Regolament

Regolamenti huma atti legali definiti mill-Artikolu 288 tat-Trattat dwar il-Funzjonament tal-Unjoni Ewropea (TFEU). Għandhom applikazzjoni ġenerali, huma vinkolanti fl-intier tagħhom u huma direttament applikabbli fl-Istati Membri kollha tal-Unjoni Ewropea (UE). Regolament huwa parti mil-liġi sekondarja tal-UE, il-korp tal-liġi li joħroġ mill-prinċipji u l-għanijiet stabbiliti fit-trattati tal-UE (il-liġi primarja).

Regolament huwa indirizzat lil kategoriji astratti ta’ persuni, mhux lil persuni identifikati. Dan huwa dak li jiddistingwih minn deċiżjoni, definita fl-Artikolu 288 tat-TFUE. Huwa vinkolanti fl-intier tiegħu.

Regolament irid jiġi rrispettat b’mod sħiħ minn dawk li japplika għalihom. Huwa att legali vinkolanti fuq:

• l-istituzzjonijiet tal-UE;
• l-Istati Membri tal-UE;
• l-individwi li japplika għalihom.

Regolament huwa direttament applikabbli fl-Istati Membri tal-UE. Dan ifisser li huwa:

• japplika immedjatament bħala n-norma fl-Istati Membri kollha tal-UE, mingħajr il-ħtieġa li jiġi traspost f’liġi nazzjonali;
• joħloq drittijiet u obbligi għall-individwi u, għalhekk, dawn jistgħu jinvokawh direttament quddiem il-qrati nazzjonali;
• jista’ jintuża bħala referenza minn individwi fir-relazzjoni tagħhom ma’ individwi oħrajn, Stati Membri tal-UE jew awtoritajiet tal-UE.

Regolament huwa applikabbli fl-Istati Membri tal-UE mid-data tad-dħul fis-seħħ tiegħu (data stabbilita minnu jew, fin-nuqqas ta’ dan, 20 jum wara l-pubblikazzjoni tiegħu fil-Ġurnal Uffiċjali tal-UE). L-effetti legali tiegħu huma vinkolanti b’mod simultanju, awtomatiku u uniformi fil-leġiżlazzjonijiet nazzjonali kollha.

Skont l-Artikolu 290 tat-TFUE, il-Kummissjoni Ewropea tista’ tadotta regolamenti delegati sabiex tispeċifika jew tikkomplementa ċerti dettalji jew aspetti ta’ regolament jew direttiva tal-UE.

Skont l-Artikolu 291 tat-TFUE, il-Parlament Ewropew u l-Kunsill jistgħu jawtorizzaw lill-Kummissjoni tadotta regolamenti biex jiġi żgurat li l-leġiżlazzjoni tiġi implimentata bl-istess mod fl-UE kollha.