifuneralis, Garella musculana, Lasiodiplodia pseudotheobromae, Phenacoccus solenopsis u Pochazia shantungensis għadhom mhumiex inklużi f’dik il-lista iżda jistgħu jissodisfaw il-kundizzjonijiet biex jiġu inklużi ladarba tkun twettqet valutazzjoni sħiħa tar-riskju.

(16)

F’konformità mal-Artikolu 42(5) tar-Regolament (UE) 2016/2031, il-valutazzjoni tar-riskju se titwettaq f’perjodu ta’ żmien raġonevoli. Madankollu, minħabba d-domanda għall-importazzjonijiet, miżuri fitosanitarji temporanji li jikkonċernaw l-Euzophera semifuneralis, il-Garella musculana, il-Lasiodiplodia pseudotheobromae, il-Phenacoccus solenopsis u l-Pochazia shantungensis huma meħtieġa u xierqa sakemm titlesta l-valutazzjoni tar-riskju.

(17)

Għal konformità mal-obbligi li jirriżultaw mill-Ftehim tal-Organizzazzjoni Dinjija tal-Kummerċ dwar l-applikazzjoni ta’ miżuri sanitarji u fitosanitarji (9), l-importazzjoni ta’ dawk il-komoditajiet fl-Unjoni jenħtieġ li tissokta fl-iqsar żmien possibbli. Għalhekk, jenħtieġ li dan ir-Regolament jidħol fis-seħħ fit-tielet jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

(18)

Il-miżuri previsti f’dan ir-Regolament huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,