1.1

L-Artikolu 3(3) TUE, l-Artikoli 11 u 191 TFUE u għall-politika tal-UE dwar l-ambjent u tibdil fil-klima. Ir-rekwiżit ta’ ritorn għaċ-ċentru operattiv jirriżulta fiż-żieda ta’ vetturi mhux mgħobbija fit-toroq Ewropej, kif ukoll fiż-żieda tal-kwantità ta’ emissjonijiet CO2 u tniġġis ambjentali. Meta l-istituzzjonijiet tal-UE adottaw id-dispożizzjoni kkontestata, huma ma kkunsidrawx il-miżuri relatati mal-politika tal-UE dwar l-ambjent u tibdil fil-klima, b’mod partikolari tar-rekwiżiti relatati mal-protezzjoni tal-ambjent u tal-għanijiet ta’ protezzjoni tal-ambjent promossi mill-Patt Ekoloġiku Ewropew u kkonfermati mill-Kunsill Ewropew;

1.2

L-Artikolu 26 TFUE u l-prinċipju ġenerali ta’ nondiskriminazzjoni. Id-dispożizzjoni kkontestata hija miżura protettiva li permezz tagħha huwa maqsum is-suq tat-trasport tal-UE, il-kompetizzjoni hija ristretta u hija stabbilita sistema diskriminatorja fir-rigward ta’ operaturi tat-trasport fl-Istati Membri li jinsabu fil-marġni ġeografiċi tal-Unjoni Ewropea (Stati Membri periferali). Permezz ta’ din id-dispożizzjoni, is-settur internazzjonali tat-trasport bit-triq huwa wkoll suġġett għal diskriminazzjoni meta mqabbel ma’ setturi oħra tat-trasport;

1.3

L-Artikoli 91(2) and 94 TFUE. L-istituzzjonijiet tal-UE kellhom jikkunsidraw il-fatt li d-dispożizzjoni kkontestata ser ikollha impatt partikolarment sinjifikattiv fuq il-livell tal-għajxien u fuq il-livell tal-impjieg fl-Istati Membri periferali tal-Unjoni Ewropea u ser ikollha impatt partikolarment negattiv fuq is-sitwazzjoni ekonomika tal-operaturi tat-trasport stabbiliti fil-periferija; l-istituzzjonijiet tal-UE, madankollu, naqsu milli jaqdu dan id-dmir;

1.4

Il-prinċipji ta’ proċedura leġiżlattiva soda, sa fejn id-dispożizzjoni kkontestata ġiet adottata mingħajr l-ebda evalwazzjoni tal-impatt tagħha u mingħajr eżami xieraq tal-konsegwenzi soċjali u ekonomiċi u tal-effett tagħha fuq l-ambjent;

1.5

Il-prinċipju ta’ proporzjonalità, sa fejn ir-rekwiżit fiss għar-ritorn regolari ta’ vetturi huwa miżura manifestament sproporzjonata u inadegwata għat-twettiq tal-għan iddikjarat b’mod pubbliku, jiġifieri dak tal-ġlieda kontra l-hekk imsejħa “kumpanniji fantażma”.

2.1

L-Artikolu 3(3) TUE u l-Artikoli 11 u 191 TFUE, minħabba li l-perijodu obbligatorju ta’ erbat ijiem għall-waqfien mill-attività wara operazzjoni ta’ kabotaġġ jirriżulta fiż-żieda tal-fluss ta’ trasport tan-numru ta’ vetturi mhux mgħobbija fit-toroq tal-Unjoni Ewropea, kif ukoll fiż-żieda tal-kwantità ta’ emissjonijiet CO2 u tniġġis ambjentali. Għalhekk id-dispożizzjoni kkontestata tmur kontra r-rekwiżit, ikkonfermat mit-Trattati, li, fl-implimentazzjoni tal-politika ta’ transport tal-Unjoni Ewropea, għandhom jittieħdu inkunsiderazzjoni r-rekwiżiti ta’ protezzjoni ambjentali u l-għanijiet tal-Patt Ekoloġiku Ewropew;

2.2

L-Artikolu 26 TFUE u l-prinċipju ta’ nondiskriminazzjoni. Il-perijodu ta’ erbat ijiem stabbilit għall-waqfien mill-attività wara operazzjoni ta’ kabotaġġ joħloq restrizzjonijiet għall-operat tas-suq intern u għall-effiċjenza tal-katina loġistika. It-tqassim tas-suq tat-trasport tal-merkanzija bit-triq ħoloq diskriminazzjoni fir-rigward ta’ Stati Membri żgħar u fir-rigward ta’ dawk li jinsabu fil-periferija tal-Unjoni Ewropea, filwaqt li jagħti vantaġġ illegali u mhux iġġustifikat lill-Istati Membri kbar u ċentrali tal-UE esklużivament minħabba l-pożizzjoni ġeografika tagħhom;

2.3

L-Artikoli 91(2) u 94 TFUE, sa fejn id-deċiżjoni kkontestata ġiet adottata mingħajr teħid inkunsiderazzjoni tal-konsegwenzi għas-sitwazzjoni ekonomika tat-trasportaturi tal-merkanzija mill-Istati Membri żgħar u ta’ dawk mill-periferija tal-Unjoni Ewropea u għal-livell tal-għajxien u għal-livell tal-impjieg f’dawn l-Istati Membri;

2.4

Il-prinċipji ta’ proċedura leġiżlattiva soda, sa fejn id-dispożizzjoni kkontestata ġiet adottata mingħajr l-ebda evalwazzjoni tal-impatt tagħha u mingħajr eżami xieraq tal-konsegwenzi soċjali u ekonomiċi u tal-effett tagħha fuq l-ambjent;

2.5

Il-prinċipju ta’ proporzjonalità, sa fejn il-perijodu ta’ erbat ijiem stabbilit għall-waqfien mill-attività wara operazzjoni ta’ kabotaġġ huwa miżura sproporzjonata fir-rigward tal-għanijiet intiżi ta’ kjarifika tal-prinċipji li jirregolaw il-kabotaġġ u ta’ estenzjoni tal-effettività tal-implimentazzjoni tagħhom.