Strument ta’ Appoġġ Tekniku tal-UE (2021–2027)

PUNTI EWLENIN

• L-Istrument ta’ Appoġġ Tekniku (IAT) jibni fuq il-Programm ta’ Appoġġ għal Riformi Strutturali (PARS) kurrenti mwaqqaf mir-Regolament (UE) 2017/825 (ara s-sommarju).
• L-IAT jikkontribwixxi għall-implimentazzjoni tal-Patt Ekoloġiku Ewropew (ara s-sommarju) u jappoġġa l-isforzi tal-Istati Membri biex jimplimentaw dawn l-objettivi politiċi ħalli jiffaċilitaw tranżizzjonijiet diġitali u soċjalment inklussivi u ekoloġiċi, skont:
  • il- Ftehim ta’ Pariġi dwar it-tibdil fil-klima;
  • il-miri tal-UE tal-2030 dwar il-klima u l-enerġija u l-mira tal-2050 dwar in-newtralità tal-klima;
  • l-Għanijiet tal-Iżvilupp Sostenibbli tan-Nazzjonijiet Uniti;
  • il-Pilastru Ewropew tad-Drittijiet Soċjali.

Objettivi

Biex jippromwovu l-koeżjoni ekonomika, soċjali u territorjali tal-UE billi jgħinu l-Istati Membri jimplimentaw ir-riformi, ir-regolament għandu l-għan li jassisti l-awtoritajiet nazzjonali biex itejbu l-kapaċità tagħhom sabiex:

• ifasslu, jiżviluppaw u jimplimentaw ir-riformi;
• jippreparaw, jemendaw, jimplimentaw u jirrevedu pjanijiet ta’ rkupru u reżiljenza skont ir-Regolament (UE) 2021/241 li jistabbilixxi l-Faċilità ta’ Rkupru u Reżiljenza (ara s-sommarju).

Kamp ta’ applikazzjoni

L-objettivi speċifiċi jirreferu għal għadd ta’ oqsma ta’ politika b’enfażi speċifika fuq azzjonijiet li jsawru t-tranżizzjonijiet diġitali, ġusti u ekoloġiċi. Dawn jinkludu:

• l-immaniġġjar pubbliku finanzjarju u ta’ assi, il-proċess tal-baġit, inkluż baġit ekoloġiku u skont il-ġeneri, qafas makro-fiskali, il-maniġment ta’ dejn u flus kontanti, in-nefqa u l-politika tat-tassazzjoni;
• riformi istituzzjonali, is-simplifikazzjoni ta’ regoli u proċeduri, ir-riformi tas-sistemi tal-ġustizzja, it-tisħiħ ta’ superviżjoni finanzjarja u r-rinfurzar tal-ġlieda kontra l-frodi, il-korruzzjoni u l-ħasil tal-flus;
• l-ambjent tan-negozju, l-industrijalizzazzjoni mill-ġdid u r-rilokazzjoni tal-produzzjoni lejn l-UE, l-iżvilupp sostenibbli settorjali u l-appoġġ għar-riċerka, l-innovazzjoni u d-diġitalizzazzjoni;
• l-edukazzjoni, it-tagħlim u t-taħriġ tul il-ħajja, l-edukazzjoni u t-taħriġ vokazzjonali, il-politiki taż-żgħażagħ , il-politiki dwar is-suq tax-xogħol, it-taħriġ mill-ġdid u mtejjeb b’mod partikolari l-ħiliet diġitali, il-litteriżmu dwar il-midja, l-inklużjoni soċjali u l-ġlieda kontra l-faqar, l-inugwaljanzi fid-dħul u kull forma ta’ diskiriminazzjoni;
• il-kura tas-saħħa pubblika, sistemi tas-sigurtà soċjali, il-kura u l-benesseri u l-kura tat-tfal aċċessibbli, affordabbli u reżiljenti;
• politiki għall-mitigazzjoni tat-tibdil fil-klima, tranżizzjonijiet diġitali, ġusti u ekoloġiċi, tagħlim elettroniku, l-użu ta’ intelliġenza artifiċjali, it-trasport u l-mobilità, l-indirizzar tal-faqar fl-enerġija u l-iżgurar tas-sigurtà tal-enerġija, il-protezzjoni tal-ħamrija u l-bijodiversità, is-sajd u l-iżvilupp sostenibbli ta’ żoni rurali, remoti u insulari;
• il-politiki u r-regolamenti tas-settur finanzjarju, inkluż il-litteriżmu finanzjarju, l-istabbiltà finanzjarja, l-aċċess għall-finanzi u s-self għall-ekonomija reali, partikolarment għall-intrapriżi żgħar u ta’ daqs medju, persuni li jaħdmu għal rashom u l-imprendituri;
• il-produzzjoni, il-provvista u l-monitoraġġ tal-kwalità tad-data u l-istatistika;
• il-preparazzjoni għas-sħubija fiż-żona tal-euro;
• sejbien bikri ta’ u rispons ikkoordinat għal riskji sostanzjali tas-saħħa pubblika jew tas-sigurtà, kif ukoll l-assigurazzjoni tal-kontinwità tan-negozju u tas-servizz għal istituzzjonijiet u setturi essenzjali pubbliċi u privati.

Appoġġ tekniku

Biex jikseb l-oġġettivi tar-regolament, l-istrument ser jiffinanzja għadd ta’ tipi ta’ azzjonijiet li jinkludu, imma mhumiex limitati għal:

• provvista ta’ kompetenza relatata ma’ pariri politiċi, tibdil tal-politika, formulazzjoni ta’ strateġiji u pjan direzzjonali ta’ riformi kif ukoll għal riformi leġiżlattivi, istituzzjonali, strutturali u amministrattivi;
• provvista ta’ esperti għal perjodu ta’ żmien qasir jew twil, inkluż esperti residenti biex iwettqu dmirijiet f’oqsma speċifiċi jew biex iwettqu attivitajiet operazzjonali;
• bini tal-kapaċità istituzzjonali, amministrattiva jew settorjali u azzjonijiet ta’ appoġġ relatat f’kull livell ta’ governanza, li jikkontribwixxi wkoll għat-tisħiħ tal- organizzazzjonijiet tas-soċjetà ċivili;
• organizzazzjoni ta’ appoġġ lokali operazzjonali fl-oqsma bħall-ażil, il-migrazzjoni u l-kontroll fuq il-fruntiera;
• it-twettiq ta’ studji, inkluż studji ta’ fattibilità, riċerka, analiżi u stħarriġ, evalwazzjonijiet u valutazzjoni tal-impatt.

Stati Membri li jixtiequ jirċievu appoġġ tekniku għandhom jissottomettu talba għal dan lill-Kummissjoni billi jidentifikaw l-oqsma ta’ politika u l-prioritajiet.

Baġit

• Il-baġit għall-istrument għall-perjodu 1 ta’ Jannar 2021–31 ta’ Diċembru 2027 huwa EUR 864 miljun fi prezzijiet kurrenti.
• L-Istati Membri jistgħu jittrasferixxu riżorsi addizzjonali lill-baġit tal-istrument biex jiffinanzjaw azzjonijiet eliġibbli għall-appoġġ tekniku li mbagħad jiġu użati esklussivament għall-benefiċċju ta’ dak l-Istat Membru kkonċernat.