(1)

Le Cinneadh (AE) 2021/1072 ón gComhairle (1), tugadh isteach maolú sealadach ar Airteagail 2, 3 agus 4 de Chinneadh 2013/471/AE ón gComhairle (2) a mhéid a bhaineann le liúntais laethúla a íoc agus speansais taistil a aisíoc le comhaltaí Choiste Eacnamaíoch agus Sóisialta na hEorpa (‘an Coiste’) agus lena gcomhaltaí malartacha (dá ngairtear le chéile ‘na tairbhithe’), lena dtugtar teidlíocht do thairbhithe a chianfhreastalaíonn ar chruinnithe trí mhéan leictreonach ar liúntas laethúil.

(2)

Measadh go raibh gá leis an maolú sealadach chun a ráthú go bhféadfaí gníomhaíochtaí an Choiste a dhéanamh ar bhealach iomchuí agus inbhuanaithe i gcónaí chun leanúnachas institiúideach a áirithiú ar feadh thréimhse na ndeacrachtaí leanúnacha taistil nó na srianta leanúnacha sláintíochta ar chruinnithe fisiciúla a chruthaigh paindéim COVID-19 san Aontas.

(3)

Léiríodh sna tuarascálacha a thíolaic an Coiste maidir le cur i bhfeidhm an mhaolaithe shealadaigh na sochair bhuiséadacha agus chomhshaoil maidir le liúntas laethúil a bheith ag na tairbhithe a chianfhreastalaíonn ar chruinnithe trí mheán leictreonach chomh maith leis na buntáistí agus na gnóthachain éifeachtúlachta a bhaineann le leanúnachas institiúideach agus gnó an Choiste. Tá na sochair sin fós ábhartha beag beann ar chásanna nach mbaineann le deacrachtaí taistil a d’eascair as paindéim COVID-19 san Aontas, mar a léirítear san iarraidh ón gCoiste ar an gComhairle ar réiteach struchtúrach lena bhféadfaí liúntas laethúil a dheonú do thairbhithe a chianfhreastalaíonn ar chineálacha áirithe cruinnithe den Choiste trí mheán leictreonach.

(4)

Is iomchuí, dá bhrí sin, réiteach struchtúrach a chur in ionad an mhaolaithe shealadaigh a thugtar isteach le Cinneadh (AE) 2021/1072, réiteach lena bhféadfaí liúntas laethúil a dheonú do thairbhithe a chianfhreastalaíonn trí mheán leictreonach ar na cruinnithe sin arna n-údarú go cuí i gcomhréir le rialacha inmheánacha an Choiste, cé is moite de chruinnithe den Bhiúró, seisiúin iomlánacha an Tionóil, cruinnithe de rannóga agus den Choimisiúin Chomhairleach um Athruithe Tionsclaíoch. Is iomchuí freisin, i gcás imthosca eisceachtúla a bhfuil údar cuí leo, i gcás nach féidir cruinnithe an Choiste a eagrú go hiomlán agus na baill a bheith i láthair go fisiciúil, an liúntas laethúil do na tairbhithe i gcomhair cianfhreastail trí mheán leictreonach a dheonú i ndáil le aon cruinniú eile arna údarú go cuí den Choiste a bhfuil bunriachtanach chun leanúnachas institiúideach agus gnó an Choiste a ráthú.

(5)

Is ísle na costais riaracháin iarbhír a thabhaíonn tairbhí a chianfhreastalaíonn ar chruinniú trí mheán leictreonach ná ráta an liúntais laethúil is infheidhme faoi láthair maidir le freastal go fisiciúil ar chruinnithe, bíodh is gur mar a chéile an t-achar ama a chaitheann tairbhí ag an gcruinniú. Ós mar sin atá, is iomchuí go n-oiriúnófaí dá réir an liúntas laethúil a dheonaítear leis na tairbhithe a dhéanann cianfhreastal ar chruinnithe.

(6)

Ba cheart don Choiste rialacha mionsonraithe a leagan síos maidir le deonú an liúntais laethúil do thairbhithe a chianfhreastalaíonn cruinnithe trí mheán leictreonach, d’fhonn na tairbhí a eascraíonn as cianfhreastal a uasmhéadú agus, ag an am céanna, a áirithiú nach bhfuil méadú gan údar ar líon na gcruinnithe a eagraíonn an Coiste.

(7)

Ba cheart don Choiste tuarascálacha rialta a chur faoi bhráid na Comhairle maidir le cur i bhfeidhm an liúntais laethúil do thairbhithe a chianfhreastalaíonn ar chruinnithe trí mheán leictreonach ionas gur féidir leis an gComhairle meastóireacht a dhéanamh ar a thionchar sin, i gcomhréir leis na ceanglais tuairiscithe mar a leagtar amach i gCinneadh 2013/471/AE iad. Ba cheart a léiriú sna tuarascálacha sin, go háirithe, an fhorbairt ar líon na gcruinnithe a chianfhreastail an Coiste orthu trí mheán leictreonach agus an fad a mhair siad, agus an choigilt bhuiséadach agus chomhshaoil a bhaineann leis na cruinnithe sin.

(8)

Ba cheart an Cinneadh seo a chur san áireamh in athbhreithniú cuimsitheach arna dhéanamh amach anseo ar Chinneadh 2013/471/AE, roimh dheireadh théarma oifige reatha an Choiste.

(9)

Ba cheart do Chinneadh (AE) 2021/1072 a aisghairm,