(1)

Le Rialachán (CE) Uimh. 853/2004, leagtar síos rialacha sonracha maidir le sláinteachas i ndáil le bia de bhunadh ainmhíoch le haghaidh oibreoirí gnólachta bia.

(2)

Ceadaítear le Rialachán (CE) Uimh. 853/2004 éanlaith chlóis a mharú ar an bhfeirm faoi réir ceanglas áirithe, lena n-áirítear an ceanglas go mbeidh deimhniú le bheith ag gabháil leis na hainmhithe maraithe i gcomhréir leis an tsamhail a leagtar amach i Rialachán Cur Chun Feidhme (AE) 2020/2235 ón gCoimisiún (3). Tagraíonn Iarscríbhinn III a ghabhann le Rialachán (CE) Uimh. 853/2004 don deimhniú mícheart, áfach, agus ba cheart an tagairt sin a cheartú dá bhrí sin.

(3)

Le Rialachán (AE) 2017/625, arna leasú le Rialachán (AE) 2021/1756 (4), leathnaítear an fhéidearthacht chun maolú ar an gceanglas maidir leis na limistéir táirgthe agus athsheachadta a aicmiú chuig gach eicínideirmeach nach scagbheathóirí iad, agus ní chuig súmairí cladaigh amháin. Dá dheasca sin, ba cheart Roinn VII, Caibidlí IX agus X, d’Iarscríbhinn III a ghabhann le Rialachán (CE) Uimh. 853/2004 a leasú chun an fhéidearthacht sin a chur san áireamh.

(4)

Ina theannta sin, le hIarscríbhinn III a ghabhann le Rialachán (CE) Uimh. 853/2004 leagtar síos ceanglais maidir le teocht agus coinníollacha iompair le haghaidh táirgí iascaigh. Foráiltear leis, inter alia, go bhfuil táirgí iascaigh le hiompar ag leátheocht oighir, i gcás táirgí iascaigh fuaraithe, nó ag – 18 °C, i gcás táirgí iascaigh reoite. Tá teicnící nua iompair ar fáil anois lena n-íslítear teocht an éisc go teocht idir reophointe tosaigh na n-iasc agus thart ar 1 °C go 2 °C níos ísle agus ligtear leis sin don iasc a iompar i mboscaí gan oighear, chomh maith le sárfhuarú. Ba cheart foráil a dhéanamh maidir leis na teicnící nua sin i Rialachán (CE) Uimh. 853/2004 agus a n-úsáid agus Tuairim Eolaíochta an Údaráis Eorpaigh um Shábháilteacht Bia (EFSA) an 28 Eanáir 2021 a chur san áireamh ar úsáid na teicníce “sárfhuarú” mar a thugtar uirthi chun táirgí iascaigh úra a iompar (5).

(5)

I gcomhréir le Roinn VIII, Caibidil III, Cuid A, in Iarscríbhinn III a ghabhann le Rialachán (CE) Uimh. 853/2004, tá táirgí iascaigh úra le stóráil faoi oighear i saoráidí iomchuí agus déanfar athoighriú a mhinice agus is gá. Thairis sin, féadfar táirgí iascaigh úra iomlána agus dí-innithe a iompar agus a stóráil in uisce fuaraithe go dtí go mbaineann siad amach an chéad bhunaíocht ar talamh a dhéanann aon ghníomhaíocht seachas iompar nó sórtáil.

(6)

D’iarr oibreoirí gnólachta bia a oibríonn in earnáil na dtáirgí iascaigh go leasófaí Iarscríbhinn III a ghabhann le Rialachán (CE) Uimh. 853/2004 chun táirgí iascaigh úra iomlána agus dí-innithe a iompar in uisce fuaraithe a cheadú tar éis dóibh an chéad bhunaíocht ar talamh a bhaint amach. Ba cheart an t-iompar seo a dhéanamh i “dtobáin”, is é sin boscaí poileitiléine trí-chiseal, a líontar le huisce agus le hoighear.

(7)

An 19 Márta 2020, ghlac EFSA Tuairim Eolaíochta ar úsáid tobán chun táirgí iascaigh úra a iompar agus a stóráil (6). Sa Tuairim sin, tháinig EFSA ar an gconclúid nach bhfuil aon difríocht suntasach don tsláinte phoiblí idir stóráil agus iompar táirgí iascaigh úra i gcomhréir leis na ceanglais a leagtar síos i Roinn VIII, Caibidil III, Cuid A, d’Iarscríbhinn III a ghabhann le Rialachán (CE) Uimh. 853/2004 agus úsáid tobán, agus thug sé roinnt moltaí maidir lena n-úsáid. Ba cheart Iarscríbhinn III a ghabhann le Rialachán (CE) Uimh. 853/2004 a leasú, dá bhrí sin, chun táirgí iascaigh úra iomlána agus dí-innithe a iompar in uisce agus in oighear a cheadú tar éis dóibh an chéad bhunaíocht ar talamh a bhaint amach a dhéanann aon ghníomhaíocht eile seachas iompar agus sórtáil.

(8)

Le Roinn VIII, Caibidil VIII, d’Iarscríbhinn III a ghabhann le Rialachán (CE) Uimh. 853/2004 leagtar síos rialacha mionsonraithe maidir le táirgí iascaigh a iompar. Go háirithe, ní mór táirgí iascaigh úra a choinneáil, agus iad á n-iompar, ag teocht atá gar do leátheocht oighir agus ní mór táirgí iascaigh reoite a choinneáil le linn iompair ag teocht nach mó ná – 18 °C i ngach cuid den táirge, agus seans go mbeadh luaineachtaí gearra aníos nach mó iad ná 3 °C ann.

(9)

An 10 Nollaig 2020, ghlac EFSA Tuairim Eolaíochta ar úsáid na teicníce “sárfhuarú” mar a thugtar uirthi chun táirgí iascaigh úra a iompar (7). Sa Tuairim sin, rinne EFSA comparáid idir teocht táirgí iascaigh úra sárfhuaraithe i mboscaí gan oighear, agus táirgí atá faoi réir an chleachtais údaraithe atá i bhfeidhm faoi láthair i mboscaí le hoighear. Tháinig EFSA ar an gconclúid, faoi choinníollacha iomchuí, nach bhfuil aon difríocht ó thaobh na sláinte poiblí de idir na teochtaí traidisiúnta iompair agus na teicnící sárfhuaraithe. A mhéid a bhaineann le modhanna anailíse lenar féidir cé acu a chuirtear, nó nach gcuirtear, iasc a reoitear roimhe seo i láthair go tráchtála mar iasc sárfhuaraithe a bhrath, d’aithin EFSA cúig mhodh a d’fhéadfaí a mheas a bheith oiriúnach dá gcuspóir. Ba cheart, dá bhrí sin, úsáid na teicníce sárfhuaraithe a cheadú faoi choinníollacha áirithe chun táirgí iascaigh úra a iompar dá dtagraítear i Roinn VIII, Caibidil VIII, pointe 1, d’Iarscríbhinn III a ghabhann le Rialachán (CE) Uimh. 853/2004.

(10)

Le Roinn X, Caibidil I, in Iarscríbhinn III a ghabhann le Rialachán (CE) Uimh. 853/2004 leagtar síos rialacha sláinteachais chun uibheacha a tháirgeadh. Is é Salmonella Enteritidis, an phríomhphataigin a bhfuil baol mór ann maidir le galair ubh-iompartha san Aontas, agus bíonn tionchar dearfach ag an teocht le linn stórála agus iompair uibheacha ar a fhás in uibheacha. Toisc nach bhfuil aon cheanglais ann i mórán Ballstát maidir le coinníollacha ama agus coinníollacha teochta le linn stórála agus iompair uibheacha, tá sé tábhachtach go ndéanfaí “dáta íosmharthanachta”, mar a shainmhínítear in Airteagal 2(2), pointe (r), de Rialachán (AE) Uimh. 1169/2011 ó Pharlaimint na hEorpa agus ón gComhairle (8) maidir le huibheacha a leagan síos i Rialachán (CE) Uimh. 853/2004, chun bunús aonfhoirmeach a sholáthar do na tomhaltóirí deiridh chun roghanna eolasacha a dhéanamh agus an úsáid is sábháilte a bhaint as a gcuid bia. I dTuairim EFSA an 10 Iúil 2014 maidir leis na rioscaí sláinte poiblí a bhaineann le huibheacha boird mar gheall ar mheathlú agus mar gheall ar fhorbairt pataiginí (9) tagtar ar an gconclúid gur cheart dáta ar fearr roimhe d’uibheacha a bheireann cearca an speicis Gallus gallus a shocrú ag 28 lá ar a mhéad, mar go dtiocfaidh méadú ar an riosca coibhneasta tinnis as aon mhéadú ar sheilfré na n-uibheacha sin thar 28 lá. Is é an ceanglas atá i bhfeidhm faoi láthair a leagtar síos i Roinn X, Caibidil I, d’Iarscríbhinn III a ghabhann le Rialachán (CE) Uimh. 853/2004 go ndéanfar uibheacha a sheachadadh don tomhaltóir laistigh de 21 lá ar a mhéad ón uair a bheirtear iad agus is caighdeán margaíochta é seo a bhfuil tionchar teoranta aige ar shábháilteacht na n-uibheacha agus é ag rannchuidiú le cur amú bia ag leibhéal miondíola. Leis an tréimhse sin a mhéadú ó 21 lá go 28 lá, laghdódh go mór an cur amú bia sin, go háirithe maidir le huibheacha a bheireann cearca an speicis Gallus gallus mar go mbainfí na huibheacha sin óna ndíol an tráth céanna agus a rachadh a ndáta ar fearr roimhe in éag.

(11)

Le Roinn XVI d’Iarscríbhinn III a ghabhann le Rialachán (CE) Uimh. 853/2004, leagtar síos ceanglais shonracha maidir le táirgí an-mhínphróiseáilte áirithe a ceapadh lena gcaitheamh ag an duine a tháirgeadh i gcás ina gcuirtear deireadh le haon riosca ar shláinte phoiblí nó sláinte ainmhithe a bhuí le cóireáil ar an amhábhar. Tá díorthaigh shaille áirithe, amhail colaistéaról agus Vitimín D3 a dhíorthaítear ó úsc olla, faoi réir cóireálacha sonracha freisin a chuireann deireadh le rioscaí den sórt sin agus ba cheart, dá bhrí sin, iad a mheas mar tháirgí an-mhínphróiseáilte.

(12)

Úsáidtear blastáin i mbia i gcomhréir le Rialachán (CE) Uimh. 1334/2008 ó Pharlaimint na hEorpa agus ón gComhairle (10). Sa mhodh monaraíochta a bhaineann leo, cuimsítear próiseas casta fisiceach, einsímeach nó micribhitheolaíoch a chuireann deireadh, ar bhonn na fianaise eolaíche atá ar fáil, le haon riosca ar shláinte phoiblí nó le riosca ar shláinte ainmhithe. Ba cheart, dá bhrí sin, blastáin a dhíorthaítear ó tháirgí de bhunadh ainmhíoch a mheas mar tháirgí an-mhínphróiseáilte.

(13)

Dá bhrí sin, ba cheart Iarscríbhinn III a ghabhann le Rialachán (CE) Uimh. 853/2004 a leasú dá réir.

(14)

Leagtar síos le Rialachán Tarmligthe (AE) 2019/624 ón gCoimisiún (11) rialacha sonracha maidir le feidhmíocht na rialuithe oifigiúla dá dtagraítear in Airteagal 18(1) de Rialachán (AE) 2017/625. Go háirithe, baineann Airteagal 1, pointe (v), agus Airteagal 11 den Rialachán Tarmligthe sin le rialacha maidir le maoluithe ar Airteagal 18(6) de Rialachán (AE) 2017/625 maidir le haicmiú limistéar táirgthe agus athsheachadta i ndáil le Pectinidae, gastrapóid mhuirí agus súmairí cladaigh. Le hAirteagal 18 de Rialachán (AE) 2017/625, arna leasú le Rialachán (AE) 2021/1756, leathnaítear an fhéidearthacht le haghaidh maoluithe ar an gceanglas maidir leis na limistéir táirgthe agus athsheachadta a aicmiú chuig gach eicínideirmeach nach scagbheathóirí iad, agus ní chuig súmairí cladaigh amháin. Dá réir sin, ba cheart Rialachán Tarmligthe (AE) 2019/624 a leasú ionas nach mbeidh gá le haicmiú limistéar táirgthe agus athsheachadta i ndáil le buaint eicínideirmeach nach scagbheathóirí iad.

(15)

Ba cheart Rialachán (CE) Uimh. 853/2004 agus Rialachán Tarmligthe (AE) 2019/624 a leasú in aon Rialachán Tarmligthe amháin, mar go bhfuil roinnt de na leasuithe atá le déanamh orthu nasctha leis na leasuithe a rinneadh le déanaí ar Rialachán (AE) 2017/625 le Rialachán (AE) 2021/1756. Ina theannta sin, is de chineál coimhdeach é an leasú atá le déanamh ar Rialachán Tarmligthe (AE) 2019/624 maidir le heicínideirmigh, mar nach bhfuil ann ach ailíniú le leasú a rinneadh ar Rialachán (AE) 2017/625 le Rialachán (AE) 2021/1756. Thairis sin, ar mhaithe le comhsheasmhacht rialacha an Aontais, ba cheart éifeacht a bheith ag na leasuithe atá le déanamh ar Rialachán (CE) Uimh. 853/2004 agus ar Rialachán Tarmligthe (AE) 2019/624 ar an dáta céanna.

(16)

Ba cheart, dá bhrí sin, Rialachán (CE) Uimh. 853/2004 agus Rialachán Tarmligthe (AE) 2019/624 a leasú dá réir sin,